5. пан̃чамавагго

235. ‘‘етадаггам̣, бхиккхаве, мама са̄вика̄нам̣ бхиккхунӣнам̣ раттан̃н̃ӯнам̣ йадидам̣ маха̄паджа̄патиготамӣ’’.

236. … маха̄пан̃н̃а̄нам̣ йадидам̣ кхема̄.

237. … иддхимантӣнам̣ йадидам̣ уппалаван̣н̣а̄.

238. … винайадхара̄нам̣ йадидам̣ пат̣а̄ча̄ра̄.

239. … дхаммакатхика̄нам̣ йадидам̣ дхаммадинна̄.

240. … джха̄йӣнам̣ йадидам̣ нанда̄.

241. … а̄раддхавӣрийа̄нам̣ йадидам̣ сон̣а̄.

242. … диббачаккхука̄нам̣ йадидам̣ бакула̄ [сакула̄ (сӣ. сйа̄. кам̣. пӣ.)].

243. … кхиппа̄бхин̃н̃а̄нам̣ йадидам̣ бхадда̄ кун̣д̣алакеса̄.

244. … пуббенива̄сам̣ ануссарантӣнам̣ йадидам̣ бхадда̄ ка̄пила̄нӣ.

245. … маха̄бхин̃н̃аппатта̄нам̣ йадидам̣ бхаддакачча̄на̄.

246. … лӯкхачӣварадхара̄нам̣ йадидам̣ киса̄готамӣ.

247. … саддха̄дхимутта̄нам̣ йадидам̣ син̇га̄лакама̄та̄ти [сига̄лама̄та̄ти (сӣ. сйа̄. кам̣. пӣ.)].

вагго пан̃чамо.