𑀏𑀓𑀼𑀢𑁆𑀢𑀭𑀺𑀓𑀦𑀬𑁄
𑁧. 𑀏𑀓𑀓𑀯𑀸𑀭𑁄
𑁩𑁨𑁧. 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀸𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀚𑀸𑀦𑀺𑀢𑀩𑁆𑀩𑀸. 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀮𑀳𑀼𑀓𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀕𑀭𑀼𑀓𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀲𑀸𑀯𑀲𑁂𑀲𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀯𑀲𑁂𑀲𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀤𑀼𑀝𑁆𑀞𑀼𑀮𑁆𑀮𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀲𑀧𑁆𑀧𑀝𑀺𑀓𑀫𑁆𑀫𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀧𑁆𑀧𑀝𑀺𑀓𑀫𑁆𑀫𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀤𑁂𑀲𑀦𑀸𑀕𑀸𑀫𑀺𑀦𑀻 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀤𑁂𑀲𑀦𑀸𑀕𑀸𑀫𑀺𑀦𑀻 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑁆𑀢𑀭𑀸𑀬𑀺𑀓𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀦𑁆𑀢𑀭𑀸𑀬𑀺𑀓𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀲𑀸𑀯𑀚𑁆𑀚𑀧𑀜𑁆𑀜𑀢𑁆𑀢𑀺 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀯𑀚𑁆𑀚𑀧𑀜𑁆𑀜𑀢𑁆𑀢𑀺 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀺𑀢𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀺𑀢𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁄 𑀲𑀫𑀼𑀝𑁆𑀞𑀺𑀢𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀧𑀼𑀩𑁆𑀩𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀧𑀭𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀧𑀼𑀩𑁆𑀩𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀧𑀭𑀸𑀧𑀢𑁆𑀢𑀻𑀦𑀁 𑀅𑀦𑁆𑀢𑀭𑀸𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀤𑁂𑀲𑀺𑀢𑀸 𑀕𑀡𑀦𑀽𑀧𑀕𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀤𑁂𑀲𑀺𑀢𑀸 𑀦 𑀕𑀡𑀦𑀽𑀧𑀕𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀼𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀧𑀤𑁂𑀲𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀏𑀓𑀢𑁄𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀉𑀪𑀢𑁄𑀧𑀜𑁆𑀜𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀣𑀼𑀮𑁆𑀮𑀯𑀚𑁆𑀚𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀣𑀼𑀮𑁆𑀮𑀯𑀚𑁆𑀚𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀦 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀦𑀺𑀬𑀢𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀅𑀦𑀺𑀬𑀢𑀸 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀆𑀤𑀺𑀓𑀭𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀦𑀸𑀤𑀺𑀓𑀭𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀥𑀺𑀘𑁆𑀘𑀸𑀧𑀢𑁆𑀢𑀺𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀘𑁄𑀤𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀘𑀼𑀤𑀺𑀢𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀥𑀫𑁆𑀫𑀘𑁄𑀤𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀥𑀫𑁆𑀫𑀘𑀼𑀤𑀺𑀢𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀥𑀫𑁆𑀫𑀘𑁄𑀤𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀥𑀫𑁆𑀫𑀘𑀼𑀤𑀺𑀢𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀦𑀺𑀬𑀢𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀦𑀺𑀬𑀢𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀪𑀩𑁆𑀩𑀸𑀧𑀢𑁆𑀢𑀺𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀪𑀩𑁆𑀩𑀸𑀧𑀢𑁆𑀢𑀺𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀉𑀓𑁆𑀔𑀺𑀢𑁆𑀢𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀦𑀼𑀓𑁆𑀔𑀺𑀢𑁆𑀢𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀦𑀸𑀲𑀺𑀢𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀦𑀸𑀲𑀺𑀢𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀲𑀫𑀸𑀦𑀲𑀁𑀯𑀸𑀲𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀅𑀲𑀫𑀸𑀦𑀲𑀁𑀯𑀸𑀲𑀓𑁄 𑀧𑀼𑀕𑁆𑀕𑀮𑁄 𑀚𑀸𑀦𑀺𑀢𑀩𑁆𑀩𑁄. 𑀞𑀧𑀦𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺.
𑀏𑀓𑀓𑀁 𑀦𑀺𑀝𑁆𑀞𑀺𑀢𑀁.
𑀢𑀲𑁆𑀲𑀼𑀤𑁆𑀤𑀸𑀦𑀁 𑁋
𑀓𑀭𑀸 𑀆𑀧𑀢𑁆𑀢𑀺 𑀮𑀳𑀼𑀓𑀸, 𑀲𑀸𑀯𑀲𑁂𑀲𑀸 𑀘 𑀤𑀼𑀝𑁆𑀞𑀼𑀮𑁆𑀮𑀸;
𑀧𑀝𑀺𑀓𑀫𑁆𑀫𑀤𑁂𑀲𑀦𑀸 𑀘, 𑀅𑀦𑁆𑀢𑀭𑀸 𑀯𑀚𑁆𑀚𑀓𑀺𑀭𑀺𑀬𑀁.
𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀧𑀼𑀩𑁆𑀩𑀸, 𑀅𑀦𑁆𑀢𑀭𑀸 𑀕𑀡𑀦𑀽𑀧𑀕𑀸;
𑀧𑀜𑁆𑀜𑀢𑁆𑀢𑀺 𑀅𑀦𑀸𑀦𑀼𑀧𑁆𑀧𑀦𑁆𑀦, 𑀲𑀩𑁆𑀩𑀲𑀸𑀥𑀸𑀭𑀡𑀸 𑀘 𑀏𑀓𑀢𑁄 [𑀧𑀜𑁆𑀜𑀢𑁆𑀢𑀸𑀦𑀼𑀧𑁆𑀧𑀦𑁆𑀦𑀸 𑀲𑀩𑁆𑀩𑀸, 𑀲𑀸𑀥𑀸𑀭𑀡𑀸 𑀘 𑀏𑀓𑀢𑁄 (𑀲𑁆𑀬𑀸.)].
𑀣𑀼𑀮𑁆𑀮𑀕𑀺𑀳𑀺𑀦𑀺𑀬𑀢𑀸 𑀘, 𑀆𑀤𑀺 𑀅𑀥𑀺𑀘𑁆𑀘𑀘𑁄𑀤𑀓𑁄;
𑀅𑀥𑀫𑁆𑀫𑀥𑀫𑁆𑀫𑀦𑀺𑀬𑀢𑁄, 𑀅𑀪𑀩𑁆𑀩𑁄𑀓𑁆𑀔𑀺𑀢𑁆𑀢𑀦𑀸𑀲𑀺𑀢𑀸;
𑀲𑀫𑀸𑀦𑀁 𑀞𑀧𑀦𑀜𑁆𑀘𑁂𑀯, 𑀉𑀤𑁆𑀤𑀸𑀦𑀁 𑀏𑀓𑀓𑁂 𑀇𑀤𑀦𑁆𑀢𑀺.
𑁨. 𑀤𑀼𑀓𑀯𑀸𑀭𑁄
𑁩𑁨𑁨. 𑀅𑀢𑁆𑀣𑀸𑀧𑀢𑁆𑀢𑀺 𑀲𑀜𑁆𑀜𑀸 𑀯𑀺𑀫𑁄𑀓𑁆𑀔𑀸, 𑀅𑀢𑁆𑀣𑀸𑀧𑀢𑁆𑀢𑀺 𑀦𑁄 𑀲𑀜𑁆𑀜𑀸𑀯𑀺𑀫𑁄𑀓𑁆𑀔𑀸. 𑀅𑀢𑁆𑀣𑀸𑀧𑀢𑁆𑀢𑀺 𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀓𑀲𑁆𑀲, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀮𑀤𑁆𑀥𑀲𑀫𑀸𑀧𑀢𑁆𑀢𑀺𑀓𑀲𑁆𑀲. 𑀅𑀢𑁆𑀣𑀸𑀧𑀢𑁆𑀢𑀺 𑀲𑀤𑁆𑀥𑀫𑁆𑀫𑀧𑀝𑀺𑀲𑀜𑁆𑀜𑀼𑀢𑁆𑀢𑀸, 𑀅𑀢𑁆𑀣𑀸𑀧𑀢𑁆𑀢𑀺 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑀜𑁆𑀜𑀼𑀢𑁆𑀢𑀸. 𑀅𑀢𑁆𑀣𑀸𑀧𑀢𑁆𑀢𑀺 𑀲𑀧𑀭𑀺𑀓𑁆𑀔𑀸𑀭𑀧𑀝𑀺𑀲𑀜𑁆𑀜𑀼𑀢𑁆𑀢𑀸, 𑀅𑀢𑁆𑀣𑀸𑀧𑀢𑁆𑀢𑀺 𑀧𑀭𑀧𑀭𑀺𑀓𑁆𑀔𑀸𑀭𑀧𑀝𑀺𑀲𑀜𑁆𑀜𑀼𑀢𑁆𑀢𑀸. 𑀅𑀢𑁆𑀣𑀸𑀧𑀢𑁆𑀢𑀺 𑀲𑀧𑀼𑀕𑁆𑀕𑀮𑀧𑀝𑀺𑀲𑀜𑁆𑀜𑀼𑀢𑁆𑀢𑀸, 𑀅𑀢𑁆𑀣𑀸𑀧𑀢𑁆𑀢𑀺 𑀧𑀭𑀧𑀼𑀕𑁆𑀕𑀮𑀧𑀝𑀺𑀲𑀜𑁆𑀜𑀼𑀢𑁆𑀢𑀸. 𑀅𑀢𑁆𑀣𑀺 𑀲𑀘𑁆𑀘𑀁 𑀪𑀡𑀦𑁆𑀢𑁄 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀫𑀼𑀲𑀸 𑀪𑀡𑀦𑁆𑀢𑁄 𑀮𑀳𑀼𑀓𑀁. 𑀅𑀢𑁆𑀣𑀺 𑀫𑀼𑀲𑀸 𑀪𑀡𑀦𑁆𑀢𑁄 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑀘𑁆𑀘𑀁 𑀪𑀡𑀦𑁆𑀢𑁄 𑀮𑀳𑀼𑀓𑀁. 𑀅𑀢𑁆𑀣𑀸𑀧𑀢𑁆𑀢𑀺 𑀪𑀽𑀫𑀺𑀕𑀢𑁄 𑀆𑀧𑀚𑁆𑀚𑀢𑀺, 𑀦𑁄 𑀯𑁂𑀳𑀸𑀲𑀕𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀯𑁂𑀳𑀸𑀲𑀕𑀢𑁄 𑀆𑀧𑀚𑁆𑀚𑀢𑀺, 𑀦𑁄 𑀪𑀽𑀫𑀺𑀕𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀦𑀺𑀓𑁆𑀔𑀫𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀦𑁄 𑀧𑀯𑀺𑀲𑀦𑁆𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀧𑀯𑀺𑀲𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀦𑁄 𑀦𑀺𑀓𑁆𑀔𑀫𑀦𑁆𑀢𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀆𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀲𑀫𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀲𑀫𑀸𑀤𑀺𑀬𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀓𑀭𑁄𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺. (𑀅𑀢𑁆𑀣𑀸𑀧𑀢𑁆𑀢𑀺 𑀤𑁂𑀲𑁂𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀤𑁂𑀲𑁂𑀦𑁆𑀢𑁄 𑀆𑀧𑀚𑁆𑀚𑀢𑀺.) [( ) (𑀦𑀢𑁆𑀣𑀺 𑀓𑀢𑁆𑀣𑀘𑀺)] 𑀅𑀢𑁆𑀣𑀸𑀧𑀢𑁆𑀢𑀺 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀧𑀭𑀺𑀪𑁄𑀕𑁂𑀦 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀧𑀭𑀺𑀪𑁄𑀕𑁂𑀦 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀭𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦𑁄 𑀤𑀺𑀯𑀸. 𑀅𑀢𑁆𑀣𑀸𑀧𑀢𑁆𑀢𑀺 𑀤𑀺𑀯𑀸 𑀆𑀧𑀚𑁆𑀚𑀢𑀺, 𑀦𑁄 𑀭𑀢𑁆𑀢𑀺𑀁. 𑀅𑀢𑁆𑀣𑀸𑀧𑀢𑁆𑀢𑀺 𑀅𑀭𑀼𑀡𑀼𑀕𑁆𑀕𑁂 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀅𑀭𑀼𑀡𑀼𑀕𑁆𑀕𑁂 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀙𑀺𑀦𑁆𑀤𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀙𑀺𑀦𑁆𑀤𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀙𑀸𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀙𑀸𑀤𑁂𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀥𑀸𑀭𑁂𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀢𑁆𑀣𑀸𑀧𑀢𑁆𑀢𑀺 𑀦 𑀥𑀸𑀭𑁂𑀦𑁆𑀢𑁄 𑀆𑀧𑀚𑁆𑀚𑀢𑀺.
𑀤𑁆𑀯𑁂 𑀉𑀧𑁄𑀲𑀣𑀸 𑁋 𑀘𑀸𑀢𑀼𑀤𑁆𑀤𑀲𑀺𑀓𑁄 𑀘 𑀧𑀦𑁆𑀦𑀭𑀲𑀺𑀓𑁄 𑀘. 𑀤𑁆𑀯𑁂 𑀧𑀯𑀸𑀭𑀡𑀸 𑁋 𑀘𑀸𑀢𑀼𑀤𑁆𑀤𑀲𑀺𑀓𑀸 𑀘 𑀧𑀦𑁆𑀦𑀭𑀲𑀺𑀓𑀸 𑀘. 𑀤𑁆𑀯𑁂 𑀓𑀫𑁆𑀫𑀸𑀦𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁. 𑀅𑀧𑀭𑀸𑀦𑀺𑀧𑀺 𑀤𑁆𑀯𑁂 𑀓𑀫𑁆𑀫𑀸𑀦𑀺 𑁋 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁. 𑀤𑁆𑀯𑁂 𑀓𑀫𑁆𑀫𑀯𑀢𑁆𑀣𑀽𑀦𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀯𑀢𑁆𑀣𑀼, 𑀜𑀢𑁆𑀢𑀺𑀓𑀫𑁆𑀫𑀲𑁆𑀲 𑀯𑀢𑁆𑀣𑀼. 𑀅𑀧𑀭𑀸𑀦𑀺𑀧𑀺 𑀤𑁆𑀯𑁂 𑀓𑀫𑁆𑀫𑀯𑀢𑁆𑀣𑀽𑀦𑀺 𑁋 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀲𑁆𑀲 𑀯𑀢𑁆𑀣𑀼, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀲𑁆𑀲 𑀯𑀢𑁆𑀣𑀼. 𑀤𑁆𑀯𑁂 𑀓𑀫𑁆𑀫𑀤𑁄𑀲𑀸 𑁋 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀤𑁄𑀲𑁄, 𑀜𑀢𑁆𑀢𑀺𑀓𑀫𑁆𑀫𑀲𑁆𑀲 𑀤𑁄𑀲𑁄. 𑀅𑀧𑀭𑁂𑀧𑀺 𑀤𑁆𑀯𑁂 𑀓𑀫𑁆𑀫𑀤𑁄𑀲𑀸 𑁋 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀲𑁆𑀲 𑀤𑁄𑀲𑁄, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀲𑁆𑀲 𑀤𑁄𑀲𑁄. 𑀤𑁆𑀯𑁂 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑁋 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀲𑀫𑁆𑀧𑀢𑁆𑀢𑀺, 𑀜𑀢𑁆𑀢𑀺𑀓𑀫𑁆𑀫𑀲𑁆𑀲 𑀲𑀫𑁆𑀧𑀢𑁆𑀢𑀺. 𑀅𑀧𑀭𑀸𑀧𑀺 𑀤𑁆𑀯𑁂 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑁋 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀲𑁆𑀲 𑀲𑀫𑁆𑀧𑀢𑁆𑀢𑀺, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀲𑁆𑀲 𑀲𑀫𑁆𑀧𑀢𑁆𑀢𑀺. 𑀤𑁆𑀯𑁂 𑀦𑀸𑀦𑀸𑀲𑀁𑀯𑀸𑀲𑀓𑀪𑀽𑀫𑀺𑀬𑁄 𑁋 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀦𑀸𑀦𑀸𑀲𑀁𑀯𑀸𑀲𑀓𑀁 𑀓𑀭𑁄𑀢𑀺, 𑀲𑀫𑀕𑁆𑀕𑁄 𑀯𑀸 𑀦𑀁 𑀲𑀗𑁆𑀖𑁄 𑀉𑀓𑁆𑀔𑀺𑀧𑀢𑀺 𑀅𑀤𑀲𑁆𑀲𑀦𑁂 𑀯𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸. 𑀤𑁆𑀯𑁂 𑀲𑀫𑀸𑀦𑀲𑀁𑀯𑀸𑀲𑀓𑀪𑀽𑀫𑀺𑀬𑁄 𑁋 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀲𑀫𑀸𑀦𑀲𑀁𑀯𑀸𑀲𑀓𑀁 𑀓𑀭𑁄𑀢𑀺, 𑀲𑀫𑀕𑁆𑀕𑁄 𑀯𑀸 𑀦𑀁 𑀲𑀗𑁆𑀖𑁄 𑀉𑀓𑁆𑀔𑀺𑀢𑁆𑀢𑀁 𑀑𑀲𑀸𑀭𑁂𑀢𑀺 𑀤𑀲𑁆𑀲𑀦𑁂 𑀯𑀸 𑀧𑀝𑀺𑀓𑀫𑁆𑀫𑁂 𑀯𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀯𑀸. 𑀤𑁆𑀯𑁂 𑀧𑀸𑀭𑀸𑀚𑀺𑀓𑀸 𑁋 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘. 𑀤𑁆𑀯𑁂 𑀲𑀗𑁆𑀖𑀸𑀤𑀺𑀲𑁂𑀲𑀸, 𑀤𑁆𑀯𑁂 𑀣𑀼𑀮𑁆𑀮𑀘𑁆𑀘𑀬𑀸, 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸, 𑀤𑁆𑀯𑁂 𑀧𑀸𑀝𑀺𑀤𑁂𑀲𑀦𑀻𑀬𑀸, 𑀤𑁆𑀯𑁂 𑀤𑀼𑀓𑁆𑀓𑀝𑀸, 𑀤𑁆𑀯𑁂 𑀤𑀼𑀩𑁆𑀪𑀸𑀲𑀺𑀢𑀸 𑁋 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘. 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄, 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸. 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺 𑁋 𑀓𑀫𑁆𑀫𑁂𑀦 𑀯𑀸 𑀲𑀮𑀸𑀓𑀕𑁆𑀕𑀸𑀳𑁂𑀦 𑀯𑀸.
𑀤𑁆𑀯𑁂 𑀧𑀼𑀕𑁆𑀕𑀮𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸 𑁋 𑀅𑀤𑁆𑀥𑀸𑀦𑀳𑀻𑀦𑁄, 𑀅𑀗𑁆𑀕𑀳𑀻𑀦𑁄. 𑀅𑀧𑀭𑁂𑀧𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸 𑁋 𑀯𑀢𑁆𑀣𑀼𑀯𑀺𑀧𑀦𑁆𑀦𑁄, 𑀓𑀭𑀡𑀤𑀼𑀓𑁆𑀓𑀝𑀓𑁄. 𑀅𑀧𑀭𑁂𑀧𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸 𑁋 𑀅𑀧𑀭𑀺𑀧𑀽𑀭𑁄 𑀧𑀭𑀺𑀧𑀽𑀭𑁄 𑀦𑁄 𑀘 𑀬𑀸𑀘𑀢𑀺. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀲𑁆𑀲𑀸𑀬 𑀦 𑀯𑀢𑁆𑀣𑀩𑁆𑀩𑀁 𑁋 𑀅𑀮𑀚𑁆𑀚𑀺𑀲𑁆𑀲 𑀘 𑀩𑀸𑀮𑀲𑁆𑀲 𑀘. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀲𑁆𑀲𑀬𑁄 𑀦 𑀤𑀸𑀢𑀩𑁆𑀩𑁄 𑁋 𑀅𑀮𑀚𑁆𑀚𑀺𑀲𑁆𑀲 𑀘 𑀮𑀚𑁆𑀚𑀺𑀦𑁄 𑀘 𑀦 𑀬𑀸𑀘𑀢𑀺. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 𑁋 𑀩𑀸𑀮𑀲𑁆𑀲 𑀘 𑀮𑀚𑁆𑀚𑀺𑀲𑁆𑀲 𑀘 𑀬𑀸𑀘𑀢𑀺. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀪𑀩𑁆𑀩𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑁋 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀪𑀩𑁆𑀩𑀸, 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑁋 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀪𑀩𑁆𑀩𑀸 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑁋 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀪𑀩𑁆𑀩𑀸 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑁋 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀧𑀼𑀣𑀼𑀚𑁆𑀚𑀦𑀸. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀅𑀪𑀩𑁆𑀩𑀸 𑀲𑀜𑁆𑀘𑀺𑀘𑁆𑀘 𑀲𑀸𑀢𑀺𑀲𑀸𑀭𑀁 𑀯𑀢𑁆𑀣𑀼𑀁 𑀅𑀚𑁆𑀛𑀸𑀘𑀭𑀺𑀢𑀼𑀁 𑁋 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀅𑀭𑀺𑀬𑀧𑀼𑀕𑁆𑀕𑀮𑀸. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀪𑀩𑁆𑀩𑀸 𑀲𑀜𑁆𑀘𑀺𑀘𑁆𑀘 𑀲𑀸𑀢𑀺𑀲𑀸𑀭𑀁 𑀯𑀢𑁆𑀣𑀼𑀁 𑀅𑀚𑁆𑀛𑀸𑀘𑀭𑀺𑀢𑀼𑀁 𑁋 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀼𑀦𑀺𑀬𑁄 𑀘 𑀧𑀼𑀣𑀼𑀚𑁆𑀚𑀦𑀸.
