𑁫. 𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺

𑁩𑁩𑁯. ‘𑀧𑀸𑀭𑀸𑀚𑀺𑀓’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀘𑀼𑀢𑁄 𑀧𑀭𑀤𑁆𑀥𑁄 𑀪𑀝𑁆𑀞𑁄 𑀘, 𑀲𑀤𑁆𑀥𑀫𑁆𑀫𑀸 𑀳𑀺 𑀦𑀺𑀭𑀗𑁆𑀓𑀢𑁄;

𑀲𑀁𑀯𑀸𑀲𑁄𑀧𑀺 𑀢𑀳𑀺𑀁 𑀦𑀢𑁆𑀣𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺.

‘𑀲𑀗𑁆𑀖𑀸𑀤𑀺𑀲𑁂𑀲𑁄’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀲𑀗𑁆𑀖𑁄𑀯 𑀤𑁂𑀢𑀺 𑀧𑀭𑀺𑀯𑀸𑀲𑀁, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺;

𑀫𑀸𑀦𑀢𑁆𑀢𑀁 𑀤𑁂𑀢𑀺 𑀅𑀩𑁆𑀪𑁂𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺.

‘𑀅𑀦𑀺𑀬𑀢𑁄’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀅𑀦𑀺𑀬𑀢𑁄 𑀦 𑀦𑀺𑀬𑀢𑁄, 𑀅𑀦𑁂𑀓𑀁𑀲𑀺𑀓𑀢𑀁 𑀧𑀤𑀁;

𑀢𑀺𑀡𑁆𑀡𑀫𑀜𑁆𑀜𑀢𑀭𑀁 𑀞𑀸𑀦𑀁, ‘𑀅𑀦𑀺𑀬𑀢𑁄’𑀢𑀺 𑀧𑀯𑀼𑀘𑁆𑀘𑀢𑀺.

‘𑀣𑀼𑀮𑁆𑀮𑀘𑁆𑀘𑀬’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀏𑀓𑀲𑁆𑀲 𑀫𑀽𑀮𑁂 𑀬𑁄 𑀤𑁂𑀲𑁂𑀢𑀺, 𑀬𑁄 𑀘 𑀢𑀁 𑀧𑀝𑀺𑀕𑀡𑁆𑀳𑀢𑀺;

𑀅𑀘𑁆𑀘𑀬𑁄 𑀢𑁂𑀦 𑀲𑀫𑁄 𑀦𑀢𑁆𑀣𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺.

‘𑀦𑀺𑀲𑁆𑀲𑀕𑁆𑀕𑀺𑀬’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀲𑀗𑁆𑀖𑀫𑀚𑁆𑀛𑁂 𑀕𑀡𑀫𑀚𑁆𑀛𑁂, 𑀏𑀓𑀲𑁆𑀲𑁂𑀯 𑀘 𑀏𑀓𑀢𑁄;

𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀦 𑀤𑁂𑀲𑁂𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺.

‘𑀧𑀸𑀘𑀺𑀢𑁆𑀢𑀺𑀬’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀧𑀸𑀢𑁂𑀢𑀺 𑀓𑀼𑀲𑀮𑀁 𑀥𑀫𑁆𑀫𑀁, 𑀅𑀭𑀺𑀬𑀫𑀕𑁆𑀕𑀁 𑀅𑀧𑀭𑀚𑁆𑀛𑀢𑀺;

𑀘𑀺𑀢𑁆𑀢𑀲𑀁𑀫𑁄𑀳𑀦𑀝𑁆𑀞𑀸𑀦𑀁, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺.

