𑀅𑀥𑀺𑀓𑀭𑀡𑀪𑁂𑀤𑁄

𑁧. 𑀉𑀓𑁆𑀓𑁄𑀝𑀦𑀪𑁂𑀤𑀸𑀤𑀺

𑁩𑁪𑁦. [𑀘𑀽𑀴𑀯. 𑁨𑁧𑁫; 𑀧𑀭𑀺. 𑁨𑁭𑁫] 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺.

𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀺 𑀉𑀓𑁆𑀓𑁄𑀝𑀸? 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀤𑀲 𑀉𑀓𑁆𑀓𑁄𑀝𑀸. 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀤𑁆𑀯𑁂 𑀉𑀓𑁆𑀓𑁄𑀝𑀸, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀘𑀢𑁆𑀢𑀸𑀭𑁄 𑀉𑀓𑁆𑀓𑁄𑀝𑀸, 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀢𑀬𑁄 𑀉𑀓𑁆𑀓𑁄𑀝𑀸, 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀏𑀓𑁄 𑀉𑀓𑁆𑀓𑁄𑀝𑁄 𑁋 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀇𑀫𑁂 𑀤𑀲 𑀉𑀓𑁆𑀓𑁄𑀝𑀸.

𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀓𑀢𑀺 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀓𑀢𑀺 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀓𑀢𑀺 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀓𑀢𑀺 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺?

𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀤𑁆𑀯𑁂 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀘𑀢𑁆𑀢𑀸𑀭𑁄 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀢𑀬𑁄 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑁄 𑀏𑀓𑀁 𑀲𑀫𑀣𑀁 𑀉𑀓𑁆𑀓𑁄𑀝𑁂𑀢𑀺.

𑁩𑁪𑁧. 𑀓𑀢𑀺 𑀉𑀓𑁆𑀓𑁄𑀝𑀸? 𑀓𑀢𑀺𑀳𑀸𑀓𑀸𑀭𑁂𑀳𑀺 𑀉𑀓𑁆𑀓𑁄𑀝𑀦𑀁 𑀧𑀲𑀯𑀢𑀺? 𑀓𑀢𑀺𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺? 𑀓𑀢𑀺 𑀧𑀼𑀕𑁆𑀕𑀮𑀸 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺?

𑀤𑁆𑀯𑀸𑀤𑀲 𑀉𑀓𑁆𑀓𑁄𑀝𑀸. 𑀤𑀲𑀳𑀸𑀓𑀸𑀭𑁂𑀳𑀺 𑀉𑀓𑁆𑀓𑁄𑀝𑀦𑀁 𑀧𑀲𑀯𑀢𑀺. 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺. 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺?

𑀓𑀢𑀫𑁂 𑀤𑁆𑀯𑀸𑀤𑀲 𑀉𑀓𑁆𑀓𑁄𑀝𑀸? 𑀅𑀓𑀢𑀁 𑀓𑀫𑁆𑀫𑀁, 𑀤𑀼𑀓𑁆𑀓𑀝𑀁 𑀓𑀫𑁆𑀫𑀁, 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫𑀁, 𑀅𑀦𑀺𑀳𑀢𑀁, 𑀤𑀼𑀦𑁆𑀦𑀺𑀳𑀢𑀁, 𑀧𑀼𑀦 𑀦𑀺𑀳𑀦𑀺𑀢𑀩𑁆𑀩𑀁, 𑀅𑀯𑀺𑀦𑀺𑀘𑁆𑀙𑀺𑀢𑀁, 𑀤𑀼𑀯𑀺𑀦𑀺𑀘𑁆𑀙𑀺𑀢𑀁, 𑀧𑀼𑀦 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀁, 𑀅𑀯𑀽𑀧𑀲𑀦𑁆𑀢𑀁, 𑀤𑀼𑀯𑀽𑀧𑀲𑀦𑁆𑀢𑀁, 𑀧𑀼𑀦 𑀯𑀽𑀧𑀲𑀫𑁂𑀢𑀩𑁆𑀩𑀦𑁆𑀢𑀺 𑁋 𑀇𑀫𑁂 𑀤𑁆𑀯𑀸𑀤𑀲 𑀉𑀓𑁆𑀓𑁄𑀝𑀸.

𑀓𑀢𑀫𑁂𑀳𑀺 𑀤𑀲𑀳𑀸𑀓𑀸𑀭𑁂𑀳𑀺 𑀉𑀓𑁆𑀓𑁄𑀝𑀦𑀁 𑀧𑀲𑀯𑀢𑀺? 𑀢𑀢𑁆𑀣 𑀚𑀸𑀢𑀓𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺, 𑀢𑀢𑁆𑀣 𑀚𑀸𑀢𑀓𑀁 𑀯𑀽𑀧𑀲𑀦𑁆𑀢𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀽𑀧𑀲𑀦𑁆𑀢𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺, 𑀢𑀢𑁆𑀣 𑀕𑀢𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺, 𑀢𑀢𑁆𑀣 𑀕𑀢𑀁 𑀯𑀽𑀧𑀲𑀦𑁆𑀢𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺, 𑀲𑀢𑀺𑀯𑀺𑀦𑀬𑀁 𑀉𑀓𑁆𑀓𑁄𑀝𑁂𑀢𑀺, 𑀅𑀫𑀽𑀴𑁆𑀳𑀯𑀺𑀦𑀬𑀁 𑀉𑀓𑁆𑀓𑁄𑀝𑁂𑀢𑀺, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀁 𑀉𑀓𑁆𑀓𑁄𑀝𑁂𑀢𑀺, 𑀢𑀺𑀡𑀯𑀢𑁆𑀣𑀸𑀭𑀓𑀁 𑀉𑀓𑁆𑀓𑁄𑀝𑁂𑀢𑀺 𑁋 𑀇𑀫𑁂𑀳𑀺 𑀤𑀲𑀳𑀸𑀓𑀸𑀭𑁂𑀳𑀺 𑀉𑀓𑁆𑀓𑁄𑀝𑀦𑀁 𑀧𑀲𑀯𑀢𑀺.

𑀓𑀢𑀫𑁂𑀳𑀺 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺? 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺 𑁋 𑀇𑀫𑁂𑀳𑀺 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺.

𑀓𑀢𑀫𑁂 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺? 𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑁄 𑀉𑀓𑁆𑀓𑁄𑀝𑁂𑀢𑀺 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀆𑀕𑀦𑁆𑀢𑀼𑀓𑁄 𑀉𑀓𑁆𑀓𑁄𑀝𑁂𑀢𑀺 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀓𑀸𑀭𑀓𑁄 𑀉𑀓𑁆𑀓𑁄𑀝𑁂𑀢𑀺 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀙𑀦𑁆𑀤𑀤𑀸𑀬𑀓𑁄 𑀉𑀓𑁆𑀓𑁄𑀝𑁂𑀢𑀺 𑀉𑀓𑁆𑀓𑁄𑀝𑀦𑀓𑀁 𑀧𑀸𑀘𑀺𑀢𑁆𑀢𑀺𑀬𑀁 𑁋 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀦𑁆𑀢𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑀺.

𑁨. 𑀅𑀥𑀺𑀓𑀭𑀡𑀦𑀺𑀤𑀸𑀦𑀸𑀤𑀺

𑁩𑁪𑁨. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁?

𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀦𑀺𑀤𑀸𑀦𑀁 𑀯𑀺𑀯𑀸𑀤𑀲𑀫𑀼𑀤𑀬𑀁 𑀯𑀺𑀯𑀸𑀤𑀚𑀸𑀢𑀺𑀓𑀁 𑀯𑀺𑀯𑀸𑀤𑀧𑀪𑀯𑀁 𑀯𑀺𑀯𑀸𑀤𑀲𑀫𑁆𑀪𑀸𑀭𑀁 𑀯𑀺𑀯𑀸𑀤𑀲𑀫𑀼𑀝𑁆𑀞𑀸𑀦𑀁. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀦𑀼𑀯𑀸𑀤𑀦𑀺𑀤𑀸𑀦𑀁 𑀅𑀦𑀼𑀯𑀸𑀤𑀲𑀫𑀼𑀤𑀬𑀁 𑀅𑀦𑀼𑀯𑀸𑀤𑀚𑀸𑀢𑀺𑀓𑀁 𑀅𑀦𑀼𑀯𑀸𑀤𑀧𑀪𑀯𑀁 𑀅𑀦𑀼𑀯𑀸𑀤𑀲𑀫𑁆𑀪𑀸𑀭𑀁 𑀅𑀦𑀼𑀯𑀸𑀤𑀲𑀫𑀼𑀝𑁆𑀞𑀸𑀦𑀁. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀺𑀦𑀺𑀤𑀸𑀦𑀁 𑀆𑀧𑀢𑁆𑀢𑀺𑀲𑀫𑀼𑀤𑀬𑀁 𑀆𑀧𑀢𑁆𑀢𑀺𑀚𑀸𑀢𑀺𑀓𑀁 𑀆𑀧𑀢𑁆𑀢𑀺𑀧𑀪𑀯𑀁 𑀆𑀧𑀢𑁆𑀢𑀺𑀲𑀫𑁆𑀪𑀸𑀭𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀁. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀬𑀦𑀺𑀤𑀸𑀦𑀁 𑀓𑀺𑀘𑁆𑀘𑀬𑀲𑀫𑀼𑀤𑀬𑀁 𑀓𑀺𑀘𑁆𑀘𑀬𑀚𑀸𑀢𑀺𑀓𑀁 𑀓𑀺𑀘𑁆𑀘𑀬𑀧𑀪𑀯𑀁 𑀓𑀺𑀘𑁆𑀘𑀬𑀲𑀫𑁆𑀪𑀸𑀭𑀁 𑀓𑀺𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀁.

𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁…𑀧𑁂… 𑀆𑀧𑀢𑁆𑀢𑀸𑀥𑀺𑀓𑀭𑀡𑀁…𑀧𑁂… 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁?

𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀳𑁂𑀢𑀼𑀦𑀺𑀤𑀸𑀦𑀁, 𑀳𑁂𑀢𑀼𑀲𑀫𑀼𑀤𑀬𑀁, 𑀳𑁂𑀢𑀼𑀚𑀸𑀢𑀺𑀓𑀁, 𑀳𑁂𑀢𑀼𑀧𑀪𑀯𑀁, 𑀳𑁂𑀢𑀼𑀲𑀫𑁆𑀪𑀸𑀭𑀁, 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀁. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁…𑀧𑁂… 𑀆𑀧𑀢𑁆𑀢𑀸𑀥𑀺𑀓𑀭𑀡𑀁…𑀧𑁂… 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀳𑁂𑀢𑀼𑀦𑀺𑀤𑀸𑀦𑀁, 𑀳𑁂𑀢𑀼𑀲𑀫𑀼𑀤𑀬𑀁, 𑀳𑁂𑀢𑀼𑀚𑀸𑀢𑀺𑀓𑀁, 𑀳𑁂𑀢𑀼𑀧𑀪𑀯𑀁, 𑀳𑁂𑀢𑀼𑀲𑀫𑁆𑀪𑀸𑀭𑀁, 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀁.

𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 …𑀧𑁂… 𑀆𑀧𑀢𑁆𑀢𑀸𑀥𑀺𑀓𑀭𑀡𑀁…𑀧𑁂… 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁?

𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀧𑀘𑁆𑀘𑀬𑀦𑀺𑀤𑀸𑀦𑀁, 𑀧𑀘𑁆𑀘𑀬𑀲𑀫𑀼𑀤𑀬𑀁, 𑀧𑀘𑁆𑀘𑀬𑀚𑀸𑀢𑀺𑀓𑀁, 𑀧𑀘𑁆𑀘𑀬𑀧𑀪𑀯𑀁, 𑀧𑀘𑁆𑀘𑀬𑀲𑀫𑁆𑀪𑀸𑀭𑀁, 𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀁. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁…𑀧𑁂… 𑀆𑀧𑀢𑁆𑀢𑀸𑀥𑀺𑀓𑀭𑀡𑀁…𑀧𑁂… 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀧𑀘𑁆𑀘𑀬𑀦𑀺𑀤𑀸𑀦𑀁, 𑀧𑀘𑁆𑀘𑀬𑀲𑀫𑀼𑀤𑀬𑀁, 𑀧𑀘𑁆𑀘𑀬𑀚𑀸𑀢𑀺𑀓𑀁, 𑀧𑀘𑁆𑀘𑀬𑀧𑀪𑀯𑀁, 𑀧𑀘𑁆𑀘𑀬𑀲𑀫𑁆𑀪𑀸𑀭𑀁, 𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀁.

𑁩. 𑀅𑀥𑀺𑀓𑀭𑀡𑀫𑀽𑀮𑀸𑀤𑀺

𑁩𑁪𑁩. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀺 𑀫𑀽𑀮𑀸𑀦𑀺, 𑀓𑀢𑀺 𑀲𑀫𑀼𑀝𑁆𑀞𑀸𑀦𑀸? 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀢𑁂𑀢𑁆𑀢𑀺𑀁𑀲 𑀫𑀽𑀮𑀸𑀦𑀺, 𑀢𑁂𑀢𑁆𑀢𑀺𑀁𑀲 𑀲𑀫𑀼𑀝𑁆𑀞𑀸𑀦𑀸.

𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀸𑀦𑀺 𑀢𑁂𑀢𑁆𑀢𑀺𑀁𑀲 𑀫𑀽𑀮𑀸𑀦𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀤𑁆𑀯𑀸𑀤𑀲 𑀫𑀽𑀮𑀸𑀦𑀺, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀘𑀼𑀤𑁆𑀤𑀲 𑀫𑀽𑀮𑀸𑀦𑀺, 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀙 𑀫𑀽𑀮𑀸𑀦𑀺, 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀏𑀓𑀁 𑀫𑀽𑀮𑀁, 𑀲𑀗𑁆𑀖𑁄 𑁋 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀇𑀫𑀸𑀦𑀺 𑀢𑁂𑀢𑁆𑀢𑀺𑀁𑀲 𑀫𑀽𑀮𑀸𑀦𑀺.

𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑁂 𑀢𑁂𑀢𑁆𑀢𑀺𑀁𑀲 𑀲𑀫𑀼𑀝𑁆𑀞𑀸𑀦𑀸? 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀅𑀝𑁆𑀞𑀸𑀭𑀲𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀲𑀫𑀼𑀝𑁆𑀞𑀸𑀦𑀸, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀸𑀦𑀸, 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀲𑀫𑀼𑀝𑁆𑀞𑀸𑀦𑀸, 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀲𑀫𑀼𑀝𑁆𑀞𑀸𑀦𑀸 𑁋 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀇𑀫𑁂 𑀢𑁂𑀢𑁆𑀢𑀺𑀁𑀲 𑀲𑀫𑀼𑀝𑁆𑀞𑀸𑀦𑀸.

𑁪. 𑀅𑀥𑀺𑀓𑀭𑀡𑀧𑀘𑁆𑀘𑀬𑀸𑀧𑀢𑁆𑀢𑀺

𑁩𑁪𑁪. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀻𑀢𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀦 𑀆𑀧𑀢𑁆𑀢𑀺. 𑀓𑀺𑀁 𑀧𑀦 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫, 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬. 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀉𑀧𑀲𑀫𑁆𑀧𑀦𑁆𑀦𑀁 𑀑𑀫𑀲𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀅𑀦𑀼𑀧𑀲𑀫𑁆𑀧𑀦𑁆𑀦𑀁 𑀑𑀫𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀇𑀫𑀸 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺? 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡𑀁? 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸? 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺? 𑀓𑀢𑀺𑀳𑀺 𑀅𑀥𑀺𑀓𑀭𑀡𑁂𑀳𑀺 𑀓𑀢𑀺𑀲𑀼 𑀞𑀸𑀦𑁂𑀲𑀼 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺?

