𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑁧. 𑀲𑀢𑁆𑀢𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁

𑁩𑁩𑁫. 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸, 𑀧𑀕𑁆𑀕𑀡𑁆𑀳𑀺𑀢𑁆𑀯𑀸𑀦 𑀅𑀜𑁆𑀚𑀮𑀺𑀁;

𑀆𑀲𑀻𑀲𑀫𑀸𑀦𑀭𑀽𑀧𑁄𑀯 [𑀆𑀲𑀺𑀁𑀲𑀫𑀸𑀦𑀭𑀽𑀧𑁄𑀯 (𑀲𑀻. 𑀲𑁆𑀬𑀸.)], 𑀓𑀺𑀲𑁆𑀲 𑀢𑁆𑀯𑀁 𑀇𑀥 𑀫𑀸𑀕𑀢𑁄.

𑀤𑁆𑀯𑀻𑀲𑀼 𑀯𑀺𑀦𑀬𑁂𑀲𑀼 𑀬𑁂 𑀧𑀜𑁆𑀜𑀢𑁆𑀢𑀸;

𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺 𑀉𑀧𑁄𑀲𑀣𑁂𑀲𑀼;

𑀓𑀢𑀺 𑀢𑁂 𑀲𑀺𑀓𑁆𑀔𑀸𑀧𑀤𑀸 𑀳𑁄𑀦𑁆𑀢𑀺;

𑀓𑀢𑀺𑀲𑀼 𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀸.

𑀪𑀤𑁆𑀤𑀓𑁄 𑀢𑁂 𑀉𑀫𑁆𑀫𑀗𑁆𑀕𑁄, 𑀬𑁄𑀦𑀺𑀲𑁄 𑀧𑀭𑀺𑀧𑀼𑀘𑁆𑀙𑀲𑀺;

𑀢𑀕𑁆𑀖 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀁, 𑀬𑀣𑀸𑀲𑀺 𑀓𑀼𑀲𑀮𑁄 𑀢𑀣𑀸.

𑀤𑁆𑀯𑀻𑀲𑀼 𑀯𑀺𑀦𑀬𑁂𑀲𑀼 𑀬𑁂 𑀧𑀜𑁆𑀜𑀢𑁆𑀢𑀸;

𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺 𑀉𑀧𑁄𑀲𑀣𑁂𑀲𑀼;

𑀅𑀟𑁆𑀠𑀼𑀟𑁆𑀠𑀲𑀢𑀸𑀦𑀺 𑀢𑁂 𑀳𑁄𑀦𑁆𑀢𑀺;

𑀲𑀢𑁆𑀢𑀲𑀼 𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀸.

𑀓𑀢𑀫𑁂𑀲𑀼 𑀲𑀢𑁆𑀢𑀲𑀼 𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀸;

𑀇𑀗𑁆𑀖 𑀫𑁂 𑀢𑁆𑀯𑀁 𑀩𑁆𑀬𑀸𑀓𑀭 𑀦𑀁 [𑀇𑀗𑁆𑀖 𑀫𑁂 𑀢𑀁 𑀩𑁆𑀬𑀸𑀓𑀭 (𑀓.)];

𑀢𑀁 𑀯𑀘𑀦𑀧𑀣𑀁 [𑀢𑀯 𑀯𑀘𑀦𑀧𑀣𑀁 (𑀲𑁆𑀬𑀸.)] 𑀦𑀺𑀲𑀸𑀫𑀬𑀺𑀢𑁆𑀯𑀸;

𑀧𑀝𑀺𑀧𑀚𑁆𑀚𑁂𑀫 𑀳𑀺𑀢𑀸𑀬 𑀦𑁄 𑀲𑀺𑀬𑀸.

𑀯𑁂𑀲𑀸𑀮𑀺𑀬𑀁 𑀭𑀸𑀚𑀕𑀳𑁂, 𑀲𑀸𑀯𑀢𑁆𑀣𑀺𑀬𑀜𑁆𑀘 𑀆𑀴𑀯𑀺𑀬𑀁;

𑀓𑁄𑀲𑀫𑁆𑀩𑀺𑀬𑀜𑁆𑀘 𑀲𑀓𑁆𑀓𑁂𑀲𑀼, 𑀪𑀕𑁆𑀕𑁂𑀲𑀼 𑀘𑁂𑀯 𑀧𑀜𑁆𑀜𑀢𑁆𑀢𑀸.