‘𑀧𑀸𑀝𑀺𑀤𑁂𑀲𑀦𑀻𑀬’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀪𑀺𑀓𑁆𑀔𑀼 𑀅𑀜𑁆𑀜𑀸𑀢𑀓𑁄 𑀲𑀦𑁆𑀢𑁄, 𑀓𑀺𑀘𑁆𑀙𑀸 𑀮𑀤𑁆𑀥𑀸𑀬 𑀪𑁄𑀚𑀦𑀁;

𑀲𑀸𑀫𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑁂𑀬𑁆𑀬, ‘𑀕𑀸𑀭𑀬𑁆𑀳’𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀦𑀺𑀫𑀦𑁆𑀢𑀦𑀸𑀲𑀼 𑀪𑀼𑀜𑁆𑀚𑀦𑁆𑀢𑀸 𑀙𑀦𑁆𑀤𑀸𑀬, 𑀯𑁄𑀲𑀸𑀲𑀢𑀺 𑀢𑀢𑁆𑀣 𑀪𑀺𑀓𑁆𑀔𑀼𑀦𑀺𑀁;

𑀅𑀦𑀺𑀯𑀸𑀭𑁂𑀢𑁆𑀯𑀸 𑀢𑀳𑀺𑀁 𑀪𑀼𑀜𑁆𑀚𑁂, 𑀕𑀸𑀭𑀬𑁆𑀳𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀲𑀤𑁆𑀥𑀸𑀘𑀺𑀢𑁆𑀢𑀁 𑀓𑀼𑀮𑀁 𑀕𑀦𑁆𑀢𑁆𑀯𑀸, 𑀅𑀧𑁆𑀧𑀪𑁄𑀕𑀁 𑀅𑀦𑀸𑀴𑀺𑀬𑀁 [𑀅𑀦𑀸𑀴𑁆𑀳𑀺𑀬𑀁 (𑀲𑀻. 𑀲𑁆𑀬𑀸.)];

𑀅𑀕𑀺𑀮𑀸𑀦𑁄 𑀢𑀳𑀺𑀁 𑀪𑀼𑀜𑁆𑀚𑁂, 𑀕𑀸𑀭𑀬𑁆𑀳𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀬𑁄 𑀘𑁂 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄, 𑀲𑀸𑀲𑀗𑁆𑀓𑁂 𑀲𑀪𑀬𑀸𑀦𑀓𑁂;

𑀅𑀯𑀺𑀤𑀺𑀢𑀁 𑀢𑀳𑀺𑀁 𑀪𑀼𑀜𑁆𑀚𑁂, 𑀕𑀸𑀭𑀬𑁆𑀳𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀸𑀢𑀺𑀓𑀸 𑀲𑀦𑁆𑀢𑀸, 𑀬𑀁 𑀧𑀭𑁂𑀲𑀁 𑀫𑀫𑀸𑀬𑀺𑀢𑀁;

𑀲𑀧𑁆𑀧𑀺 𑀢𑁂𑀮𑀁 𑀫𑀥𑀼𑀁 𑀨𑀸𑀡𑀺𑀢𑀁, 𑀫𑀘𑁆𑀙𑀫𑀁𑀲𑀁 𑀅𑀣𑁄 𑀔𑀻𑀭𑀁;

𑀤𑀥𑀺𑀁 𑀲𑀬𑀁 𑀯𑀺𑀜𑁆𑀜𑀸𑀧𑁂𑀬𑁆𑀬 𑀪𑀺𑀓𑁆𑀔𑀼𑀦𑀻, 𑀕𑀸𑀭𑀬𑁆𑀳𑀧𑀢𑁆𑀢𑀸 𑀲𑀼𑀕𑀢𑀲𑁆𑀲 𑀲𑀸𑀲𑀦𑁂.

‘𑀤𑀼𑀓𑁆𑀓𑀝’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀅𑀧𑀭𑀤𑁆𑀥𑀁 𑀯𑀺𑀭𑀤𑁆𑀥𑀜𑁆𑀘, 𑀔𑀮𑀺𑀢𑀁 𑀬𑀜𑁆𑀘 𑀤𑀼𑀓𑁆𑀓𑀝𑀁.

