5. ра̄джантепураппавесанасуттам̣

45. [па̄чи. 497] ‘‘дасайиме, бхиккхаве, а̄дӣнава̄ ра̄джантепураппавесане. катаме даса? идха, бхиккхаве, ра̄джа̄ махесийа̄ саддхим̣ нисинно хоти. татра бхиккху пависати. махесӣ ва̄ бхиккхум̣ дисва̄ ситам̣ па̄тукароти, бхиккху ва̄ махесим̣ дисва̄ ситам̣ па̄тукароти. таттха ран̃н̃о евам̣ хоти – ‘аддха̄ имесам̣ катам̣ ва̄ кариссанти ва̄’ти! айам̣, бхиккхаве, пат̣хамо а̄дӣнаво ра̄джантепураппавесане.

‘‘пуна чапарам̣, бхиккхаве, ра̄джа̄ бахукиччо бахукаран̣ӣйо ан̃н̃атарам̣ иттхим̣ гантва̄ на сарати – ‘са̄ тена габбхам̣ ган̣ха̄ти’. таттха ран̃н̃о евам̣ хоти – ‘на кхо идха ан̃н̃о кочи пависати, ан̃н̃атра паббаджитена. сийа̄ ну кхо паббаджитасса камма’нти. айам̣, бхиккхаве, дутийо а̄дӣнаво ра̄джантепураппавесане.

‘‘пуна чапарам̣, бхиккхаве, ран̃н̃о антепуре ан̃н̃атарам̣ ратанам̣ нассати. таттха ран̃н̃о евам̣ хоти – ‘на кхо идха ан̃н̃о кочи пависати, ан̃н̃атра паббаджитена. сийа̄ ну кхо паббаджитасса камма’нти. айам̣, бхиккхаве, татийо а̄дӣнаво ра̄джантепураппавесане.

‘‘пуна чапарам̣, бхиккхаве, ран̃н̃о антепуре аббхантара̄ гуйхаманта̄ бахиддха̄ самбхедам̣ гаччханти. таттха ран̃н̃о евам̣ хоти – ‘на кхо идха ан̃н̃о кочи пависати, ан̃н̃атра паббаджитена. сийа̄ ну кхо паббаджитасса камма’нти. айам̣, бхиккхаве, чатуттхо а̄дӣнаво ра̄джантепураппавесане.

‘‘пуна чапарам̣, бхиккхаве, ран̃н̃о антепуре пита̄ ва̄ путтам̣ паттхети путто ва̄ питарам̣ паттхети. тесам̣ евам̣ хоти – ‘на кхо идха ан̃н̃о кочи пависати, ан̃н̃атра паббаджитена. сийа̄ ну кхо паббаджитасса камма’нти. айам̣, бхиккхаве, пан̃чамо а̄дӣнаво ра̄джантепураппавесане.

‘‘пуна чапарам̣, бхиккхаве, ра̄джа̄ нӣчат̣т̣ха̄нийам̣ учче т̣ха̄не т̣хапети. йесам̣ там̣ амана̄пам̣ тесам̣ евам̣ хоти – ‘ра̄джа̄ кхо паббаджитена сам̣сат̣т̣хо. сийа̄ ну кхо паббаджитасса камма’нти. айам̣, бхиккхаве, чхат̣т̣хо а̄дӣнаво ра̄джантепураппавесане.

‘‘пуна чапарам̣, бхиккхаве, ра̄джа̄ уччат̣т̣ха̄нийам̣ нӣче т̣ха̄не т̣хапети. йесам̣ там̣ амана̄пам̣ тесам̣ евам̣ хоти – ‘ра̄джа̄ кхо паббаджитена сам̣сат̣т̣хо. сийа̄ ну кхо паббаджитасса камма’нти. айам̣, бхиккхаве, саттамо а̄дӣнаво ра̄джантепураппавесане.

‘‘пуна чапарам̣, бхиккхаве, ра̄джа̄ ака̄ле сенам̣ уййоджети. йесам̣ там̣ амана̄пам̣ тесам̣ евам̣ хоти – ‘ра̄джа̄ кхо паббаджитена сам̣сат̣т̣хо. сийа̄ ну кхо паббаджитасса камма’нти. айам̣, бхиккхаве, ат̣т̣хамо а̄дӣнаво ра̄джантепураппавесане.

‘‘пуна чапарам̣, бхиккхаве, ра̄джа̄ ка̄ле сенам̣ уййоджетва̄ антара̄маггато ниватта̄пети. йесам̣ там̣ амана̄пам̣ тесам̣ евам̣ хоти – ‘ра̄джа̄ кхо паббаджитена сам̣сат̣т̣хо. сийа̄ ну кхо паббаджитасса камма’нти. айам̣, бхиккхаве, навамо а̄дӣнаво ра̄джантепураппавесане.

‘‘пуна чапарам̣, бхиккхаве, ран̃н̃о антепурам̣ хаттхисаммаддам̣ ассасаммаддам̣ ратхасаммаддам̣ раджанӣйа̄ни рӯпасаддагандхарасапхот̣т̣хабба̄ни, йа̄ни на паббаджитасса са̄руппа̄ни. айам̣, бхиккхаве, дасамо а̄дӣнаво ра̄джантепураппавесане. име кхо, бхиккхаве, даса а̄дӣнава̄ ра̄джантепураппавесане’’ти. пан̃чамам̣.