3. ан̃н̃атарабра̄хман̣асуттам̣

54. атха кхо ан̃н̃атаро бра̄хман̣о йена бхагава̄ тенупасан̇ками; упасан̇камитва̄ бхагавата̄ саддхим̣ саммоди…пе… екамантам̣ нисинно кхо со бра̄хман̣о бхагавантам̣ етадавоча – ‘‘‘сандит̣т̣хико дхаммо сандит̣т̣хико дхаммо’ти, бхо готама, вуччати. китта̄вата̄ ну кхо, бхо готама, сандит̣т̣хико дхаммо хоти ака̄лико ехипассико опанеййико [опанайико (сӣ. сйа̄. кам̣. пӣ.) пан̃чамасуттасса т̣ӣка̄ олокетабба̄] паччаттам̣ ведитаббо вин̃н̃ӯхӣ’’ти?

‘‘ратто кхо, бра̄хман̣а, ра̄гена абхибхӯто парийа̄динначитто аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети, четасикампи дуккхам̣ доманассам̣ пат̣исам̣ведети. ра̄ге пахӣне неваттабйа̄ба̄дха̄йапи четети, на парабйа̄ба̄дха̄йапи четети, на убхайабйа̄ба̄дха̄йапи четети, на четасикам̣ дуккхам̣ доманассам̣ пат̣исам̣ведети. (ратто кхо…пе… ка̄йена дуччаритам̣ чарати, ва̄ча̄йа дуччаритам̣ чарати, манаса̄ дуччаритам̣ чарати. ра̄ге пахӣна̄ нева ка̄йена дуччаритам̣ чарати, на ва̄ча̄йа дуччаритам̣ чарати, на манаса̄ дуччаритам̣ чарати. ратто кхо…пе… аттаттхампи йатха̄бхӯтам̣ наппаджа̄на̄ти, параттхампи йатха̄бхӯтам̣ наппаджа̄на̄ти, убхайаттхампи йатха̄бхӯтам̣ наппаджа̄на̄ти. ра̄ге пахӣне аттаттхампи йатха̄бхӯтам̣ паджа̄на̄ти, параттхампи йатха̄бхӯтам̣ паджа̄на̄ти, убхайаттхампи йатха̄бхӯтам̣ паджа̄на̄ти.) [( ) еттхантаре па̄т̣хо сӣ. сйа̄. кам̣. пӣ. поттхакесу на диссати, идхапи дут̣т̣хамӯл̣хава̄ресу] евампи кхо, бра̄хман̣а, сандит̣т̣хико дхаммо хоти…пе….

‘‘дут̣т̣хо кхо, бра̄хман̣а, досена абхибхӯто парийа̄динначитто аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети, четасикампи дуккхам̣ доманассам̣ пат̣исам̣ведети. досе пахӣне неваттабйа̄ба̄дха̄йапи четети, на парабйа̄ба̄дха̄йапи четети, на убхайабйа̄ба̄дха̄йапи четети, на четасикампи [на четасикам̣ (сӣ. сйа̄. ка.)] дуккхам̣ доманассам̣ пат̣исам̣ведети. евампи кхо, бра̄хман̣а, сандит̣т̣хико дхаммо хоти…пе….

‘‘мӯл̣хо кхо, бра̄хман̣а, мохена абхибхӯто парийа̄динначитто аттабйа̄ба̄дха̄йапи четети, парабйа̄ба̄дха̄йапи четети, убхайабйа̄ба̄дха̄йапи четети, четасикампи дуккхам̣ доманассам̣ пат̣исам̣ведети. мохе пахӣне неваттабйа̄ба̄дха̄йапи четети, на парабйа̄ба̄дха̄йапи четети, на убхайабйа̄ба̄дха̄йапи четети, на четасикам̣ дуккхам̣ доманассам̣ пат̣исам̣ведети. евам̣ кхо, бра̄хман̣а, сандит̣т̣хико дхаммо хоти ака̄лико ехипассико опанеййико паччаттам̣ ведитаббо вин̃н̃ӯхӣ’’ти.

‘‘абхиккантам̣, бхо готама, абхиккантам̣, бхо готама! сеййатха̄пи, бхо готама, никкуджджитам̣ ва̄ уккуджджеййа, пат̣иччханнам̣ ва̄ вивареййа, мӯл̣хасса ва̄ маггам̣ а̄чиккхеййа, андхака̄ре ва̄ телападжджотам̣ дха̄реййа – ‘чаккхуманто рӯпа̄ни даккхантӣ’ти; евамевам̣ бхота̄ готамена анекапарийа̄йена дхаммо пака̄сито. еса̄хам̣ бхавантам̣ готамам̣ саран̣ам̣ гаччха̄ми дхамман̃ча бхиккхусан̇гхан̃ча. упа̄сакам̣ мам̣ бхавам̣ готамо дха̄рету аджджатагге па̄н̣упетам̣ саран̣ам̣ гата’’нти. татийам̣.