5. виджджа̄суттам̣

105. ‘‘авиджджа̄, бхиккхаве, пуббан̇гама̄ акусала̄нам̣ дхамма̄нам̣ сама̄паттийа̄, анвадева ахирикам̣ аноттаппам̣. авиджджа̄гатасса, бхиккхаве, авиддасуно миччха̄дит̣т̣хи пахоти, миччха̄дит̣т̣хикасса миччха̄сан̇каппо пахоти, миччха̄сан̇каппасса миччха̄ва̄ча̄ пахоти, миччха̄ва̄часса миччха̄камманто пахоти, миччха̄каммантасса миччха̄а̄джӣво пахоти, миччха̄а̄джӣвасса миччха̄ва̄йа̄мо пахоти, миччха̄ва̄йа̄масса миччха̄сати пахоти, миччха̄сатисса миччха̄сама̄дхи пахоти, миччха̄сама̄дхисса миччха̄н̃а̄н̣ам̣ пахоти, миччха̄н̃а̄н̣исса миччха̄вимутти пахоти.

‘‘виджджа̄, бхиккхаве, пуббан̇гама̄ кусала̄нам̣ дхамма̄нам̣ сама̄паттийа̄, анвадева хироттаппам̣. виджджа̄гатасса, бхиккхаве, виддасуно самма̄дит̣т̣хи пахоти, самма̄дит̣т̣хикасса самма̄сан̇каппо пахоти, самма̄сан̇каппасса самма̄ва̄ча̄ пахоти, самма̄ва̄часса самма̄камманто пахоти, самма̄каммантасса самма̄а̄джӣво пахоти, самма̄а̄джӣвасса самма̄ва̄йа̄мо пахоти, самма̄ва̄йа̄масса самма̄сати пахоти, самма̄сатисса самма̄сама̄дхи пахоти, самма̄сама̄дхисса самма̄н̃а̄н̣ам̣ пахоти, самма̄н̃а̄н̣исса самма̄вимутти пахотӣ’’ти. пан̃чамам̣.