1. авиджджа̄суттам̣

61. ‘‘пурима̄, бхиккхаве, кот̣и на пан̃н̃а̄йати авиджджа̄йа – ‘ито пуббе авиджджа̄ на̄хоси, атха паччха̄ самабхавӣ’ти. еван̃четам̣, бхиккхаве, вуччати, атха ча пана пан̃н̃а̄йати – ‘идаппаччайа̄ авиджджа̄’ти.

‘‘авиджджампа̄хам̣ [авиджджампахам̣ (сӣ. сйа̄.)], бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро авиджджа̄йа? ‘пан̃ча нӣваран̣а̄’тисса вачанӣйам̣. пан̃чапа̄хам̣, бхиккхаве, нӣваран̣е са̄ха̄ре вада̄ми, но ана̄ха̄ре. ко ча̄ха̄ро пан̃чаннам̣ нӣваран̣а̄нам̣? ‘тӣн̣и дуччарита̄нӣ’тисса вачанӣйам̣. тӣн̣ипа̄хам̣, бхиккхаве, дуччарита̄ни са̄ха̄ра̄ни вада̄ми, но ана̄ха̄ра̄ни. ко ча̄ха̄ро тин̣н̣ам̣ дуччарита̄нам̣? ‘индрийаасам̣варо’тисса вачанӣйам̣. индрийаасам̣варампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро индрийаасам̣варасса? ‘асата̄сампаджан̃н̃а’нтисса вачанӣйам̣. асата̄сампаджан̃н̃ампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро асата̄сампаджан̃н̃асса? ‘айонисоманасика̄ро’тисса вачанӣйам̣. айонисоманасика̄рампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро айонисоманасика̄расса? ‘ассаддхийа’нтисса вачанӣйам̣. ассаддхийампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро ассаддхийасса? ‘асаддхаммассавана’нтисса вачанӣйам̣. асаддхаммассаванампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро асаддхаммассаванасса? ‘асаппурисасам̣сево’тисса вачанӣйам̣.

‘‘ити кхо, бхиккхаве, асаппурисасам̣сево парипӯро асаддхаммассаванам̣ парипӯрети, асаддхаммассаванам̣ парипӯрам̣ ассаддхийам̣ парипӯрети, ассаддхийам̣ парипӯрам̣ айонисоманасика̄рам̣ парипӯрети, айонисоманасика̄ро парипӯро асата̄сампаджан̃н̃ам̣ парипӯрети, асата̄сампаджан̃н̃ам̣ парипӯрам̣ индрийаасам̣варам̣ парипӯрети, индрийаасам̣варо парипӯро тӣн̣и дуччарита̄ни парипӯрети, тӣн̣и дуччарита̄ни парипӯра̄ни пан̃ча нӣваран̣е парипӯренти, пан̃ча нӣваран̣а̄ парипӯра̄ авиджджам̣ парипӯренти. еваметисса̄ авиджджа̄йа а̄ха̄ро хоти, еван̃ча па̄рипӯри.

‘‘сеййатха̄пи, бхиккхаве, упарипаббате тхуллапхуситаке деве вассанте ( ) [(галагала̄йанте) (сӣ.), (гал̣агал̣а̄йанте) (сйа̄.)] там̣ удакам̣ йатха̄ниннам̣ паваттама̄нам̣ паббатакандарападараса̄кха̄ парипӯрети, паббатакандарападараса̄кха̄ парипӯра̄ кусоббхе [куссуббхе (сӣ.), кусуббхе (сйа̄.), кусомбхе (ка.) а. ни. 3.96] парипӯренти. кусоббха̄ парипӯра̄ маха̄соббхе [маха̄сомбхе (ка.)] парипӯренти, маха̄соббха̄ парипӯра̄ куннадийо парипӯренти, куннадийо парипӯра̄ маха̄надийо парипӯренти, маха̄надийо парипӯра̄ маха̄самуддам̣ са̄гарам̣ парипӯренти; еваметасса маха̄самуддасса са̄гарасса а̄ха̄ро хоти, еван̃ча па̄рипӯри.

‘‘евамевам̣ кхо, бхиккхаве, асаппурисасам̣сево парипӯро асаддхаммассаванам̣ парипӯрети, асаддхаммассаванам̣ парипӯрам̣ ассаддхийам̣ парипӯрети, ассаддхийам̣ парипӯрам̣ айонисоманасика̄рам̣ парипӯрети, айонисоманасика̄ро парипӯро асата̄сампаджан̃н̃ам̣ парипӯрети, асата̄сампаджан̃н̃ам̣ парипӯрам̣ индрийаасам̣варам̣ парипӯрети, индрийаасам̣варо парипӯро тӣн̣и дуччарита̄ни парипӯрети, тӣн̣и дуччарита̄ни парипӯра̄ни пан̃ча нӣваран̣е парипӯренти, пан̃ча нӣваран̣а̄ парипӯра̄ авиджджам̣ парипӯренти; еваметисса̄ авиджджа̄йа а̄ха̄ро хоти, еван̃ча па̄рипӯри.

