4. парибба̄джакасуттам̣

55. атха кхо ан̃н̃атаро бра̄хман̣апарибба̄джако йена бхагава̄ тенупасан̇ками; упасан̇камитва̄…пе… екамантам̣ нисинно кхо со бра̄хман̣апарибба̄джако бхагавантам̣ етадавоча – ‘‘‘сандит̣т̣хико дхаммо сандит̣т̣хико дхаммо’ти, бхо готама, вуччати. китта̄вата̄ ну кхо, бхо готама, сандит̣т̣хико дхаммо хоти ака̄лико ехипассико опанеййико паччаттам̣ ведитаббо вин̃н̃ӯхӣ’’ти?

‘‘ратто кхо, бра̄хман̣а, ра̄гена абхибхӯто парийа̄динначитто аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети, четасикампи дуккхам̣ доманассам̣ пат̣исам̣ведети. ра̄ге пахӣне неваттабйа̄ба̄дха̄йапи четети, на парабйа̄ба̄дха̄йапи четети, на убхайабйа̄ба̄дха̄йапи четети, на четасикампи дуккхам̣ доманассам̣ пат̣исам̣ведети.

‘‘ратто кхо, бра̄хман̣а, ра̄гена абхибхӯто парийа̄динначитто ка̄йена дуччаритам̣ чарати, ва̄ча̄йа дуччаритам̣ чарати, манаса̄ дуччаритам̣ чарати. ра̄ге пахӣне нева ка̄йена дуччаритам̣ чарати, на ва̄ча̄йа дуччаритам̣ чарати, на манаса̄ дуччаритам̣ чарати.

‘‘ратто кхо, бра̄хман̣а, ра̄гена абхибхӯто парийа̄динначитто аттаттхампи йатха̄бхӯтам̣ наппаджа̄на̄ти, параттхампи йатха̄бхӯтам̣ наппаджа̄на̄ти, убхайаттхампи йатха̄бхӯтам̣ наппаджа̄на̄ти. ра̄ге пахӣне аттаттхампи йатха̄бхӯтам̣ паджа̄на̄ти, параттхампи йатха̄бхӯтам̣ паджа̄на̄ти, убхайаттхампи йатха̄бхӯтам̣ паджа̄на̄ти. евампи кхо, бра̄хман̣а, сандит̣т̣хико дхаммо хоти…пе….

‘‘дут̣т̣хо кхо, бра̄хман̣а, досена…пе… мӯл̣хо кхо, бра̄хман̣а, мохена абхибхӯто парийа̄динначитто аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети, четасикампи дуккхам̣ доманассам̣ пат̣исам̣ведети. мохе пахӣне неваттабйа̄ба̄дха̄йапи четети, на парабйа̄ба̄дха̄йапи четети, на убхайабйа̄ба̄дха̄йапи четети, на четасикам̣ дуккхам̣ доманассам̣ пат̣исам̣ведети.

‘‘мӯл̣хо кхо, бра̄хман̣а, мохена абхибхӯто парийа̄динначитто, ка̄йена дуччаритам̣ чарати, ва̄ча̄йа дуччаритам̣ чарати, манаса̄ дуччаритам̣ чарати. мохе пахӣне нева ка̄йена дуччаритам̣ чарати, на ва̄ча̄йа дуччаритам̣ чарати, на манаса̄ дуччаритам̣ чарати.

‘‘мӯл̣хо кхо, бра̄хман̣а, мохена абхибхӯто парийа̄динначитто аттаттхампи йатха̄бхӯтам̣ наппаджа̄на̄ти, параттхампи йатха̄бхӯтам̣ наппаджа̄на̄ти, убхайаттхампи йатха̄бхӯтам̣ наппаджа̄на̄ти. мохе пахӣне аттаттхампи йатха̄бхӯтам̣ паджа̄на̄ти, параттхампи йатха̄бхӯтам̣ паджа̄на̄ти, убхайаттхампи йатха̄бхӯтам̣ паджа̄на̄ти. евам̣ кхо, бра̄хман̣а, сандит̣т̣хико дхаммо хоти ака̄лико ехипассико опанеййико паччаттам̣ ведитаббо вин̃н̃ӯхӣ’’ти.

‘‘абхиккантам̣, бхо готама…пе… упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти. чатуттхам̣.