𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀁

𑁧. 𑀓𑀸𑀬𑀺𑀓𑀸𑀤𑀺𑀆𑀧𑀢𑁆𑀢𑀺

𑁪𑁭𑁪. 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀓𑀸𑀬𑀺𑀓𑀸, 𑀓𑀢𑀺 𑀯𑀸𑀘𑀲𑀺𑀓𑀸 𑀓𑀢𑀸.

𑀙𑀸𑀤𑁂𑀦𑁆𑀢𑀲𑁆𑀲 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀲𑀁𑀲𑀕𑁆𑀕𑀧𑀘𑁆𑀘𑀬𑀸.

𑀙𑀸𑀧𑀢𑁆𑀢𑀺𑀬𑁄 𑀓𑀸𑀬𑀺𑀓𑀸, 𑀙 𑀯𑀸𑀘𑀲𑀺𑀓𑀸 𑀓𑀢𑀸;

𑀙𑀸𑀤𑁂𑀦𑁆𑀢𑀲𑁆𑀲 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀲𑀁𑀲𑀕𑁆𑀕𑀧𑀘𑁆𑀘𑀬𑀸.

𑀅𑀭𑀼𑀡𑀼𑀕𑁆𑀕𑁂 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀬𑀸𑀯𑀢𑀢𑀺𑀬𑀓𑀸;

𑀓𑀢𑁂𑀢𑁆𑀣 𑀅𑀝𑁆𑀞 𑀯𑀢𑁆𑀣𑀼𑀓𑀸, 𑀓𑀢𑀺𑀳𑀺 𑀲𑀩𑁆𑀩𑀲𑀗𑁆𑀕𑀳𑁄.

𑀅𑀭𑀼𑀡𑀼𑀕𑁆𑀕𑁂 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀤𑁆𑀯𑁂 𑀬𑀸𑀯𑀢𑀢𑀺𑀬𑀓𑀸;

𑀏𑀓𑁂𑀢𑁆𑀣 𑀅𑀝𑁆𑀞 𑀯𑀢𑁆𑀣𑀼𑀓𑀸, 𑀏𑀓𑁂𑀦 𑀲𑀩𑁆𑀩𑀲𑀗𑁆𑀕𑀳𑁄.

𑀯𑀺𑀦𑀬𑀲𑁆𑀲 𑀓𑀢𑀺 𑀫𑀽𑀮𑀸𑀦𑀺, 𑀬𑀸𑀦𑀺 𑀩𑀼𑀤𑁆𑀥𑁂𑀦 𑀧𑀜𑁆𑀜𑀢𑁆𑀢𑀸;

𑀯𑀺𑀦𑀬𑀕𑀭𑀼𑀓𑀸 𑀓𑀢𑀺 𑀯𑀼𑀢𑁆𑀢𑀸, 𑀤𑀼𑀝𑁆𑀞𑀼𑀮𑁆𑀮𑀘𑁆𑀙𑀸𑀤𑀦𑀸 𑀓𑀢𑀺.

𑀯𑀺𑀦𑀬𑀲𑁆𑀲 𑀤𑁆𑀯𑁂 𑀫𑀽𑀮𑀸𑀦𑀺, 𑀬𑀸𑀦𑀺 𑀩𑀼𑀤𑁆𑀥𑁂𑀦 𑀧𑀜𑁆𑀜𑀢𑁆𑀢𑀸;

𑀯𑀺𑀦𑀬𑀕𑀭𑀼𑀓𑀸 𑀤𑁆𑀯𑁂 𑀯𑀼𑀢𑁆𑀢𑀸, 𑀤𑁆𑀯𑁂 𑀤𑀼𑀝𑁆𑀞𑀼𑀮𑁆𑀮𑀘𑁆𑀙𑀸𑀤𑀦𑀸.

𑀕𑀸𑀫𑀦𑁆𑀢𑀭𑁂 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀦𑀤𑀺𑀧𑀸𑀭𑀧𑀘𑁆𑀘𑀬𑀸;

𑀓𑀢𑀺𑀫𑀁𑀲𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀁, 𑀓𑀢𑀺𑀫𑀁𑀲𑁂𑀲𑀼 𑀤𑀼𑀓𑁆𑀓𑀝𑀁.

𑀕𑀸𑀫𑀦𑁆𑀢𑀭𑁂 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀘𑀢𑀲𑁆𑀲𑁄 𑀦𑀤𑀺𑀧𑀸𑀭𑀧𑀘𑁆𑀘𑀬𑀸;

𑀏𑀓𑀫𑀁𑀲𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀦𑀯𑀫𑀁𑀲𑁂𑀲𑀼 𑀤𑀼𑀓𑁆𑀓𑀝𑀁.

