𑁯. 𑀦𑀯𑀓𑀯𑀸𑀭𑁄

𑁩𑁨𑁯. 𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺. 𑀦𑀯 𑀆𑀖𑀸𑀢𑀧𑀝𑀺𑀯𑀺𑀦𑀬𑀸. 𑀦𑀯 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀦𑀯 𑀧𑀞𑀫𑀸𑀧𑀢𑁆𑀢𑀺𑀓𑀸. 𑀦𑀯𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀦𑀯 𑀧𑀡𑀻𑀢𑀪𑁄𑀚𑀦𑀸𑀦𑀺. 𑀦𑀯𑀫𑀁𑀲𑁂𑀳𑀺 𑀤𑀼𑀓𑁆𑀓𑀝𑀁. 𑀦𑀯 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸. 𑀦𑀯 𑀧𑀭𑀫𑀸𑀦𑀺. 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸. 𑀦𑀯 𑀯𑀺𑀥𑀫𑀸𑀦𑀸. 𑀦𑀯 𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺. 𑀦𑀯 𑀘𑀻𑀯𑀭𑀸𑀦𑀺 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀺. 𑀤𑀻𑀖𑀲𑁄 𑀦𑀯 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸. 𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀤𑀸𑀦𑀸𑀦𑀺. 𑀦𑀯 𑀅𑀥𑀫𑁆𑀫𑀺𑀓𑀸 𑀧𑀝𑀺𑀕𑁆𑀕𑀳𑀸. 𑀦𑀯 𑀅𑀥𑀫𑁆𑀫𑀺𑀓𑀸 𑀧𑀭𑀺𑀪𑁄𑀕𑀸 𑁋 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺 𑀤𑀸𑀦𑀸𑀦𑀺, 𑀢𑀬𑁄 𑀥𑀫𑁆𑀫𑀺𑀓𑀸 𑀧𑀝𑀺𑀕𑁆𑀕𑀳𑀸, 𑀢𑀬𑁄 𑀥𑀫𑁆𑀫𑀺𑀓𑀸 𑀧𑀭𑀺𑀪𑁄𑀕𑀸. 𑀦𑀯 𑀅𑀥𑀫𑁆𑀫𑀺𑀓𑀸 𑀲𑀜𑁆𑀜𑀢𑁆𑀢𑀺𑀬𑁄 [𑀧𑀜𑁆𑀜𑀢𑁆𑀢𑀺𑀬𑁄 (𑀲𑀩𑁆𑀩𑀢𑁆𑀣) 𑀅𑀝𑁆𑀞𑀓𑀣𑀸 𑀘 𑀲𑀫𑀣𑀓𑁆𑀔𑀦𑁆𑀥𑀓𑁂 𑀓𑀡𑁆𑀳𑀧𑀓𑁆𑀔𑀦𑀯𑀓𑀜𑁆𑀘 𑀑𑀮𑁄𑀓𑁂𑀢𑀩𑁆𑀩𑀁]. 𑀦𑀯 𑀥𑀫𑁆𑀫𑀺𑀓𑀸 𑀲𑀜𑁆𑀜𑀢𑁆𑀢𑀺𑀬𑁄. 𑀅𑀥𑀫𑁆𑀫𑀓𑀫𑁆𑀫𑁂 𑀤𑁆𑀯𑁂 𑀦𑀯𑀓𑀸𑀦𑀺. 𑀥𑀫𑁆𑀫𑀓𑀫𑁆𑀫𑁂 𑀤𑁆𑀯𑁂 𑀦𑀯𑀓𑀸𑀦𑀺. 𑀦𑀯 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀦𑀯 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀻𑀢𑀺.

𑀦𑀯𑀓𑀁 𑀦𑀺𑀝𑁆𑀞𑀺𑀢𑀁.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀆𑀖𑀸𑀢𑀯𑀢𑁆𑀣𑀼𑀯𑀺𑀦𑀬𑀸, 𑀯𑀺𑀦𑀻𑀢𑀸 𑀧𑀞𑀫𑁂𑀦 𑀘;

𑀪𑀺𑀚𑁆𑀚𑀢𑀺 𑀘 𑀧𑀡𑀻𑀢𑀜𑁆𑀘, 𑀫𑀁𑀲𑀼𑀤𑁆𑀤𑁂𑀲𑀧𑀭𑀫𑀸𑀦𑀺 𑀘.

𑀢𑀡𑁆𑀳𑀸 𑀫𑀸𑀦𑀸 𑀅𑀥𑀺𑀝𑁆𑀞𑀸𑀦𑀸, 𑀯𑀺𑀓𑀧𑁆𑀧𑁂 𑀘 𑀯𑀺𑀤𑀢𑁆𑀣𑀺𑀬𑁄;

𑀤𑀸𑀦𑀸 𑀧𑀝𑀺𑀕𑁆𑀕𑀳𑀸 𑀪𑁄𑀕𑀸, 𑀢𑀺𑀯𑀺𑀥𑀸 𑀧𑀼𑀦 𑀥𑀫𑁆𑀫𑀺𑀓𑀸.

𑀅𑀥𑀫𑁆𑀫𑀥𑀫𑁆𑀫𑀲𑀜𑁆𑀜𑀢𑁆𑀢𑀺, 𑀤𑀼𑀯𑁂 𑀤𑁆𑀯𑁂 𑀦𑀯𑀓𑀸𑀦𑀺 𑀘;

𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀅𑀥𑀫𑁆𑀫𑀥𑀫𑁆𑀫𑀺𑀓𑀸𑀦𑀺 𑀘𑀸𑀢𑀺.