8. пат̣хамасама̄дхисуттам̣

18. [а. ни. 10.6] атха кхо самбахула̄ бхиккхӯ йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинна̄ кхо те бхиккхӯ бхагавантам̣ етадавочум̣ –

‘‘сийа̄ ну кхо, бханте, бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса, на а̄пасмим̣ а̄посан̃н̃ӣ асса, на теджасмим̣ теджосан̃н̃ӣ асса, на ва̄йасмим̣ ва̄йосан̃н̃ӣ асса, на а̄ка̄са̄нан̃ча̄йатане а̄ка̄са̄нан̃ча̄йатанасан̃н̃ӣ асса, на вин̃н̃а̄н̣ан̃ча̄йатане вин̃н̃а̄н̣ан̃ча̄йатанасан̃н̃ӣ асса, на а̄кин̃чан̃н̃а̄йатане а̄кин̃чан̃н̃а̄йатанасан̃н̃ӣ асса, на невасан̃н̃а̄на̄сан̃н̃а̄йатане невасан̃н̃а̄на̄сан̃н̃а̄йатанасан̃н̃ӣ асса, на идхалоке идхалокасан̃н̃ӣ асса, на паралоке паралокасан̃н̃ӣ асса, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ татра̄пи на сан̃н̃ӣ асса; сан̃н̃ӣ ча пана асса̄’’ти?

‘‘сийа̄, бхиккхаве, бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе. … йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ татра̄пи на сан̃н̃ӣ асса; сан̃н̃ӣ ча пана асса̄’’ти.

‘‘йатха̄ катхам̣ пана, бханте, сийа̄ бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ татра̄пи на сан̃н̃ӣ асса; сан̃н̃ӣ ча пана асса̄’’ти?

‘‘идха, бхиккхаве, бхиккху евам̣сан̃н̃ӣ хоти – ‘етам̣ сантам̣ етам̣ пан̣ӣтам̣, йадидам̣ саббасан̇кха̄расаматхо саббӯпадхипат̣иниссагго тан̣ха̄ккхайо вира̄го ниродхо нибба̄на’нти. евам̣ кхо, бхиккхаве, сийа̄ бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса, на а̄пасмим̣ а̄посан̃н̃ӣ асса, на теджасмим̣ теджосан̃н̃ӣ асса, на ва̄йасмим̣ ва̄йосан̃н̃ӣ асса, на а̄ка̄са̄нан̃ча̄йатане а̄ка̄са̄нан̃ча̄йатанасан̃н̃ӣ асса, на вин̃н̃а̄н̣ан̃ча̄йатане вин̃н̃а̄н̣ан̃ча̄йатанасан̃н̃ӣ асса, на а̄кин̃чан̃н̃а̄йатане а̄кин̃чан̃н̃а̄йатанасан̃н̃ӣ асса, на невасан̃н̃а̄на̄сан̃н̃а̄йатане невасан̃н̃а̄на̄сан̃н̃а̄йатанасан̃н̃ӣ асса, на идхалоке идхалокасан̃н̃ӣ асса, на паралоке паралокасан̃н̃ӣ асса, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ татра̄пи на сан̃н̃ӣ асса; сан̃н̃ӣ ча пана асса̄’’ти. ат̣т̣хамам̣.