𑀓𑀢𑀺 𑀯𑀸𑀘𑀲𑀺𑀓𑀸 𑀭𑀢𑁆𑀢𑀺𑀁, 𑀓𑀢𑀺 𑀯𑀸𑀘𑀲𑀺𑀓𑀸 𑀤𑀺𑀯𑀸;

𑀤𑀤𑀫𑀸𑀦𑀲𑁆𑀲 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀓𑀺𑀢𑁆𑀢𑀓𑀸.

𑀤𑁆𑀯𑁂 𑀯𑀸𑀘𑀲𑀺𑀓𑀸 𑀭𑀢𑁆𑀢𑀺𑀁, 𑀤𑁆𑀯𑁂 𑀯𑀸𑀘𑀲𑀺𑀓𑀸 𑀤𑀺𑀯𑀸;

𑀤𑀤𑀫𑀸𑀦𑀲𑁆𑀲 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀘𑀢𑁆𑀢𑀸𑀭𑁄 𑀘 𑀧𑀝𑀺𑀕𑁆𑀕𑀳𑁂.

𑁨. 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸𑀤𑀺𑀆𑀧𑀢𑁆𑀢𑀺

𑁪𑁭𑁫. 𑀓𑀢𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑁄, 𑀓𑀢𑀺 𑀲𑀧𑁆𑀧𑀝𑀺𑀓𑀫𑁆𑀫𑀸 𑀓𑀢𑀸;

𑀓𑀢𑁂𑀢𑁆𑀣 𑀅𑀧𑁆𑀧𑀝𑀺𑀓𑀫𑁆𑀫𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀧𑀜𑁆𑀘 𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑁄, 𑀙 𑀲𑀧𑁆𑀧𑀝𑀺𑀓𑀫𑁆𑀫𑀸 𑀓𑀢𑀸;

𑀏𑀓𑁂𑀢𑁆𑀣 𑀅𑀧𑁆𑀧𑀝𑀺𑀓𑀫𑁆𑀫𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀯𑀺𑀦𑀬𑀕𑀭𑀼𑀓𑀸 𑀓𑀢𑀺 𑀯𑀼𑀢𑁆𑀢𑀸, 𑀓𑀸𑀬𑀯𑀸𑀘𑀲𑀺𑀓𑀸𑀦𑀺 𑀘;

𑀓𑀢𑀺 𑀯𑀺𑀓𑀸𑀮𑁂 𑀥𑀜𑁆𑀜𑀭𑀲𑁄, 𑀓𑀢𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀲𑀫𑁆𑀫𑀼𑀢𑀺.

𑀯𑀺𑀦𑀬𑀕𑀭𑀼𑀓𑀸 𑀤𑁆𑀯𑁂 𑀯𑀼𑀢𑁆𑀢𑀸, 𑀓𑀸𑀬𑀯𑀸𑀘𑀲𑀺𑀓𑀸𑀦𑀺 𑀘;

𑀏𑀓𑁄 𑀯𑀺𑀓𑀸𑀮𑁂 𑀥𑀜𑁆𑀜𑀭𑀲𑁄, 𑀏𑀓𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀲𑀫𑁆𑀫𑀼𑀢𑀺.

𑀧𑀸𑀭𑀸𑀚𑀺𑀓𑀸 𑀓𑀸𑀬𑀺𑀓𑀸 𑀓𑀢𑀺, 𑀓𑀢𑀺 𑀲𑀁𑀯𑀸𑀲𑀓𑀪𑀽𑀫𑀺𑀬𑁄;

𑀓𑀢𑀺𑀦𑀁 𑀭𑀢𑁆𑀢𑀺𑀘𑁆𑀙𑁂𑀤𑁄, 𑀧𑀜𑁆𑀜𑀢𑁆𑀢𑀸 𑀤𑁆𑀯𑀗𑁆𑀕𑀼𑀮𑀸 𑀓𑀢𑀺.

𑀧𑀸𑀭𑀸𑀚𑀺𑀓𑀸 𑀓𑀸𑀬𑀺𑀓𑀸 𑀤𑁆𑀯𑁂, 𑀤𑁆𑀯𑁂 𑀲𑀁𑀯𑀸𑀲𑀓𑀪𑀽𑀫𑀺𑀬𑁄;

𑀤𑁆𑀯𑀺𑀦𑁆𑀦𑀁 𑀭𑀢𑁆𑀢𑀺𑀘𑁆𑀙𑁂𑀤𑁄, 𑀧𑀜𑁆𑀜𑀢𑁆𑀢𑀸 𑀤𑁆𑀯𑀗𑁆𑀕𑀼𑀮𑀸 𑀤𑀼𑀯𑁂.

