3. ба̄лавагго

22. ‘‘‘двеме, бхиккхаве, ба̄ла̄. катаме две? йо ча аччайам̣ аччайато на пассати, йо ча аччайам̣ десентасса йатха̄дхаммам̣ наппат̣игган̣ха̄ти. име кхо, бхиккхаве, две ба̄ла̄’ти. ‘двеме, бхиккхаве, пан̣д̣ита̄. катаме две? йо ча аччайам̣ аччайато пассати, йо ча аччайам̣ десентасса йатха̄дхаммам̣ пат̣игган̣ха̄ти. име кхо, бхиккхаве, две пан̣д̣ита̄’’’ти.

23. ‘‘двеме, бхиккхаве, татха̄гатам̣ аббха̄чиккханти. катаме две? дут̣т̣хо ва̄ досантаро, саддхо ва̄ дуггахитена [дуггахӣтена (сӣ.)]. име кхо, бхиккхаве, две татха̄гатам̣ аббха̄чиккхантӣ’’ти.

24. ‘‘‘двеме, бхиккхаве, татха̄гатам̣ аббха̄чиккханти. катаме две? йо ча абха̄ситам̣ алапитам̣ татха̄гатена бха̄ситам̣ лапитам̣ татха̄гатена̄ти дӣпети, йо ча бха̄ситам̣ лапитам̣ татха̄гатена абха̄ситам̣ алапитам̣ татха̄гатена̄ти дӣпети. име кхо, бхиккхаве, две татха̄гатам̣ аббха̄чиккхантӣ’ти. ‘двеме, бхиккхаве, татха̄гатам̣ на̄ббха̄чиккханти. катаме две? йо ча абха̄ситам̣ алапитам̣ татха̄гатена абха̄ситам̣ алапитам̣ татха̄гатена̄ти дӣпети, йо ча бха̄ситам̣ лапитам̣ татха̄гатена бха̄ситам̣ лапитам̣ татха̄гатена̄ти дӣпети. име кхо, бхиккхаве, две татха̄гатам̣ на̄ббха̄чиккхантӣ’’’ти.

25. ‘‘двеме, бхиккхаве, татха̄гатам̣ аббха̄чиккханти. катаме две? йо ча неййаттхам̣ суттантам̣ нӣтаттхо суттантоти дӣпети, йо ча нӣтаттхам̣ суттантам̣ неййаттхо суттантоти дӣпети. име кхо, бхиккхаве, две татха̄гатам̣ аббха̄чиккхантӣ’’ти.

26. ‘‘двеме, бхиккхаве, татха̄гатам̣ на̄ббха̄чиккханти. катаме две? йо ча неййаттхам̣ суттантам̣ неййаттхо суттантоти дӣпети, йо ча нӣтаттхам̣ суттантам̣ нӣтаттхо суттантоти дӣпети. име кхо, бхиккхаве, две татха̄гатам̣ на̄ббха̄чиккхантӣ’’ти.

27. ‘‘пат̣иччханнакаммантасса, бхиккхаве, двиннам̣ гатӣнам̣ ан̃н̃атара̄ гати па̄т̣икан̇кха̄ – нирайо ва̄ тираччха̄найони ва̄ти. аппат̣иччханнакаммантасса, бхиккхаве, двиннам̣ гатӣнам̣ ан̃н̃атара̄ гати па̄т̣икан̇кха̄ – дева̄ ва̄ манусса̄ ва̄’’ти.

28. ‘‘миччха̄дит̣т̣хикасса, бхиккхаве, двиннам̣ гатӣнам̣ ан̃н̃атара̄ гати па̄т̣икан̇кха̄ – нирайо ва̄ тираччха̄найони ва̄’’ти.

29. ‘‘самма̄дит̣т̣хикасса, бхиккхаве, двиннам̣ гатӣнам̣ ан̃н̃атара̄ гати па̄т̣икан̇кха̄ – дева̄ ва̄ манусса̄ ва̄’’ти.

30. ‘‘дуссӣласса, бхиккхаве, две пат̣игга̄ха̄ – нирайо ва̄ тираччха̄найони ва̄. сӣлавато, бхиккхаве, две пат̣игга̄ха̄ – дева̄ ва̄ манусса̄ ва̄’’ти [дево ва̄ мануссо ва̄ти (ка.)].

31. ‘‘два̄хам̣, бхиккхаве, аттхавасе сампассама̄но аран̃н̃аванапаттха̄ни [аран̃н̃е паванапаттха̄ни (сӣ. пӣ.)] панта̄ни сена̄сана̄ни пат̣исева̄ми. катаме две? аттано ча дит̣т̣хадхаммасукхавиха̄рам̣ сампассама̄но, паччхиман̃ча джанатам̣ анукампама̄но. име кхо ахам̣, бхиккхаве, две аттхавасе сампассама̄но аран̃н̃аванапаттха̄ни панта̄ни сена̄сана̄ни пат̣исева̄мӣ’’ти.

32. ‘‘две ме, бхиккхаве, дхамма̄ виджджа̄бха̄гийа̄. катаме две? саматхо ча випассана̄ ча. саматхо, бхиккхаве, бха̄вито каматтха [киматтха (сйа̄. кам̣.), катаматтха (ка.)] манубхоти? читтам̣ бха̄вӣйати. читтам̣ бха̄витам̣ каматтхаманубхоти? йо ра̄го со пахӣйати. випассана̄, бхиккхаве, бха̄вита̄ каматтхаманубхоти? пан̃н̃а̄ бха̄вӣйати. пан̃н̃а̄ бха̄вита̄ каматтхаманубхоти? йа̄ авиджджа̄ са̄ пахӣйати. ра̄гупаккилит̣т̣хам̣ ва̄, бхиккхаве, читтам̣ на вимуччати, авиджджупаккилит̣т̣ха̄ ва̄ пан̃н̃а̄ на бха̄вӣйати. ити кхо, бхиккхаве, ра̄гавира̄га̄ четовимутти, авиджджа̄вира̄га̄ пан̃н̃а̄вимуттӣ’’ти.

ба̄лавагго татийо.