𑀓𑀢𑀺 𑀯𑁂𑀲𑀸𑀮𑀺𑀬𑀁 𑀧𑀜𑁆𑀜𑀢𑁆𑀢𑀸, 𑀓𑀢𑀺 𑀭𑀸𑀚𑀕𑀳𑁂 𑀓𑀢𑀸;

𑀲𑀸𑀯𑀢𑁆𑀣𑀺𑀬𑀁 𑀓𑀢𑀺 𑀳𑁄𑀦𑁆𑀢𑀺, 𑀓𑀢𑀺 𑀆𑀴𑀯𑀺𑀬𑀁 𑀓𑀢𑀸.

𑀓𑀢𑀺 𑀓𑁄𑀲𑀫𑁆𑀩𑀺𑀬𑀁 𑀧𑀜𑁆𑀜𑀢𑁆𑀢𑀸, 𑀓𑀢𑀺 𑀲𑀓𑁆𑀓𑁂𑀲𑀼 𑀯𑀼𑀘𑁆𑀘𑀦𑁆𑀢𑀺;

𑀓𑀢𑀺 𑀪𑀕𑁆𑀕𑁂𑀲𑀼 𑀧𑀜𑁆𑀜𑀢𑁆𑀢𑀸, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑀤𑀲 𑀯𑁂𑀲𑀸𑀮𑀺𑀬𑀁 𑀧𑀜𑁆𑀜𑀢𑁆𑀢𑀸, 𑀏𑀓𑀯𑀻𑀲 𑀭𑀸𑀚𑀕𑀳𑁂 𑀓𑀢𑀸;

𑀙𑀊𑀦 𑀢𑀻𑀡𑀺𑀲𑀢𑀸𑀦𑀺, 𑀲𑀩𑁆𑀩𑁂 𑀲𑀸𑀯𑀢𑁆𑀣𑀺𑀬𑀁 𑀓𑀢𑀸.

𑀙 𑀆𑀴𑀯𑀺𑀬𑀁 𑀧𑀜𑁆𑀜𑀢𑁆𑀢𑀸, 𑀅𑀝𑁆𑀞 𑀓𑁄𑀲𑀫𑁆𑀩𑀺𑀬𑀁 𑀓𑀢𑀸;

𑀅𑀝𑁆𑀞 𑀲𑀓𑁆𑀓𑁂𑀲𑀼 𑀯𑀼𑀘𑁆𑀘𑀦𑁆𑀢𑀺, 𑀢𑀬𑁄 𑀪𑀕𑁆𑀕𑁂𑀲𑀼 𑀧𑀜𑁆𑀜𑀢𑁆𑀢𑀸.

𑀬𑁂 𑀯𑁂𑀲𑀸𑀮𑀺𑀬𑀁 𑀧𑀜𑁆𑀜𑀢𑁆𑀢𑀸, 𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁 [𑀬𑀣𑀸𑀓𑀣𑀁 (𑀲𑀻. 𑀲𑁆𑀬𑀸. 𑀏𑀯𑀫𑀼𑀧𑀭𑀺𑀧𑀺)];

𑀫𑁂𑀣𑀼𑀦𑀯𑀺𑀕𑁆𑀕𑀳𑀼𑀢𑁆𑀢𑀭𑀺, 𑀅𑀢𑀺𑀭𑁂𑀓𑀜𑁆𑀘 𑀓𑀸𑀴𑀓𑀁.

𑀪𑀽𑀢𑀁 𑀧𑀭𑀫𑁆𑀧𑀭𑀪𑀢𑁆𑀢𑀁, 𑀤𑀦𑁆𑀢𑀧𑁄𑀦𑁂𑀦 [𑀤𑀦𑁆𑀢𑀧𑁄𑀡𑁂𑀦 (𑀓.)] 𑀅𑀘𑁂𑀮𑀓𑁄;

𑀪𑀺𑀓𑁆𑀔𑀼𑀦𑀻𑀲𑀼 𑀘 𑀅𑀓𑁆𑀓𑁄𑀲𑁄, 𑀤𑀲𑁂𑀢𑁂 𑀯𑁂𑀲𑀸𑀮𑀺𑀬𑀁 𑀓𑀢𑀸.

𑀬𑁂 𑀭𑀸𑀚𑀕𑀳𑁂 𑀧𑀜𑁆𑀜𑀢𑁆𑀢𑀸, 𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀅𑀤𑀺𑀦𑁆𑀦𑀸𑀤𑀸𑀦𑀁 𑀭𑀸𑀚𑀕𑀳𑁂, 𑀤𑁆𑀯𑁂 𑀅𑀦𑀼𑀤𑁆𑀥𑀁𑀲𑀦𑀸 𑀤𑁆𑀯𑁂𑀧𑀺 𑀘 𑀪𑁂𑀤𑀸.

