10. дутийаа̄нандасуттам̣

40. ‘‘‘сан̇гхаса̄маггӣ сан̇гхаса̄маггӣ’ти, бханте, вуччати. китта̄вата̄ ну кхо, бханте, сан̇гхо самагго хотӣ’’ти? ‘‘идха̄нанда, бхиккхӯ адхаммам̣ адхаммоти дӣпенти, дхаммам̣ дхаммоти дӣпенти, авинайам̣ авинайоти дӣпенти, винайам̣ винайоти дӣпенти, абха̄ситам̣ алапитам̣ татха̄гатена абха̄ситам̣ алапитам̣ татха̄гатена̄ти дӣпенти, бха̄ситам̣ лапитам̣ татха̄гатена бха̄ситам̣ лапитам̣ татха̄гатена̄ти дӣпенти, ана̄чин̣н̣ам̣ татха̄гатена ана̄чин̣н̣ам̣ татха̄гатена̄ти дӣпенти, а̄чин̣н̣ам̣ татха̄гатена а̄чин̣н̣ам̣ татха̄гатена̄ти дӣпенти, апан̃н̃аттам̣ татха̄гатена апан̃н̃аттам̣ татха̄гатена̄ти дӣпенти, пан̃н̃аттам̣ татха̄гатена пан̃н̃аттам̣ татха̄гатена̄ти дӣпенти. те имехи дасахи ваттхӯхи на авакассанти на апакассанти на а̄вени камма̄ни каронти на а̄вени па̄тимоккхам̣ уддисанти. етта̄вата̄ кхо, а̄нанда, сан̇гхо самагго хотӣ’’ти.

‘‘бхиннам̣ пана, бханте, сан̇гхам̣ самаггам̣ катва̄ ким̣ со пасаватӣ’’ти? ‘‘брахмам̣, а̄нанда, пун̃н̃ам̣ пасаватӣ’’ти. ‘‘ким̣ пана, бханте, брахмам̣ пун̃н̃а’’нти? ‘‘каппам̣, а̄нанда, саггамхи модатӣти –

‘‘сукха̄ сан̇гхасса са̄маггӣ, самагга̄нан̃ча ануггахо;

самаггарато дхаммат̣т̣хо, йогаккхема̄ на дхам̣сати;

сан̇гхам̣ самаггам̣ катва̄на, каппам̣ саггамхи модатӣ’’ти. дасамам̣;

упа̄ливагго чатуттхо.