𑀧𑀜𑁆𑀘𑀯𑀕𑁆𑀕𑁄

𑁧. 𑀓𑀫𑁆𑀫𑀯𑀕𑁆𑀕𑁄

𑁪𑁮𑁨. 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺. 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑁋 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀺 𑁋 𑀯𑀢𑁆𑀣𑀼𑀢𑁄 𑀯𑀸 𑀜𑀢𑁆𑀢𑀺𑀢𑁄 𑀯𑀸 𑀅𑀦𑀼𑀲𑁆𑀲𑀸𑀯𑀦𑀢𑁄 𑀯𑀸 𑀲𑀻𑀫𑀢𑁄 𑀯𑀸 𑀧𑀭𑀺𑀲𑀢𑁄 𑀯𑀸.

𑁪𑁮𑁩. 𑀓𑀣𑀁 𑀯𑀢𑁆𑀣𑀼𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀲𑀫𑁆𑀫𑀼𑀔𑀸 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀧𑀝𑀺𑀧𑀼𑀘𑁆𑀙𑀸𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀧𑀝𑀺𑀧𑀼𑀘𑁆𑀙𑀸 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀧𑀝𑀺𑀜𑁆𑀜𑀸𑀬 𑀓𑀭𑀡𑀻𑀬𑀁 𑀓𑀫𑁆𑀫𑀁 𑀅𑀧𑀝𑀺𑀜𑁆𑀜𑀸𑀬 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀲𑀢𑀺𑀯𑀺𑀦𑀬𑀸𑀭𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀅𑀫𑀽𑀴𑁆𑀳𑀯𑀺𑀦𑀬𑀸𑀭𑀳𑀲𑁆𑀲 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀁 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫𑀸𑀭𑀳𑀲𑁆𑀲 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀦𑀺𑀬𑀲𑁆𑀲𑀓𑀫𑁆𑀫𑀁 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀦𑀺𑀬𑀲𑁆𑀲𑀓𑀫𑁆𑀫𑀸𑀭𑀳𑀲𑁆𑀲 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀸𑀭𑀳𑀲𑁆𑀲 𑀧𑀭𑀺𑀯𑀸𑀲𑀁 𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀧𑀭𑀺𑀯𑀸𑀲𑀸𑀭𑀳𑀁 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀲𑁆𑀲 𑀫𑀸𑀦𑀢𑁆𑀢𑀁 𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀫𑀸𑀦𑀢𑁆𑀢𑀸𑀭𑀳𑀁 𑀅𑀩𑁆𑀪𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀅𑀩𑁆𑀪𑀸𑀦𑀸𑀭𑀳𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀅𑀦𑀼𑀧𑁄𑀲𑀣𑁂 𑀉𑀧𑁄𑀲𑀣𑀁 𑀓𑀭𑁄𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁; 𑀅𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀏𑀯𑀁 𑀯𑀢𑁆𑀣𑀼𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁮𑁪. 𑀓𑀣𑀁 𑀜𑀢𑁆𑀢𑀺𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀜𑀢𑁆𑀢𑀺𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺 𑁋 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀺, 𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀺, 𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀺, 𑀜𑀢𑁆𑀢𑀺𑀁 𑀦 𑀧𑀭𑀸𑀫𑀲𑀢𑀺, 𑀧𑀘𑁆𑀙𑀸 𑀯𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺 𑁋 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀜𑀢𑁆𑀢𑀺𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁮𑁫. 𑀓𑀣𑀁 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺 𑁋 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀺, 𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀺, 𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀺, 𑀲𑀸𑀯𑀦𑀁 𑀳𑀸𑀧𑁂𑀢𑀺, 𑀅𑀓𑀸𑀮𑁂 𑀯𑀸 𑀲𑀸𑀯𑁂𑀢𑀺 𑁋 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁮𑁬. 