1. ниссайавагго

1. киматтхийасуттам̣

1. [а. ни. 10.1] евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. атха кхо а̄йасма̄ а̄нандо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча – ‘‘киматтхийа̄ни, бханте, кусала̄ни сӣла̄ни кима̄нисам̣са̄нӣ’’ти? ‘‘авиппат̣иса̄раттха̄ни кхо, а̄нанда, кусала̄ни сӣла̄ни авиппат̣иса̄ра̄нисам̣са̄нӣ’’ти.

‘‘авиппат̣иса̄ро пана, бханте, киматтхийо кима̄нисам̣со’’? ‘‘авиппат̣иса̄ро кхо, а̄нанда, па̄моджджаттхо па̄моджджа̄нисам̣со’’.

‘‘па̄моджджам̣ пана, бханте, киматтхийам̣ кима̄нисам̣сам̣’’? ‘‘па̄моджджам̣ кхо, а̄нанда, пӣтаттхам̣ пӣта̄нисам̣сам̣’’.

‘‘пӣти пана, бханте, киматтхийа̄ кима̄нисам̣са̄’’? ‘‘пӣти кхо, а̄нанда, пассаддхаттха̄ пассаддха̄нисам̣са̄’’.

‘‘пассаддхи пана, бханте, киматтхийа̄ кима̄нисам̣са̄’’? ‘‘пассаддхи кхо, а̄нанда, сукхаттха̄ сукха̄нисам̣са̄’’.

‘‘сукхам̣ пана, бханте, киматтхийам̣ кима̄нисам̣сам̣’’? ‘‘сукхам̣ кхо, а̄нанда, сама̄дхаттхам̣ сама̄дха̄нисам̣сам̣’’.

‘‘сама̄дхи пана, бханте, киматтхийо кима̄нисам̣со’’? ‘‘сама̄дхи кхо, а̄нанда, йатха̄бхӯтан̃а̄н̣адассанаттхо йатха̄бхӯтан̃а̄н̣адассана̄нисам̣со’’.

‘‘йатха̄бхӯтан̃а̄н̣адассанам̣ пана, бханте, киматтхийам̣ кима̄нисам̣сам̣’’? ‘‘йатха̄бхӯтан̃а̄н̣адассанам̣ кхо, а̄нанда, ниббидаттхам̣ ниббида̄нисам̣сам̣’’.

‘‘ниббида̄, пана, бханте, киматтхийа̄ кима̄нисам̣са̄’’? ‘‘ниббида̄ кхо, а̄нанда, вира̄гаттха̄ вира̄га̄нисам̣са̄ ’’.

‘‘вира̄го пана, бханте, киматтхийо кима̄нисам̣со’’? ‘‘вира̄го кхо, а̄нанда, вимуттин̃а̄н̣адассанаттхо вимуттин̃а̄н̣адассана̄нисам̣со.

‘‘ити кхо, а̄нанда, кусала̄ни сӣла̄ни авиппат̣иса̄раттха̄ни авиппат̣иса̄ра̄нисам̣са̄ни, авиппат̣иса̄ро па̄моджджаттхо па̄моджджа̄нисам̣со, па̄моджджам̣ пӣтаттхам̣ пӣта̄нисам̣сам̣, пӣти пассаддхаттха̄ пассаддха̄нисам̣са̄, пассаддхи сукхаттха̄ сукха̄нисам̣са̄, сукхам̣ сама̄дхаттхам̣ сама̄дха̄нисам̣сам̣, сама̄дхи йатха̄бхӯтан̃а̄н̣адассанаттхо йатха̄бхӯтан̃а̄н̣адассана̄нисам̣со, йатха̄бхӯтан̃а̄н̣адассанам̣ ниббидаттхам̣ ниббида̄нисам̣сам̣, ниббида̄ вира̄гаттха̄ вира̄га̄нисам̣са̄, вира̄го вимуттин̃а̄н̣адассанаттхо вимуттин̃а̄н̣адассана̄нисам̣со. ити кхо, а̄нанда, кусала̄ни сӣла̄ни анупуббена агга̄йа парентӣ’’ти. пат̣хамам̣.

2. четана̄каран̣ӣйасуттам̣

2. [а. ни. 10.2] ‘‘сӣлавато, бхиккхаве, сӣласампаннасса на четана̄йа каран̣ӣйам̣ – ‘авиппат̣иса̄ро ме уппаджджатӯ’ти. дхаммата̄ еса̄, бхиккхаве, йам̣ сӣлавато сӣласампаннасса авиппат̣иса̄ро уппаджджати.

‘‘авиппат̣иса̄рисса, бхиккхаве, на четана̄йа каран̣ӣйам̣ – ‘па̄моджджам̣ ме уппаджджатӯ’ти. дхаммата̄ еса̄, бхиккхаве, йам̣ авиппат̣иса̄рисса па̄моджджам̣ уппаджджати.

‘‘памудитасса, бхиккхаве, на четана̄йа каран̣ӣйам̣ – ‘пӣти ме уппаджджатӯ’ти. дхаммата̄ еса̄, бхиккхаве, йам̣ памудитасса пӣти уппаджджати.

‘‘пӣтиманасса, бхиккхаве, на четана̄йа каран̣ӣйам̣ – ‘ка̄йо ме пассамбхатӯ’ти. дхаммата̄ еса̄, бхиккхаве, йам̣ пӣтиманасса ка̄йо пассамбхати.

‘‘пассаддхака̄йасса, бхиккхаве, на четана̄йа каран̣ӣйам̣ – ‘сукхам̣ ведийа̄мӣ’ти. дхаммата̄ еса̄, бхиккхаве, йам̣ пассаддхака̄йо сукхам̣ ведийати.

‘‘сукхино, бхиккхаве, на четана̄йа каран̣ӣйам̣ – ‘читтам̣ ме сама̄дхийатӯ’ти. дхаммата̄ еса̄, бхиккхаве, йам̣ сукхино читтам̣ сама̄дхийати.

