6. саккасуттам̣

46. екам̣ самайам̣ бхагава̄ саккесу вихарати капилаваттхусмим̣ нигродха̄ра̄ме. атха кхо самбахула̄ сакка̄ упа̄сака̄ тадахупосатхе йена бхагава̄ тенупасан̇камим̣су; упасан̇камитва̄ бхагавантам̣ абхива̄детва̄ екамантам̣ нисӣдим̣су. екамантам̣ нисинне кхо сакке упа̄саке бхагава̄ етадавоча – ‘‘апи ну тумхе, сакка̄, ат̣т̣хан̇гасаманна̄гатам̣ упосатхам̣ упавасатха̄’’ти? ‘‘аппекада̄ майам̣, бханте, ат̣т̣хан̇гасаманна̄гатам̣ упосатхам̣ упаваса̄ма, аппекада̄ на упаваса̄ма̄’’ти. ‘‘тесам̣ во, сакка̄, ала̄бха̄ тесам̣ дулладдхам̣, йе тумхе евам̣ сокасабхайе джӣвите маран̣асабхайе джӣвите аппекада̄ ат̣т̣хан̇гасаманна̄гатам̣ упосатхам̣ упавасатха, аппекада̄ на упавасатха.

‘‘там̣ ким̣ ман̃н̃атха, сакка̄, идха пурисо йена кеначи каммат̣т̣ха̄нена ана̄паджджа акусалам̣ дивасам̣ ад̣д̣хакаха̄пан̣ам̣ ниббисеййа. даккхо пурисо ут̣т̣ха̄насампанноти алам̣ вачана̄йа̄’’ти? ‘‘евам̣, бханте’’.

‘‘там̣ ким̣ ман̃н̃атха, сакка̄, идха пурисо йена кеначи каммат̣т̣ха̄нена ана̄паджджа акусалам̣ дивасам̣ каха̄пан̣ам̣ ниббисеййа. даккхо пурисо ут̣т̣ха̄насампанноти алам̣ вачана̄йа̄’’ти? ‘‘евам̣, бханте’’.

‘‘там̣ ким̣, ман̃н̃атха, сакка̄, идха пурисо йена кеначи каммат̣т̣ха̄нена ана̄паджджа акусалам̣ дивасам̣ две каха̄пан̣е ниббисеййа … тайо каха̄пан̣е ниббисеййа… чатта̄ро каха̄пан̣е ниббисеййа… пан̃ча каха̄пан̣е ниббисеййа… чха каха̄пан̣е ниббисеййа… сатта каха̄пан̣е ниббисеййа… ат̣т̣ха каха̄пан̣е ниббисеййа… нава каха̄пан̣е ниббисеййа… даса каха̄пан̣е ниббисеййа… вӣса каха̄пан̣е ниббисеййа… тим̣са каха̄пан̣е ниббисеййа… чатта̄рӣсам̣ каха̄пан̣е ниббисеййа… пан̃н̃а̄сам̣ каха̄пан̣е ниббисеййа… каха̄пан̣асатам̣ ниббисеййа. даккхо пурисо ут̣т̣ха̄насампанноти алам̣ вачана̄йа̄’’ти? ‘‘евам̣, бханте’’.

‘‘там̣ ким̣ ман̃н̃атха, сакка̄, апи ну со пурисо дивасе дивасе каха̄пан̣асатам̣ каха̄пан̣асахассам̣ ниббисама̄но ладдхам̣ ладдхам̣ никкхипанто вассасата̄йуко вассасатаджӣвӣ махантам̣ бхогаккхандхам̣ адхигаччхеййа̄’’ти? ‘‘евам̣, бханте’’.

‘‘там̣ ким̣ ман̃н̃атха, сакка̄, апи ну со пурисо бхогахету бхоганида̄нам̣ бхога̄дхикаран̣ам̣ екам̣ ва̄ раттим̣ екам̣ ва̄ дивасам̣ упад̣д̣хам̣ ва̄ раттим̣ упад̣д̣хам̣ ва̄ дивасам̣ екантасукхаппат̣исам̣ведӣ вихареййа̄’’ти? ‘‘но хетам̣, бханте’’. ‘‘там̣ кисса хету’’? ‘‘ка̄ма̄ хи, бханте, аничча̄ туччха̄ муса̄ мосадхамма̄’’ти.

