2. четана̄каран̣ӣйасуттам̣

2. [а. ни. 10.2] ‘‘сӣлавато, бхиккхаве, сӣласампаннасса на четана̄йа каран̣ӣйам̣ – ‘авиппат̣иса̄ро ме уппаджджатӯ’ти. дхаммата̄ еса̄, бхиккхаве, йам̣ сӣлавато сӣласампаннасса авиппат̣иса̄ро уппаджджати.

‘‘авиппат̣иса̄рисса, бхиккхаве, на четана̄йа каран̣ӣйам̣ – ‘па̄моджджам̣ ме уппаджджатӯ’ти. дхаммата̄ еса̄, бхиккхаве, йам̣ авиппат̣иса̄рисса па̄моджджам̣ уппаджджати.

‘‘памудитасса, бхиккхаве, на четана̄йа каран̣ӣйам̣ – ‘пӣти ме уппаджджатӯ’ти. дхаммата̄ еса̄, бхиккхаве, йам̣ памудитасса пӣти уппаджджати.

‘‘пӣтиманасса, бхиккхаве, на четана̄йа каран̣ӣйам̣ – ‘ка̄йо ме пассамбхатӯ’ти. дхаммата̄ еса̄, бхиккхаве, йам̣ пӣтиманасса ка̄йо пассамбхати.

‘‘пассаддхака̄йасса, бхиккхаве, на четана̄йа каран̣ӣйам̣ – ‘сукхам̣ ведийа̄мӣ’ти. дхаммата̄ еса̄, бхиккхаве, йам̣ пассаддхака̄йо сукхам̣ ведийати.

‘‘сукхино, бхиккхаве, на четана̄йа каран̣ӣйам̣ – ‘читтам̣ ме сама̄дхийатӯ’ти. дхаммата̄ еса̄, бхиккхаве, йам̣ сукхино читтам̣ сама̄дхийати.

‘‘сама̄хитасса, бхиккхаве, на четана̄йа каран̣ӣйам̣ – ‘йатха̄бхӯтам̣ джа̄на̄ми пасса̄мӣ’ти. дхаммата̄ еса̄, бхиккхаве, йам̣ сама̄хито йатха̄бхӯтам̣ джа̄на̄ти пассати.

‘‘йатха̄бхӯтам̣, бхиккхаве, джа̄нато пассато на четана̄йа каран̣ӣйам̣ – ‘ниббинда̄мӣ’ти. дхаммата̄ еса̄, бхиккхаве, йам̣ йатха̄бхӯтам̣ джа̄нам̣ пассам̣ ниббиндати.

‘‘ниббиннасса, бхиккхаве, на четана̄йа каран̣ӣйам̣ – ‘вираджджа̄мӣ’ти. дхаммата̄ еса̄, бхиккхаве, йам̣ ниббинно вираджджати.

‘‘вираттасса, бхиккхаве, на четана̄йа каран̣ӣйам̣ – ‘вимуттин̃а̄н̣адассанам̣ саччхикаромӣ’ти. дхаммата̄ еса̄, бхиккхаве, йам̣ виратто вимуттин̃а̄н̣адассанам̣ саччхикароти.

‘‘ити кхо, бхиккхаве, вира̄го вимуттин̃а̄н̣адассанаттхо вимуттин̃а̄н̣адассана̄нисам̣со, ниббида̄ вира̄гаттха̄ вира̄га̄нисам̣са̄, йатха̄бхӯтан̃а̄н̣адассанам̣ ниббидаттхам̣ ниббида̄нисам̣сам̣, сама̄дхи йатха̄бхӯтан̃а̄н̣адассанаттхо йатха̄бхӯтан̃а̄н̣адассана̄нисам̣со, сукхам̣ сама̄дхаттхам̣ сама̄дха̄нисам̣сам̣, пассаддхи сукхаттха̄ сукха̄нисам̣са̄, пӣти пассаддхаттха̄ пассаддха̄нисам̣са̄, па̄моджджам̣ пӣтаттхам̣ пӣта̄нисам̣сам̣, авиппат̣иса̄ро па̄моджджаттхо па̄моджджа̄нисам̣со, кусала̄ни сӣла̄ни авиппат̣иса̄раттха̄ни авиппат̣иса̄ра̄нисам̣са̄ни. ити кхо, бхиккхаве, дхамма̄ дхамме абхисанденти, дхамма̄ дхамме парипӯренти апа̄ра̄ па̄рам̣ гамана̄йа̄’’ти. дутийам̣.