9. сукхума̄ласуттам̣

39. ‘‘сукхума̄ло ахам̣, бхиккхаве, парамасукхума̄ло аччантасукхума̄ло. мама судам̣, бхиккхаве, питу нивесане поккхаран̣ийо ка̄рита̄ хонти. екаттха судам̣, бхиккхаве, уппалам̣ ваппати [пуппхати (сӣ. пӣ.)], екаттха падумам̣, екаттха пун̣д̣арӣкам̣, йа̄вадева маматтха̄йа. на кхо панасса̄хам̣, бхиккхаве, ака̄сикам̣ чанданам̣ дха̄реми [ка̄сикам̣ чанданам̣ дха̄реми (сйа̄. кам̣. ка.), ака̄сикам̣ дха̄реми (?)]. ка̄сикам̣, бхиккхаве, су ме там̣ вет̣ханам̣ хоти, ка̄сика̄ кан̃чука̄, ка̄сикам̣ нива̄санам̣, ка̄сико уттара̄сан̇го. раттиндивам̣ [раттидивам̣ (ка.)] кхо пана ме су там̣, бхиккхаве, сетаччхаттам̣ дха̄рӣйати – ‘ма̄ нам̣ пхуси сӣтам̣ ва̄ ун̣хам̣ ва̄ тин̣ам̣ ва̄ раджо ва̄ усса̄во ва̄’’’ти.

‘‘тасса майхам̣, бхиккхаве, тайо па̄са̄да̄ ахесум̣ – еко хемантико, еко гимхико, еко вассико. со кхо ахам̣, бхиккхаве, вассике па̄са̄де вассике чатта̄ро ма̄се ниппурисехи тӯрийехи парича̄райама̄но [парича̄рийама̄но (сйа̄. кам̣. пӣ. ка.)] на хет̣т̣ха̄па̄са̄дам̣ ороха̄ми. йатха̄ кхо пана, бхиккхаве, ан̃н̃есам̣ нивесане да̄сакаммакарапорисасса кан̣а̄джакам̣ бходжанам̣ дӣйати билан̇гадутийам̣, евамевассу ме, бхиккхаве, питу нивесане да̄сакаммакарапорисасса са̄лимам̣содано дӣйати.

‘‘тасса майхам̣, бхиккхаве, еварӯпа̄йа иддхийа̄ саманна̄гатасса еварӯпена ча сукхума̄лена етадахоси – ‘ассутава̄ кхо путхуджджано аттана̄ джара̄дхаммо сама̄но джарам̣ анатӣто парам̣ джин̣н̣ам̣ дисва̄ ат̣т̣ӣйати хара̄йати джигуччхати атта̄нам̣йева атиситва̄, ахампи кхомхи джара̄дхаммо джарам̣ анатӣто. ахан̃чева [ахан̃че (?)] кхо пана джара̄дхаммо сама̄но джарам̣ анатӣто парам̣ джин̣н̣ам̣ дисва̄ ат̣т̣ӣйеййам̣ хара̄йеййам̣ джигуччхеййам̣ на метам̣ асса патирӯпа’нти. тасса майхам̣, бхиккхаве, ити пат̣исан̃чиккхато йо йоббане йоббанамадо со саббасо пахӣйи.

‘‘ассутава̄ кхо путхуджджано аттана̄ бйа̄дхидхаммо сама̄но бйа̄дхим̣ анатӣто парам̣ бйа̄дхитам̣ дисва̄ ат̣т̣ӣйати хара̄йати джигуччхати атта̄нам̣йева атиситва̄ – ‘ахампи кхомхи бйа̄дхидхаммо бйа̄дхим̣ анатӣто, ахан̃чева кхо пана бйа̄дхидхаммо сама̄но бйа̄дхим̣ анатӣто парам̣ бйа̄дхикам̣ дисва̄ ат̣т̣ӣйеййам̣ хара̄йеййам̣ джигуччхеййам̣, на метам̣ асса патирӯпа’нти. тасса майхам̣, бхиккхаве, ити пат̣исан̃чиккхато йо а̄рогйе а̄рогйамадо со саббасо пахӣйи.

‘‘ассутава̄ кхо путхуджджано аттана̄ маран̣адхаммо сама̄но маран̣ам̣ анатӣто парам̣ матам̣ дисва̄ ат̣т̣ӣйати хара̄йати джигуччхати атта̄нам̣йева атиситва̄ – ‘ахампи кхомхи маран̣адхаммо, маран̣ам̣ анатӣто, ахам̣ чева кхо пана маран̣адхаммо сама̄но маран̣ам̣ анатӣто парам̣ матам̣ дисва̄ ат̣т̣ӣйеййам̣ хара̄йеййам̣ джигуччхеййам̣, на метам̣ асса патирӯпа’нти. тасса майхам̣, бхиккхаве, ити пат̣исан̃чиккхато йо джӣвите джӣвитамадо со саббасо пахӣйӣ’’ти.

‘‘тайоме, бхиккхаве, мада̄. катаме тайо? йоббанамадо, а̄рогйамадо, джӣвитамадо. йоббанамадаматто ва̄, бхиккхаве, ассутава̄ путхуджджано ка̄йена дуччаритам̣ чарати, ва̄ча̄йа дуччаритам̣ чарати, манаса̄ дуччаритам̣ чарати. со ка̄йена дуччаритам̣ чаритва̄, ва̄ча̄йа дуччаритам̣ чаритва̄, манаса̄ дуччаритам̣ чаритва̄ ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджати. а̄рогйамадаматто ва̄, бхиккхаве, ассутава̄ путхуджджано…пе… джӣвитамадаматто ва̄, бхиккхаве, ассутава̄ путхуджджано ка̄йена дуччаритам̣ чарати, ва̄ча̄йа дуччаритам̣ чарати, манаса̄ дуччаритам̣ чарати. со ка̄йена дуччаритам̣ чаритва̄, ва̄ча̄йа дуччаритам̣ чаритва̄, манаса̄ дуччаритам̣ чаритва̄ ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджати.

‘‘йоббанамадаматто ва̄, бхиккхаве, бхиккху сиккхам̣ паччаккха̄йа хӣна̄йа̄ваттати. а̄рогйамадаматто ва̄, бхиккхаве, бхиккху…пе… джӣвитамадаматто ва̄, бхиккхаве, бхиккху сиккхам̣ паччаккха̄йа хӣна̄йа̄ваттатӣ’’ти.

‘‘бйа̄дхидхамма̄ джара̄дхамма̄, атхо маран̣адхаммино;

йатха̄дхамма̄ [бйа̄дхидхаммо джара̄дхаммо, атхо маран̣адхаммико; йатха̄ дхаммо (ка.)] татха̄санта̄, джигуччханти путхуджджана̄.

‘‘ахан̃че там̣ джигуччхеййам̣, евам̣дхаммесу па̄н̣ису;

на метам̣ патирӯпасса, мама евам̣ виха̄рино.

‘‘сохам̣ евам̣ вихаранто, н̃атва̄ дхаммам̣ нирӯпадхим̣;

а̄рогйе йоббанасмин̃ча, джӣвитасмин̃ча йе мада̄.

‘‘саббе маде абхибхосми [атӣтосми (ка.)], неккхамме дат̣т̣ху кхематам̣;

тасса ме аху усса̄хо, нибба̄нам̣ абхипассато.

‘‘на̄хам̣ бхаббо етарахи, ка̄ма̄ни пат̣исевитум̣;

аниватти бхависса̄ми, брахмачарийапара̄йан̣о’’ти. навамам̣;