𑀲𑁂𑀤𑀫𑁄𑀘𑀦𑀕𑀸𑀣𑀸

𑁧. 𑀅𑀯𑀺𑀧𑁆𑀧𑀯𑀸𑀲𑀧𑀜𑁆𑀳𑀸

𑁪𑁭𑁯. 𑀅𑀲𑀁𑀯𑀸𑀲𑁄 𑀪𑀺𑀓𑁆𑀔𑀽𑀳𑀺 𑀘 𑀪𑀺𑀓𑁆𑀔𑀼𑀦𑀻𑀳𑀺 𑀘;

𑀲𑀫𑁆𑀪𑁄𑀕𑁄 𑀏𑀓𑀘𑁆𑀘𑁄 𑀢𑀳𑀺𑀁 𑀦 𑀮𑀩𑁆𑀪𑀢𑀺;

𑀅𑀯𑀺𑀧𑁆𑀧𑀯𑀸𑀲𑁂𑀦 𑀅𑀦𑀸𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀁;

𑀧𑀜𑁆𑀘 𑀯𑀼𑀢𑁆𑀢𑀸 𑀫𑀳𑁂𑀲𑀺𑀦𑀸;

𑀯𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀤𑀲 𑀧𑀼𑀕𑁆𑀕𑀮𑁂 𑀦 𑀯𑀤𑀸𑀫𑀺, 𑀏𑀓𑀸𑀤𑀲 𑀯𑀺𑀯𑀚𑁆𑀚𑀺𑀬;

𑀯𑀼𑀟𑁆𑀠𑀁 𑀯𑀦𑁆𑀤𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦 𑀉𑀓𑁆𑀔𑀺𑀢𑁆𑀢𑀓𑁄 𑀦 𑀘 𑀧𑀦 𑀧𑀸𑀭𑀺𑀯𑀸𑀲𑀺𑀓𑁄;

𑀦 𑀲𑀗𑁆𑀖𑀪𑀺𑀦𑁆𑀦𑁄 𑀦 𑀘 𑀧𑀦 𑀧𑀓𑁆𑀔𑀲𑀗𑁆𑀓𑀦𑁆𑀢𑁄;

𑀲𑀫𑀸𑀦𑀲𑀁𑀯𑀸𑀲𑀓𑀪𑀽𑀫𑀺𑀬𑀸 𑀞𑀺𑀢𑁄;

𑀓𑀣𑀁 𑀦𑀼 𑀲𑀺𑀓𑁆𑀔𑀸𑀬 𑀅𑀲𑀸𑀥𑀸𑀭𑀡𑁄 𑀲𑀺𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀉𑀧𑁂𑀢𑀺 𑀥𑀫𑁆𑀫𑀁 𑀧𑀭𑀺𑀧𑀼𑀘𑁆𑀙𑀫𑀸𑀦𑁄, 𑀓𑀼𑀲𑀮𑀁 𑀅𑀢𑁆𑀣𑀽𑀧𑀲𑀜𑁆𑀳𑀺𑀢𑀁;

𑀦 𑀚𑀻𑀯𑀢𑀺 𑀦 𑀫𑀢𑁄 𑀦 𑀦𑀺𑀩𑁆𑀩𑀼𑀢𑁄, 𑀢𑀁 𑀧𑀼𑀕𑁆𑀕𑀮𑀁 𑀓𑀢𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀉𑀩𑁆𑀪𑀓𑁆𑀔𑀓𑁂 𑀦 𑀯𑀤𑀸𑀫𑀺, 𑀅𑀥𑁄 𑀦𑀸𑀪𑀺𑀁 𑀯𑀺𑀯𑀚𑁆𑀚𑀺𑀬;

𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸, 𑀓𑀣𑀁 𑀧𑀸𑀭𑀸𑀚𑀺𑀓𑁄 𑀲𑀺𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀢𑀺;

𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁;

𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁 𑀅𑀦𑀸𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀢𑀺;

𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁;

𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁 𑀆𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦 𑀓𑀸𑀬𑀺𑀓𑀁 𑀓𑀺𑀜𑁆𑀘𑀺 𑀧𑀬𑁄𑀕𑀫𑀸𑀘𑀭𑁂;

𑀦 𑀘𑀸𑀧𑀺 𑀯𑀸𑀘𑀸𑀬 𑀧𑀭𑁂 𑀪𑀡𑁂𑀬𑁆𑀬;

