𑁪. 𑀅𑀯𑀦𑁆𑀤𑀦𑀻𑀬𑀧𑀼𑀕𑁆𑀕𑀮𑀸𑀤𑀺

𑁪𑁭𑁭. 𑀓𑀢𑀺 𑀧𑀼𑀕𑁆𑀕𑀮𑀸 𑀦𑀸𑀪𑀺𑀯𑀸𑀤𑁂𑀢𑀩𑁆𑀩𑀸, 𑀅𑀜𑁆𑀚𑀮𑀺𑀲𑀸𑀫𑀺𑀘𑁂𑀦 𑀘;

𑀓𑀢𑀺𑀦𑀁 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀓𑀢𑀺 𑀘𑀻𑀯𑀭𑀥𑀸𑀭𑀡𑀸.

𑀤𑀲 𑀧𑀼𑀕𑁆𑀕𑀮𑀸 𑀦𑀸𑀪𑀺𑀯𑀸𑀤𑁂𑀢𑀩𑁆𑀩𑀸, 𑀅𑀜𑁆𑀚𑀮𑀺𑀲𑀸𑀫𑀺𑀘𑁂𑀦 𑀘;

𑀤𑀲𑀦𑁆𑀦𑀁 𑀤𑀼𑀓𑁆𑀓𑀝𑀁 𑀳𑁄𑀢𑀺, 𑀤𑀲 𑀘𑀻𑀯𑀭𑀥𑀸𑀭𑀡𑀸.

𑀓𑀢𑀺𑀦𑀁 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁, 𑀤𑀸𑀢𑀩𑁆𑀩𑀁 𑀇𑀥 𑀘𑀻𑀯𑀭𑀁;

𑀓𑀢𑀺𑀦𑀁 𑀪𑀦𑁆𑀢𑁂 𑀤𑀸𑀢𑀩𑁆𑀩𑀁, 𑀓𑀢𑀺𑀦𑀜𑁆𑀘𑁂𑀯 𑀦 𑀤𑀸𑀢𑀩𑁆𑀩𑀁.

𑀧𑀜𑁆𑀘𑀦𑁆𑀦𑀁 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁, 𑀤𑀸𑀢𑀩𑁆𑀩𑀁 𑀇𑀥 𑀘𑀻𑀯𑀭𑀁;

𑀲𑀢𑁆𑀢𑀦𑁆𑀦𑀁 𑀲𑀦𑁆𑀢𑁂 𑀤𑀸𑀢𑀩𑁆𑀩𑀁, 𑀲𑁄𑀴𑀲𑀦𑁆𑀦𑀁 𑀦 𑀤𑀸𑀢𑀩𑁆𑀩𑀁.

𑀓𑀢𑀺𑀲𑀢𑀁 𑀭𑀢𑁆𑀢𑀺𑀲𑀢𑀁, 𑀆𑀧𑀢𑁆𑀢𑀺𑀬𑁄 𑀙𑀸𑀤𑀬𑀺𑀢𑁆𑀯𑀸𑀦;

𑀓𑀢𑀺 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸𑀦, 𑀫𑀼𑀘𑁆𑀘𑁂𑀬𑁆𑀬 𑀧𑀸𑀭𑀺𑀯𑀸𑀲𑀺𑀓𑁄.

𑀤𑀲𑀲𑀢𑀁 𑀭𑀢𑁆𑀢𑀺𑀲𑀢𑀁, 𑀆𑀧𑀢𑁆𑀢𑀺𑀬𑁄 𑀙𑀸𑀤𑀬𑀺𑀢𑁆𑀯𑀸𑀦;

𑀤𑀲 𑀭𑀢𑁆𑀢𑀺𑀬𑁄 𑀯𑀲𑀺𑀢𑁆𑀯𑀸𑀦, 𑀫𑀼𑀘𑁆𑀘𑁂𑀬𑁆𑀬 𑀧𑀸𑀭𑀺𑀯𑀸𑀲𑀺𑀓𑁄.

𑀓𑀢𑀺 𑀓𑀫𑁆𑀫𑀤𑁄𑀲𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀲𑀩𑁆𑀩𑁂𑀯 𑀅𑀥𑀫𑁆𑀫𑀺𑀓𑀸 [𑀲𑀩𑁆𑀩𑁂 𑀅𑀥𑀫𑁆𑀫𑀺𑀓𑀸 (𑀲𑀻. 𑀲𑁆𑀬𑀸.)] 𑀓𑀢𑀺.

𑀤𑁆𑀯𑀸𑀤𑀲 𑀓𑀫𑁆𑀫𑀤𑁄𑀲𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀲𑀩𑁆𑀩𑁂𑀯 𑀅𑀥𑀫𑁆𑀫𑀺𑀓𑀸 [𑀲𑀩𑁆𑀩𑁂𑀯𑀸𑀥𑀫𑁆𑀫𑀺𑀓𑀸 (𑀲𑀻.), 𑀲𑀩𑁆𑀩𑁂 𑀅𑀥𑀫𑁆𑀫𑀺𑀓𑀸 (𑀲𑁆𑀬𑀸.)] 𑀓𑀢𑀸.

