𑁫. 𑀲𑁄𑀴𑀲𑀓𑀫𑁆𑀫𑀸𑀤𑀺

𑁪𑁭𑁮. 𑀓𑀢𑀺 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀲𑁄𑀴𑀲 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀓𑀫𑁆𑀫𑀤𑁄𑀲𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀤𑁆𑀯𑀸𑀤𑀲 𑀓𑀫𑁆𑀫𑀤𑁄𑀲𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀘𑀢𑀲𑁆𑀲𑁄 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀙 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀧𑀸𑀭𑀸𑀚𑀺𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀅𑀝𑁆𑀞 𑀧𑀸𑀭𑀸𑀚𑀺𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀢𑁂𑀯𑀻𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀅𑀦𑀺𑀬𑀢𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀤𑁆𑀯𑁂 𑀅𑀦𑀺𑀬𑀢𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀤𑁆𑀯𑁂𑀘𑀢𑁆𑀢𑀸𑀮𑀻𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀧𑀸𑀘𑀺𑀢𑁆𑀢𑀺𑀬𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀅𑀝𑁆𑀞𑀸𑀲𑀻𑀢𑀺𑀲𑀢𑀁 𑀧𑀸𑀘𑀺𑀢𑁆𑀢𑀺𑀬𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀤𑁆𑀯𑀸𑀤𑀲 𑀧𑀸𑀝𑀺𑀤𑁂𑀲𑀦𑀻𑀬𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀲𑁂𑀔𑀺𑀬𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀧𑀜𑁆𑀘𑀲𑀢𑁆𑀢𑀢𑀺 𑀲𑁂𑀔𑀺𑀬𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀬𑀸𑀯 𑀲𑀼𑀧𑀼𑀘𑁆𑀙𑀺𑀢𑀁 𑀢𑀬𑀸, 𑀬𑀸𑀯 𑀲𑀼𑀯𑀺𑀲𑁆𑀲𑀚𑁆𑀚𑀺𑀢𑀁 𑀫𑀬𑀸;

𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀬 𑀯𑀸, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀅𑀲𑀼𑀢𑁆𑀢𑀓𑀦𑁆𑀢𑀺.

𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀁 𑀦𑀺𑀝𑁆𑀞𑀺𑀢𑀁.