5. ниббутасуттам̣

56. атха кхо джа̄н̣уссон̣и бра̄хман̣о йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо джа̄н̣уссон̣и бра̄хман̣о бхагавантам̣ етадавоча – ‘‘‘сандит̣т̣хикам̣ нибба̄нам̣ сандит̣т̣хикам̣ нибба̄на’нти, бхо готама, вуччати. китта̄вата̄ ну кхо, бхо готама, сандит̣т̣хикам̣ нибба̄нам̣ хоти ака̄ликам̣ ехипассикам̣ опанеййикам̣ паччаттам̣ ведитаббам̣ вин̃н̃ӯхӣ’’ти?

‘‘ратто кхо, бра̄хман̣а, ра̄гена абхибхӯто парийа̄динначитто аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети, четасикампи дуккхам̣ доманассам̣ пат̣исам̣ведети. ра̄ге пахӣне неваттабйа̄ба̄дха̄йапи четети, на парабйа̄ба̄дха̄йапи четети, на убхайабйа̄ба̄дха̄йапи четети, на четасикампи дуккхам̣ доманассам̣ пат̣исам̣ведети. евампи кхо, бра̄хман̣а, сандит̣т̣хикам̣ нибба̄нам̣ хоти.

‘‘дут̣т̣хо кхо, бра̄хман̣а…пе… мӯл̣хо кхо, бра̄хман̣а, мохена абхибхӯто парийа̄динначитто аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети, четасикампи дуккхам̣ доманассам̣ пат̣исам̣ведети. мохе пахӣне неваттабйа̄ба̄дха̄йапи четети, на парабйа̄ба̄дха̄йапи четети, на убхайабйа̄ба̄дха̄йапи четети, на четасикам̣ дуккхам̣ доманассам̣ пат̣исам̣ведети. евампи кхо, бра̄хман̣а, сандит̣т̣хикам̣ нибба̄нам̣ хоти.

‘‘йато кхо айам̣, бра̄хман̣а [йато ча кхо айам̣ бра̄хман̣а (сӣ.), йато кхо бра̄хман̣а ака̄ликам̣ ехипассикам̣ опанеййикам̣ паччаттам̣ ведитаббам̣ (ка.)], анавасесам̣ ра̄гаккхайам̣ пат̣исам̣ведети, анавасесам̣ досаккхайам̣ пат̣исам̣ведети, анавасесам̣ мохаккхайам̣ пат̣исам̣ведети; евам̣ кхо, бра̄хман̣а, сандит̣т̣хикам̣ нибба̄нам̣ хоти ака̄ликам̣ ехипассикам̣ опанеййикам̣ паччаттам̣ ведитаббам̣ вин̃н̃ӯхӣ’’ти. ‘‘абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти. пан̃чамам̣.