𑀅𑀦𑁆𑀢𑀭𑀯𑀸𑀲𑀓𑀁 𑀭𑀽𑀧𑀺𑀬𑀁 𑀲𑀼𑀢𑁆𑀢𑀁, 𑀉𑀚𑁆𑀛𑀸𑀧𑀦𑁂𑀦 𑀘 𑀧𑀸𑀘𑀺𑀢𑀧𑀺𑀡𑁆𑀟𑀁;

𑀕𑀡𑀪𑁄𑀚𑀦𑀁 𑀯𑀺𑀓𑀸𑀮𑁂 𑀘, 𑀘𑀸𑀭𑀺𑀢𑁆𑀢𑀁 𑀦𑀳𑀸𑀦𑀁 𑀊𑀦𑀯𑀻𑀲𑀢𑀺.

𑀘𑀻𑀯𑀭𑀁 𑀤𑀢𑁆𑀯𑀸 𑀯𑁄𑀲𑀸𑀲𑀦𑁆𑀢𑀺, 𑀏𑀢𑁂 𑀭𑀸𑀚𑀕𑀳𑁂 𑀓𑀢𑀸;

𑀕𑀺𑀭𑀕𑁆𑀕𑀘𑀭𑀺𑀬𑀸 𑀢𑀢𑁆𑀣𑁂𑀯, 𑀙𑀦𑁆𑀤𑀤𑀸𑀦𑁂𑀦 𑀏𑀓𑀯𑀻𑀲𑀢𑀺.

𑀬𑁂 𑀲𑀸𑀯𑀢𑁆𑀣𑀺𑀬𑀁 𑀧𑀜𑁆𑀜𑀢𑁆𑀢𑀸, 𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀗𑁆𑀖𑀸𑀤𑀺𑀲𑁂𑀲𑀸 𑀪𑀯𑀦𑁆𑀢𑀺 𑀲𑁄𑀴𑀲.

𑀅𑀦𑀺𑀬𑀢𑀸 𑀘 𑀤𑁆𑀯𑁂 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀸 𑀘𑀢𑀼𑀯𑀻𑀲𑀢𑀺;

𑀙𑀧𑀜𑁆𑀜𑀸𑀲𑀲𑀢𑀜𑁆𑀘𑁂𑀯, 𑀔𑀼𑀤𑁆𑀤𑀓𑀸𑀦𑀺 𑀧𑀯𑀼𑀘𑁆𑀘𑀦𑁆𑀢𑀺.

𑀤𑀲𑀬𑁂𑀯 𑀘 𑀕𑀸𑀭𑀬𑁆𑀳𑀸, 𑀤𑁆𑀯𑁂𑀲𑀢𑁆𑀢𑀢𑀺 𑀘 𑀲𑁂𑀔𑀺𑀬𑀸;

𑀙𑀊𑀦 𑀢𑀻𑀡𑀺𑀲𑀢𑀸𑀦𑀺, 𑀲𑀩𑁆𑀩𑁂 𑀲𑀸𑀯𑀢𑁆𑀣𑀺𑀬𑀁 𑀓𑀢𑀸.

𑀬𑁂 𑀆𑀴𑀯𑀺𑀬𑀁 𑀧𑀜𑁆𑀜𑀢𑁆𑀢𑀸, 𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀓𑀼𑀝𑀺𑀓𑁄𑀲𑀺𑀬𑀲𑁂𑀬𑁆𑀬𑀸 𑀘, 𑀔𑀡𑀦𑁂 𑀕𑀘𑁆𑀙 𑀤𑁂𑀯𑀢𑁂;

𑀲𑀧𑁆𑀧𑀸𑀡𑀓𑀜𑁆𑀘 𑀲𑀺𑀜𑁆𑀘𑀦𑁆𑀢𑀺, 𑀙 𑀏𑀢𑁂 𑀆𑀴𑀯𑀺𑀬𑀁 𑀓𑀢𑀸.

𑀬𑁂 𑀓𑁄𑀲𑀫𑁆𑀩𑀺𑀬𑀁 𑀧𑀜𑁆𑀜𑀢𑁆𑀢𑀸, 𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀫𑀳𑀸𑀯𑀺𑀳𑀸𑀭𑁄 𑀤𑁄𑀯𑀘𑀲𑁆𑀲𑀁, 𑀅𑀜𑁆𑀜𑀁 𑀤𑁆𑀯𑀸𑀭𑀁 𑀲𑀼𑀭𑀸𑀬 𑀘;

𑀅𑀦𑀸𑀤𑀭𑀺𑀬𑀁 𑀲𑀳𑀥𑀫𑁆𑀫𑁄, 𑀧𑀬𑁄𑀧𑀸𑀦𑁂𑀦 𑀅𑀝𑁆𑀞𑀫𑀁.