𑀓𑀣𑀁 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀏𑀓𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺 𑁋 𑀅𑀢𑀺𑀔𑀼𑀤𑁆𑀤𑀓𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀅𑀢𑀺𑀫𑀳𑀢𑀺𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀔𑀡𑁆𑀟𑀦𑀺𑀫𑀺𑀢𑁆𑀢𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀙𑀸𑀬𑀸𑀦𑀺𑀫𑀺𑀢𑁆𑀢𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀅𑀦𑀺𑀫𑀺𑀢𑁆𑀢𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀩𑀳𑀺𑀲𑀻𑀫𑁂 𑀞𑀺𑀢𑁄 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀦𑀤𑀺𑀬𑀸 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀲𑀫𑀼𑀤𑁆𑀤𑁂 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀚𑀸𑀢𑀲𑁆𑀲𑀭𑁂 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀢𑀺, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀢𑀺 𑁋 𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁮𑁭. 𑀓𑀣𑀁 𑀧𑀭𑀺𑀲𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀲𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺 𑁋 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀅𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺. 𑀧𑀜𑁆𑀘𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂…𑀧𑁂… 𑀤𑀲𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂…𑀧𑁂… 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀅𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸, 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀲𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁮𑁮. 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄 𑀦𑁂𑀯 𑀓𑀫𑁆𑀫𑀧𑀢𑁆𑀢𑁄 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄, 𑀅𑀧𑀺 𑀘 𑀓𑀫𑁆𑀫𑀸𑀭𑀳𑁄. 𑀧𑀜𑁆𑀘𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀧𑀜𑁆𑀘 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄 𑀦𑁂𑀯 𑀓𑀫𑁆𑀫𑀧𑀢𑁆𑀢𑁄 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄, 𑀅𑀧𑀺 𑀘 𑀓𑀫𑁆𑀫𑀸𑀭𑀳𑁄. 𑀤𑀲𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀤𑀲 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄 𑀦𑁂𑀯 𑀓𑀫𑁆𑀫𑀧𑀢𑁆𑀢𑁄 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄, 𑀅𑀧𑀺 𑀘 𑀓𑀫𑁆𑀫𑀸𑀭𑀳𑁄. 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀯𑀻𑀲𑀢𑀺 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄 𑀦𑁂𑀯 𑀓𑀫𑁆𑀫𑀧𑀢𑁆𑀢𑁄 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄, 𑀅𑀧𑀺 𑀘 𑀓𑀫𑁆𑀫𑀸𑀭𑀳𑁄.

