намо тасса бхагавато арахато самма̄самбуддхасса

ан̇гуттараника̄йо

екаканипа̄тапа̄л̣и

1. рӯпа̄дивагго

1. евам̣ ме сутам̣ – екам̣ самайам̣ бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. татра кхо бхагава̄ бхиккхӯ а̄мантеси – ‘‘бхиккхаво’’ти. ‘‘бхаданте’’ти те бхиккхӯ бхагавато паччассосум̣. бхагава̄ етадавоча –

‘‘на̄хам̣, бхиккхаве, ан̃н̃ам̣ екарӯпампи саманупасса̄ми йам̣ евам̣ пурисасса читтам̣ парийа̄да̄йа тит̣т̣хати йатхайидам̣, бхиккхаве, иттхирӯпам̣. иттхирӯпам̣, бхиккхаве, пурисасса читтам̣ парийа̄да̄йа тит̣т̣хатӣ’’ти. пат̣хамам̣.

2. ‘‘на̄хам̣, бхиккхаве, ан̃н̃ам̣ екасаддампи саманупасса̄ми йам̣ евам̣ пурисасса читтам̣ парийа̄да̄йа тит̣т̣хати йатхайидам̣, бхиккхаве, иттхисаддо. иттхисаддо, бхиккхаве, пурисасса читтам̣ парийа̄да̄йа тит̣т̣хатӣ’’ти. дутийам̣.

3. ‘‘на̄хам̣, бхиккхаве, ан̃н̃ам̣ екагандхампи саманупасса̄ми йам̣ евам̣ пурисасса читтам̣ парийа̄да̄йа тит̣т̣хати йатхайидам̣, бхиккхаве, иттхигандхо. иттхигандхо, бхиккхаве, пурисасса читтам̣ парийа̄да̄йа тит̣т̣хатӣ’’ти. татийам̣.

4. ‘‘на̄хам̣, бхиккхаве, ан̃н̃ам̣ екарасампи саманупасса̄ми йам̣ евам̣ пурисасса читтам̣ парийа̄да̄йа тит̣т̣хати йатхайидам̣, бхиккхаве, иттхирасо. иттхирасо, бхиккхаве, пурисасса читтам̣ парийа̄да̄йа тит̣т̣хатӣ’’ти. чатуттхам̣.

5. ‘‘на̄хам̣, бхиккхаве, ан̃н̃ам̣ екапхот̣т̣хаббампи саманупасса̄ми йам̣ евам̣ пурисасса читтам̣ парийа̄да̄йа тит̣т̣хати йатхайидам̣, бхиккхаве, иттхипхот̣т̣хаббо. иттхипхот̣т̣хаббо, бхиккхаве, пурисасса читтам̣ парийа̄да̄йа тит̣т̣хатӣ’’ти. пан̃чамам̣.

6. ‘‘на̄хам̣, бхиккхаве, ан̃н̃ам̣ екарӯпампи саманупасса̄ми йам̣ евам̣ иттхийа̄ читтам̣ парийа̄да̄йа тит̣т̣хати йатхайидам̣, бхиккхаве, пурисарӯпам̣. пурисарӯпам̣, бхиккхаве, иттхийа̄ читтам̣ парийа̄да̄йа тит̣т̣хатӣ’’ти. чхат̣т̣хам̣.

7. ‘‘на̄хам̣, бхиккхаве, ан̃н̃ам̣ екасаддампи саманупасса̄ми йам̣ евам̣ иттхийа̄ читтам̣ парийа̄да̄йа тит̣т̣хати йатхайидам̣, бхиккхаве, пурисасаддо. пурисасаддо, бхиккхаве, иттхийа̄ читтам̣ парийа̄да̄йа тит̣т̣хатӣ’’ти. саттамам̣.

8. ‘‘на̄хам̣, бхиккхаве, ан̃н̃ам̣ екагандхампи саманупасса̄ми йам̣ евам̣ иттхийа̄ читтам̣ парийа̄да̄йа тит̣т̣хати йатхайидам̣, бхиккхаве, пурисагандхо. пурисагандхо, бхиккхаве, иттхийа̄ читтам̣ парийа̄да̄йа тит̣т̣хатӣ’’ти. ат̣т̣хамам̣.

9. ‘‘на̄хам̣, бхиккхаве, ан̃н̃ам̣ екарасампи саманупасса̄ми йам̣ евам̣ иттхийа̄ читтам̣ парийа̄да̄йа тит̣т̣хати йатхайидам̣, бхиккхаве, пурисарасо. пурисарасо, бхиккхаве, иттхийа̄ читтам̣ парийа̄да̄йа тит̣т̣хатӣ’’ти. навамам̣.

10. ‘‘на̄хам̣, бхиккхаве, ан̃н̃ам̣ екапхот̣т̣хаббампи саманупасса̄ми йам̣ евам̣ иттхийа̄ читтам̣ парийа̄да̄йа тит̣т̣хати йатхайидам̣, бхиккхаве, пурисапхот̣т̣хаббо. пурисапхот̣т̣хаббо, бхиккхаве, иттхийа̄ читтам̣ парийа̄да̄йа тит̣т̣хатӣ’’ти. дасамам̣.

рӯпа̄дивагго пат̣хамо.

2. нӣваран̣аппаха̄навагго

11. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанно ва̄ ка̄маччхандо уппаджджати уппанно ва̄ ка̄маччхандо бхиййобха̄ва̄йа вепулла̄йа сам̣ваттати йатхайидам̣, бхиккхаве, субханимиттам̣. субханимиттам̣, бхиккхаве, айонисо манаси карото ануппанно чева ка̄маччхандо уппаджджати уппанно ча ка̄маччхандо бхиййобха̄ва̄йа вепулла̄йа сам̣ваттатӣ’’ти. пат̣хамам̣.

12. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанно ва̄ бйа̄па̄до уппаджджати уппанно ва̄ бйа̄па̄до бхиййобха̄ва̄йа вепулла̄йа сам̣ваттати йатхайидам̣, бхиккхаве, пат̣игханимиттам̣. пат̣игханимиттам̣, бхиккхаве, айонисо манаси карото ануппанно чева бйа̄па̄до уппаджджати уппанно ча бйа̄па̄до бхиййобха̄ва̄йа вепулла̄йа сам̣ваттатӣ’’ти. дутийам̣.

13. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппаннам̣ ва̄ тхинамиддхам̣ [тхӣнамиддхам̣ (сӣ. сйа̄. кам̣. пӣ.)] уппаджджати уппаннам̣ ва̄ тхинамиддхам̣ бхиййобха̄ва̄йа вепулла̄йа сам̣ваттати йатхайидам̣, бхиккхаве, арати тандӣ [танди (ка.)] виджамбхита̄ [виджамбхика̄ (сӣ. сйа̄. кам̣. пӣ.)] бхаттасаммадо четасо ча лӣнаттам̣. лӣначиттасса, бхиккхаве, ануппаннан̃чева тхинамиддхам̣ уппаджджати уппаннан̃ча тхинамиддхам̣ бхиййобха̄ва̄йа вепулла̄йа сам̣ваттатӣ’’ти. татийам̣.

14. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппаннам̣ ва̄ уддхаччакуккуччам̣ уппаджджати уппаннам̣ ва̄ уддхаччакуккуччам̣ бхиййобха̄ва̄йа вепулла̄йа сам̣ваттати йатхайидам̣, бхиккхаве, четасо авӯпасамо. авӯпасантачиттасса, бхиккхаве, ануппаннан̃чева уддхаччакуккуччам̣ уппаджджати уппаннан̃ча уддхаччакуккуччам̣ бхиййобха̄ва̄йа вепулла̄йа сам̣ваттатӣ’’ти. чатуттхам̣.

15. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ вичикиччха̄ уппаджджати уппанна̄ ва̄ вичикиччха̄ бхиййобха̄ва̄йа вепулла̄йа сам̣ваттати йатхайидам̣, бхиккхаве, айонисоманасика̄ро. айонисо, бхиккхаве, манаси карото ануппанна̄ чева вичикиччха̄ уппаджджати уппанна̄ ча вичикиччха̄ бхиййобха̄ва̄йа вепулла̄йа сам̣ваттатӣ’’ти. пан̃чамам̣.

16. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанно ва̄ ка̄маччхандо нуппаджджати уппанно ва̄ ка̄маччхандо пахӣйати йатхайидам̣, бхиккхаве, асубханимиттам̣. асубханимиттам̣, бхиккхаве, йонисо манаси карото ануппанно чева ка̄маччхандо нуппаджджати уппанно ча ка̄маччхандо пахӣйатӣ’’ти. чхат̣т̣хам̣.

17. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанно ва̄ бйа̄па̄до нуппаджджати уппанно ва̄ бйа̄па̄до пахӣйати йатхайидам̣, бхиккхаве, метта̄ четовимутти. меттам̣, бхиккхаве, четовимуттим̣ йонисо манаси карото ануппанно чева бйа̄па̄до нуппаджджати уппанно ча бйа̄па̄до пахӣйатӣ’’ти. саттамам̣.

18. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппаннам̣ ва̄ тхинамиддхам̣ нуппаджджати уппаннам̣ ва̄ тхинамиддхам̣ пахӣйати йатхайидам̣, бхиккхаве, а̄рамбхадха̄ту никкамадха̄ту параккамадха̄ту. а̄раддхавӣрийасса, бхиккхаве, ануппаннан̃чева тхинамиддхам̣ нуппаджджати уппаннан̃ча тхинамиддхам̣ пахӣйатӣ’’ти. ат̣т̣хамам̣.

19. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппаннам̣ ва̄ уддхаччакуккуччам̣ нуппаджджати уппаннам̣ ва̄ уддхаччакуккуччам̣ пахӣйати йатхайидам̣, бхиккхаве, четасо вӯпасамо. вӯпасантачиттасса, бхиккхаве, ануппаннан̃чева уддхаччакуккуччам̣ нуппаджджати уппаннан̃ча уддхаччакуккуччам̣ пахӣйатӣ’’ти. навамам̣.

20. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ вичикиччха̄ нуппаджджати уппанна̄ ва̄ вичикиччха̄ пахӣйати йатхайидам̣, бхиккхаве, йонисоманасика̄ро. йонисо, бхиккхаве, манаси карото ануппанна̄ чева вичикиччха̄ нуппаджджати уппанна̄ ча вичикиччха̄ пахӣйатӣ’’ти. дасамам̣.

нӣваран̣аппаха̄навагго дутийо.

3. акамманийавагго

21. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ абха̄витам̣ акамманийам̣ хоти йатхайидам̣, бхиккхаве, читтам̣ [йатхайидам̣ читтам̣ (сӣ. пӣ.) евамупарипи]. читтам̣, бхиккхаве, абха̄витам̣ акамманийам̣ хотӣ’’ти. пат̣хамам̣.

22. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ бха̄витам̣ камманийам̣ хоти йатхайидам̣, бхиккхаве, читтам̣. читтам̣, бхиккхаве, бха̄витам̣ камманийам̣ хотӣ’’ти. дутийам̣.

23. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ абха̄витам̣ махато анаттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, абха̄витам̣ махато анаттха̄йа сам̣ваттатӣ’’ти. татийам̣.

24. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ бха̄витам̣ махато аттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, бха̄витам̣ махато аттха̄йа сам̣ваттатӣ’’ти. чатуттхам̣.

25. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ абха̄витам̣ апа̄тубхӯтам̣ махато анаттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, абха̄витам̣ апа̄тубхӯтам̣ махато анаттха̄йа сам̣ваттатӣ’’ти. пан̃чамам̣.

26. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ бха̄витам̣ па̄тубхӯтам̣ махато аттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, бха̄витам̣ па̄тубхӯтам̣ махато аттха̄йа сам̣ваттатӣ’’ти. чхат̣т̣хам̣.

27. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ абха̄витам̣ абахулӣкатам̣ махато анаттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, абха̄витам̣ абахулӣкатам̣ махато анаттха̄йа сам̣ваттатӣ’’ти. саттамам̣.

28. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ бха̄витам̣ бахулӣкатам̣ махато аттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, бха̄витам̣ бахулӣкатам̣ махато аттха̄йа сам̣ваттатӣ’’ти. ат̣т̣хамам̣.

29. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ абха̄витам̣ абахулӣкатам̣ дуккха̄дхивахам̣ хоти йатхайидам̣, бхиккхаве, читтам̣. читтам̣, бхиккхаве, абха̄витам̣ абахулӣкатам̣ дуккха̄дхивахам̣ хотӣ’’ти. навамам̣.

30. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ бха̄витам̣ бахулӣкатам̣ сукха̄дхивахам̣ хоти йатхайидам̣, бхиккхаве, читтам̣. читтам̣, бхиккхаве, бха̄витам̣ бахулӣкатам̣ сукха̄дхивахам̣ хотӣ’’ти. дасамам̣.

акамманийавагго татийо.

4. адантавагго

31. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ адантам̣ махато анаттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, адантам̣ махато анаттха̄йа сам̣ваттатӣ’’ти. пат̣хамам̣.

32. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ дантам̣ махато аттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, дантам̣ махато аттха̄йа сам̣ваттатӣ’’ти. дутийам̣.

33. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ агуттам̣ махато анаттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, агуттам̣ махато анаттха̄йа сам̣ваттатӣ’’ти. татийам̣.

34. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ гуттам̣ махато аттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, гуттам̣ махато аттха̄йа сам̣ваттатӣ’’ти. чатуттхам̣.

35. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ араккхитам̣ махато анаттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, араккхитам̣ махато анаттха̄йа сам̣ваттатӣ’’ти. пан̃чамам̣.

36. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ раккхитам̣ махато аттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, раккхитам̣ махато аттха̄йа сам̣ваттатӣ’’ти. чхат̣т̣хам̣.

37. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ асам̣вутам̣ махато анаттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, асам̣вутам̣ махато анаттха̄йа сам̣ваттатӣ’’ти. саттамам̣.

38. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ сам̣вутам̣ махато аттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, сам̣вутам̣ махато аттха̄йа сам̣ваттатӣ’’ти. ат̣т̣хамам̣.

39. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ адантам̣ агуттам̣ араккхитам̣ асам̣вутам̣ махато анаттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, адантам̣ агуттам̣ араккхитам̣ асам̣вутам̣ махато анаттха̄йа сам̣ваттатӣ’’ти. навамам̣.

40. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ дантам̣ гуттам̣ раккхитам̣ сам̣вутам̣ махато аттха̄йа сам̣ваттати йатхайидам̣, бхиккхаве, читтам̣. читтам̣, бхиккхаве, дантам̣ гуттам̣ раккхитам̣ сам̣вутам̣ махато аттха̄йа сам̣ваттатӣ’’ти. дасамам̣.

адантавагго чатуттхо.

5. пан̣ихитааччхавагго

41. ‘‘сеййатха̄пи, бхиккхаве, са̄лисӯкам̣ ва̄ йавасӯкам̣ ва̄ миччха̄пан̣ихитам̣ хаттхена ва̄ па̄дена ва̄ аккантам̣ хаттхам̣ ва̄ па̄дам̣ ва̄ бхеччхати [бхиджджиссати (сйа̄. кам̣. ка.), бхеджджати (сӣ.) моггалла̄набйа̄каран̣ам̣ пасситаббам̣] лохитам̣ ва̄ уппа̄дессатӣти нетам̣ т̣ха̄нам̣ виджджати. там̣ кисса хету? миччха̄пан̣ихитатта̄, бхиккхаве, сӯкасса. евамевам̣ кхо, бхиккхаве, со вата бхиккху миччха̄пан̣ихитена читтена авиджджам̣ бхеччхати, виджджам̣ уппа̄дессати, нибба̄нам̣ саччхикариссатӣти нетам̣ т̣ха̄нам̣ виджджати. там̣ кисса хету? миччха̄пан̣ихитатта̄, бхиккхаве, читтасса̄’’ти. пат̣хамам̣.

42. ‘‘сеййатха̄пи, бхиккхаве, са̄лисӯкам̣ ва̄ йавасӯкам̣ ва̄ самма̄пан̣ихитам̣ хаттхена ва̄ па̄дена ва̄ аккантам̣ хаттхам̣ ва̄ па̄дам̣ ва̄ бхеччхати лохитам̣ ва̄ уппа̄дессатӣти т̣ха̄наметам̣ виджджати. там̣ кисса хету? самма̄пан̣ихитатта̄, бхиккхаве, сӯкасса. евамевам̣ кхо, бхиккхаве, со вата бхиккху самма̄пан̣ихитена читтена авиджджам̣ бхеччхати, виджджам̣ уппа̄дессати, нибба̄нам̣ саччхикариссатӣти т̣ха̄наметам̣ виджджати. там̣ кисса хету? самма̄пан̣ихитатта̄, бхиккхаве, читтасса̄’’ти. дутийам̣.

43. ‘‘идха̄хам̣ [ида̄хам̣ (сӣ.)], бхиккхаве, екаччам̣ пуггалам̣ падут̣т̣хачиттам̣ евам̣ четаса̄ чето паричча паджа̄на̄ми – ‘имамхи че айам̣ самайе пуггало ка̄лам̣ кареййа, йатха̄бхатам̣ никкхитто евам̣ нирайе’. там̣ кисса хету? читтам̣ хисса, бхиккхаве, падут̣т̣хам̣. ‘‘четопадосахету пана, бхиккхаве, евамидхекачче сатта̄ ка̄йасса бхеда̄ парам̣ маран̣а̄ апа̄йам̣ дуггатим̣ винипа̄там̣ нирайам̣ упападжджантӣ’’ти. татийам̣.

44. ‘‘идха̄хам̣, бхиккхаве, екаччам̣ пуггалам̣ пасанначиттам̣ евам̣ четаса̄ чето паричча паджа̄на̄ми – ‘имамхи че айам̣ самайе пуггало ка̄лам̣ кареййа, йатха̄бхатам̣ никкхитто евам̣ сагге’. там̣ кисса хету? читтам̣ хисса, бхиккхаве, пасаннам̣. ‘‘четопаса̄дахету пана, бхиккхаве, евамидхекачче сатта̄ ка̄йасса бхеда̄ парам̣ маран̣а̄ сугатим̣ саггам̣ локам̣ упападжджантӣ’’ти. чатуттхам̣.

45. ‘‘сеййатха̄пи, бхиккхаве, удакарахадо а̄вило лул̣ито калалӣбхӯто таттха чаккхума̄ пурисо тӣре т̣хито на пассеййа сипписамбукампи [сиппикасамбукампи (ка.)] саккхаракат̣халампи маччхагумбампи чарантампи тит̣т̣хантампи. там̣ кисса хету? а̄вилатта̄, бхиккхаве, удакасса. евамевам̣ кхо, бхиккхаве, со вата бхиккху а̄вилена читтена аттаттхам̣ ва̄ н̃ассати параттхам̣ ва̄ н̃ассати убхайаттхам̣ ва̄ н̃ассати уттарим̣ ва̄ мануссадхамма̄ аламарийан̃а̄н̣адассанависесам̣ саччхикариссатӣти нетам̣ т̣ха̄нам̣ виджджати. там̣ кисса хету? а̄вилатта̄, бхиккхаве, читтасса̄’’ти. пан̃чамам̣.

46. ‘‘сеййатха̄пи, бхиккхаве, удакарахадо аччхо виппасанно ана̄вило таттха чаккхума̄ пурисо тӣре т̣хито пассеййа сипписамбукампи саккхаракат̣халампи маччхагумбампи чарантампи тит̣т̣хантампи. там̣ кисса хету? ана̄вилатта̄, бхиккхаве, удакасса. евамевам̣ кхо, бхиккхаве, со вата бхиккху ана̄вилена читтена аттаттхам̣ ва̄ н̃ассати параттхам̣ ва̄ н̃ассати убхайаттхам̣ ва̄ н̃ассати уттарим̣ ва̄ мануссадхамма̄ аламарийан̃а̄н̣адассанависесам̣ саччхикариссатӣти т̣ха̄наметам̣ виджджати. там̣ кисса хету? ана̄вилатта̄, бхиккхаве, читтасса̄’’ти. чхат̣т̣хам̣.

47. ‘‘сеййатха̄пи, бхиккхаве, йа̄ни ка̄ничи руккхаджа̄та̄нам̣ пхандано тесам̣ аггамаккха̄йати йадидам̣ мудута̄йа чева камман̃н̃ата̄йа ча. евамевам̣ кхо ахам̣, бхиккхаве, на̄н̃н̃ам̣ екадхаммампи саманупасса̄ми йам̣ евам̣ бха̄витам̣ бахулӣкатам̣ муду ча хоти камман̃н̃ан̃ча йатхайидам̣ читтам̣. читтам̣, бхиккхаве, бха̄витам̣ бахулӣкатам̣ муду ча хоти камман̃н̃ан̃ча хотӣ’’ти. саттамам̣.

48. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йам̣ евам̣ лахупариваттам̣ йатхайидам̣ читтам̣. йа̄ван̃чидам̣, бхиккхаве, упама̄пи на сукара̄ йа̄ва лахупариваттам̣ читта’’нти. ат̣т̣хамам̣.

49. ‘‘пабхассарамидам̣, бхиккхаве, читтам̣. тан̃ча кхо а̄гантукехи упаккилесехи упаккилит̣т̣ха’’нти. навамам̣.

50. ‘‘пабхассарамидам̣, бхиккхаве, читтам̣. тан̃ча кхо а̄гантукехи упаккилесехи виппамутта’’нти. дасамам̣.

