15. ат̣т̣ха̄напа̄л̣и

1. пат̣хамавагго

268. ‘‘ат̣т̣ха̄наметам̣, бхиккхаве, анавака̄со йам̣ дит̣т̣хисампанно пуггало кан̃чи [кин̃чи (ка.)] сан̇кха̄рам̣ ниччато упагаччхеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ путхуджджано кан̃чи сан̇кха̄рам̣ ниччато упагаччхеййа. т̣ха̄наметам̣ виджджатӣ’’ти.

269. ‘‘ат̣т̣ха̄наметам̣, бхиккхаве, анавака̄со йам̣ дит̣т̣хисампанно пуггало кан̃чи сан̇кха̄рам̣ сукхато упагаччхеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ путхуджджано кан̃чи сан̇кха̄рам̣ сукхато упагаччхеййа. т̣ха̄наметам̣ виджджатӣ’’ти.

270. ‘‘ат̣т̣ха̄наметам̣, бхиккхаве, анавака̄со йам̣ дит̣т̣хисампанно пуггало кан̃чи дхаммам̣ аттато упагаччхеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ путхуджджано кан̃чи дхаммам̣ аттато упагаччхеййа. т̣ха̄наметам̣ виджджатӣ’’ти.

271. ‘‘ат̣т̣ха̄наметам̣, бхиккхаве, анавака̄со йам̣ дит̣т̣хисампанно пуггало ма̄тарам̣ джӣвита̄ воропеййа. нетам̣ т̣ха̄нам̣ виджджати. т̣ха̄нан̃ча кхо, бхиккхаве, виджджати йам̣ путхуджджано ма̄тарам̣ джӣвита̄ воропеййа. т̣ха̄наметам̣ виджджатӣ’’ти.

272. ‘‘ат̣т̣ха̄наметам̣, бхиккхаве, анавака̄со йам̣ дит̣т̣хисампанно пуггало питарам̣ джӣвита̄ воропеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ путхуджджано питарам̣ джӣвита̄ воропеййа. т̣ха̄наметам̣ виджджатӣ’’ти.

273. ‘‘ат̣т̣ха̄наметам̣, бхиккхаве, анавака̄со йам̣ дит̣т̣хисампанно пуггало арахантам̣ джӣвита̄ воропеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ путхуджджано арахантам̣ джӣвита̄ воропеййа. т̣ха̄наметам̣ виджджатӣ’’ти.

274. ‘‘ат̣т̣ха̄наметам̣, бхиккхаве, анавака̄со йам̣ дит̣т̣хисампанно пуггало татха̄гатасса падут̣т̣хачитто лохитам̣ уппа̄деййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ путхуджджано татха̄гатасса падут̣т̣хачитто лохитам̣ уппа̄деййа. т̣ха̄наметам̣ виджджатӣ’’ти.

275. ‘‘ат̣т̣ха̄наметам̣, бхиккхаве, анавака̄со йам̣ дит̣т̣хисампанно пуггало сан̇гхам̣ бхиндеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ путхуджджано сан̇гхам̣ бхиндеййа. т̣ха̄наметам̣ виджджатӣ’’ти.

276. ‘‘ат̣т̣ха̄наметам̣, бхиккхаве, анавака̄со йам̣ дит̣т̣хисампанно пуггало ан̃н̃ам̣ саттха̄рам̣ уддисеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ путхуджджано ан̃н̃ам̣ саттха̄рам̣ уддисеййа. т̣ха̄наметам̣ виджджатӣ’’ти.

277. ‘‘ат̣т̣ха̄наметам̣, бхиккхаве, анавака̄со йам̣ екисса̄ локадха̄туйа̄ две араханто самма̄самбуддха̄ апуббам̣ ачаримам̣ уппаджджеййум̣. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ екисса̄ локадха̄туйа̄ екова арахам̣ самма̄самбуддхо уппаджджеййа. т̣ха̄наметам̣ виджджатӣ’’ти.

вагго пат̣хамо.

2. дутийавагго

278. ‘‘ат̣т̣ха̄наметам̣, бхиккхаве, анавака̄со йам̣ екисса̄ локадха̄туйа̄ две ра̄джа̄но чаккаваттӣ апуббам̣ ачаримам̣ уппаджджеййум̣. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ екисса̄ локадха̄туйа̄ еко ра̄джа̄ чаккаваттӣ уппаджджеййа. т̣ха̄наметам̣ виджджатӣ’’ти.

279. ‘‘ат̣т̣ха̄наметам̣, бхиккхаве, анавака̄со йам̣ иттхӣ арахам̣ асса самма̄самбуддхо. нетам̣ т̣ха̄нам̣ виджджати. т̣ха̄нан̃ча кхо, етам̣, бхиккхаве, виджджати йам̣ пурисо арахам̣ асса самма̄самбуддхо. т̣ха̄наметам̣ виджджатӣ’’ти.

