𑁫. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀁

𑁨𑁯𑁬. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀽𑀧𑀓𑁄 𑀳𑁄𑀢𑀺. 𑀩𑀳𑀼𑀓𑀸𑀦𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺. 𑀬𑀢𑁆𑀣 𑀧𑀲𑁆𑀲𑀢𑀺 𑀓𑀼𑀫𑀸𑀭𑀓𑀁 𑀯𑀸 𑀅𑀧𑀚𑀸𑀧𑀢𑀺𑀓𑀁, 𑀓𑀼𑀫𑀸𑀭𑀺𑀓𑀁 𑀯𑀸 𑀅𑀧𑀢𑀺𑀓𑀁, 𑀓𑀼𑀫𑀸𑀭𑀓𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑁂 𑀓𑀼𑀫𑀸𑀭𑀺𑀓𑀸𑀬 𑀯𑀡𑁆𑀡𑀁 𑀪𑀡𑀢𑀺 𑁋 ‘‘𑀅𑀫𑀼𑀓𑀲𑁆𑀲 𑀓𑀼𑀮𑀲𑁆𑀲 𑀓𑀼𑀫𑀸𑀭𑀺𑀓𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑀻 𑀤𑀓𑁆𑀔𑀸 𑀅𑀦𑀮𑀲𑀸. 𑀙𑀦𑁆𑀦𑀸 𑀲𑀸 𑀓𑀼𑀫𑀸𑀭𑀺𑀓𑀸 𑀇𑀫𑀲𑁆𑀲 𑀓𑀼𑀫𑀸𑀭𑀓𑀲𑁆𑀲𑀸’’𑀢𑀺. 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀏𑀢𑁂 𑀔𑁄, 𑀪𑀦𑁆𑀢𑁂, 𑀅𑀫𑁆𑀳𑁂 𑀦 𑀚𑀸𑀦𑀦𑁆𑀢𑀺 𑁋 ‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’𑀢𑀺. 𑀲𑀘𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀤𑀸𑀧𑁂𑀬𑁆𑀬 𑀆𑀦𑁂𑀬𑁆𑀬𑀸𑀫 𑀫𑀬𑀁 𑀢𑀁 𑀓𑀼𑀫𑀸𑀭𑀺𑀓𑀁 𑀇𑀫𑀲𑁆𑀲 𑀓𑀼𑀫𑀸𑀭𑀓𑀲𑁆𑀲𑀸’’𑀢𑀺. 𑀓𑀼𑀫𑀸𑀭𑀺𑀓𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑁂 𑀓𑀼𑀫𑀸𑀭𑀓𑀲𑁆𑀲 𑀯𑀡𑁆𑀡𑀁 𑀪𑀡𑀢𑀺 𑁋 ‘‘𑀅𑀫𑀼𑀓𑀲𑁆𑀲 𑀓𑀼𑀮𑀲𑁆𑀲 𑀓𑀼𑀫𑀸𑀭𑀓𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀤𑀓𑁆𑀔𑁄 𑀅𑀦𑀮𑀲𑁄. 𑀙𑀦𑁆𑀦𑀸𑀬𑀁 𑀓𑀼𑀫𑀸𑀭𑀺𑀓𑀸 𑀢𑀲𑁆𑀲 𑀓𑀼𑀫𑀸𑀭𑀓𑀲𑁆𑀲𑀸’’𑀢𑀺 [𑀙𑀦𑁆𑀦𑁄 𑀲𑁄 𑀓𑀼𑀫𑀸𑀭𑀓𑁄 𑀇𑀫𑀺𑀲𑁆𑀲𑀸 𑀓𑀼𑀫𑀸𑀭𑀺𑀓𑀸𑀬𑀸𑀢𑀺 (𑀲𑁆𑀬𑀸.)]. 𑀢𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀏𑀢𑁂 𑀔𑁄, 𑀪𑀦𑁆𑀢𑁂, 𑀅𑀫𑁆𑀳𑁂 𑀦 𑀚𑀸𑀦𑀦𑁆𑀢𑀺 𑁋 ‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’𑀢𑀺, 𑀓𑀺𑀲𑁆𑀫𑀺𑀁 𑀯𑀺𑀬 𑀓𑀼𑀫𑀸𑀭𑀺𑀓𑀸𑀬 𑀯𑀢𑁆𑀢𑀼𑀁. 𑀲𑀘𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀬𑀸𑀘𑀸𑀧𑁂𑀬𑁆𑀬 𑀤𑀚𑁆𑀚𑁂𑀬𑁆𑀬𑀸𑀫 𑀫𑀬𑀁 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀢𑀲𑁆𑀲 𑀓𑀼𑀫𑀸𑀭𑀓𑀲𑁆𑀲𑀸’’𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀆𑀯𑀸𑀳𑀸𑀦𑀺𑀧𑀺 𑀓𑀸𑀭𑀸𑀧𑁂𑀢𑀺, 𑀯𑀺𑀯𑀸𑀳𑀸𑀦𑀺𑀧𑀺 𑀓𑀸𑀭𑀸𑀧𑁂𑀢𑀺, 𑀯𑀸𑀭𑁂𑀬𑁆𑀬𑀸𑀦𑀺𑀧𑀺 𑀓𑀸𑀭𑀸𑀧𑁂𑀢𑀺.