𑀤𑁆𑀯𑁂 𑀧𑀝𑀺𑀓𑁆𑀓𑁄𑀲𑀸 𑁋 𑀓𑀸𑀬𑁂𑀦 𑀯𑀸 𑀧𑀝𑀺𑀓𑁆𑀓𑁄𑀲𑀢𑀺 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀓𑁄𑀲𑀢𑀺. 𑀤𑁆𑀯𑁂 𑀦𑀺𑀲𑁆𑀲𑀸𑀭𑀡𑀸 𑁋 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀦𑀺𑀲𑁆𑀲𑀸𑀭𑀡𑀁 𑀢𑀁 𑀘𑁂 𑀲𑀗𑁆𑀖𑁄 𑀦𑀺𑀲𑁆𑀲𑀸𑀭𑁂𑀢𑀺 𑀏𑀓𑀘𑁆𑀘𑁄 𑀲𑀼𑀦𑀺𑀲𑁆𑀲𑀸𑀭𑀺𑀢𑁄, 𑀏𑀓𑀘𑁆𑀘𑁄 𑀤𑀼𑀦𑁆𑀦𑀺𑀲𑁆𑀲𑀸𑀭𑀺𑀢𑁄. 𑀤𑁆𑀯𑁂 𑀑𑀲𑀸𑀭𑀡𑀸 𑁋 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀧𑁆𑀧𑀢𑁆𑀢𑁄 𑀑𑀲𑀸𑀭𑀡𑀁 𑀢𑀁 𑀘𑁂 𑀲𑀗𑁆𑀖𑁄 𑀑𑀲𑀸𑀭𑁂𑀢𑀺 𑀏𑀓𑀘𑁆𑀘𑁄 𑀲𑁄𑀲𑀸𑀭𑀺𑀢𑁄, 𑀏𑀓𑀘𑁆𑀘𑁄 𑀤𑁄𑀲𑀸𑀭𑀺𑀢𑁄. 𑀤𑁆𑀯𑁂 𑀧𑀝𑀺𑀜𑁆𑀜𑀸 𑁋 𑀓𑀸𑀬𑁂𑀦 𑀯𑀸 𑀧𑀝𑀺𑀚𑀸𑀦𑀸𑀢𑀺 𑀯𑀸𑀘𑀸𑀬 𑀯𑀸 𑀧𑀝𑀺𑀚𑀸𑀦𑀸𑀢𑀺. 𑀤𑁆𑀯𑁂 𑀧𑀝𑀺𑀕𑁆𑀕𑀳𑀸 𑁋 𑀓𑀸𑀬𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀤𑁆𑀯𑁂 𑀧𑀝𑀺𑀓𑁆𑀔𑁂𑀧𑀸 𑁋 𑀓𑀸𑀬𑁂𑀦 𑀯𑀸 𑀧𑀝𑀺𑀓𑁆𑀔𑀺𑀧𑀢𑀺 𑀯𑀸𑀘𑀸𑀬 𑀯𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀤𑁆𑀯𑁂 𑀉𑀧𑀖𑀸𑀢𑀺𑀓𑀸 𑁋 𑀲𑀺𑀓𑁆𑀔𑀽𑀧𑀖𑀸𑀢𑀺𑀓𑀸 𑀘 𑀪𑁄𑀕𑀽𑀧𑀖𑀸𑀢𑀺𑀓𑀸 𑀘. 𑀤𑁆𑀯𑁂 𑀘𑁄𑀤𑀦𑀸 𑁋 𑀓𑀸𑀬𑁂𑀦 𑀯𑀸 𑀘𑁄𑀤𑁂𑀢𑀺 𑀯𑀸𑀘𑀸𑀬 𑀯𑀸 𑀘𑁄𑀤𑁂𑀢𑀺. 𑀤𑁆𑀯𑁂 𑀓𑀣𑀺𑀦𑀲𑁆𑀲 𑀧𑀮𑀺𑀩𑁄𑀥𑀸 𑁋 𑀆𑀯𑀸𑀲𑀧𑀮𑀺𑀩𑁄𑀥𑁄 𑀘 𑀘𑀻𑀯𑀭𑀧𑀮𑀺𑀩𑁄𑀥𑁄 𑀘. 𑀤𑁆𑀯𑁂 𑀓𑀣𑀺𑀦𑀲𑁆𑀲 𑀅𑀧𑀮𑀺𑀩𑁄𑀥𑀸 𑁋 𑀆𑀯𑀸𑀲𑀅𑀧𑀮𑀺𑀩𑁄𑀥𑁄 𑀘 𑀘𑀻𑀯𑀭𑀅𑀧𑀮𑀺𑀩𑁄𑀥𑁄 𑀘. 𑀤𑁆𑀯𑁂 𑀘𑀻𑀯𑀭𑀸𑀦𑀺 𑁋 𑀕𑀳𑀧𑀢𑀺𑀓𑀜𑁆𑀘 𑀧𑀁𑀲𑀼𑀓𑀽𑀮𑀜𑁆𑀘. 𑀤𑁆𑀯𑁂 𑀧𑀢𑁆𑀢𑀸 𑁋 𑀅𑀬𑁄𑀧𑀢𑁆𑀢𑁄 𑀫𑀢𑁆𑀢𑀺𑀓𑀸𑀧𑀢𑁆𑀢𑁄. 𑀤𑁆𑀯𑁂 𑀫𑀡𑁆𑀟𑀮𑀸𑀦𑀺 𑁋 𑀢𑀺𑀧𑀼𑀫𑀬𑀁, 𑀲𑀻𑀲𑀫𑀬𑀁. 𑀤𑁆𑀯𑁂 𑀧𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀸 𑁋 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑁂𑀢𑀺 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑁂𑀢𑀺. 𑀤𑁆𑀯𑁂 𑀘𑀻𑀯𑀭𑀲𑁆𑀲 𑀅𑀥𑀺𑀝𑁆𑀞𑀸𑀦𑀸 𑁋 𑀓𑀸𑀬𑁂𑀦 𑀯𑀸 𑀅𑀥𑀺𑀝𑁆𑀞𑁂𑀢𑀺 𑀯𑀸𑀘𑀸𑀬 𑀯𑀸 𑀅𑀥𑀺𑀝𑁆𑀞𑁂𑀢𑀺. 𑀤𑁆𑀯𑁂 𑀯𑀺𑀓𑀧𑁆𑀧𑀦𑀸 𑁋 𑀲𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀘 𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸 𑀘. 𑀤𑁆𑀯𑁂 𑀯𑀺𑀦𑀬𑀸 𑁋 𑀪𑀺𑀓𑁆𑀔𑀽𑀦𑀜𑁆𑀘 𑀪𑀺𑀓𑁆𑀔𑀼𑀦𑀻𑀦𑀜𑁆𑀘. 𑀤𑁆𑀯𑁂 𑀯𑁂𑀦𑀬𑀺𑀓𑀸 𑁋 𑀧𑀜𑁆𑀜𑀢𑁆𑀢𑀜𑁆𑀘 𑀧𑀜𑁆𑀜𑀢𑁆𑀢𑀸𑀦𑀼𑀮𑁄𑀫𑀜𑁆𑀘. 𑀤𑁆𑀯𑁂 𑀯𑀺𑀦𑀬𑀲𑁆𑀲 𑀲𑀮𑁆𑀮𑁂𑀔𑀸 𑁋 𑀅𑀓𑀧𑁆𑀧𑀺𑀬𑁂 𑀲𑁂𑀢𑀼𑀖𑀸𑀢𑁄, 𑀓𑀧𑁆𑀧𑀺𑀬𑁂 𑀫𑀢𑁆𑀢𑀓𑀸𑀭𑀺𑀢𑀸. 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑁋 𑀓𑀸𑀬𑁂𑀦 𑀯𑀸 𑀆𑀧𑀚𑁆𑀚𑀢𑀺 𑀯𑀸𑀘𑀸𑀬 𑀯𑀸 𑀆𑀧𑀚𑁆𑀚𑀢𑀺. 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀢𑀺 𑁋 𑀓𑀸𑀬𑁂𑀦 𑀯𑀸 𑀯𑀼𑀝𑁆𑀞𑀸𑀢𑀺 𑀯𑀸𑀘𑀸𑀬 𑀯𑀸 𑀯𑀼𑀝𑁆𑀞𑀸𑀢𑀺. 𑀤𑁆𑀯𑁂 𑀧𑀭𑀺𑀯𑀸𑀲𑀸 𑁋 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄. 𑀅𑀧𑀭𑁂𑀧𑀺 𑀤𑁆𑀯𑁂 𑀧𑀭𑀺𑀯𑀸𑀲𑀸 𑁋 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄. 𑀤𑁆𑀯𑁂 𑀫𑀸𑀦𑀢𑁆𑀢𑀸 𑁋 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁. 𑀅𑀧𑀭𑁂𑀧𑀺 𑀤𑁆𑀯𑁂 𑀫𑀸𑀦𑀢𑁆𑀢𑀸 𑁋 𑀧𑀓𑁆𑀔𑀫𑀸𑀦𑀢𑁆𑀢𑀁, 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀁. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀭𑀢𑁆𑀢𑀺𑀘𑁆𑀙𑁂𑀤𑁄 𑁋 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀘 𑀫𑀸𑀦𑀢𑁆𑀢𑀘𑀸𑀭𑀺𑀓𑀲𑁆𑀲 𑀘. 𑀤𑁆𑀯𑁂 𑀅𑀦𑀸𑀤𑀭𑀺𑀬𑀸𑀦𑀺 𑁋 𑀧𑀼𑀕𑁆𑀕𑀮𑀸𑀦𑀸𑀤𑀭𑀺𑀬𑀜𑁆𑀘 𑀥𑀫𑁆𑀫𑀸𑀦𑀸𑀤𑀭𑀺𑀬𑀜𑁆𑀘. 𑀤𑁆𑀯𑁂 𑀮𑁄𑀡𑀸𑀦𑀺 𑁋 𑀚𑀸𑀢𑀺𑀫𑀜𑁆𑀘 𑀓𑀸𑀭𑀺𑀫𑀜𑁆𑀘 [𑀚𑀸𑀢𑀺𑀫𑀬𑀜𑁆𑀘 𑀔𑀸𑀭𑀺𑀫𑀬𑀜𑁆𑀘 (𑀲𑁆𑀬𑀸.)]. 𑀅𑀧𑀭𑀸𑀦𑀺𑀧𑀺 𑀤𑁆𑀯𑁂 𑀮𑁄𑀡𑀸𑀦𑀺 𑁋 𑀲𑀸𑀫𑀼𑀤𑁆𑀤𑀁 𑀓𑀸𑀴𑀮𑁄𑀡𑀁. 𑀅𑀧𑀭𑀸𑀦𑀺𑀧𑀺 𑀤𑁆𑀯𑁂 𑀮𑁄𑀡𑀸𑀦𑀺 𑁋 𑀲𑀺𑀦𑁆𑀥𑀯𑀁, 𑀉𑀩𑁆𑀪𑀺𑀤𑀁 [𑀉𑀩𑁆𑀪𑀺𑀭𑀁 (𑀇𑀢𑀺𑀧𑀺)]. 𑀅𑀧𑀭𑀸𑀦𑀺𑀧𑀺 𑀤𑁆𑀯𑁂 𑀮𑁄𑀡𑀸𑀦𑀺 𑁋 𑀭𑁄𑀫𑀓𑀁, 𑀧𑀓𑁆𑀓𑀸𑀮𑀓𑀁. 𑀤𑁆𑀯𑁂 𑀧𑀭𑀺𑀪𑁄𑀕𑀸 𑁋 𑀅𑀩𑁆𑀪𑀦𑁆𑀢𑀭𑀧𑀭𑀺𑀪𑁄𑀕𑁄 𑀘 𑀩𑀸𑀳𑀺𑀭𑀧𑀭𑀺𑀪𑁄𑀕𑁄 𑀘. 𑀤𑁆𑀯𑁂 𑀅𑀓𑁆𑀓𑁄𑀲𑀸 𑁋 𑀳𑀻𑀦𑁄 𑀘 𑀅𑀓𑁆𑀓𑁄𑀲𑁄 𑀉𑀓𑁆𑀓𑀝𑁆𑀞𑁄 𑀘 𑀅𑀓𑁆𑀓𑁄𑀲𑁄. 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑁂𑀲𑀼𑀜𑁆𑀜𑀁 𑀳𑁄𑀢𑀺 𑁋 𑀧𑀺𑀬𑀓𑀫𑁆𑀬𑀲𑁆𑀲 𑀯𑀸 𑀪𑁂𑀤𑀸𑀥𑀺𑀧𑁆𑀧𑀸𑀬𑀲𑁆𑀲 𑀯𑀸. 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀕𑀡𑀪𑁄𑀚𑀦𑀁 𑀧𑀲𑀯𑀢𑀺 𑁋 𑀦𑀺𑀫𑀦𑁆𑀢𑀦𑀢𑁄 𑀯𑀸 𑀯𑀺𑀜𑁆𑀜𑀢𑁆𑀢𑀺𑀢𑁄 𑀯𑀸. 𑀤𑁆𑀯𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸 𑁋 𑀧𑀼𑀭𑀺𑀫𑀺𑀓𑀸, 𑀧𑀘𑁆𑀙𑀺𑀫𑀺𑀓𑀸. 𑀤𑁆𑀯𑁂 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀤𑁆𑀯𑁂 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.
[𑀅. 𑀦𑀺. 𑁨.𑁯𑁯 𑀆𑀤𑀬𑁄] 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀩𑀸𑀮𑀸 𑁋 𑀬𑁄 𑀘 𑀅𑀦𑀸𑀕𑀢𑀁 𑀪𑀸𑀭𑀁 𑀯𑀳𑀢𑀺, 𑀬𑁄 𑀘 𑀆𑀕𑀢𑀁 𑀪𑀸𑀭𑀁 𑀦 𑀯𑀳𑀢𑀺. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀡𑁆𑀟𑀺𑀢𑀸 𑁋 𑀬𑁄 𑀘 𑀅𑀦𑀸𑀕𑀢𑀁 𑀪𑀸𑀭𑀁 𑀦 𑀯𑀳𑀢𑀺, 𑀬𑁄 𑀘 𑀆𑀕𑀢𑀁 𑀪𑀸𑀭𑀁 𑀯𑀳𑀢𑀺. 𑀅𑀧𑀭𑁂𑀧𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀩𑀸𑀮𑀸 𑁋 𑀬𑁄 𑀘 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻, 𑀬𑁄 𑀘 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀡𑁆𑀟𑀺𑀢𑀸 𑁋 𑀬𑁄 𑀘 𑀅𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻, 𑀬𑁄 𑀘 𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻. 𑀅𑀧𑀭𑁂𑀧𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀩𑀸𑀮𑀸 𑁋 𑀬𑁄 𑀘 𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻, 𑀬𑁄 𑀘 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀡𑁆𑀟𑀺𑀢𑀸 𑁋 𑀬𑁄 𑀘 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻, 𑀬𑁄 𑀘 𑀅𑀦𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻. 𑀅𑀧𑀭𑁂𑀧𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀩𑀸𑀮𑀸 𑁋 𑀬𑁄 𑀘 𑀅𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀻, 𑀬𑁄 𑀘 𑀥𑀫𑁆𑀫𑁂 𑀅𑀥𑀫𑁆𑀫𑀲𑀜𑁆𑀜𑀻. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀡𑁆𑀟𑀺𑀢𑀸 𑁋 𑀬𑁄 𑀘 𑀅𑀥𑀫𑁆𑀫𑁂 𑀅𑀥𑀫𑁆𑀫𑀲𑀜𑁆𑀜𑀻, 𑀬𑁄 𑀘 𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀻. 𑀅𑀧𑀭𑁂𑀧𑀺 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀩𑀸𑀮𑀸 𑁋 𑀬𑁄 𑀘 𑀅𑀯𑀺𑀦𑀬𑁂 𑀯𑀺𑀦𑀬𑀲𑀜𑁆𑀜𑀻, 𑀬𑁄 𑀘 𑀯𑀺𑀦𑀬𑁂 𑀅𑀯𑀺𑀦𑀬𑀲𑀜𑁆𑀜𑀻. 𑀤𑁆𑀯𑁂 𑀧𑀼𑀕𑁆𑀕𑀮𑀸 𑀧𑀡𑁆𑀟𑀺𑀢𑀸 𑁋 𑀬𑁄 𑀘 𑀅𑀯𑀺𑀦𑀬𑁂 𑀅𑀯𑀺𑀦𑀬𑀲𑀜𑁆𑀜𑀻, 𑀬𑁄 𑀘 𑀯𑀺𑀦𑀬𑁂 𑀯𑀺𑀦𑀬𑀲𑀜𑁆𑀜𑀻.
[𑀅. 𑀦𑀺. 𑁨.𑁧𑁦𑁯] 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺, 𑀬𑁄 𑀘 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀦 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺, 𑀬𑁄 𑀘 𑀓𑀼𑀓𑁆𑀓𑀼𑀘𑁆𑀘𑀸𑀬𑀺𑀢𑀩𑁆𑀩𑀁 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀺. 𑀅𑀧𑀭𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻, 𑀬𑁄 𑀘 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀅𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀻, 𑀬𑁄 𑀘 𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀻. 𑀅𑀧𑀭𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀅𑀦𑀸𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻, 𑀬𑁄 𑀘 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀅𑀦𑀸𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀲𑀜𑁆𑀜𑀻, 𑀬𑁄 𑀘 𑀆𑀧𑀢𑁆𑀢𑀺𑀬𑀸 𑀆𑀧𑀢𑁆𑀢𑀺𑀲𑀜𑁆𑀜𑀻. 𑀅𑀧𑀭𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀅𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀻, 𑀬𑁄 𑀘 𑀥𑀫𑁆𑀫𑁂 𑀅𑀥𑀫𑁆𑀫𑀲𑀜𑁆𑀜𑀻. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀅𑀥𑀫𑁆𑀫𑁂 𑀅𑀥𑀫𑁆𑀫𑀲𑀜𑁆𑀜𑀻, 𑀬𑁄 𑀘 𑀥𑀫𑁆𑀫𑁂 𑀥𑀫𑁆𑀫𑀲𑀜𑁆𑀜𑀻. 𑀅𑀧𑀭𑁂𑀲𑀫𑁆𑀧𑀺 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀅𑀯𑀺𑀦𑀬𑁂 𑀯𑀺𑀦𑀬𑀲𑀜𑁆𑀜𑀻, 𑀬𑁄 𑀘 𑀯𑀺𑀦𑀬𑁂 𑀅𑀯𑀺𑀦𑀬𑀲𑀜𑁆𑀜𑀻. 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀲𑀯𑀸 𑀦 𑀯𑀟𑁆𑀠𑀦𑁆𑀢𑀺 𑁋 𑀬𑁄 𑀘 𑀅𑀯𑀺𑀦𑀬𑁂 𑀅𑀯𑀺𑀦𑀬𑀲𑀜𑁆𑀜𑀻, 𑀬𑁄 𑀘 𑀯𑀺𑀦𑀬𑁂 𑀯𑀺𑀦𑀬𑀲𑀜𑁆𑀜𑀻.
𑀤𑀼𑀓𑀸 𑀦𑀺𑀝𑁆𑀞𑀺𑀢𑀸.
𑀢𑀲𑁆𑀲𑀼𑀤𑁆𑀤𑀸𑀦𑀁 𑁋
𑀲𑀜𑁆𑀜𑀸 𑀮𑀤𑁆𑀥𑀸 𑀘 𑀲𑀤𑁆𑀥𑀫𑁆𑀫𑀸, 𑀧𑀭𑀺𑀓𑁆𑀔𑀸𑀭𑀸 𑀘 𑀧𑀼𑀕𑁆𑀕𑀮𑀸;
𑀲𑀘𑁆𑀘𑀁 𑀪𑀽𑀫𑀺 𑀦𑀺𑀓𑁆𑀔𑀫𑀦𑁆𑀢𑁄, 𑀆𑀤𑀺𑀬𑀦𑁆𑀢𑁄 𑀲𑀫𑀸𑀤𑀺𑀬𑀁.
𑀓𑀭𑁄𑀦𑁆𑀢𑁄 𑀤𑁂𑀦𑁆𑀢𑁄 𑀕𑀡𑁆𑀳𑀦𑁆𑀢𑁄, 𑀧𑀭𑀺𑀪𑁄𑀕𑁂𑀦 𑀭𑀢𑁆𑀢𑀺 𑀘;
𑀅𑀭𑀼𑀡𑀸𑀙𑀺𑀦𑁆𑀤𑀁 𑀙𑀸𑀤𑁂𑀦𑁆𑀢𑁄, 𑀥𑀸𑀭𑁂𑀦𑁆𑀢𑁄 𑀘 𑀉𑀧𑁄𑀲𑀣𑀸.
𑀧𑀯𑀸𑀭𑀡𑀸 𑀓𑀫𑁆𑀫𑀸𑀧𑀭𑀸, 𑀯𑀢𑁆𑀣𑀼 𑀅𑀧𑀭𑀸 𑀤𑁄𑀲𑀸 𑀘;
𑀅𑀧𑀭𑀸 𑀤𑁆𑀯𑁂 𑀘 𑀲𑀫𑁆𑀧𑀢𑁆𑀢𑀺, 𑀦𑀸𑀦𑀸 𑀲𑀫𑀸𑀦𑀫𑁂𑀯 𑀘.
𑀧𑀸𑀭𑀸𑀚𑀺𑀲𑀗𑁆𑀖𑀣𑀼𑀮𑁆𑀮𑀘𑁆𑀘𑀬, 𑀧𑀸𑀘𑀺𑀢𑁆𑀢𑀺 𑀧𑀸𑀝𑀺𑀤𑁂𑀲𑀦𑀸;
𑀤𑀼𑀓𑁆𑀓𑀝𑀸 𑀤𑀼𑀩𑁆𑀪𑀸𑀲𑀺𑀢𑀸 𑀘𑁂𑀯, 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀘.
𑀪𑀺𑀚𑁆𑀚𑀢𑀺 𑀉𑀧𑀲𑀫𑁆𑀧𑀤𑀸, 𑀢𑀣𑁂𑀯 𑀅𑀧𑀭𑁂 𑀤𑀼𑀯𑁂;
𑀦 𑀯𑀢𑁆𑀣𑀩𑁆𑀩𑀁 𑀦 𑀤𑀸𑀢𑀩𑁆𑀩𑀁, 𑀅𑀪𑀩𑁆𑀩𑀸𑀪𑀩𑁆𑀩𑀫𑁂𑀯 𑀘.
𑀲𑀜𑁆𑀘𑀺𑀘𑁆𑀘 𑀲𑀸𑀢𑀺𑀲𑀸𑀭𑀸 𑀘, 𑀧𑀝𑀺𑀓𑁆𑀓𑁄𑀲𑀸 𑀦𑀺𑀲𑁆𑀲𑀸𑀭𑀡𑀸;
𑀑𑀲𑀸𑀭𑀡𑀸 𑀧𑀝𑀺𑀜𑁆𑀜𑀸 𑀘, 𑀧𑀝𑀺𑀕𑁆𑀕𑀳𑀸 𑀧𑀝𑀺𑀓𑁆𑀔𑀺𑀧𑀸.
𑀉𑀧𑀖𑀸𑀢𑀺 𑀘𑁄𑀤𑀦𑀸 𑀘, 𑀓𑀣𑀺𑀦𑀸 𑀘 𑀤𑀼𑀯𑁂 𑀢𑀣𑀸;
𑀘𑀻𑀯𑀭𑀸 𑀧𑀢𑁆𑀢𑀫𑀡𑁆𑀟𑀮𑀸, 𑀅𑀥𑀺𑀝𑁆𑀞𑀸𑀦𑀸 𑀢𑀣𑁂𑀯 𑀤𑁆𑀯𑁂.
𑀯𑀺𑀓𑀧𑁆𑀧𑀦𑀸 𑀘 𑀯𑀺𑀦𑀬𑀸, 𑀯𑁂𑀦𑀬𑀺𑀓𑀸 𑀘 𑀲𑀮𑁆𑀮𑁂𑀔𑀸;
𑀆𑀧𑀚𑁆𑀚𑀢𑀺 𑀘 𑀯𑀼𑀝𑁆𑀞𑀸𑀢𑀺, 𑀧𑀭𑀺𑀯𑀸𑀲𑀸𑀧𑀭𑁂 𑀤𑀼𑀯𑁂.
𑀤𑁆𑀯𑁂 𑀫𑀸𑀦𑀢𑁆𑀢𑀸 𑀅𑀧𑀭𑁂 𑀘, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀅𑀦𑀸𑀤𑀭𑀺;
𑀤𑁆𑀯𑁂 𑀮𑁄𑀡𑀸 𑀢𑀬𑁄 𑀅𑀧𑀭𑁂, 𑀧𑀭𑀺𑀪𑁄𑀕𑀓𑁆𑀓𑁄𑀲𑁂𑀦 𑀘.