280. ‘‘ат̣т̣ха̄наметам̣, бхиккхаве, анавака̄со йам̣ иттхӣ ра̄джа̄ асса чаккаваттӣ. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ пурисо ра̄джа̄ асса чаккаваттӣ. т̣ха̄наметам̣ виджджатӣ’’ти.

281-283. ‘‘ат̣т̣ха̄наметам̣, бхиккхаве, анавака̄со йам̣ иттхӣ саккаттам̣ ка̄реййа…пе… ма̄раттам̣ ка̄реййа…пе… брахматтам̣ ка̄реййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ пурисо саккаттам̣ ка̄реййа…пе… ма̄раттам̣ ка̄реййа…пе… брахматтам̣ ка̄реййа. т̣ха̄наметам̣ виджджатӣ’’ти.

284. ‘‘ат̣т̣ха̄наметам̣, бхиккхаве, анавака̄со йам̣ ка̄йадуччаритасса ит̣т̣хо канто мана̄по випа̄ко ниббаттеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ ка̄йадуччаритасса анит̣т̣хо аканто амана̄по випа̄ко ниббаттеййа. т̣ха̄наметам̣ виджджатӣ’’ти.

285-286. ‘‘ат̣т̣ха̄наметам̣, бхиккхаве, анавака̄со йам̣ вачӣдуччаритасса…пе… йам̣ манодуччаритасса ит̣т̣хо канто мана̄по випа̄ко ниббаттеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ манодуччаритасса анит̣т̣хо аканто амана̄по випа̄ко ниббаттеййа. т̣ха̄наметам̣ виджджатӣ’’ти.

вагго дутийо.

3. татийавагго

287. ‘‘ат̣т̣ха̄наметам̣, бхиккхаве, анавака̄со йам̣ ка̄йасучаритасса анит̣т̣хо аканто амана̄по випа̄ко ниббаттеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ ка̄йасучаритасса ит̣т̣хо канто мана̄по випа̄ко ниббаттеййа. т̣ха̄наметам̣ виджджатӣ’’ти.

288-289. ‘‘ат̣т̣ха̄наметам̣, бхиккхаве, анавака̄со йам̣ вачӣсучаритасса…пе… маносучаритасса анит̣т̣хо аканто амана̄по випа̄ко ниббаттеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ маносучаритасса ит̣т̣хо канто мана̄по випа̄ко ниббаттеййа. т̣ха̄наметам̣ виджджатӣ’’ти.

290. ‘‘ат̣т̣ха̄наметам̣, бхиккхаве, анавака̄со йам̣ ка̄йадуччаритасаман̇гӣ таннида̄на̄ таппаччайа̄ ка̄йасса бхеда̄ парам̣ маран̣а̄ сугатим̣ саггам̣ локам̣ упападжджеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ ка̄йадуччаритасаман̇гӣ таннида̄на̄ таппаччайа̄ ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджеййа. т̣ха̄наметам̣ виджджатӣ’’ти.

291-292. ‘‘ат̣т̣ха̄наметам̣, бхиккхаве, анавака̄со йам̣ вачӣдуччаритасаман̇гӣ…пе… йам̣ манодуччаритасаман̇гӣ таннида̄на̄ таппаччайа̄ ка̄йасса бхеда̄ парам̣ маран̣а̄ сугатим̣ саггам̣ локам̣ упападжджеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ манодуччаритасаман̇гӣ таннида̄на̄ таппаччайа̄ ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджеййа. т̣ха̄наметам̣ виджджатӣ’’ти.

293. ‘‘ат̣т̣ха̄наметам̣, бхиккхаве, анавака̄со йам̣ ка̄йасучаритасаман̇гӣ таннида̄на̄ таппаччайа̄ ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ ка̄йасучаритасаман̇гӣ таннида̄на̄ таппаччайа̄ ка̄йасса бхеда̄ парам̣ маран̣а̄ сугатим̣ саггам̣ локам̣ упападжджеййа. т̣ха̄наметам̣ виджджатӣ’’ти.

294-295. ‘‘ат̣т̣ха̄наметам̣, бхиккхаве, анавака̄со йам̣ вачӣсучаритасаман̇гӣ…пе… йам̣ маносучаритасаман̇гӣ таннида̄на̄ таппаччайа̄ ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджеййа. нетам̣ т̣ха̄нам̣ виджджати. т̣ха̄нан̃ча кхо етам̣, бхиккхаве, виджджати йам̣ маносучаритасаман̇гӣ таннида̄на̄ таппаччайа̄ ка̄йасса бхеда̄ парам̣ маран̣а̄ сугатим̣ саггам̣ локам̣ упападжджеййа. т̣ха̄наметам̣ виджджатӣ’’ти.

вагго татийо.

ат̣т̣ха̄напа̄л̣и паннарасамо.