1. упа̄лисуттам̣

31. атха кхо а̄йасма̄ упа̄ли йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисинно кхо а̄йасма̄ упа̄ли бхагавантам̣ етадавоча – ‘‘кати ну кхо, бханте, аттхавасе пат̣ичча татха̄гатена са̄вака̄нам̣ сиккха̄падам̣ пан̃н̃аттам̣, па̄тимоккхам̣ уддит̣т̣ха’’нти?

‘‘даса кхо, упа̄ли, аттхавасе пат̣ичча татха̄гатена са̄вака̄нам̣ сиккха̄падам̣ пан̃н̃аттам̣, па̄тимоккхам̣ уддит̣т̣хам̣. катаме даса? сан̇гхасут̣т̣хута̄йа, сан̇гхапха̄сута̄йа, думман̇кӯнам̣ пуггала̄нам̣ ниггаха̄йа, песала̄нам̣ бхиккхӯнам̣ пха̄сувиха̄ра̄йа, дит̣т̣хадхаммика̄нам̣ а̄сава̄нам̣ сам̣вара̄йа, сампара̄йика̄нам̣ а̄сава̄нам̣ пат̣игха̄та̄йа, аппасанна̄нам̣ паса̄да̄йа, пасанна̄нам̣ бхиййобха̄ва̄йа, саддхаммат̣т̣хитийа̄, винайа̄нуггаха̄йа – име кхо, упа̄ли, даса аттхавасе пат̣ичча татха̄гатена са̄вака̄нам̣ сиккха̄падам̣ пан̃н̃аттам̣, па̄тимоккхам̣ уддит̣т̣ха’’нти. пат̣хамам̣.