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀏𑀓𑀁 𑀯𑀺𑀧𑀢𑁆𑀢𑀺𑀁 𑀪𑀚𑀦𑁆𑀢𑀺 𑁋 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀤𑁆𑀯𑀻𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺. 𑀏𑀓𑁂𑀦 𑀅𑀥𑀺𑀓𑀭𑀡𑁂𑀦 𑁋 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦; 𑀢𑀻𑀲𑀼 𑀞𑀸𑀦𑁂𑀲𑀼 𑁋 𑀲𑀗𑁆𑀖𑀫𑀚𑁆𑀛𑁂, 𑀕𑀡𑀫𑀚𑁆𑀛𑁂, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂; 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁩𑁪𑁫. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀻𑀢𑀺? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀦 𑀆𑀧𑀢𑁆𑀢𑀺. 𑀓𑀺𑀁 𑀧𑀦 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸, 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀅𑀫𑀽𑀮𑀓𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀅𑀫𑀽𑀮𑀺𑀓𑀸𑀬 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀇𑀫𑀸 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺? 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡𑀁? 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸? 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺? 𑀓𑀢𑀺𑀳𑀺 𑀅𑀥𑀺𑀓𑀭𑀡𑁂𑀳𑀺 𑀓𑀢𑀺𑀲𑀼 𑀞𑀸𑀦𑁂𑀲𑀼 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺?

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁, 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀢𑀻𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀢𑀻𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺. 𑀬𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀕𑀭𑀼𑀓𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀏𑀓𑁂𑀦 𑀅𑀥𑀺𑀓𑀭𑀡𑁂𑀦 𑁋 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦; 𑀏𑀓𑀫𑁆𑀳𑀺 𑀞𑀸𑀦𑁂 𑁋 𑀲𑀗𑁆𑀖𑀫𑀚𑁆𑀛𑁂; 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘. 𑀬𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀮𑀳𑀼𑀓𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀏𑀓𑁂𑀦 𑀅𑀥𑀺𑀓𑀭𑀡𑁂𑀦 𑁋 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦; 𑀢𑀻𑀲𑀼 𑀞𑀸𑀦𑁂𑀲𑀼 𑁋 𑀲𑀗𑁆𑀖𑀫𑀚𑁆𑀛𑁂 𑀕𑀡𑀫𑀚𑁆𑀛𑁂 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂; 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁩𑁪𑁬. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀻𑀢𑀺? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀺. 𑀓𑀺𑀁 𑀧𑀦 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫, 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬. 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀼𑀦𑀻 𑀚𑀸𑀦𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 [𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑀁 (𑀲𑁆𑀬𑀸.)] 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀯𑁂𑀫𑀢𑀺𑀓𑀸 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲; 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲; 𑀆𑀘𑀸𑀭𑀯𑀺𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲 𑁋 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀇𑀫𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺? 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡𑀁? 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸? 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺? 𑀓𑀢𑀺𑀳𑀺 𑀅𑀥𑀺𑀓𑀭𑀡𑁂𑀳𑀺 𑀓𑀢𑀺𑀲𑀼 𑀞𑀸𑀦𑁂𑀲𑀼 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺?

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑁋 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀘𑀢𑀽𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀬𑀸 𑀲𑀸 𑀆𑀧𑀢𑁆𑀢𑀺 𑀅𑀦𑀯𑀲𑁂𑀲𑀸 𑀲𑀸 𑀆𑀧𑀢𑁆𑀢𑀺 𑀦 𑀓𑀢𑀫𑁂𑀦 𑀅𑀥𑀺𑀓𑀭𑀡𑁂𑀦, 𑀦 𑀓𑀢𑀫𑀫𑁆𑀳𑀺 𑀞𑀸𑀦𑁂, 𑀦 𑀓𑀢𑀫𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀺. 𑀬𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀮𑀳𑀼𑀓𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀏𑀓𑁂𑀦 𑀅𑀥𑀺𑀓𑀭𑀡𑁂𑀦 𑁋 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦; 𑀢𑀻𑀲𑀼 𑀞𑀸𑀦𑁂𑀲𑀼 𑁋 𑀲𑀗𑁆𑀖𑀫𑀚𑁆𑀛𑁂, 𑀕𑀡𑀫𑀚𑁆𑀛𑁂, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂; 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁩𑁪𑁭. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀻𑀢𑀺? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀦 𑀆𑀧𑀢𑁆𑀢𑀺. 𑀓𑀺𑀁 𑀧𑀦 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀆𑀫, 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑁂𑀬𑁆𑀬. 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺? 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺. 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀪𑀺𑀓𑁆𑀔𑀼𑀦𑀻 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀁; 𑀤𑁆𑀯𑀻𑀳𑀺 𑀓𑀫𑁆𑀫𑀯𑀸𑀘𑀸𑀳𑀺 𑀣𑀼𑀮𑁆𑀮𑀘𑁆𑀘𑀬𑀸; 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀪𑁂𑀤𑀓𑀸𑀦𑀼𑀯𑀢𑁆𑀢𑀓𑀸 𑀪𑀺𑀓𑁆𑀔𑀽 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑁋 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀇𑀫𑀸 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺.

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀓𑀢𑀺 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺? 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀓𑀢𑀫𑀁 𑀅𑀥𑀺𑀓𑀭𑀡𑀁? 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀓𑀢𑀺𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸? 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀓𑀢𑀺𑀳𑀺 𑀲𑀫𑀼𑀝𑁆𑀞𑀸𑀦𑁂𑀳𑀺 𑀲𑀫𑀼𑀝𑁆𑀞𑀦𑁆𑀢𑀺? 𑀓𑀢𑀺𑀳𑀺 𑀅𑀥𑀺𑀓𑀭𑀡𑁂𑀳𑀺 𑀓𑀢𑀺𑀲𑀼 𑀞𑀸𑀦𑁂𑀲𑀼 𑀓𑀢𑀺𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺?

𑀢𑀸 𑀆𑀧𑀢𑁆𑀢𑀺𑀬𑁄 𑀘𑀢𑀼𑀦𑁆𑀦𑀁 𑀯𑀺𑀧𑀢𑁆𑀢𑀻𑀦𑀁 𑀤𑁆𑀯𑁂 𑀯𑀺𑀧𑀢𑁆𑀢𑀺𑀬𑁄 𑀪𑀚𑀦𑁆𑀢𑀺 𑁋 𑀲𑀺𑀬𑀸 𑀲𑀻𑀮𑀯𑀺𑀧𑀢𑁆𑀢𑀺𑀁 𑀲𑀺𑀬𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀁. 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑁋 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀧𑀜𑁆𑀘𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑀸 𑁋 𑀲𑀺𑀬𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦, 𑀲𑀺𑀬𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀦. 𑀙𑀦𑁆𑀦𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀦𑁆𑀢𑀺 𑁋 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀬𑀸 𑀲𑀸 𑀆𑀧𑀢𑁆𑀢𑀺 𑀅𑀦𑀯𑀲𑁂𑀲𑀸 𑀲𑀸 𑀆𑀧𑀢𑁆𑀢𑀺 𑀦 𑀓𑀢𑀫𑁂𑀦 𑀅𑀥𑀺𑀓𑀭𑀡𑁂𑀦, 𑀦 𑀓𑀢𑀫𑀫𑁆𑀳𑀺 𑀞𑀸𑀦𑁂, 𑀦 𑀓𑀢𑀫𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀺. 𑀬𑀸 𑀲𑀸 𑀆𑀧𑀢𑁆𑀢𑀺 𑀕𑀭𑀼𑀓𑀸 𑀲𑀸 𑀆𑀧𑀢𑁆𑀢𑀺 𑀏𑀓𑁂𑀦 𑀅𑀥𑀺𑀓𑀭𑀡𑁂𑀦 𑁋 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦; 𑀏𑀓𑀫𑁆𑀳𑀺 𑀞𑀸𑀦𑁂 𑁋 𑀲𑀗𑁆𑀖𑀫𑀚𑁆𑀛𑁂; 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑁋 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘. 𑀬𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀮𑀳𑀼𑀓𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀏𑀓𑁂𑀦 𑀅𑀥𑀺𑀓𑀭𑀡𑁂𑀦 𑁋 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦; 𑀢𑀻𑀲𑀼 𑀞𑀸𑀦𑁂𑀲𑀼 𑁋 𑀲𑀗𑁆𑀖𑀫𑀚𑁆𑀛𑁂, 𑀕𑀡𑀫𑀚𑁆𑀛𑁂, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂; 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺 𑁋 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘, 𑀲𑀺𑀬𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘.