𑀬𑁂 𑀲𑀓𑁆𑀓𑁂𑀲𑀼 𑀧𑀜𑁆𑀜𑀢𑁆𑀢𑀸, 𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀏𑀴𑀓𑀮𑁄𑀫𑀸𑀦𑀺 𑀧𑀢𑁆𑀢𑁄 𑀘, 𑀑𑀯𑀸𑀤𑁄 𑀘𑁂𑀯 𑀪𑁂𑀲𑀚𑁆𑀚𑀁.

𑀲𑀽𑀘𑀺 𑀆𑀭𑀜𑁆𑀜𑀺𑀓𑁄 𑀘𑁂𑀯, 𑀅𑀝𑁆𑀞𑁂𑀢𑁂 [𑀙 𑀏𑀢𑁂 (𑀲𑀩𑁆𑀩𑀢𑁆𑀣)] 𑀓𑀸𑀧𑀺𑀮𑀯𑀢𑁆𑀣𑀯𑁂;

𑀉𑀤𑀓𑀲𑀼𑀤𑁆𑀥𑀺𑀬𑀸 𑀑𑀯𑀸𑀤𑁄, 𑀪𑀺𑀓𑁆𑀔𑀼𑀦𑀻𑀲𑀼 𑀧𑀯𑀼𑀘𑁆𑀘𑀦𑁆𑀢𑀺.

𑀬𑁂 𑀪𑀕𑁆𑀕𑁂𑀲𑀼 𑀧𑀜𑁆𑀜𑀢𑁆𑀢𑀸, 𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀲𑀫𑀸𑀤𑀳𑀺𑀢𑁆𑀯𑀸 𑀯𑀺𑀲𑀺𑀩𑁆𑀩𑁂𑀦𑁆𑀢𑀺, 𑀲𑀸𑀫𑀺𑀲𑁂𑀦 𑀲𑀲𑀺𑀢𑁆𑀣𑀓𑀁.

𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀺 𑀪𑀯𑀦𑁆𑀢𑀺;

𑀲𑀢𑁆𑀢 𑀘 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺, 𑀅𑀝𑁆𑀞 𑀤𑁆𑀯𑀢𑁆𑀢𑀺𑀁𑀲 𑀔𑀼𑀤𑁆𑀤𑀓𑀸.

𑀤𑁆𑀯𑁂 𑀕𑀸𑀭𑀬𑁆𑀳𑀸 𑀢𑀬𑁄 𑀲𑁂𑀓𑁆𑀔𑀸, 𑀙𑀧𑁆𑀧𑀜𑁆𑀜𑀸𑀲 𑀲𑀺𑀓𑁆𑀔𑀸𑀧𑀤𑀸;

𑀙𑀲𑀼 𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀙𑀊𑀦 𑀢𑀻𑀡𑀺𑀲𑀢𑀸𑀦𑀺, 𑀲𑀩𑁆𑀩𑁂 𑀲𑀸𑀯𑀢𑁆𑀣𑀺𑀬𑀁 𑀓𑀢𑀸;

𑀓𑀸𑀭𑀼𑀡𑀺𑀓𑁂𑀦 𑀩𑀼𑀤𑁆𑀥𑁂𑀦, 𑀕𑁄𑀢𑀫𑁂𑀦 𑀬𑀲𑀲𑁆𑀲𑀺𑀦𑀸.

𑁨. 𑀘𑀢𑀼𑀯𑀺𑀧𑀢𑁆𑀢𑀺𑀁

𑁩𑁩𑁬. 𑀬𑀁 𑀢𑀁 [𑀬𑀁 𑀬𑀁 (𑀓.)] 𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀺 𑀦𑁄;

𑀢𑀁 𑀢𑀁 𑀩𑁆𑀬𑀸𑀓𑀢𑀁 𑀅𑀦𑀜𑁆𑀜𑀣𑀸;

𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫𑀺 𑀢𑀤𑀺𑀗𑁆𑀖 𑀩𑁆𑀭𑀽𑀳𑀺;

𑀕𑀭𑀼𑀓 𑀮𑀳𑀼𑀓𑀜𑁆𑀘𑀸𑀧𑀺 𑀲𑀸𑀯𑀲𑁂𑀲𑀁;

𑀅𑀦𑀯𑀲𑁂𑀲𑀁 𑀤𑀼𑀝𑁆𑀞𑀼𑀮𑁆𑀮𑀜𑁆𑀘 𑀅𑀤𑀼𑀝𑁆𑀞𑀼𑀮𑁆𑀮𑀁;

𑀬𑁂 𑀘 𑀬𑀸𑀯𑀢𑀢𑀺𑀬𑀓𑀸.