𑁨𑁯𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀺𑀲𑁆𑀲𑀸 𑀧𑀼𑀭𑀸𑀡𑀕𑀡𑀓𑀺𑀬𑀸 𑀥𑀻𑀢𑀸 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀢𑀺𑀭𑁄𑀕𑀸𑀫𑀓𑀸 𑀆𑀚𑀻𑀯𑀓𑀲𑀸𑀯𑀓𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀕𑀡𑀓𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁂𑀳𑀸𑀬𑁆𑀬𑁂, 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀅𑀫𑁆𑀳𑀸𑀓𑀁 𑀓𑀼𑀫𑀸𑀭𑀓𑀲𑁆𑀲𑀸’’𑀢𑀺. 𑀲𑀸 𑀏𑀯𑀫𑀸𑀳 𑁋 ‘‘𑀅𑀳𑀁 𑀔𑁆𑀯𑀬𑁆𑀬𑁄 [𑀔𑁆𑀯𑀬𑁆𑀬𑀸 (𑀲𑁆𑀬𑀸.), 𑀔𑁆𑀯𑀸𑀬𑁆𑀬𑁄 (𑀓.)] 𑀢𑀼𑀫𑁆𑀳𑁂 𑀦 𑀚𑀸𑀦𑀸𑀫𑀺 𑁋 ‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’𑀢𑀺. 𑀅𑀬𑀜𑁆𑀘 𑀫𑁂 𑀏𑀓𑀥𑀻𑀢𑀺𑀓𑀸, 𑀢𑀺𑀭𑁄𑀕𑀸𑀫𑁄 𑀘 𑀕𑀦𑁆𑀢𑀩𑁆𑀩𑁄, 𑀦𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺. 𑀫𑀦𑀼𑀲𑁆𑀲𑀸 𑀢𑁂 𑀆𑀚𑀻𑀯𑀓𑀲𑀸𑀯𑀓𑁂 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂, 𑀅𑀬𑁆𑀬𑁄, 𑀆𑀕𑀢𑀢𑁆𑀣𑀸’’𑀢𑀺? ‘‘𑀇𑀥 𑀫𑀬𑀁, 𑀅𑀬𑁆𑀬𑁄, 𑀅𑀫𑀼𑀓𑀁 𑀦𑀸𑀫 𑀕𑀡𑀓𑀺𑀁 𑀥𑀻𑀢𑀭𑀁 𑀬𑀸𑀘𑀺𑀫𑁆𑀳𑀸 𑀅𑀫𑁆𑀳𑀸𑀓𑀁 𑀓𑀼𑀫𑀸𑀭𑀓𑀲𑁆𑀲. 𑀲𑀸 𑀏𑀯𑀫𑀸𑀳 𑁋 ‘𑀅𑀳𑀁, 𑀔𑁆𑀯𑀬𑁆𑀬𑁄 𑀢𑀼𑀫𑁆𑀳𑁂 𑀦 𑀚𑀸𑀦𑀸𑀫𑀺 𑁋 𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’𑀢𑀺. 𑀅𑀬𑀜𑁆𑀘 𑀫𑁂 𑀏𑀓𑀥𑀻𑀢𑀺𑀓𑀸, 𑀢𑀺𑀭𑁄𑀕𑀸𑀫𑁄 𑀘 𑀕𑀦𑁆𑀢𑀩𑁆𑀩𑁄, 𑀦𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺. ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂, 𑀅𑀬𑁆𑀬𑁄, 𑀢𑀁 𑀕𑀡𑀓𑀺𑀁 𑀥𑀻𑀢𑀭𑀁 𑀬𑀸𑀘𑀺𑀢𑁆𑀣? 𑀦𑀦𑀼 𑀅𑀬𑁆𑀬𑁄 𑀉𑀤𑀸𑀬𑀻 𑀯𑀢𑁆𑀢𑀩𑁆𑀩𑁄. 