2. гадрабхасуттам̣

83. ‘‘сеййатха̄пи, бхиккхаве, гадрабхо гоган̣ам̣ пит̣т̣хито пит̣т̣хито анубандхо хоти – ‘ахампи даммо, ахампи даммо’ти [ахампи го амха̄ ахампи го амха̄ти (сӣ.), ахампи амха̄ ахампи амха̄ти (сйа̄. кам̣. пӣ.), ахампи го ахампи готи (?)]. тасса на та̄дисо ван̣н̣о хоти сеййатха̄пи гуннам̣, на та̄дисо саро хоти сеййатха̄пи гуннам̣, на та̄дисам̣ падам̣ хоти сеййатха̄пи гуннам̣. со гоган̣ам̣йева пит̣т̣хито пит̣т̣хито анубандхо хоти – ‘ахампи даммо, ахампи даммо’’’ти.

‘‘евамевам̣ кхо, бхиккхаве, идхекаччо бхиккху бхиккхусан̇гхам̣ пит̣т̣хито пит̣т̣хито анубандхо хоти – ‘ахампи бхиккху, ахампи бхиккхӯ’ти. тасса на та̄дисо чхандо хоти адхисӣласиккха̄сама̄да̄не сеййатха̄пи ан̃н̃есам̣ бхиккхӯнам̣, на та̄дисо чхандо хоти адхичиттасиккха̄сама̄да̄не сеййатха̄пи ан̃н̃есам̣ бхиккхӯнам̣, на та̄дисо чхандо хоти адхипан̃н̃а̄сиккха̄сама̄да̄не сеййатха̄пи ан̃н̃есам̣ бхиккхӯнам̣. со бхиккхусан̇гхам̣йева пит̣т̣хито пит̣т̣хито анубандхо хоти – ‘ахампи бхиккху, ахампи бхиккхӯ’’’ти.

‘‘тасма̄тиха, бхиккхаве, евам̣ сиккхитаббам̣ – ‘тиббо но чхандо бхависсати адхисӣласиккха̄сама̄да̄не, тиббо но чхандо бхависсати адхичиттасиккха̄сама̄да̄не, тиббо но чхандо бхависсати адхипан̃н̃а̄сиккха̄сама̄да̄не’ти. еван̃хи во, бхиккхаве, сиккхитабба’’нти. дутийам̣.