𑁮. 𑀅𑀝𑁆𑀞𑀓𑀯𑀸𑀭𑁄

𑁩𑁨𑁮. 𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀦 𑀲𑁄 𑀪𑀺𑀓𑁆𑀔𑀼 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀧𑀺𑀢𑀩𑁆𑀩𑁄. 𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 𑀧𑀭𑁂𑀲𑀫𑁆𑀧𑀺 𑀲𑀤𑁆𑀥𑀸𑀬 𑀲𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀅𑀝𑁆𑀞 𑀬𑀸𑀯𑀢𑀢𑀺𑀬𑀓𑀸. 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀓𑀼𑀮𑀸𑀦𑀺 𑀤𑀽𑀲𑁂𑀢𑀺. 𑀅𑀝𑁆𑀞 𑀫𑀸𑀢𑀺𑀓𑀸 𑀘𑀻𑀯𑀭𑀲𑁆𑀲 𑀉𑀧𑁆𑀧𑀸𑀤𑀸𑀬. 𑀅𑀝𑁆𑀞 𑀫𑀸𑀢𑀺𑀓𑀸 𑀓𑀣𑀺𑀦𑀲𑁆𑀲 𑀉𑀩𑁆𑀪𑀸𑀭𑀸𑀬. 𑀅𑀝𑁆𑀞 𑀧𑀸𑀦𑀸𑀦𑀺. [𑀘𑀽𑀴𑀯. 𑁩𑁪𑁮; 𑀅. 𑀦𑀺. 𑁮.𑁭] 𑀅𑀝𑁆𑀞𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄. 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸. 𑀅𑀝𑁆𑀞 𑀕𑀭𑀼𑀥𑀫𑁆𑀫𑀸. 𑀅𑀝𑁆𑀞 𑀧𑀸𑀝𑀺𑀤𑁂𑀲𑀦𑀻𑀬𑀸. 𑀅𑀝𑁆𑀞𑀗𑁆𑀕𑀺𑀓𑁄 𑀫𑀼𑀲𑀸𑀯𑀸𑀤𑁄. 𑀅𑀝𑁆𑀞 𑀉𑀧𑁄𑀲𑀣𑀗𑁆𑀕𑀸𑀦𑀺. 𑀅𑀝𑁆𑀞 𑀤𑀽𑀢𑁂𑀬𑁆𑀬𑀗𑁆𑀕𑀸𑀦𑀺. 𑀅𑀝𑁆𑀞 𑀢𑀺𑀢𑁆𑀣𑀺𑀬𑀯𑀢𑁆𑀢𑀸𑀦𑀺. 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀥𑀫𑁆𑀫𑀸 𑀫𑀳𑀸𑀲𑀫𑀼𑀤𑁆𑀤𑁂. 𑀅𑀝𑁆𑀞 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀥𑀫𑁆𑀫𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂. 𑀅𑀝𑁆𑀞 𑀅𑀦𑀢𑀺𑀭𑀺𑀢𑁆𑀢𑀸. 𑀅𑀝𑁆𑀞 𑀅𑀢𑀺𑀭𑀺𑀢𑁆𑀢𑀸. 𑀅𑀝𑁆𑀞𑀫𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸. 𑀅𑀝𑁆𑀞𑀫𑀁 𑀯𑀢𑁆𑀣𑀼𑀁 𑀧𑀭𑀺𑀧𑀽𑀭𑁂𑀦𑁆𑀢𑀻 𑀦𑀸𑀲𑁂𑀢𑀩𑁆𑀩𑀸. 𑀅𑀝𑁆𑀞𑀫𑀁 𑀯𑀢𑁆𑀣𑀼𑀁 𑀧𑀭𑀺𑀧𑀽𑀭𑁂𑀦𑁆𑀢𑀺𑀬𑀸 𑀤𑁂𑀲𑀺𑀢𑀸𑀧𑀺 𑀅𑀤𑁂𑀲𑀺𑀢𑀸 𑀳𑁄𑀢𑀺. 𑀅𑀝𑁆𑀞𑀯𑀸𑀘𑀺𑀓𑀸 𑀉𑀧𑀲𑀫𑁆𑀧𑀤𑀸. 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀼𑀝𑁆𑀞𑀸𑀢𑀩𑁆𑀩𑀁. 𑀅𑀝𑁆𑀞𑀦𑁆𑀦𑀁 𑀆𑀲𑀦𑀁 𑀤𑀸𑀢𑀩𑁆𑀩𑀁. 𑀉𑀧𑀸𑀲𑀺𑀓𑀸 𑀅𑀝𑁆𑀞 𑀯𑀭𑀸𑀦𑀺 𑀬𑀸𑀘𑀢𑀺. 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄 [𑀲𑀫𑁆𑀫𑀦𑀺𑀢𑀩𑁆𑀩𑁄 (𑀓.)]. 𑀅𑀝𑁆𑀞𑀸𑀦𑀺𑀲𑀁𑀲𑀸 𑀯𑀺𑀦𑀬𑀥𑀭𑁂. 𑀅𑀝𑁆𑀞 𑀧𑀭𑀫𑀸𑀦𑀺. 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀓𑀫𑁆𑀫𑀓𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀝𑁆𑀞𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀸 𑀯𑀢𑁆𑀢𑀺𑀢𑀩𑁆𑀩𑀁. 𑀅𑀝𑁆𑀞 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺 𑀅𑀝𑁆𑀞 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀻𑀢𑀺.