𑀧𑁂𑀲𑀼𑀜𑁆𑀜𑁄 𑀘 𑀕𑀡𑀸𑀯𑀲𑁆𑀲, 𑀞𑀧𑀦𑀸 𑀪𑀸𑀭𑀓𑀧𑁆𑀧𑀺𑀬𑀁;
𑀅𑀦𑀸𑀧𑀢𑁆𑀢𑀺 𑀅𑀥𑀫𑁆𑀫𑀥𑀫𑁆𑀫𑀸, 𑀯𑀺𑀦𑀬𑁂 𑀆𑀲𑀯𑁂 𑀢𑀣𑀸𑀢𑀺.
𑁩. 𑀢𑀺𑀓𑀯𑀸𑀭𑁄
𑁩𑁨𑁩. 𑀅𑀢𑁆𑀣𑀸𑀧𑀢𑁆𑀢𑀺 𑀢𑀺𑀝𑁆𑀞𑀦𑁆𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀺, 𑀦𑁄 𑀧𑀭𑀺𑀦𑀺𑀩𑁆𑀩𑀼𑀢𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀧𑀚𑁆𑀚𑀢𑀺, 𑀦𑁄 𑀢𑀺𑀝𑁆𑀞𑀦𑁆𑀢𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀢𑀺𑀝𑁆𑀞𑀦𑁆𑀢𑁂𑀧𑀺 𑀪𑀕𑀯𑀢𑀺 𑀆𑀧𑀚𑁆𑀚𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂𑀧𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀮𑁂 𑀆𑀧𑀚𑁆𑀚𑀢𑀺, 𑀦𑁄 𑀯𑀺𑀓𑀸𑀮𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀯𑀺𑀓𑀸𑀮𑁂 𑀆𑀧𑀚𑁆𑀚𑀢𑀺, 𑀦𑁄 𑀓𑀸𑀮𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀮𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀯𑀺𑀓𑀸𑀮𑁂 𑀘. 𑀅𑀢𑁆𑀣𑀸𑀧𑀢𑁆𑀢𑀺 𑀭𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦𑁄 𑀤𑀺𑀯𑀸; 𑀅𑀢𑁆𑀣𑀸𑀧𑀢𑁆𑀢𑀺 𑀤𑀺𑀯𑀸 𑀆𑀧𑀚𑁆𑀚𑀢𑀺, 𑀦𑁄 𑀭𑀢𑁆𑀢𑀺𑀁; 𑀅𑀢𑁆𑀣𑀸𑀧𑀢𑁆𑀢𑀺 𑀭𑀢𑁆𑀢𑀺𑀜𑁆𑀘𑁂𑀯 𑀆𑀧𑀚𑁆𑀚𑀢𑀺 𑀤𑀺𑀯𑀸 𑀘. 𑀅𑀢𑁆𑀣𑀸𑀧𑀢𑁆𑀢𑀺 𑀤𑀲𑀯𑀲𑁆𑀲𑁄 𑀆𑀧𑀚𑁆𑀚𑀢𑀺, 𑀦𑁄 𑀊𑀦𑀤𑀲𑀯𑀲𑁆𑀲𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀊𑀦𑀤𑀲𑀯𑀲𑁆𑀲𑁄 𑀆𑀧𑀚𑁆𑀚𑀢𑀺, 𑀦𑁄 𑀤𑀲𑀯𑀲𑁆𑀲𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀤𑀲𑀯𑀲𑁆𑀲𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀊𑀦𑀤𑀲𑀯𑀲𑁆𑀲𑁄 𑀘. 𑀅𑀢𑁆𑀣𑀸𑀧𑀢𑁆𑀢𑀺 𑀧𑀜𑁆𑀘𑀯𑀲𑁆𑀲𑁄 𑀆𑀧𑀚𑁆𑀚𑀢𑀺, 𑀦𑁄 𑀊𑀦𑀧𑀜𑁆𑀘𑀯𑀲𑁆𑀲𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀊𑀦𑀧𑀜𑁆𑀘𑀯𑀲𑁆𑀲𑁄 𑀆𑀧𑀚𑁆𑀚𑀢𑀺, 𑀦𑁄 𑀧𑀜𑁆𑀘𑀯𑀲𑁆𑀲𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀜𑁆𑀘𑀯𑀲𑁆𑀲𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀊𑀦𑀧𑀜𑁆𑀘𑀯𑀲𑁆𑀲𑁄 𑀘. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸𑀲𑀫𑀗𑁆𑀕𑀻 𑀆𑀧𑀚𑁆𑀚𑀢𑀺. 𑀢𑀻𑀡𑀺 𑀘𑁄𑀤𑀦𑀸𑀯𑀢𑁆𑀣𑀽𑀦𑀺 𑁋 𑀤𑀺𑀝𑁆𑀞𑁂𑀦, 𑀲𑀼𑀢𑁂𑀦, 𑀧𑀭𑀺𑀲𑀗𑁆𑀓𑀸𑀬. 𑀢𑀬𑁄 𑀲𑀮𑀸𑀓𑀕𑁆𑀕𑀸𑀳𑀸 𑁋 𑀕𑀼𑀴𑁆𑀳𑀓𑁄, 𑀯𑀺𑀯𑀝𑀓𑁄 [𑀯𑀺𑀯𑀝𑁆𑀝𑀓𑁄 (𑀓.)], 𑀲𑀓𑀡𑁆𑀡𑀚𑀧𑁆𑀧𑀓𑁄. 𑀢𑀬𑁄 𑀧𑀝𑀺𑀓𑁆𑀔𑁂𑀧𑀸 𑁋 𑀫𑀳𑀺𑀘𑁆𑀙𑀢𑀸, 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 [𑀅𑀲𑀦𑁆𑀢𑀼𑀝𑁆𑀞𑀢𑀸 (𑀲𑁆𑀬𑀸.)], 𑀅𑀲𑀮𑁆𑀮𑁂𑀔𑀢𑀸. 𑀢𑀬𑁄 𑀅𑀦𑀼𑀜𑁆𑀜𑀸𑀢𑀸 𑁋 𑀅𑀧𑁆𑀧𑀺𑀘𑁆𑀙𑀢𑀸, 𑀲𑀦𑁆𑀢𑀼𑀝𑁆𑀞𑀺𑀢𑀸, 𑀲𑀮𑁆𑀮𑁂𑀔𑀢𑀸. 𑀅𑀧𑀭𑁂𑀧𑀺 𑀢𑀬𑁄 𑀧𑀝𑀺𑀓𑁆𑀔𑁂𑀧𑀸 𑁋 𑀫𑀳𑀺𑀘𑁆𑀙𑀢𑀸, 𑀅𑀲𑀦𑁆𑀢𑀼𑀝𑁆𑀞𑀺𑀢𑀸, 𑀅𑀫𑀢𑁆𑀢𑀜𑁆𑀜𑀼𑀢𑀸. 𑀢𑀬𑁄 𑀅𑀦𑀼𑀜𑁆𑀜𑀸𑀢𑀸 𑁋 𑀅𑀧𑁆𑀧𑀺𑀘𑁆𑀙𑀢𑀸, 𑀲𑀦𑁆𑀢𑀼𑀝𑁆𑀞𑀺𑀢𑀸, 𑀫𑀢𑁆𑀢𑀜𑁆𑀜𑀼𑀢𑀸. 𑀢𑀺𑀲𑁆𑀲𑁄 𑀧𑀜𑁆𑀜𑀢𑁆𑀢𑀺𑀬𑁄 𑁋 𑀧𑀜𑁆𑀜𑀢𑁆𑀢𑀺, 𑀅𑀦𑀼𑀧𑀜𑁆𑀜𑀢𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀜𑁆𑀜𑀢𑁆𑀢𑀺𑀬𑁄 𑁋 𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺, 𑀧𑀤𑁂𑀲𑀧𑀜𑁆𑀜𑀢𑁆𑀢𑀺, 𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀜𑁆𑀜𑀢𑁆𑀢𑀺𑀬𑁄 𑁋 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺, 𑀏𑀓𑀢𑁄𑀧𑀜𑁆𑀜𑀢𑁆𑀢𑀺, 𑀉𑀪𑀢𑁄𑀧𑀜𑁆𑀜𑀢𑁆𑀢𑀺.
𑀅𑀢𑁆𑀣𑀸𑀧𑀢𑁆𑀢𑀺 𑀩𑀸𑀮𑁄 𑀆𑀧𑀚𑁆𑀚𑀢𑀺, 𑀦𑁄 𑀧𑀡𑁆𑀟𑀺𑀢𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀡𑁆𑀟𑀺𑀢𑁄 𑀆𑀧𑀚𑁆𑀚𑀢𑀺, 𑀦𑁄 𑀩𑀸𑀮𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀩𑀸𑀮𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀧𑀡𑁆𑀟𑀺𑀢𑁄 𑀘. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀴𑁂 𑀆𑀧𑀚𑁆𑀚𑀢𑀺, 𑀦𑁄 𑀚𑀼𑀡𑁆𑀳𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀚𑀼𑀡𑁆𑀳𑁂 𑀆𑀧𑀚𑁆𑀚𑀢𑀺, 𑀦𑁄 𑀓𑀸𑀴𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀴𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀚𑀼𑀡𑁆𑀳𑁂 𑀘. 𑀅𑀢𑁆𑀣𑀺 𑀓𑀸𑀴𑁂 𑀓𑀧𑁆𑀧𑀢𑀺, 𑀦𑁄 𑀚𑀼𑀡𑁆𑀳𑁂; 𑀅𑀢𑁆𑀣𑀺 𑀚𑀼𑀡𑁆𑀳𑁂 𑀓𑀧𑁆𑀧𑀢𑀺, 𑀦𑁄 𑀓𑀸𑀴𑁂; 𑀅𑀢𑁆𑀣𑀺 𑀓𑀸𑀴𑁂 𑀘𑁂𑀯 𑀓𑀧𑁆𑀧𑀢𑀺 𑀚𑀼𑀡𑁆𑀳𑁂 𑀘. 𑀅𑀢𑁆𑀣𑀸𑀧𑀢𑁆𑀢𑀺 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺, 𑀦𑁄 𑀕𑀺𑀫𑁆𑀳𑁂 𑀦𑁄 𑀯𑀲𑁆𑀲𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀕𑀺𑀫𑁆𑀳𑁂 𑀆𑀧𑀚𑁆𑀚𑀢𑀺, 𑀦𑁄 𑀳𑁂𑀫𑀦𑁆𑀢𑁂 𑀦𑁄 𑀯𑀲𑁆𑀲𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀯𑀲𑁆𑀲𑁂 𑀆𑀧𑀚𑁆𑀚𑀢𑀺, 𑀦𑁄 𑀳𑁂𑀫𑀦𑁆𑀢𑁂 𑀦𑁄 𑀕𑀺𑀫𑁆𑀳𑁂. 𑀅𑀢𑁆𑀣𑀸𑀧𑀢𑁆𑀢𑀺 𑀲𑀗𑁆𑀖𑁄 𑀆𑀧𑀚𑁆𑀚𑀢𑀺, 𑀦 𑀕𑀡𑁄 𑀦 𑀧𑀼𑀕𑁆𑀕𑀮𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀕𑀡𑁄 𑀆𑀧𑀚𑁆𑀚𑀢𑀺, 𑀦 𑀲𑀗𑁆𑀖𑁄 𑀦 𑀧𑀼𑀕𑁆𑀕𑀮𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀼𑀕𑁆𑀕𑀮𑁄 𑀆𑀧𑀚𑁆𑀚𑀢𑀺, 𑀦 𑀲𑀗𑁆𑀖𑁄 𑀦 𑀕𑀡𑁄. 𑀅𑀢𑁆𑀣𑀺 𑀲𑀗𑁆𑀖𑀲𑁆𑀲 𑀓𑀧𑁆𑀧𑀢𑀺, 𑀦 𑀕𑀡𑀲𑁆𑀲 𑀦 𑀧𑀼𑀕𑁆𑀕𑀮𑀲𑁆𑀲; 𑀅𑀢𑁆𑀣𑀺 𑀕𑀡𑀲𑁆𑀲 𑀓𑀧𑁆𑀧𑀢𑀺, 𑀦 𑀲𑀗𑁆𑀖𑀲𑁆𑀲 𑀦 𑀧𑀼𑀕𑁆𑀕𑀮𑀲𑁆𑀲; 𑀅𑀢𑁆𑀣𑀺 𑀧𑀼𑀕𑁆𑀕𑀮𑀲𑁆𑀲 𑀓𑀧𑁆𑀧𑀢𑀺, 𑀦 𑀲𑀗𑁆𑀖𑀲𑁆𑀲 𑀦 𑀕𑀡𑀲𑁆𑀲. 𑀢𑀺𑀲𑁆𑀲𑁄 𑀙𑀸𑀤𑀦𑀸 𑀯𑀢𑁆𑀣𑀼𑀁 𑀙𑀸𑀤𑁂𑀢𑀺, 𑀦𑁄 𑀆𑀧𑀢𑁆𑀢𑀺𑀁; 𑀆𑀧𑀢𑁆𑀢𑀺𑀁 𑀙𑀸𑀤𑁂𑀢𑀺, 𑀦𑁄 𑀯𑀢𑁆𑀣𑀼𑀁; 𑀯𑀢𑁆𑀣𑀼𑀜𑁆𑀘𑁂𑀯 𑀙𑀸𑀤𑁂𑀢𑀺 𑀆𑀧𑀢𑁆𑀢𑀺𑀜𑁆𑀘. 𑀢𑀺𑀲𑁆𑀲𑁄 𑀧𑀝𑀺𑀘𑁆𑀙𑀸𑀤𑀺𑀬𑁄 𑁋 𑀚𑀦𑁆𑀢𑀸𑀖𑀭𑀧𑀝𑀺𑀘𑁆𑀙𑀸𑀤𑀺, 𑀉𑀤𑀓𑀧𑀝𑀺𑀘𑁆𑀙𑀸𑀤𑀺, 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺. [𑀅. 𑀦𑀺. 𑁩.𑁧𑁩𑁨] 𑀢𑀻𑀡𑀺 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀳𑀦𑁆𑀢𑀺, 𑀦𑁄 𑀯𑀺𑀯𑀝𑀸𑀦𑀺 𑁋 𑀫𑀸𑀢𑀼𑀕𑀸𑀫𑁄 𑀧𑀝𑀺𑀘𑁆𑀙𑀦𑁆𑀦𑁄 𑀯𑀳𑀢𑀺, 𑀦𑁄 𑀯𑀺𑀯𑀝𑁄; 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀦𑁆𑀢𑀸 𑀧𑀝𑀺𑀘𑁆𑀙𑀦𑁆𑀦𑀸 𑀯𑀳𑀦𑁆𑀢𑀺, 𑀦𑁄 𑀯𑀺𑀯𑀝𑀸; 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀝𑀺𑀘𑁆𑀙𑀦𑁆𑀦𑀸 𑀯𑀳𑀢𑀺, 𑀦𑁄 𑀯𑀺𑀯𑀝𑀸. 𑀢𑀻𑀡𑀺 𑀯𑀺𑀯𑀝𑀸𑀦𑀺 𑀯𑀺𑀭𑁄𑀘𑀦𑁆𑀢𑀺, 𑀦𑁄 𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑁋 𑀘𑀦𑁆𑀤𑀫𑀡𑁆𑀟𑀮𑀁 𑀯𑀺𑀯𑀝𑀁 𑀯𑀺𑀭𑁄𑀘𑀢𑀺, 𑀦𑁄 𑀧𑀝𑀺𑀘𑁆𑀙𑀦𑁆𑀦𑀁; 𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀺𑀯𑀝𑀁 𑀯𑀺𑀭𑁄𑀘𑀢𑀺, 𑀦𑁄 𑀧𑀝𑀺𑀘𑁆𑀙𑀦𑁆𑀦𑀁; 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁄 𑀥𑀫𑁆𑀫𑀯𑀺𑀦𑀬𑁄 𑀯𑀺𑀯𑀝𑁄 𑀯𑀺𑀭𑁄𑀘𑀢𑀺, 𑀦𑁄 𑀧𑀝𑀺𑀘𑁆𑀙𑀦𑁆𑀦𑁄. 𑀢𑀬𑁄 𑀲𑁂𑀦𑀸𑀲𑀦𑀕𑁆𑀕𑀸𑀳𑀸 𑁋 𑀧𑀼𑀭𑀺𑀫𑀓𑁄, 𑀧𑀘𑁆𑀙𑀺𑀫𑀓𑁄, 𑀅𑀦𑁆𑀢𑀭𑀸𑀫𑀼𑀢𑁆𑀢𑀓𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀦𑁄 𑀅𑀕𑀺𑀮𑀸𑀦𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀦𑁄 𑀕𑀺𑀮𑀸𑀦𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀕𑀺𑀮𑀸𑀦𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀅𑀕𑀺𑀮𑀸𑀦𑁄 𑀘.
𑀢𑀻𑀡𑀺 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀢𑀬𑁄 𑀧𑀭𑀺𑀯𑀸𑀲𑀸 𑁋 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄. 𑀢𑀬𑁄 𑀫𑀸𑀦𑀢𑁆𑀢𑀸 𑁋 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁, 𑀧𑀓𑁆𑀔𑀫𑀸𑀦𑀢𑁆𑀢𑀁. 𑀢𑀬𑁄 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸 𑁋 𑀲𑀳𑀯𑀸𑀲𑁄, 𑀯𑀺𑀧𑁆𑀧𑀯𑀸𑀲𑁄, 𑀅𑀦𑀸𑀭𑁄𑀘𑀦𑀸. 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀦𑁄 𑀩𑀳𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀩𑀳𑀺 𑀆𑀧𑀚𑁆𑀚𑀢𑀺, 𑀦𑁄 𑀅𑀦𑁆𑀢𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀳𑀺 𑀘. 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀆𑀧𑀚𑁆𑀚𑀢𑀺, 𑀦𑁄 𑀩𑀳𑀺𑀲𑀻𑀫𑀸𑀬; 𑀅𑀢𑁆𑀣𑀸𑀧𑀢𑁆𑀢𑀺 𑀩𑀳𑀺𑀲𑀻𑀫𑀸𑀬 𑀆𑀧𑀚𑁆𑀚𑀢𑀺, 𑀦𑁄 𑀅𑀦𑁆𑀢𑁄𑀲𑀻𑀫𑀸𑀬; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀳𑀺𑀲𑀻𑀫𑀸𑀬 𑀘. 𑀢𑀻𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑁋 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺, 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑁋 𑀲𑀗𑁆𑀖𑀫𑀚𑁆𑀛𑁂, 𑀕𑀡𑀫𑀚𑁆𑀛𑁂, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂. 𑀢𑀻𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀢𑀺 𑁋 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀺, 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀢𑀺 𑁋 𑀲𑀗𑁆𑀖𑀫𑀚𑁆𑀛𑁂, 𑀕𑀡𑀫𑀚𑁆𑀛𑁂, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂. 𑀢𑀻𑀡𑀺 𑀅𑀥𑀫𑁆𑀫𑀺𑀓𑀸𑀦𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀺. 𑀢𑀻𑀡𑀺 𑀥𑀫𑁆𑀫𑀺𑀓𑀸𑀦𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀺.
[𑀘𑀽𑀴𑀯. 𑁬] 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄, 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺. [𑀘𑀽𑀴𑀯. 𑁧𑁫] 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄, 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺. [𑀘𑀽𑀴𑀯. 𑁨𑁭] 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄, 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄 𑀓𑀼𑀮𑀤𑀽𑀓𑀓𑁄 𑀳𑁄𑀢𑀺 𑀧𑀸𑀧𑀲𑀫𑀸𑀘𑀸𑀭𑁄 𑀧𑀸𑀧𑀲𑀫𑀸𑀘𑀸𑀭𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄, 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀆𑀧𑀢𑁆𑀢𑀺 𑀩𑀳𑀼𑀮𑁄 𑀅𑀦𑀧𑀤𑀸𑀦𑁄 𑀕𑀺𑀳𑀻 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. [𑀘𑀽𑀴𑀯. 𑁫𑁦] 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄, 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀁. [𑀘𑀽𑀴𑀯. 𑁫𑁯] 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄, 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀦 𑀇𑀘𑁆𑀙𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀓𑀸𑀢𑀼𑀁. [𑀘𑀽𑀴𑀯. 𑁬𑁯] 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬 𑁋 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺…𑀧𑁂… 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄, 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄, 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄 𑀦 𑀇𑀘𑁆𑀙𑀢𑀺 𑀧𑀸𑀧𑀺𑀓𑀁 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀁.
𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀆𑀕𑀸𑀴𑁆𑀳𑀸𑀬 𑀘𑁂𑀢𑁂𑀬𑁆𑀬 𑁋 𑀪𑀡𑁆𑀟𑀦𑀓𑀸𑀭𑀓𑁄 𑀳𑁄𑀢𑀺 𑀓𑀮𑀳𑀓𑀸𑀭𑀓𑁄 𑀯𑀺𑀯𑀸𑀤𑀓𑀸𑀭𑀓𑁄 𑀪𑀲𑁆𑀲𑀓𑀸𑀭𑀓𑁄 𑀲𑀗𑁆𑀖𑁂 𑀅𑀥𑀺𑀓𑀭𑀡𑀓𑀸𑀭𑀓𑁄, 𑀩𑀸𑀮𑁄 𑀳𑁄𑀢𑀺 𑀅𑀩𑁆𑀬𑀢𑁆𑀢𑁄 𑀆𑀧𑀢𑁆𑀢𑀺𑀩𑀳𑀼𑀮𑁄 𑀅𑀦𑀧𑀤𑀸𑀦𑁄, 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀅𑀦𑀦𑀼𑀮𑁄𑀫𑀺𑀓𑁂𑀳𑀺 𑀕𑀺𑀳𑀺𑀲𑀁𑀲𑀕𑁆𑀕𑁂𑀳𑀺. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀓𑀸𑀬𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀤𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀓𑀸𑀬𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀅𑀦𑀸𑀘𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀓𑀸𑀬𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀉𑀧𑀖𑀸𑀢𑀺𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀓𑀸𑀬𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀓𑀫𑁆𑀫𑀓𑀢𑁄 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀦𑀺𑀲𑁆𑀲𑀬𑀁 𑀤𑁂𑀢𑀺, 𑀲𑀸𑀫𑀡𑁂𑀭𑀁 𑀉𑀧𑀝𑁆𑀞𑀸𑀧𑁂𑀢𑀺. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀬𑀸𑀬 𑀆𑀧𑀢𑁆𑀢𑀺𑀬𑀸 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺 𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀺𑀓𑀁, 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀁. 𑀅𑀧𑀭𑁂𑀳𑀺𑀧𑀺 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑁋 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺.
𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀫𑀚𑁆𑀛𑁂 𑀉𑀧𑁄𑀲𑀣𑀁 𑀞𑀧𑁂𑀦𑁆𑀢𑀲𑁆𑀲 𑁋 ‘‘𑀅𑀮𑀁, 𑀪𑀺𑀓𑁆𑀔𑀼, 𑀫𑀸 𑀪𑀡𑁆𑀟𑀦𑀁 𑀫𑀸 𑀓𑀮𑀳𑀁 𑀫𑀸 𑀯𑀺𑀕𑁆𑀕𑀳𑀁 𑀫𑀸 𑀯𑀺𑀯𑀸𑀤’’𑀦𑁆𑀢𑀺 𑀑𑀫𑀤𑁆𑀤𑀺𑀢𑁆𑀯𑀸 𑀲𑀗𑁆𑀖𑁂𑀦 𑀉𑀧𑁄𑀲𑀣𑁄 𑀓𑀸𑀢𑀩𑁆𑀩𑁄 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀗𑁆𑀖𑀫𑀚𑁆𑀛𑁂 𑀧𑀯𑀸𑀭𑀡𑀁 𑀞𑀧𑁂𑀦𑁆𑀢𑀲𑁆𑀲 𑁋 ‘‘𑀅𑀮𑀁, 𑀪𑀺𑀓𑁆𑀔𑀼, 𑀫𑀸 𑀪𑀡𑁆𑀟𑀦𑀁 𑀫𑀸 𑀓𑀮𑀳𑀁 𑀫𑀸 𑀯𑀺𑀕𑁆𑀕𑀳𑀁 𑀫𑀸 𑀯𑀺𑀯𑀸𑀤’’𑀦𑁆𑀢𑀺 𑀑𑀫𑀤𑁆𑀤𑀺𑀢𑁆𑀯𑀸 𑀲𑀗𑁆𑀖𑁂𑀦 𑀧𑀯𑀸𑀭𑁂𑀢𑀩𑁆𑀩𑀁 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦 𑀓𑀸𑀘𑀺 𑀲𑀗𑁆𑀖𑀲𑀫𑁆𑀫𑀼𑀢𑀺 𑀤𑀸𑀢𑀩𑁆𑀩𑀸 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑁂 𑀦 𑀯𑁄𑀳𑀭𑀺𑀢𑀩𑁆𑀩𑀁 [𑀲𑀁𑀖𑁄 𑀦 𑀯𑁄𑀳𑀭𑀺𑀢𑀩𑁆𑀩𑁄 (𑀲𑁆𑀬𑀸.)] 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀦 𑀓𑀺𑀲𑁆𑀫𑀺𑀁 𑀘𑀺 𑀧𑀘𑁆𑀘𑁂𑀓𑀝𑁆𑀞𑀸𑀦𑁂 𑀞𑀧𑁂𑀢𑀩𑁆𑀩𑁄 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀸𑀬 𑀦 𑀯𑀢𑁆𑀣𑀩𑁆𑀩𑀁 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀬𑁄 𑀦 𑀤𑀸𑀢𑀩𑁆𑀩𑁄 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀑𑀓𑀸𑀲𑀓𑀫𑁆𑀫𑀁 𑀓𑀸𑀭𑀸𑀧𑁂𑀦𑁆𑀢𑀲𑁆𑀲 𑀦𑀸𑀮𑀁 𑀑𑀓𑀸𑀲𑀓𑀫𑁆𑀫𑀁 𑀓𑀸𑀢𑀼𑀁 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀯𑀘𑀦𑀻𑀬𑀁 𑀦𑀸𑀤𑀸𑀢𑀩𑁆𑀩𑀁 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀦𑀬𑁄 𑀦 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑁄 𑀦 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀦𑀬𑁄 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑁄 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀬𑁄𑀕𑁄 𑀦 𑀤𑀸𑀢𑀩𑁆𑀩𑁄 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀯𑀺𑀦𑀬𑁄 𑀦 𑀲𑀸𑀓𑀘𑁆𑀙𑀺𑀢𑀩𑁆𑀩𑁄 [𑀲𑀸𑀓𑀘𑁆𑀙𑀸𑀢𑀩𑁆𑀩𑁄 (𑀓.)] 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘. 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀦 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 𑀦 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑁋 𑀅𑀮𑀚𑁆𑀚𑀻 𑀘 𑀳𑁄𑀢𑀺, 𑀩𑀸𑀮𑁄 𑀘, 𑀅𑀧𑀓𑀢𑀢𑁆𑀢𑁄 𑀘.
𑀢𑀬𑁄 𑀉𑀧𑁄𑀲𑀣𑀸 𑁋 𑀘𑀸𑀢𑀼𑀤𑁆𑀤𑀲𑀺𑀓𑁄, 𑀧𑀦𑁆𑀦𑀭𑀲𑀺𑀓𑁄, 𑀲𑀸𑀫𑀕𑁆𑀕𑀺𑀉𑀧𑁄𑀲𑀣𑁄. 𑀅𑀧𑀭𑁂𑀧𑀺 𑀢𑀬𑁄 𑀉𑀧𑁄𑀲𑀣𑀸 𑁋 𑀲𑀗𑁆𑀖𑁂𑀉𑀧𑁄𑀲𑀣𑁄, 𑀕𑀡𑁂𑀉𑀧𑁄𑀲𑀣𑁄, 𑀧𑀼𑀕𑁆𑀕𑀮𑁂𑀉𑀧𑁄𑀲𑀣𑁄. 𑀅𑀧𑀭𑁂𑀧𑀺 𑀢𑀬𑁄 𑀉𑀧𑁄𑀲𑀣𑀸 𑁋 𑀲𑀼𑀢𑁆𑀢𑀼𑀤𑁆𑀤𑁂𑀲𑁄𑀉𑀧𑁄𑀲𑀣𑁄, 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄, 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑁄. 𑀢𑀺𑀲𑁆𑀲𑁄 𑀧𑀯𑀸𑀭𑀡𑀸 𑁋 𑀘𑀸𑀢𑀼𑀤𑁆𑀤𑀲𑀺𑀓𑀸, 𑀧𑀦𑁆𑀦𑀭𑀲𑀺𑀓𑀸, 𑀲𑀸𑀫𑀕𑁆𑀕𑀺𑀧𑀯𑀸𑀭𑀡𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀯𑀸𑀭𑀡𑀸 𑁋 𑀲𑀗𑁆𑀖𑁂𑀧𑀯𑀸𑀭𑀡𑀸, 𑀕𑀡𑁂𑀧𑀯𑀸𑀭𑀡𑀸, 𑀧𑀼𑀕𑁆𑀕𑀮𑁂𑀧𑀯𑀸𑀭𑀡𑀸. 𑀅𑀧𑀭𑀸𑀧𑀺 𑀢𑀺𑀲𑁆𑀲𑁄 𑀧𑀯𑀸𑀭𑀡𑀸 𑁋 𑀢𑁂𑀯𑀸𑀘𑀺𑀓𑀸𑀧𑀯𑀸𑀭𑀡𑀸, 𑀤𑁆𑀯𑁂𑀯𑀸𑀘𑀺𑀓𑀸𑀧𑀯𑀸𑀭𑀡𑀸, 𑀲𑀫𑀸𑀦𑀯𑀲𑁆𑀲𑀺𑀓𑀸𑀧𑀯𑀸𑀭𑀡𑀸.
𑀢𑀬𑁄 𑀆𑀧𑀸𑀬𑀺𑀓𑀸 𑀦𑁂𑀭𑀬𑀺𑀓𑀸 𑁋 𑀇𑀤𑀫𑀧𑁆𑀧𑀳𑀸𑀬, 𑀬𑁄 𑀘 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄, 𑀬𑁄 𑀘 𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀭𑀺𑀲𑀼𑀤𑁆𑀥𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀁 𑀅𑀫𑀽𑀮𑀓𑁂𑀦 𑀅𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀺, 𑀬𑁄 𑀘𑀸𑀬𑀁 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀺 [𑀏𑀯𑀁𑀤𑀺𑀝𑁆𑀞𑀻 (𑀲𑀻.)] 𑁋 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺 𑀲𑁄 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀢𑀺. [𑀅. 𑀦𑀺. 𑁩.𑁭𑁦] 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑁋 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁, 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁, 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮𑀁. [𑀅. 𑀦𑀺. 𑁩.𑁭𑁦] 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑁋 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁, 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁, 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁. 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑁋 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑁋 𑀓𑀸𑀬𑀲𑀼𑀘𑀭𑀺𑀢𑀁, 𑀯𑀘𑀻𑀲𑀼𑀘𑀭𑀺𑀢𑀁, 𑀫𑀦𑁄𑀲𑀼𑀘𑀭𑀺𑀢𑀁. 𑀢𑀬𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀪𑀕𑀯𑀢𑀸 𑀓𑀼𑀮𑁂𑀲𑀼 𑀢𑀺𑀓𑀪𑁄𑀚𑀦𑀁 𑀧𑀜𑁆𑀜𑀢𑁆𑀢𑀁 𑁋 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, ‘‘𑀫𑀸 𑀧𑀸𑀧𑀺𑀘𑁆𑀙𑀸 𑀧𑀓𑁆𑀔𑀁 𑀦𑀺𑀲𑁆𑀲𑀸𑀬 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀼’’𑀦𑁆𑀢𑀺 𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀬 𑀘. [𑀘𑀽𑀴𑀯. 𑁩𑁫𑁦] 𑀢𑀻𑀳𑀺 𑀅𑀲𑀤𑁆𑀥𑀫𑁆𑀫𑁂𑀳𑀺 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀤𑁂𑀯𑀤𑀢𑁆𑀢𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀓𑀧𑁆𑀧𑀝𑁆𑀞𑁄 𑀅𑀢𑁂𑀓𑀺𑀘𑁆𑀙𑁄 𑀧𑀸𑀧𑀺𑀘𑁆𑀙𑀢𑀸 𑀧𑀸𑀧𑀫𑀺𑀢𑁆𑀢𑀢𑀸 𑀑𑀭𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀆𑀧𑀸𑀤𑀺. 𑀢𑀺𑀲𑁆𑀲𑁄 𑀲𑀫𑁆𑀫𑀼𑀢𑀺𑀬𑁄 𑁋 𑀤𑀡𑁆𑀟𑀲𑀫𑁆𑀫𑀼𑀢𑀺, 𑀲𑀺𑀓𑁆𑀓𑀸𑀲𑀫𑁆𑀫𑀼𑀢𑀺, 𑀤𑀡𑁆𑀟𑀲𑀺𑀓𑁆𑀓𑀸𑀲𑀫𑁆𑀫𑀼𑀢𑀺. 𑀢𑀺𑀲𑁆𑀲𑁄 𑀧𑀸𑀤𑀼𑀓𑀸 𑀥𑀼𑀯𑀝𑁆𑀞𑀸𑀦𑀺𑀓𑀸 𑀅𑀲𑀗𑁆𑀓𑀫𑀦𑀻𑀬𑀸 𑁋 𑀯𑀘𑁆𑀘𑀧𑀸𑀤𑀼𑀓𑀸, 𑀧𑀲𑁆𑀲𑀸𑀯𑀧𑀸𑀤𑀼𑀓𑀸, 𑀆𑀘𑀫𑀦𑀧𑀸𑀤𑀼𑀓𑀸. 𑀢𑀺𑀲𑁆𑀲𑁄 𑀧𑀸𑀤𑀖𑀁𑀲𑀦𑀺𑀬𑁄 𑁋 𑀲𑀓𑁆𑀔𑀭𑀁, 𑀓𑀣𑀮𑀸, 𑀲𑀫𑀼𑀤𑁆𑀤𑀨𑁂𑀡𑀓𑁄𑀢𑀺.
𑀢𑀺𑀓𑀁 𑀦𑀺𑀝𑁆𑀞𑀺𑀢𑀁.
𑀢𑀲𑁆𑀲𑀼𑀤𑁆𑀤𑀸𑀦𑀁 𑁋
𑀢𑀺𑀝𑁆𑀞𑀦𑁆𑀢𑁂 𑀓𑀸𑀮𑁂 𑀭𑀢𑁆𑀢𑀺𑀜𑁆𑀘, 𑀤𑀲 𑀧𑀜𑁆𑀘 𑀓𑀼𑀲𑀮𑁂𑀦;
𑀯𑁂𑀤𑀦𑀸 𑀘𑁄𑀤𑀦𑀸 𑀯𑀢𑁆𑀣𑀼, 𑀲𑀮𑀸𑀓𑀸 𑀤𑁆𑀯𑁂 𑀧𑀝𑀺𑀓𑁆𑀔𑀺𑀧𑀸.
𑀧𑀜𑁆𑀜𑀢𑁆𑀢𑀺 𑀅𑀧𑀭𑁂 𑀤𑁆𑀯𑁂 𑀘, 𑀩𑀸𑀮𑁄 𑀓𑀸𑀴𑁂 𑀘 𑀓𑀧𑁆𑀧𑀢𑀺;
𑀳𑁂𑀫𑀦𑁆𑀢𑁂 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲, 𑀙𑀸𑀤𑀦𑀸 𑀘 𑀧𑀝𑀺𑀘𑁆𑀙𑀸𑀤𑀺.
𑀧𑀝𑀺𑀘𑁆𑀙𑀦𑁆𑀦𑀸 𑀯𑀺𑀯𑀝𑀸 𑀘, 𑀲𑁂𑀦𑀸𑀲𑀦𑀕𑀺𑀮𑀸𑀬𑀦𑀸;
𑀧𑀸𑀢𑀺𑀫𑁄𑀓𑁆𑀔𑀁 𑀧𑀭𑀺𑀯𑀸𑀲𑀁, 𑀫𑀸𑀦𑀢𑁆𑀢𑀸 𑀧𑀸𑀭𑀺𑀯𑀸𑀲𑀺𑀓𑀸.
𑀅𑀦𑁆𑀢𑁄 𑀅𑀦𑁆𑀢𑁄 𑀘 𑀲𑀻𑀫𑀸𑀬, 𑀆𑀧𑀚𑁆𑀚𑀢𑀺 𑀧𑀼𑀦𑀸𑀧𑀭𑁂;
𑀯𑀼𑀝𑁆𑀞𑀸𑀢𑀺 𑀅𑀧𑀭𑁂 𑀘𑁂𑀯, 𑀅𑀫𑀽𑀴𑁆𑀳𑀯𑀺𑀦𑀬𑀸 𑀤𑀼𑀯𑁂.
𑀢𑀚𑁆𑀚𑀦𑀻𑀬𑀸 𑀦𑀺𑀬𑀲𑁆𑀲𑀸 𑀘, 𑀧𑀩𑁆𑀩𑀸𑀚𑀧𑀝𑀺𑀲𑀸𑀭𑀡𑀻;
𑀅𑀤𑀲𑁆𑀲𑀦𑀸 𑀧𑀝𑀺𑀓𑀫𑁆𑀫𑁂, 𑀅𑀦𑀺𑀲𑁆𑀲𑀕𑁆𑀕𑁂 𑀘 𑀤𑀺𑀝𑁆𑀞𑀺𑀬𑀸.
𑀆𑀕𑀸𑀴𑁆𑀳𑀓𑀫𑁆𑀫𑀸𑀥𑀺𑀲𑀻𑀮𑁂, 𑀤𑀯𑀸𑀦𑀸𑀘𑀸𑀭 𑀖𑀸𑀢𑀺𑀓𑀸;
𑀆𑀚𑀻𑀯𑀸𑀧𑀦𑁆𑀦𑀸 𑀢𑀸𑀤𑀺𑀲𑀺𑀓𑀸, 𑀅𑀯𑀡𑁆𑀡𑀼𑀧𑁄𑀲𑀣𑁂𑀦 𑀘.
𑀧𑀯𑀸𑀭𑀡𑀸 𑀲𑀫𑁆𑀫𑀼𑀢𑀺 𑀘, 𑀯𑁄𑀳𑀸𑀭𑀧𑀘𑁆𑀘𑁂𑀓𑁂𑀦 𑀘;
𑀦 𑀯𑀢𑁆𑀣𑀩𑁆𑀩𑀁 𑀦 𑀤𑀸𑀢𑀩𑁆𑀩𑀁, 𑀑𑀓𑀸𑀲𑀁 𑀦 𑀓𑀭𑁂 𑀢𑀣𑀸.
𑀦 𑀓𑀭𑁂 𑀲𑀯𑀘𑀦𑀻𑀬𑀁, 𑀦 𑀧𑀼𑀘𑁆𑀙𑀺𑀢𑀩𑁆𑀩𑀓𑀸 𑀤𑀼𑀯𑁂;
𑀦 𑀯𑀺𑀲𑁆𑀲𑀚𑁆𑀚𑁂 𑀤𑀼𑀯𑁂 𑀘𑁂𑀯, 𑀅𑀦𑀼𑀬𑁄𑀕𑀫𑁆𑀧𑀺 𑀦𑁄 𑀤𑀤𑁂.
𑀲𑀸𑀓𑀘𑁆𑀙𑀸 𑀉𑀧𑀲𑀫𑁆𑀧𑀤𑀸, 𑀦𑀺𑀲𑁆𑀲𑀬𑀲𑀸𑀫𑀡𑁂𑀭𑀸 𑀘;
𑀉𑀧𑁄𑀲𑀣𑀢𑀺𑀓𑀸 𑀢𑀻𑀡𑀺, 𑀧𑀯𑀸𑀭𑀡𑀢𑀺𑀓𑀸 𑀢𑀬𑁄.
𑀆𑀧𑀸𑀬𑀺𑀓𑀸 𑀅𑀓𑀼𑀲𑀮𑀸, 𑀓𑀼𑀲𑀮𑀸 𑀘𑀭𑀺𑀢𑀸 𑀤𑀼𑀯𑁂;
𑀢𑀺𑀓𑀪𑁄𑀚𑀦𑀲𑀤𑁆𑀥𑀫𑁆𑀫𑁂, 𑀲𑀫𑁆𑀫𑀼𑀢𑀺 𑀧𑀸𑀤𑀼𑀓𑁂𑀦 𑀘;
𑀧𑀸𑀤𑀖𑀁𑀲𑀦𑀺𑀓𑀸 𑀘𑁂𑀯, 𑀉𑀤𑁆𑀤𑀸𑀦𑀁 𑀢𑀺𑀓𑀓𑁂 𑀇𑀤𑀦𑁆𑀢𑀺.
𑁪. 𑀘𑀢𑀼𑀓𑁆𑀓𑀯𑀸𑀭𑁄
𑁩𑁨𑁪. 𑀅𑀢𑁆𑀣𑀸𑀧𑀢𑁆𑀢𑀺 𑀲𑀓𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀧𑀭𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀭𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀲𑀓𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀲𑀓𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀭𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀧𑀭𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺, 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺, 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀧𑀲𑀼𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀧𑀝𑀺𑀩𑀼𑀤𑁆𑀥𑁄 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀝𑀺𑀩𑀼𑀤𑁆𑀥𑁄 𑀆𑀧𑀚𑁆𑀚𑀢𑀺, 𑀧𑀲𑀼𑀢𑁆𑀢𑁄 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀲𑀼𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀧𑀲𑀼𑀢𑁆𑀢𑁄 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀝𑀺𑀩𑀼𑀤𑁆𑀥𑁄 𑀆𑀧𑀚𑁆𑀚𑀢𑀺, 𑀧𑀝𑀺𑀩𑀼𑀤𑁆𑀥𑁄 𑀯𑀼𑀝𑁆𑀞𑀸𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀅𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺, 𑀲𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀲𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺, 𑀅𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺, 𑀅𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀲𑀘𑀺𑀢𑁆𑀢𑀓𑁄 𑀆𑀧𑀚𑁆𑀚𑀢𑀺, 𑀲𑀘𑀺𑀢𑁆𑀢𑀓𑁄 𑀯𑀼𑀝𑁆𑀞𑀸𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀆𑀧𑀚𑁆𑀚𑀦𑁆𑀢𑁄 𑀤𑁂𑀲𑁂𑀢𑀺; 𑀤𑁂𑀲𑁂𑀦𑁆𑀢𑁄 𑀆𑀧𑀚𑁆𑀚𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀆𑀧𑀚𑁆𑀚𑀦𑁆𑀢𑁄 𑀯𑀼𑀝𑁆𑀞𑀸𑀢𑀺; 𑀯𑀼𑀝𑁆𑀞𑀳𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺, 𑀅𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺, 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺, 𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀓𑀫𑁆𑀫𑁂𑀦 𑀆𑀧𑀚𑁆𑀚𑀢𑀺, 𑀅𑀓𑀫𑁆𑀫𑁂𑀦 𑀯𑀼𑀝𑁆𑀞𑀸𑀢𑀺.
[𑀅. 𑀦𑀺. 𑁪.𑁨𑁫𑁦; 𑀤𑀻. 𑀦𑀺. 𑁩.𑁩𑁧𑁩; 𑀯𑀺𑀪. 𑁯𑁩𑁯] 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸 𑁋 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀺𑀢𑀸, 𑀅𑀲𑁆𑀲𑀼𑀢𑁂 𑀲𑀼𑀢𑀯𑀸𑀤𑀺𑀢𑀸, 𑀅𑀫𑀼𑀢𑁂 𑀫𑀼𑀢𑀯𑀸𑀤𑀺𑀢𑀸, 𑀅𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀯𑀸𑀤𑀺𑀢𑀸. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑁄𑀳𑀸𑀭𑀸 𑁋 𑀅𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀯𑀸𑀤𑀺𑀢𑀸, 𑀅𑀲𑁆𑀲𑀼𑀢𑁂 𑀅𑀲𑁆𑀲𑀼𑀢𑀯𑀸𑀤𑀺𑀢𑀸, 𑀅𑀫𑀼𑀢𑁂 𑀅𑀫𑀼𑀢𑀯𑀸𑀤𑀺𑀢𑀸, 𑀅𑀯𑀺𑀜𑁆𑀜𑀸𑀢𑁂 𑀅𑀯𑀺𑀜𑁆𑀜𑀸𑀢𑀯𑀸𑀤𑀺𑀢𑀸. 𑀅𑀧𑀭𑁂𑀧𑀺 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸 𑁋 𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑀯𑀸𑀤𑀺𑀢𑀸, 𑀲𑀼𑀢𑁂 𑀅𑀲𑁆𑀲𑀼𑀢𑀯𑀸𑀤𑀺𑀢𑀸, 𑀫𑀼𑀢𑁂 𑀅𑀫𑀼𑀢𑀯𑀸𑀤𑀺𑀢𑀸, 𑀯𑀺𑀜𑁆𑀜𑀸𑀢𑁂 𑀅𑀯𑀺𑀜𑁆𑀜𑀸𑀢𑀯𑀸𑀤𑀺𑀢𑀸. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑁄𑀳𑀸𑀭𑀸 𑁋 𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀺𑀢𑀸, 𑀲𑀼𑀢𑁂 𑀲𑀼𑀢𑀯𑀸𑀤𑀺𑀢𑀸, 𑀫𑀼𑀢𑁂 𑀫𑀼𑀢𑀯𑀸𑀤𑀺𑀢𑀸, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀯𑀸𑀤𑀺𑀢𑀸.
𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀲𑀸𑀥𑀸𑀭𑀡𑀸; 𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸. 𑀘𑀢𑁆𑀢𑀸𑀭𑁄 𑀧𑀭𑀺𑀓𑁆𑀔𑀸𑀭𑀸 𑁋 𑀅𑀢𑁆𑀣𑀺 𑀧𑀭𑀺𑀓𑁆𑀔𑀸𑀭𑁄 𑀭𑀓𑁆𑀔𑀺𑀢𑀩𑁆𑀩𑁄 𑀕𑁄𑀧𑁂𑀢𑀩𑁆𑀩𑁄 𑀫𑀫𑀸𑀬𑀺𑀢𑀩𑁆𑀩𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄; 𑀅𑀢𑁆𑀣𑀺 𑀧𑀭𑀺𑀓𑁆𑀔𑀸𑀭𑁄 𑀭𑀓𑁆𑀔𑀺𑀢𑀩𑁆𑀩𑁄 𑀕𑁄𑀧𑁂𑀢𑀩𑁆𑀩𑁄 𑀫𑀫𑀸𑀬𑀺𑀢𑀩𑁆𑀩𑁄, 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄; 𑀅𑀢𑁆𑀣𑀺 𑀧𑀭𑀺𑀓𑁆𑀔𑀸𑀭𑁄 𑀭𑀓𑁆𑀔𑀺𑀢𑀩𑁆𑀩𑁄 𑀕𑁄𑀧𑁂𑀢𑀩𑁆𑀩𑁄, 𑀦 𑀫𑀫𑀸𑀬𑀺𑀢𑀩𑁆𑀩𑁄 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄; 𑀅𑀢𑁆𑀣𑀺 𑀧𑀭𑀺𑀓𑁆𑀔𑀸𑀭𑁄 𑀦 𑀭𑀓𑁆𑀔𑀺𑀢𑀩𑁆𑀩𑁄 𑀦 𑀕𑁄𑀧𑁂𑀢𑀩𑁆𑀩𑁄, 𑀦 𑀫𑀫𑀸𑀬𑀺𑀢𑀩𑁆𑀩𑁄 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀲𑀫𑁆𑀫𑀼𑀔𑀸 𑀆𑀧𑀚𑁆𑀚𑀢𑀺, 𑀧𑀭𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀭𑀫𑁆𑀫𑀼𑀔𑀸 𑀆𑀧𑀚𑁆𑀚𑀢𑀺, 𑀲𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀲𑀫𑁆𑀫𑀼𑀔𑀸 𑀆𑀧𑀚𑁆𑀚𑀢𑀺, 𑀲𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀭𑀫𑁆𑀫𑀼𑀔𑀸 𑀆𑀧𑀚𑁆𑀚𑀢𑀺, 𑀧𑀭𑀫𑁆𑀫𑀼𑀔𑀸 𑀯𑀼𑀝𑁆𑀞𑀸𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀚𑀸𑀦𑀦𑁆𑀢𑁄 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀚𑀸𑀦𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀚𑀸𑀦𑀦𑁆𑀢𑁄 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀅𑀚𑀸𑀦𑀦𑁆𑀢𑁄 𑀯𑀼𑀝𑁆𑀞𑀸𑀢𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀚𑀸𑀦𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀚𑀸𑀦𑀦𑁆𑀢𑁄 𑀯𑀼𑀝𑁆𑀞𑀸𑀢𑀺.
𑀘𑀢𑀽𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑁋 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺, 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀺. 𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑁋 𑀲𑀗𑁆𑀖𑀫𑀚𑁆𑀛𑁂, 𑀕𑀡𑀫𑀚𑁆𑀛𑁂, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂, 𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦. 𑀘𑀢𑀽𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀢𑀺 𑁋 𑀓𑀸𑀬𑁂𑀦 𑀯𑀼𑀝𑁆𑀞𑀸𑀢𑀺, 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺, 𑀓𑀫𑁆𑀫𑀯𑀸𑀘𑀸𑀬 𑀯𑀼𑀝𑁆𑀞𑀸𑀢𑀺. 𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀢𑀺 𑁋 𑀲𑀗𑁆𑀖𑀫𑀚𑁆𑀛𑁂, 𑀕𑀡𑀫𑀚𑁆𑀛𑁂, 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂, 𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦. 𑀲𑀳 𑀧𑀝𑀺𑀮𑀸𑀪𑁂𑀦 𑀧𑀼𑀭𑀺𑀫𑀁 𑀚𑀳𑀢𑀺, 𑀧𑀘𑁆𑀙𑀺𑀫𑁂 𑀧𑀢𑀺𑀝𑁆𑀞𑀸𑀢𑀺, 𑀯𑀺𑀜𑁆𑀜𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀧𑀡𑁆𑀡𑀢𑁆𑀢𑀺𑀬𑁄 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀲𑀳 𑀧𑀝𑀺𑀮𑀸𑀪𑁂𑀦 𑀧𑀘𑁆𑀙𑀺𑀫𑀁 𑀚𑀳𑀢𑀺, 𑀧𑀼𑀭𑀺𑀫𑁂 𑀧𑀢𑀺𑀝𑁆𑀞𑀸𑀢𑀺, 𑀯𑀺𑀜𑁆𑀜𑀢𑁆𑀢𑀺𑀬𑁄 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀧𑀡𑁆𑀡𑀢𑁆𑀢𑀺𑀬𑁄 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀘𑀢𑀲𑁆𑀲𑁄 𑀘𑁄𑀤𑀦𑀸 𑁋 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀺, 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀘𑁄𑀤𑁂𑀢𑀺. 𑀘𑀢𑁆𑀢𑀸𑀭𑁄 𑀧𑀭𑀺𑀯𑀸𑀲𑀸 𑁋 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑁄, 𑀲𑀼𑀤𑁆𑀥𑀦𑁆𑀢𑀧𑀭𑀺𑀯𑀸𑀲𑁄, 𑀲𑀫𑁄𑀥𑀸𑀦𑀧𑀭𑀺𑀯𑀸𑀲𑁄. 𑀘𑀢𑁆𑀢𑀸𑀭𑁄 𑀫𑀸𑀦𑀢𑁆𑀢𑀸 𑁋 𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁, 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀫𑀸𑀦𑀢𑁆𑀢𑀁, 𑀧𑀓𑁆𑀔𑀫𑀸𑀦𑀢𑁆𑀢𑀁, 𑀲𑀫𑁄𑀥𑀸𑀦𑀫𑀸𑀦𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀫𑀸𑀦𑀢𑁆𑀢𑀘𑀸𑀭𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑀢𑁆𑀢𑀺𑀘𑁆𑀙𑁂𑀤𑀸 𑁋 𑀲𑀳𑀯𑀸𑀲𑁄, 𑀯𑀺𑀧𑁆𑀧𑀯𑀸𑀲𑁄, 𑀅𑀦𑀸𑀭𑁄𑀘𑀦𑀸, 𑀊𑀦𑁂 𑀕𑀡𑁂 𑀘𑀭𑀢𑀺. 𑀘𑀢𑁆𑀢𑀸𑀭𑁄 𑀲𑀸𑀫𑀼𑀓𑁆𑀓𑀁𑀲𑀸. 𑀘𑀢𑁆𑀢𑀸𑀭𑁄 𑀧𑀝𑀺𑀕𑁆𑀕𑀳𑀺𑀢𑀧𑀭𑀺𑀪𑁄𑀕𑀸 𑁋 𑀬𑀸𑀯𑀓𑀸𑀮𑀺𑀓𑀁, 𑀬𑀸𑀫𑀓𑀸𑀮𑀺𑀓𑀁, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀬𑀸𑀯𑀚𑀻𑀯𑀺𑀓𑀁. 𑀘𑀢𑁆𑀢𑀸𑀭𑀺 𑀫𑀳𑀸𑀯𑀺𑀓𑀝𑀸𑀦𑀺 𑁋 𑀕𑀽𑀣𑁄, 𑀫𑀼𑀢𑁆𑀢𑀁, 𑀙𑀸𑀭𑀺𑀓𑀸, 𑀫𑀢𑁆𑀢𑀺𑀓𑀸. 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁. 𑀅𑀧𑀭𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑁋 𑀅𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀅𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀯𑀕𑁆𑀕𑀓𑀫𑁆𑀫𑀁, 𑀥𑀫𑁆𑀫𑁂𑀦 𑀲𑀫𑀕𑁆𑀕𑀓𑀫𑁆𑀫𑀁. 𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑁋 𑀲𑀻𑀮𑀯𑀺𑀧𑀢𑁆𑀢𑀺, 𑀆𑀘𑀸𑀭𑀯𑀺𑀧𑀢𑁆𑀢𑀺, 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺, 𑀆𑀚𑀻𑀯𑀯𑀺𑀧𑀢𑁆𑀢𑀺. 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑁋 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀁. [𑀅. 𑀦𑀺. 𑁪.𑁨𑁧𑁧] 𑀘𑀢𑁆𑀢𑀸𑀭𑁄 𑀧𑀭𑀺𑀲𑀤𑀽𑀲𑀦𑀸 𑁋 𑀪𑀺𑀓𑁆𑀔𑀼 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀧𑀭𑀺𑀲𑀤𑀽𑀲𑀦𑁄, 𑀪𑀺𑀓𑁆𑀔𑀼𑀦𑀻 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀧𑀭𑀺𑀲𑀤𑀽𑀲𑀦𑀸, 𑀉𑀧𑀸𑀲𑀓𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 𑀧𑀭𑀺𑀲𑀤𑀽𑀲𑀦𑁄, 𑀉𑀧𑀸𑀲𑀺𑀓𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀧𑀭𑀺𑀲𑀤𑀽𑀲𑀦𑀸. 𑀘𑀢𑁆𑀢𑀸𑀭𑁄 𑀧𑀭𑀺𑀲𑀲𑁄𑀪𑀦𑀸 [𑀧𑀭𑀺𑀲𑀲𑁄𑀪𑀡𑀸 (𑀲𑁆𑀬𑀸. 𑀓.)] 𑁋 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀧𑀭𑀺𑀲𑀲𑁄𑀪𑀦𑁄, 𑀪𑀺𑀓𑁆𑀔𑀼𑀦𑀻 𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀭𑀺𑀲𑀲𑁄𑀪𑀦𑀸, 𑀉𑀧𑀸𑀲𑀓𑁄 𑀲𑀻𑀮𑀯𑀸 𑀓𑀮𑁆𑀬𑀸𑀡𑀥𑀫𑁆𑀫𑁄 𑀧𑀭𑀺𑀲𑀲𑁄𑀪𑀦𑁄, 𑀉𑀧𑀸𑀲𑀺𑀓𑀸 𑀲𑀻𑀮𑀯𑀢𑀻 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀭𑀺𑀲𑀲𑁄𑀪𑀦𑀸.
𑀅𑀢𑁆𑀣𑀸𑀧𑀢𑁆𑀢𑀺 𑀆𑀕𑀦𑁆𑀢𑀼𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀯𑀸𑀲𑀺𑀓𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀆𑀯𑀸𑀲𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀕𑀦𑁆𑀢𑀼𑀓𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀆𑀕𑀦𑁆𑀢𑀼𑀓𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀆𑀯𑀸𑀲𑀺𑀓𑁄 𑀘 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀆𑀕𑀦𑁆𑀢𑀼𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀯𑀸𑀲𑀺𑀓𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀕𑀫𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀆𑀯𑀸𑀲𑀺𑀓𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀆𑀯𑀸𑀲𑀺𑀓𑁄 𑀆𑀧𑀚𑁆𑀚𑀢𑀺, 𑀦𑁄 𑀕𑀫𑀺𑀓𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀕𑀫𑀺𑀓𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀆𑀯𑀸𑀲𑀺𑀓𑁄 𑀘; 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀕𑀫𑀺𑀓𑁄 𑀆𑀧𑀚𑁆𑀚𑀢𑀺 𑀦𑁄 𑀆𑀯𑀸𑀲𑀺𑀓𑁄. 𑀅𑀢𑁆𑀣𑀺 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸 𑀦𑁄 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸, 𑀅𑀢𑁆𑀣𑀺 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸 𑀦𑁄 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸, 𑀅𑀢𑁆𑀣𑀺 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸 𑀘𑁂𑀯 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸 𑀘, 𑀅𑀢𑁆𑀣𑀺 𑀦𑁂𑀯 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸 𑀦𑁄 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸. 𑀅𑀢𑁆𑀣𑀺 𑀯𑀢𑁆𑀣𑀼𑀲𑀪𑀸𑀕𑀢𑀸 𑀦𑁄 𑀆𑀧𑀢𑁆𑀢𑀺𑀲𑀪𑀸𑀕𑀢𑀸, 𑀅𑀢𑁆𑀣𑀺 𑀆𑀧𑀢𑁆𑀢𑀺𑀲𑀪𑀸𑀕𑀢𑀸 𑀦𑁄 𑀯𑀢𑁆𑀣𑀼𑀲𑀪𑀸𑀕𑀢𑀸, 𑀅𑀢𑁆𑀣𑀺 𑀯𑀢𑁆𑀣𑀼𑀲𑀪𑀸𑀕𑀢𑀸 𑀘𑁂𑀯 𑀆𑀧𑀢𑁆𑀢𑀺𑀲𑀪𑀸𑀕𑀢𑀸 𑀘 𑀅𑀢𑁆𑀣𑀺 𑀦𑁂𑀯 𑀯𑀢𑁆𑀣𑀼𑀲𑀪𑀸𑀕𑀢𑀸 𑀦𑁄 𑀆𑀧𑀢𑁆𑀢𑀺𑀲𑀪𑀸𑀕𑀢𑀸. 𑀅𑀢𑁆𑀣𑀸𑀧𑀢𑁆𑀢𑀺 𑀉𑀧𑀚𑁆𑀛𑀸𑀬𑁄 𑀆𑀧𑀚𑁆𑀚𑀢𑀺 𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄, 𑀅𑀢𑁆𑀣𑀸𑀧𑀢𑁆𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀆𑀧𑀚𑁆𑀚𑀢𑀺 𑀦𑁄 𑀉𑀧𑀚𑁆𑀛𑀸𑀬𑁄, 𑀅𑀢𑁆𑀣𑀸𑀧𑀢𑁆𑀢𑀺 𑀉𑀧𑀚𑁆𑀛𑀸𑀬𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀘, 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀉𑀧𑀚𑁆𑀛𑀸𑀬𑁄 𑀆𑀧𑀚𑁆𑀚𑀢𑀺 𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀆𑀘𑀭𑀺𑀬𑁄 𑀆𑀧𑀚𑁆𑀚𑀢𑀺 𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁄 𑀆𑀧𑀚𑁆𑀚𑀢𑀺 𑀦𑁄 𑀆𑀘𑀭𑀺𑀬𑁄, 𑀅𑀢𑁆𑀣𑀸𑀧𑀢𑁆𑀢𑀺 𑀆𑀘𑀭𑀺𑀬𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁄 𑀘, 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀆𑀘𑀭𑀺𑀬𑁄 𑀆𑀧𑀚𑁆𑀚𑀢𑀺 𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁄. 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀅𑀦𑀸𑀧𑀢𑁆𑀢𑀺 𑀯𑀲𑁆𑀲𑀘𑁆𑀙𑁂𑀤𑀲𑁆𑀲 𑁋 𑀲𑀗𑁆𑀖𑁄 𑀯𑀸 𑀪𑀺𑀦𑁆𑀦𑁄 𑀳𑁄𑀢𑀺, 𑀲𑀗𑁆𑀖𑀁 𑀯𑀸 𑀪𑀺𑀦𑁆𑀤𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀯𑀸 𑀳𑁄𑀢𑀺, 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄 𑀯𑀸 𑀳𑁄𑀢𑀺. 𑀘𑀢𑁆𑀢𑀸𑀭𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀦𑀺 𑁋 𑀫𑀼𑀲𑀸𑀯𑀸𑀤𑁄, 𑀧𑀺𑀲𑀼𑀡𑀸 𑀯𑀸𑀘𑀸, 𑀨𑀭𑀼𑀲𑀸 𑀯𑀸𑀘𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀘𑀢𑁆𑀢𑀸𑀭𑀺 𑀯𑀘𑀻𑀲𑀼𑀘𑀭𑀺𑀢𑀸𑀦𑀺 𑁋 𑀲𑀘𑁆𑀘𑀯𑀸𑀘𑀸, 𑀅𑀧𑀺𑀲𑀼𑀡𑀸 𑀯𑀸𑀘𑀸, 𑀲𑀡𑁆𑀳𑀸 𑀯𑀸𑀘𑀸, 𑀫𑀦𑁆𑀢𑀸 𑀪𑀸𑀲𑀸. 𑀅𑀢𑁆𑀣𑀺 𑀆𑀤𑀺𑀬𑀦𑁆𑀢𑁄 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀧𑀬𑁄𑀚𑁂𑀦𑁆𑀢𑁄 𑀮𑀳𑀼𑀓𑀁; 𑀅𑀢𑁆𑀣𑀺 𑀆𑀤𑀺𑀬𑀦𑁆𑀢𑁄 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀧𑀬𑁄𑀚𑁂𑀦𑁆𑀢𑁄 𑀕𑀭𑀼𑀓𑀁, 𑀅𑀢𑁆𑀣𑀺 𑀆𑀤𑀺𑀬𑀦𑁆𑀢𑁄𑀧𑀺 𑀧𑀬𑁄𑀚𑁂𑀦𑁆𑀢𑁄𑀧𑀺 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺; 𑀅𑀢𑁆𑀣𑀺 𑀆𑀤𑀺𑀬𑀦𑁆𑀢𑁄𑀧𑀺 𑀧𑀬𑁄𑀚𑁂𑀦𑁆𑀢𑁄𑀧𑀺 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺.
𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀪𑀺𑀯𑀸𑀤𑀦𑀸𑀭𑀳𑁄, 𑀦𑁄 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄; 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄, 𑀦𑁄 𑀅𑀪𑀺𑀯𑀸𑀤𑀦𑀸𑀭𑀳𑁄; 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀪𑀺𑀯𑀸𑀤𑀦𑀸𑀭𑀳𑁄 𑀘𑁂𑀯 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄 𑀘; 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀦𑁂𑀯 𑀅𑀪𑀺𑀯𑀸𑀤𑀦𑀸𑀭𑀳𑁄 𑀦𑁄 𑀧𑀘𑁆𑀘𑀼𑀝𑁆𑀞𑀸𑀦𑀸𑀭𑀳𑁄. 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀆𑀲𑀦𑀸𑀭𑀳𑁄, 𑀦𑁄 𑀅𑀪𑀺𑀯𑀸𑀤𑀦𑀸𑀭𑀳𑁄; 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀅𑀪𑀺𑀯𑀸𑀤𑀦𑀸𑀭𑀳𑁄, 𑀦𑁄 𑀆𑀲𑀦𑀸𑀭𑀳𑁄; 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀆𑀲𑀦𑀸𑀭𑀳𑁄 𑀘𑁂𑀯 𑀅𑀪𑀺𑀯𑀸𑀤𑀦𑀸𑀭𑀳𑁄 𑀘; 𑀅𑀢𑁆𑀣𑀺 𑀧𑀼𑀕𑁆𑀕𑀮𑁄 𑀦𑁂𑀯 𑀆𑀲𑀦𑀸𑀭𑀳𑁄 𑀦𑁄 𑀅𑀪𑀺𑀯𑀸𑀤𑀦𑀸𑀭𑀳𑁄. 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀮𑁂 𑀆𑀧𑀚𑁆𑀚𑀢𑀺, 𑀦𑁄 𑀯𑀺𑀓𑀸𑀮𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀯𑀺𑀓𑀸𑀮𑁂 𑀆𑀧𑀚𑁆𑀚𑀢𑀺, 𑀦𑁄 𑀓𑀸𑀮𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀓𑀸𑀮𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀯𑀺𑀓𑀸𑀮𑁂 𑀘; 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀓𑀸𑀮𑁂 𑀆𑀧𑀚𑁆𑀚𑀢𑀺 𑀦𑁄 𑀯𑀺𑀓𑀸𑀮𑁂. 𑀅𑀢𑁆𑀣𑀺 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀺, 𑀦𑁄 𑀯𑀺𑀓𑀸𑀮𑁂; 𑀅𑀢𑁆𑀣𑀺 𑀧𑀝𑀺𑀕𑁆𑀕𑀳𑀺𑀢𑀁 𑀯𑀺𑀓𑀸𑀮𑁂 𑀓𑀧𑁆𑀧𑀢𑀺, 𑀦𑁄 𑀓𑀸𑀮𑁂; 𑀅𑀢𑁆𑀣𑀺 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀘𑁂𑀯 𑀓𑀧𑁆𑀧𑀢𑀺 𑀯𑀺𑀓𑀸𑀮𑁂 𑀘; 𑀅𑀢𑁆𑀣𑀺 𑀧𑀝𑀺𑀕𑁆𑀕𑀳𑀺𑀢𑀁 𑀦𑁂𑀯 𑀓𑀸𑀮𑁂 𑀓𑀧𑁆𑀧𑀢𑀺 𑀦𑁄 𑀯𑀺𑀓𑀸𑀮𑁂. 𑀅𑀢𑁆𑀣𑀸𑀧𑀢𑁆𑀢𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀆𑀧𑀚𑁆𑀚𑀢𑀺, 𑀦𑁄 𑀫𑀚𑁆𑀛𑀺𑀫𑁂𑀲𑀼; 𑀅𑀢𑁆𑀣𑀸𑀧𑀢𑁆𑀢𑀺 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀆𑀧𑀚𑁆𑀚𑀢𑀺, 𑀦𑁄 𑀧𑀘𑁆𑀘𑀦𑁆𑀢𑀺𑀫𑁂𑀲𑀼; 𑀅𑀢𑁆𑀣𑀸𑀧𑀢𑁆𑀢𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀘𑁂𑀯 𑀚𑀦𑀧𑀤𑁂𑀲𑀼 𑀆𑀧𑀚𑁆𑀚𑀢𑀺 𑀫𑀚𑁆𑀛𑀺𑀫𑁂𑀲𑀼 𑀘; 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀆𑀧𑀚𑁆𑀚𑀢𑀺 𑀦𑁄 𑀫𑀚𑁆𑀛𑀺𑀫𑁂𑀲𑀼. 𑀅𑀢𑁆𑀣𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀓𑀧𑁆𑀧𑀢𑀺, 𑀦𑁄 𑀫𑀚𑁆𑀛𑀺𑀫𑁂𑀲𑀼; 𑀅𑀢𑁆𑀣𑀺 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀓𑀧𑁆𑀧𑀢𑀺, 𑀦𑁄 𑀧𑀘𑁆𑀘𑀦𑁆𑀢𑀺𑀫𑁂𑀲𑀼; 𑀅𑀢𑁆𑀣𑀺 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀘𑁂𑀯 𑀚𑀦𑀧𑀤𑁂𑀲𑀼 𑀓𑀧𑁆𑀧𑀢𑀺 𑀫𑀚𑁆𑀛𑀺𑀫𑁂𑀲𑀼 𑀘; 𑀅𑀢𑁆𑀣𑀺 𑀦𑁂𑀯 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀓𑀧𑁆𑀧𑀢𑀺 𑀦𑁄 𑀫𑀚𑁆𑀛𑀺𑀫𑁂𑀲𑀼. 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀦𑁄 𑀩𑀳𑀺; 𑀅𑀢𑁆𑀣𑀸𑀧𑀢𑁆𑀢𑀺 𑀩𑀳𑀺 𑀆𑀧𑀚𑁆𑀚𑀢𑀺, 𑀦𑁄 𑀅𑀦𑁆𑀢𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀳𑀺 𑀘; 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀅𑀦𑁆𑀢𑁄 𑀆𑀧𑀚𑁆𑀚𑀢𑀺 𑀦𑁄 𑀩𑀳𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀆𑀧𑀚𑁆𑀚𑀢𑀺, 𑀦𑁄 𑀩𑀳𑀺𑀲𑀻𑀫𑀸𑀬; 𑀅𑀢𑁆𑀣𑀸𑀧𑀢𑁆𑀢𑀺 𑀩𑀳𑀺𑀲𑀻𑀫𑀸𑀬 𑀆𑀧𑀚𑁆𑀚𑀢𑀺, 𑀦𑁄 𑀅𑀦𑁆𑀢𑁄𑀲𑀻𑀫𑀸𑀬; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀦𑁆𑀢𑁄𑀲𑀻𑀫𑀸𑀬 𑀘𑁂𑀯 𑀆𑀧𑀚𑁆𑀚𑀢𑀺 𑀩𑀳𑀺𑀲𑀻𑀫𑀸𑀬 𑀘; 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀅𑀦𑁆𑀢𑁄𑀲𑀻𑀫𑀸𑀬 𑀆𑀧𑀚𑁆𑀚𑀢𑀺 𑀦𑁄 𑀩𑀳𑀺𑀲𑀻𑀫𑀸𑀬. 𑀅𑀢𑁆𑀣𑀸𑀧𑀢𑁆𑀢𑀺 𑀕𑀸𑀫𑁂 𑀆𑀧𑀚𑁆𑀚𑀢𑀺, 𑀦𑁄 𑀅𑀭𑀜𑁆𑀜𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀭𑀜𑁆𑀜𑁂 𑀆𑀧𑀚𑁆𑀚𑀢𑀺, 𑀦𑁄 𑀕𑀸𑀫𑁂; 𑀅𑀢𑁆𑀣𑀸𑀧𑀢𑁆𑀢𑀺 𑀕𑀸𑀫𑁂 𑀘𑁂𑀯 𑀆𑀧𑀚𑁆𑀚𑀢𑀺 𑀅𑀭𑀜𑁆𑀜𑁂 𑀘; 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀕𑀸𑀫𑁂 𑀆𑀧𑀚𑁆𑀚𑀢𑀺 𑀦𑁄 𑀅𑀭𑀜𑁆𑀜𑁂.