‘‘виджджа̄вимуттимпа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро виджджа̄вимуттийа̄? ‘сатта боджджхан̇га̄’тисса вачанӣйам̣. саттапа̄хам̣, бхиккхаве, боджджхан̇ге са̄ха̄ре вада̄ми, но ана̄ха̄ре. ко ча̄ха̄ро саттаннам̣ боджджхан̇га̄нам̣? ‘чатта̄ро сатипат̣т̣ха̄на̄’тисса вачанӣйам̣. чатта̄ропа̄хам̣, бхиккхаве, сатипат̣т̣ха̄не са̄ха̄ре вада̄ми, но ана̄ха̄ре. ко ча̄ха̄ро чатуннам̣ сатипат̣т̣ха̄на̄нам̣? ‘тӣн̣и сучарита̄нӣ’тисса вачанӣйам̣. тӣн̣ипа̄хам̣, бхиккхаве, сучарита̄ни са̄ха̄ра̄ни вада̄ми, но ана̄ха̄ра̄ни. ко ча̄ха̄ро тин̣н̣ам̣ сучарита̄нам̣? ‘индрийасам̣варо’тисса вачанӣйам̣. индрийасам̣варампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро индрийасам̣варасса? ‘сатисампаджан̃н̃а’нтисса вачанӣйам̣. сатисампаджан̃н̃ампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро сатисампаджан̃н̃асса? ‘йонисоманасика̄ро’тисса вачанӣйам̣. йонисоманасика̄рампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро йонисоманасика̄расса? ‘саддха̄’тисса вачанӣйам̣. саддхампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро саддха̄йа? ‘саддхаммассавана’нтисса вачанӣйам̣. саддхаммассаванампа̄хам̣, бхиккхаве, са̄ха̄рам̣ вада̄ми, но ана̄ха̄рам̣. ко ча̄ха̄ро саддхаммассаванасса? ‘саппурисасам̣сево’тисса вачанӣйам̣.

‘‘ити кхо, бхиккхаве, саппурисасам̣сево парипӯро саддхаммассаванам̣ парипӯрети, саддхаммассаванам̣ парипӯрам̣ саддхам̣ парипӯрети, саддха̄ парипӯра̄ йонисоманасика̄рам̣ парипӯрети, йонисоманасика̄ро парипӯро сатисампаджан̃н̃ам̣ парипӯрети, сатисампаджан̃н̃ам̣ парипӯрам̣ индрийасам̣варам̣ парипӯрети, индрийасам̣варо парипӯро тӣн̣и сучарита̄ни парипӯрети, тӣн̣и сучарита̄ни парипӯра̄ни чатта̄ро сатипат̣т̣ха̄не парипӯренти, чатта̄ро сатипат̣т̣ха̄на̄ парипӯра̄ сатта боджджхан̇ге парипӯренти, сатта боджджхан̇га̄ парипӯра̄ виджджа̄вимуттим̣ парипӯренти; еваметисса̄ виджджа̄вимуттийа̄ а̄ха̄ро хоти, еван̃ча па̄рипӯри.

‘‘сеййатха̄пи, бхиккхаве, упарипаббате тхуллапхуситаке деве вассанте там̣ удакам̣ йатха̄ниннам̣ паваттама̄нам̣ паббатакандарападараса̄кха̄ парипӯрети, паббатакандарападараса̄кха̄ парипӯра̄ кусоббхе парипӯренти, кусоббха̄ парипӯра̄ маха̄соббхе парипӯренти, маха̄соббха̄ парипӯра̄ куннадийо парипӯренти, куннадийо парипӯра̄ маха̄надийо парипӯренти, маха̄надийо парипӯра̄ маха̄самуддам̣ са̄гарам̣ парипӯренти; еваметасса маха̄самуддасса са̄гарасса а̄ха̄ро хоти, еван̃ча па̄рипӯри.

‘‘евамевам̣ кхо, бхиккхаве, саппурисасам̣сево парипӯро саддхаммассаванам̣ парипӯрети, саддхаммассаванам̣ парипӯрам̣ саддхам̣ парипӯрети, саддха̄ парипӯра̄ йонисоманасика̄рам̣ парипӯрети, йонисоманасика̄ро парипӯро сатисампаджан̃н̃ам̣ парипӯрети, сатисампаджан̃н̃ам̣ парипӯрам̣ индрийасам̣варам̣ парипӯрети, индрийасам̣варо парипӯро тӣн̣и сучарита̄ни парипӯрети, тӣн̣и сучарита̄ни парипӯра̄ни чатта̄ро сатипат̣т̣ха̄не парипӯренти, чатта̄ро сатипат̣т̣ха̄на̄ парипӯра̄ сатта боджджхан̇ге парипӯренти, сатта боджджхан̇га̄ парипӯра̄ виджджа̄вимуттим̣ парипӯренти; еваметисса̄ виджджа̄вимуттийа̄ а̄ха̄ро хоти, еван̃ча па̄рипӯрӣ’’ти. пат̣хамам̣.