𑀅𑀝𑁆𑀞𑀓𑀁 𑀦𑀺𑀝𑁆𑀞𑀺𑀢𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀦 𑀲𑁄 𑀪𑀺𑀓𑁆𑀔𑀼 𑀧𑀭𑁂𑀲𑀫𑁆𑀧𑀺, 𑀬𑀸𑀯𑀢𑀢𑀺𑀬𑀤𑀽𑀲𑀦𑀸;

𑀫𑀸𑀢𑀺𑀓𑀸 𑀓𑀣𑀺𑀦𑀼𑀩𑁆𑀪𑀸𑀭𑀸, 𑀧𑀸𑀦𑀸 𑀅𑀪𑀺𑀪𑀽𑀢𑁂𑀦 𑀘.

𑀮𑁄𑀓𑀥𑀫𑁆𑀫𑀸 𑀕𑀭𑀼𑀥𑀫𑁆𑀫𑀸, 𑀧𑀸𑀝𑀺𑀤𑁂𑀲𑀦𑀻𑀬𑀸 𑀫𑀼𑀲𑀸;

𑀉𑀧𑁄𑀲𑀣𑀸 𑀘 𑀤𑀽𑀢𑀗𑁆𑀕𑀸, 𑀢𑀺𑀢𑁆𑀣𑀺𑀬𑀸 𑀲𑀫𑀼𑀤𑁆𑀤𑁂𑀧𑀺 𑀘.

𑀅𑀩𑁆𑀪𑀼𑀢𑀸 𑀅𑀦𑀢𑀺𑀭𑀺𑀢𑁆𑀢𑀁, 𑀅𑀢𑀺𑀭𑀺𑀢𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁;

𑀧𑀸𑀭𑀸𑀚𑀺𑀓𑀝𑁆𑀞𑀫𑀁 𑀯𑀢𑁆𑀣𑀼, 𑀅𑀤𑁂𑀲𑀺𑀢𑀽𑀧𑀲𑀫𑁆𑀧𑀤𑀸.

𑀧𑀘𑁆𑀘𑀼𑀝𑁆𑀞𑀸𑀦𑀸𑀲𑀦𑀜𑁆𑀘𑁂𑀯, 𑀯𑀭𑀁 𑀑𑀯𑀸𑀤𑀓𑁂𑀦 𑀘;

𑀆𑀦𑀺𑀲𑀁𑀲𑀸 𑀧𑀭𑀫𑀸𑀦𑀺, 𑀅𑀝𑁆𑀞𑀥𑀫𑁆𑀫𑁂𑀲𑀼 𑀯𑀢𑁆𑀢𑀦𑀸;

𑀅𑀥𑀫𑁆𑀫𑀺𑀓𑀸 𑀥𑀫𑁆𑀫𑀺𑀓𑀸 𑀘, 𑀅𑀝𑁆𑀞𑀓𑀸 𑀲𑀼𑀧𑁆𑀧𑀓𑀸𑀲𑀺𑀢𑀸𑀢𑀺.