7. катха̄ваттхусуттам̣

68. ‘‘тӣн̣има̄ни, бхиккхаве, катха̄ваттхӯни. катама̄ни тӣн̣и? атӣтам̣ ва̄, бхиккхаве, аддха̄нам̣ а̄раббха катхам̣ катхеййа – ‘евам̣ ахоси атӣтамаддха̄на’нти. ана̄гатам̣ ва̄, бхиккхаве, аддха̄нам̣ а̄раббха катхам̣ катхеййа – ‘евам̣ бхависсати ана̄гатамаддха̄на’нти. етарахи ва̄, бхиккхаве, паччуппаннам̣ аддха̄нам̣ а̄раббха катхам̣ катхеййа – ‘евам̣ хоти етарахи паччуппаннамаддха̄на’’’нти [евам̣ етарахи паччуппаннанти (сӣ. пӣ. ка.), евам̣ хоти етарахи паччуппаннанти (сйа̄. кам̣.)].

‘‘катха̄сампайогена, бхиккхаве, пуггало ведитаббо йади ва̄ каччхо йади ва̄ акаччхоти. сача̄йам̣, бхиккхаве, пуггало пан̃хам̣ пут̣т̣хо сама̄но екам̣сабйа̄каран̣ӣйам̣ пан̃хам̣ на екам̣сена бйа̄кароти, вибхаджджабйа̄каран̣ӣйам̣ пан̃хам̣ на вибхаджджа бйа̄кароти, пат̣ипуччха̄бйа̄каран̣ӣйам̣ пан̃хам̣ на пат̣ипуччха̄ бйа̄кароти, т̣хапанӣйам̣ пан̃хам̣ на т̣хапети [тхапанӣйам̣ пан̃хам̣ на тхапети (ка.)], евам̣ санта̄йам̣, бхиккхаве, пуггало акаччхо хоти. саче пана̄йам̣, бхиккхаве, пуггало пан̃хам̣ пут̣т̣хо сама̄но екам̣сабйа̄каран̣ӣйам̣ пан̃хам̣ екам̣сена бйа̄кароти, вибхаджджабйа̄каран̣ӣйам̣ пан̃хам̣ вибхаджджа бйа̄кароти, пат̣ипуччха̄бйа̄каран̣ӣйам̣ пан̃хам̣ пат̣ипуччха̄ бйа̄кароти, т̣хапанӣйам̣ пан̃хам̣ т̣хапети, евам̣ санта̄йам̣, бхиккхаве, пуггало каччхо хоти.

‘‘катха̄сампайогена, бхиккхаве, пуггало ведитаббо йади ва̄ каччхо йади ва̄ акаччхоти. сача̄йам̣, бхиккхаве, пуггало пан̃хам̣ пут̣т̣хо сама̄но т̣ха̄на̄т̣ха̄не на сан̣т̣ха̄ти парикаппе на сан̣т̣ха̄ти ан̃н̃а̄тава̄де [ан̃н̃ава̄де (сӣ. сйа̄. кам̣. пӣ.), ан̃н̃а̄тава̄ре (ка.)] на сан̣т̣ха̄ти пат̣ипада̄йа на сан̣т̣ха̄ти, евам̣ санта̄йам̣, бхиккхаве, пуггало акаччхо хоти. саче пана̄йам̣, бхиккхаве, пуггало пан̃хам̣ пут̣т̣хо сама̄но т̣ха̄на̄т̣ха̄не сан̣т̣ха̄ти парикаппе сан̣т̣ха̄ти ан̃н̃а̄тава̄де сан̣т̣ха̄ти пат̣ипада̄йа сан̣т̣ха̄ти, евам̣ санта̄йам̣, бхиккхаве, пуггало каччхо хоти.