‘‘сама̄хитасса, бхиккхаве, на четана̄йа каран̣ӣйам̣ – ‘йатха̄бхӯтам̣ джа̄на̄ми пасса̄мӣ’ти. дхаммата̄ еса̄, бхиккхаве, йам̣ сама̄хито йатха̄бхӯтам̣ джа̄на̄ти пассати.

‘‘йатха̄бхӯтам̣, бхиккхаве, джа̄нато пассато на четана̄йа каран̣ӣйам̣ – ‘ниббинда̄мӣ’ти. дхаммата̄ еса̄, бхиккхаве, йам̣ йатха̄бхӯтам̣ джа̄нам̣ пассам̣ ниббиндати.

‘‘ниббиннасса, бхиккхаве, на четана̄йа каран̣ӣйам̣ – ‘вираджджа̄мӣ’ти. дхаммата̄ еса̄, бхиккхаве, йам̣ ниббинно вираджджати.

‘‘вираттасса, бхиккхаве, на четана̄йа каран̣ӣйам̣ – ‘вимуттин̃а̄н̣адассанам̣ саччхикаромӣ’ти. дхаммата̄ еса̄, бхиккхаве, йам̣ виратто вимуттин̃а̄н̣адассанам̣ саччхикароти.

‘‘ити кхо, бхиккхаве, вира̄го вимуттин̃а̄н̣адассанаттхо вимуттин̃а̄н̣адассана̄нисам̣со, ниббида̄ вира̄гаттха̄ вира̄га̄нисам̣са̄, йатха̄бхӯтан̃а̄н̣адассанам̣ ниббидаттхам̣ ниббида̄нисам̣сам̣, сама̄дхи йатха̄бхӯтан̃а̄н̣адассанаттхо йатха̄бхӯтан̃а̄н̣адассана̄нисам̣со, сукхам̣ сама̄дхаттхам̣ сама̄дха̄нисам̣сам̣, пассаддхи сукхаттха̄ сукха̄нисам̣са̄, пӣти пассаддхаттха̄ пассаддха̄нисам̣са̄, па̄моджджам̣ пӣтаттхам̣ пӣта̄нисам̣сам̣, авиппат̣иса̄ро па̄моджджаттхо па̄моджджа̄нисам̣со, кусала̄ни сӣла̄ни авиппат̣иса̄раттха̄ни авиппат̣иса̄ра̄нисам̣са̄ни. ити кхо, бхиккхаве, дхамма̄ дхамме абхисанденти, дхамма̄ дхамме парипӯренти апа̄ра̄ па̄рам̣ гамана̄йа̄’’ти. дутийам̣.

3. пат̣хамаупаниса̄суттам̣

3. [а. ни. 5.24; 10.3] ‘‘дуссӣласса, бхиккхаве, сӣлавипаннасса хатӯпанисо хоти авиппат̣иса̄ро. авиппат̣иса̄ре асати авиппат̣иса̄равипаннасса хатӯпанисам̣ хоти па̄моджджам̣. па̄модждже асати па̄моджджавипаннасса хатӯпаниса̄ хоти пӣти. пӣтийа̄ асати пӣтивипаннасса хатӯпаниса̄ хоти пассаддхи. пассаддхийа̄ асати пассаддхивипаннасса хатӯпанисам̣ хоти сукхам̣. сукхе асати сукхавипаннасса хатӯпанисо хоти самма̄сама̄дхи. самма̄сама̄дхимхи асати самма̄сама̄дхивипаннасса хатӯпанисам̣ хоти йатха̄бхӯтан̃а̄н̣адассанам̣. йатха̄бхӯтан̃а̄н̣адассане асати йатха̄бхӯтан̃а̄н̣адассанавипаннасса хатӯпаниса̄ хоти ниббида̄. ниббида̄йа асати ниббида̄випаннасса хатӯпанисо хоти вира̄го. вира̄ге асати вира̄гавипаннасса хатӯпанисам̣ хоти вимуттин̃а̄н̣адассанам̣.

‘‘сеййатха̄пи, бхиккхаве, руккхо са̄кха̄пала̄савипанно. тасса папат̣ика̄пи на па̄рипӯрим̣ гаччхати, тачопи… пхеггупи… са̄ропи на па̄рипӯрим̣ гаччхати. евамевам̣ кхо, бхиккхаве, дуссӣласса сӣлавипаннасса хатӯпанисо хоти авиппат̣иса̄ро, авиппат̣иса̄ре асати авиппат̣иса̄равипаннасса хатӯпанисам̣ хоти па̄моджджам̣…пе… вимуттин̃а̄н̣адассанам̣.

‘‘сӣлавато, бхиккхаве, сӣласампаннасса упанисасампанно хоти авиппат̣иса̄ро, авиппат̣иса̄ре сати авиппат̣иса̄расампаннасса упанисасампаннам̣ хоти па̄моджджам̣, па̄модждже сати па̄моджджасампаннасса упанисасампанна̄ хоти пӣти, пӣтийа̄ сати пӣтисампаннасса упанисасампанна̄ хоти пассаддхи, пассаддхийа̄ сати пассаддхисампаннасса упанисасампаннам̣ хоти сукхам̣, сукхе сати сукхасампаннасса упанисасампанно хоти самма̄сама̄дхи, самма̄сама̄дхимхи сати самма̄сама̄дхисампаннасса упанисасампаннам̣ хоти йатха̄бхӯтан̃а̄н̣адассанам̣, йатха̄бхӯтан̃а̄н̣адассане сати йатха̄бхӯтан̃а̄н̣адассанасампаннасса упанисасампанна̄ хоти ниббида̄, ниббида̄йа сати ниббида̄сампаннасса упанисасампанно хоти вира̄го, вира̄ге сати вира̄гасампаннасса упанисасампаннам̣ хоти вимуттин̃а̄н̣адассанам̣.