пан̣ихитааччхавагго пан̃чамо.

6. аччхара̄сан̇гха̄тавагго

51. ‘‘пабхассарамидам̣, бхиккхаве, читтам̣. тан̃ча кхо а̄гантукехи упаккилесехи упаккилит̣т̣хам̣. там̣ ассутава̄ путхуджджано йатха̄бхӯтам̣ наппаджа̄на̄ти. тасма̄ ‘ассутавато путхуджджанасса читтабха̄вана̄ наттхӣ’ти вада̄мӣ’’ти. пат̣хамам̣.

52. ‘‘пабхассарамидам̣, бхиккхаве, читтам̣. тан̃ча кхо а̄гантукехи упаккилесехи виппамуттам̣. там̣ сутава̄ арийаса̄вако йатха̄бхӯтам̣ паджа̄на̄ти. тасма̄ ‘сутавато арийаса̄вакасса читтабха̄вана̄ аттхӣ’ти вада̄мӣ’’ти. дутийам̣.

53. ‘‘аччхара̄сан̇гха̄таматтампи че, бхиккхаве, бхиккху метта̄читтам̣ [меттам̣ читтам̣ (сӣ.), меттачиттам̣ (сйа̄. кам̣. пӣ. ка.)] а̄севати; айам̣ вуччати, бхиккхаве – ‘бхиккху ариттаджджха̄но вихарати саттхуса̄санакаро ова̄дапатикаро, амогхам̣ рат̣т̣хапин̣д̣ам̣ бхун̃джати’. ко пана ва̄до йе нам̣ бахулӣкаронтӣ’’ти! татийам̣.

54. ‘‘аччхара̄сан̇гха̄таматтампи че, бхиккхаве, бхиккху метта̄читтам̣ бха̄вети; айам̣ вуччати, бхиккхаве – ‘бхиккху ариттаджджха̄но вихарати саттхуса̄санакаро ова̄дапатикаро, амогхам̣ рат̣т̣хапин̣д̣ам̣ бхун̃джати’. ко пана ва̄до йе нам̣ бахулӣкаронтӣ’’ти! чатуттхам̣.

55. ‘‘аччхара̄сан̇гха̄таматтампи че, бхиккхаве, бхиккху метта̄читтам̣ манаси кароти; айам̣ вуччати, бхиккхаве – ‘бхиккху ариттаджджха̄но вихарати саттхуса̄санакаро ова̄дапатикаро амогхам̣ рат̣т̣хапин̣д̣ам̣ бхун̃джати’. ко пана ва̄до йе нам̣ бахулӣкаронтӣ’’ти! пан̃чамам̣.

56. ‘‘йе кечи, бхиккхаве, дхамма̄ акусала̄ акусалабха̄гийа̄ акусалапаккхика̄, саббе те манопуббан̇гама̄. мано тесам̣ дхамма̄нам̣ пат̣хамам̣ уппаджджати, анвадева акусала̄ дхамма̄’’ти. чхат̣т̣хам̣.

57. ‘‘йе кечи, бхиккхаве, дхамма̄ кусала̄ кусалабха̄гийа̄ кусалапаккхика̄, саббе те манопуббан̇гама̄. мано тесам̣ дхамма̄нам̣ пат̣хамам̣ уппаджджати, анвадева кусала̄ дхамма̄’’ти. саттамам̣.

58. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ акусала̄ дхамма̄ уппаджджанти уппанна̄ ва̄ кусала̄ дхамма̄ париха̄йанти йатхайидам̣, бхиккхаве, пама̄до. паматтасса, бхиккхаве, ануппанна̄ чева акусала̄ дхамма̄ уппаджджанти уппанна̄ ча кусала̄ дхамма̄ париха̄йантӣ’’ти. ат̣т̣хамам̣.

59. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ кусала̄ дхамма̄ уппаджджанти уппанна̄ ва̄ акусала̄ дхамма̄ париха̄йанти йатхайидам̣, бхиккхаве, аппама̄до. аппаматтасса, бхиккхаве, ануппанна̄ чева кусала̄ дхамма̄ уппаджджанти уппанна̄ ча акусала̄ дхамма̄ париха̄йантӣ’’ти. навамам̣.

60. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ акусала̄ дхамма̄ уппаджджанти уппанна̄ ва̄ кусала̄ дхамма̄ париха̄йанти йатхайидам̣, бхиккхаве, косаджджам̣. кусӣтасса, бхиккхаве, ануппанна̄ чева акусала̄ дхамма̄ уппаджджанти уппанна̄ ча кусала̄ дхамма̄ париха̄йантӣ’’ти. дасамам̣.

аччхара̄сан̇гха̄тавагго чхат̣т̣хо.

7. вӣрийа̄рамбха̄дивагго

61. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ кусала̄ дхамма̄ уппаджджанти уппанна̄ ва̄ акусала̄ дхамма̄ париха̄йанти йатхайидам̣, бхиккхаве, вӣрийа̄рамбхо [вирийа̄рамбхо (сӣ. сйа̄. кам̣. пӣ.)]. а̄раддхавӣрийасса, бхиккхаве, ануппанна̄ чева кусала̄ дхамма̄ уппаджджанти уппанна̄ ча акусала̄ дхамма̄ париха̄йантӣ’’ти. пат̣хамам̣.

62. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ акусала̄ дхамма̄ уппаджджанти уппанна̄ ва̄ кусала̄ дхамма̄ париха̄йанти йатхайидам̣, бхиккхаве, махиччхата̄. махиччхасса, бхиккхаве, ануппанна̄ чева акусала̄ дхамма̄ уппаджджанти уппанна̄ ча кусала̄ дхамма̄ париха̄йантӣ’’ти. дутийам̣.

63. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ кусала̄ дхамма̄ уппаджджанти уппанна̄ ва̄ акусала̄ дхамма̄ париха̄йанти йатхайидам̣, бхиккхаве, аппиччхата̄. аппиччхасса, бхиккхаве, ануппанна̄ чева кусала̄ дхамма̄ уппаджджанти уппанна̄ ча акусала̄ дхамма̄ париха̄йантӣ’’ти. татийам̣.

64. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ акусала̄ дхамма̄ уппаджджанти уппанна̄ ва̄ кусала̄ дхамма̄ париха̄йанти йатхайидам̣, бхиккхаве, асантут̣т̣хита̄. асантут̣т̣хасса, бхиккхаве, ануппанна̄ чева акусала̄ дхамма̄ уппаджджанти уппанна̄ ча кусала̄ дхамма̄ париха̄йантӣ’’ти. чатуттхам̣.

65. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ кусала̄ дхамма̄ уппаджджанти уппанна̄ ва̄ акусала̄ дхамма̄ париха̄йанти йатхайидам̣, бхиккхаве, сантут̣т̣хита̄. сантут̣т̣хасса, бхиккхаве, ануппанна̄ чева кусала̄ дхамма̄ уппаджджанти уппанна̄ ча акусала̄ дхамма̄ париха̄йантӣ’’ти. пан̃чамам̣.

66. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ акусала̄ дхамма̄ уппаджджанти уппанна̄ ва̄ кусала̄ дхамма̄ париха̄йанти йатхайидам̣, бхиккхаве, айонисоманасика̄ро. айонисо, бхиккхаве, манаси карото ануппанна̄ чева акусала̄ дхамма̄ уппаджджанти уппанна̄ ча кусала̄ дхамма̄ париха̄йантӣ’’ти. чхат̣т̣хам̣.

67. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ кусала̄ дхамма̄ уппаджджанти уппанна̄ ва̄ акусала̄ дхамма̄ париха̄йанти йатхайидам̣, бхиккхаве, йонисоманасика̄ро. йонисо, бхиккхаве, манаси карото ануппанна̄ чева кусала̄ дхамма̄ уппаджджанти уппанна̄ ча акусала̄ дхамма̄ париха̄йантӣ’’ти. саттамам̣.

68. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ акусала̄ дхамма̄ уппаджджанти уппанна̄ ва̄ кусала̄ дхамма̄ париха̄йанти йатхайидам̣, бхиккхаве, асампаджан̃н̃ам̣. асампаджа̄насса, бхиккхаве, ануппанна̄ чева акусала̄ дхамма̄ уппаджджанти уппанна̄ ча кусала̄ дхамма̄ париха̄йантӣ’’ти. ат̣т̣хамам̣.

69. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ кусала̄ дхамма̄ уппаджджанти уппанна̄ ва̄ акусала̄ дхамма̄ париха̄йанти йатхайидам̣, бхиккхаве, сампаджан̃н̃ам̣. сампаджа̄насса, бхиккхаве, ануппанна̄ чева кусала̄ дхамма̄ уппаджджанти уппанна̄ ча акусала̄ дхамма̄ париха̄йантӣ’’ти. навамам̣.

70. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ акусала̄ дхамма̄ уппаджджанти уппанна̄ ва̄ кусала̄ дхамма̄ париха̄йанти йатхайидам̣, бхиккхаве, па̄памиттата̄. па̄памиттасса, бхиккхаве, ануппанна̄ чева акусала̄ дхамма̄ уппаджджанти уппанна̄ ча кусала̄ дхамма̄ париха̄йантӣ’’ти. дасамам̣.

вӣрийа̄рамбха̄дивагго саттамо.

8. калйа̄н̣амитта̄дивагго

71. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ кусала̄ дхамма̄ уппаджджанти уппанна̄ ва̄ акусала̄ дхамма̄ париха̄йанти йатхайидам̣, бхиккхаве, калйа̄н̣амиттата̄. калйа̄н̣амиттасса, бхиккхаве, ануппанна̄ чева кусала̄ дхамма̄ уппаджджанти уппанна̄ ча акусала̄ дхамма̄ париха̄йантӣ’’ти. пат̣хамам̣.

72. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ акусала̄ дхамма̄ уппаджджанти уппанна̄ ва̄ кусала̄ дхамма̄ париха̄йанти йатхайидам̣, бхиккхаве, ануйого акусала̄нам̣ дхамма̄нам̣, анануйого кусала̄нам̣ дхамма̄нам̣. ануйога̄, бхиккхаве, акусала̄нам̣ дхамма̄нам̣, анануйога̄ кусала̄нам̣ дхамма̄нам̣ ануппанна̄ чева акусала̄ дхамма̄ уппаджджанти уппанна̄ ча кусала̄ дхамма̄ париха̄йантӣ’’ти. дутийам̣.

73. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ кусала̄ дхамма̄ уппаджджанти уппанна̄ ва̄ акусала̄ дхамма̄ париха̄йанти йатхайидам̣, бхиккхаве, ануйого кусала̄нам̣ дхамма̄нам̣, анануйого акусала̄нам̣ дхамма̄нам̣. ануйога̄, бхиккхаве, кусала̄нам̣ дхамма̄нам̣, анануйога̄ акусала̄нам̣ дхамма̄нам̣ ануппанна̄ чева кусала̄ дхамма̄ уппаджджанти уппанна̄ ча акусала̄ дхамма̄ париха̄йантӣ’’ти. татийам̣.

74. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ боджджхан̇га̄ нуппаджджанти уппанна̄ ва̄ боджджхан̇га̄ на бха̄вана̄па̄рипӯрим̣ гаччханти йатхайидам̣, бхиккхаве, айонисоманасика̄ро. айонисо, бхиккхаве, манаси карото ануппанна̄ чева боджджхан̇га̄ нуппаджджанти уппанна̄ ча боджджхан̇га̄ на бха̄вана̄па̄рипӯрим̣ гаччхантӣ’’ти. чатуттхам̣.

75. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йена ануппанна̄ ва̄ боджджхан̇га̄ уппаджджанти уппанна̄ ва̄ боджджхан̇га̄ бха̄вана̄па̄рипӯрим̣ гаччханти йатхайидам̣, бхиккхаве, йонисоманасика̄ро. йонисо, бхиккхаве, манаси карото ануппанна̄ чева боджджхан̇га̄ уппаджджанти уппанна̄ ча боджджхан̇га̄ бха̄вана̄па̄рипӯрим̣ гаччхантӣ’’ти. пан̃чамам̣.

76. ‘‘аппаматтика̄ еса̄, бхиккхаве, париха̄ни йадидам̣ н̃а̄типариха̄ни. етам̣ патикит̣т̣хам̣, бхиккхаве, париха̄нӣнам̣ йадидам̣ пан̃н̃а̄париха̄нӣ’’ти. чхат̣т̣хам̣.

77. ‘‘аппаматтика̄ еса̄, бхиккхаве, вуддхи йадидам̣ н̃а̄тивуддхи. етадаггам̣, бхиккхаве, вуддхӣнам̣ йадидам̣ пан̃н̃а̄вуддхи. тасма̄тиха, бхиккхаве, евам̣ сиккхитаббам̣ – ‘пан̃н̃а̄вуддхийа̄ ваддхисса̄ма̄’ти. еван̃хи во, бхиккхаве, сиккхитабба’’нти. саттамам̣.

78. ‘‘аппаматтика̄ еса̄, бхиккхаве, париха̄ни йадидам̣ бхогапариха̄ни. етам̣ патикит̣т̣хам̣, бхиккхаве, париха̄нӣнам̣ йадидам̣ пан̃н̃а̄париха̄нӣ’’ти. ат̣т̣хамам̣.

79. ‘‘аппаматтика̄ еса̄, бхиккхаве, вуддхи йадидам̣ бхогавуддхи. етадаггам̣, бхиккхаве, вуддхӣнам̣ йадидам̣ пан̃н̃а̄вуддхи. тасма̄тиха, бхиккхаве, евам̣ сиккхитаббам̣ – ‘пан̃н̃а̄вуддхийа̄ ваддхисса̄ма̄’ти. еван̃хи во, бхиккхаве, сиккхитабба’’нти. навамам̣.

80. ‘‘аппаматтика̄ еса̄, бхиккхаве, париха̄ни йадидам̣ йасопариха̄ни. етам̣ патикит̣т̣хам̣, бхиккхаве, париха̄нӣнам̣ йадидам̣ пан̃н̃а̄париха̄нӣ’’ти. дасамам̣.

калйа̄н̣амитта̄дивагго ат̣т̣хамо.

