5. хаттхакасуттам̣

128. екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо хаттхако девапутто абхикканта̄йа раттийа̄ абхиккантаван̣н̣о кевалакаппам̣ джетаванам̣ обха̄сетва̄ йена бхагава̄ тенупасан̇ками; упасан̇камитва̄ – ‘‘бхагавато пурато т̣хасса̄мӣ’’ти осӣдатимева сам̣сӣдатимева [осӣдати чева сам̣сӣдати ча (сӣ. пӣ.), осӣдати сам̣сӣдати (сйа̄. кам̣.)], на саккоти сан̣т̣ха̄тум̣. сеййатха̄пи на̄ма саппи ва̄ телам̣ ва̄ ва̄лука̄йа а̄ситтам̣ осӣдатимева сам̣сӣдатимева, на сан̣т̣ха̄ти; евамевам̣ хаттхако девапутто – ‘‘бхагавато пурато т̣хасса̄мӣ’’ти осӣдатимева сам̣сӣдатимева, на саккоти сан̣т̣ха̄тум̣.

атха кхо бхагава̄ хаттхакам̣ девапуттам̣ етадавоча – ‘‘ол̣а̄рикам̣, хаттхака, аттабха̄вам̣ абхиниммина̄хӣ’’ти. ‘‘евам̣, бханте’’ти, кхо хаттхако девапутто бхагавато пат̣иссутва̄ ол̣а̄рикам̣ аттабха̄вам̣ абхинимминитва̄ бхагавантам̣ абхива̄детва̄ екамантам̣ ат̣т̣ха̄си. екамантам̣ т̣хитам̣ кхо хаттхакам̣ девапуттам̣ бхагава̄ етадавоча –

‘‘йе те, хаттхака, дхамма̄ пуббе мануссабхӯтасса паваттино ахесум̣, апи ну те те дхамма̄ етарахи паваттино’’ти? ‘‘йе ча ме, бханте, дхамма̄ пуббе мануссабхӯтасса паваттино ахесум̣, те ча ме дхамма̄ етарахи паваттино; йе ча ме, бханте, дхамма̄ пуббе мануссабхӯтасса наппаваттино ахесум̣, те ча ме дхамма̄ етарахи паваттино. сеййатха̄пи, бханте, бхагава̄ етарахи а̄кин̣н̣о вихарати бхиккхӯхи бхиккхунӣхи упа̄сакехи упа̄сика̄хи ра̄джӯхи ра̄джамаха̄маттехи титтхийехи титтхийаса̄вакехи; евамевам̣ кхо ахам̣, бханте, а̄кин̣н̣о вихара̄ми девапуттехи. дӯратопи, бханте, девапутта̄ а̄гаччханти хаттхакасса девапуттасса сантике ‘дхаммам̣ сосса̄ма̄’ти. тин̣н̣а̄хам̣, бханте, дхамма̄нам̣ атитто аппат̣ива̄но ка̄лан̇като. катамесам̣ тин̣н̣ам̣? бхагавато ахам̣, бханте, дассанасса атитто аппат̣ива̄но ка̄лан̇като; саддхаммасаванасса̄хам̣, бханте, атитто аппат̣ива̄но ка̄лан̇като; сан̇гхасса̄хам̣, бханте, упат̣т̣ха̄насса атитто аппат̣ива̄но ка̄лан̇като. имесам̣ кхо ахам̣, бханте, тин̣н̣ам̣ дхамма̄нам̣ атитто аппат̣ива̄но ка̄лан̇като’’ти.

‘‘на̄хам̣ бхагавато дассанасса, титтимаджджхага̄ [титти титтисамбхавам̣ (ка.)] куда̄чанам̣;

сан̇гхасса упат̣т̣ха̄насса, саддхаммасаванасса ча.

‘‘адхисӣлам̣ сиккхама̄но, саддхаммасаване рато;

тин̣н̣ам̣ дхамма̄нам̣ атитто, хаттхако авихам̣ гато’’ти. пан̃чамам̣;