𑀅𑀬𑁆𑀬𑁄 𑀉𑀤𑀸𑀬𑀻 𑀤𑀸𑀧𑁂𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀢𑁂 𑀆𑀚𑀻𑀯𑀓𑀲𑀸𑀯𑀓𑀸 𑀬𑁂𑀦𑀸𑀬𑀲𑁆𑀫𑀸 𑀉𑀤𑀸𑀬𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀅𑀫𑀼𑀓𑀁 𑀦𑀸𑀫 𑀕𑀡𑀓𑀺𑀁 𑀥𑀻𑀢𑀭𑀁 𑀬𑀸𑀘𑀺𑀫𑁆𑀳𑀸 𑀅𑀫𑁆𑀳𑀸𑀓𑀁 𑀓𑀼𑀫𑀸𑀭𑀓𑀲𑁆𑀲. 𑀲𑀸 𑀏𑀯𑀫𑀸𑀳 𑁋 ‘𑀅𑀳𑀁 𑀔𑁆𑀯𑀬𑁆𑀬𑁄 𑀢𑀼𑀫𑁆𑀳𑁂 𑀦 𑀚𑀸𑀦𑀸𑀫𑀺 𑁋 𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸𑀢𑀺. 𑀅𑀬𑀜𑁆𑀘 𑀫𑁂 𑀏𑀓𑀥𑀻𑀢𑀺𑀓𑀸, 𑀢𑀺𑀭𑁄𑀕𑀸𑀫𑁄 𑀘 𑀕𑀦𑁆𑀢𑀩𑁆𑀩𑁄, 𑀦𑀸𑀳𑀁 𑀤𑀲𑁆𑀲𑀸𑀫𑀻’𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀢𑀁 𑀕𑀡𑀓𑀺𑀁 𑀥𑀻𑀢𑀭𑀁 𑀤𑀸𑀧𑁂𑀢𑀼 𑀅𑀫𑁆𑀳𑀸𑀓𑀁 𑀓𑀼𑀫𑀸𑀭𑀓𑀲𑁆𑀲𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀬𑁂𑀦 𑀲𑀸 𑀕𑀡𑀓𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀕𑀡𑀓𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲𑀺𑀫𑁂𑀲𑀁 𑀥𑀻𑀢𑀭𑀁 𑀦 𑀤𑁂𑀲𑀻’’𑀢𑀺? ‘‘𑀅𑀳𑀁 𑀔𑁆𑀯𑀬𑁆𑀬, 𑀇𑀫𑁂 𑀦 𑀚𑀸𑀦𑀸𑀫𑀺 𑁋 ‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’𑀢𑀺. 𑀅𑀬𑀜𑁆𑀘 𑀫𑁂 𑀏𑀓𑀥𑀻𑀢𑀺𑀓𑀸, 𑀢𑀺𑀭𑁄𑀕𑀸𑀫𑁄 𑀘 𑀕𑀦𑁆𑀢𑀩𑁆𑀩𑁄, 𑀦𑀸𑀳𑀁 𑀤𑀲𑁆𑀲𑀸𑀫𑀻’’𑀢𑀺. ‘‘𑀤𑁂𑀳𑀺𑀫𑁂𑀲𑀁. 𑀅𑀳𑀁 𑀇𑀫𑁂 𑀚𑀸𑀦𑀸𑀫𑀻’’𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀚𑀸𑀦𑀸𑀢𑀺, 𑀤𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀲𑀸 𑀕𑀡𑀓𑀻 𑀢𑁂𑀲𑀁 𑀆𑀚𑀻𑀯𑀓𑀲𑀸𑀯𑀓𑀸𑀦𑀁 𑀥𑀻𑀢𑀭𑀁 𑀅𑀤𑀸𑀲𑀺. 𑀅𑀣 𑀔𑁄 𑀢𑁂 𑀆𑀚𑀻𑀯𑀓𑀲𑀸𑀯𑀓𑀸 𑀢𑀁 𑀓𑀼𑀫𑀸𑀭𑀺𑀓𑀁 𑀦𑁂𑀢𑁆𑀯𑀸 𑀫𑀸𑀲𑀁𑀬𑁂𑀯 𑀲𑀼𑀡𑀺𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀢𑀢𑁄 𑀅𑀧𑀭𑁂𑀦 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀦𑁆𑀢𑀺.