𑁪𑁮𑁯. 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁, 𑀜𑀢𑁆𑀢𑀺𑀓𑀫𑁆𑀫𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀓𑀢𑀺𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀧𑀚𑁆𑀚𑀦𑁆𑀢𑀺 𑁋 𑀯𑀢𑁆𑀣𑀼𑀢𑁄 𑀯𑀸 𑀜𑀢𑁆𑀢𑀺𑀢𑁄 𑀯𑀸 𑀅𑀦𑀼𑀲𑁆𑀲𑀸𑀯𑀦𑀢𑁄 𑀯𑀸 𑀲𑀻𑀫𑀢𑁄 𑀯𑀸 𑀧𑀭𑀺𑀲𑀢𑁄 𑀯𑀸.

𑁪𑁯𑁦. 𑀓𑀣𑀁 𑀯𑀢𑁆𑀣𑀼𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀧𑀡𑁆𑀟𑀓𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀣𑁂𑀬𑁆𑀬𑀲𑀁𑀯𑀸𑀲𑀓𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀢𑀺𑀭𑀘𑁆𑀙𑀸𑀦𑀕𑀢𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀫𑀸𑀢𑀼𑀖𑀸𑀢𑀓𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀧𑀺𑀢𑀼𑀖𑀸𑀢𑀓𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀅𑀭𑀳𑀦𑁆𑀢𑀖𑀸𑀢𑀓𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀲𑀗𑁆𑀖𑀪𑁂𑀤𑀓𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀉𑀪𑀢𑁄𑀩𑁆𑀬𑀜𑁆𑀚𑀦𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀊𑀦𑀯𑀻𑀲𑀢𑀺𑀯𑀲𑁆𑀲𑀁 𑀧𑀼𑀕𑁆𑀕𑀮𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀯𑀢𑁆𑀣𑀼𑀯𑀺𑀧𑀦𑁆𑀦𑀁 𑀅𑀥𑀫𑁆𑀫𑀓𑀫𑁆𑀫𑀁. 𑀏𑀯𑀁 𑀯𑀢𑁆𑀣𑀼𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁯𑁧. 𑀓𑀣𑀁 𑀜𑀢𑁆𑀢𑀺𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀜𑀢𑁆𑀢𑀺𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺. 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀺, 𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀺, 𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀺, 𑀜𑀢𑁆𑀢𑀺𑀁 𑀦 𑀧𑀭𑀸𑀫𑀲𑀢𑀺, 𑀧𑀘𑁆𑀙𑀸 𑀯𑀸 𑀜𑀢𑁆𑀢𑀺𑀁 𑀞𑀧𑁂𑀢𑀺 𑁋 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀜𑀢𑁆𑀢𑀺𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁯𑁨. 𑀓𑀣𑀁 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺 𑁋 𑀯𑀢𑁆𑀣𑀼𑀁 𑀦 𑀧𑀭𑀸𑀫𑀲𑀢𑀺, 𑀲𑀗𑁆𑀖𑀁 𑀦 𑀧𑀭𑀸𑀫𑀲𑀢𑀺, 𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀺, 𑀲𑀸𑀯𑀦𑀁 𑀳𑀸𑀧𑁂𑀢𑀺, 𑀅𑀓𑀸𑀮𑁂 𑀯𑀸 𑀲𑀸𑀯𑁂𑀢𑀺 𑁋 𑀇𑀫𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀅𑀦𑀼𑀲𑁆𑀲𑀸𑀯𑀦𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁯𑁩. 𑀓𑀣𑀁 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀏𑀓𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺. 𑀅𑀢𑀺𑀔𑀼𑀤𑁆𑀤𑀓𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀅𑀢𑀺𑀫𑀳𑀢𑀺𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀔𑀡𑁆𑀟𑀦𑀺𑀫𑀺𑀢𑁆𑀢𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀙𑀸𑀬𑀸𑀦𑀺𑀫𑀺𑀢𑁆𑀢𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀅𑀦𑀺𑀫𑀺𑀢𑁆𑀢𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀩𑀳𑀺𑀲𑀻𑀫𑁂 𑀞𑀺𑀢𑁄 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀦𑀤𑀺𑀬𑀸 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀲𑀫𑀼𑀤𑁆𑀤𑁂 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀚𑀸𑀢𑀲𑁆𑀲𑀭𑁂 𑀲𑀻𑀫𑀁 𑀲𑀫𑁆𑀫𑀦𑁆𑀦𑀢𑀺, 𑀲𑀻𑀫𑀸𑀬 𑀲𑀻𑀫𑀁 𑀲𑀫𑁆𑀪𑀺𑀦𑁆𑀤𑀢𑀺, 𑀲𑀻𑀫𑀸𑀬 𑀲𑀻𑀫𑀁 𑀅𑀚𑁆𑀛𑁄𑀢𑁆𑀣𑀭𑀢𑀺 𑁋 𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀲𑀻𑀫𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁯𑁪. 𑀓𑀣𑀁 𑀧𑀭𑀺𑀲𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺? 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀲𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺 𑁋 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀅𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺, 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺. 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺. 𑀧𑀜𑁆𑀘𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂…𑀧𑁂… 𑀤𑀲𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂…𑀧𑁂… 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀅𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺. 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺. 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑀢𑁆𑀢𑀸 𑀢𑁂 𑀆𑀕𑀢𑀸 𑀳𑁄𑀦𑁆𑀢𑀺, 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀆𑀳𑀝𑁄 𑀳𑁄𑀢𑀺, 𑀲𑀫𑁆𑀫𑀼𑀔𑀻𑀪𑀽𑀢𑀸 𑀧𑀝𑀺𑀓𑁆𑀓𑁄𑀲𑀦𑁆𑀢𑀺 𑁋 𑀇𑀫𑁂𑀳𑀺 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀲𑀢𑁄 𑀓𑀫𑁆𑀫𑀸𑀦𑀺 𑀯𑀺𑀧𑀚𑁆𑀚𑀦𑁆𑀢𑀺.