‘‘сеййатха̄пи, бхиккхаве, руккхо са̄кха̄пала̄сасампанно. тасса папат̣ика̄пи па̄рипӯрим̣ гаччхати, тачопи… пхеггупи… са̄ропи па̄рипӯрим̣ гаччхати. евамевам̣ кхо, бхиккхаве, сӣлавато сӣласампаннасса упанисасампанно хоти авиппат̣иса̄ро, авиппат̣иса̄ре сати авиппат̣иса̄расампаннасса упанисасампаннам̣ хоти…пе… вимуттин̃а̄н̣адассана’’нти. татийам̣.

4. дутийаупаниса̄суттам̣

4. татра кхо а̄йасма̄ са̄рипутто бхиккхӯ а̄мантеси – ‘‘а̄вусо бхиккхаве’’ти [бхиккхавоти (сӣ. сйа̄. пӣ.) евам̣ саббаттха а. ни. 10.4]. ‘‘а̄вусо’’ти кхо те бхиккхӯ а̄йасмато са̄рипуттасса паччассосум̣. а̄йасма̄ са̄рипутто етадавоча –

‘‘дуссӣласса, а̄вусо, сӣлавипаннасса хатӯпанисо хоти авиппат̣иса̄ро, авиппат̣иса̄ре асати авиппат̣иса̄равипаннасса хатӯпанисам̣ хоти па̄моджджам̣, па̄модждже асати па̄моджджавипаннасса хатӯпаниса̄ хоти пӣти, пӣтийа̄ асати пӣтивипаннасса хатӯпаниса̄ хоти пассаддхи, пассаддхийа̄ асати пассаддхивипаннасса хатӯпанисам̣ хоти сукхам̣, сукхе асати сукхавипаннасса хатӯпанисо хоти самма̄сама̄дхи, самма̄сама̄дхимхи асати самма̄сама̄дхивипаннасса хатӯпанисам̣ хоти йатха̄бхӯтан̃а̄н̣адассанам̣, йатха̄бхӯтан̃а̄н̣адассане асати йатха̄бхӯтан̃а̄н̣адассанавипаннасса хатӯпаниса̄ хоти ниббида̄, ниббида̄йа асати ниббида̄випаннасса хатӯпанисо хоти вира̄го, вира̄ге асати вира̄гавипаннасса хатӯпанисам̣ хоти вимуттин̃а̄н̣адассанам̣.

‘‘сеййатха̄пи, а̄вусо, руккхо са̄кха̄пала̄савипанно. тасса папат̣ика̄пи на па̄рипӯрим̣ гаччхати, тачопи… пхеггупи… са̄ропи на па̄рипӯрим̣ гаччхати. евамевам̣ кхо, а̄вусо, дуссӣласса сӣлавипаннасса хатӯпанисо хоти авиппат̣иса̄ро, авиппат̣иса̄ре асати авиппат̣иса̄равипаннасса хатӯпанисам̣ хоти па̄моджджам̣…пе… вимуттин̃а̄н̣адассанам̣.

‘‘сӣлавато, а̄вусо, сӣласампаннасса упанисасампанно хоти авиппат̣иса̄ро, авиппат̣иса̄ре сати авиппат̣иса̄расампаннасса упанисасампаннам̣ хоти па̄моджджам̣, па̄модждже сати па̄моджджасампаннасса упанисасампанна̄ хоти пӣти, пӣтийа̄ сати пӣтисампаннасса упанисасампанна̄ хоти пассаддхи, пассаддхийа̄ сати пассаддхисампаннасса упанисасампаннам̣ хоти сукхам̣, сукхе сати сукхасампаннасса упанисасампанно хоти самма̄сама̄дхи, самма̄сама̄дхимхи сати самма̄сама̄дхисампаннасса упанисасампаннам̣ хоти йатха̄бхӯтан̃а̄н̣адассанам̣, йатха̄бхӯтан̃а̄н̣адассане сати йатха̄бхӯтан̃а̄н̣адассанасампаннасса упанисасампанна̄ хоти ниббида̄, ниббида̄йа сати ниббида̄сампаннасса упанисасампанно хоти вира̄го, вира̄ге сати вира̄гасампаннасса упанисасампаннам̣ хоти вимуттин̃а̄н̣адассанам̣.

‘‘сеййатха̄пи, а̄вусо, руккхо са̄кха̄пала̄сасампанно. тасса папат̣ика̄пи па̄рипӯрим̣ гаччхати, тачопи… пхеггупи… са̄ропи па̄рипӯрим̣ гаччхати. евамевам̣ кхо, а̄вусо, сӣлавато сӣласампаннасса упанисасампанно хоти авиппат̣иса̄ро, авиппат̣иса̄ре сати авиппат̣иса̄расампаннасса упанисасампаннам̣ хоти па̄моджджам̣…пе… вимуттин̃а̄н̣адассана’’нти. чатуттхам̣.

5. татийаупаниса̄суттам̣

5. [а. ни. 10.5] татра кхо а̄йасма̄ а̄нандо бхиккхӯ а̄мантеси…пе… ‘‘дуссӣласса, а̄вусо, сӣлавипаннасса хатӯпанисо хоти авиппат̣иса̄ро, авиппат̣иса̄ре асати авиппат̣иса̄равипаннасса хатӯпанисам̣ хоти па̄моджджам̣, па̄модждже асати па̄моджджавипаннасса хатӯпаниса̄ хоти пӣти, пӣтийа̄ асати пӣтивипаннасса хатӯпаниса̄ хоти пассаддхи, пассаддхийа̄ асати пассаддхивипаннасса хатӯпанисам̣ хоти сукхам̣, сукхе асати сукхавипаннасса хатӯпанисо хоти самма̄сама̄дхи, самма̄сама̄дхимхи асати самма̄сама̄дхивипаннасса хатӯпанисам̣ хоти йатха̄бхӯтан̃а̄н̣адассанам̣, йатха̄бхӯтан̃а̄н̣адассане асати йатха̄бхӯтан̃а̄н̣адассанавипаннасса хатӯпаниса̄ хоти ниббида̄, ниббида̄йа асати ниббида̄випаннасса хатӯпанисо хоти вира̄го, вира̄ге асати вира̄гавипаннасса хатӯпанисам̣ хоти вимуттин̃а̄н̣адассанам̣.