𑀅𑀣 𑀔𑁄 𑀲𑀸 𑀓𑀼𑀫𑀸𑀭𑀺𑀓𑀸 𑀫𑀸𑀢𑀼𑀬𑀸 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀅𑀳𑀫𑁆𑀳𑀺 𑀤𑀼𑀕𑁆𑀕𑀢𑀸 𑀤𑀼𑀓𑁆𑀔𑀺𑀢𑀸, 𑀦 𑀲𑀼𑀔𑀁 𑀮𑀪𑀸𑀫𑀺. 𑀫𑀸𑀲𑀁𑀬𑁂𑀯 𑀫𑀁 𑀲𑀼𑀡𑀺𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀢𑀢𑁄 𑀅𑀧𑀭𑁂𑀦 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀦𑁆𑀢𑀺. 𑀆𑀕𑀘𑁆𑀙𑀢𑀼 𑀫𑁂 𑀫𑀸𑀢𑀸, 𑀫𑀁 𑀦𑁂𑀲𑁆𑀲𑀢𑀽’’𑀢𑀺. 𑀅𑀣 𑀔𑁄 𑀲𑀸 𑀕𑀡𑀓𑀻 𑀬𑁂𑀦 𑀢𑁂 𑀆𑀚𑀻𑀯𑀓𑀲𑀸𑀯𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀆𑀚𑀻𑀯𑀓𑀲𑀸𑀯𑀓𑁂 𑀏𑀢𑀤𑀯𑁄𑀘 𑁋 ‘‘𑀫𑀸𑀬𑁆𑀬𑁄, 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑁆𑀣. 𑀲𑀼𑀡𑀺𑀲𑀪𑁄𑀕𑁂𑀦 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀪𑀼𑀜𑁆𑀚𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦𑀢𑁆𑀣𑀫𑁆𑀳𑀸𑀓𑀁 𑀢𑀬𑀸 𑀲𑀤𑁆𑀥𑀺𑀁 𑀆𑀳𑀸𑀭𑀽𑀧𑀳𑀸𑀭𑁄, 𑀲𑀫𑀡𑁂𑀦 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀆𑀳𑀸𑀭𑀽𑀧𑀳𑀸𑀭𑁄. 𑀕𑀘𑁆𑀙 𑀢𑁆𑀯𑀁. 𑀦 𑀫𑀬𑀁 𑀢𑀁 𑀚𑀸𑀦𑀸𑀫𑀸’’𑀢𑀺. 𑀅𑀣 𑀔𑁄 𑀲𑀸 𑀕𑀡𑀓𑀻 𑀢𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀅𑀧𑀲𑀸𑀤𑀺𑀢𑀸 𑀧𑀼𑀦𑀤𑁂𑀯 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀸 𑀓𑀼𑀫𑀸𑀭𑀺𑀓𑀸 𑀫𑀸𑀢𑀼𑀬𑀸 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀅𑀳𑀫𑁆𑀳𑀺 𑀤𑀼𑀕𑁆𑀕𑀢𑀸 𑀤𑀼𑀓𑁆𑀔𑀺𑀢𑀸, 𑀦 𑀲𑀼𑀔𑀁 𑀮𑀪𑀸𑀫𑀺. 𑀫𑀸𑀲𑀁𑀬𑁂𑀯 𑀫𑀁 𑀲𑀼𑀡𑀺𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀢𑀢𑁄 𑀅𑀧𑀭𑁂𑀦 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀦𑁆𑀢𑀺. 𑀆𑀕𑀘𑁆𑀙𑀢𑀼 𑀫𑁂 𑀫𑀸𑀢𑀸, 𑀫𑀁 𑀦𑁂𑀲𑁆𑀲𑀢𑀽’’𑀢𑀺. 𑀅𑀣 𑀔𑁄 𑀲𑀸 𑀕𑀡𑀓𑀻 𑀬𑁂𑀦𑀸𑀬𑀲𑁆𑀫𑀸 𑀉𑀤𑀸𑀬𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀸 𑀓𑀺𑀭, 𑀪𑀦𑁆𑀢𑁂, 𑀓𑀼𑀫𑀸𑀭𑀺𑀓𑀸 𑀤𑀼𑀕𑁆𑀕𑀢𑀸 𑀤𑀼𑀓𑁆𑀔𑀺𑀢𑀸, 𑀦 𑀲𑀼𑀔𑀁 𑀮𑀪𑀢𑀺. 