𑀓𑀢𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸𑀦, 𑀓𑀢𑀺𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺;

𑀓𑀢𑁂𑀢𑁆𑀣 𑀧𑀞𑀫𑀸𑀧𑀢𑁆𑀢𑀺𑀓𑀸, 𑀜𑀢𑁆𑀢𑀺𑀬𑀸 𑀓𑀭𑀡𑀸 𑀓𑀢𑀺.

𑀤𑁆𑀯𑁂 𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸𑀦, 𑀤𑁆𑀯𑀻𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺;

𑀤𑁆𑀯𑁂𑀢𑁆𑀣 𑀧𑀞𑀫𑀸𑀧𑀢𑁆𑀢𑀺𑀓𑀸, 𑀜𑀢𑁆𑀢𑀺𑀬𑀸 𑀓𑀭𑀡𑀸 𑀤𑀼𑀯𑁂.

𑀧𑀸𑀡𑀸𑀢𑀺𑀧𑀸𑀢𑁂 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀯𑀸𑀘𑀸 𑀧𑀸𑀭𑀸𑀚𑀺𑀓𑀸 𑀓𑀢𑀺;

𑀑𑀪𑀸𑀲𑀦𑀸 𑀓𑀢𑀺 𑀯𑀼𑀢𑁆𑀢𑀸, 𑀲𑀜𑁆𑀘𑀭𑀺𑀢𑁆𑀢𑁂𑀦 𑀯𑀸 𑀓𑀢𑀺.

𑀧𑀸𑀡𑀸𑀢𑀺𑀧𑀸𑀢𑁂 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄;

𑀯𑀸𑀘𑀸 𑀧𑀸𑀭𑀸𑀚𑀺𑀓𑀸 𑀢𑀬𑁄;

𑀑𑀪𑀸𑀲𑀦𑀸 𑀢𑀬𑁄 𑀯𑀼𑀢𑁆𑀢𑀸;

𑀲𑀜𑁆𑀘𑀭𑀺𑀢𑁆𑀢𑁂𑀦 𑀯𑀸 𑀢𑀬𑁄.

𑀓𑀢𑀺 𑀧𑀼𑀕𑁆𑀕𑀮𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀓𑀢𑀺 𑀓𑀫𑁆𑀫𑀸𑀦𑀁 𑀲𑀗𑁆𑀕𑀳𑀸;

𑀦𑀸𑀲𑀺𑀢𑀓𑀸 𑀓𑀢𑀺 𑀯𑀼𑀢𑁆𑀢𑀸, 𑀓𑀢𑀺𑀦𑀁 𑀏𑀓𑀯𑀸𑀘𑀺𑀓𑀸.

𑀢𑀬𑁄 𑀧𑀼𑀕𑁆𑀕𑀮𑀸 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀢𑀬𑁄 𑀓𑀫𑁆𑀫𑀸𑀦𑀁 𑀲𑀗𑁆𑀕𑀳𑀸;

𑀦𑀸𑀲𑀺𑀢𑀓𑀸 𑀢𑀬𑁄 𑀯𑀼𑀢𑁆𑀢𑀸, 𑀢𑀺𑀡𑁆𑀡𑀦𑁆𑀦𑀁 𑀏𑀓𑀯𑀸𑀘𑀺𑀓𑀸.

𑀅𑀤𑀺𑀦𑁆𑀦𑀸𑀤𑀸𑀦𑁂 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀫𑁂𑀣𑀼𑀦𑀧𑀘𑁆𑀘𑀬𑀸;

𑀙𑀺𑀦𑁆𑀤𑀦𑁆𑀢𑀲𑁆𑀲 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀙𑀟𑁆𑀟𑀺𑀢𑀧𑀘𑁆𑀘𑀬𑀸.

𑀅𑀤𑀺𑀦𑁆𑀦𑀸𑀤𑀸𑀦𑁂 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀘𑀢𑀲𑁆𑀲𑁄 𑀫𑁂𑀣𑀼𑀦𑀧𑀘𑁆𑀘𑀬𑀸;

𑀙𑀺𑀦𑁆𑀤𑀦𑁆𑀢𑀲𑁆𑀲 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀙𑀟𑁆𑀟𑀺𑀢𑀧𑀘𑁆𑀘𑀬𑀸.

𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀯𑀕𑁆𑀕𑀲𑁆𑀫𑀺𑀁, 𑀧𑀸𑀘𑀺𑀢𑁆𑀢𑀺𑀬𑁂𑀦 𑀤𑀼𑀓𑁆𑀓𑀝𑀸;

𑀓𑀢𑁂𑀢𑁆𑀣 𑀦𑀯𑀓𑀸 𑀯𑀼𑀢𑁆𑀢𑀸, 𑀓𑀢𑀺𑀦𑀁 𑀘𑀻𑀯𑀭𑁂𑀦 𑀘.

𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀯𑀕𑁆𑀕𑀲𑁆𑀫𑀺𑀁, 𑀧𑀸𑀘𑀺𑀢𑁆𑀢𑀺𑀬𑁂𑀦 𑀤𑀼𑀓𑁆𑀓𑀝𑀸 𑀓𑀢𑀸;

𑀘𑀢𑀼𑀭𑁂𑀢𑁆𑀣 𑀦𑀯𑀓𑀸 𑀯𑀼𑀢𑁆𑀢𑀸, 𑀤𑁆𑀯𑀺𑀦𑁆𑀦𑀁 𑀘𑀻𑀯𑀭𑁂𑀦 𑀘.

𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀅𑀓𑁆𑀔𑀸𑀢𑀸, 𑀧𑀸𑀝𑀺𑀤𑁂𑀲𑀦𑀺𑀬𑀸 𑀓𑀢𑀺;

𑀪𑀼𑀜𑁆𑀚𑀦𑁆𑀢𑀸𑀫𑀓𑀥𑀜𑁆𑀜𑁂𑀦, 𑀧𑀸𑀘𑀺𑀢𑁆𑀢𑀺𑀬𑁂𑀦 𑀤𑀼𑀓𑁆𑀓𑀝𑀸 𑀓𑀢𑀺.

𑀪𑀺𑀓𑁆𑀔𑀼𑀦𑀻𑀦𑀜𑁆𑀘 𑀅𑀓𑁆𑀔𑀸𑀢𑀸, 𑀅𑀝𑁆𑀞 𑀧𑀸𑀝𑀺𑀤𑁂𑀲𑀦𑀻𑀬𑀸 𑀓𑀢𑀸;

𑀪𑀼𑀜𑁆𑀚𑀦𑁆𑀢𑀸𑀫𑀓𑀥𑀜𑁆𑀜𑁂𑀦, 𑀧𑀸𑀘𑀺𑀢𑁆𑀢𑀺𑀬𑁂𑀦 𑀤𑀼𑀓𑁆𑀓𑀝𑀸 𑀓𑀢𑀸.

𑀕𑀘𑁆𑀙𑀦𑁆𑀢𑀲𑁆𑀲 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀞𑀺𑀢𑀲𑁆𑀲 𑀘𑀸𑀧𑀺 𑀓𑀺𑀢𑁆𑀢𑀓𑀸;

𑀦𑀺𑀲𑀺𑀦𑁆𑀦𑀲𑁆𑀲 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀦𑀺𑀧𑀦𑁆𑀦𑀲𑁆𑀲𑀸𑀧𑀺 𑀓𑀺𑀢𑁆𑀢𑀓𑀸.

𑀕𑀘𑁆𑀙𑀦𑁆𑀢𑀲𑁆𑀲 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀞𑀺𑀢𑀲𑁆𑀲 𑀘𑀸𑀧𑀺 𑀢𑀢𑁆𑀢𑀓𑀸;

𑀦𑀺𑀲𑀺𑀦𑁆𑀦𑀲𑁆𑀲 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀦𑀺𑀧𑀦𑁆𑀦𑀲𑁆𑀲𑀸𑀧𑀺 𑀢𑀢𑁆𑀢𑀓𑀸.

𑁩. 𑀧𑀸𑀘𑀺𑀢𑁆𑀢𑀺𑀬𑀁

𑁪𑁭𑁬. 𑀓𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁, 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄.

𑀧𑀜𑁆𑀘 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁, 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄.

𑀓𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁, 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄.

𑀦 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁, 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄.