6. бйасанасуттам̣

6. ‘‘йо со, бхиккхаве, бхиккху аккосако парибха̄сако арийӯпава̄до сабрахмача̄рӣнам̣, т̣ха̄наметам̣ авака̄со йам̣ со ека̄дасаннам̣ бйасана̄нам̣ ан̃н̃атарам̣ бйасанам̣ нигаччхеййа.

катамесам̣ ека̄дасаннам̣? анадхигатам̣ на̄дхигаччхати, адхигата̄ париха̄йати, саддхаммасса на вода̄йанти, саддхаммесу ва̄ адхима̄нико хоти, анабхирато ва̄ брахмачарийам̣ чарати, ан̃н̃атарам̣ ва̄ сам̣килит̣т̣хам̣ а̄паттим̣ а̄паджджати, сиккхам̣ ва̄ паччаккха̄йа хӣна̄йа̄ваттати, га̄л̣хам̣ ва̄ рога̄тан̇кам̣ пхусати, умма̄дам̣ ва̄ па̄пун̣а̄ти читтаккхепам̣ ва̄, саммӯл̣хо ка̄лам̣ кароти, ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджати – йо со, бхиккхаве, бхиккху аккосако парибха̄сако арийӯпава̄до сабрахмача̄рӣнам̣, т̣ха̄наметам̣ авака̄со йам̣ со имесам̣ ека̄дасаннам̣ бйасана̄нам̣ ан̃н̃атарам̣ бйасанам̣ нигаччхеййа. [( ) еттхантаре па̄т̣хо сӣ. сйа̄. кам̣. пӣ. поттхакесу на диссати]

‘‘йо со, бхиккхаве, бхиккху аккосако парибха̄сако арийӯпава̄до сабрахмача̄рӣнам̣, ат̣т̣ха̄наметам̣ анавака̄со йам̣ со ека̄дасаннам̣ бйасана̄нам̣ ан̃н̃атарам̣ бйасанам̣ на нигаччхеййа.

катамесам̣ ека̄дасаннам̣? анадхигатам̣ на̄дхигаччхати, адхигата̄ париха̄йати, саддхаммасса на вода̄йанти, саддхаммесу ва̄ адхима̄нико хоти, анабхирато ва̄ брахмачарийам̣ чарати, ан̃н̃атарам̣ ва̄ сам̣килит̣т̣хам̣ а̄паттим̣ а̄паджджати, сиккхам̣ ва̄ паччаккха̄йа хӣна̄йа̄ваттати, га̄л̣хам̣ ва̄ рога̄тан̇кам̣ пхусати, умма̄дам̣ ва̄ па̄пун̣а̄ти читтаккхепам̣ ва̄, саммӯл̣хо ка̄лам̣ кароти, ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджати – йо со, бхиккхаве, бхиккху аккосако парибха̄сако арийӯпава̄до сабрахмача̄рӣнам̣, ат̣т̣ха̄наметам̣ анавака̄со йам̣ со имесам̣ ека̄дасаннам̣ бйасана̄нам̣ ан̃н̃атарам̣ бйасанам̣ на нигаччхеййа̄’’ти. чхат̣т̣хам̣.

7. сан̃н̃а̄суттам̣

7. атха кхо а̄йасма̄ а̄нандо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча –

‘‘сийа̄ ну кхо, бханте, бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса, на а̄пасмим̣ а̄посан̃н̃ӣ асса, на теджасмим̣ теджосан̃н̃ӣ асса, на ва̄йасмим̣ ва̄йосан̃н̃ӣ асса, на а̄ка̄са̄нан̃ча̄йатане а̄ка̄са̄нан̃ча̄йатанасан̃н̃ӣ асса, на вин̃н̃а̄н̣ан̃ча̄йатане вин̃н̃а̄н̣ан̃ча̄йатанасан̃н̃ӣ асса, на а̄кин̃чан̃н̃а̄йатане а̄кин̃чан̃н̃а̄йатанасан̃н̃ӣ асса, на невасан̃н̃а̄на̄сан̃н̃а̄йатане невасан̃н̃а̄на̄сан̃н̃а̄йатанасан̃н̃ӣ асса, на идхалоке идхалокасан̃н̃ӣ асса, на паралоке паралокасан̃н̃ӣ асса, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, татра̄пи на сан̃н̃ӣ асса; сан̃н̃ӣ ча пана асса̄ти?

‘‘сийа̄, а̄нанда, бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса, на а̄пасмим̣ а̄посан̃н̃ӣ асса, на теджасмим̣ теджосан̃н̃ӣ асса, на ва̄йасмим̣ ва̄йосан̃н̃ӣ асса, на а̄ка̄са̄нан̃ча̄йатане а̄ка̄са̄нан̃ча̄йатанасан̃н̃ӣ асса, на вин̃н̃а̄н̣ан̃ча̄йатане вин̃н̃а̄н̣ан̃ча̄йатанасан̃н̃ӣ асса, на а̄кин̃чан̃н̃а̄йатане а̄кин̃чан̃н̃а̄йатанасан̃н̃ӣ асса, на невасан̃н̃а̄на̄сан̃н̃а̄йатане невасан̃н̃а̄на̄сан̃н̃а̄йатанасан̃н̃ӣ асса, на идхалоке идхалокасан̃н̃ӣ асса, на паралоке паралокасан̃н̃ӣ асса, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, татра̄пи на сан̃н̃ӣ асса; сан̃н̃ӣ ча пана асса̄’’ти.