𑀘𑀢𑀲𑁆𑀲𑁄 𑀘𑁄𑀤𑀦𑀸 𑁋 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀸, 𑀆𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀸, 𑀲𑀁𑀯𑀸𑀲𑀧𑀝𑀺𑀓𑁆𑀔𑁂𑀧𑁄, 𑀲𑀸𑀫𑀻𑀘𑀺𑀧𑀝𑀺𑀓𑁆𑀔𑁂𑀧𑁄. 𑀘𑀢𑁆𑀢𑀸𑀭𑁄 𑀧𑀼𑀩𑁆𑀩𑀓𑀺𑀘𑁆𑀘𑀸. 𑀘𑀢𑁆𑀢𑀸𑀭𑁄 𑀧𑀢𑁆𑀢𑀓𑀮𑁆𑀮𑀸. 𑀘𑀢𑁆𑀢𑀸𑀭𑀺 𑀅𑀦𑀜𑁆𑀜𑀧𑀸𑀘𑀺𑀢𑁆𑀢𑀺𑀬𑀸𑀦𑀺. 𑀘𑀢𑀲𑁆𑀲𑁄 𑀪𑀺𑀓𑁆𑀔𑀼𑀲𑀫𑁆𑀫𑀼𑀢𑀺𑀬𑁄. [𑀅. 𑀦𑀺. 𑁪.𑁧𑁭; 𑀯𑀺𑀪. 𑁯𑁩𑁯; 𑀤𑀻. 𑀦𑀺. 𑁩.𑁩𑁧𑁧] 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑁋 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀘𑀢𑁆𑀢𑀸𑀭𑀺 𑀦𑀸𑀕𑀢𑀺𑀕𑀫𑀦𑀸𑀦𑀺 𑁋 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀮𑀚𑁆𑀚𑀻 𑀪𑀺𑀓𑁆𑀔𑀼 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺 𑁋 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄. 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀧𑁂𑀲𑀮𑁄 𑀪𑀺𑀓𑁆𑀔𑀼 𑀪𑀺𑀦𑁆𑀦𑀁 𑀲𑀗𑁆𑀖𑀁 𑀲𑀫𑀕𑁆𑀕𑀁 𑀓𑀭𑁄𑀢𑀺 𑁋 𑀦 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄, 𑀦 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄, 𑀦 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄, 𑀦 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄. 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀦𑀬𑁄 𑀦 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑁄 𑀦 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀦𑀬𑁄 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑁋 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀦𑀬𑁄 𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑁋 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀬𑁄𑀕𑁄 𑀦 𑀤𑀸𑀢𑀩𑁆𑀩𑁄 𑁋 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀯𑀺𑀦𑀬𑁄 𑀦 𑀲𑀸𑀓𑀘𑁆𑀙𑀺𑀢𑀩𑁆𑀩𑁄 𑁋 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀢𑀺, 𑀪𑀬𑀸𑀕𑀢𑀺𑀁 𑀕𑀘𑁆𑀙𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀦𑁄 𑀅𑀕𑀺𑀮𑀸𑀦𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀅𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺, 𑀦𑁄 𑀕𑀺𑀮𑀸𑀦𑁄; 𑀅𑀢𑁆𑀣𑀸𑀧𑀢𑁆𑀢𑀺 𑀕𑀺𑀮𑀸𑀦𑁄 𑀘𑁂𑀯 𑀆𑀧𑀚𑁆𑀚𑀢𑀺 𑀅𑀕𑀺𑀮𑀸𑀦𑁄 𑀘; 𑀅𑀢𑁆𑀣𑀸𑀧𑀢𑁆𑀢𑀺 𑀦𑁂𑀯 𑀕𑀺𑀮𑀸𑀦𑁄 𑀆𑀧𑀚𑁆𑀚𑀢𑀺 𑀦𑁄 𑀅𑀕𑀺𑀮𑀸𑀦𑁄. 𑀘𑀢𑁆𑀢𑀸𑀭𑀺 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀘𑀢𑁆𑀢𑀸𑀭𑀺 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺.
𑀘𑀢𑀼𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.
𑀢𑀲𑁆𑀲𑀼𑀤𑁆𑀤𑀸𑀦𑀁 𑁋
𑀲𑀓𑀯𑀸𑀘𑀸𑀬 𑀓𑀸𑀬𑁂𑀦, 𑀧𑀲𑀼𑀢𑁆𑀢𑁄 𑀘 𑀅𑀘𑀺𑀢𑁆𑀢𑀓𑁄;
𑀆𑀧𑀚𑁆𑀚𑀦𑁆𑀢𑁄 𑀘 𑀓𑀫𑁆𑀫𑁂𑀦, 𑀯𑁄𑀳𑀸𑀭𑀸 𑀘𑀢𑀼𑀭𑁄 𑀢𑀣𑀸.
𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀜𑁆𑀘, 𑀧𑀭𑀺𑀓𑁆𑀔𑀸𑀭𑁄 𑀘 𑀲𑀫𑁆𑀫𑀼𑀔𑀸;
𑀅𑀚𑀸𑀦𑀓𑀸𑀬𑁂 𑀫𑀚𑁆𑀛𑁂 𑀘, 𑀯𑀼𑀝𑁆𑀞𑀸𑀢𑀺 𑀤𑀼𑀯𑀺𑀥𑀸 𑀢𑀣𑀸.
𑀧𑀝𑀺𑀮𑀸𑀪𑁂𑀦 𑀘𑁄𑀤𑀦𑀸, 𑀧𑀭𑀺𑀯𑀸𑀲𑀸 𑀘 𑀯𑀼𑀘𑁆𑀘𑀢𑀺;
𑀫𑀸𑀦𑀢𑁆𑀢𑀘𑀸𑀭𑀺𑀓𑀸 𑀘𑀸𑀧𑀺, 𑀲𑀸𑀫𑀼𑀓𑁆𑀓𑀁𑀲𑀸 𑀧𑀝𑀺𑀕𑁆𑀕𑀳𑀺.
𑀫𑀳𑀸𑀯𑀺𑀓𑀝𑀓𑀫𑁆𑀫𑀸𑀦𑀺, 𑀧𑀼𑀦 𑀓𑀫𑁆𑀫𑁂 𑀯𑀺𑀧𑀢𑁆𑀢𑀺𑀬𑁄;
𑀅𑀥𑀺𑀓𑀭𑀡𑀸 𑀤𑀼𑀲𑁆𑀲𑀻𑀮𑀸 𑀘, 𑀲𑁄𑀪𑀦𑀸𑀕𑀦𑁆𑀢𑀼𑀓𑁂𑀦 𑀘.
𑀕𑀫𑀺𑀓𑁄 𑀯𑀢𑁆𑀣𑀼𑀦𑀸𑀦𑀢𑁆𑀢𑀸, 𑀲𑀪𑀸𑀕𑀼𑀧𑀚𑁆𑀛𑀸𑀬𑁂𑀦 𑀘;
𑀆𑀘𑀭𑀺𑀬𑁄 𑀧𑀘𑁆𑀘𑀬𑀸 𑀯𑀸, 𑀤𑀼𑀘𑁆𑀘𑀭𑀺𑀢𑀁 𑀲𑀼𑀘𑀭𑀺𑀢𑀁.
𑀆𑀤𑀺𑀬𑀦𑁆𑀢𑁄 𑀧𑀼𑀕𑁆𑀕𑀮𑁄 𑀘, 𑀅𑀭𑀳𑁄 𑀆𑀲𑀦𑁂𑀦 𑀘;
𑀓𑀸𑀮𑁂 𑀘 𑀓𑀧𑁆𑀧𑀢𑀺 𑀘𑁂𑀯, 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀓𑀧𑁆𑀧𑀢𑀺.
𑀅𑀦𑁆𑀢𑁄 𑀅𑀦𑁆𑀢𑁄 𑀘 𑀲𑀻𑀫𑀸𑀬, 𑀕𑀸𑀫𑁂 𑀘 𑀘𑁄𑀤𑀦𑀸𑀬 𑀘;
𑀧𑀼𑀩𑁆𑀩𑀓𑀺𑀘𑁆𑀘𑀁 𑀧𑀢𑁆𑀢𑀓𑀮𑁆𑀮𑀁, 𑀅𑀦𑀜𑁆𑀜𑀸 𑀲𑀫𑁆𑀫𑀼𑀢𑀺𑀬𑁄 𑀘.
𑀅𑀕𑀢𑀺 𑀦𑀸𑀕𑀢𑀺 𑀘𑁂𑀯, 𑀅𑀮𑀚𑁆𑀚𑀻 𑀧𑁂𑀲𑀮𑁂𑀦 𑀘;
𑀧𑀼𑀘𑁆𑀙𑀺𑀢𑀩𑁆𑀩𑀸 𑀤𑀼𑀯𑁂 𑀘𑁂𑀯, 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸 𑀢𑀣𑀸 𑀤𑀼𑀯𑁂;
𑀅𑀦𑀼𑀬𑁄𑀕𑁄 𑀘 𑀲𑀸𑀓𑀘𑁆𑀙𑀸, 𑀕𑀺𑀮𑀸𑀦𑁄 𑀞𑀧𑀦𑁂𑀦 𑀘𑀸𑀢𑀺.
𑁫. 𑀧𑀜𑁆𑀘𑀓𑀯𑀸𑀭𑁄
𑁩𑁨𑁫. 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄. 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸. 𑀧𑀜𑁆𑀘 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀧𑀜𑁆𑀘 𑀓𑀫𑁆𑀫𑀸𑀦𑀺 𑀆𑀦𑀦𑁆𑀢𑀭𑀺𑀓𑀸𑀦𑀺. 𑀧𑀜𑁆𑀘 𑀧𑀼𑀕𑁆𑀕𑀮𑀸 𑀦𑀺𑀬𑀢𑀸. 𑀧𑀜𑁆𑀘 𑀙𑁂𑀤𑀦𑀓𑀸 𑀆𑀧𑀢𑁆𑀢𑀺𑀬𑁄. 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄. 𑀫𑀼𑀲𑀸𑀯𑀸𑀤𑀧𑀘𑁆𑀘𑀬𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀓𑀫𑁆𑀫𑀁 𑀦 𑀉𑀧𑁂𑀢𑀺 𑁋 𑀲𑀬𑀁 𑀯𑀸 𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀧𑀭𑀁 𑀯𑀸 𑀦 𑀅𑀚𑁆𑀛𑁂𑀲𑀢𑀺, 𑀙𑀦𑁆𑀤𑀁 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀁 𑀯𑀸 𑀦 𑀤𑁂𑀢𑀺, 𑀓𑀬𑀺𑀭𑀫𑀸𑀦𑁂 𑀓𑀫𑁆𑀫𑁂 𑀧𑀝𑀺𑀓𑁆𑀓𑁄𑀲𑀢𑀺, 𑀓𑀢𑁂 𑀯𑀸 𑀧𑀦 𑀓𑀫𑁆𑀫𑁂 𑀅𑀥𑀫𑁆𑀫𑀤𑀺𑀝𑁆𑀞𑀺 𑀳𑁄𑀢𑀺. 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀓𑀫𑁆𑀫𑀁 𑀉𑀧𑁂𑀢𑀺 𑁋 𑀲𑀬𑀁 𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀭𑀁 𑀯𑀸 𑀅𑀚𑁆𑀛𑁂𑀲𑀢𑀺, 𑀙𑀦𑁆𑀤𑀁 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺𑀁 𑀯𑀸 𑀤𑁂𑀢𑀺, 𑀓𑀬𑀺𑀭𑀫𑀸𑀦𑁂 𑀓𑀫𑁆𑀫𑁂 𑀦𑀧𑁆𑀧𑀝𑀺𑀓𑁆𑀓𑁄𑀲𑀢𑀺, 𑀓𑀢𑁂 𑀯𑀸 𑀧𑀦 𑀓𑀫𑁆𑀫𑁂 𑀥𑀫𑁆𑀫𑀤𑀺𑀝𑁆𑀞𑀺 𑀳𑁄𑀢𑀺. 𑀧𑀜𑁆𑀘 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀧𑁆𑀧𑀦𑁆𑀢𑀺 𑁋 𑀅𑀦𑀸𑀫𑀦𑁆𑀢𑀘𑀸𑀭𑁄, 𑀕𑀡𑀪𑁄𑀚𑀦𑀁, 𑀧𑀭𑀫𑁆𑀧𑀭𑀪𑁄𑀚𑀦𑀁, 𑀅𑀦𑀥𑀺𑀝𑁆𑀞𑀸𑀦𑀁, 𑀅𑀯𑀺𑀓𑀧𑁆𑀧𑀦𑀸. [𑀅. 𑀦𑀺. 𑁫.𑁧𑁦𑁨] 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺 𑁋 𑀧𑀸𑀧𑀪𑀺𑀓𑁆𑀔𑀼𑀧𑀺 𑀅𑀓𑀼𑀧𑁆𑀧𑀥𑀫𑁆𑀫𑁄𑀧𑀺 𑀯𑁂𑀲𑀺𑀬𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀯𑀺𑀥𑀯𑀸𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀣𑀼𑀮𑁆𑀮𑀓𑀼𑀫𑀸𑀭𑀺𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀧𑀡𑁆𑀟𑀓𑀕𑁄𑀘𑀭𑁄 𑀯𑀸 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀺𑀕𑁄𑀘𑀭𑁄 𑀯𑀸 𑀳𑁄𑀢𑀺. 𑀧𑀜𑁆𑀘 𑀢𑁂𑀮𑀸𑀦𑀺 𑁋 𑀢𑀺𑀮𑀢𑁂𑀮𑀁, 𑀲𑀸𑀲𑀧𑀢𑁂𑀮𑀁, 𑀫𑀥𑀼𑀓𑀢𑁂𑀮𑀁, 𑀏𑀭𑀡𑁆𑀟𑀓𑀢𑁂𑀮𑀁, 𑀯𑀲𑀸𑀢𑁂𑀮𑀁. 𑀧𑀜𑁆𑀘 𑀯𑀲𑀸𑀦𑀺 𑁋 𑀅𑀘𑁆𑀙𑀯𑀲𑀁, 𑀫𑀘𑁆𑀙𑀯𑀲𑀁, 𑀲𑀼𑀲𑀼𑀓𑀸𑀯𑀲𑀁, 𑀲𑀽𑀓𑀭𑀯𑀲𑀁, 𑀕𑀤𑁆𑀭𑀪𑀯𑀲𑀁. [𑀅. 𑀦𑀺. 𑁫.𑁧𑁩𑁦; 𑀤𑀻. 𑀦𑀺. 𑁩.𑁩𑁧𑁬] 𑀧𑀜𑁆𑀘 𑀩𑁆𑀬𑀲𑀦𑀸𑀦𑀺 𑁋 𑀜𑀸𑀢𑀺𑀩𑁆𑀬𑀲𑀦𑀁, 𑀪𑁄𑀕𑀩𑁆𑀬𑀲𑀦𑀁, 𑀭𑁄𑀕𑀩𑁆𑀬𑀲𑀦𑀁, 𑀲𑀻𑀮𑀩𑁆𑀬𑀲𑀦𑀁, 𑀤𑀺𑀝𑁆𑀞𑀺𑀩𑁆𑀬𑀲𑀦𑀁. [𑀅. 𑀦𑀺. 𑁫.𑁧𑁩𑁦; 𑀤𑀻. 𑀦𑀺. 𑁩.𑁩𑁧𑁬] 𑀧𑀜𑁆𑀘 𑀲𑀫𑁆𑀧𑀤𑀸 𑁋 𑀜𑀸𑀢𑀺𑀲𑀫𑁆𑀧𑀤𑀸, 𑀪𑁄𑀕𑀲𑀫𑁆𑀧𑀤𑀸, 𑀅𑀭𑁄𑀕𑀲𑀫𑁆𑀧𑀤𑀸, 𑀲𑀻𑀮𑀲𑀫𑁆𑀧𑀤𑀸, 𑀤𑀺𑀝𑁆𑀞𑀺𑀲𑀫𑁆𑀧𑀤𑀸. 𑀧𑀜𑁆𑀘 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀉𑀧𑀚𑁆𑀛𑀸𑀬𑀫𑁆𑀳𑀸 𑁋 𑀉𑀧𑀚𑁆𑀛𑀸𑀬𑁄 𑀧𑀓𑁆𑀓𑀦𑁆𑀢𑁄 𑀯𑀸 𑀳𑁄𑀢𑀺, 𑀯𑀺𑀩𑁆𑀪𑀦𑁆𑀢𑁄 𑀯𑀸, 𑀓𑀸𑀮𑀗𑁆𑀓𑀢𑁄 𑀯𑀸, 𑀧𑀓𑁆𑀔𑀲𑀗𑁆𑀓𑀦𑁆𑀢𑁄 𑀯𑀸, 𑀆𑀡𑀢𑁆𑀢𑀺𑀬𑁂𑀯 𑀧𑀜𑁆𑀘𑀫𑀻. 𑀧𑀜𑁆𑀘 𑀧𑀼𑀕𑁆𑀕𑀮𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸 𑁋 𑀅𑀤𑁆𑀥𑀸𑀦𑀳𑀻𑀦𑁄, 𑀅𑀗𑁆𑀕𑀳𑀻𑀦𑁄, 𑀯𑀢𑁆𑀣𑀼𑀯𑀺𑀧𑀦𑁆𑀦𑁄, 𑀓𑀭𑀡𑀤𑀼𑀓𑁆𑀓𑀝𑀓𑁄, 𑀅𑀧𑀭𑀺𑀧𑀽𑀭𑁄. 𑀧𑀜𑁆𑀘 𑀧𑀁𑀲𑀼𑀓𑀽𑀮𑀸𑀦𑀺 𑁋 𑀲𑁄𑀲𑀸𑀦𑀺𑀓𑀁, 𑀧𑀸𑀧𑀡𑀺𑀓𑀁, 𑀉𑀦𑁆𑀤𑀽𑀭𑀓𑁆𑀔𑀸𑀬𑀺𑀓𑀁, 𑀉𑀧𑀘𑀺𑀓𑀓𑁆𑀔𑀸𑀬𑀺𑀓𑀁, 𑀅𑀕𑁆𑀕𑀺𑀤𑀟𑁆𑀠𑀁. 𑀅𑀧𑀭𑀸𑀦𑀺𑀧𑀺 𑀧𑀜𑁆𑀘 𑀧𑀁𑀲𑀼𑀓𑀽𑀮𑀸𑀦𑀺 𑁋 𑀕𑁄𑀔𑀸𑀬𑀺𑀓𑀁, 𑀅𑀚𑀓𑁆𑀔𑀸𑀬𑀺𑀓𑀁, 𑀣𑀽𑀧𑀘𑀻𑀯𑀭𑀁, 𑀆𑀪𑀺𑀲𑁂𑀓𑀺𑀓𑀁, 𑀕𑀢𑀧𑀝𑀺𑀬𑀸𑀕𑀢𑀁 [𑀪𑀢𑀧𑀝𑀺𑀬𑀸𑀪𑀢𑀁 (𑀓.)]. 𑀧𑀜𑁆𑀘 𑀅𑀯𑀳𑀸𑀭𑀸 𑁋 𑀣𑁂𑀬𑁆𑀬𑀸𑀯𑀳𑀸𑀭𑁄, 𑀧𑀲𑀬𑁆𑀳𑀸𑀯𑀳𑀸𑀭𑁄, 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄, 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄, 𑀓𑀼𑀲𑀸𑀯𑀳𑀸𑀭𑁄. 𑀧𑀜𑁆𑀘 𑀫𑀳𑀸𑀘𑁄𑀭𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀧𑀜𑁆𑀘 𑀅𑀯𑀺𑀲𑁆𑀲𑀚𑁆𑀚𑀦𑀺𑀬𑀸𑀦𑀺. 𑀧𑀜𑁆𑀘 𑀅𑀯𑁂𑀪𑀗𑁆𑀕𑀺𑀬𑀸𑀦𑀺. 𑀧𑀜𑁆𑀘𑀸𑀧𑀢𑁆𑀢𑀺𑀬𑁄 𑀓𑀸𑀬𑀢𑁄 𑀲𑀫𑀼𑀝𑁆𑀞𑀦𑁆𑀢𑀺, 𑀦 𑀯𑀸𑀘𑀢𑁄 𑀦 𑀘𑀺𑀢𑁆𑀢𑀢𑁄. 𑀧𑀜𑁆𑀘𑀸𑀧𑀢𑁆𑀢𑀺𑀬𑁄 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺, 𑀘𑀺𑀢𑁆𑀢𑀢𑁄. 𑀧𑀜𑁆𑀘𑀸𑀧𑀢𑁆𑀢𑀺𑀬𑁄 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑁄. 𑀧𑀜𑁆𑀘 𑀲𑀗𑁆𑀖𑀸. 𑀧𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸. 𑀲𑀩𑁆𑀩𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀧𑀜𑁆𑀘𑀸𑀦𑀺𑀲𑀁𑀲𑀸 𑀓𑀣𑀺𑀦𑀢𑁆𑀣𑀸𑀭𑁂. 𑀧𑀜𑁆𑀘 𑀓𑀫𑁆𑀫𑀸𑀦𑀺. 𑀬𑀸𑀯𑀢𑀢𑀺𑀬𑀓𑁂 𑀧𑀜𑁆𑀘 𑀆𑀧𑀢𑁆𑀢𑀺𑀬𑁄. 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀜𑁆𑀘 𑀅𑀓𑀧𑁆𑀧𑀺𑀬𑀸𑀦𑀺 𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺 𑁋 𑀅𑀤𑀺𑀦𑁆𑀦𑀜𑁆𑀘 𑀳𑁄𑀢𑀺, 𑀅𑀯𑀺𑀤𑀺𑀢𑀜𑁆𑀘 𑀳𑁄𑀢𑀺, 𑀅𑀓𑀧𑁆𑀧𑀺𑀬𑀜𑁆𑀘 𑀳𑁄𑀢𑀺, 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀺, 𑀅𑀓𑀢𑀸𑀢𑀺𑀭𑀺𑀢𑁆𑀢𑀜𑁆𑀘 𑀳𑁄𑀢𑀺. 𑀧𑀜𑁆𑀘 𑀓𑀧𑁆𑀧𑀺𑀬𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸𑀦𑀺 𑁋 𑀤𑀺𑀦𑁆𑀦𑀜𑁆𑀘 𑀳𑁄𑀢𑀺, 𑀯𑀺𑀤𑀺𑀢𑀜𑁆𑀘 𑀳𑁄𑀢𑀺, 𑀓𑀧𑁆𑀧𑀺𑀬𑀜𑁆𑀘 𑀳𑁄𑀢𑀺, 𑀧𑀝𑀺𑀕𑁆𑀕𑀳𑀺𑀢𑀜𑁆𑀘 𑀳𑁄𑀢𑀺, 𑀓𑀢𑀸𑀢𑀺𑀭𑀺𑀢𑁆𑀢𑀜𑁆𑀘 𑀳𑁄𑀢𑀺. 𑀧𑀜𑁆𑀘 𑀤𑀸𑀦𑀸𑀦𑀺 𑀅𑀧𑀼𑀜𑁆𑀜𑀸𑀦𑀺 𑀧𑀼𑀜𑁆𑀜𑀲𑀫𑁆𑀫𑀢𑀸𑀦𑀺 𑀮𑁄𑀓𑀲𑁆𑀫𑀺𑀁 [𑀮𑁄𑀓𑀲𑁆𑀲 (𑀲𑁆𑀬𑀸.)] 𑁋 𑀫𑀚𑁆𑀚𑀤𑀸𑀦𑀁, 𑀲𑀫𑀚𑁆𑀚𑀤𑀸𑀦𑀁, 𑀇𑀢𑁆𑀣𑀺𑀤𑀸𑀦𑀁, 𑀉𑀲𑀪𑀤𑀸𑀦𑀁, 𑀘𑀺𑀢𑁆𑀢𑀓𑀫𑁆𑀫𑀤𑀸𑀦𑀁. 𑀧𑀜𑁆𑀘 𑀉𑀧𑁆𑀧𑀦𑁆𑀦𑀸 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀸 [𑀯𑀺𑀦𑁄𑀤𑀺𑀬𑀸 (𑀲𑁆𑀬𑀸.)] 𑁋 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑁄, 𑀉𑀧𑁆𑀧𑀦𑁆𑀦𑁄 𑀤𑁄𑀲𑁄 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑁄, 𑀉𑀧𑁆𑀧𑀦𑁆𑀦𑁄 𑀫𑁄𑀳𑁄 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑁄, 𑀉𑀧𑁆𑀧𑀦𑁆𑀦𑀁 𑀧𑀝𑀺𑀪𑀸𑀦𑀁 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀁, 𑀉𑀧𑁆𑀧𑀦𑁆𑀦𑀁 𑀕𑀫𑀺𑀬𑀘𑀺𑀢𑁆𑀢𑀁 𑀤𑀼𑀧𑁆𑀧𑀝𑀺𑀯𑀺𑀦𑁄𑀤𑀬𑀁. 𑀧𑀜𑁆𑀘𑀸𑀦𑀺𑀲𑀁𑀲𑀸 𑀲𑀫𑁆𑀫𑀚𑁆𑀚𑀦𑀺𑀬𑀸 𑁋 𑀲𑀓𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀭𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺, 𑀧𑀸𑀲𑀸𑀤𑀺𑀓𑀲𑀁𑀯𑀢𑁆𑀢𑀦𑀺𑀓𑀓𑀫𑁆𑀫𑀁 𑀉𑀧𑀘𑀺𑀦𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀅𑀧𑀭𑁂𑀧𑀺 𑀧𑀜𑁆𑀘𑀸𑀦𑀺𑀲𑀁𑀲𑀸 𑀲𑀫𑁆𑀫𑀚𑁆𑀚𑀦𑀺𑀬𑀸 𑁋 𑀲𑀓𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀧𑀭𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺, 𑀲𑀢𑁆𑀣𑀼𑀲𑀸𑀲𑀦𑀁 𑀓𑀢𑀁 𑀳𑁄𑀢𑀺, 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺.
𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 ‘‘𑀩𑀸𑀮𑁄’’ 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀅𑀢𑁆𑀢𑀦𑁄 𑀪𑀸𑀲𑀧𑀭𑀺𑀬𑀦𑁆𑀢𑀁 𑀦 𑀉𑀕𑁆𑀕𑀡𑁆𑀳𑀸𑀢𑀺, 𑀧𑀭𑀲𑁆𑀲 𑀪𑀸𑀲𑀧𑀭𑀺𑀬𑀦𑁆𑀢𑀁 𑀦 𑀉𑀕𑁆𑀕𑀡𑁆𑀳𑀸𑀢𑀺, 𑀅𑀢𑁆𑀢𑀦𑁄 𑀪𑀸𑀲𑀧𑀭𑀺𑀬𑀦𑁆𑀢𑀁 𑀦 𑀉𑀕𑁆𑀕𑀳𑁂𑀢𑁆𑀯𑀸 𑀧𑀭𑀲𑁆𑀲 𑀪𑀸𑀲𑀧𑀭𑀺𑀬𑀦𑁆𑀢𑀁 𑀦 𑀉𑀕𑁆𑀕𑀳𑁂𑀢𑁆𑀯𑀸 𑀅𑀥𑀫𑁆𑀫𑁂𑀦 𑀓𑀸𑀭𑁂𑀢𑀺 𑀅𑀧𑁆𑀧𑀝𑀺𑀜𑁆𑀜𑀸𑀬. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 ‘‘𑀧𑀡𑁆𑀟𑀺𑀢𑁄’’ 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀅𑀢𑁆𑀢𑀦𑁄 𑀪𑀸𑀲𑀧𑀭𑀺𑀬𑀦𑁆𑀢𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀧𑀭𑀲𑁆𑀲 𑀪𑀸𑀲𑀧𑀭𑀺𑀬𑀦𑁆𑀢𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀅𑀢𑁆𑀢𑀦𑁄 𑀪𑀸𑀲𑀧𑀭𑀺𑀬𑀦𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀭𑀲𑁆𑀲 𑀪𑀸𑀲𑀧𑀭𑀺𑀬𑀦𑁆𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑁂𑀦 𑀓𑀸𑀭𑁂𑀢𑀺 𑀧𑀝𑀺𑀜𑁆𑀜𑀸𑀬. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀩𑀸𑀮𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀫𑀽𑀮𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀲𑀫𑀼𑀤𑀬𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀦𑀺𑀭𑁄𑀥𑀁 𑀦 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦 𑀚𑀸𑀦𑀸𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀧𑀡𑁆𑀟𑀺𑀢𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀫𑀽𑀮𑀁 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀲𑀫𑀼𑀤𑀬𑀁 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀦𑀺𑀭𑁄𑀥𑀁 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀚𑀸𑀦𑀸𑀢𑀺. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀩𑀸𑀮𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀅𑀥𑀺𑀓𑀭𑀡𑀁 𑀦 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑀲𑁆𑀲 𑀫𑀽𑀮𑀁 𑀦 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑀲𑀫𑀼𑀤𑀬𑀁 𑀦 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑀦𑀺𑀭𑁄𑀥𑀁 𑀦 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀦 𑀚𑀸𑀦𑀸𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀧𑀡𑁆𑀟𑀺𑀢𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀅𑀥𑀺𑀓𑀭𑀡𑀁 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑀲𑁆𑀲 𑀫𑀽𑀮𑀁 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑀲𑀫𑀼𑀤𑀬𑀁 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑀦𑀺𑀭𑁄𑀥𑀁 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀚𑀸𑀦𑀸𑀢𑀺. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀩𑀸𑀮𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀯𑀢𑁆𑀣𑀼𑀁 𑀦 𑀚𑀸𑀦𑀸𑀢𑀺, 𑀦𑀺𑀤𑀸𑀦𑀁 𑀦 𑀚𑀸𑀦𑀸𑀢𑀺, 𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀁 𑀦 𑀚𑀸𑀦𑀸𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀧𑀡𑁆𑀟𑀺𑀢𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀯𑀢𑁆𑀣𑀼𑀁 𑀚𑀸𑀦𑀸𑀢𑀺, 𑀦𑀺𑀤𑀸𑀦𑀁 𑀚𑀸𑀦𑀸𑀢𑀺, 𑀧𑀜𑁆𑀜𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀼𑀧𑀜𑁆𑀜𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀦𑁆𑀥𑀺𑀯𑀘𑀦𑀧𑀣𑀁 𑀚𑀸𑀦𑀸𑀢𑀺. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀩𑀸𑀮𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀜𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀜𑀢𑁆𑀢𑀺𑀬𑀸 𑀓𑀭𑀡𑀁 𑀦 𑀚𑀸𑀦𑀸𑀢𑀺, 𑀦 𑀧𑀼𑀩𑁆𑀩𑀓𑀼𑀲𑀮𑁄 𑀳𑁄𑀢𑀺, 𑀦 𑀅𑀧𑀭𑀓𑀼𑀲𑀮𑁄 𑀳𑁄𑀢𑀺, 𑀅𑀓𑀸𑀮𑀜𑁆𑀜𑀽 𑀘 𑀳𑁄𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀧𑀡𑁆𑀟𑀺𑀢𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀜𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀜𑀢𑁆𑀢𑀺𑀬𑀸 𑀓𑀭𑀡𑀁 𑀚𑀸𑀦𑀸𑀢𑀺, 𑀧𑀼𑀩𑁆𑀩𑀓𑀼𑀲𑀮𑁄 𑀳𑁄𑀢𑀺, 𑀅𑀧𑀭𑀓𑀼𑀲𑀮𑁄 𑀳𑁄𑀢𑀺, 𑀓𑀸𑀮𑀜𑁆𑀜𑀽 𑀘 𑀳𑁄𑀢𑀺. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀩𑀸𑀮𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀔𑁄 𑀧𑀦𑀲𑁆𑀲 𑀦 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺 𑀦 𑀲𑀼𑀫𑀦𑀲𑀺𑀓𑀢𑀸 𑀦 𑀲𑀽𑀧𑀥𑀸𑀭𑀺𑀢𑀸. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀧𑀡𑁆𑀟𑀺𑀢𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀚𑀸𑀦𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀔𑁄 𑀧𑀦𑀲𑁆𑀲 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀺 𑀲𑀼𑀫𑀦𑀲𑀺𑀓𑀢𑀸 𑀲𑀽𑀧𑀥𑀸𑀭𑀺𑀢𑀸. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀩𑀸𑀮𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀦 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀦 𑀲𑀼𑀯𑀺𑀪𑀢𑁆𑀢𑀸𑀦𑀺 𑀦 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀦 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀧𑀡𑁆𑀟𑀺𑀢𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀩𑀸𑀮𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑁂 𑀘 𑀦 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑁄 𑀳𑁄𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀯𑀺𑀦𑀬𑀥𑀭𑁄 𑀧𑀡𑁆𑀟𑀺𑀢𑁄 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀥𑀺𑀓𑀭𑀡𑁂 𑀘 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑁄 𑀳𑁄𑀢𑀺.
[𑀅. 𑀦𑀺. 𑁫.𑁧𑁮𑁧; 𑀧𑀭𑀺. 𑁪𑁪𑁩] 𑀧𑀜𑁆𑀘 𑀆𑀭𑀜𑁆𑀜𑀺𑀓𑀸 𑁋 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀉𑀫𑁆𑀫𑀸𑀤𑀸 𑀘𑀺𑀢𑁆𑀢𑀓𑁆𑀔𑁂𑀧𑀸 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀯𑀡𑁆𑀡𑀺𑀢𑀁 𑀩𑀼𑀤𑁆𑀥𑁂𑀳𑀺 𑀩𑀼𑀤𑁆𑀥𑀲𑀸𑀯𑀓𑁂𑀳𑀻𑀢𑀺 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀅𑀧𑀺 𑀘 𑀅𑀧𑁆𑀧𑀺𑀘𑁆𑀙𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀲𑀦𑁆𑀢𑀼𑀝𑁆𑀞𑀺𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀲𑀮𑁆𑀮𑁂𑀔𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀧𑀯𑀺𑀯𑁂𑀓𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀇𑀤𑀫𑀢𑁆𑀣𑀺𑀢𑀜𑁆𑀜𑁂𑀯 [𑀇𑀤𑀫𑀝𑁆𑀞𑀺𑀢𑀜𑁆𑀜𑁂𑀯 (𑀲𑀻. 𑀲𑁆𑀬𑀸.)] 𑀦𑀺𑀲𑁆𑀲𑀸𑀬 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺. 𑀧𑀜𑁆𑀘 𑀧𑀺𑀡𑁆𑀟𑀧𑀸𑀢𑀺𑀓𑀸…𑀧𑁂… 𑀧𑀜𑁆𑀘 𑀧𑀁𑀲𑀼𑀓𑀽𑀮𑀺𑀓𑀸…𑀧𑁂… 𑀧𑀜𑁆𑀘 𑀭𑀼𑀓𑁆𑀔𑀫𑀽𑀮𑀺𑀓𑀸…𑀧𑁂… 𑀧𑀜𑁆𑀘 𑀲𑁄𑀲𑀸𑀦𑀺𑀓𑀸…𑀧𑁂… 𑀧𑀜𑁆𑀘 𑀅𑀩𑁆𑀪𑁄𑀓𑀸𑀲𑀺𑀓𑀸…𑀧𑁂… 𑀧𑀜𑁆𑀘 𑀢𑁂𑀘𑀻𑀯𑀭𑀺𑀓𑀸…𑀧𑁂… 𑀧𑀜𑁆𑀘 𑀲𑀧𑀤𑀸𑀦𑀘𑀸𑀭𑀺𑀓𑀸…𑀧𑁂… 𑀧𑀜𑁆𑀘 𑀦𑁂𑀲𑀚𑁆𑀚𑀺𑀓𑀸…𑀧𑁂… 𑀧𑀜𑁆𑀘 𑀬𑀣𑀸𑀲𑀦𑁆𑀣𑀢𑀺𑀓𑀸…𑀧𑁂… 𑀧𑀜𑁆𑀘 𑀏𑀓𑀸𑀲𑀦𑀺𑀓𑀸…𑀧𑁂… 𑀧𑀜𑁆𑀘 𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀸…𑀧𑁂… 𑀧𑀜𑁆𑀘 𑀧𑀢𑁆𑀢𑀧𑀺𑀡𑁆𑀟𑀺𑀓𑀸 𑁋 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀧𑀢𑁆𑀢𑀧𑀺𑀡𑁆𑀟𑀺𑀓𑁄 𑀳𑁄𑀢𑀺, 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀧𑀢𑁆𑀢𑀧𑀺𑀡𑁆𑀟𑀺𑀓𑁄 𑀳𑁄𑀢𑀺, 𑀉𑀫𑁆𑀫𑀸𑀤𑀸 𑀘𑀺𑀢𑁆𑀢𑀓𑁆𑀔𑁂𑀧𑀸 𑀧𑀢𑁆𑀢𑀧𑀺𑀡𑁆𑀟𑀺𑀓𑁄 𑀳𑁄𑀢𑀺, 𑀯𑀡𑁆𑀡𑀺𑀢𑀁 𑀩𑀼𑀤𑁆𑀥𑁂𑀳𑀺 𑀩𑀼𑀤𑁆𑀥𑀲𑀸𑀯𑀓𑁂𑀳𑀻𑀢𑀺 𑀧𑀢𑁆𑀢𑀧𑀺𑀡𑁆𑀟𑀺𑀓𑁄 𑀳𑁄𑀢𑀺, 𑀅𑀧𑀺 𑀘 𑀅𑀧𑁆𑀧𑀺𑀘𑁆𑀙𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀲𑀦𑁆𑀢𑀼𑀝𑁆𑀞𑀺𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀲𑀮𑁆𑀮𑁂𑀔𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀧𑀯𑀺𑀯𑁂𑀓𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀇𑀤𑀫𑀢𑁆𑀣𑀺𑀢𑀜𑁆𑀜𑁂𑀯 𑀦𑀺𑀲𑁆𑀲𑀸𑀬 𑀧𑀢𑁆𑀢𑀧𑀺𑀡𑁆𑀟𑀺𑀓𑁄 𑀳𑁄𑀢𑀺.
[𑀧𑀭𑀺. 𑁪𑁧𑁭] 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦𑀸𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁 𑁋 𑀉𑀧𑁄𑀲𑀣𑀁 𑀦 𑀚𑀸𑀦𑀸𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀦 𑀚𑀸𑀦𑀸𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑁄 𑀳𑁄𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁 𑁋 𑀉𑀧𑁄𑀲𑀣𑀁 𑀚𑀸𑀦𑀸𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀚𑀸𑀦𑀸𑀢𑀺, 𑀧𑀜𑁆𑀘𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑁄 𑀯𑀸. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦𑀸𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁 𑁋 𑀧𑀯𑀸𑀭𑀡𑀁 𑀦 𑀚𑀸𑀦𑀸𑀢𑀺, 𑀧𑀯𑀸𑀭𑀡𑀸𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀦 𑀚𑀸𑀦𑀸𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑁄 𑀳𑁄𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁 𑁋 𑀧𑀯𑀸𑀭𑀡𑀁 𑀚𑀸𑀦𑀸𑀢𑀺, 𑀧𑀯𑀸𑀭𑀡𑀸𑀓𑀫𑁆𑀫𑀁 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀚𑀸𑀦𑀸𑀢𑀺, 𑀧𑀜𑁆𑀘𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑁄 𑀯𑀸. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦𑀸𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑁄 𑀳𑁄𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀺𑀲𑁆𑀲𑀺𑀢𑁂𑀦 𑀯𑀢𑁆𑀣𑀩𑁆𑀩𑀁 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀧𑀜𑁆𑀘𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑁄 𑀯𑀸. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀦𑀸𑀦𑀺𑀲𑁆𑀲𑀺𑀢𑀸𑀬 𑀯𑀢𑁆𑀣𑀩𑁆𑀩𑀁 𑁋 𑀉𑀧𑁄𑀲𑀣𑀁 𑀦 𑀚𑀸𑀦𑀸𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀦 𑀚𑀸𑀦𑀸𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑀸 𑀳𑁄𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀺𑀲𑁆𑀲𑀺𑀢𑀸𑀬 𑀯𑀢𑁆𑀣𑀩𑁆𑀩𑀁 𑁋 𑀉𑀧𑁄𑀲𑀣𑀁 𑀚𑀸𑀦𑀸𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀚𑀸𑀦𑀸𑀢𑀺, 𑀧𑀜𑁆𑀘𑀯𑀲𑁆𑀲𑀸 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑀸 𑀯𑀸. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀦𑀸𑀦𑀺𑀲𑁆𑀲𑀺𑀢𑀸𑀬 𑀯𑀢𑁆𑀣𑀩𑁆𑀩𑀁 𑁋 𑀧𑀯𑀸𑀭𑀡𑀁 𑀦 𑀚𑀸𑀦𑀸𑀢𑀺, 𑀧𑀯𑀸𑀭𑀡𑀸𑀓𑀫𑁆𑀫𑀁 𑀦 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀦 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀦 𑀚𑀸𑀦𑀸𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑀸 𑀳𑁄𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀺𑀲𑁆𑀲𑀺𑀢𑀸𑀬 𑀯𑀢𑁆𑀣𑀩𑁆𑀩𑀁 𑁋 𑀧𑀯𑀸𑀭𑀡𑀁 𑀚𑀸𑀦𑀸𑀢𑀺, 𑀧𑀯𑀸𑀭𑀡𑀸𑀓𑀫𑁆𑀫𑀁 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀁 𑀚𑀸𑀦𑀸𑀢𑀺, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀚𑀸𑀦𑀸𑀢𑀺, 𑀧𑀜𑁆𑀘𑀯𑀲𑁆𑀲𑀸 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑀸 𑀯𑀸. 𑀅𑀧𑀭𑁂𑀳𑀺𑀧𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀦𑀸𑀦𑀺𑀲𑁆𑀲𑀺𑀢𑀸𑀬 𑀯𑀢𑁆𑀣𑀩𑁆𑀩𑀁 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺, 𑀊𑀦𑀧𑀜𑁆𑀘𑀯𑀲𑁆𑀲𑀸 𑀳𑁄𑀢𑀺. 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀦𑀺𑀲𑁆𑀲𑀺𑀢𑀸𑀬 𑀯𑀢𑁆𑀣𑀩𑁆𑀩𑀁 𑁋 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀲𑀸𑀯𑀲𑁂𑀲𑀸𑀦𑀯𑀲𑁂𑀲𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀧𑀜𑁆𑀘𑀯𑀲𑁆𑀲𑀸 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀯𑀲𑁆𑀲𑀸 𑀯𑀸.
𑀧𑀜𑁆𑀘 𑀆𑀤𑀻𑀦𑀯𑀸 𑀅𑀧𑀸𑀲𑀸𑀤𑀺𑀓𑁂 𑁋 𑀅𑀢𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀉𑀧𑀯𑀤𑀢𑀺, 𑀅𑀦𑀼𑀯𑀺𑀘𑁆𑀘𑀧𑀺 𑀯𑀺𑀜𑁆𑀜𑀽 𑀕𑀭𑀳𑀦𑁆𑀢𑀺, 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀧𑀜𑁆𑀘𑀸𑀦𑀺𑀲𑀁𑀲𑀸 𑀧𑀸𑀲𑀸𑀤𑀺𑀓𑁂 𑁋 𑀅𑀢𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀦 𑀉𑀧𑀯𑀤𑀢𑀺, 𑀅𑀦𑀼𑀯𑀺𑀘𑁆𑀘𑀧𑀺 𑀯𑀺𑀜𑁆𑀜𑀽 𑀧𑀲𑀁𑀲𑀦𑁆𑀢𑀺, 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀺, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀅𑀧𑀭𑁂𑀧𑀺 𑀧𑀜𑁆𑀘 𑀆𑀤𑀻𑀦𑀯𑀸 𑀅𑀧𑀸𑀲𑀸𑀤𑀺𑀓𑁂 𑁋 𑀅𑀧𑁆𑀧𑀲𑀦𑁆𑀦𑀸 𑀦 𑀧𑀲𑀻𑀤𑀦𑁆𑀢𑀺, 𑀧𑀲𑀦𑁆𑀦𑀸𑀦𑀁 𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀁 𑀳𑁄𑀢𑀺, 𑀲𑀢𑁆𑀣𑀼𑀲𑀸𑀲𑀦𑀁 𑀅𑀓𑀢𑀁 𑀳𑁄𑀢𑀺, 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀦𑀸𑀧𑀚𑁆𑀚𑀢𑀺, 𑀘𑀺𑀢𑁆𑀢𑀫𑀲𑁆𑀲 𑀦 𑀧𑀲𑀻𑀤𑀢𑀺. 𑀧𑀜𑁆𑀘𑀸𑀦𑀺𑀲𑀁𑀲𑀸 𑀧𑀸𑀲𑀸𑀤𑀺𑀓𑁂 𑁋 𑀅𑀧𑁆𑀧𑀲𑀦𑁆𑀦𑀸 𑀧𑀲𑀻𑀤𑀦𑁆𑀢𑀺, 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑀳𑁄𑀢𑀺, 𑀲𑀢𑁆𑀣𑀼𑀲𑀸𑀲𑀦𑀁 𑀓𑀢𑀁 𑀳𑁄𑀢𑀺, 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀫𑀲𑁆𑀲 𑀧𑀲𑀻𑀤𑀢𑀺. 𑀧𑀜𑁆𑀘 𑀆𑀤𑀻𑀦𑀯𑀸 𑀓𑀼𑀮𑀽𑀧𑀓𑁂 𑁋 𑀅𑀦𑀸𑀫𑀦𑁆𑀢𑀘𑀸𑀭𑁂 𑀆𑀧𑀚𑁆𑀚𑀢𑀺, 𑀭𑀳𑁄 𑀦𑀺𑀲𑀚𑁆𑀚𑀸𑀬 𑀆𑀧𑀚𑁆𑀚𑀢𑀺, 𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀆𑀧𑀚𑁆𑀚𑀢𑀺, 𑀫𑀸𑀢𑀼𑀕𑀸𑀫𑀲𑁆𑀲 𑀉𑀢𑁆𑀢𑀭𑀺𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀧𑀚𑁆𑀚𑀢𑀺, 𑀓𑀸𑀫𑀲𑀗𑁆𑀓𑀧𑁆𑀧𑀩𑀳𑀼𑀮𑁄 𑀘 𑀯𑀺𑀳𑀭𑀢𑀺. 𑀧𑀜𑁆𑀘 𑀆𑀤𑀻𑀦𑀯𑀸 𑀓𑀼𑀮𑀽𑀧𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑁋 𑀅𑀢𑀺𑀯𑁂𑀮𑀁 𑀓𑀼𑀮𑁂𑀲𑀼 𑀲𑀁𑀲𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀫𑀸𑀢𑀼𑀕𑀸𑀫𑀲𑁆𑀲 𑀅𑀪𑀺𑀡𑁆𑀳𑀤𑀲𑁆𑀲𑀦𑀁, 𑀤𑀲𑁆𑀲𑀦𑁂 𑀲𑀢𑀺 𑀲𑀁𑀲𑀕𑁆𑀕𑁄, 𑀲𑀁𑀲𑀕𑁆𑀕𑁂 𑀲𑀢𑀺 𑀯𑀺𑀲𑁆𑀲𑀸𑀲𑁄, 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀑𑀢𑀸𑀭𑁄, 𑀑𑀢𑀺𑀡𑁆𑀡𑀘𑀺𑀢𑁆𑀢𑀲𑁆𑀲𑁂𑀢𑀁 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀅𑀦𑀪𑀺𑀭𑀢𑁄 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀢𑀺 𑀅𑀜𑁆𑀜𑀢𑀭𑀁 𑀯𑀸 𑀲𑀁𑀓𑀺𑀮𑀺𑀝𑁆𑀞𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀲𑁆𑀲𑀢𑀺 𑀲𑀺𑀓𑁆𑀔𑀁 𑀯𑀸 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀲𑁆𑀲𑀢𑀺.