𑀓𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀓𑀢𑀺 𑀯𑀸𑀘𑀸𑀬 𑀤𑁂𑀲𑁂𑀬𑁆𑀬, 𑀯𑀼𑀢𑁆𑀢𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀧𑀜𑁆𑀘 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀏𑀓𑀯𑀸𑀘𑀸𑀬 𑀤𑁂𑀲𑁂𑀬𑁆𑀬, 𑀯𑀼𑀢𑁆𑀢𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀓𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀓𑀢𑀺 𑀯𑀸𑀘𑀸𑀬 𑀤𑁂𑀲𑁂𑀬𑁆𑀬, 𑀯𑀼𑀢𑁆𑀢𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀦𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀏𑀓𑀯𑀸𑀘𑀸𑀬 𑀤𑁂𑀲𑁂𑀬𑁆𑀬, 𑀯𑀼𑀢𑁆𑀢𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀓𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀓𑀺𑀜𑁆𑀘 𑀓𑀺𑀢𑁆𑀢𑁂𑀢𑁆𑀯𑀸 𑀤𑁂𑀲𑁂𑀬𑁆𑀬, 𑀯𑀼𑀢𑁆𑀢𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀧𑀜𑁆𑀘 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀤𑁂𑀲𑁂𑀬𑁆𑀬, 𑀯𑀼𑀢𑁆𑀢𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀓𑀢𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀓𑀺𑀜𑁆𑀘 𑀓𑀺𑀢𑁆𑀢𑁂𑀢𑁆𑀯𑀸 𑀤𑁂𑀲𑁂𑀬𑁆𑀬, 𑀯𑀼𑀢𑁆𑀢𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀦𑀯 𑀧𑀸𑀘𑀺𑀢𑁆𑀢𑀺𑀬𑀸𑀦𑀺, 𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀤𑁂𑀲𑁂𑀬𑁆𑀬, 𑀯𑀼𑀢𑁆𑀢𑀸 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀬𑀸𑀯𑀢𑀢𑀺𑀬𑀓𑁂 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀯𑁄𑀳𑀸𑀭𑀧𑀘𑁆𑀘𑀬𑀸;

𑀔𑀸𑀤𑀦𑁆𑀢𑀲𑁆𑀲 𑀓𑀢𑀺 𑀆𑀧𑀢𑁆𑀢𑀺𑀬𑁄, 𑀓𑀢𑀺 𑀪𑁄𑀚𑀦𑀧𑀘𑁆𑀘𑀬𑀸.

𑀬𑀸𑀯𑀢𑀢𑀺𑀬𑀓𑁂 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀙 𑀯𑁄𑀳𑀸𑀭𑀧𑀘𑁆𑀘𑀬𑀸;

𑀔𑀸𑀤𑀦𑁆𑀢𑀲𑁆𑀲 𑀢𑀺𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀪𑁄𑀚𑀦𑀧𑀘𑁆𑀘𑀬𑀸.

𑀲𑀩𑁆𑀩𑀸 𑀬𑀸𑀯𑀢𑀢𑀺𑀬𑀓𑀸, 𑀓𑀢𑀺 𑀞𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑀺;

𑀓𑀢𑀺𑀦𑀜𑁆𑀘𑁂𑀯 𑀆𑀧𑀢𑁆𑀢𑀺, 𑀓𑀢𑀺𑀦𑀁 𑀅𑀥𑀺𑀓𑀭𑀡𑁂𑀦 𑀘.

𑀲𑀩𑁆𑀩𑀸 𑀬𑀸𑀯𑀢𑀢𑀺𑀬𑀓𑀸, 𑀧𑀜𑁆𑀘 𑀞𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑀺;

𑀧𑀜𑁆𑀘𑀦𑁆𑀦𑀜𑁆𑀘𑁂𑀯 𑀆𑀧𑀢𑁆𑀢𑀺, 𑀧𑀜𑁆𑀘𑀦𑁆𑀦𑀁 𑀅𑀥𑀺𑀓𑀭𑀡𑁂𑀦 𑀘.

𑀓𑀢𑀺𑀦𑀁 𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀺, 𑀓𑀢𑀺𑀦𑀁 𑀯𑀽𑀧𑀲𑀫𑁂𑀦 𑀘;

𑀓𑀢𑀺𑀦𑀜𑁆𑀘𑁂𑀯 𑀅𑀦𑀸𑀧𑀢𑁆𑀢𑀺, 𑀓𑀢𑀺𑀳𑀺 𑀞𑀸𑀦𑁂𑀳𑀺 𑀲𑁄𑀪𑀢𑀺.

𑀧𑀜𑁆𑀘𑀦𑁆𑀦𑀁 𑀯𑀺𑀦𑀺𑀘𑁆𑀙𑀬𑁄 𑀳𑁄𑀢𑀺, 𑀧𑀜𑁆𑀘𑀦𑁆𑀦𑀁 𑀯𑀽𑀧𑀲𑀫𑁂𑀦 𑀘;

𑀧𑀜𑁆𑀘𑀦𑁆𑀦𑀜𑁆𑀘𑁂𑀯 𑀅𑀦𑀸𑀧𑀢𑁆𑀢𑀺, 𑀢𑀻𑀳𑀺 𑀞𑀸𑀦𑁂𑀳𑀺 𑀲𑁄𑀪𑀢𑀺.

