9. пат̣хамаа̄нандасуттам̣

39. атха кхо а̄йасма̄ а̄нандо йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ а̄нандо бхагавантам̣ етадавоча – ‘‘‘сан̇гхабхедо сан̇гхабхедо’ти, бханте, вуччати. китта̄вата̄ ну кхо, бханте, сан̇гхо бхинно хотӣ’’ти? ‘‘идха̄нанда, бхиккхӯ адхаммам̣ дхаммоти дӣпенти, дхаммам̣ адхаммоти дӣпенти, авинайам̣ винайоти дӣпенти…пе… пан̃н̃аттам̣ татха̄гатена апан̃н̃аттам̣ татха̄гатена̄ти дӣпенти. те имехи дасахи ваттхӯхи авакассанти апакассанти а̄вени камма̄ни каронти а̄вени па̄тимоккхам̣ уддисанти. етта̄вата̄ кхо, а̄нанда, сан̇гхо бхинно хотӣ’’ти.

‘‘самаггам̣ пана, бханте, сан̇гхам̣ бхиндитва̄ ким̣ со пасаватӣ’’ти? ‘‘каппат̣т̣хикам̣, а̄нанда, киббисам̣ пасаватӣ’’ти. ‘‘ким̣ пана, бханте, каппат̣т̣хикам̣ киббиса’’нти? ‘‘каппам̣, а̄нанда, нирайамхи паччатӣти –

‘‘а̄па̄йико нерайико, каппат̣т̣хо сан̇гхабхедако;

ваггарато адхаммат̣т̣хо, йогаккхема̄ падхам̣сати;

сан̇гхам̣ самаггам̣ бхиндитва̄ [бхетва̄на (сӣ. сйа̄.), бхитва̄на (ка.) чӯл̣ава. 354; итиву. 18; катха̄ва. 657] каппам̣ нирайамхи паччатӣ’’ти. навамам̣;