9. пама̄да̄дивагго

81. ‘‘аппаматтика̄ еса̄, бхиккхаве, вуддхи йадидам̣ йасовуддхи. етадаггам̣, бхиккхаве, вуддхӣнам̣ йадидам̣ пан̃н̃а̄вуддхи. тасма̄тиха, бхиккхаве, евам̣ сиккхитаббам̣ – ‘пан̃н̃а̄вуддхийа̄ ваддхисса̄ма̄’ти. еван̃хи во, бхиккхаве, сиккхитабба’’нти. пат̣хамам̣.

82. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато анаттха̄йа сам̣ваттати йатхайидам̣, бхиккхаве, пама̄до. пама̄до, бхиккхаве, махато анаттха̄йа сам̣ваттатӣ’’ти. дутийам̣.

83. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато аттха̄йа сам̣ваттати йатхайидам̣, бхиккхаве, аппама̄до. аппама̄до, бхиккхаве, махато аттха̄йа сам̣ваттатӣ’’ти. татийам̣.

84. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато анаттха̄йа сам̣ваттати йатхайидам̣, бхиккхаве, косаджджам̣. косаджджам̣, бхиккхаве, махато анаттха̄йа сам̣ваттатӣ’’ти. чатуттхам̣.

85. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато аттха̄йа сам̣ваттати йатхайидам̣, бхиккхаве, вӣрийа̄рамбхо. вӣрийа̄рамбхо, бхиккхаве, махато аттха̄йа сам̣ваттатӣ’’ти. пан̃чамам̣.

86. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато анаттха̄йа сам̣ваттати йатхайидам̣, бхиккхаве, махиччхата̄. махиччхата̄, бхиккхаве, махато анаттха̄йа сам̣ваттатӣ’’ти. чхат̣т̣хам̣.

87. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато аттха̄йа сам̣ваттати йатхайидам̣, бхиккхаве, аппиччхата̄. аппиччхата̄, бхиккхаве, махато аттха̄йа сам̣ваттатӣ’’ти. саттамам̣.

88. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато анаттха̄йа сам̣ваттати йатхайидам̣, бхиккхаве, асантут̣т̣хита̄. асантут̣т̣хита̄, бхиккхаве, махато анаттха̄йа сам̣ваттатӣ’’ти. ат̣т̣хамам̣.

89. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато аттха̄йа сам̣ваттати йатхайидам̣, бхиккхаве, сантут̣т̣хита̄. сантут̣т̣хита̄, бхиккхаве, махато аттха̄йа сам̣ваттатӣ’’ти. навамам̣.

90. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато анаттха̄йа сам̣ваттати йатхайидам̣, бхиккхаве, айонисо манасика̄ро. айонисоманасика̄ро, бхиккхаве, махато анаттха̄йа сам̣ваттатӣ’’ти. дасамам̣.

91. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато аттха̄йа сам̣ваттати йатхайидам̣, бхиккхаве, йонисо манасика̄ро. йонисоманасика̄ро, бхиккхаве, махато аттха̄йа сам̣ваттатӣ’’ти. ека̄дасамам̣.

92. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато анаттха̄йа сам̣ваттати йатхайидам̣, бхиккхаве, асампаджан̃н̃ам̣. асампаджан̃н̃ам̣, бхиккхаве, махато анаттха̄йа сам̣ваттатӣ’’ти. два̄дасамам̣.

93. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато аттха̄йа сам̣ваттати йатхайидам̣, бхиккхаве, сампаджан̃н̃ам̣. сампаджан̃н̃ам̣, бхиккхаве, махато аттха̄йа сам̣ваттатӣ’’ти. терасамам̣.

94. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато анаттха̄йа сам̣ваттати йатхайидам̣, бхиккхаве, па̄памиттата̄. па̄памиттата̄, бхиккхаве, махато анаттха̄йа сам̣ваттатӣ’’ти. чуддасамам̣.

95. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато аттха̄йа сам̣ваттати йатхайидам̣, бхиккхаве, калйа̄н̣амиттата̄. калйа̄н̣амиттата̄, бхиккхаве, махато аттха̄йа сам̣ваттатӣ’’ти. паннарасамам̣.

96. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато анаттха̄йа сам̣ваттати йатхайидам̣, бхиккхаве, ануйого акусала̄нам̣ дхамма̄нам̣, анануйого кусала̄нам̣ дхамма̄нам̣. ануйого, бхиккхаве, акусала̄нам̣ дхамма̄нам̣, анануйого кусала̄нам̣ дхамма̄нам̣ махато анаттха̄йа сам̣ваттатӣ’’ти. сол̣асамам̣.

97. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ махато аттха̄йа сам̣ваттати йатхайидам̣, бхиккхаве, ануйого кусала̄нам̣ дхамма̄нам̣, анануйого акусала̄нам̣ дхамма̄нам̣. ануйого, бхиккхаве, кусала̄нам̣ дхамма̄нам̣, анануйого акусала̄нам̣ дхамма̄нам̣ махато аттха̄йа сам̣ваттатӣ’’ти. саттарасамам̣.

пама̄да̄дивагго навамо.

10. дутийапама̄да̄дивагго

98. ‘‘аджджхаттикам̣, бхиккхаве, ан̇ганти каритва̄ на̄н̃н̃ам̣ екан̇гампи саманупасса̄ми йам̣ евам̣ махато анаттха̄йа сам̣ваттати йатхайидам̣, бхиккхаве, пама̄до. пама̄до, бхиккхаве, махато анаттха̄йа сам̣ваттатӣ’’ти. пат̣хамам̣.

99. ‘‘аджджхаттикам̣, бхиккхаве, ан̇ганти каритва̄ на̄н̃н̃ам̣ екан̇гампи саманупасса̄ми йам̣ евам̣ махато аттха̄йа сам̣ваттати йатхайидам̣, бхиккхаве, аппама̄до. аппама̄до, бхиккхаве, махато аттха̄йа сам̣ваттатӣ’’ти. дутийам̣.

100. ‘‘аджджхаттикам̣, бхиккхаве, ан̇ганти каритва̄ на̄н̃н̃ам̣ екан̇гампи саманупасса̄ми йам̣ евам̣ махато анаттха̄йа сам̣ваттати йатхайидам̣, бхиккхаве, косаджджам̣. косаджджам̣, бхиккхаве, махато анаттха̄йа сам̣ваттатӣ’’ти. татийам̣.

101. ‘‘аджджхаттикам̣, бхиккхаве, ан̇ганти каритва̄ на̄н̃н̃ам̣ екан̇гампи саманупасса̄ми йам̣ евам̣ махато аттха̄йа сам̣ваттати йатхайидам̣, бхиккхаве, вӣрийа̄рамбхо. вӣрийа̄рамбхо, бхиккхаве, махато аттха̄йа сам̣ваттатӣ’’ти. чатуттхам̣.

102-109. ‘‘аджджхаттикам̣, бхиккхаве, ан̇ганти каритва̄ на̄н̃н̃ам̣ екан̇гампи саманупасса̄ми йам̣ евам̣ махато анаттха̄йа сам̣ваттати йатхайидам̣, бхиккхаве, махиччхата̄…пе… аппиччхата̄… асантут̣т̣хита̄… сантут̣т̣хита̄… айонисоманасика̄ро… йонисоманасика̄ро… асампаджан̃н̃ам̣… сампаджан̃н̃ам̣… два̄дасамам̣.