𑀓𑀢𑀺 𑀓𑀸𑀬𑀺𑀓𑀸 𑀭𑀢𑁆𑀢𑀺𑀁, 𑀓𑀢𑀺 𑀓𑀸𑀬𑀺𑀓𑀸 𑀤𑀺𑀯𑀸;

𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀓𑀢𑀺 𑀆𑀧𑀢𑁆𑀢𑀺, 𑀓𑀢𑀺 𑀧𑀺𑀡𑁆𑀟𑀧𑀸𑀢𑀧𑀘𑁆𑀘𑀬𑀸.

𑀤𑁆𑀯𑁂 𑀓𑀸𑀬𑀺𑀓𑀸 𑀭𑀢𑁆𑀢𑀺𑀁, 𑀤𑁆𑀯𑁂 𑀓𑀸𑀬𑀺𑀓𑀸 𑀤𑀺𑀯𑀸;

𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀏𑀓𑀸 𑀆𑀧𑀢𑁆𑀢𑀺, 𑀏𑀓𑀸 𑀧𑀺𑀡𑁆𑀟𑀧𑀸𑀢𑀧𑀘𑁆𑀘𑀬𑀸.

𑀓𑀢𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀁, 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀤𑁂𑀲𑀬𑁂;

𑀉𑀓𑁆𑀔𑀺𑀢𑁆𑀢𑀓𑀸 𑀓𑀢𑀺 𑀯𑀼𑀢𑁆𑀢𑀸, 𑀓𑀢𑀺 𑀲𑀫𑁆𑀫𑀸𑀯𑀢𑁆𑀢𑀦𑀸.

𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀁, 𑀧𑀭𑁂𑀲𑀁 𑀲𑀤𑁆𑀥𑀸𑀬 𑀤𑁂𑀲𑀬𑁂;

𑀉𑀓𑁆𑀔𑀺𑀢𑁆𑀢𑀓𑀸 𑀢𑀬𑁄 𑀯𑀼𑀢𑁆𑀢𑀸, 𑀢𑁂𑀘𑀢𑁆𑀢𑀸𑀮𑀻𑀲 𑀲𑀫𑁆𑀫𑀸𑀯𑀢𑁆𑀢𑀦𑀸.

𑀓𑀢𑀺 𑀞𑀸𑀦𑁂 𑀫𑀼𑀲𑀸𑀯𑀸𑀤𑁄, 𑀓𑀢𑀺 𑀧𑀭𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀓𑀢𑀺 𑀧𑀸𑀝𑀺𑀤𑁂𑀲𑀦𑀻𑀬𑀸, 𑀓𑀢𑀺𑀦𑀁 𑀤𑁂𑀲𑀦𑀸𑀬 𑀘.

𑀧𑀜𑁆𑀘 𑀞𑀸𑀦𑁂 𑀫𑀼𑀲𑀸𑀯𑀸𑀤𑁄, 𑀘𑀼𑀤𑁆𑀤𑀲 𑀧𑀭𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀤𑁆𑀯𑀸𑀤𑀲 𑀧𑀸𑀝𑀺𑀤𑁂𑀲𑀦𑀻𑀬𑀸, 𑀘𑀢𑀼𑀦𑁆𑀦𑀁 𑀤𑁂𑀲𑀦𑀸𑀬 𑀘.

𑀓𑀢𑀗𑁆𑀕𑀺𑀓𑁄 𑀫𑀼𑀲𑀸𑀯𑀸𑀤𑁄, 𑀓𑀢𑀺 𑀉𑀧𑁄𑀲𑀣𑀗𑁆𑀕𑀸𑀦𑀺;

𑀓𑀢𑀺 𑀤𑀽𑀢𑁂𑀬𑁆𑀬𑀗𑁆𑀕𑀸𑀦𑀺, 𑀓𑀢𑀺 𑀢𑀺𑀢𑁆𑀣𑀺𑀬𑀯𑀢𑁆𑀢𑀦𑀸.

