4. кусина̄расуттам̣

44. екам̣ самайам̣ бхагава̄ кусина̄ра̄йам̣ вихарати балихаран̣е ванасан̣д̣е. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

[чӯл̣ава. 399; пари. 436] ‘‘чодакена, бхиккхаве, бхиккхуна̄ парам̣ чодетука̄мена пан̃ча дхамме аджджхаттам̣ паччавеккхитва̄ пан̃ча дхамме аджджхаттам̣ упат̣т̣ха̄петва̄ паро чодетаббо. катаме пан̃ча дхамма̄ аджджхаттам̣ паччавеккхитабба̄? чодакена, бхиккхаве, бхиккхуна̄ парам̣ чодетука̄мена евам̣ паччавеккхитаббам̣ – ‘парисуддхака̄йасама̄ча̄ро ну кхомхи, парисуддхенамхи ка̄йасама̄ча̄рена саманна̄гато аччхиддена аппат̣имам̣сена. сам̣виджджати ну кхо ме есо дхаммо уда̄ху но’ти? но че, бхиккхаве, бхиккху парисуддхака̄йасама̄ча̄ро хоти парисуддхена ка̄йасама̄ча̄рена саманна̄гато аччхиддена аппат̣имам̣сена, тасса бхаванти ватта̄ро – ‘ин̇гха та̄ва а̄йасма̄ ка̄йикам̣ сиккхассӯ’ти, итисса бхаванти ватта̄ро.

‘‘пуна чапарам̣, бхиккхаве, чодакена бхиккхуна̄ парам̣ чодетука̄мена евам̣ паччавеккхитаббам̣ – ‘парисуддхавачӣсама̄ча̄ро ну кхомхи, парисуддхенамхи вачӣсама̄ча̄рена саманна̄гато аччхиддена аппат̣имам̣сена. сам̣виджджати ну кхо ме есо дхаммо уда̄ху но’ти? но че, бхиккхаве, бхиккху парисуддхавачӣсама̄ча̄ро хоти парисуддхена вачӣсама̄ча̄рена саманна̄гато аччхиддена аппат̣имам̣сена, тасса бхаванти ватта̄ро – ‘ин̇гха та̄ва а̄йасма̄ ва̄часикам̣ сиккхассӯ’ти, итисса бхаванти ватта̄ро.

‘‘пуна чапарам̣, бхиккхаве, чодакена бхиккхуна̄ парам̣ чодетука̄мена евам̣ паччавеккхитаббам̣ – ‘меттам̣ ну кхо ме читтам̣ паччупат̣т̣хитам̣ сабрахмача̄рӣсу ана̄гха̄там̣. сам̣виджджати ну кхо ме есо дхаммо уда̄ху но’ти? но че, бхиккхаве, бхиккхуно меттам̣ читтам̣ паччупат̣т̣хитам̣ хоти сабрахмача̄рӣсу ана̄гха̄там̣, тасса бхаванти ватта̄ро – ‘ин̇гха та̄ва а̄йасма̄ сабрахмача̄рӣсу меттам̣ читтам̣ упат̣т̣ха̄пехӣ’ти, итисса бхаванти ватта̄ро.

‘‘пуна чапарам̣, бхиккхаве, чодакена бхиккхуна̄ парам̣ чодетука̄мена евам̣ паччавеккхитаббам̣ – ‘бахуссуто ну кхомхи сутадхаро сутасанничайо, йе те дхамма̄ а̄дикалйа̄н̣а̄ маджджхекалйа̄н̣а̄ парийоса̄накалйа̄н̣а̄ са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ абхиваданти, татха̄рӯпа̄ ме дхамма̄ бахуссута̄ хонти дха̄та̄ вачаса̄ паричита̄ манаса̄нупеккхита̄ дит̣т̣хийа̄ суппат̣ивиддха̄. сам̣виджджати ну кхо ме есо дхаммо уда̄ху но’ти? но че, бхиккхаве, бхиккху бахуссуто хоти сутадхаро сутасанничайо, йе те дхамма̄ а̄дикалйа̄н̣а̄ маджджхекалйа̄н̣а̄ парийоса̄накалйа̄н̣а̄ са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ абхиваданти, татха̄рӯпа̄сса дхамма̄ бахуссута̄ хонти дха̄та̄ вачаса̄ паричита̄ манаса̄нупеккхита̄ дит̣т̣хийа̄ суппат̣ивиддха̄, тасса бхаванти ватта̄ро – ‘ин̇гха та̄ва а̄йасма̄ а̄гамам̣ парийа̄пун̣ассӯ’ти, итисса бхаванти ватта̄ро.

‘‘пуна чапарам̣, бхиккхаве, чодакена бхиккхуна̄ парам̣ чодетука̄мена евам̣ паччавеккхитаббам̣ – ‘убхайа̄ни кхо пана ме па̄тимоккха̄ни виттха̄рена сва̄гата̄ни хонти сувибхатта̄ни суппаваттӣни сувиниччхита̄ни суттасо анубйан̃джанасо. сам̣виджджати ну кхо ме есо дхаммо уда̄ху но’ти? но че, бхиккхаве, бхиккхуно убхайа̄ни па̄тимоккха̄ни виттха̄рена сва̄гата̄ни хонти сувибхатта̄ни суппаваттӣни сувиниччхита̄ни суттасо анубйан̃джанасо, ‘идам̣ пана̄йасма̄, каттха вуттам̣ бхагавата̄’ти, ити пут̣т̣хо на сампа̄йиссати. тасса бхаванти ватта̄ро – ‘ин̇гха та̄ва а̄йасма̄ винайам̣ сиккхассӯ’ти, итисса бхаванти ватта̄ро. име пан̃ча дхамма̄ аджджхаттам̣ паччавеккхитабба̄.

‘‘катаме пан̃ча дхамма̄ аджджхаттам̣ упат̣т̣ха̄петабба̄? ‘ка̄лена ваккха̄ми, но ака̄лена; бхӯтена ваккха̄ми, но абхӯтена; сан̣хена ваккха̄ми, но пхарусена; аттхасам̣хитена ваккха̄ми, но анаттхасам̣хитена; меттачитто ваккха̄ми, но досантаро’ти – име пан̃ча дхамма̄ аджджхаттам̣ упат̣т̣ха̄петабба̄. чодакена, бхиккхаве, бхиккхуна̄ парам̣ чодетука̄мена име пан̃ча дхамме аджджхаттам̣ паччавеккхитва̄ име пан̃ча дхамме аджджхаттам̣ упат̣т̣ха̄петва̄ паро чодетаббо’’ти. чатуттхам̣.