𑀫𑀸𑀲𑀁𑀬𑁂𑀯 𑀦𑀁 𑀲𑀼𑀡𑀺𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀢𑀢𑁄 𑀅𑀧𑀭𑁂𑀦 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀦𑁆𑀢𑀺. 𑀯𑀤𑁂𑀬𑁆𑀬𑀸𑀣, 𑀪𑀦𑁆𑀢𑁂 𑁋 ‘𑀫𑀸𑀬𑁆𑀬𑁄, 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑁆𑀣. 𑀲𑀼𑀡𑀺𑀲𑀪𑁄𑀕𑁂𑀦 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀪𑀼𑀜𑁆𑀚𑀺𑀣𑀸’’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀬𑁂𑀦 𑀢𑁂 𑀆𑀚𑀻𑀯𑀓𑀲𑀸𑀯𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀆𑀚𑀻𑀯𑀓𑀲𑀸𑀯𑀓𑁂 𑀏𑀢𑀤𑀯𑁄𑀘 𑁋 ‘‘𑀫𑀸𑀬𑁆𑀬𑁄, 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀤𑀸𑀲𑀺𑀪𑁄𑀕𑁂𑀦 𑀪𑀼𑀚𑁆𑀚𑀺𑀢𑁆𑀣. 𑀲𑀼𑀡𑀺𑀲𑀪𑁄𑀕𑁂𑀦 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀪𑀼𑀜𑁆𑀚𑀣𑀸’’𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦𑀢𑁆𑀣𑀫𑁆𑀳𑀸𑀓𑀁 𑀢𑀬𑀸 𑀲𑀤𑁆𑀥𑀺𑀁 𑀆𑀳𑀸𑀭𑀽𑀧𑀳𑀸𑀭𑁄, 𑀕𑀡𑀓𑀺𑀬𑀸 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀆𑀳𑀸𑀭𑀽𑀧𑀳𑀸𑀭𑁄. 𑀲𑀫𑀡𑁂𑀦 𑀪𑀯𑀺𑀢𑀩𑁆𑀩𑀁 𑀅𑀩𑁆𑀬𑀸𑀯𑀝𑁂𑀦. 𑀲𑀫𑀡𑁄 𑀅𑀲𑁆𑀲 𑀲𑀼𑀲𑀫𑀡𑁄, 𑀕𑀘𑁆𑀙 𑀢𑁆𑀯𑀁, 𑀦 𑀫𑀬𑀁 𑀢𑀁 𑀚𑀸𑀦𑀸𑀫𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀢𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀅𑀧𑀲𑀸𑀤𑀺𑀢𑁄 𑀧𑀼𑀦𑀤𑁂𑀯 𑀲𑀸𑀯𑀢𑁆𑀣𑀺𑀁 𑀧𑀘𑁆𑀘𑀸𑀕𑀜𑁆𑀙𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀸 𑀓𑀼𑀫𑀸𑀭𑀺𑀓𑀸 𑀫𑀸𑀢𑀼𑀬𑀸 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀅𑀳𑀫𑁆𑀳𑀺 𑀤𑀼𑀕𑁆𑀕𑀢𑀸 𑀤𑀼𑀓𑁆𑀔𑀺𑀢𑀸, 𑀦 𑀲𑀼𑀔𑀁 𑀮𑀪𑀸𑀫𑀺. 