110. ‘‘ба̄хирам̣, бхиккхаве, ан̇ганти каритва̄ на̄н̃н̃ам̣ екан̇гампи саманупасса̄ми йам̣ евам̣ махато анаттха̄йа сам̣ваттати йатхайидам̣, бхиккхаве, па̄памиттата̄. па̄памиттата̄, бхиккхаве, махато анаттха̄йа сам̣ваттатӣ’’ти. терасамам̣.

111. ‘‘ба̄хирам̣, бхиккхаве, ан̇ганти каритва̄ на̄н̃н̃ам̣ екан̇гампи саманупасса̄ми йам̣ евам̣ махато аттха̄йа сам̣ваттати йатхайидам̣, бхиккхаве, калйа̄н̣амиттата̄. калйа̄н̣амиттата̄, бхиккхаве, махато аттха̄йа сам̣ваттатӣ’’ти. чуддасамам̣.

112. ‘‘аджджхаттикам̣, бхиккхаве, ан̇ганти каритва̄ на̄н̃н̃ам̣ екан̇гампи саманупасса̄ми йам̣ евам̣ махато анаттха̄йа сам̣ваттати йатхайидам̣, бхиккхаве, ануйого акусала̄нам̣ дхамма̄нам̣, анануйого кусала̄нам̣ дхамма̄нам̣. ануйого, бхиккхаве, акусала̄нам̣ дхамма̄нам̣, анануйого кусала̄нам̣ дхамма̄нам̣ махато анаттха̄йа сам̣ваттатӣ’’ти. паннарасамам̣.

113. ‘‘аджджхаттикам̣, бхиккхаве, ан̇ганти каритва̄ на̄н̃н̃ам̣ екан̇гампи саманупасса̄ми йам̣ евам̣ махато аттха̄йа сам̣ваттати йатхайидам̣, бхиккхаве, ануйого кусала̄нам̣ дхамма̄нам̣, анануйого акусала̄нам̣ дхамма̄нам̣. ануйого, бхиккхаве, кусала̄нам̣ дхамма̄нам̣, анануйого акусала̄нам̣ дхамма̄нам̣ махато аттха̄йа сам̣ваттатӣ’’ти. сол̣асамам̣.

114. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ саддхаммасса саммоса̄йа антарадха̄на̄йа сам̣ваттати йатхайидам̣, бхиккхаве, пама̄до. пама̄до, бхиккхаве, саддхаммасса саммоса̄йа антарадха̄на̄йа сам̣ваттатӣ’’ти. саттарасамам̣.

115. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ саддхаммасса т̣хитийа̄ асаммоса̄йа анантарадха̄на̄йа сам̣ваттати йатхайидам̣, бхиккхаве, аппама̄до. аппама̄до, бхиккхаве, саддхаммасса т̣хитийа̄ асаммоса̄йа анантарадха̄на̄йа сам̣ваттатӣ’’ти. ат̣т̣ха̄расамам̣.

116. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ саддхаммасса саммоса̄йа антарадха̄на̄йа сам̣ваттати йатхайидам̣, бхиккхаве, косаджджам̣. косаджджам̣, бхиккхаве, саддхаммасса саммоса̄йа антарадха̄на̄йа сам̣ваттатӣ’’ти. екӯнавӣсатимам̣.

117. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ саддхаммасса т̣хитийа̄ асаммоса̄йа анантарадха̄на̄йа сам̣ваттати йатхайидам̣, бхиккхаве, вӣрийа̄рамбхо. вӣрийа̄рамбхо, бхиккхаве, саддхаммасса т̣хитийа̄ асаммоса̄йа анантарадха̄на̄йа сам̣ваттатӣ’’ти. вӣсатимам̣.

118-128. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ саддхаммасса саммоса̄йа антарадха̄на̄йа сам̣ваттати йатхайидам̣, бхиккхаве, махиччхата̄…пе… аппиччхата̄… асантут̣т̣хита̄… сантут̣т̣хита̄… айонисоманасика̄ро… йонисоманасика̄ро… асампаджан̃н̃ам̣… сампаджан̃н̃ам̣ … па̄памиттата̄… калйа̄н̣амиттата̄… ануйого акусала̄нам̣ дхамма̄нам̣, анануйого кусала̄нам̣ дхамма̄нам̣. ануйого, бхиккхаве, акусала̄нам̣ дхамма̄нам̣, анануйого кусала̄нам̣ дхамма̄нам̣ саддхаммасса саммоса̄йа антарадха̄на̄йа сам̣ваттатӣ’’ти. екаттим̣сатимам̣.

129. ‘‘на̄хам̣, бхиккхаве, ан̃н̃ам̣ екадхаммампи саманупасса̄ми йо евам̣ саддхаммасса т̣хитийа̄ асаммоса̄йа анантарадха̄на̄йа сам̣ваттати йатхайидам̣, бхиккхаве, ануйого кусала̄нам̣ дхамма̄нам̣, анануйого акусала̄нам̣ дхамма̄нам̣. ануйого, бхиккхаве, кусала̄нам̣ дхамма̄нам̣, анануйого акусала̄нам̣ дхамма̄нам̣ саддхаммасса т̣хитийа̄ асаммоса̄йа анантарадха̄на̄йа сам̣ваттатӣ’’ти. чатуккот̣икам̣ нит̣т̣хитам̣. ба̄ттим̣сатимам̣.

130. ‘‘йе те, бхиккхаве, бхиккхӯ адхаммам̣ дхаммоти дӣпенти те, бхиккхаве, бхиккхӯ бахуджанаахита̄йа пат̣ипанна̄ бахуджанаасукха̄йа, бахуно джанасса анаттха̄йа ахита̄йа дуккха̄йа деваманусса̄нам̣. бахун̃ча те, бхиккхаве, бхиккхӯ апун̃н̃ам̣ пасаванти, те чимам̣ [тепимам̣ (сӣ.)] саддхаммам̣ антарадха̄пентӣ’’ти. теттим̣сатимам̣.

131. ‘‘йе те, бхиккхаве, бхиккхӯ дхаммам̣ адхаммоти дӣпенти те, бхиккхаве, бхиккхӯ бахуджанаахита̄йа пат̣ипанна̄ бахуджанаасукха̄йа, бахуно джанасса анаттха̄йа ахита̄йа дуккха̄йа деваманусса̄нам̣. бахун̃ча те, бхиккхаве, бхиккхӯ апун̃н̃ам̣ пасаванти, те чимам̣ саддхаммам̣ антарадха̄пентӣ’’ти. чатуттим̣сатимам̣.