‘‘катха̄сампайогена, бхиккхаве, пуггало ведитаббо йади ва̄ каччхо йади ва̄ акаччхоти. сача̄йам̣, бхиккхаве, пуггало пан̃хам̣ пут̣т̣хо сама̄но ан̃н̃енан̃н̃ам̣ пат̣ичарати, бахиддха̄ катхам̣ апана̄мети, копан̃ча досан̃ча аппаччайан̃ча па̄тукароти, евам̣ санта̄йам̣, бхиккхаве, пуггало акаччхо хоти. саче пана̄йам̣, бхиккхаве, пуггало пан̃хам̣ пут̣т̣хо сама̄но на ан̃н̃енан̃н̃ам̣ пат̣ичарати на бахиддха̄ катхам̣ апана̄мети, на копан̃ча досан̃ча аппаччайан̃ча па̄тукароти, евам̣ санта̄йам̣, бхиккхаве, пуггало каччхо хоти.

‘‘катха̄сампайогена, бхиккхаве, пуггало ведитаббо йади ва̄ каччхо йади ва̄ акаччхоти. сача̄йам̣, бхиккхаве, пуггало пан̃хам̣ пут̣т̣хо сама̄но абхихарати абхимаддати анупаджаггхати [анусам̣джаггхати (ка.)] кхалитам̣ ган̣ха̄ти, евам̣ санта̄йам̣, бхиккхаве, пуггало акаччхо хоти. саче пана̄йам̣, бхиккхаве, пуггало пан̃хам̣ пут̣т̣хо сама̄но на̄бхихарати на̄бхимаддати на анупаджаггхати на кхалитам̣ ган̣ха̄ти, евам̣ санта̄йам̣, бхиккхаве, пуггало каччхо хоти.

‘‘катха̄сампайогена, бхиккхаве, пуггало ведитаббо йади ва̄ саупанисо йади ва̄ анупанисоти. анохитасото, бхиккхаве, анупанисо хоти, охитасото саупанисо хоти. со саупанисо сама̄но абхиджа̄на̄ти екам̣ дхаммам̣, париджа̄на̄ти екам̣ дхаммам̣, паджахати екам̣ дхаммам̣, саччхикароти екам̣ дхаммам̣. со абхиджа̄нанто екам̣ дхаммам̣, париджа̄нанто екам̣ дхаммам̣, паджаханто екам̣ дхаммам̣, саччхикаронто екам̣ дхаммам̣ самма̄вимуттим̣ пхусати. етадаттха̄, бхиккхаве, катха̄; етадаттха̄ мантана̄; етадаттха̄ упаниса̄; етадаттхам̣ сота̄вадха̄нам̣, йадидам̣ анупа̄да̄ читтасса вимоккхоти.

‘‘йе вируддха̄ саллапанти, винивит̣т̣ха̄ самуссита̄;

анарийагун̣ама̄саджджа, ан̃н̃он̃н̃авиваресино.

‘‘дуббха̄ситам̣ виккхалитам̣, сампамохам̣ [сасаммохам̣ (ка.)] пара̄джайам̣;

ан̃н̃он̃н̃асса̄бхинанданти, тадарийо катхана̄чаре [тадарийо на катхам̣ ваде (ка.)].

‘‘саче часса катха̄ка̄мо, ка̄ламан̃н̃а̄йа пан̣д̣ито;

дхаммат̣т̣хапат̣исам̣йутта̄, йа̄ арийачарита̄ [арийан̃чарита̄ (сӣ.), арийа̄дика̄ (ка.)] катха̄.

‘‘там̣ катхам̣ катхайе дхӣро, авируддхо ануссито;

ануннатена манаса̄, апал̣а̄со аса̄хасо.

‘‘анусӯйа̄йама̄но со, саммадан̃н̃а̄йа бха̄сати;

субха̄ситам̣ анумодеййа, дуббхат̣т̣хе на̄паса̄дайе [на̄васа̄дайе (сӣ. пӣ.)].

‘‘упа̄рамбхам̣ на сиккхеййа, кхалитан̃ча на га̄хайе [на бха̄сайе (ка.)];

на̄бхихаре на̄бхимадде, на ва̄чам̣ пайутам̣ бхан̣е.

‘‘ан̃н̃а̄таттхам̣ паса̄даттхам̣, сатам̣ ве хоти мантана̄;

евам̣ кхо арийа̄ мантенти, еса̄ арийа̄на мантана̄;

етадан̃н̃а̄йа медха̄вӣ, на самуссеййа мантайе’’ти. саттамам̣;