𑀲𑀸𑀥𑀸𑀭𑀡𑀁 𑀅𑀲𑀸𑀥𑀸𑀭𑀡𑀁;

𑀯𑀺𑀪𑀢𑁆𑀢𑀺𑀬𑁄 𑀘 [𑀯𑀺𑀧𑀢𑁆𑀢𑀺𑀬𑁄 𑀘 (𑀲𑀻. 𑀲𑁆𑀬𑀸.)] 𑀬𑁂𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺;

𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀯𑀺𑀬𑀸𑀓𑀭𑁄𑀳𑀺;

𑀳𑀦𑁆𑀤 𑀯𑀸𑀓𑁆𑀬𑀁 𑀲𑀼𑀡𑁄𑀫 𑀢𑁂.

𑀏𑀓𑀢𑀺𑀁𑀲𑀸 𑀬𑁂 𑀕𑀭𑀼𑀓𑀸, 𑀅𑀝𑁆𑀞𑁂𑀢𑁆𑀣 𑀅𑀦𑀯𑀲𑁂𑀲𑀸;

𑀬𑁂 𑀕𑀭𑀼𑀓𑀸 𑀢𑁂 𑀤𑀼𑀝𑁆𑀞𑀼𑀮𑁆𑀮𑀸, 𑀬𑁂 𑀤𑀼𑀝𑁆𑀞𑀼𑀮𑁆𑀮𑀸 𑀲𑀸 𑀲𑀻𑀮𑀯𑀺𑀧𑀢𑁆𑀢𑀺;

𑀧𑀸𑀭𑀸𑀚𑀺𑀓𑀁 𑀲𑀗𑁆𑀖𑀸𑀤𑀺𑀲𑁂𑀲𑁄, ‘‘𑀲𑀻𑀮𑀯𑀺𑀧𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀣𑀼𑀮𑁆𑀮𑀘𑁆𑀘𑀬𑀁 𑀧𑀸𑀘𑀺𑀢𑁆𑀢𑀺𑀬𑀸, 𑀧𑀸𑀝𑀺𑀤𑁂𑀲𑀦𑀻𑀬𑀁 𑀤𑀼𑀓𑁆𑀓𑀝𑀁;

𑀤𑀼𑀩𑁆𑀪𑀸𑀲𑀺𑀢𑀁 𑀬𑁄 𑀘𑀸𑀬𑀁, 𑀅𑀓𑁆𑀓𑁄𑀲𑀢𑀺 𑀳𑀲𑀸𑀥𑀺𑀧𑁆𑀧𑀸𑀬𑁄;

𑀅𑀬𑀁 𑀲𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀲𑀫𑁆𑀫𑀢𑀸.

𑀯𑀺𑀧𑀭𑀻𑀢𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺, 𑀅𑀲𑀤𑁆𑀥𑀫𑁆𑀫𑁂𑀳𑀺 𑀧𑀼𑀭𑀓𑁆𑀔𑀢𑀸;

𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀁, 𑀤𑀼𑀧𑁆𑀧𑀜𑁆𑀜𑀸 𑀫𑁄𑀳𑀧𑀸𑀭𑀼𑀢𑀸;

𑀅𑀬𑀁 𑀲𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀲𑀫𑁆𑀫𑀢𑀸.

𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑁋 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸’’𑀢𑀺 𑀪𑀡𑀢𑀺, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀪𑀺𑀓𑁆𑀔𑀼𑀦𑀻 𑀧𑀡𑀻𑀢𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑀲𑀽𑀧𑀁 𑀯𑀸 𑀑𑀤𑀦𑀁 𑀯𑀸 𑀅𑀕𑀺𑀮𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺. 𑀅𑀬𑀁 𑀲𑀸 𑀆𑀚𑀻𑀯𑀯𑀺𑀧𑀢𑁆𑀢𑀺 𑀲𑀫𑁆𑀫𑀢𑀸.

𑀏𑀓𑀸𑀤𑀲 𑀬𑀸𑀯𑀢𑀢𑀺𑀬𑀓𑀸, 𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁;

𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸, 𑀅𑀝𑁆𑀞 𑀬𑀸𑀯𑀢𑀢𑀺𑀬𑀓𑀸;

𑀅𑀭𑀺𑀝𑁆𑀞𑁄 𑀘𑀡𑁆𑀟𑀓𑀸𑀴𑀻 𑀘, 𑀇𑀫𑁂 𑀢𑁂 𑀬𑀸𑀯𑀢𑀢𑀺𑀬𑀓𑀸.

