10. лекхасуттам̣

133. ‘‘тайоме, бхиккхаве, пуггала̄ санто сам̣виджджама̄на̄ локасмим̣. катаме тайо? па̄са̄н̣алекхӯпамо пуггало, патхавилекхӯпамо пуггало, удакалекхӯпамо пуггало. катамо ча, бхиккхаве, па̄са̄н̣алекхӯпамо пуггало? идха, бхиккхаве, екаччо пуггало абхин̣хам̣ куджджхати. со ча кхвасса кодхо дӣгхараттам̣ анусети. сеййатха̄пи, бхиккхаве, па̄са̄н̣е лекха̄ на кхиппам̣ луджджати ва̄тена ва̄ удакена ва̄, чират̣т̣хитика̄ хоти; евамевам̣ кхо, бхиккхаве, идхекаччо пуггало абхин̣хам̣ куджджхати. со ча кхвасса кодхо дӣгхараттам̣ анусети. айам̣ вуччати, бхиккхаве, па̄са̄н̣алекхӯпамо пуггало.

‘‘катамо ча, бхиккхаве, патхавилекхӯпамо пуггало? идха, бхиккхаве, екаччо пуггало абхин̣хам̣ куджджхати. со ча кхвасса кодхо на дӣгхараттам̣ анусети. сеййатха̄пи, бхиккхаве, патхавийа̄ лекха̄ кхиппам̣ луджджати ва̄тена ва̄ удакена ва̄, на чират̣т̣хитика̄ хоти; евамевам̣ кхо, бхиккхаве, идхекаччо пуггало абхин̣хам̣ куджджхати. со ча кхвасса кодхо на дӣгхараттам̣ анусети. айам̣ вуччати, бхиккхаве, патхавилекхӯпамо пуггало.

‘‘катамо ча, бхиккхаве, удакалекхӯпамо пуггало? идха, бхиккхаве, екаччо пуггало а̄га̄л̣хенапи вуччама̄но пхарусенапи вуччама̄но амана̄пенапи вуччама̄но сандхийатимева [… йева (сйа̄. кам̣.) … чева (пӣ.)] сам̣сандатимева [… йева (сйа̄. кам̣.) … чева (пӣ.)] саммодатимева [… йева (сйа̄. кам̣.) … чева (пӣ.)]. сеййатха̄пи, бхиккхаве, удаке лекха̄ кхиппам̣йева пат̣ивигаччхати, на чират̣т̣хитика̄ хоти; евамевам̣ кхо, бхиккхаве, идхекаччо пуггало а̄га̄л̣хенапи вуччама̄но пхарусенапи вуччама̄но амана̄пенапи вуччама̄но сандхийатимева сам̣сандатимева саммодатимева. айам̣ вуччати, бхиккхаве, удакалекхӯпамо пуггало. име кхо, бхиккхаве, тайо пуггала̄ санто сам̣виджджама̄на̄ локасми’’нти [пу. па. 115]. дасамам̣.

кусина̄равагго терасамо.