𑀫𑀸𑀲𑀁𑀬𑁂𑀯 𑀫𑀁 𑀲𑀼𑀡𑀺𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀢𑀢𑁄 𑀅𑀧𑀭𑁂𑀦 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀦𑁆𑀢𑀺. 𑀆𑀕𑀘𑁆𑀙𑀢𑀼 𑀫𑁂 𑀫𑀸𑀢𑀸, 𑀫𑀁 𑀦𑁂𑀲𑁆𑀲𑀢𑀽’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀸 𑀕𑀡𑀓𑀻 𑀬𑁂𑀦𑀸𑀬𑀲𑁆𑀫𑀸 𑀉𑀤𑀸𑀬𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀸 𑀓𑀺𑀭, 𑀪𑀦𑁆𑀢𑁂, 𑀓𑀼𑀫𑀸𑀭𑀺𑀓𑀸 𑀤𑀼𑀕𑁆𑀕𑀢𑀸 𑀤𑀼𑀓𑁆𑀔𑀺𑀢𑀸, 𑀦 𑀲𑀼𑀔𑀁 𑀮𑀪𑀢𑀺. 𑀫𑀸𑀲𑀁𑀬𑁂𑀯 𑀦𑀁 𑀲𑀼𑀡𑀺𑀲𑀪𑁄𑀕𑁂𑀦 𑀪𑀼𑀜𑁆𑀚𑀺𑀁𑀲𑀼. 𑀢𑀢𑁄 𑀅𑀧𑀭𑁂𑀦 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀦𑁆𑀢𑀺. 𑀯𑀤𑁂𑀬𑁆𑀬𑀸𑀣, 𑀪𑀦𑁆𑀢𑁂 𑁋 ‘𑀫𑀸𑀬𑁆𑀬𑁄, 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀤𑀸𑀲𑀺𑀪𑁄𑀕𑁂𑀦 𑀪𑀼𑀜𑁆𑀚𑀺𑀢𑁆𑀣, 𑀲𑀼𑀡𑀺𑀲𑀪𑁄𑀕𑁂𑀦 𑀇𑀫𑀁 𑀓𑀼𑀫𑀸𑀭𑀺𑀓𑀁 𑀪𑀼𑀜𑁆𑀚𑀣𑀸’’’𑀢𑀺. ‘‘𑀧𑀞𑀫𑀁𑀧𑀸𑀳𑀁 𑀢𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀅𑀧𑀲𑀸𑀤𑀺𑀢𑁄. 𑀕𑀘𑁆𑀙 𑀢𑁆𑀯𑀁. 𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺.

𑁨𑁯𑁮. 𑀅𑀣 𑀔𑁄 𑀲𑀸 𑀕𑀡𑀓𑀻 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀏𑀯𑀁 𑀤𑀼𑀕𑁆𑀕𑀢𑁄 𑀳𑁄𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀏𑀯𑀁 𑀤𑀼𑀓𑁆𑀔𑀺𑀢𑁄 𑀳𑁄𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀏𑀯𑀁 𑀫𑀸 𑀲𑀼𑀔𑀁 𑀮𑀪𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀬𑀣𑀸 𑀫𑁂 𑀓𑀼𑀫𑀸𑀭𑀺𑀓𑀸 𑀤𑀼𑀕𑁆𑀕𑀢𑀸 𑀤𑀼𑀓𑁆𑀔𑀺𑀢𑀸 𑀦 𑀲𑀼𑀔𑀁 𑀮𑀪𑀢𑀺 𑀧𑀸𑀧𑀺𑀓𑀸𑀬 𑀲𑀲𑁆𑀲𑀼𑀬𑀸 𑀧𑀸𑀧𑀓𑁂𑀦 𑀲𑀲𑀼𑀭𑁂𑀦 𑀧𑀸𑀧𑀓𑁂𑀦 𑀲𑀸𑀫𑀺𑀓𑁂𑀦𑀸’’𑀢𑀺. 