𑁩. 𑀙𑁂𑀤𑀦𑀓𑀸𑀤𑀺

𑁩𑁩𑁭. 𑀓𑀢𑀺 𑀙𑁂𑀤𑀦𑀓𑀸𑀦𑀺? 𑀓𑀢𑀺 𑀪𑁂𑀤𑀦𑀓𑀸𑀦𑀺? 𑀓𑀢𑀺 𑀉𑀤𑁆𑀤𑀸𑀮𑀦𑀓𑀸𑀦𑀺? 𑀓𑀢𑀺 𑀅𑀦𑀜𑁆𑀜𑀧𑀸𑀘𑀺𑀢𑁆𑀢𑀺𑀬𑀸𑀦𑀺? 𑀓𑀢𑀺 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑁄? 𑀓𑀢𑀺 𑀲𑀸𑀫𑀻𑀘𑀺𑀬𑁄? 𑀓𑀢𑀺 𑀧𑀭𑀫𑀸𑀦𑀺?

𑀓𑀢𑀺 𑀚𑀸𑀦𑀦𑁆𑀢𑀺 𑀧𑀜𑁆𑀜𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀙 𑀙𑁂𑀤𑀦𑀓𑀸𑀦𑀺. 𑀏𑀓𑀁 𑀪𑁂𑀤𑀦𑀓𑀁. 𑀏𑀓𑀁 𑀉𑀤𑁆𑀤𑀸𑀮𑀦𑀓𑀁. 𑀘𑀢𑁆𑀢𑀸𑀭𑀺 𑀅𑀦𑀜𑁆𑀜𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀘𑀢𑀲𑁆𑀲𑁄 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑁄. 𑀲𑀢𑁆𑀢 𑀲𑀸𑀫𑀻𑀘𑀺𑀬𑁄. 𑀘𑀼𑀤𑁆𑀤𑀲 𑀧𑀭𑀫𑀸𑀦𑀺.

𑀲𑁄𑀤𑀲 [𑀲𑁄𑀴𑀲 (𑀲𑀻. 𑀲𑁆𑀬𑀸.) 𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀚𑀸𑀦𑀦𑁆𑀢𑀺 𑀧𑀜𑁆𑀜𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑁪. 𑀅𑀲𑀸𑀥𑀸𑀭𑀡𑀸𑀤𑀺

𑁩𑁩𑁮. 𑀯𑀻𑀲𑀁 𑀤𑁆𑀯𑁂 𑀲𑀢𑀸𑀦𑀺 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺;

𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺 𑀉𑀧𑁄𑀲𑀣𑁂𑀲𑀼;

𑀢𑀻𑀡𑀺 𑀲𑀢𑀸𑀦𑀺 𑀘𑀢𑁆𑀢𑀸𑀭𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺;

𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺 𑀉𑀧𑁄𑀲𑀣𑁂𑀲𑀼.

𑀙𑀘𑀢𑁆𑀢𑀸𑀭𑀻𑀲𑀸 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸;

𑀲𑀢𑀁 𑀢𑀺𑀁𑀲𑀸 𑀘 𑀪𑀺𑀓𑁆𑀔𑀼𑀦𑀻𑀦𑀁, 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸.

𑀲𑀢𑀁 𑀲𑀢𑁆𑀢𑀢𑀺 𑀙𑀘𑁆𑀘𑁂𑀯, 𑀉𑀪𑀺𑀦𑁆𑀦𑀁 𑀅𑀲𑀸𑀥𑀸𑀭𑀡𑀸;

𑀲𑀢𑀁 𑀲𑀢𑁆𑀢𑀢𑀺 𑀘𑀢𑁆𑀢𑀸𑀭𑀺, 𑀉𑀪𑀺𑀦𑁆𑀦𑀁 𑀲𑀫𑀲𑀺𑀓𑁆𑀔𑀢𑀸.

𑀯𑀻𑀲𑀁 𑀤𑁆𑀯𑁂 𑀲𑀢𑀸𑀦𑀺 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺;

𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺 𑀉𑀧𑁄𑀲𑀣𑁂𑀲𑀼;

𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁.

𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀺 𑀪𑀯𑀦𑁆𑀢𑀺 𑀢𑁂𑀭𑀲;

𑀅𑀦𑀺𑀬𑀢𑀸 𑀤𑁆𑀯𑁂 𑀳𑁄𑀦𑁆𑀢𑀺.

𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀢𑀺𑀁𑀲𑁂𑀯, 𑀤𑁆𑀯𑁂𑀦𑀯𑀼𑀢𑀺 𑀘 𑀔𑀼𑀤𑁆𑀤𑀓𑀸;

𑀘𑀢𑁆𑀢𑀸𑀭𑁄 𑀧𑀸𑀝𑀺𑀤𑁂𑀲𑀦𑀻𑀬𑀸, 𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀸.