𑀆𑀧𑀚𑁆𑀚𑁂𑀬𑁆𑀬 𑀕𑀭𑀼𑀓𑀁 𑀙𑁂𑀚𑁆𑀚𑀯𑀢𑁆𑀣𑀼𑀁;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦 𑀓𑀸𑀬𑀺𑀓𑀁 𑀯𑀸𑀘𑀲𑀺𑀓𑀜𑁆𑀘 𑀓𑀺𑀜𑁆𑀘𑀺;

𑀫𑀦𑀲𑀸𑀧𑀺 𑀲𑀦𑁆𑀢𑁄 𑀦 𑀓𑀭𑁂𑀬𑁆𑀬 𑀧𑀸𑀧𑀁;

𑀲𑁄 𑀦𑀸𑀲𑀺𑀢𑁄 𑀓𑀺𑀦𑁆𑀢𑀺 𑀲𑀼𑀦𑀸𑀲𑀺𑀢𑁄 𑀪𑀯𑁂;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀅𑀦𑀸𑀮𑀧𑀦𑁆𑀢𑁄 𑀫𑀦𑀼𑀚𑁂𑀦 𑀓𑁂𑀦𑀘𑀺;

𑀯𑀸𑀘𑀸𑀕𑀺𑀭𑀁 𑀦𑁄 𑀘 𑀧𑀭𑁂 𑀪𑀡𑁂𑀬𑁆𑀬;

𑀆𑀧𑀚𑁆𑀚𑁂𑀬𑁆𑀬 𑀯𑀸𑀘𑀲𑀺𑀓𑀁 𑀦 𑀓𑀸𑀬𑀺𑀓𑀁;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀲𑀺𑀓𑁆𑀔𑀸𑀧𑀤𑀸 𑀩𑀼𑀤𑁆𑀥𑀯𑀭𑁂𑀦 𑀯𑀡𑁆𑀡𑀺𑀢𑀸;

𑀲𑀗𑁆𑀖𑀸𑀤𑀺𑀲𑁂𑀲𑀸 𑀘𑀢𑀼𑀭𑁄 𑀪𑀯𑁂𑀬𑁆𑀬𑀼𑀁;

𑀆𑀧𑀚𑁆𑀚𑁂𑀬𑁆𑀬 𑀏𑀓𑀧𑀬𑁄𑀕𑁂𑀦 𑀲𑀩𑁆𑀩𑁂;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀉𑀪𑁄 𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸;

𑀉𑀪𑀺𑀦𑁆𑀦𑀁 𑀳𑀢𑁆𑀣𑀢𑁄 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬;

𑀲𑀺𑀬𑀸 𑀆𑀧𑀢𑁆𑀢𑀺𑀬𑁄 𑀦𑀸𑀦𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀘𑀢𑀼𑀭𑁄 𑀚𑀦𑀸 𑀲𑀁𑀯𑀺𑀥𑀸𑀬;

𑀕𑀭𑀼𑀪𑀡𑁆𑀟𑀁 𑀅𑀯𑀸𑀳𑀭𑀼𑀁;

𑀢𑀬𑁄 𑀧𑀸𑀭𑀸𑀚𑀺𑀓𑀸 𑀏𑀓𑁄 𑀦 𑀧𑀸𑀭𑀸𑀚𑀺𑀓𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑁨. 𑀧𑀸𑀭𑀸𑀚𑀺𑀓𑀸𑀤𑀺𑀧𑀜𑁆𑀳𑀸

𑁪𑁮𑁦. 𑀇𑀢𑁆𑀣𑀻 𑀘 𑀅𑀩𑁆𑀪𑀦𑁆𑀢𑀭𑁂 𑀲𑀺𑀬𑀸,

𑀪𑀺𑀓𑁆𑀔𑀼 𑀘 𑀩𑀳𑀺𑀤𑁆𑀥𑀸 𑀲𑀺𑀬𑀸;

𑀙𑀺𑀤𑁆𑀤𑀁 𑀢𑀲𑁆𑀫𑀺𑀁 𑀖𑀭𑁂 𑀦𑀢𑁆𑀣𑀺;

𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸;

𑀓𑀣𑀁 𑀧𑀸𑀭𑀸𑀚𑀺𑀓𑁄 𑀲𑀺𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀢𑁂𑀮𑀁 𑀫𑀥𑀼𑀁 𑀨𑀸𑀡𑀺𑀢𑀜𑁆𑀘𑀸𑀧𑀺 𑀲𑀧𑁆𑀧𑀺𑀁;

