2. а̄нандасуттам̣

82. атха кхо а̄йасма̄ а̄нандо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо а̄йасмантам̣ а̄нандам̣ бхагава̄ етадавоча –

‘‘со вата̄нанда, бхиккху ‘ассаддхо сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘дуссӣло сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘аппассуто сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘дуббачо сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘па̄памитто сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘кусӣто сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘мут̣т̣хассати сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘асантут̣т̣хо сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘па̄пиччхо сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘миччха̄дит̣т̣хико сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘имехи дасахи дхаммехи саманна̄гато имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти нетам̣ т̣ха̄нам̣ виджджати.

‘‘со вата̄нанда, бхиккху ‘саддхо сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘сӣлава̄ сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘бахуссуто сутадхаро сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘сувачо сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘калйа̄н̣амитто сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘а̄раддхавӣрийо сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘упат̣т̣хитассати сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘сантут̣т̣хо сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘аппиччхо сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘самма̄дит̣т̣хико сама̄но имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджати.

‘‘со вата̄нанда, бхиккху ‘имехи дасахи дхаммехи саманна̄гато имасмим̣ дхаммавинайе вуддхим̣ вирӯл̣хим̣ вепуллам̣ а̄паджджиссатӣ’ти т̣ха̄наметам̣ виджджатӣ’’ти. дутийам̣.