𑁪𑁯𑁫. 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑀺 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀜𑀢𑁆𑀢𑀺𑀓𑀫𑁆𑀫𑀁 𑀓𑀢𑀺 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀓𑀢𑀺 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀓𑀢𑀺 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀅𑀧𑀮𑁄𑀓𑀦𑀓𑀫𑁆𑀫𑀁 𑀧𑀜𑁆𑀘 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀜𑀢𑁆𑀢𑀺𑀓𑀫𑁆𑀫𑀁 𑀦𑀯 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺.

𑁪𑁯𑁬. 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑀫𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀑𑀲𑀸𑀭𑀡𑀁, 𑀦𑀺𑀲𑁆𑀲𑀸𑀭𑀡𑀁, 𑀪𑀡𑁆𑀟𑀼𑀓𑀫𑁆𑀫𑀁, 𑀩𑁆𑀭𑀳𑁆𑀫𑀤𑀡𑁆𑀟𑀁, 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀧𑀜𑁆𑀘𑀫𑀁 𑁋 𑀅𑀧𑀮𑁄𑀓𑀦𑀓𑀫𑁆𑀫𑀁 𑀇𑀫𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀜𑀢𑁆𑀢𑀺𑀓𑀫𑁆𑀫𑀁 𑀓𑀢𑀫𑀸𑀦𑀺 𑀦𑀯 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀑𑀲𑀸𑀭𑀡𑀁, 𑀦𑀺𑀲𑁆𑀲𑀸𑀭𑀡𑀁, 𑀉𑀧𑁄𑀲𑀣𑀁, 𑀧𑀯𑀸𑀭𑀡𑀁, 𑀲𑀫𑁆𑀫𑀼𑀢𑀺𑀁, 𑀤𑀸𑀦𑀁, 𑀧𑀝𑀺𑀕𑁆𑀕𑀳𑀁, 𑀧𑀘𑁆𑀘𑀼𑀓𑁆𑀓𑀟𑁆𑀠𑀦𑀁, 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀦𑀯𑀫𑀁 𑁋 𑀜𑀢𑁆𑀢𑀺𑀓𑀫𑁆𑀫𑀁 𑀇𑀫𑀸𑀦𑀺 𑀦𑀯 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀓𑀢𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀑𑀲𑀸𑀭𑀡𑀁, 𑀦𑀺𑀲𑁆𑀲𑀸𑀭𑀡𑀁, 𑀲𑀫𑁆𑀫𑀼𑀢𑀺𑀁, 𑀤𑀸𑀦𑀁, 𑀉𑀤𑁆𑀥𑀭𑀡𑀁, 𑀤𑁂𑀲𑀦𑀁, 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀲𑀢𑁆𑀢𑀫𑀁 𑁋 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀇𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀓𑀢𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺? 𑀑𑀲𑀸𑀭𑀡𑀁, 𑀦𑀺𑀲𑁆𑀲𑀸𑀭𑀡𑀁, 𑀲𑀫𑁆𑀫𑀼𑀢𑀺𑀁, 𑀤𑀸𑀦𑀁, 𑀦𑀺𑀕𑁆𑀕𑀳𑀁, 𑀲𑀫𑀦𑀼𑀪𑀸𑀲𑀦𑀁, 𑀓𑀫𑁆𑀫𑀮𑀓𑁆𑀔𑀡𑀜𑁆𑀜𑁂𑀯 𑀲𑀢𑁆𑀢𑀫𑀁 𑁋 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀇𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀕𑀘𑁆𑀙𑀢𑀺.