‘‘идха пана во, сакка̄, мама са̄вако даса васса̄ни аппаматто а̄та̄пӣ пахитатто вихаранто йатха̄ майа̄нусит̣т̣хам̣ татха̄ пат̣ипаджджама̄но сатампи васса̄ни сатампи вассасата̄ни сатампи вассасахасса̄ни екантасукхаппат̣исам̣ведӣ вихареййа. со ча кхвасса сакада̄га̄мӣ ва̄ ана̄га̄мӣ ва̄ апан̣н̣акам̣ ва̄ сота̄панно. тит̣т̣ханту, сакка̄, даса васса̄ни.

идха мама са̄вако нава васса̄ни… ат̣т̣ха васса̄ни… сатта васса̄ни… чха васса̄ни… пан̃ча васса̄ни чатта̄ри васса̄ни… тӣн̣и васса̄ни… две васса̄ни… екам̣ вассам̣ аппаматто а̄та̄пӣ пахитатто вихаранто йатха̄ майа̄нусит̣т̣хам̣ татха̄ пат̣ипаджджама̄но сатампи васса̄ни сатампи вассасата̄ни сатампи вассасахасса̄ни екантасукхаппат̣исам̣ведӣ вихареййа, со ча кхвасса сакада̄га̄мӣ ва̄ ана̄га̄мӣ ва̄ апан̣н̣акам̣ ва̄ сота̄панно. тит̣т̣хату, сакка̄, екам̣ вассам̣.

идха мама са̄вако даса ма̄се аппаматто а̄та̄пӣ пахитатто вихаранто йатха̄ майа̄нусит̣т̣хам̣ татха̄ пат̣ипаджджама̄но сатампи васса̄ни сатампи вассасата̄ни сатампи вассасахасса̄ни екантасукхаппат̣исам̣ведӣ вихареййа, со ча кхвасса сакада̄га̄мӣ ва̄ ана̄га̄мӣ ва̄ апан̣н̣акам̣ ва̄ сота̄панно. тит̣т̣ханту, сакка̄, даса ма̄са̄.

идха мама са̄вако нава ма̄се… ат̣т̣ха ма̄се… сатта ма̄се… чха ма̄се… пан̃ча ма̄се… чатта̄ро ма̄се… тайо ма̄се… две ма̄се… екам̣ ма̄сам̣… ад̣д̣хама̄сам̣ аппаматто а̄та̄пӣ пахитатто вихаранто йатха̄ майа̄нусит̣т̣хам̣ татха̄ пат̣ипаджджама̄но сатампи васса̄ни сатампи вассасата̄ни сатампи вассасахасса̄ни екантасукхаппат̣исам̣ведӣ вихареййа, со ча кхвасса сакада̄га̄мӣ ва̄ ана̄га̄мӣ ва̄ апан̣н̣акам̣ ва̄ сота̄панно. тит̣т̣хату, сакка̄, ад̣д̣хама̄со.

идха мама са̄вако даса раттиндиве [раттидиве (ка.)] аппаматто а̄та̄пӣ пахитатто вихаранто йатха̄ майа̄нусит̣т̣хам̣ татха̄ пат̣ипаджджама̄но сатампи васса̄ни сатампи вассасата̄ни сатампи вассасахасса̄ни екантасукхаппат̣исам̣ведӣ вихареййа, со ча кхвасса сакада̄га̄мӣ ва̄ ана̄га̄мӣ ва̄ апан̣н̣акам̣ ва̄ сота̄панно. тит̣т̣ханту, сакка̄, даса раттиндива̄.

идха мама са̄вако нава раттиндиве… ат̣т̣ха раттиндиве… сатта раттиндиве… чха раттиндиве… пан̃ча раттиндиве… чатта̄ро раттиндиве… тайо раттиндиве… две раттиндиве… екам̣ раттиндивам̣ аппаматто а̄та̄пӣ пахитатто вихаранто йатха̄ майа̄нусит̣т̣хам̣ татха̄ пат̣ипаджджама̄но сатампи васса̄ни сатампи вассасата̄ни сатампи вассасахасса̄ни екантасукхаппат̣исам̣ведӣ вихареййа, со ча кхвасса сакада̄га̄мӣ ва̄ ана̄га̄мӣ ва̄ апан̣н̣акам̣ ва̄ сота̄панно. тесам̣ во, сакка̄, ала̄бха̄ тесам̣ дулладдхам̣, йе тумхе евам̣ сокасабхайе джӣвите маран̣асабхайе джӣвите аппекада̄ ат̣т̣хан̇гасаманна̄гатам̣ упосатхам̣ упавасатха, аппекада̄ на упавасатха̄’’ти. ‘‘ете майам̣, бханте, аджджатагге ат̣т̣хан̇гасаманна̄гатам̣ упосатхам̣ упавасисса̄ма̄’’ти. чхат̣т̣хам̣.