10. татийасама̄дхисуттам̣

20. [а. ни. 10.7] атха кхо самбахула̄ бхиккхӯ йена̄йасма̄ са̄рипутто тенупасан̇камим̣су; упасан̇камитва̄ а̄йасмата̄ са̄рипуттена саддхим̣ саммодим̣су. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣдим̣су. екамантам̣ нисинна̄ кхо те бхиккхӯ а̄йасмантам̣ са̄рипуттам̣ етадавочум̣ –

‘‘сийа̄ ну кхо, а̄вусо са̄рипутта, бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ татра̄пи на сан̃н̃ӣ асса; сан̃н̃ӣ ча пана асса̄’’ти? ‘‘сийа̄, а̄вусо, бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ татра̄пи на сан̃н̃ӣ асса; сан̃н̃ӣ ча пана асса̄’’ти.

‘‘йатха̄ катхам̣ пана, а̄вусо са̄рипутта, сийа̄ бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ татра̄пи на сан̃н̃ӣ асса; сан̃н̃ӣ ча пана асса̄’’ти?

‘‘идха, а̄вусо, бхиккху евам̣сан̃н̃ӣ хоти – ‘етам̣ сантам̣ етам̣ пан̣ӣтам̣, йадидам̣ саббасан̇кха̄расаматхо саббӯпадхипат̣иниссагго тан̣ха̄ккхайо вира̄го ниродхо нибба̄на’нти. евам̣ кхо, а̄вусо, сийа̄ бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄ татра̄пи на сан̃н̃ӣ асса; сан̃н̃ӣ ча пана асса̄’’ти. дасамам̣.