𑁪𑁯𑁭. 𑀘𑀢𑀼𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄 𑀦𑁂𑀯 𑀓𑀫𑁆𑀫𑀧𑀢𑁆𑀢𑁄 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄, 𑀅𑀧𑀺 𑀘 𑀓𑀫𑁆𑀫𑀸𑀭𑀳𑁄. 𑀧𑀜𑁆𑀘𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀧𑀜𑁆𑀘 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄 𑀦𑁂𑀯 𑀓𑀫𑁆𑀫𑀧𑀢𑁆𑀢𑁄 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄, 𑀅𑀧𑀺 𑀘 𑀓𑀫𑁆𑀫𑀸𑀭𑀳𑁄. 𑀤𑀲𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀤𑀲 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄 𑀦𑁂𑀯 𑀓𑀫𑁆𑀫𑀧𑀢𑁆𑀢𑁄 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄, 𑀅𑀧𑀺 𑀘 𑀓𑀫𑁆𑀫𑀸𑀭𑀳𑁄. 𑀯𑀻𑀲𑀢𑀺𑀯𑀕𑁆𑀕𑀓𑀭𑀡𑁂 𑀓𑀫𑁆𑀫𑁂 𑀯𑀻𑀲𑀢𑀺 𑀪𑀺𑀓𑁆𑀔𑀽 𑀧𑀓𑀢𑀢𑁆𑀢𑀸 𑀓𑀫𑁆𑀫𑀧𑀢𑁆𑀢𑀸, 𑀅𑀯𑀲𑁂𑀲𑀸 𑀧𑀓𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸. 𑀬𑀲𑁆𑀲 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺 𑀲𑁄 𑀦𑁂𑀯 𑀓𑀫𑁆𑀫𑀧𑀢𑁆𑀢𑁄 𑀦𑀸𑀧𑀺 𑀙𑀦𑁆𑀤𑀸𑀭𑀳𑁄, 𑀅𑀧𑀺 𑀘 𑀓𑀫𑁆𑀫𑀸𑀭𑀳𑁄.

𑀓𑀫𑁆𑀫𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀧𑀞𑀫𑁄.

𑁨. 𑀅𑀢𑁆𑀣𑀯𑀲𑀯𑀕𑁆𑀕𑁄

𑁪𑁯𑁮. [𑀅. 𑀦𑀺. 𑁨.𑁨𑁦𑁧-𑁨𑁩𑁦] 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬, 𑀲𑀗𑁆𑀖𑀨𑀸𑀲𑀼𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀯𑁂𑀭𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀯𑁂𑀭𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀯𑀚𑁆𑀚𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀯𑀚𑁆𑀚𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀪𑀬𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀪𑀬𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀕𑀺𑀳𑀻𑀦𑀁 𑀅𑀦𑀼𑀓𑀫𑁆𑀧𑀸𑀬, 𑀧𑀸𑀧𑀺𑀘𑁆𑀙𑀸𑀦𑀁 𑀧𑀓𑁆𑀔𑀼𑀧𑀘𑁆𑀙𑁂𑀤𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁.

𑀅𑀢𑁆𑀣𑀯𑀲𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀤𑀼𑀢𑀺𑀬𑁄.