𑁫. 𑀅𑀥𑀺𑀓𑀭𑀡𑀸𑀥𑀺𑀧𑁆𑀧𑀸𑀬𑁄

𑁩𑁪𑁮. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀦 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀦 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀦 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁; 𑀅𑀧𑀺 𑀘, 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁. 𑀬𑀣𑀸 𑀓𑀣𑀁 𑀯𑀺𑀬? [𑀘𑀽𑀴𑀯. 𑁨𑁧𑁫; 𑀧𑀭𑀺. 𑁩𑁧𑁪] 𑀇𑀥 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 𑁋 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁 𑀓𑀮𑀳𑁄 𑀯𑀺𑀕𑁆𑀕𑀳𑁄 𑀯𑀺𑀯𑀸𑀤𑁄 𑀦𑀸𑀦𑀸𑀯𑀸𑀤𑁄 𑀅𑀜𑁆𑀜𑀣𑀸𑀯𑀸𑀤𑁄 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄 𑀫𑁂𑀥𑀓𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀯𑀺𑀯𑀸𑀤𑀸𑀥𑀺𑀓𑀭𑀡𑁂 𑀲𑀗𑁆𑀖𑁄 𑀯𑀺𑀯𑀤𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀯𑀺𑀯𑀤𑀫𑀸𑀦𑁄 𑀅𑀦𑀼𑀯𑀤𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. 𑀅𑀦𑀼𑀯𑀤𑀫𑀸𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀢𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁. 𑀏𑀯𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁.

𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀦 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀦 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀦 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁; 𑀅𑀧𑀺 𑀘, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀬𑀣𑀸 𑀓𑀣𑀁 𑀯𑀺𑀬? 𑀇𑀥 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀦𑀼𑀯𑀤𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑁂 𑀲𑀗𑁆𑀖𑁄 𑀯𑀺𑀯𑀤𑀢𑀺, 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀯𑀺𑀯𑀤𑀫𑀸𑀦𑁄 𑀅𑀦𑀼𑀯𑀤𑀢𑀺, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. 𑀅𑀦𑀼𑀯𑀤𑀫𑀸𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀢𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁. 𑀏𑀯𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁.

𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀦 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀦 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀦 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁; 𑀅𑀧𑀺 𑀘, 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. 𑀬𑀣𑀸 𑀓𑀣𑀁 𑀯𑀺𑀬? [𑀘𑀽𑀴𑀯. 𑁨𑁧𑁫; 𑀧𑀭𑀺. 𑁩𑁪𑁮] 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀲𑀗𑁆𑀖𑁄 𑀯𑀺𑀯𑀤𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀯𑀺𑀯𑀤𑀫𑀸𑀦𑁄 𑀅𑀦𑀼𑀯𑀤𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. 𑀅𑀦𑀼𑀯𑀤𑀫𑀸𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀢𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁. 𑀏𑀯𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀳𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁.

𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀦 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀦 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀦 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁; 𑀅𑀧𑀺 𑀘, 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀬𑀣𑀸 𑀓𑀣𑀁 𑀯𑀺𑀬? 𑀬𑀸 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑀬𑀢𑀸 𑀓𑀭𑀡𑀻𑀬𑀢𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁. 𑀓𑀺𑀘𑁆𑀘𑀸𑀥𑀺𑀓𑀭𑀡𑁂 𑀲𑀗𑁆𑀖𑁄 𑀯𑀺𑀯𑀤𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀯𑀺𑀯𑀤𑀫𑀸𑀦𑁄 𑀅𑀦𑀼𑀯𑀤𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁. 𑀅𑀦𑀼𑀯𑀤𑀫𑀸𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀢𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑀁. 𑀏𑀯𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀳𑁄𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀳𑁄𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁.

𑁬. 𑀧𑀼𑀘𑁆𑀙𑀸𑀯𑀸𑀭𑁄

𑁩𑁪𑁯. 𑀬𑀢𑁆𑀣 𑀲𑀢𑀺𑀯𑀺𑀦𑀬𑁄 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄? 𑀬𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀢𑀢𑁆𑀣 𑀲𑀢𑀺𑀯𑀺𑀦𑀬𑁄? 𑀬𑀢𑁆𑀣 𑀅𑀫𑀽𑀴𑁆𑀳𑀯𑀺𑀦𑀬𑁄 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄? 𑀬𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀢𑀢𑁆𑀣 𑀅𑀫𑀽𑀴𑁆𑀳𑀯𑀺𑀦𑀬𑁄? 𑀬𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄? 𑀬𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀢𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀁? 𑀬𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄? 𑀬𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀢𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸? 𑀬𑀢𑁆𑀣 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄? 𑀬𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀢𑀢𑁆𑀣 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸? 𑀬𑀢𑁆𑀣 𑀢𑀺𑀡𑀯𑀢𑁆𑀣𑀸𑀭𑀓𑁄 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄? 𑀬𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀢𑀢𑁆𑀣 𑀢𑀺𑀡𑀯𑀢𑁆𑀣𑀸𑀭𑀓𑁄?

𑁭. 𑀯𑀺𑀲𑁆𑀲𑀚𑁆𑀚𑀦𑀸𑀯𑀸𑀭𑁄

𑁩𑁫𑁦. 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀲𑀢𑀺𑀯𑀺𑀦𑀬𑁂𑀦 𑀘 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺 𑁋 𑀬𑀢𑁆𑀣 𑀲𑀢𑀺𑀯𑀺𑀦𑀬𑁄 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄, 𑀬𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀢𑀢𑁆𑀣 𑀲𑀢𑀺𑀯𑀺𑀦𑀬𑁄, 𑀦 𑀢𑀢𑁆𑀣 𑀅𑀫𑀽𑀴𑁆𑀳𑀯𑀺𑀦𑀬𑁄, 𑀦 𑀢𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀁, 𑀦 𑀢𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸, 𑀦 𑀢𑀢𑁆𑀣 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸, 𑀦 𑀢𑀢𑁆𑀣 𑀢𑀺𑀡𑀯𑀢𑁆𑀣𑀸𑀭𑀓𑁄. 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘…𑀧𑁂… 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘…𑀧𑁂… 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘…𑀧𑁂… 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀘…𑀧𑁂… 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺 𑁋 𑀬𑀢𑁆𑀣 𑀢𑀺𑀡𑀯𑀢𑁆𑀣𑀸𑀭𑀓𑁄 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄, 𑀬𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀢𑀢𑁆𑀣 𑀢𑀺𑀡𑀯𑀢𑁆𑀣𑀸𑀭𑀓𑁄, 𑀦 𑀢𑀢𑁆𑀣 𑀲𑀢𑀺𑀯𑀺𑀦𑀬𑁄, 𑀦 𑀢𑀢𑁆𑀣 𑀅𑀫𑀽𑀴𑁆𑀳𑀯𑀺𑀦𑀬𑁄, 𑀦 𑀢𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀁, 𑀦 𑀢𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸, 𑀦 𑀢𑀢𑁆𑀣 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸.