𑀬𑀁 𑀫𑀦𑀼𑀲𑁆𑀲𑁄 𑀓𑀭𑁂 𑀧𑀸𑀧𑀁, 𑀆𑀯𑀺 𑀯𑀸 𑀬𑀤𑀺 𑀯𑀸 𑀭𑀳𑁄;

‘𑀤𑀼𑀓𑁆𑀓𑀝’𑀦𑁆𑀢𑀺 𑀧𑀯𑁂𑀤𑁂𑀦𑁆𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺.

‘𑀤𑀼𑀩𑁆𑀪𑀸𑀲𑀺𑀢’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀭𑀸𑀪𑀝𑁆𑀞𑀁, 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁 𑀧𑀤𑀁;

𑀬𑀜𑁆𑀘 𑀯𑀺𑀜𑁆𑀜𑀽 𑀕𑀭𑀳𑀦𑁆𑀢𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺.

‘𑀲𑁂𑀔𑀺𑀬’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀲𑁂𑀓𑁆𑀔𑀲𑁆𑀲 𑀲𑀺𑀓𑁆𑀔𑀫𑀸𑀦𑀲𑁆𑀲, 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄.

𑀆𑀤𑀺 𑀘𑁂𑀢𑀁 𑀘𑀭𑀡𑀜𑁆𑀘, 𑀫𑀼𑀔𑀁 𑀲𑀜𑁆𑀜𑀫𑀲𑀁𑀯𑀭𑁄;

𑀲𑀺𑀓𑁆𑀔𑀸 𑀏𑀢𑀸𑀤𑀺𑀲𑀻 𑀦𑀢𑁆𑀣𑀺, 𑀢𑁂𑀦𑁂𑀢𑀁 𑀇𑀢𑀺 𑀯𑀼𑀘𑁆𑀘𑀢𑀺.

[𑀉𑀤𑀸. 𑁪𑁫 𑀉𑀤𑀸𑀦𑁂𑀧𑀺] 𑀙𑀦𑁆𑀦𑀫𑀢𑀺𑀯𑀲𑁆𑀲𑀢𑀺, 𑀯𑀺𑀯𑀝𑀁 𑀦𑀸𑀢𑀺𑀯𑀲𑁆𑀲𑀢𑀺;

𑀢𑀲𑁆𑀫𑀸 𑀙𑀦𑁆𑀦𑀁 𑀯𑀺𑀯𑀭𑁂𑀣, 𑀏𑀯𑀁 𑀢𑀁 𑀦𑀸𑀢𑀺𑀯𑀲𑁆𑀲𑀢𑀺.

𑀕𑀢𑀺 𑀫𑀺𑀕𑀸𑀦𑀁 𑀧𑀯𑀦𑀁, 𑀆𑀓𑀸𑀲𑁄 𑀧𑀓𑁆𑀔𑀺𑀦𑀁 𑀕𑀢𑀺;

𑀯𑀺𑀪𑀯𑁄 𑀕𑀢𑀺 𑀥𑀫𑁆𑀫𑀸𑀦𑀁, 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻𑀢𑀺.

𑀕𑀸𑀣𑀸𑀲𑀗𑁆𑀕𑀡𑀺𑀓𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀲𑀢𑁆𑀢𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀸, 𑀯𑀺𑀧𑀢𑁆𑀢𑀺 𑀘𑀢𑀼𑀭𑁄𑀧𑀺 𑀘;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀲𑀸𑀥𑀸𑀭𑀡𑀸 𑀅𑀲𑀸𑀥𑀸𑀭𑀡𑀸;

𑀲𑀸𑀲𑀦𑀁 𑀅𑀦𑀼𑀕𑁆𑀕𑀳𑀸𑀬, 𑀕𑀸𑀣𑀸𑀲𑀗𑁆𑀕𑀡𑀺𑀓𑀁 𑀇𑀤𑀦𑁆𑀢𑀺.

𑀕𑀸𑀣𑀸𑀲𑀗𑁆𑀕𑀡𑀺𑀓𑀁 𑀦𑀺𑀝𑁆𑀞𑀺𑀢𑀁.