‘‘йатха̄ катхам̣ пана, бханте, сийа̄ бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса, на а̄пасмим̣ а̄посан̃н̃ӣ асса, на теджасмим̣ теджосан̃н̃ӣ асса, на ва̄йасмим̣ ва̄йосан̃н̃ӣ асса, на а̄ка̄са̄нан̃ча̄йатане а̄ка̄са̄нан̃ча̄йатанасан̃н̃ӣ асса, на вин̃н̃а̄н̣ан̃ча̄йатане вин̃н̃а̄н̣ан̃ча̄йатанасан̃н̃ӣ асса, на а̄кин̃чан̃н̃а̄йатане а̄кин̃чан̃н̃а̄йатанасан̃н̃ӣ асса, на невасан̃н̃а̄на̄сан̃н̃а̄йатане невасан̃н̃а̄на̄сан̃н̃а̄йатанасан̃н̃ӣ асса, на идхалоке идхалокасан̃н̃ӣ асса, на паралоке паралокасан̃н̃ӣ асса, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, татра̄пи на сан̃н̃ӣ асса, сан̃н̃ӣ ча пана асса̄ти.

‘‘идха̄нанда, бхиккху евам̣сан̃н̃ӣ хоти – ‘етам̣ сантам̣ етам̣ пан̣ӣтам̣, йадидам̣ саббасан̇кха̄расаматхо саббӯпадхипат̣иниссагго тан̣ха̄ккхайо вира̄го ниродхо нибба̄на’нти. евам̣ кхо, а̄нанда, сийа̄ бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса, на а̄пасмим̣ а̄посан̃н̃ӣ асса, на теджасмим̣ теджосан̃н̃ӣ асса, на ва̄йасмим̣ ва̄йосан̃н̃ӣ асса, на а̄ка̄са̄нан̃ча̄йатане а̄ка̄са̄нан̃ча̄йатанасан̃н̃ӣ асса, на вин̃н̃а̄н̣ан̃ча̄йатане вин̃н̃а̄н̣ан̃ча̄йатанасан̃н̃ӣ асса, на а̄кин̃чан̃н̃а̄йатане а̄кин̃чан̃н̃а̄йатанасан̃н̃ӣ асса, на невасан̃н̃а̄на̄сан̃н̃а̄йатане невасан̃н̃а̄на̄сан̃н̃а̄йатанасан̃н̃ӣ асса, на идхалоке идхалокасан̃н̃ӣ асса, на паралоке паралокасан̃н̃ӣ асса, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, татра̄пи на сан̃н̃ӣ асса, сан̃н̃ӣ ча пана асса̄’’ти.

атха кхо а̄йасма̄ а̄нандо бхагавато бха̄ситам̣ абхинандитва̄ анумодитва̄ ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ йена̄йасма̄ са̄рипутто тенупасан̇ками; упасан̇камитва̄ а̄йасмата̄ са̄рипуттена саддхим̣ саммоди. саммоданӣйам̣ катхам̣ са̄ран̣ӣйам̣ вӣтиса̄ретва̄ екамантам̣ нисӣди. екамантам̣ нисинно кхо а̄йасма̄ а̄нандо а̄йасмантам̣ са̄рипуттам̣ етадавоча –

‘‘сийа̄ ну кхо, а̄вусо са̄рипутта, бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, татра̄пи на сан̃н̃ӣ асса, сан̃н̃ӣ пана асса̄ти. ‘‘сийа̄, а̄вусо а̄нанда, бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, татра̄пи на сан̃н̃ӣ асса, сан̃н̃ӣ ча пана асса̄’’ти.

‘‘йатха̄ катхам̣ пана̄вусо са̄рипутта, сийа̄ бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, татра̄пи на сан̃н̃ӣ асса, сан̃н̃ӣ ча пана асса̄’’ти?

‘‘идха, а̄вусо а̄нанда, бхиккху евам̣сан̃н̃ӣ хоти – ‘етам̣ сантам̣ етам̣ пан̣ӣтам̣, йадидам̣ саббасан̇кха̄расаматхо саббӯпадхипат̣иниссагго тан̣ха̄ккхайо вира̄го ниродхо нибба̄на’нти. евам̣ кхо, а̄вусо а̄нанда, сийа̄ бхиккхуно татха̄рӯпо сама̄дхипат̣ила̄бхо йатха̄ нева патхавийам̣ патхависан̃н̃ӣ асса…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, татра̄пи на сан̃н̃ӣ асса, сан̃н̃ӣ ча пана асса̄’’ти.

‘‘аччхарийам̣, а̄вусо, аббхутам̣, а̄вусо! йатра хи на̄ма саттху чева са̄вакасса ча аттхена аттхо бйан̃джанена бйан̃джанам̣ сам̣сандиссати самессати на виггайхиссати, йадидам̣ аггападасмим̣! ида̄на̄хам̣, а̄вусо, бхагавантам̣ упасан̇камитва̄ етаматтхам̣ апуччхим̣. бхагава̄пи ме етехи аккхарехи етехи падехи етехи бйан̃джанехи етаматтхам̣ бйа̄ка̄си, сеййатха̄пи а̄йасма̄ са̄рипутто. аччхарийам̣, а̄вусо, аббхутам̣, а̄вусо, йатра хи на̄ма саттху чева са̄вакасса ча аттхена аттхо бйан̃джанена бйан̃джанам̣ сам̣сандиссати самессати на виггайхиссати, йадидам̣ аггападасми’’нти! саттамам̣.