𑀯𑀻𑀲𑀁 𑀤𑁆𑀯𑁂 𑀲𑀢𑀸𑀦𑀺 𑀘𑀺𑀫𑁂 𑀳𑁄𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺;

𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺 𑀉𑀧𑁄𑀲𑀣𑁂𑀲𑀼.

𑀢𑀻𑀡𑀺 𑀲𑀢𑀸𑀦𑀺 𑀘𑀢𑁆𑀢𑀸𑀭𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺;

𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺 𑀉𑀧𑁄𑀲𑀣𑁂𑀲𑀼, 𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁.

𑀧𑀸𑀭𑀸𑀚𑀺𑀓𑀸𑀦𑀺 𑀅𑀝𑁆𑀞, 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀺 𑀪𑀯𑀦𑁆𑀢𑀺 𑀲𑀢𑁆𑀢𑀭𑀲;

𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀢𑀺𑀁𑀲𑁂𑀯, 𑀲𑀢𑀁 𑀲𑀝𑁆𑀞𑀺 𑀙 𑀘𑁂𑀯 𑀔𑀼𑀤𑁆𑀤𑀓𑀸𑀦𑀺 𑀧𑀯𑀼𑀘𑁆𑀘𑀦𑁆𑀢𑀺.

𑀅𑀝𑁆𑀞 𑀧𑀸𑀝𑀺𑀤𑁂𑀲𑀦𑀻𑀬𑀸, 𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀸;

𑀢𑀻𑀡𑀺 𑀲𑀢𑀸𑀦𑀺 𑀘𑀢𑁆𑀢𑀸𑀭𑀺 𑀘𑀺𑀫𑁂 𑀳𑁄𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀺;

𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀦𑁆𑀢𑀺 𑀉𑀧𑁄𑀲𑀣𑁂𑀲𑀼.

𑀙𑀘𑀢𑁆𑀢𑀸𑀭𑀻𑀲𑀸 𑀪𑀺𑀓𑁆𑀔𑀽𑀦𑀁, 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸;

𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁.

𑀲𑀗𑁆𑀖𑀸𑀤𑀺𑀲𑁂𑀲𑀸, 𑀤𑁆𑀯𑁂 𑀅𑀦𑀺𑀬𑀢𑁂𑀳𑀺 𑀅𑀝𑁆𑀞;

𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀤𑁆𑀯𑀸𑀤𑀲, 𑀢𑁂𑀳𑀺 𑀢𑁂 𑀳𑁄𑀦𑁆𑀢𑀺 𑀯𑀻𑀲𑀢𑀺.

𑀤𑁆𑀯𑁂𑀯𑀻𑀲𑀢𑀺 𑀔𑀼𑀤𑁆𑀤𑀓𑀸, 𑀘𑀢𑀼𑀭𑁄 𑀧𑀸𑀝𑀺𑀤𑁂𑀲𑀦𑀻𑀬𑀸;

𑀙𑀘𑀢𑁆𑀢𑀸𑀭𑀻𑀲𑀸 𑀘𑀺𑀫𑁂 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸.

𑀲𑀢𑀁 𑀢𑀺𑀁𑀲𑀸 𑀘 𑀪𑀺𑀓𑁆𑀔𑀼𑀦𑀻𑀦𑀁, 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸;

𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁.

𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀗𑁆𑀖𑀫𑁆𑀳𑀸 𑀤𑀲 𑀦𑀺𑀲𑁆𑀲𑀭𑁂;

𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀤𑁆𑀯𑀸𑀤𑀲, 𑀙𑀦𑁆𑀦𑀯𑀼𑀢𑀺 𑀘 𑀔𑀼𑀤𑁆𑀤𑀓𑀸;

𑀅𑀝𑁆𑀞 𑀧𑀸𑀝𑀺𑀤𑁂𑀲𑀦𑀻𑀬𑀸.

𑀲𑀢𑀁 𑀢𑀺𑀁𑀲𑀸 𑀘𑀺𑀫𑁂 𑀳𑁄𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁, 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸;

𑀲𑀢𑀁 𑀲𑀢𑁆𑀢𑀢𑀺 𑀙𑀘𑁆𑀘𑁂𑀯, 𑀉𑀪𑀺𑀦𑁆𑀦𑀁 𑀅𑀲𑀸𑀥𑀸𑀭𑀡𑀸;

𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁.

𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀺 𑀪𑀯𑀦𑁆𑀢𑀺 𑀲𑁄𑀴𑀲;

𑀅𑀦𑀺𑀬𑀢𑀸 𑀤𑁆𑀯𑁂 𑀳𑁄𑀦𑁆𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀘𑀢𑀼𑀯𑀻𑀲𑀢𑀺;

𑀲𑀢𑀁 𑀅𑀝𑁆𑀞𑀸𑀭𑀲𑀸 𑀘𑁂𑀯, 𑀔𑀼𑀤𑁆𑀤𑀓𑀸𑀦𑀺 𑀧𑀯𑀼𑀘𑁆𑀘𑀦𑁆𑀢𑀺;

𑀤𑁆𑀯𑀸𑀤𑀲 𑀧𑀸𑀝𑀺𑀤𑁂𑀲𑀦𑀻𑀬𑀸.

𑀲𑀢𑀁 𑀲𑀢𑁆𑀢𑀢𑀺 𑀙𑀘𑁆𑀘𑁂𑀯𑀺𑀫𑁂 𑀳𑁄𑀦𑁆𑀢𑀺, 𑀉𑀪𑀺𑀦𑁆𑀦𑀁 𑀅𑀲𑀸𑀥𑀸𑀭𑀡𑀸;

𑀲𑀢𑀁 𑀲𑀢𑁆𑀢𑀢𑀺 𑀘𑀢𑁆𑀢𑀸𑀭𑀺, 𑀉𑀪𑀺𑀦𑁆𑀦𑀁 𑀲𑀫𑀲𑀺𑀓𑁆𑀔𑀢𑀸;

𑀢𑁂 𑀲𑀼𑀡𑁄𑀳𑀺 𑀬𑀣𑀸𑀢𑀣𑀁.

𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀺 𑀪𑀯𑀦𑁆𑀢𑀺 𑀲𑀢𑁆𑀢;

𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀅𑀝𑁆𑀞𑀸𑀭𑀲, 𑀲𑀫𑀲𑀢𑁆𑀢𑀢𑀺 𑀔𑀼𑀤𑁆𑀤𑀓𑀸;

𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀸𑀦𑀺.

𑀲𑀢𑀁 𑀲𑀢𑁆𑀢𑀢𑀺 𑀘𑀢𑁆𑀢𑀸𑀭𑀺 𑀘𑀺𑀫𑁂 𑀳𑁄𑀦𑁆𑀢𑀺, 𑀉𑀪𑀺𑀦𑁆𑀦𑀁 𑀲𑀫𑀲𑀺𑀓𑁆𑀔𑀢𑀸;

𑀅𑀝𑁆𑀞𑁂 𑀧𑀸𑀭𑀸𑀚𑀺𑀓𑀸 𑀬𑁂 𑀤𑀼𑀭𑀸𑀲𑀤𑀸, 𑀢𑀸𑀮𑀯𑀢𑁆𑀣𑀼𑀲𑀫𑀽𑀧𑀫𑀸.

𑀧𑀡𑁆𑀟𑀼𑀧𑀮𑀸𑀲𑁄 𑀧𑀼𑀣𑀼𑀲𑀺𑀮𑀸, 𑀲𑀻𑀲𑀘𑁆𑀙𑀺𑀦𑁆𑀦𑁄𑀯 𑀲𑁄 𑀦𑀭𑁄;

𑀢𑀸𑀮𑁄𑀯 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑁄, 𑀅𑀯𑀺𑀭𑀼𑀴𑁆𑀳𑀻 𑀪𑀯𑀦𑁆𑀢𑀺 𑀢𑁂.

𑀢𑁂𑀯𑀻𑀲𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀤𑁆𑀯𑁂 𑀅𑀦𑀺𑀬𑀢𑀸;

𑀤𑁆𑀯𑁂 𑀘𑀢𑁆𑀢𑀸𑀭𑀻𑀲 𑀦𑀺𑀲𑁆𑀲𑀕𑁆𑀕𑀺𑀬𑀸;

𑀅𑀝𑁆𑀞𑀸𑀲𑀻𑀢𑀺𑀲𑀢𑀁 𑀧𑀸𑀘𑀺𑀢𑁆𑀢𑀺𑀬𑀸, 𑀤𑁆𑀯𑀸𑀤𑀲 𑀧𑀸𑀝𑀺𑀤𑁂𑀲𑀦𑀻𑀬𑀸.

𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀸, 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺;

𑀲𑀫𑁆𑀫𑀼𑀔𑀸 𑀘 𑀧𑀝𑀺𑀜𑁆𑀜𑀸𑀬, 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑀤𑁆𑀯𑁂 𑀉𑀧𑁄𑀲𑀣𑀸 𑀤𑁆𑀯𑁂 𑀧𑀯𑀸𑀭𑀡𑀸;