𑀲𑀸𑀫𑀁 𑀕𑀳𑁂𑀢𑁆𑀯𑀸𑀦 𑀦𑀺𑀓𑁆𑀔𑀺𑀧𑁂𑀬𑁆𑀬;

𑀅𑀯𑀻𑀢𑀺𑀯𑀢𑁆𑀢𑁂 𑀲𑀢𑁆𑀢𑀸𑀳𑁂;

𑀲𑀢𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀆𑀧𑀢𑁆𑀢𑀺;

𑀲𑀼𑀤𑁆𑀥𑀓𑁂𑀦 𑀧𑀸𑀘𑀺𑀢𑁆𑀢𑀺𑀬𑀁;

𑀆𑀧𑀚𑁆𑀚𑀦𑁆𑀢𑀲𑁆𑀲 𑀏𑀓𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀪𑀺𑀓𑁆𑀔𑀽 𑀲𑀺𑀬𑀸 𑀯𑀻𑀲𑀢𑀺𑀬𑀸 𑀲𑀫𑀸𑀕𑀢𑀸;

𑀓𑀫𑁆𑀫𑀁 𑀓𑀭𑁂𑀬𑁆𑀬𑀼𑀁 𑀲𑀫𑀕𑁆𑀕𑀲𑀜𑁆𑀜𑀺𑀦𑁄;

𑀪𑀺𑀓𑁆𑀔𑀼 𑀲𑀺𑀬𑀸 𑀤𑁆𑀯𑀸𑀤𑀲𑀬𑁄𑀚𑀦𑁂 𑀞𑀺𑀢𑁄;

𑀓𑀫𑁆𑀫𑀜𑁆𑀘 𑀢𑀁 𑀓𑀼𑀧𑁆𑀧𑁂𑀬𑁆𑀬 𑀯𑀕𑁆𑀕𑀧𑀘𑁆𑀘𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀧𑀤𑀯𑀻𑀢𑀺𑀳𑀸𑀭𑀫𑀢𑁆𑀢𑁂𑀦 𑀯𑀸𑀘𑀸𑀬 𑀪𑀡𑀺𑀢𑁂𑀦 𑀘;

𑀲𑀩𑁆𑀩𑀸𑀦𑀺 𑀕𑀭𑀼𑀓𑀸𑀦𑀺 𑀲𑀧𑁆𑀧𑀝𑀺𑀓𑀫𑁆𑀫𑀸𑀦𑀺;

𑀘𑀢𑀼𑀲𑀝𑁆𑀞𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦𑀺𑀯𑀢𑁆𑀣𑁄 𑀅𑀦𑁆𑀢𑀭𑀯𑀸𑀲𑀓𑁂𑀦;

𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀢𑁄;

𑀲𑀩𑁆𑀩𑀸𑀦𑀺 𑀢𑀸𑀦𑀺 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀺 𑀳𑁄𑀦𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦 𑀘𑀸𑀧𑀺 𑀜𑀢𑁆𑀢𑀺 𑀦 𑀘 𑀧𑀦 𑀓𑀫𑁆𑀫𑀯𑀸𑀘𑀸;

𑀦 𑀘𑁂𑀳𑀺 𑀪𑀺𑀓𑁆𑀔𑀽𑀢𑀺 𑀚𑀺𑀦𑁄 𑀅𑀯𑁄𑀘;

𑀲𑀭𑀡𑀕𑀫𑀦𑀫𑁆𑀧𑀺 𑀦 𑀢𑀲𑁆𑀲 𑀅𑀢𑁆𑀣𑀺;

𑀉𑀧𑀲𑀫𑁆𑀧𑀤𑀸 𑀘𑀲𑁆𑀲 𑀅𑀓𑀼𑀧𑁆𑀧𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀇𑀢𑁆𑀣𑀺𑀁 𑀳𑀦𑁂 𑀦 𑀫𑀸𑀢𑀭𑀁, 𑀧𑀼𑀭𑀺𑀲𑀜𑁆𑀘 𑀦 𑀧𑀺𑀢𑀭𑀁 𑀳𑀦𑁂;