8. манасика̄расуттам̣

8. атха кхо а̄йасма̄ а̄нандо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча –

‘‘сийа̄ ну кхо, бханте, бхиккхуно татха̄рӯпо сама̄дхипат̣ила̄бхо йатха̄ на чаккхум̣ манаси кареййа, на рӯпам̣ манаси кареййа, на сотам̣ манаси кареййа, на саддам̣ манаси кареййа, на гха̄нам̣ манаси кареййа, на гандхам̣ манаси кареййа, на дживхам̣ манаси кареййа, на расам̣ манаси кареййа, на ка̄йам̣ манаси кареййа, на пхот̣т̣хаббам̣ манаси кареййа, на патхавим̣ манаси кареййа, на а̄пам̣ манаси кареййа, на теджам̣ манаси кареййа, на ва̄йам̣ манаси кареййа, на а̄ка̄са̄нан̃ча̄йатанам̣ манаси кареййа, на вин̃н̃а̄н̣ан̃ча̄йатанам̣ манаси кареййа, на а̄кин̃чан̃н̃а̄йатанам̣ манаси кареййа, на невасан̃н̃а̄на̄сан̃н̃а̄йатанам̣ манаси кареййа, на идхалокам̣ манаси кареййа, на паралокам̣ манаси кареййа, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тампи на манаси кареййа; манаси ча пана кареййа̄’’ти?

‘‘сийа̄, а̄нанда, бхиккхуно татха̄рӯпо сама̄дхипат̣ила̄бхо йатха̄ на чаккхум̣ манаси кареййа, на рӯпам̣ манаси кареййа, на сотам̣ манаси кареййа, на саддам̣ манаси кареййа, на гха̄нам̣ манаси кареййа, на гандхам̣ манаси кареййа, на дживхам̣ манаси кареййа, на расам̣ манаси кареййа, на ка̄йам̣ манаси кареййа, на пхот̣т̣хаббам̣ манаси кареййа, на патхавим̣ манаси кареййа, на а̄пам̣ манаси кареййа, на теджам̣ манаси кареййа, на ва̄йам̣ манаси кареййа, на а̄ка̄са̄нан̃ча̄йатанам̣ манаси кареййа, на вин̃н̃а̄н̣ан̃ча̄йатанам̣ манаси кареййа, на а̄кин̃чан̃н̃а̄йатанам̣ манаси кареййа, на невасан̃н̃а̄на̄сан̃н̃а̄йатанам̣ манаси кареййа, на идхалокам̣ манаси кареййа, на паралокам̣ манаси кареййа, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тампи на манаси кареййа; манаси ча пана кареййа̄’’ти.

‘‘йатха̄ катхам̣ пана, бханте, сийа̄ бхиккхуно татха̄рӯпо сама̄дхипат̣ила̄бхо йатха̄ на чаккхум̣ манаси кареййа, на рӯпам̣ манаси кареййа… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тампи на манаси кареййа; манаси ча пана кареййа̄’’ти?

‘‘идха̄нанда, бхиккху евам̣ манаси кароти – ‘етам̣ сантам̣ етам̣ пан̣ӣтам̣, йадидам̣ саббасан̇кха̄расаматхо саббӯпадхипат̣иниссагго тан̣ха̄ккхайо вира̄го ниродхо нибба̄на’нти. евам̣ кхо, а̄нанда, сийа̄ бхиккхуно татха̄рӯпо сама̄дхипат̣ила̄бхо йатха̄ на чаккхум̣ манаси кареййа, на рӯпам̣ манаси кареййа…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тампи на манаси кареййа; манаси ча пана кареййа̄’’ти. ат̣т̣хамам̣.

9. саддхасуттам̣

9. екам̣ самайам̣ бхагава̄ на̄тике вихарати гин̃джака̄васатхе. атха кхо а̄йасма̄ саддхо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо а̄йасмантам̣ саддхам̣ бхагава̄ етадавоча –

‘‘а̄джа̄нӣйаджха̄йитам̣ кхо, саддха, джха̄йа; ма̄ кхал̣ун̇каджха̄йитам̣ [а̄джа̄нӣйаджджха̄йитам̣ кхо саддха джха̄йатха, ма̄ кхал̣ун̇каджджха̄йитам̣ (сӣ. пӣ.)]. катхан̃ча, кхал̣ун̇каджха̄йитам̣ хоти? ассакхал̣ун̇ко хи, саддха, дон̣ийа̄ баддхо [бандхо (сйа̄. ка.)] ‘йавасам̣ йаваса’нти джха̄йати. там̣ кисса хету? на хи, саддха, ассакхал̣ун̇касса дон̣ийа̄ баддхасса евам̣ хоти – ‘ким̣ ну кхо мам̣ аджджа ассадаммаса̄ратхи ка̄ран̣ам̣ ка̄рессати, кимасса̄хам̣ [каммасса̄хам̣ (ка.)] пат̣икаромӣ’ти. со дон̣ийа̄ баддхо ‘йавасам̣ йаваса’нти джха̄йати. евамевам̣ кхо, саддха, идхекаччо пурисакхал̣ун̇ко аран̃н̃агатопи руккхамӯлагатопи сун̃н̃а̄га̄рагатопи ка̄мара̄гапарийут̣т̣хитена четаса̄ вихарати ка̄мара̄гапаретена уппаннасса ча ка̄мара̄гасса ниссаран̣ам̣ йатха̄бхӯтам̣ наппаджа̄на̄ти. со ка̄мара̄гам̣йева антарам̣ катва̄ джха̄йати паджджха̄йати ниджджха̄йати аваджджха̄йати, бйа̄па̄дапарийут̣т̣хитена четаса̄ вихарати… тхинамиддхапарийут̣т̣хитена четаса̄ вихарати… уддхаччакуккуччапарийут̣т̣хитена четаса̄ вихарати… вичикиччха̄парийут̣т̣хитена четаса̄ вихарати вичикиччха̄паретена, уппанна̄йа ча вичикиччха̄йа ниссаран̣ам̣ йатха̄бхӯтам̣ наппаджа̄на̄ти. со вичикиччхам̣йева антарам̣ катва̄ джха̄йати паджджха̄йати ниджджха̄йати аваджджха̄йати. со патхавимпи нисса̄йа джха̄йати, а̄пампи нисса̄йа джха̄йати, теджампи нисса̄йа джха̄йати, ва̄йампи нисса̄йа джха̄йати, а̄ка̄са̄нан̃ча̄йатанампи нисса̄йа джха̄йати, вин̃н̃а̄н̣ан̃ча̄йатанампи нисса̄йа джха̄йати, а̄кин̃чан̃н̃а̄йатанампи нисса̄йа джха̄йати, невасан̃н̃а̄на̄сан̃н̃а̄йатанампи нисса̄йа джха̄йати, идхалокампи нисса̄йа джха̄йати, паралокампи нисса̄йа джха̄йати, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тампи нисса̄йа джха̄йати. евам̣ кхо, саддха, пурисакхал̣ун̇каджха̄йитам̣ хоти.