𑀓𑀢𑀺 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀲𑀩𑁆𑀩𑁂𑀯 𑀥𑀫𑁆𑀫𑀺𑀓𑀸 𑀓𑀢𑀺.

𑀘𑀢𑀲𑁆𑀲𑁄 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀲𑀩𑁆𑀩𑁂𑀯 𑀥𑀫𑁆𑀫𑀺𑀓𑀸 𑀓𑀢𑀸.

𑀓𑀢𑀺 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀥𑀫𑁆𑀫𑀺𑀓𑀸 𑀅𑀥𑀫𑁆𑀫𑀺𑀓𑀸 𑀓𑀢𑀺.

𑀙 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀏𑀓𑁂𑀢𑁆𑀣 𑀥𑀫𑁆𑀫𑀺𑀓𑀸 𑀓𑀢𑀸;

𑀧𑀜𑁆𑀘 𑀅𑀥𑀫𑁆𑀫𑀺𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀓𑀢𑀺 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀥𑀫𑁆𑀫𑀺𑀓𑀸 𑀅𑀥𑀫𑁆𑀫𑀺𑀓𑀸 𑀓𑀢𑀺.

𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀘𑀫𑁆𑀧𑀸𑀬𑀁 𑀯𑀺𑀦𑀬𑀯𑀢𑁆𑀣𑀼𑀲𑁆𑀫𑀺𑀁, 𑀏𑀓𑁂𑀢𑁆𑀣 𑀥𑀫𑁆𑀫𑀺𑀓𑀸 𑀓𑀢𑀸;

𑀢𑀬𑁄 𑀅𑀥𑀫𑁆𑀫𑀺𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸.

𑀬𑀁 𑀤𑁂𑀲𑀺𑀢𑀁𑀦𑀦𑁆𑀢𑀚𑀺𑀦𑁂𑀦 𑀢𑀸𑀤𑀺𑀦𑀸;

𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀺 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀓𑀢𑁂𑀢𑁆𑀣 𑀲𑀫𑁆𑀫𑀦𑁆𑀢𑀺 𑀯𑀺𑀦𑀸 𑀲𑀫𑀣𑁂𑀳𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀩𑁆𑀭𑀽𑀳𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀬𑀁 𑀤𑁂𑀲𑀺𑀢𑀁𑀦𑀦𑁆𑀢𑀚𑀺𑀦𑁂𑀦 𑀢𑀸𑀤𑀺𑀦𑀸;

𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀺 𑀯𑀺𑀯𑁂𑀓𑀤𑀲𑁆𑀲𑀺𑀦𑀸;

𑀏𑀓𑁂𑀢𑁆𑀣 𑀲𑀫𑁆𑀫𑀢𑀺 𑀯𑀺𑀦𑀸 𑀲𑀫𑀣𑁂𑀳𑀺;

𑀏𑀢𑀁 𑀢𑁂 𑀅𑀓𑁆𑀔𑀸𑀫𑀺 𑀯𑀺𑀪𑀗𑁆𑀕𑀓𑁄𑀯𑀺𑀤.

𑀓𑀢𑀺 𑀆𑀧𑀸𑀬𑀺𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 [𑀯𑀺𑀲𑀬𑀸𑀦𑀺 (𑀲𑀻. 𑀲𑁆𑀬𑀸. 𑀏𑀯𑀫𑀼𑀧𑀭𑀺𑀧𑀺)] 𑀲𑀼𑀡𑁄𑀫 𑀢𑁂.

𑀙𑀊𑀦𑀤𑀺𑀬𑀟𑁆𑀠𑀲𑀢𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀆𑀧𑀸𑀬𑀺𑀓𑀸 𑀦𑁂𑀭𑀬𑀺𑀓𑀸, 𑀓𑀧𑁆𑀧𑀝𑁆𑀞𑀸 𑀲𑀗𑁆𑀖𑀪𑁂𑀤𑀓𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀦𑀸𑀧𑀸𑀬𑀺𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀅𑀝𑁆𑀞𑀸𑀭𑀲 𑀦𑀸𑀧𑀸𑀬𑀺𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.

𑀓𑀢𑀺 𑀅𑀝𑁆𑀞𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀫 𑀢𑁂.

𑀅𑀝𑁆𑀞𑀸𑀭𑀲 𑀅𑀝𑁆𑀞𑀓𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀯𑀺𑀦𑀬𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲, 𑀯𑀺𑀦𑀬𑀸𑀦𑀺 𑀲𑀼𑀡𑁄𑀳𑀺 𑀫𑁂.