3. нит̣т̣хан̇гатасуттам̣

63. ‘‘йе кечи, бхиккхаве, майи нит̣т̣хам̣ гата̄ саббе те дит̣т̣хисампанна̄. тесам̣ дит̣т̣хисампанна̄нам̣ пан̃чаннам̣ идха нит̣т̣ха̄, пан̃чаннам̣ идха виха̄йа нит̣т̣ха̄. катамесам̣ пан̃чаннам̣ идха нит̣т̣ха̄? саттаккхаттупарамасса, колам̣коласса, екабӣджисса, сакада̄га̄мисса, йо ча дит̣т̣хева дхамме араха̄ – имесам̣ пан̃чаннам̣ идха нит̣т̣ха̄. катамесам̣ пан̃чаннам̣ идха виха̄йа нит̣т̣ха̄? антара̄паринибба̄йисса, упахаччапаринибба̄йисса, асан̇кха̄рапаринибба̄йисса, сасан̇кха̄рапаринибба̄йисса, уддхам̣сотасса аканит̣т̣хага̄мино – имесам̣ пан̃чаннам̣ идха виха̄йа нит̣т̣ха̄. йе кечи, бхиккхаве, майи нит̣т̣хам̣ гата̄, саббе те дит̣т̣хисампанна̄. тесам̣ дит̣т̣хисампанна̄нам̣ имесам̣ пан̃чаннам̣ идха нит̣т̣ха̄, имесам̣ пан̃чаннам̣ идха виха̄йа нит̣т̣ха̄’’ти. татийам̣.