132-139. ‘‘йе те, бхиккхаве, бхиккхӯ авинайам̣ винайоти дӣпенти…пе… винайам̣ авинайоти дӣпенти…пе… абха̄ситам̣ алапитам̣ татха̄гатена бха̄ситам̣ лапитам̣ татха̄гатена̄ти дӣпенти…пе… бха̄ситам̣ лапитам̣ татха̄гатена абха̄ситам̣ алапитам̣ татха̄гатена̄ти дӣпенти…пе… ана̄чин̣н̣ам̣ татха̄гатена а̄чин̣н̣ам̣ татха̄гатена̄ти дӣпенти…пе… а̄чин̣н̣ам̣ татха̄гатена ана̄чин̣н̣ам̣ татха̄гатена̄ти дӣпенти…пе… апан̃н̃аттам̣ татха̄гатена пан̃н̃аттам̣ татха̄гатена̄ти дӣпенти…пе… пан̃н̃аттам̣ татха̄гатена апан̃н̃аттам̣ татха̄гатена̄ти дӣпенти те, бхиккхаве, бхиккхӯ бахуджанаахита̄йа пат̣ипанна̄ бахуджанаасукха̄йа, бахуно джанасса анаттха̄йа ахита̄йа дуккха̄йа деваманусса̄нам̣. бахун̃ча те, бхиккхаве, бхиккхӯ апун̃н̃ам̣ пасаванти, те чимам̣ саддхаммам̣ антарадха̄пентӣ’’ти. два̄чатта̄лӣсатимам̣.

дутийапама̄да̄дивагго дасамо.

11. адхаммавагго

140. ‘‘йе те, бхиккхаве, бхиккхӯ адхаммам̣ адхаммоти дӣпенти те, бхиккхаве, бхиккхӯ бахуджанахита̄йа пат̣ипанна̄ бахуджанасукха̄йа, бахуно джанасса аттха̄йа хита̄йа сукха̄йа деваманусса̄нам̣. бахун̃ча те, бхиккхаве, бхиккхӯ пун̃н̃ам̣ пасаванти, те чимам̣ саддхаммам̣ т̣хапентӣ’’ти [тхапентӣти (ка.)]. пат̣хамам̣.

141. ‘‘йе те, бхиккхаве, бхиккхӯ дхаммам̣ дхаммоти дӣпенти те, бхиккхаве, бхиккхӯ бахуджанахита̄йа пат̣ипанна̄ бахуджанасукха̄йа, бахуно джанасса аттха̄йа хита̄йа сукха̄йа деваманусса̄нам̣. бахун̃ча те, бхиккхаве, бхиккхӯ пун̃н̃ам̣ пасаванти, те чимам̣ саддхаммам̣ т̣хапентӣ’’ти. дутийам̣.

142-149. ‘‘йе те, бхиккхаве, бхиккхӯ авинайам̣ авинайоти дӣпенти…пе… винайам̣ винайоти дӣпенти…пе… абха̄ситам̣ алапитам̣ татха̄гатена абха̄ситам̣ алапитам̣ татха̄гатена̄ти дӣпенти…пе… бха̄ситам̣ лапитам̣ татха̄гатена бха̄ситам̣ лапитам̣ татха̄гатена̄ти дӣпенти…пе… ана̄чин̣н̣ам̣ татха̄гатена ана̄чин̣н̣ам̣ татха̄гатена̄ти дӣпенти…пе… а̄чин̣н̣ам̣ татха̄гатена а̄чин̣н̣ам̣ татха̄гатена̄ти дӣпенти…пе… апан̃н̃аттам̣ татха̄гатена апан̃н̃аттам̣ татха̄гатена̄ти дӣпенти…пе… пан̃н̃аттам̣ татха̄гатена пан̃н̃аттам̣ татха̄гатена̄ти дӣпенти те, бхиккхаве, бхиккхӯ бахуджанахита̄йа пат̣ипанна̄ бахуджанасукха̄йа, бахуно джанасса аттха̄йа хита̄йа сукха̄йа деваманусса̄нам̣. бахун̃ча те, бхиккхаве, бхиккхӯ пун̃н̃ам̣ пасаванти, те чимам̣ саддхаммам̣ т̣хапентӣ’’ти. дасамам̣.

адхаммавагго ека̄дасамо.

12. ана̄паттивагго

150. ‘‘йе те, бхиккхаве, бхиккхӯ ана̄паттим̣ а̄паттӣти дӣпенти те, бхиккхаве, бхиккхӯ бахуджанаахита̄йа пат̣ипанна̄ бахуджанаасукха̄йа, бахуно джанасса анаттха̄йа ахита̄йа дуккха̄йа деваманусса̄нам̣. бахун̃ча те, бхиккхаве, бхиккхӯ апун̃н̃ам̣ пасаванти, те чимам̣ саддхаммам̣ антарадха̄пентӣ’’ти. пат̣хамам̣.

151. ‘‘йе те, бхиккхаве, бхиккхӯ а̄паттим̣ ана̄паттӣти дӣпенти те, бхиккхаве, бхиккхӯ бахуджанаахита̄йа пат̣ипанна̄ бахуджанаасукха̄йа, бахуно джанасса анаттха̄йа ахита̄йа дуккха̄йа деваманусса̄нам̣. бахун̃ча те, бхиккхаве, бхиккхӯ апун̃н̃ам̣ пасаванти, те чимам̣ саддхаммам̣ антарадха̄пентӣ’’ти. дутийам̣.

152-159. ‘‘йе те, бхиккхаве, бхиккхӯ лахукам̣ а̄паттим̣ гарука̄ а̄паттӣти дӣпенти…пе… гарукам̣ а̄паттим̣ лахука̄ а̄паттӣти дӣпенти…пе… дут̣т̣хуллам̣ а̄паттим̣ адут̣т̣хулла̄ а̄паттӣти дӣпенти…пе… адут̣т̣хуллам̣ а̄паттим̣ дут̣т̣хулла̄ а̄паттӣти дӣпенти…пе… са̄васесам̣ а̄паттим̣ анавасеса̄ а̄паттӣти дӣпенти…пе… анавасесам̣ а̄паттим̣ са̄васеса̄ а̄паттӣти дӣпенти…пе… саппат̣икаммам̣ а̄паттим̣ аппат̣икамма̄ а̄паттӣти дӣпенти…пе… аппат̣икаммам̣ а̄паттим̣ саппат̣икамма̄ а̄паттӣти дӣпенти те, бхиккхаве, бхиккхӯ бахуджанаахита̄йа пат̣ипанна̄ бахуджанаасукха̄йа, бахуно джанасса анаттха̄йа ахита̄йа дуккха̄йа деваманусса̄нам̣. бахун̃ча те, бхиккхаве, бхиккхӯ апун̃н̃ам̣ пасаванти, те чимам̣ саддхаммам̣ антарадха̄пентӣ’’ти. дасамам̣.

160. ‘‘йе те, бхиккхаве, бхиккхӯ ана̄паттим̣ ана̄паттӣти дӣпенти те, бхиккхаве, бхиккхӯ бахуджанахита̄йа пат̣ипанна̄ бахуджанасукха̄йа, бахуно джанасса аттха̄йа хита̄йа сукха̄йа деваманусса̄нам̣. бахун̃ча те, бхиккхаве, бхиккхӯ пун̃н̃ам̣ пасаванти, те чимам̣ саддхаммам̣ т̣хапентӣ’’ти. ека̄дасамам̣.

161. ‘‘йе те, бхиккхаве, бхиккхӯ а̄паттим̣ а̄паттӣти дӣпенти те, бхиккхаве, бхиккхӯ бахуджанахита̄йа пат̣ипанна̄ бахуджанасукха̄йа, бахуно джанасса аттха̄йа хита̄йа сукха̄йа деваманусса̄нам̣. бахун̃ча те, бхиккхаве, бхиккхӯ пун̃н̃ам̣ пасаванти, те чимам̣ саддхаммам̣ т̣хапентӣ’’ти. два̄дасамам̣.