𑀳𑀦𑁂𑀬𑁆𑀬 𑀅𑀦𑀭𑀺𑀬𑀁 𑀫𑀦𑁆𑀤𑁄, 𑀢𑁂𑀦 𑀘𑀸𑀦𑀦𑁆𑀢𑀭𑀁 𑀨𑀼𑀲𑁂;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀇𑀢𑁆𑀣𑀺𑀁 𑀳𑀦𑁂 𑀘 𑀫𑀸𑀢𑀭𑀁, 𑀧𑀼𑀭𑀺𑀲𑀜𑁆𑀘 𑀧𑀺𑀢𑀭𑀁 𑀳𑀦𑁂;

𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸, 𑀦 𑀢𑁂𑀦𑀸𑀦𑀦𑁆𑀢𑀭𑀁 𑀨𑀼𑀲𑁂;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀅𑀘𑁄𑀤𑀬𑀺𑀢𑁆𑀯𑀸 𑀅𑀲𑁆𑀲𑀸𑀭𑀬𑀺𑀢𑁆𑀯𑀸;

𑀅𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀓𑀭𑁂𑀬𑁆𑀬 𑀓𑀫𑁆𑀫𑀁;

𑀓𑀢𑀜𑁆𑀘 𑀓𑀫𑁆𑀫𑀁 𑀲𑀼𑀓𑀢𑀁 𑀪𑀯𑁂𑀬𑁆𑀬;

𑀓𑀸𑀭𑀓𑁄 𑀘 𑀲𑀗𑁆𑀖𑁄 𑀅𑀦𑀸𑀧𑀢𑁆𑀢𑀺𑀓𑁄 𑀲𑀺𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀘𑁄𑀤𑀬𑀺𑀢𑁆𑀯𑀸 𑀲𑀸𑀭𑀬𑀺𑀢𑁆𑀯𑀸;

𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀓𑀭𑁂𑀬𑁆𑀬 𑀓𑀫𑁆𑀫𑀁;

𑀓𑀢𑀜𑁆𑀘 𑀓𑀫𑁆𑀫𑀁 𑀅𑀓𑀢𑀁 𑀪𑀯𑁂𑀬𑁆𑀬;

𑀓𑀸𑀭𑀓𑁄 𑀘 𑀲𑀗𑁆𑀖𑁄 𑀲𑀸𑀧𑀢𑁆𑀢𑀺𑀓𑁄 𑀲𑀺𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀙𑀺𑀦𑁆𑀤𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺;

𑀙𑀸𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀙𑀸𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀲𑀘𑁆𑀘𑀁 𑀪𑀡𑀦𑁆𑀢𑁄 𑀕𑀭𑀼𑀓𑀁, 𑀫𑀼𑀲𑀸 𑀘 𑀮𑀳𑀼 𑀪𑀸𑀲𑀢𑁄;

𑀫𑀼𑀲𑀸 𑀪𑀡𑀦𑁆𑀢𑁄 𑀕𑀭𑀼𑀓𑀁, 𑀲𑀘𑁆𑀘𑀜𑁆𑀘 𑀮𑀳𑀼 𑀪𑀸𑀲𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑁩. 𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀧𑀜𑁆𑀳𑀸

𑁪𑁮𑁧. 𑀅𑀥𑀺𑀝𑁆𑀞𑀺𑀢𑀁 𑀭𑀚𑀦𑀸𑀬 𑀭𑀢𑁆𑀢𑀁;

𑀓𑀧𑁆𑀧𑀓𑀢𑀫𑁆𑀧𑀺 𑀲𑀦𑁆𑀢𑀁;

𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀪𑀺𑀓𑁆𑀔𑀼 𑀫𑀁𑀲𑀸𑀦𑀺 𑀔𑀸𑀤𑀢𑀺;

𑀦 𑀉𑀫𑁆𑀫𑀢𑁆𑀢𑀓𑁄 𑀦 𑀘 𑀧𑀦 𑀔𑀺𑀢𑁆𑀢𑀘𑀺𑀢𑁆𑀢𑁄;

𑀦 𑀘𑀸𑀧𑀺 𑀲𑁄 𑀯𑁂𑀤𑀦𑀸𑀝𑁆𑀝𑁄 𑀪𑀯𑁂𑀬𑁆𑀬;

𑀦 𑀘𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺;

𑀲𑁄 𑀘 𑀥𑀫𑁆𑀫𑁄 𑀲𑀼𑀕𑀢𑁂𑀦 𑀤𑁂𑀲𑀺𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦 𑀭𑀢𑁆𑀢𑀘𑀺𑀢𑁆𑀢𑁄 𑀦 𑀘 𑀧𑀦 𑀣𑁂𑀬𑁆𑀬𑀘𑀺𑀢𑁆𑀢𑁄;