𑁮. 𑀲𑀁𑀲𑀝𑁆𑀞𑀯𑀸𑀭𑁄

𑁩𑁫𑁧. 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀲𑀢𑀺𑀯𑀺𑀦𑀬𑁄𑀢𑀺 𑀯𑀸 𑁋 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸 𑀉𑀤𑀸𑀳𑀼 𑀯𑀺𑀲𑀁𑀲𑀝𑁆𑀞𑀸? 𑀮𑀩𑁆𑀪𑀸 𑀘 𑀧𑀦𑀺𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀅𑀫𑀽𑀴𑁆𑀳𑀯𑀺𑀦𑀬𑁄𑀢𑀺 𑀯𑀸…𑀧𑁂… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀧𑀝𑀺𑀜𑁆𑀜𑀸𑀢𑀓𑀭𑀡𑀦𑁆𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑁋 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸 𑀉𑀤𑀸𑀳𑀼 𑀯𑀺𑀲𑀁𑀲𑀝𑁆𑀞𑀸? 𑀮𑀩𑁆𑀪𑀸 𑀘 𑀧𑀦𑀺𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁?

𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀲𑀢𑀺𑀯𑀺𑀦𑀬𑁄𑀢𑀺 𑀯𑀸 𑁋 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸, 𑀦𑁄 𑀯𑀺𑀲𑀁𑀲𑀝𑁆𑀞𑀸; 𑀦 𑀘 𑀮𑀩𑁆𑀪𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁. 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀅𑀫𑀽𑀴𑁆𑀳𑀯𑀺𑀦𑀬𑁄𑀢𑀺 𑀯𑀸…𑀧𑁂… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀧𑀝𑀺𑀜𑁆𑀜𑀸𑀢𑀓𑀭𑀡𑀦𑁆𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀯𑀸 𑁋 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸, 𑀦𑁄 𑀯𑀺𑀲𑀁𑀲𑀝𑁆𑀞𑀸; 𑀦 𑀘 𑀮𑀩𑁆𑀪𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀧𑁂𑀢𑀼𑀁.

𑁯. 𑀲𑀢𑁆𑀢𑀲𑀫𑀣𑀦𑀺𑀤𑀸𑀦𑀁

𑁩𑁫𑁨. 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄 𑀓𑀺𑀁𑀲𑀫𑀼𑀝𑁆𑀞𑀸𑀦𑁄? 𑀲𑀢𑀺𑀯𑀺𑀦𑀬𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄? 𑀅𑀫𑀽𑀴𑁆𑀳𑀯𑀺𑀦𑀬𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄? 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀓𑀺𑀁𑀦𑀺𑀤𑀸𑀦𑀁, 𑀓𑀺𑀁𑀲𑀫𑀼𑀤𑀬𑀁, 𑀓𑀺𑀁𑀚𑀸𑀢𑀺𑀓𑀁, 𑀓𑀺𑀁𑀧𑀪𑀯𑀁, 𑀓𑀺𑀁𑀲𑀫𑁆𑀪𑀸𑀭𑀁, 𑀓𑀺𑀁𑀲𑀫𑀼𑀝𑁆𑀞𑀸𑀦𑀁? 𑀬𑁂𑀪𑀼𑀬𑁆𑀬𑀲𑀺𑀓𑀸 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸, 𑀓𑀺𑀁𑀲𑀫𑁆𑀪𑀸𑀭𑀸, 𑀓𑀺𑀁𑀲𑀫𑀼𑀝𑁆𑀞𑀸𑀦𑀸? 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀓𑀺𑀁𑀦𑀺𑀤𑀸𑀦𑀸, 𑀓𑀺𑀁𑀲𑀫𑀼𑀤𑀬𑀸, 𑀓𑀺𑀁𑀚𑀸𑀢𑀺𑀓𑀸, 𑀓𑀺𑀁𑀧𑀪𑀯𑀸, 𑀓𑀺𑀁𑀲𑀫𑁆𑀪𑀸𑀭𑀸, 𑀓𑀺𑀁𑀲𑀫𑀼𑀝𑁆𑀞𑀸𑀦𑀸 𑀢𑀺𑀡𑀯𑀢𑁆𑀣𑀸𑀭𑀓𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄?

𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀦𑀺𑀤𑀸𑀦𑀦𑀺𑀤𑀸𑀦𑁄, 𑀦𑀺𑀤𑀸𑀦𑀲𑀫𑀼𑀤𑀬𑁄, 𑀦𑀺𑀤𑀸𑀦𑀚𑀸𑀢𑀺𑀓𑁄, 𑀦𑀺𑀤𑀸𑀦𑀧𑀪𑀯𑁄, 𑀦𑀺𑀤𑀸𑀦𑀲𑀫𑁆𑀪𑀸𑀭𑁄, 𑀦𑀺𑀤𑀸𑀦𑀲𑀫𑀼𑀝𑁆𑀞𑀸𑀦𑁄. 𑀲𑀢𑀺𑀯𑀺𑀦𑀬𑁄…𑀧𑁂… 𑀅𑀫𑀽𑀴𑁆𑀳𑀯𑀺𑀦𑀬𑁄…𑀧𑁂… 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀦𑀺𑀤𑀸𑀦𑀦𑀺𑀤𑀸𑀦𑀁, 𑀦𑀺𑀤𑀸𑀦𑀲𑀫𑀼𑀤𑀬𑀁, 𑀦𑀺𑀤𑀸𑀦𑀚𑀸𑀢𑀺𑀓𑀁, 𑀦𑀺𑀤𑀸𑀦𑀧𑀪𑀯𑀁, 𑀦𑀺𑀤𑀸𑀦𑀲𑀫𑁆𑀪𑀸𑀭𑀁, 𑀦𑀺𑀤𑀸𑀦𑀲𑀫𑀼𑀝𑁆𑀞𑀸𑀦𑀁. 𑀬𑁂𑀪𑀼𑀬𑁆𑀬𑀲𑀺𑀓𑀸…𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀦𑀺𑀤𑀸𑀦𑀦𑀺𑀤𑀸𑀦𑀸, 𑀦𑀺𑀤𑀸𑀦𑀲𑀫𑀼𑀤𑀬𑀸, 𑀦𑀺𑀤𑀸𑀦𑀚𑀸𑀢𑀺𑀓𑀸, 𑀦𑀺𑀤𑀸𑀦𑀧𑀪𑀯𑀸, 𑀦𑀺𑀤𑀸𑀦𑀲𑀫𑁆𑀪𑀸𑀭𑀸, 𑀦𑀺𑀤𑀸𑀦𑀲𑀫𑀼𑀝𑁆𑀞𑀸𑀦𑀸. 𑀢𑀺𑀡𑀯𑀢𑁆𑀣𑀸𑀭𑀓𑁄 𑀦𑀺𑀤𑀸𑀦𑀦𑀺𑀤𑀸𑀦𑁄, 𑀦𑀺𑀤𑀸𑀦𑀲𑀫𑀼𑀤𑀬𑁄, 𑀦𑀺𑀤𑀸𑀦𑀚𑀸𑀢𑀺𑀓𑁄, 𑀦𑀺𑀤𑀸𑀦𑀧𑀪𑀯𑁄, 𑀦𑀺𑀤𑀸𑀦𑀲𑀫𑁆𑀪𑀸𑀭𑁄, 𑀦𑀺𑀤𑀸𑀦𑀲𑀫𑀼𑀝𑁆𑀞𑀸𑀦𑁄.

𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄? 𑀲𑀢𑀺𑀯𑀺𑀦𑀬𑁄…𑀧𑁂… 𑀅𑀫𑀽𑀴𑁆𑀳𑀯𑀺𑀦𑀬𑁄…𑀧𑁂… 𑀧𑀝𑀺𑀜𑁆𑀜𑀸𑀢𑀓𑀭𑀡𑀁…𑀧𑁂… 𑀬𑁂𑀪𑀼𑀬𑁆𑀬𑀲𑀺𑀓𑀸…𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸…𑀧𑁂… 𑀢𑀺𑀡𑀯𑀢𑁆𑀣𑀸𑀭𑀓𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄?

𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀳𑁂𑀢𑀼𑀦𑀺𑀤𑀸𑀦𑁄, 𑀳𑁂𑀢𑀼𑀲𑀫𑀼𑀤𑀬𑁄, 𑀳𑁂𑀢𑀼𑀚𑀸𑀢𑀺𑀓𑁄, 𑀳𑁂𑀢𑀼𑀧𑀪𑀯𑁄, 𑀳𑁂𑀢𑀼𑀲𑀫𑁆𑀪𑀸𑀭𑁄, 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑁄. 𑀲𑀢𑀺𑀯𑀺𑀦𑀬𑁄…𑀧𑁂… 𑀅𑀫𑀽𑀴𑁆𑀳𑀯𑀺𑀦𑀬𑁄…𑀧𑁂… 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀳𑁂𑀢𑀼𑀦𑀺𑀤𑀸𑀦𑀁, 𑀳𑁂𑀢𑀼𑀲𑀫𑀼𑀤𑀬𑀁, 𑀳𑁂𑀢𑀼𑀚𑀸𑀢𑀺𑀓𑀁, 𑀳𑁂𑀢𑀼𑀧𑀪𑀯𑀁, 𑀳𑁂𑀢𑀼𑀲𑀫𑁆𑀪𑀸𑀭𑀁, 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀁. 𑀬𑁂𑀪𑀼𑀬𑁆𑀬𑀲𑀺𑀓𑀸…𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀳𑁂𑀢𑀼𑀦𑀺𑀤𑀸𑀦𑀸, 𑀳𑁂𑀢𑀼𑀲𑀫𑀼𑀤𑀬𑀸, 𑀳𑁂𑀢𑀼𑀚𑀸𑀢𑀺𑀓𑀸, 𑀳𑁂𑀢𑀼𑀧𑀪𑀯𑀸, 𑀳𑁂𑀢𑀼𑀲𑀫𑁆𑀪𑀸𑀭𑀸, 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀸. 𑀢𑀺𑀡𑀯𑀢𑁆𑀣𑀸𑀭𑀓𑁄 𑀳𑁂𑀢𑀼𑀦𑀺𑀤𑀸𑀦𑁄, 𑀳𑁂𑀢𑀼𑀲𑀫𑀼𑀤𑀬𑁄, 𑀳𑁂𑀢𑀼𑀚𑀸𑀢𑀺𑀓𑁄, 𑀳𑁂𑀢𑀼𑀧𑀪𑀯𑁄, 𑀳𑁂𑀢𑀼𑀲𑀫𑁆𑀪𑀸𑀭𑁄, 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑁄.

𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄? 𑀲𑀢𑀺𑀯𑀺𑀦𑀬𑁄…𑀧𑁂… 𑀅𑀫𑀽𑀴𑁆𑀳𑀯𑀺𑀦𑀬𑁄…𑀧𑁂… 𑀧𑀝𑀺𑀜𑁆𑀜𑀸𑀢𑀓𑀭𑀡𑀁…𑀧𑁂… 𑀬𑁂𑀪𑀼𑀬𑁆𑀬𑀲𑀺𑀓𑀸…𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸…𑀧𑁂… 𑀢𑀺𑀡𑀯𑀢𑁆𑀣𑀸𑀭𑀓𑁄 𑀓𑀺𑀁𑀦𑀺𑀤𑀸𑀦𑁄, 𑀓𑀺𑀁𑀲𑀫𑀼𑀤𑀬𑁄, 𑀓𑀺𑀁𑀚𑀸𑀢𑀺𑀓𑁄, 𑀓𑀺𑀁𑀧𑀪𑀯𑁄, 𑀓𑀺𑀁𑀲𑀫𑁆𑀪𑀸𑀭𑁄, 𑀓𑀺𑀁𑀲𑀫𑀼𑀝𑁆𑀞𑀸𑀦𑁄? 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀧𑀘𑁆𑀘𑀬𑀦𑀺𑀤𑀸𑀦𑁄, 𑀧𑀘𑁆𑀘𑀬𑀲𑀫𑀼𑀤𑀬𑁄, 𑀧𑀘𑁆𑀘𑀬𑀚𑀸𑀢𑀺𑀓𑁄, 𑀧𑀘𑁆𑀘𑀬𑀧𑀪𑀯𑁄, 𑀧𑀘𑁆𑀘𑀬𑀲𑀫𑁆𑀪𑀸𑀭𑁄, 𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄. 𑀲𑀢𑀺𑀯𑀺𑀦𑀬𑁄…𑀧𑁂… 𑀅𑀫𑀽𑀴𑁆𑀳𑀯𑀺𑀦𑀬𑁄…𑀧𑁂… 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀧𑀘𑁆𑀘𑀬𑀦𑀺𑀤𑀸𑀦𑀁, 𑀧𑀘𑁆𑀘𑀬𑀲𑀫𑀼𑀤𑀬𑀁, 𑀧𑀘𑁆𑀘𑀬𑀚𑀸𑀢𑀺𑀓𑀁, 𑀧𑀘𑁆𑀘𑀬𑀧𑀪𑀯𑀁, 𑀧𑀘𑁆𑀘𑀬𑀲𑀫𑁆𑀪𑀸𑀭𑀁, 𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀁. 𑀬𑁂𑀪𑀼𑀬𑁆𑀬𑀲𑀺𑀓𑀸…𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀧𑀘𑁆𑀘𑀬𑀦𑀺𑀤𑀸𑀦𑀸, 𑀧𑀘𑁆𑀘𑀬𑀲𑀫𑀼𑀤𑀬𑀸, 𑀧𑀘𑁆𑀘𑀬𑀚𑀸𑀢𑀺𑀓𑀸, 𑀧𑀘𑁆𑀘𑀬𑀧𑀪𑀯𑀸, 𑀧𑀘𑁆𑀘𑀬𑀲𑀫𑁆𑀪𑀸𑀭𑀸, 𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑀸. 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀘𑁆𑀘𑀬𑀦𑀺𑀤𑀸𑀦𑁄, 𑀧𑀘𑁆𑀘𑀬𑀲𑀫𑀼𑀤𑀬𑁄, 𑀧𑀘𑁆𑀘𑀬𑀚𑀸𑀢𑀺𑀓𑁄, 𑀧𑀘𑁆𑀘𑀬𑀧𑀪𑀯𑁄, 𑀧𑀘𑁆𑀘𑀬𑀲𑀫𑁆𑀪𑀸𑀭𑁄, 𑀧𑀘𑁆𑀘𑀬𑀲𑀫𑀼𑀝𑁆𑀞𑀸𑀦𑁄.