‘‘катхан̃ча, саддха, а̄джа̄нӣйаджха̄йитам̣ хоти? бхадро хи, саддха, асса̄джа̄нӣйо дон̣ийа̄ баддхо на ‘йавасам̣ йаваса’нти джха̄йати. там̣ кисса хету? бхадрасса хи, саддха, асса̄джа̄нӣйасса дон̣ийа̄ баддхасса евам̣ хоти – ‘ким̣ ну кхо мам̣ аджджа ассадаммаса̄ратхи ка̄ран̣ам̣ ка̄рессати, кимасса̄хам̣ пат̣икаромӣ’ти. со дон̣ийа̄ баддхо на ‘йавасам̣ йаваса’нти джха̄йати. бхадро хи, саддха, асса̄джа̄нӣйо йатха̄ ин̣ам̣ йатха̄ бандхам̣ йатха̄ джа̄ним̣ йатха̄ калим̣ евам̣ патодасса аджджхохаран̣ам̣ саманупассати. евамевам̣ кхо, саддха, бхадро пуриса̄джа̄нӣйо аран̃н̃агатопи руккхамӯлагатопи сун̃н̃а̄га̄рагатопи на ка̄мара̄гапарийут̣т̣хитена четаса̄ вихарати на ка̄мара̄гапаретена, уппаннасса ча ка̄мара̄гасса ниссаран̣ам̣ йатха̄бхӯтам̣ паджа̄на̄ти, на бйа̄па̄дапарийут̣т̣хитена четаса̄ вихарати… на тхинамиддхапарийут̣т̣хитена четаса̄ вихарати… на уддхаччакуккуччапарийут̣т̣хитена четаса̄ вихарати… на вичикиччха̄парийут̣т̣хитена четаса̄ вихарати на вичикиччха̄паретена, уппанна̄йа ча вичикиччха̄йа ниссаран̣ам̣ йатха̄бхӯтам̣ паджа̄на̄ти. со нева патхавим̣ нисса̄йа джха̄йати, на а̄пам̣ нисса̄йа джха̄йати, на теджам̣ нисса̄йа джха̄йати, на ва̄йам̣ нисса̄йа джха̄йати, на а̄ка̄са̄нан̃ча̄йатанам̣ нисса̄йа джха̄йати, на вин̃н̃а̄н̣ан̃ча̄йатанам̣ нисса̄йа джха̄йати, на а̄кин̃чан̃н̃а̄йатанам̣ нисса̄йа джха̄йати, на невасан̃н̃а̄на̄сан̃н̃а̄йатанам̣ нисса̄йа джха̄йати, на идхалокам̣ нисса̄йа джха̄йати, на паралокам̣ нисса̄йа джха̄йати, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тампи нисса̄йа на джха̄йати; джха̄йати ча пана. евам̣ джха̄йин̃ча пана, саддха, бхадрам̣ пуриса̄джа̄нӣйам̣ саинда̄ дева̄ сабрахмака̄ сападжа̄патика̄ а̄рака̄ва намассанти –

‘‘намо те пуриса̄джан̃н̃а, намо те пурисуттама;

йасса те на̄бхиджа̄на̄ма, йампи нисса̄йа джха̄йасӣ’’ти.

евам̣ вутте а̄йасма̄ саддхо бхагавантам̣ етадавоча – ‘‘катхам̣ джха̄йӣ пана, бханте, бхадро пуриса̄джа̄нӣйо [пуриса̄джа̄нӣйо джха̄йати, со (сӣ. сйа̄. пӣ.), пуриса̄джа̄нӣйо, со (ка.)] нева патхавим̣ нисса̄йа джха̄йати, на а̄пам̣ нисса̄йа джха̄йати, на теджам̣ нисса̄йа джха̄йати, на ва̄йам̣ нисса̄йа джха̄йати, на а̄ка̄са̄нан̃ча̄йатанам̣ нисса̄йа джха̄йати, на вин̃н̃а̄н̣ан̃ча̄йатанам̣ нисса̄йа джха̄йати, на а̄кин̃чан̃н̃а̄йатанам̣ нисса̄йа джха̄йати, на невасан̃н̃а̄на̄сан̃н̃а̄йатанам̣ нисса̄йа джха̄йати, на идхалокам̣ нисса̄йа джха̄йати, на паралокам̣ нисса̄йа джха̄йати, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тампи нисса̄йа на джха̄йати; джха̄йати ча пана? катхам̣ джха̄йин̃ча пана, бханте, бхадрам̣ пуриса̄джа̄нӣйам̣ саинда̄ дева̄ сабрахмака̄ сападжа̄патика̄ а̄рака̄ва намассанти –

‘‘намо те пуриса̄джан̃н̃а, намо те пурисуттама;

йасса те на̄бхиджа̄на̄ма, йампи нисса̄йа джха̄йасӣ’’ти.