𑁩. 𑀧𑀜𑁆𑀜𑀢𑁆𑀢𑀯𑀕𑁆𑀕𑁄

𑁪𑁯𑁯. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀁 𑀧𑀜𑁆𑀜𑀢𑁆𑀢𑀁…𑀧𑁂… 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀧𑀜𑁆𑀜𑀢𑁆𑀢𑁄… 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀁 𑀧𑀜𑁆𑀜𑀢𑁆𑀢𑀁… 𑀧𑀯𑀸𑀭𑀡𑀸 𑀧𑀜𑁆𑀜𑀢𑁆𑀢𑀸… 𑀧𑀯𑀸𑀭𑀡𑀸𑀞𑀧𑀦𑀁 𑀧𑀜𑁆𑀜𑀢𑁆𑀢𑀁… 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀁… 𑀦𑀺𑀬𑀲𑁆𑀲𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀁… 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀁… 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀁… 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀁… 𑀧𑀭𑀺𑀯𑀸𑀲𑀤𑀸𑀦𑀁 𑀧𑀜𑁆𑀜𑀢𑁆𑀢𑀁… 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸 𑀧𑀜𑁆𑀜𑀢𑁆𑀢𑀸… 𑀫𑀸𑀦𑀢𑁆𑀢𑀤𑀸𑀦𑀁 𑀧𑀜𑁆𑀜𑀢𑁆𑀢𑀁… 𑀅𑀩𑁆𑀪𑀸𑀦𑀁 𑀧𑀜𑁆𑀜𑀢𑁆𑀢𑀁… 𑀑𑀲𑀸𑀭𑀡𑀻𑀬𑀁 𑀧𑀜𑁆𑀜𑀢𑁆𑀢𑀁… 𑀦𑀺𑀲𑁆𑀲𑀸𑀭𑀡𑀻𑀬𑀁 𑀧𑀜𑁆𑀜𑀢𑁆𑀢𑀁… 𑀉𑀧𑀲𑀫𑁆𑀧𑀤𑀁 𑀧𑀜𑁆𑀜𑀢𑁆𑀢𑀁… 𑀅𑀧𑀮𑁄𑀓𑀦𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀁… 𑀜𑀢𑁆𑀢𑀺𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀁… 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀁… 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀧𑀜𑁆𑀜𑀢𑁆𑀢𑀁…𑀧𑁂….

𑀧𑀜𑁆𑀜𑀢𑁆𑀢𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀢𑀢𑀺𑀬𑁄.

𑁪. 𑀅𑀧𑀜𑁆𑀜𑀢𑁆𑀢𑁂 𑀧𑀜𑁆𑀜𑀢𑁆𑀢𑀯𑀕𑁆𑀕𑁄

𑁫𑁦𑁦. …𑀧𑁂… 𑀅𑀧𑀜𑁆𑀜𑀢𑁆𑀢𑁂 𑀧𑀜𑁆𑀜𑀢𑁆𑀢𑀁, 𑀧𑀜𑁆𑀜𑀢𑁆𑀢𑁂 𑀅𑀦𑀼𑀧𑀜𑁆𑀜𑀢𑁆𑀢𑀁…𑀧𑁂… 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀧𑀜𑁆𑀜𑀢𑁆𑀢𑁄…𑀧𑁂… 𑀲𑀢𑀺𑀯𑀺𑀦𑀬𑁄 𑀧𑀜𑁆𑀜𑀢𑁆𑀢𑁄…𑀧𑁂… 𑀅𑀫𑀽𑀴𑁆𑀳𑀯𑀺𑀦𑀬𑁄 𑀧𑀜𑁆𑀜𑀢𑁆𑀢𑁄…𑀧𑁂… 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀧𑀜𑁆𑀜𑀢𑁆𑀢𑀁…𑀧𑁂… 𑀬𑁂𑀪𑀼𑀬𑁆𑀬𑀲𑀺𑀓𑀸 𑀧𑀜𑁆𑀜𑀢𑁆𑀢𑀸…𑀧𑁂… 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀧𑀜𑁆𑀜𑀢𑁆𑀢𑀸…𑀧𑁂… 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬, 𑀲𑀗𑁆𑀖𑀨𑀸𑀲𑀼𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀯𑁂𑀭𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀯𑁂𑀭𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀯𑀚𑁆𑀚𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀯𑀚𑁆𑀚𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀪𑀬𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀪𑀬𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀖𑀸𑀢𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀕𑀺𑀳𑀻𑀦𑀁 𑀅𑀦𑀼𑀓𑀫𑁆𑀧𑀸𑀬, 𑀧𑀸𑀧𑀺𑀘𑁆𑀙𑀸𑀦𑀁 𑀧𑀓𑁆𑀔𑀼𑀧𑀘𑁆𑀙𑁂𑀤𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄. 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬 𑁋 𑀇𑀫𑁂 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀢𑀺𑀡𑀯𑀢𑁆𑀣𑀸𑀭𑀓𑁄 𑀧𑀜𑁆𑀜𑀢𑁆𑀢𑁄.