𑀦 𑀘𑀸𑀧𑀺 𑀲𑁄 𑀧𑀭𑀁 𑀫𑀭𑀡𑀸𑀬 𑀘𑁂𑀢𑀬𑀺;

𑀲𑀮𑀸𑀓𑀁 𑀤𑁂𑀦𑁆𑀢𑀲𑁆𑀲 𑀳𑁄𑀢𑀺 𑀙𑁂𑀚𑁆𑀚𑀁;

𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀣𑀼𑀮𑁆𑀮𑀘𑁆𑀘𑀬𑀁;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀦 𑀘𑀸𑀧𑀺 𑀆𑀭𑀜𑁆𑀜𑀓𑀁 𑀲𑀸𑀲𑀗𑁆𑀓𑀲𑀫𑁆𑀫𑀢𑀁;

𑀦 𑀘𑀸𑀧𑀺 𑀲𑀗𑁆𑀖𑁂𑀦 𑀲𑀫𑁆𑀫𑀼𑀢𑀺 𑀤𑀺𑀦𑁆𑀦𑀸;

𑀦 𑀘𑀲𑁆𑀲 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀢𑀢𑁆𑀣𑁂𑀯;

𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬 𑀅𑀟𑁆𑀠𑀬𑁄𑀚𑀦𑀁;

𑀢𑀢𑁆𑀣𑁂𑀯 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀓𑀸𑀬𑀺𑀓𑀸𑀦𑀺 𑀦 𑀯𑀸𑀘𑀲𑀺𑀓𑀸𑀦𑀺;

𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀯𑀸𑀘𑀲𑀺𑀓𑀸𑀦𑀺 𑀦 𑀓𑀸𑀬𑀺𑀓𑀸𑀦𑀺;

𑀲𑀩𑁆𑀩𑀸𑀦𑀺 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀺;

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀧𑀚𑁆𑀚𑁂𑀬𑁆𑀬 𑀏𑀓𑀢𑁄;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀢𑀺𑀲𑁆𑀲𑀺𑀢𑁆𑀣𑀺𑀬𑁄 𑀫𑁂𑀣𑀼𑀦𑀁 𑀢𑀁 𑀦 𑀲𑁂𑀯𑁂;

𑀢𑀬𑁄 𑀧𑀼𑀭𑀺𑀲𑁂 𑀢𑀬𑁄 𑀅𑀦𑀭𑀺𑀬𑀧𑀡𑁆𑀟𑀓𑁂;

𑀦 𑀘𑀸𑀘𑀭𑁂 𑀫𑁂𑀣𑀼𑀦𑀁 𑀩𑁆𑀬𑀜𑁆𑀚𑀦𑀲𑁆𑀫𑀺𑀁;

𑀙𑁂𑀚𑁆𑀚𑀁 𑀲𑀺𑀬𑀸 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀫𑀸𑀢𑀭𑀁 𑀘𑀻𑀯𑀭𑀁 𑀬𑀸𑀘𑁂, 𑀦𑁄 𑀘 𑀲𑀗𑁆𑀖𑁂 [𑀦𑁄 𑀲𑀁𑀖𑀲𑁆𑀲 (𑀓.), 𑀦𑁄 𑀘 𑀲𑀁𑀖𑀲𑁆𑀲 (𑀲𑁆𑀬𑀸.), 𑀦𑁄 𑀘𑁂 𑀲𑀁𑀖𑀲𑁆𑀲 (𑀲𑀻.)] 𑀧𑀭𑀺𑀡𑀢𑀁;

𑀓𑁂𑀦𑀲𑁆𑀲 𑀳𑁄𑀢𑀺 𑀆𑀧𑀢𑁆𑀢𑀺, 𑀅𑀦𑀸𑀧𑀢𑁆𑀢𑀺 𑀘 𑀜𑀸𑀢𑀓𑁂;

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸.

𑀓𑀼𑀤𑁆𑀥𑁄 𑀆𑀭𑀸𑀥𑀓𑁄 𑀳𑁄𑀢𑀺, 𑀓𑀼𑀤𑁆𑀥𑁄 𑀳𑁄𑀢𑀺 𑀕𑀭𑀳𑀺𑀬𑁄;