‘‘идха, саддха, бхадрасса пуриса̄джа̄нӣйасса патхавийам̣ патхависан̃н̃а̄ вибхӯта̄ хоти, а̄пасмим̣ а̄посан̃н̃а̄ вибхӯта̄ хоти, теджасмим̣ теджосан̃н̃а̄ вибхӯта̄ хоти, ва̄йасмим̣ ва̄йосан̃н̃а̄ вибхӯта̄ хоти, а̄ка̄са̄нан̃ча̄йатане а̄ка̄са̄нан̃ча̄йатанасан̃н̃а̄ вибхӯта̄ хоти, вин̃н̃а̄н̣ан̃ча̄йатане вин̃н̃а̄н̣ан̃ча̄йатанасан̃н̃а̄ вибхӯта̄ хоти, а̄кин̃чан̃н̃а̄йатане а̄кин̃чан̃н̃а̄йатанасан̃н̃а̄ вибхӯта̄ хоти, невасан̃н̃а̄на̄сан̃н̃а̄йатане невасан̃н̃а̄на̄сан̃н̃а̄йатанасан̃н̃а̄ вибхӯта̄ хоти, идхалоке идхалокасан̃н̃а̄ вибхӯта̄ хоти, паралоке паралокасан̃н̃а̄ вибхӯта̄ хоти, йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, татра̄пи сан̃н̃а̄ вибхӯта̄ хоти. евам̣ джха̄йӣ кхо, саддха, бхадро пуриса̄джа̄нӣйо нева патхавим̣ нисса̄йа джха̄йати…пе… йампидам̣ дит̣т̣хам̣ сутам̣ мутам̣ вин̃н̃а̄там̣ паттам̣ парийеситам̣ анувичаритам̣ манаса̄, тампи нисса̄йа на джха̄йати; джха̄йати ча пана. евам̣ джха̄йин̃ча пана, саддха, бхадрам̣ пуриса̄джа̄нӣйам̣ саинда̄ дева̄ сабрахмака̄ сападжа̄патика̄ а̄рака̄ва намассанти –

‘‘намо те пуриса̄джан̃н̃а, намо те пурисуттама;

йасса те на̄бхиджа̄на̄ма, йампи нисса̄йа джха̄йасӣ’’ти. навамам̣;

10. моранива̄пасуттам̣

10. екам̣ самайам̣ бхагава̄ ра̄джагахе вихарати моранива̄пе парибба̄джака̄ра̄ме. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘тӣхи, бхиккхаве, дхаммехи саманна̄гато бхиккху аччантанит̣т̣хо хоти аччантайогаккхемӣ аччантабрахмача̄рӣ аччантапарийоса̄но сет̣т̣хо деваманусса̄нам̣. катамехи тӣхи? асекхена сӣлаккхандхена, асекхена сама̄дхиккхандхена, асекхена пан̃н̃а̄ккхандхена – имехи, кхо, бхиккхаве, тӣхи дхаммехи саманна̄гато бхиккху аччантанит̣т̣хо хоти аччантайогаккхемӣ аччантабрахмача̄рӣ аччантапарийоса̄но сет̣т̣хо деваманусса̄нам̣.

‘‘апарехипи, бхиккхаве, тӣхи дхаммехи саманна̄гато бхиккху аччантанит̣т̣хо хоти аччантайогаккхемӣ аччантабрахмача̄рӣ аччантапарийоса̄но сет̣т̣хо деваманусса̄нам̣. катамехи тӣхи? иддхипа̄т̣иха̄рийена, а̄десана̄па̄т̣иха̄рийена, ануса̄санӣпа̄т̣иха̄рийена – имехи кхо, бхиккхаве, тӣхи дхаммехи саманна̄гато бхиккху аччантанит̣т̣хо хоти, аччантайогаккхемӣ аччантабрахмача̄рӣ аччантапарийоса̄но сет̣т̣хо деваманусса̄нам̣.

‘‘апарехипи, бхиккхаве, тӣхи дхаммехи саманна̄гато бхиккху аччантанит̣т̣хо хоти аччантайогаккхемӣ аччантабрахмача̄рӣ аччантапарийоса̄но сет̣т̣хо деваманусса̄нам̣. катамехи тӣхи? самма̄дит̣т̣хийа̄, самма̄н̃а̄н̣ена, самма̄вимуттийа̄ – имехи кхо, бхиккхаве, тӣхи дхаммехи саманна̄гато бхиккху аччантанит̣т̣хо хоти аччантайогаккхемӣ аччантабрахмача̄рӣ аччантапарийоса̄но сет̣т̣хо деваманусса̄нам̣.

‘‘двӣхи, бхиккхаве, дхаммехи саманна̄гато бхиккху аччантанит̣т̣хо хоти аччантайогаккхемӣ аччантабрахмача̄рӣ аччантапарийоса̄но сет̣т̣хо деваманусса̄нам̣. катамехи двӣхи? виджджа̄йа, чаран̣ена – имехи кхо, бхиккхаве, двӣхи дхаммехи саманна̄гато бхиккху аччантанит̣т̣хо хоти аччантайогаккхемӣ аччантабрахмача̄рӣ аччантапарийоса̄но сет̣т̣хо деваманусса̄нам̣. брахмуна̄ песа̄, бхиккхаве, санан̇кума̄рена га̄тха̄ бха̄сита̄ –

‘‘кхаттийо сет̣т̣хо джанетасмим̣, йе готтапат̣иса̄рино;

виджджа̄чаран̣асампанно, со сет̣т̣хо девама̄нусе’’ти [дӣ. ни. 1.277; сам̣. ни. 1.182; 2.245].

‘‘са̄ кхо панеса̄, бхиккхаве, санан̇кума̄рена га̄тха̄ бха̄сита̄ субха̄сита̄, но дуббха̄сита̄; аттхасам̣хита̄, но анаттхасам̣хита̄; анумата̄ майа̄. ахампи, бхиккхаве, евам̣ вада̄ми –

‘‘кхаттийо сет̣т̣хо джанетасмим̣, йе готтапат̣иса̄рино;

виджджа̄чаран̣асампанно, со сет̣т̣хо девама̄нусе’’ти. дасамам̣;

ниссайавагго [нисса̄йавагго (сйа̄. кам̣.)] пат̣хамо.