𑁩𑁫𑁩. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀺 𑀫𑀽𑀮𑀸𑀦𑀺, 𑀓𑀢𑀺 𑀲𑀫𑀼𑀝𑁆𑀞𑀸𑀦𑀸? 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀙𑀩𑁆𑀩𑀻𑀲 𑀫𑀽𑀮𑀸𑀦𑀺, 𑀙𑀢𑁆𑀢𑀺𑀁𑀲 𑀲𑀫𑀼𑀝𑁆𑀞𑀸𑀦𑀸. 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀫𑀸𑀦𑀺 𑀙𑀩𑁆𑀩𑀻 𑀫𑀽𑀮𑀸𑀦𑀺? 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀲 𑀘𑀢𑁆𑀢𑀸𑀭𑀺 𑀫𑀽𑀮𑀸𑀦𑀺. 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸; 𑀲𑀢𑀺𑀯𑀺𑀦𑀬𑀲𑁆𑀲 𑀘𑀢𑁆𑀢𑀸𑀭𑀺 𑀫𑀽𑀮𑀸𑀦𑀺; 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀘𑀢𑁆𑀢𑀸𑀭𑀺 𑀫𑀽𑀮𑀸𑀦𑀺; 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑁆𑀲 𑀤𑁆𑀯𑁂 𑀫𑀽𑀮𑀸𑀦𑀺 𑁋 𑀬𑁄 𑀘 𑀤𑁂𑀲𑁂𑀢𑀺 𑀬𑀲𑁆𑀲 𑀘 𑀤𑁂𑀲𑁂𑀢𑀺; 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘𑀢𑁆𑀢𑀸𑀭𑀺 𑀫𑀽𑀮𑀸𑀦𑀺; 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀘𑀢𑁆𑀢𑀸𑀭𑀺 𑀫𑀽𑀮𑀸𑀦𑀺; 𑀢𑀺𑀡𑀯𑀢𑁆𑀣𑀸𑀭𑀓𑀲𑁆𑀲 𑀘𑀢𑁆𑀢𑀸𑀭𑀺 𑀫𑀽𑀮𑀸𑀦𑀺 𑁋 𑀲𑀗𑁆𑀖𑀲𑀫𑁆𑀫𑀼𑀔𑀢𑀸, 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸 𑁋 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀇𑀫𑀸𑀦𑀺 𑀙𑀩𑁆𑀩𑀻𑀲 𑀫𑀽𑀮𑀸𑀦𑀺.

𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀓𑀢𑀫𑁂 𑀙𑀢𑁆𑀢𑀺𑀁𑀲 𑀲𑀫𑀼𑀝𑁆𑀞𑀸𑀦𑀸? 𑀲𑀢𑀺𑀯𑀺𑀦𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸, 𑀓𑀭𑀡𑀁, 𑀉𑀧𑀕𑀫𑀦𑀁, 𑀅𑀚𑁆𑀛𑀼𑀧𑀕𑀫𑀦𑀁, 𑀅𑀥𑀺𑀯𑀸𑀲𑀦𑀸, 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸. 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀓𑀫𑁆𑀫𑀲𑁆𑀲…𑀧𑁂… 𑀧𑀝𑀺𑀜𑁆𑀜𑀸𑀢𑀓𑀭𑀡𑀲𑁆𑀲 𑀓𑀫𑁆𑀫𑀲𑁆𑀲… 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀓𑀫𑁆𑀫𑀲𑁆𑀲… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀓𑀫𑁆𑀫𑀲𑁆𑀲… 𑀢𑀺𑀡𑀯𑀢𑁆𑀣𑀸𑀭𑀓𑀲𑁆𑀲 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸, 𑀓𑀭𑀡𑀁, 𑀉𑀧𑀕𑀫𑀦𑀁, 𑀅𑀚𑁆𑀛𑀼𑀧𑀕𑀫𑀦𑀁, 𑀅𑀥𑀺𑀯𑀸𑀲𑀦𑀸, 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀸 𑁋 𑀲𑀢𑁆𑀢𑀦𑁆𑀦𑀁 𑀲𑀫𑀣𑀸𑀦𑀁 𑀇𑀫𑁂 𑀙𑀢𑁆𑀢𑀺𑀁𑀲 𑀲𑀫𑀼𑀝𑁆𑀞𑀸𑀦𑀸.

𑁧𑁦. 𑀲𑀢𑁆𑀢𑀲𑀫𑀣𑀦𑀸𑀦𑀢𑁆𑀣𑀸𑀤𑀺

𑁩𑁫𑁪. 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀲𑀢𑀺𑀯𑀺𑀦𑀬𑁄𑀢𑀺 𑀯𑀸 𑁋 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀅𑀫𑀽𑀴𑁆𑀳𑀯𑀺𑀦𑀬𑁄𑀢𑀺 𑀯𑀸…𑀧𑁂… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀧𑀝𑀺𑀜𑁆𑀜𑀸𑀢𑀓𑀭𑀡𑀦𑁆𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀯𑀸 𑁋 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁? 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀲𑀢𑀺𑀯𑀺𑀦𑀬𑁄𑀢𑀺 𑀯𑀸 𑁋 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘. 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀅𑀫𑀽𑀴𑁆𑀳𑀯𑀺𑀦𑀬𑁄𑀢𑀺 𑀯𑀸…𑀧𑁂… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀧𑀝𑀺𑀜𑁆𑀜𑀸𑀢𑀓𑀭𑀡𑀦𑁆𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀢𑀺 𑀯𑀸… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀸 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀯𑀸 𑁋 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸 𑀩𑁆𑀬𑀜𑁆𑀚𑀦𑀸 𑀘.

𑁩𑁫𑁫. [𑀘𑀽𑀴𑀯. 𑁨𑁨𑁪] 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄, 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘? 𑀲𑀺𑀬𑀸 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀲𑀺𑀬𑀸 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄, 𑀲𑀺𑀬𑀸 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘.

𑀢𑀢𑁆𑀣 𑀓𑀢𑀫𑁄 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁? 𑀇𑀥 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀺 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸…𑀧𑁂… 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀻𑀢𑀺 𑀯𑀸. 𑀬𑀁 𑀢𑀢𑁆𑀣 𑀪𑀡𑁆𑀟𑀦𑀁, 𑀓𑀮𑀳𑁄, 𑀯𑀺𑀕𑁆𑀕𑀳𑁄, 𑀯𑀺𑀯𑀸𑀤𑁄, 𑀦𑀸𑀦𑀸𑀯𑀸𑀤𑁄, 𑀅𑀜𑁆𑀜𑀣𑀸𑀯𑀸𑀤𑁄, 𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄, 𑀫𑁂𑀥𑀓𑀁 𑁋 𑀅𑀬𑀁 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁.

𑀢𑀢𑁆𑀣 𑀓𑀢𑀫𑁄 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁? 𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀸 𑀯𑀺𑀯𑀤𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀬𑀸 𑀯𑀺𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀸𑀢𑀭𑀸 𑀯𑀺𑀯𑀤𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑁂𑀦 𑀯𑀺𑀯𑀤𑀢𑀺 𑁋 𑀅𑀬𑀁 𑀯𑀺𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁.

𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀅𑀥𑀺𑀓𑀭𑀡𑀁 𑀦𑁄 𑀯𑀺𑀯𑀸𑀤𑁄.

𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀯𑀺𑀯𑀸𑀤𑁄 𑀘.

𑁩𑁫𑁬. [𑀘𑀽𑀴𑀯. 𑁨𑁨𑁪 𑀆𑀤𑀬𑁄] 𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀅𑀥𑀺𑀓𑀭𑀡𑀁 𑀦𑁄 𑀅𑀦𑀼𑀯𑀸𑀤𑁄, 𑀅𑀥𑀺𑀓𑀭𑀡𑀜𑁆𑀘𑁂𑀯 𑀅𑀦𑀼𑀯𑀸𑀤𑁄 𑀘? 𑀲𑀺𑀬𑀸 𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀦𑀼𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀁 𑀦𑁄 𑀅𑀦𑀼𑀯𑀸𑀤𑁄, 𑀲𑀺𑀬𑀸 𑀅𑀥𑀺𑀓𑀭𑀡𑀜𑁆𑀘𑁂𑀯 𑀅𑀦𑀼𑀯𑀸𑀤𑁄 𑀘.

𑀢𑀢𑁆𑀣 𑀓𑀢𑀫𑁄 𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁? 𑀇𑀥 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀅𑀦𑀼𑀯𑀤𑀦𑁆𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸. 𑀬𑁄 𑀢𑀢𑁆𑀣 𑀅𑀦𑀼𑀯𑀸𑀤𑁄, 𑀅𑀦𑀼𑀯𑀤𑀦𑀸 𑀅𑀦𑀼𑀮𑁆𑀮𑀧𑀦𑀸 𑀅𑀦𑀼𑀪𑀡𑀦𑀸 𑀅𑀦𑀼𑀲𑀫𑁆𑀧𑀯𑀗𑁆𑀓𑀢𑀸 𑀅𑀩𑁆𑀪𑀼𑀲𑁆𑀲𑀳𑀦𑀢𑀸 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑁋 𑀅𑀬𑀁 𑀅𑀦𑀼𑀯𑀸𑀤𑁄 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁.

