3. ит̣т̣хадхаммасуттам̣

73. ‘‘дасайиме, бхиккхаве, дхамма̄ ит̣т̣ха̄ канта̄ мана̄па̄ дуллабха̄ локасмим̣. катаме даса? бхога̄ ит̣т̣ха̄ канта̄ мана̄па̄ дуллабха̄ локасмим̣; ван̣н̣о ит̣т̣хо канто мана̄по дуллабхо локасмим̣; а̄рогйам̣ ит̣т̣хам̣ кантам̣ мана̄пам̣ дуллабхам̣ локасмим̣; сӣлам̣ ит̣т̣хам̣ кантам̣ мана̄пам̣ дуллабхам̣ локасмим̣; брахмачарийам̣ ит̣т̣хам̣ кантам̣ мана̄пам̣ дуллабхам̣ локасмим̣; митта̄ ит̣т̣ха̄ канта̄ мана̄па̄ дуллабха̄ локасмим̣; ба̄хусаччам̣ ит̣т̣хам̣ кантам̣ мана̄пам̣ дуллабхам̣ локасмим̣; пан̃н̃а̄ ит̣т̣ха̄ канта̄ мана̄па̄ дуллабха̄ локасмим̣; дхамма̄ ит̣т̣ха̄ канта̄ мана̄па̄ дуллабха̄ локасмим̣; сагга̄ ит̣т̣ха̄ канта̄ мана̄па̄ дуллабха̄ локасмим̣.

‘‘имесам̣ кхо, бхиккхаве, дасаннам̣ дхамма̄нам̣ ит̣т̣ха̄нам̣ канта̄нам̣ мана̄па̄нам̣ дуллабха̄нам̣ локасмим̣ даса дхамма̄ парипантха̄ [парибандха̄ (ка.)] – а̄ласйам̣ анут̣т̣ха̄нам̣ бхога̄нам̣ парипантхо, аман̣д̣ана̄ авибхӯсана̄ ван̣н̣асса парипантхо, асаппа̄йакирийа̄ а̄рогйасса парипантхо, па̄памиттата̄ сӣла̄нам̣ парипантхо, индрийаасам̣варо брахмачарийасса парипантхо, висам̣ва̄дана̄ митта̄нам̣ парипантхо, асаджджха̄йакирийа̄ ба̄хусаччасса парипантхо, асуссӯса̄ апарипуччха̄ пан̃н̃а̄йа парипантхо, анануйого апаччавеккхан̣а̄ дхамма̄нам̣ парипантхо, миччха̄пат̣ипатти сагга̄нам̣ парипантхо. имесам̣ кхо, бхиккхаве, дасаннам̣ ит̣т̣ха̄нам̣ канта̄нам̣ мана̄па̄нам̣ дуллабха̄нам̣ локасмим̣ име даса дхамма̄ парипантха̄.

‘‘имесам̣ кхо, бхиккхаве, дасаннам̣ дхамма̄нам̣ ит̣т̣ха̄нам̣ канта̄нам̣ мана̄па̄нам̣ дуллабха̄нам̣ локасмим̣ даса дхамма̄ а̄ха̄ра̄ – ут̣т̣ха̄нам̣ ана̄ласйам̣ бхога̄нам̣ а̄ха̄ро, ман̣д̣ана̄ вибхӯсана̄ ван̣н̣асса а̄ха̄ро, саппа̄йакирийа̄ а̄рогйасса а̄ха̄ро, калйа̄н̣амиттата̄ сӣла̄нам̣ а̄ха̄ро, индрийасам̣варо брахмачарийасса а̄ха̄ро, ависам̣ва̄дана̄ митта̄нам̣ а̄ха̄ро, саджджха̄йакирийа̄ ба̄хусаччасса а̄ха̄ро, суссӯса̄ парипуччха̄ пан̃н̃а̄йа а̄ха̄ро, ануйого паччавеккхан̣а̄ дхамма̄нам̣ а̄ха̄ро, самма̄пат̣ипатти сагга̄нам̣ а̄ха̄ро. имесам̣ кхо, бхиккхаве, дасаннам̣ дхамма̄нам̣ ит̣т̣ха̄нам̣ канта̄нам̣ мана̄па̄нам̣ дуллабха̄нам̣ локасмим̣ име даса дхамма̄ а̄ха̄ра̄’’ти. татийам̣.