[𑀧𑀸𑀘𑀺. 𑁯𑁨] 𑀧𑀜𑁆𑀘 𑀩𑀻𑀚𑀚𑀸𑀢𑀸𑀦𑀺 𑁋 𑀫𑀽𑀮𑀩𑀻𑀚𑀁, 𑀔𑀦𑁆𑀥𑀩𑀻𑀚𑀁, 𑀨𑀴𑀼𑀩𑀻𑀚𑀁, 𑀅𑀕𑁆𑀕𑀩𑀻𑀚𑀁, 𑀩𑀻𑀚𑀩𑀻𑀚𑀜𑁆𑀜𑁂𑀯 [𑀩𑀻𑀚𑀩𑀻𑀚𑀫𑁂𑀯 (𑀓.)] 𑀧𑀜𑁆𑀘𑀫𑀁. 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑁋 𑀅𑀕𑁆𑀕𑀺𑀧𑀭𑀺𑀚𑀺𑀢𑀁, 𑀲𑀢𑁆𑀣𑀧𑀭𑀺𑀚𑀺𑀢𑀁, 𑀦𑀔𑀧𑀭𑀺𑀚𑀺𑀢𑀁, 𑀅𑀩𑀻𑀚𑀁, 𑀦𑀺𑀩𑁆𑀩𑀢𑁆𑀢𑀩𑀻𑀚𑀜𑁆𑀜𑁂𑀯 [𑀦𑀺𑀩𑁆𑀩𑀝𑁆𑀝𑀩𑀻𑀚𑀜𑁆𑀜𑁂𑀯 (𑀲𑀻.), 𑀦𑀺𑀩𑁆𑀩𑀝𑀩𑀻𑀚𑀜𑁆𑀜𑁂𑀯 (𑀲𑁆𑀬𑀸.), 𑀦𑀺𑀧𑁆𑀧𑀝𑁆𑀝𑀩𑀻𑀚𑀜𑁆𑀜𑁂𑀯 (𑀓.)] 𑀧𑀜𑁆𑀘𑀫𑀁. 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑁋 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀧𑀞𑀫𑀸 𑀯𑀺𑀲𑀼𑀤𑁆𑀥𑀺; 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀤𑀼𑀢𑀺𑀬𑀸 𑀯𑀺𑀲𑀼𑀤𑁆𑀥𑀺; 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀢𑀢𑀺𑀬𑀸 𑀯𑀺𑀲𑀼𑀤𑁆𑀥𑀺; 𑀦𑀺𑀤𑀸𑀦𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀢𑁂𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁆𑀯𑁂 𑀅𑀦𑀺𑀬𑀢𑁂 𑀉𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑁂𑀲𑀁 𑀲𑀼𑀢𑁂𑀦 𑀲𑀸𑀯𑁂𑀢𑀩𑁆𑀩𑀁, 𑀅𑀬𑀁 𑀘𑀢𑀼𑀢𑁆𑀣𑀸 𑀯𑀺𑀲𑀼𑀤𑁆𑀥𑀺; 𑀯𑀺𑀢𑁆𑀣𑀸𑀭𑁂𑀦𑁂𑀯 𑀧𑀜𑁆𑀘𑀫𑀻. 𑀅𑀧𑀭𑀸𑀧𑀺 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑁋 𑀲𑀼𑀢𑁆𑀢𑀼𑀤𑁆𑀤𑁂𑀲𑁄, 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄, 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑁄, 𑀧𑀯𑀸𑀭𑀡𑀸, 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄𑀬𑁂𑀯 𑀧𑀜𑁆𑀘𑀫𑁄. 𑀧𑀜𑁆𑀘𑀸𑀦𑀺𑀲𑀁𑀲𑀸 𑀯𑀺𑀦𑀬𑀥𑀭𑁂 𑁋 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀼𑀕𑀼𑀢𑁆𑀢𑁄 𑀳𑁄𑀢𑀺 𑀲𑀼𑀭𑀓𑁆𑀔𑀺𑀢𑁄, 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀦𑀁 𑀧𑀝𑀺𑀲𑀭𑀡𑀁 𑀳𑁄𑀢𑀺, 𑀯𑀺𑀲𑀸𑀭𑀤𑁄 𑀲𑀗𑁆𑀖𑀫𑀚𑁆𑀛𑁂 𑀯𑁄𑀳𑀭𑀢𑀺, 𑀧𑀘𑁆𑀘𑀢𑁆𑀣𑀺𑀓𑁂 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀧𑀜𑁆𑀘 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺. 𑀧𑀜𑁆𑀘 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀻𑀢𑀺.
𑀧𑀜𑁆𑀘𑀓𑀁 𑀦𑀺𑀝𑁆𑀞𑀺𑀢𑀁.
𑀢𑀲𑁆𑀲𑀼𑀤𑁆𑀤𑀸𑀦𑀁 𑁋
𑀆𑀧𑀢𑁆𑀢𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸, 𑀯𑀺𑀦𑀻𑀢𑀸𑀦𑀦𑁆𑀢𑀭𑁂𑀦 𑀘;
𑀧𑀼𑀕𑁆𑀕𑀮𑀸 𑀙𑁂𑀤𑀦𑀸 𑀘𑁂𑀯, 𑀆𑀧𑀚𑁆𑀚𑀢𑀺 𑀘 𑀧𑀘𑁆𑀘𑀬𑀸.
𑀦 𑀉𑀧𑁂𑀢𑀺 𑀉𑀧𑁂𑀢𑀺 𑀘, 𑀓𑀧𑁆𑀧𑀦𑁆𑀢𑀼𑀲𑀗𑁆𑀓𑀺𑀢𑁂𑀮𑀜𑁆𑀘;
𑀯𑀲𑀁 𑀩𑁆𑀬𑀲𑀦𑀸 𑀲𑀫𑁆𑀧𑀤𑀸, 𑀧𑀲𑁆𑀲𑀤𑁆𑀥𑀺 𑀧𑀼𑀕𑁆𑀕𑀮𑁂𑀦 𑀘.
𑀲𑁄𑀲𑀸𑀦𑀺𑀓𑀁 𑀔𑀸𑀬𑀺𑀢𑀜𑁆𑀘, 𑀣𑁂𑀬𑁆𑀬𑀁 𑀘𑁄𑀭𑁄 𑀘 𑀯𑀼𑀘𑁆𑀘𑀢𑀺;
𑀅𑀯𑀺𑀲𑁆𑀲𑀚𑁆𑀚𑀺 𑀅𑀯𑁂𑀪𑀗𑁆𑀕𑀺, 𑀓𑀸𑀬𑀢𑁄 𑀓𑀸𑀬𑀯𑀸𑀘𑀢𑁄.
𑀤𑁂𑀲𑀦𑀸 𑀲𑀗𑁆𑀖𑀁 𑀉𑀤𑁆𑀤𑁂𑀲𑀁, 𑀧𑀘𑁆𑀘𑀦𑁆𑀢𑀺𑀓𑀣𑀺𑀦𑁂𑀦 𑀘;
𑀓𑀫𑁆𑀫𑀸𑀦𑀺 𑀬𑀸𑀯𑀢𑀢𑀺𑀬𑀁, 𑀧𑀸𑀭𑀸𑀚𑀺𑀣𑀼𑀮𑁆𑀮𑀤𑀼𑀓𑁆𑀓𑀝𑀁.
𑀅𑀓𑀧𑁆𑀧𑀺𑀬𑀁 𑀓𑀧𑁆𑀧𑀺𑀬𑀜𑁆𑀘, 𑀅𑀧𑀼𑀜𑁆𑀜𑀤𑀼𑀯𑀺𑀦𑁄𑀤𑀬𑀸;
𑀲𑀫𑁆𑀫𑀚𑁆𑀚𑀦𑀻 𑀅𑀧𑀭𑁂 𑀘, 𑀪𑀸𑀲𑀁 𑀆𑀧𑀢𑁆𑀢𑀺𑀫𑁂𑀯 𑀘.
𑀅𑀥𑀺𑀓𑀭𑀡𑀁 𑀯𑀢𑁆𑀣𑀼 𑀜𑀢𑁆𑀢𑀺, 𑀆𑀧𑀢𑁆𑀢𑀸 𑀉𑀪𑀬𑀸𑀦𑀺 𑀘;
𑀮𑀳𑀼𑀓𑀝𑁆𑀞𑀫𑀓𑀸 𑀏𑀢𑁂, 𑀓𑀡𑁆𑀳𑀲𑀼𑀓𑁆𑀓𑀸 𑀯𑀺𑀚𑀸𑀦𑀣.
𑀅𑀭𑀜𑁆𑀜𑀁 𑀧𑀺𑀡𑁆𑀟𑀧𑀸𑀢𑀜𑁆𑀘, 𑀧𑀁𑀲𑀼𑀭𑀼𑀓𑁆𑀔𑀲𑀼𑀲𑀸𑀦𑀺𑀓𑀸;
𑀅𑀩𑁆𑀪𑁄𑀓𑀸𑀲𑁄 𑀘𑀻𑀯𑀭𑀜𑁆𑀘, 𑀲𑀧𑀤𑀸𑀦𑁄 𑀦𑀺𑀲𑀚𑁆𑀚𑀺𑀓𑁄.
𑀲𑀦𑁆𑀣𑀢𑀺 𑀔𑀮𑀼 𑀧𑀘𑁆𑀙𑀸𑀧𑀺, 𑀧𑀢𑁆𑀢𑀧𑀺𑀡𑁆𑀟𑀺𑀓𑀫𑁂𑀯 𑀘;
𑀉𑀧𑁄𑀲𑀣𑀁 𑀧𑀯𑀸𑀭𑀡𑀁, 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀧𑀺 𑀘.
𑀓𑀡𑁆𑀳𑀲𑀼𑀓𑁆𑀓𑀧𑀤𑀸 𑀏𑀢𑁂, 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀢𑁂 𑀢𑀣𑀸;
𑀅𑀧𑀸𑀲𑀸𑀤𑀺𑀓𑀧𑀸𑀲𑀸𑀤𑀺, 𑀢𑀣𑁂𑀯 𑀅𑀧𑀭𑁂 𑀤𑀼𑀯𑁂.
𑀓𑀼𑀮𑀽𑀧𑀓𑁂 𑀅𑀢𑀺𑀯𑁂𑀮𑀁, 𑀩𑀻𑀚𑀁 𑀲𑀫𑀡𑀓𑀧𑁆𑀧𑀺 𑀘;
𑀯𑀺𑀲𑀼𑀤𑁆𑀥𑀺 𑀅𑀧𑀭𑁂 𑀘𑁂𑀯, 𑀯𑀺𑀦𑀬𑀸𑀥𑀫𑁆𑀫𑀺𑀓𑁂𑀦 𑀘;
𑀥𑀫𑁆𑀫𑀺𑀓𑀸 𑀘 𑀢𑀣𑀸 𑀯𑀼𑀢𑁆𑀢𑀸, 𑀦𑀺𑀝𑁆𑀞𑀺𑀢𑀸 𑀲𑀼𑀤𑁆𑀥𑀺𑀧𑀜𑁆𑀘𑀓𑀸𑀢𑀺.
𑁬. 𑀙𑀓𑁆𑀓𑀯𑀸𑀭𑁄
𑁩𑁨𑁬. [𑀤𑀻. 𑀦𑀺. 𑁩.𑁩𑁨𑁪] 𑀙 𑀅𑀕𑀸𑀭𑀯𑀸. 𑀙 𑀕𑀸𑀭𑀯𑀸. 𑀙 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀙 𑀲𑀸𑀫𑀻𑀘𑀺𑀬𑁄. 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸. 𑀙𑀘𑁆𑀙𑁂𑀤𑀦𑀓𑀸 𑀆𑀧𑀢𑁆𑀢𑀺𑀬𑁄. 𑀙𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀙𑀸𑀦𑀺𑀲𑀁𑀲𑀸 𑀯𑀺𑀦𑀬𑀥𑀭𑁂. 𑀙 𑀧𑀭𑀫𑀸𑀦𑀺. 𑀙𑀸𑀭𑀢𑁆𑀢𑀁 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀩𑁆𑀩𑀁. 𑀙 𑀘𑀻𑀯𑀭𑀸𑀦𑀺. 𑀙 𑀭𑀚𑀦𑀸𑀦𑀺. 𑀙 𑀆𑀧𑀢𑁆𑀢𑀺𑀬𑁄 𑀓𑀸𑀬𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺 𑀦 𑀯𑀸𑀘𑀢𑁄. 𑀙 𑀆𑀧𑀢𑁆𑀢𑀺𑀬𑁄 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺 𑀦 𑀓𑀸𑀬𑀢𑁄. 𑀙 𑀆𑀧𑀢𑁆𑀢𑀺𑀬𑁄 𑀓𑀸𑀬𑀢𑁄 𑀘 𑀯𑀸𑀘𑀢𑁄 𑀘 𑀘𑀺𑀢𑁆𑀢𑀢𑁄 𑀘 𑀲𑀫𑀼𑀝𑁆𑀞𑀦𑁆𑀢𑀺. 𑀙 𑀓𑀫𑁆𑀫𑀸𑀦𑀺. 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺. 𑀙 𑀅𑀦𑀼𑀯𑀸𑀤𑀫𑀽𑀮𑀸𑀦𑀺. 𑀙 𑀲𑀸𑀭𑀡𑀻𑀬𑀸 𑀥𑀫𑁆𑀫𑀸 𑀤𑀻𑀖𑀲𑁄. 𑀙 𑀯𑀺𑀤𑀢𑁆𑀣𑀺𑀬𑁄, 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸, 𑀢𑀺𑀭𑀺𑀬𑀁 𑀙 𑀯𑀺𑀤𑀢𑁆𑀣𑀺𑀬𑁄. 𑀙 𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑁄 𑀆𑀘𑀭𑀺𑀬𑀫𑁆𑀳𑀸. 𑀙 𑀦𑀳𑀸𑀦𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄 𑁋 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀢𑀺, 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺.
[𑀫𑀳𑀸𑀯. 𑁮𑁫 𑀆𑀤𑀬𑁄] 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑁋 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸.
𑀅𑀧𑀭𑁂𑀳𑀺𑀧𑀺 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑁋 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀻𑀮𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀧𑀜𑁆𑀜𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀧𑀜𑁆𑀜𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀅𑀢𑁆𑀢𑀦𑀸 𑀅𑀲𑁂𑀓𑁆𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀧𑀭𑀁 𑀅𑀲𑁂𑀓𑁆𑀔𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀲𑀫𑀸𑀤𑀧𑁂𑀢𑀸; 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸.
𑀅𑀧𑀭𑁂𑀳𑀺𑀧𑀺 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑁋 𑀲𑀤𑁆𑀥𑁄 𑀳𑁄𑀢𑀺, 𑀳𑀺𑀭𑀺𑀫𑀸 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀳𑁄𑀢𑀺, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸.
𑀅𑀧𑀭𑁂𑀳𑀺𑀧𑀺 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑁋 𑀦 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀚𑁆𑀛𑀸𑀘𑀸𑀭𑁂 𑀆𑀘𑀸𑀭𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀦 𑀅𑀢𑀺𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀯𑀺𑀧𑀦𑁆𑀦𑁄 𑀳𑁄𑀢𑀺, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀳𑁄𑀢𑀺, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸.
𑀅𑀧𑀭𑁂𑀳𑀺𑀧𑀺 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑁋 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀕𑀺𑀮𑀸𑀦𑀁 𑀉𑀧𑀝𑁆𑀞𑀸𑀢𑀼𑀁 𑀯𑀸 𑀉𑀧𑀝𑁆𑀞𑀸𑀧𑁂𑀢𑀼𑀁 𑀯𑀸, 𑀅𑀦𑀪𑀺𑀭𑀢𑀁 𑀯𑀽𑀧𑀓𑀸𑀲𑁂𑀢𑀼𑀁 𑀯𑀸 𑀯𑀽𑀧𑀓𑀸𑀲𑀸𑀧𑁂𑀢𑀼𑀁 𑀯𑀸 [𑀅𑀦𑀪𑀺𑀭𑀢𑀺𑀁 (𑀓.)], 𑀉𑀧𑁆𑀧𑀦𑁆𑀦𑀁 𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀢𑁄 𑀯𑀺𑀦𑁄𑀤𑁂𑀢𑀼𑀁 [𑀯𑀺𑀦𑁄𑀤𑁂𑀢𑀼𑀁 𑀯𑀸 𑀯𑀺𑀦𑁄𑀤𑀸𑀧𑁂𑀢𑀼𑀁 𑀯𑀸 (𑀲𑁆𑀬𑀸.) 𑀫𑀳𑀸𑀯. 𑁮𑁫], 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀚𑀸𑀦𑀸𑀢𑀺, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸.
𑀅𑀧𑀭𑁂𑀳𑀺𑀧𑀺 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑁋 𑀧𑀝𑀺𑀩𑀮𑁄 𑀳𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀁 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀁 𑀯𑀸 𑀆𑀪𑀺𑀲𑀫𑀸𑀘𑀸𑀭𑀺𑀓𑀸𑀬 𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀸𑀧𑁂𑀢𑀼𑀁, 𑀆𑀤𑀺𑀩𑁆𑀭𑀳𑁆𑀫𑀘𑀸𑀭𑀺𑀬𑀓𑀸𑀬 𑀲𑀺𑀓𑁆𑀔𑀸𑀬 𑀯𑀺𑀦𑁂𑀢𑀼𑀁, 𑀅𑀪𑀺𑀥𑀫𑁆𑀫𑁂 𑀯𑀺𑀦𑁂𑀢𑀼𑀁, 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀼𑀁, 𑀉𑀧𑁆𑀧𑀦𑁆𑀦𑀁 𑀤𑀺𑀝𑁆𑀞𑀺𑀕𑀢𑀁 𑀥𑀫𑁆𑀫𑀢𑁄 𑀯𑀺𑀯𑁂𑀘𑁂𑀢𑀼𑀁, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸.
𑀅𑀧𑀭𑁂𑀳𑀺𑀧𑀺 𑀙𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄 𑁋 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀸𑀦𑀺 𑀲𑀼𑀧𑁆𑀧𑀯𑀢𑁆𑀢𑀻𑀦𑀺 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀲𑀼𑀢𑁆𑀢𑀲𑁄 𑀅𑀦𑀼𑀩𑁆𑀬𑀜𑁆𑀚𑀦𑀲𑁄, 𑀤𑀲𑀯𑀲𑁆𑀲𑁄 𑀯𑀸 𑀳𑁄𑀢𑀺 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁄 𑀯𑀸.
𑀙 𑀅𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀺, 𑀙 𑀥𑀫𑁆𑀫𑀺𑀓𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀸𑀦𑀻𑀢𑀺.
𑀙𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.
𑀢𑀲𑁆𑀲𑀼𑀤𑁆𑀤𑀸𑀦𑀁 𑁋
𑀅𑀕𑀸𑀭𑀯𑀸 𑀕𑀸𑀭𑀯𑀸 𑀘, 𑀯𑀺𑀦𑀻𑀢𑀸 𑀲𑀸𑀫𑀻𑀘𑀺𑀧𑀺 𑀘;
𑀲𑀫𑀼𑀝𑁆𑀞𑀸𑀦𑀸 𑀙𑁂𑀤𑀦𑀸 𑀘𑁂𑀯, 𑀆𑀓𑀸𑀭𑀸𑀦𑀺𑀲𑀁𑀲𑁂𑀦 𑀘.
𑀧𑀭𑀫𑀸𑀦𑀺 𑀘 𑀙𑀸𑀭𑀢𑁆𑀢𑀁, 𑀘𑀻𑀯𑀭𑀁 𑀭𑀚𑀦𑀸𑀦𑀺 𑀘;
𑀓𑀸𑀬𑀢𑁄 𑀘𑀺𑀢𑁆𑀢𑀢𑁄 𑀘𑀸𑀧𑀺, 𑀯𑀸𑀘𑀢𑁄 𑀘𑀺𑀢𑁆𑀢𑀢𑁄𑀧𑀺 𑀘.
𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀢𑁄 𑀘, 𑀓𑀫𑁆𑀫𑀯𑀺𑀯𑀸𑀤𑀫𑁂𑀯 𑀘;
𑀅𑀦𑀼𑀯𑀸𑀤𑀸 𑀤𑀻𑀖𑀲𑁄 𑀘, 𑀢𑀺𑀭𑀺𑀬𑀁 𑀦𑀺𑀲𑁆𑀲𑀬𑁂𑀦 𑀘.
𑀅𑀦𑀼𑀧𑀜𑁆𑀜𑀢𑁆𑀢𑀺 𑀆𑀤𑀸𑀬, 𑀲𑀫𑀸𑀤𑀸𑀬 𑀢𑀣𑁂𑀯 𑀘;
𑀅𑀲𑁂𑀓𑁆𑀔𑁂 𑀲𑀫𑀸𑀤𑀧𑁂𑀢𑀸, 𑀲𑀤𑁆𑀥𑁄 𑀅𑀥𑀺𑀲𑀻𑀮𑁂𑀦 𑀘;