𑀅𑀝𑁆𑀞𑀗𑁆𑀕𑀺𑀓𑁄 𑀫𑀼𑀲𑀸𑀯𑀸𑀤𑁄, 𑀅𑀝𑁆𑀞 𑀉𑀧𑁄𑀲𑀣𑀗𑁆𑀕𑀸𑀦𑀺;

𑀅𑀝𑁆𑀞 𑀤𑀽𑀢𑁂𑀬𑁆𑀬𑀗𑁆𑀕𑀸𑀦𑀺, 𑀅𑀝𑁆𑀞 𑀢𑀺𑀢𑁆𑀣𑀺𑀬𑀯𑀢𑁆𑀢𑀦𑀸.

𑀓𑀢𑀺𑀯𑀸𑀘𑀺𑀓𑀸 𑀉𑀧𑀲𑀫𑁆𑀧𑀤𑀸, 𑀓𑀢𑀺𑀦𑀁 𑀧𑀘𑁆𑀘𑀼𑀝𑁆𑀞𑀸𑀢𑀩𑁆𑀩𑀁;

𑀓𑀢𑀺𑀦𑀁 𑀆𑀲𑀦𑀁 𑀤𑀸𑀢𑀩𑁆𑀩𑀁, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀓𑀢𑀺𑀳𑀺.

𑀅𑀝𑁆𑀞𑀯𑀸𑀘𑀺𑀓𑀸 𑀉𑀧𑀲𑀫𑁆𑀧𑀤𑀸, 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑀼𑀝𑁆𑀞𑀸𑀢𑀩𑁆𑀩𑀁;

𑀅𑀝𑁆𑀞𑀦𑁆𑀦𑀁 𑀆𑀲𑀦𑀁 𑀤𑀸𑀢𑀩𑁆𑀩𑀁, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀅𑀝𑁆𑀞𑀳𑀺.

𑀓𑀢𑀺𑀦𑀁 𑀙𑁂𑀚𑁆𑀚𑀁 𑀳𑁄𑀢𑀺, 𑀓𑀢𑀺𑀦𑀁 𑀣𑀼𑀮𑁆𑀮𑀘𑁆𑀘𑀬𑀁;

𑀓𑀢𑀺𑀦𑀜𑁆𑀘𑁂𑀯 𑀅𑀦𑀸𑀧𑀢𑁆𑀢𑀺, 𑀲𑀩𑁆𑀩𑁂𑀲𑀁 𑀏𑀓𑀯𑀢𑁆𑀣𑀼𑀓𑀸.

𑀏𑀓𑀲𑁆𑀲 𑀙𑁂𑀚𑁆𑀚𑀁 𑀳𑁄𑀢𑀺, 𑀘𑀢𑀼𑀦𑁆𑀦𑀁 𑀣𑀼𑀮𑁆𑀮𑀘𑁆𑀘𑀬𑀁;

𑀘𑀢𑀼𑀦𑁆𑀦𑀜𑁆𑀘𑁂𑀯 𑀅𑀦𑀸𑀧𑀢𑁆𑀢𑀺, 𑀲𑀩𑁆𑀩𑁂𑀲𑀁 𑀏𑀓𑀯𑀢𑁆𑀣𑀼𑀓𑀸.

𑀓𑀢𑀺 𑀆𑀖𑀸𑀢𑀯𑀢𑁆𑀣𑀽𑀦𑀺, 𑀓𑀢𑀺𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺;

𑀓𑀢𑁂𑀢𑁆𑀣 𑀧𑀞𑀫𑀸𑀧𑀢𑁆𑀢𑀺𑀓𑀸, 𑀜𑀢𑁆𑀢𑀺𑀬𑀸 𑀓𑀭𑀡𑀸 𑀓𑀢𑀺.

𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀺, 𑀦𑀯𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺;

𑀦𑀯𑁂𑀢𑁆𑀣 𑀧𑀞𑀫𑀸𑀧𑀢𑁆𑀢𑀺𑀓𑀸, 𑀜𑀢𑁆𑀢𑀺𑀬𑀸 𑀓𑀭𑀡𑀸 𑀦𑀯.

𑁪. 𑀅𑀯𑀦𑁆𑀤𑀦𑀻𑀬𑀧𑀼𑀕𑁆𑀕𑀮𑀸𑀤𑀺

𑁪𑁭𑁭. 𑀓𑀢𑀺 𑀧𑀼𑀕𑁆𑀕𑀮𑀸 𑀦𑀸𑀪𑀺𑀯𑀸𑀤𑁂𑀢𑀩𑁆𑀩𑀸, 𑀅𑀜𑁆𑀚𑀮𑀺𑀲𑀸𑀫𑀺𑀘𑁂𑀦 𑀘;

𑀓𑀢𑀺𑀦𑀁 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀓𑀢𑀺 𑀘𑀻𑀯𑀭𑀥𑀸𑀭𑀡𑀸.

