6. севитаббасуттам̣

26. ‘‘тайоме, бхиккхаве, пуггала̄ санто сам̣виджджама̄на̄ локасмим̣. катаме тайо? аттхи, бхиккхаве, пуггало на севитаббо на бхаджитаббо на пайирупа̄ситаббо. аттхи, бхиккхаве, пуггало севитаббо бхаджитаббо пайирупа̄ситаббо. аттхи, бхиккхаве, пуггало саккатва̄ гарум̣ катва̄ севитаббо бхаджитаббо пайирупа̄ситаббо. катамо ча, бхиккхаве, пуггало на севитаббо на бхаджитаббо на пайирупа̄ситаббо? идха, бхиккхаве, екаччо пуггало хӣно хоти сӣлена сама̄дхина̄ пан̃н̃а̄йа. еварӯпо, бхиккхаве, пуггало на севитаббо на бхаджитаббо на пайирупа̄ситаббо ан̃н̃атра ануддайа̄ ан̃н̃атра анукампа̄.

‘‘катамо ча, бхиккхаве, пуггало севитаббо бхаджитаббо пайирупа̄ситаббо? идха, бхиккхаве, екаччо пуггало садисо хоти сӣлена сама̄дхина̄ пан̃н̃а̄йа. еварӯпо, бхиккхаве, пуггало севитаббо бхаджитаббо пайирупа̄ситаббо. там̣ кисса хету? сӣласа̄ман̃н̃агата̄нам̣ сатам̣ сӣлакатха̄ ча но бхависсати, са̄ ча но паваттинӣ [паваттанӣ (сӣ. сйа̄. кам̣. пӣ.) пу. па. 122 пасситаббам̣] бхависсати, са̄ ча но пха̄су бхависсати. сама̄дхиса̄ман̃н̃агата̄нам̣ сатам̣ сама̄дхикатха̄ ча но бхависсати, са̄ ча но паваттинӣ бхависсати, са̄ ча но пха̄су бхависсати. пан̃н̃а̄са̄ман̃н̃агата̄нам̣ сатам̣ пан̃н̃а̄катха̄ ча но бхависсати, са̄ ча но паваттинӣ бхависсати, са̄ ча но пха̄су бхависсатӣти. тасма̄ еварӯпо пуггало севитаббо бхаджитаббо пайирупа̄ситаббо.

‘‘катамо ча, бхиккхаве, пуггало саккатва̄ гарум̣ катва̄ севитаббо бхаджитаббо пайирупа̄ситаббо? идха, бхиккхаве, екаччо пуггало адхико хоти сӣлена сама̄дхина̄ пан̃н̃а̄йа. еварӯпо, бхиккхаве, пуггало саккатва̄ гарум̣ катва̄ севитаббо бхаджитаббо пайирупа̄ситаббо. там̣ кисса хету? ити апарипӯрам̣ ва̄ сӣлаккхандхам̣ парипӯресса̄ми, парипӯрам̣ ва̄ сӣлаккхандхам̣ таттха таттха пан̃н̃а̄йа ануггахесса̄ми; апарипӯрам̣ ва̄ сама̄дхиккхандхам̣ парипӯресса̄ми, парипӯрам̣ ва̄ сама̄дхиккхандхам̣ таттха таттха пан̃н̃а̄йа ануггахесса̄ми; апарипӯрам̣ ва̄ пан̃н̃а̄ккхандхам̣ парипӯресса̄ми, парипӯрам̣ ва̄ пан̃н̃а̄ккхандхам̣ таттха таттха пан̃н̃а̄йа ануггахесса̄мӣти. тасма̄ еварӯпо пуггало саккатва̄ гарум̣ катва̄ севитаббо бхаджитаббо пайирупа̄ситаббо. име кхо, бхиккхаве, тайо пуггала̄ санто сам̣виджджама̄на̄ локасми’’нти.

‘‘нихӣйати пурисо нихӣнасевӣ,

на ча ха̄йетха када̄чи тулйасевӣ;

сет̣т̣хамупанамам̣ удети кхиппам̣,

тасма̄ аттано уттарим̣ бхаджетха̄’’ти. чхат̣т̣хам̣;