𑀅𑀧𑀜𑁆𑀜𑀢𑁆𑀢𑁂 𑀧𑀜𑁆𑀜𑀢𑁆𑀢𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀘𑀢𑀼𑀢𑁆𑀣𑁄.

𑁫. 𑀦𑀯𑀲𑀗𑁆𑀕𑀳𑀯𑀕𑁆𑀕𑁄

𑁫𑁦𑁧. 𑀦𑀯𑀲𑀗𑁆𑀕𑀳𑀸 𑁋 𑀯𑀢𑁆𑀣𑀼𑀲𑀗𑁆𑀕𑀳𑁄, 𑀯𑀺𑀧𑀢𑁆𑀢𑀺𑀲𑀗𑁆𑀕𑀳𑁄 𑀆𑀧𑀢𑁆𑀢𑀺𑀲𑀗𑁆𑀕𑀳𑁄, 𑀦𑀺𑀤𑀸𑀦𑀲𑀗𑁆𑀕𑀳𑁄, 𑀧𑀼𑀕𑁆𑀕𑀮𑀲𑀗𑁆𑀕𑀳𑁄, 𑀔𑀦𑁆𑀥𑀲𑀗𑁆𑀕𑀳𑁄, 𑀲𑀫𑀼𑀝𑁆𑀞𑀸𑀦𑀲𑀗𑁆𑀕𑀳𑁄, 𑀅𑀥𑀺𑀓𑀭𑀡𑀲𑀗𑁆𑀕𑀳𑁄, 𑀲𑀫𑀣𑀲𑀗𑁆𑀕𑀳𑁄𑀢𑀺.

𑀅𑀥𑀺𑀓𑀭𑀡𑁂 𑀲𑀫𑀼𑀧𑁆𑀧𑀦𑁆𑀦𑁂 𑀲𑀘𑁂 𑀉𑀪𑁄 𑀅𑀢𑁆𑀣𑀧𑀘𑁆𑀘𑀢𑁆𑀣𑀺𑀓𑀸 𑀆𑀕𑀘𑁆𑀙𑀦𑁆𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀯𑀢𑁆𑀣𑀼 𑀆𑀭𑁄𑀘𑀸𑀧𑁂𑀢𑀩𑁆𑀩𑀁. 𑀉𑀪𑀺𑀦𑁆𑀦𑀫𑁆𑀧𑀺 𑀯𑀢𑁆𑀣𑀼 𑀆𑀭𑁄𑀘𑀸𑀧𑁂𑀢𑁆𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀧𑀝𑀺𑀜𑁆𑀜𑀸 𑀲𑁄𑀢𑀩𑁆𑀩𑀸. 𑀉𑀪𑀺𑀦𑁆𑀦𑀫𑁆𑀧𑀺 𑀧𑀝𑀺𑀜𑁆𑀜𑀁 𑀲𑀼𑀢𑁆𑀯𑀸 𑀉𑀪𑁄𑀧𑀺 𑀯𑀢𑁆𑀢𑀩𑁆𑀩𑀸 𑁋 ‘‘𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀅𑀥𑀺𑀓𑀭𑀡𑁂 𑀯𑀽𑀧𑀲𑀫𑀺𑀢𑁂 [𑀯𑀽𑀧𑀲𑀫𑁂𑀧𑀺 (𑀓.)] 𑀉𑀪𑁄𑀧𑀺 𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀣𑀸’’𑀢𑀺. 𑀲𑀘𑁂 𑀆𑀳𑀁𑀲𑀼 𑁋 ‘‘𑀉𑀪𑁄𑀧𑀺 𑀢𑀼𑀝𑁆𑀞𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺, 𑀲𑀗𑁆𑀖𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀲𑀘𑁂 𑀅𑀮𑀚𑁆𑀚𑀼𑀲𑁆𑀲𑀦𑁆𑀦𑀸 𑀳𑁄𑀢𑀺, 𑀧𑀭𑀺𑀲𑀸 𑀉𑀩𑁆𑀩𑀸𑀳𑀺𑀓𑀸𑀬 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀲𑀘𑁂 𑀩𑀸𑀮𑀼𑀲𑁆𑀲𑀦𑁆𑀦𑀸 𑀳𑁄𑀢𑀺, 𑀧𑀭𑀺𑀲𑀸 𑀯𑀺𑀦𑀬𑀥𑀭𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄 𑀬𑁂𑀦 𑀥𑀫𑁆𑀫𑁂𑀦 𑀬𑁂𑀦 𑀯𑀺𑀦𑀬𑁂𑀦 𑀬𑁂𑀦 𑀲𑀢𑁆𑀣𑀼𑀲𑀸𑀲𑀦𑁂𑀦 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺. 𑀢𑀣𑀸 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁.

𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀕𑁄𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀦𑀸𑀫𑀁 𑀚𑀸𑀦𑀺𑀢𑀩𑁆𑀩𑀁, 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸.

𑀫𑁂𑀣𑀼𑀦𑀥𑀫𑁆𑀫𑁄𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀧𑀸𑀭𑀸𑀚𑀺𑀓𑀦𑁆𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀅𑀤𑀺𑀦𑁆𑀦𑀸𑀤𑀸𑀦𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀧𑀸𑀭𑀸𑀚𑀺𑀓𑀦𑁆𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀧𑀸𑀭𑀸𑀚𑀺𑀓𑀦𑁆𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀧𑀸𑀭𑀸𑀚𑀺𑀓𑀦𑁆𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀻𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀓𑀸𑀬𑀲𑀁𑀲𑀕𑁆𑀕𑁄𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀅𑀢𑁆𑀢𑀓𑀸𑀫𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀲𑀜𑁆𑀘𑀭𑀺𑀢𑁆𑀢𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀸𑀭𑀸𑀧𑀦𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀫𑀳𑀮𑁆𑀮𑀓𑀁 𑀯𑀺𑀳𑀸𑀭𑀁 𑀓𑀸𑀭𑀸𑀧𑀦𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀪𑀺𑀓𑁆𑀔𑀼𑀁 𑀅𑀫𑀽𑀮𑀓𑁂𑀦 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑀦𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀪𑀺𑀓𑁆𑀔𑀼𑀁 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀓𑀺𑀜𑁆𑀘𑀺 𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬 𑀧𑀸𑀭𑀸𑀚𑀺𑀓𑁂𑀦 𑀥𑀫𑁆𑀫𑁂𑀦 𑀅𑀦𑀼𑀤𑁆𑀥𑀁𑀲𑀦𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀲𑀗𑁆𑀖𑀪𑁂𑀤𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀪𑁂𑀤𑀓𑀸𑀦𑀼𑀯𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀤𑀼𑀩𑁆𑀩𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘.

𑀓𑀼𑀮𑀤𑀽𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯𑀢𑀢𑀺𑀬𑀁 𑀲𑀫𑀦𑀼𑀪𑀸𑀲𑀦𑀸𑀬 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘…𑀧𑁂….

𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘 𑀉𑀤𑀓𑁂 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀔𑁂𑀴𑀁 𑀯𑀸 𑀓𑀭𑀡𑀦𑁆𑀢𑀺 𑀯𑀢𑁆𑀣𑀼 𑀘𑁂𑀯 𑀕𑁄𑀢𑁆𑀢𑀜𑁆𑀘 𑁋 𑀤𑀼𑀓𑁆𑀓𑀝𑀦𑁆𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘𑀸𑀢𑀺.

𑀦𑀯𑀲𑀗𑁆𑀕𑀳𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄 𑀧𑀜𑁆𑀘𑀫𑁄.