𑀤𑀲 𑀧𑀼𑀕𑁆𑀕𑀮𑀸 𑀦𑀸𑀪𑀺𑀯𑀸𑀤𑁂𑀢𑀩𑁆𑀩𑀸, 𑀅𑀜𑁆𑀚𑀮𑀺𑀲𑀸𑀫𑀺𑀘𑁂𑀦 𑀘;

𑀤𑀲𑀦𑁆𑀦𑀁 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀤𑀲 𑀘𑀻𑀯𑀭𑀥𑀸𑀭𑀡𑀸.

𑀓𑀢𑀺𑀦𑀁 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁, 𑀤𑀸𑀢𑀩𑁆𑀩𑀁 𑀇𑀥 𑀘𑀻𑀯𑀭𑀁;

𑀓𑀢𑀺𑀦𑀁 𑀪𑀦𑁆𑀢𑁂 𑀤𑀸𑀢𑀩𑁆𑀩𑀁, 𑀓𑀢𑀺𑀦𑀜𑁆𑀘𑁂𑀯 𑀦 𑀤𑀸𑀢𑀩𑁆𑀩𑀁.

𑀧𑀜𑁆𑀘𑀦𑁆𑀦𑀁 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁, 𑀤𑀸𑀢𑀩𑁆𑀩𑀁 𑀇𑀥 𑀘𑀻𑀯𑀭𑀁;

𑀲𑀢𑁆𑀢𑀦𑁆𑀦𑀁 𑀲𑀦𑁆𑀢𑁂 𑀤𑀸𑀢𑀩𑁆𑀩𑀁, 𑀲𑁄𑀴𑀲𑀦𑁆𑀦𑀁 𑀦 𑀤𑀸𑀢𑀩𑁆𑀩𑀁.

𑀓𑀢𑀺𑀲𑀢𑀁 𑀭𑀢𑁆𑀢𑀺𑀲𑀢𑀁, 𑀆𑀧𑀢𑁆𑀢𑀺𑀬𑁄 𑀙𑀸𑀤𑀬𑀺𑀢𑁆𑀯𑀸𑀦;

𑀓𑀢𑀺 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸𑀦, 𑀫𑀼𑀘𑁆𑀘𑁂𑀬𑁆𑀬 𑀧𑀸𑀭𑀺𑀯𑀸𑀲𑀺𑀓𑁄.

𑀤𑀲𑀲𑀢𑀁 𑀭𑀢𑁆𑀢𑀺𑀲𑀢𑀁, 𑀆𑀧𑀢𑁆𑀢𑀺𑀬𑁄 𑀙𑀸𑀤𑀬𑀺𑀢𑁆𑀯𑀸𑀦;

𑀤𑀲 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸𑀦, 𑀫𑀼𑀘𑁆𑀘𑁂𑀬𑁆𑀬 𑀧𑀸𑀭𑀺𑀯𑀸𑀲𑀺𑀓𑁄.

𑀓𑀢𑀺 𑀓𑀫𑁆𑀫𑀤𑁄𑀲𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀲𑀩𑁆𑀩𑁂𑀯 𑀅𑀥𑀫𑁆𑀫𑀺𑀓𑀸 [𑀲𑀩𑁆𑀩𑁂 𑀅𑀥𑀫𑁆𑀫𑀺𑀓𑀸 (𑀲𑀻. 𑀲𑁆𑀬𑀸.)] 𑀓𑀢𑀺.

𑀤𑁆𑀯𑀸𑀤𑀲 𑀓𑀫𑁆𑀫𑀤𑁄𑀲𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀲𑀩𑁆𑀩𑁂𑀯 𑀅𑀥𑀫𑁆𑀫𑀺𑀓𑀸 [𑀲𑀩𑁆𑀩𑁂𑀯𑀸𑀥𑀫𑁆𑀫𑀺𑀓𑀸 (𑀲𑀻.), 𑀲𑀩𑁆𑀩𑁂 𑀅𑀥𑀫𑁆𑀫𑀺𑀓𑀸 (𑀲𑁆𑀬𑀸.)] 𑀓𑀢𑀸.

𑀓𑀢𑀺 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀲𑀩𑁆𑀩𑁂𑀯 𑀥𑀫𑁆𑀫𑀺𑀓𑀸 𑀓𑀢𑀺.

𑀘𑀢𑀲𑁆𑀲𑁄 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;