𑀢𑀢𑁆𑀣 𑀓𑀢𑀫𑁄 𑀅𑀦𑀼𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁? 𑀫𑀸𑀢𑀸𑀧𑀺 𑀧𑀼𑀢𑁆𑀢𑀁 𑀅𑀦𑀼𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀫𑀸𑀢𑀭𑀁 𑀅𑀦𑀼𑀯𑀤𑀢𑀺, 𑀧𑀺𑀢𑀸𑀧𑀺 𑀧𑀼𑀢𑁆𑀢𑀁 𑀅𑀦𑀼𑀯𑀤𑀢𑀺, 𑀧𑀼𑀢𑁆𑀢𑁄𑀧𑀺 𑀧𑀺𑀢𑀭𑀁 𑀅𑀦𑀼𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀸𑀢𑀭𑀁 𑀅𑀦𑀼𑀯𑀤𑀢𑀺, 𑀪𑀸𑀢𑀸𑀧𑀺 𑀪𑀕𑀺𑀦𑀺𑀁 𑀅𑀦𑀼𑀯𑀤𑀢𑀺, 𑀪𑀕𑀺𑀦𑀻𑀧𑀺 𑀪𑀸𑀢𑀭𑀁 𑀅𑀦𑀼𑀯𑀤𑀢𑀺, 𑀲𑀳𑀸𑀬𑁄𑀧𑀺 𑀲𑀳𑀸𑀬𑀁 𑀅𑀦𑀼𑀯𑀤𑀢𑀺 𑁋 𑀅𑀬𑀁 𑀅𑀦𑀼𑀯𑀸𑀤𑁄 𑀦𑁄 𑀅𑀥𑀺𑀓𑀭𑀡𑀁.

𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀦𑁄 𑀅𑀦𑀼𑀯𑀸𑀤𑁄? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀅𑀥𑀺𑀓𑀭𑀡𑀁 𑀦𑁄 𑀅𑀦𑀼𑀯𑀸𑀤𑁄.

𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀅𑀦𑀼𑀯𑀸𑀤𑁄 𑀘? 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀅𑀦𑀼𑀯𑀸𑀤𑁄 𑀘.

𑁩𑁫𑁭. 𑀆𑀧𑀢𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀺 𑀦𑁄 𑀅𑀥𑀺𑀓𑀭𑀡𑀁, 𑀅𑀥𑀺𑀓𑀭𑀡𑀁 𑀦𑁄 𑀆𑀧𑀢𑁆𑀢𑀺, 𑀅𑀥𑀺𑀓𑀭𑀡𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘? 𑀲𑀺𑀬𑀸 𑀆𑀧𑀢𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀲𑀺𑀬𑀸 𑀆𑀧𑀢𑁆𑀢𑀺 𑀦𑁄 𑀅𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀁 𑀦𑁄 𑀆𑀧𑀢𑁆𑀢𑀺, 𑀲𑀺𑀬𑀸 𑀅𑀥𑀺𑀓𑀭𑀡𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀢𑀢𑁆𑀣 𑀓𑀢𑀫𑀸 𑀆𑀧𑀢𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁? 𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁. 𑀅𑀬𑀁 𑀆𑀧𑀢𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁.

𑀢𑀢𑁆𑀣 𑀓𑀢𑀫𑀸 𑀆𑀧𑀢𑁆𑀢𑀺 𑀦𑁄 𑀅𑀥𑀺𑀓𑀭𑀡𑀁? 𑀲𑁄𑀢𑀸𑀧𑀢𑁆𑀢𑀺 𑀲𑀫𑀸𑀧𑀢𑁆𑀢𑀺 𑁋 𑀅𑀬𑀁 𑀆𑀧𑀢𑁆𑀢𑀺 𑀦𑁄 𑀅𑀥𑀺𑀓𑀭𑀡𑀁.

𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀦𑁄 𑀆𑀧𑀢𑁆𑀢𑀺? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀅𑀥𑀺𑀓𑀭𑀡𑀁 𑀦𑁄 𑀆𑀧𑀢𑁆𑀢𑀺.

𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘? 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑁩𑁫𑁮. [𑀘𑀽𑀴𑀯. 𑁨𑁨𑁩] 𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀁 𑀦𑁄 𑀅𑀥𑀺𑀓𑀭𑀡𑀁, 𑀅𑀥𑀺𑀓𑀭𑀡𑀁 𑀦𑁄 𑀓𑀺𑀘𑁆𑀘𑀁, 𑀅𑀥𑀺𑀓𑀭𑀡𑀜𑁆𑀘𑁂𑀯 𑀓𑀺𑀘𑁆𑀘𑀜𑁆𑀘? 𑀲𑀺𑀬𑀸 𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀲𑀺𑀬𑀸 𑀓𑀺𑀘𑁆𑀘𑀁 𑀦𑁄 𑀅𑀥𑀺𑀓𑀭𑀡𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀁 𑀦𑁄 𑀓𑀺𑀘𑁆𑀘𑀁, 𑀲𑀺𑀬𑀸 𑀅𑀥𑀺𑀓𑀭𑀡𑀜𑁆𑀘𑁂𑀯 𑀓𑀺𑀘𑁆𑀘𑀜𑁆𑀘.

𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁? 𑀬𑀸 𑀲𑀗𑁆𑀖𑀲𑁆𑀲 𑀓𑀺𑀘𑁆𑀘𑀬𑀢𑀸 𑀓𑀭𑀡𑀻𑀬𑀢𑀸 𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀤𑀁 𑀓𑀺𑀘𑁆𑀘𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁.

𑀢𑀢𑁆𑀣 𑀓𑀢𑀫𑀁 𑀓𑀺𑀘𑁆𑀘𑀁 𑀦𑁄 𑀅𑀥𑀺𑀓𑀭𑀡𑀁? 𑀆𑀘𑀭𑀺𑀬𑀓𑀺𑀘𑁆𑀘𑀁 𑀉𑀧𑀚𑁆𑀛𑀸𑀬𑀓𑀺𑀘𑁆𑀘𑀁 [𑀉𑀧𑀚𑁆𑀛𑀸𑀬𑀓𑀺𑀘𑁆𑀘𑀁 𑀲𑀓𑀺𑀘𑁆𑀘𑀁 (𑀓.)] 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀺𑀘𑁆𑀘𑀁 𑀲𑀫𑀸𑀦𑀸𑀘𑀭𑀺𑀬𑀓𑀺𑀘𑁆𑀘𑀁 𑁋 𑀇𑀤𑀁 𑀓𑀺𑀘𑁆𑀘𑀁 𑀦𑁄 𑀅𑀥𑀺𑀓𑀭𑀡𑀁.

𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀦𑁄 𑀓𑀺𑀘𑁆𑀘𑀁? 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑁋 𑀇𑀤𑀁 𑀅𑀥𑀺𑀓𑀭𑀡𑀁 𑀦𑁄 𑀓𑀺𑀘𑁆𑀘𑀁.

𑀢𑀢𑁆𑀣 𑀓𑀢𑀫𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀓𑀺𑀘𑁆𑀘𑀜𑁆𑀘? 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀜𑁆𑀘𑁂𑀯 𑀓𑀺𑀘𑁆𑀘𑀁 𑀘𑀸𑀢𑀺.

𑀅𑀥𑀺𑀓𑀭𑀡𑀪𑁂𑀤𑁄 𑀦𑀺𑀝𑁆𑀞𑀺𑀢𑁄.