6. адхима̄насуттам̣

86. екам̣ самайам̣ а̄йасма̄ маха̄кассапо ра̄джагахе вихарати вел̣уване каландаканива̄пе. татра кхо а̄йасма̄ маха̄кассапо бхиккхӯ а̄мантеси – ‘‘а̄вусо бхиккхаве’’ти. ‘‘а̄вусо’’ти кхо те бхиккхӯ а̄йасмато маха̄кассапасса паччассосум̣. а̄йасма̄ маха̄кассапо етадавоча –

‘‘идха̄вусо, бхиккху ан̃н̃ам̣ бйа̄кароти – ‘кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄ти паджа̄на̄мӣ’ти. таменам̣ татха̄гато ва̄ татха̄гатаса̄вако ва̄ джха̄йӣ сама̄паттикусало парачиттакусало парачиттапарийа̄йакусало самануйун̃джати саманугга̄хати саманубха̄сати. со татха̄гатена ва̄ татха̄гатаса̄вакена ва̄ джха̄йина̄ сама̄паттикусалена парачиттакусалена парачиттапарийа̄йакусалена самануйун̃джийама̄но саманугга̄хийама̄но саманубха̄сийама̄но ирӣн̣ам̣ а̄паджджати вичинам̣ а̄паджджати анайам̣ а̄паджджати бйасанам̣ а̄паджджати анайабйасанам̣ а̄паджджати.

‘‘таменам̣ татха̄гато ва̄ татха̄гатаса̄вако ва̄ джха̄йӣ сама̄паттикусало парачиттакусало парачиттапарийа̄йакусало евам̣ четаса̄ чето паричча манаси кароти – ‘ким̣ ну кхо айама̄йасма̄ ан̃н̃ам̣ бйа̄кароти – кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄ти паджа̄на̄мӣ’ти.

‘‘таменам̣ татха̄гато ва̄ татха̄гатаса̄вако ва̄ джха̄йӣ сама̄паттикусало парачиттакусало парачиттапарийа̄йакусало евам̣ четаса̄ чето паричча паджа̄на̄ти –

‘адхима̄нико кхо айама̄йасма̄ адхима̄насаччо, аппатте паттасан̃н̃ӣ, акате катасан̃н̃ӣ, анадхигате адхигатасан̃н̃ӣ. адхима̄нена ан̃н̃ам̣ бйа̄кароти – кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄ти паджа̄на̄мӣ’ти.

‘‘таменам̣ татха̄гато ва̄ татха̄гатаса̄вако ва̄ джха̄йӣ сама̄паттикусало парачиттакусало парачиттапарийа̄йакусало евам̣ четаса̄ чето паричча манаси кароти – ‘ким̣ ну кхо айама̄йасма̄ нисса̄йа адхима̄нико адхима̄насаччо, аппатте паттасан̃н̃ӣ, акате катасан̃н̃ӣ, анадхигате адхигатасан̃н̃ӣ. адхима̄нена ан̃н̃ам̣ бйа̄кароти – кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄ти паджа̄на̄мӣ’ти.

‘бахуссуто кхо пана айама̄йасма̄ сутадхаро сутасанничайо, йе те дхамма̄ а̄дикалйа̄н̣а̄ маджджхекалйа̄н̣а̄ парийоса̄накалйа̄н̣а̄ са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ абхиваданти, татха̄рӯпа̄сса дхамма̄ бахуссута̄ хонти дха̄та̄ вачаса̄ паричита̄ манаса̄нупеккхита̄ дит̣т̣хийа̄ суппат̣ивиддха̄. тасма̄ айама̄йасма̄ адхима̄нико адхима̄насаччо, аппатте паттасан̃н̃ӣ, акате катасан̃н̃ӣ, анадхигате адхигатасан̃н̃ӣ. адхима̄нена ан̃н̃ам̣ бйа̄кароти – кхӣн̣а̄ джа̄ти, вуситам̣ брахмачарийам̣, катам̣ каран̣ӣйам̣, на̄парам̣ иттхатта̄йа̄ти паджа̄на̄мӣ’ти.

‘абхиджджха̄лу кхо пана айама̄йасма̄; абхиджджха̄парийут̣т̣хитена четаса̄ бахулам̣ вихарати. абхиджджха̄парийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘бйа̄панно кхо пана айама̄йасма̄; бйа̄па̄дапарийут̣т̣хитена четаса̄ бахулам̣ вихарати. бйа̄па̄дапарийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘тхинамиддхо кхо пана айама̄йасма̄; тхинамиддхапарийут̣т̣хитена четаса̄ бахулам̣ вихарати. тхинамиддхапарийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘уддхато кхо пана айама̄йасма̄; уддхаччапарийут̣т̣хитена четаса̄ бахулам̣ вихарати. уддхаччапарийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘вичикиччхо кхо пана айама̄йасма̄; вичикиччха̄парийут̣т̣хитена четаса̄ бахулам̣ вихарати. вичикиччха̄парийут̣т̣ха̄нам̣ кхо пана татха̄гатаппаведите дхаммавинайе париха̄наметам̣.

‘камма̄ра̄мо кхо пана айама̄йасма̄ каммарато камма̄ра̄матам̣ ануйутто. камма̄ра̄мата̄ кхо пана татха̄гатаппаведите дхаммавинайе париха̄наметам̣.

‘бхасса̄ра̄мо кхо пана айама̄йасма̄ бхассарато бхасса̄ра̄матам̣ ануйутто. бхасса̄ра̄мата̄ кхо пана татха̄гатаппаведите дхаммавинайе париха̄наметам̣.

‘нидда̄ра̄мо кхо пана айама̄йасма̄ нидда̄рато нидда̄ра̄матам̣ ануйутто. нидда̄ра̄мата̄ кхо пана татха̄гатаппаведите дхаммавинайе париха̄наметам̣.

‘сан̇ган̣ика̄ра̄мо кхо пана айама̄йасма̄ сан̇ган̣икарато сан̇ган̣ика̄ра̄матам̣ ануйутто. сан̇ган̣ика̄ра̄мата̄ кхо пана татха̄гатаппаведите дхаммавинайе париха̄наметам̣.

‘сати кхо пана айама̄йасма̄ уттари каран̣ӣйе ораматтакена висеса̄дхигамена антара̄ воса̄нам̣ а̄панно. антара̄ воса̄нагаманам̣ кхо пана татха̄гатаппаведите дхаммавинайе париха̄наметам̣’.

‘‘со вата̄вусо, бхиккху ‘име даса дхамме аппаха̄йа имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати. со вата̄вусо, бхиккху ‘име даса дхамме паха̄йа имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджатӣ’’ти. чхат̣т̣хам̣.