3. сарадасуттам̣

95. ‘‘сеййатха̄пи, бхиккхаве, сарадасамайе виддхе вигатавала̄хаке деве а̄диччо набхам̣ аббхуссаккама̄но [аббхуссуккама̄но (сӣ. пӣ.)] саббам̣ а̄ка̄сагатам̣ тамагатам̣ абхивихачча бха̄сате ча тапате ча вирочати ча.

‘‘евамевам̣ кхо, бхиккхаве, йато арийаса̄вакасса вираджам̣ вӣтамалам̣ дхаммачаккхум̣ уппаджджати [удапа̄ди (саббаттха)], саха дассануппа̄да̄, бхиккхаве, арийаса̄вакасса тӣн̣и сам̣йоджана̄ни пахӣйанти – сакка̄йадит̣т̣хи, вичикиччха̄, сӣлаббатапара̄ма̄со.

‘‘атха̄парам̣ двӣхи дхаммехи ниййа̄ти абхиджджха̄йа ча бйа̄па̄дена ча. со вивиччева ка̄мехи вивичча акусалехи дхаммехи савитаккам̣ савича̄рам̣ вивекаджам̣ пӣтисукхам̣ пат̣хамам̣ джха̄нам̣ упасампаджджа вихарати. тасмим̣ че, бхиккхаве, самайе арийаса̄вако ка̄лам̣ кареййа, наттхи там̣ [тасса (ка.)] сам̣йоджанам̣ йена сам̣йоджанена сам̣йутто арийаса̄вако пуна имам̣ [пунайимам̣ (сйа̄. кам̣. ка.)] локам̣ а̄гаччхеййа̄’’ти. татийам̣.