𑀲𑀸𑀧𑀺 𑀔𑁄 𑀓𑀼𑀫𑀸𑀭𑀺𑀓𑀸 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀏𑀯𑀁 𑀤𑀼𑀕𑁆𑀕𑀢𑁄 𑀳𑁄𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀏𑀯𑀁 𑀤𑀼𑀓𑁆𑀔𑀺𑀢𑁄 𑀳𑁄𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀏𑀯𑀁 𑀫𑀸 𑀲𑀼𑀔𑀁 𑀮𑀪𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀬𑀣𑀸𑀳𑀁 𑀤𑀼𑀕𑁆𑀕𑀢𑀸 𑀤𑀼𑀓𑁆𑀔𑀺𑀢𑀸 𑀦 𑀲𑀼𑀔𑀁 𑀮𑀪𑀸𑀫𑀺 𑀧𑀸𑀧𑀺𑀓𑀸𑀬 𑀲𑀲𑁆𑀲𑀼𑀬𑀸 𑀧𑀸𑀧𑀓𑁂𑀦 𑀲𑀲𑀼𑀭𑁂𑀦 𑀧𑀸𑀧𑀓𑁂𑀦 𑀲𑀸𑀫𑀺𑀓𑁂𑀦𑀸’’𑀢𑀺. 𑀅𑀜𑁆𑀜𑀸𑀧𑀺 𑀇𑀢𑁆𑀣𑀺𑀬𑁄 𑀅𑀲𑀦𑁆𑀢𑀼𑀝𑁆𑀞𑀸 𑀲𑀲𑁆𑀲𑀽𑀳𑀺 𑀯𑀸 𑀲𑀲𑀼𑀭𑁂𑀳𑀺 𑀯𑀸 𑀲𑀸𑀫𑀺𑀓𑁂𑀳𑀺 𑀯𑀸, 𑀢𑀸 𑀏𑀯𑀁 𑀑𑀬𑀸𑀘𑀦𑁆𑀢𑀺 𑁋 ‘‘𑀏𑀯𑀁 𑀤𑀼𑀕𑁆𑀕𑀢𑁄 𑀳𑁄𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀏𑀯𑀁 𑀤𑀼𑀓𑁆𑀔𑀺𑀢𑁄 𑀳𑁄𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀏𑀯𑀁 𑀫𑀸 𑀲𑀼𑀔𑀁 𑀮𑀪𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀬𑀣𑀸 𑀫𑀬𑀁 𑀤𑀼𑀕𑁆𑀕𑀢𑀸 𑀤𑀼𑀓𑁆𑀔𑀺𑀢𑀸 𑀦 𑀲𑀼𑀔𑀁 𑀮𑀪𑀸𑀫 𑀧𑀸𑀧𑀺𑀓𑀸𑀳𑀺 𑀲𑀲𑁆𑀲𑀽𑀳𑀺 𑀧𑀸𑀧𑀓𑁂𑀳𑀺 𑀲𑀲𑀼𑀭𑁂𑀳𑀺 𑀧𑀸𑀧𑀓𑁂𑀳𑀺 𑀲𑀸𑀫𑀺𑀓𑁂𑀳𑀻’’𑀢𑀺. 𑀬𑀸 𑀧𑀦 𑀢𑀸 𑀇𑀢𑁆𑀣𑀺𑀬𑁄 𑀲𑀦𑁆𑀢𑀼𑀝𑁆𑀞𑀸 𑀲𑀲𑁆𑀲𑀽𑀳𑀺 𑀯𑀸 𑀲𑀲𑀼𑀭𑁂𑀳𑀺 𑀯𑀸 𑀲𑀸𑀫𑀺𑀓𑁂𑀳𑀺 𑀯𑀸 𑀢𑀸 𑀏𑀯𑀁 𑀆𑀬𑀸𑀘𑀦𑁆𑀢𑀺 𑁋 ‘‘𑀏𑀯𑀁 𑀲𑀼𑀔𑀺𑀢𑁄 𑀳𑁄𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀏𑀯𑀁 𑀲𑀚𑁆𑀚𑀺𑀢𑁄 𑀳𑁄𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀏𑀯𑀁 𑀲𑀼𑀔𑀫𑁂𑀥𑁄 [𑀲𑀼𑀔𑀫𑁂𑀥𑀺𑀢𑁄 (𑀲𑀻. 𑀓.)] 𑀳𑁄𑀢𑀼 𑀅𑀬𑁆𑀬𑁄 𑀉𑀤𑀸𑀬𑀻, 𑀬𑀣𑀸 𑀫𑀬𑀁 𑀲𑀼𑀔𑀺𑀢𑀸 𑀲𑀚𑁆𑀚𑀺𑀢𑀸 𑀲𑀼𑀔𑀫𑁂𑀥𑀸 𑀪𑀤𑁆𑀤𑀺𑀓𑀸𑀳𑀺 𑀲𑀲𑁆𑀲𑀽𑀳𑀺 𑀪𑀤𑁆𑀤𑀓𑁂𑀳𑀺 𑀲𑀲𑀼𑀭𑁂𑀳𑀺 𑀪𑀤𑁆𑀤𑀓𑁂𑀳𑀺 𑀲𑀸𑀫𑀺𑀓𑁂𑀳𑀻’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀏𑀓𑀘𑁆𑀘𑀸𑀦𑀁 𑀇𑀢𑁆𑀣𑀻𑀦𑀁 𑀑𑀬𑀸𑀘𑀦𑁆𑀢𑀻𑀦𑀁 𑀏𑀓𑀘𑁆𑀘𑀸𑀦𑀁 𑀇𑀢𑁆𑀣𑀻𑀦𑀁 𑀆𑀬𑀸𑀘𑀦𑁆𑀢𑀻𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀤𑀸𑀬𑀺, 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁯𑁯. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀫𑀢𑀺𑀁, 𑀚𑀸𑀬𑀢𑁆𑀢𑀦𑁂 𑀯𑀸 𑀚𑀸𑀭𑀢𑁆𑀢𑀦𑁂 𑀯𑀸, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁩𑁦𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀥𑀼𑀢𑁆𑀢𑀸 𑀉𑀬𑁆𑀬𑀸𑀦𑁂 𑀧𑀭𑀺𑀘𑀸𑀭𑁂𑀦𑁆𑀢𑀸 𑀅𑀜𑁆𑀜𑀢𑀭𑀺𑀲𑁆𑀲𑀸 𑀯𑁂𑀲𑀺𑀬𑀸 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀸𑀳𑁂𑀲𑀼𑀁 𑁋 ‘‘𑀆𑀕𑀘𑁆𑀙𑀢𑀼 𑀉𑀬𑁆𑀬𑀸𑀦𑁂, 𑀧𑀭𑀺𑀘𑀸𑀭𑁂𑀲𑁆𑀲𑀸𑀫𑀸’’𑀢𑀺. 𑀲𑀸 𑀏𑀯𑀫𑀸𑀳 𑁋 ‘‘𑀅𑀳𑀁 𑀔𑁆𑀯𑀬𑁆𑀬𑁄 𑀢𑀼𑀫𑁆𑀳𑁂 𑀦 𑀚𑀸𑀦𑀸𑀫𑀺 𑁋 ‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀩𑀳𑀼𑀪𑀡𑁆𑀟𑀸 𑀩𑀳𑀼𑀧𑀭𑀺𑀓𑁆𑀔𑀸𑀭𑀸, 𑀩𑀳𑀺𑀦𑀕𑀭𑀜𑁆𑀘 𑀕𑀦𑁆𑀢𑀩𑁆𑀩𑀁. 𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀲𑁄 𑀤𑀽𑀢𑁄 𑀢𑁂𑀲𑀁 𑀥𑀼𑀢𑁆𑀢𑀸𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀢𑁂 𑀥𑀼𑀢𑁆𑀢𑁂 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑀼𑀫𑁆𑀳𑁂 𑀅𑀬𑁆𑀬𑁄 𑀏𑀢𑀁 𑀯𑁂𑀲𑀺𑀁 𑀬𑀸𑀘𑀺𑀢𑁆𑀣? 𑀦𑀦𑀼 𑀅𑀬𑁆𑀬𑁄 𑀉𑀤𑀸𑀬𑀻 𑀯𑀢𑁆𑀢𑀩𑁆𑀩𑁄! 𑀅𑀬𑁆𑀬𑁄 𑀉𑀤𑀸𑀬𑀻 𑀉𑀬𑁆𑀬𑁄𑀚𑁂𑀲𑁆𑀲𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀢𑀁 𑀧𑀼𑀭𑀺𑀲𑀁 𑀏𑀢𑀤𑀯𑁄𑀘 𑁋 ‘‘𑀫𑀸𑀬𑁆𑀬𑁄 𑀏𑀯𑀁 𑀅𑀯𑀘. 𑀦 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀏𑀯𑀭𑀽𑀧𑀁 𑀓𑀸𑀢𑀼𑀁. 𑀦𑀸𑀬𑁆𑀬𑁄 𑀉𑀤𑀸𑀬𑀻 𑀏𑀯𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, ‘‘𑀓𑀭𑀺𑀲𑁆𑀲𑀢𑀺 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀅𑀩𑁆𑀪𑀼𑀢𑀫𑀓𑀁𑀲𑀼. 𑀅𑀣 𑀔𑁄 𑀢𑁂 𑀥𑀼𑀢𑁆𑀢𑀸 𑀬𑁂𑀦𑀸𑀬𑀲𑁆𑀫𑀸 𑀉𑀤𑀸𑀬𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥 𑀫𑀬𑀁, 𑀪𑀦𑁆𑀢𑁂, 𑀉𑀬𑁆𑀬𑀸𑀦𑁂 𑀧𑀭𑀺𑀘𑀸𑀭𑁂𑀦𑁆𑀢𑀸 𑀅𑀲𑀼𑀓𑀸𑀬 𑀦𑀸𑀫 𑀯𑁂𑀲𑀺𑀬𑀸 𑀲𑀦𑁆𑀢𑀺𑀓𑁂 𑀤𑀽𑀢𑀁 𑀧𑀳𑀺𑀡𑀺𑀫𑁆𑀳𑀸 𑁋 ‘𑀆𑀕𑀘𑁆𑀙𑀢𑀼 𑀉𑀬𑁆𑀬𑀸𑀦𑁂, 𑀧𑀭𑀺𑀘𑀸𑀭𑁂𑀲𑁆𑀲𑀸𑀫𑀸’𑀢𑀺. 𑀲𑀸 𑀏𑀯𑀫𑀸𑀳 𑁋 ‘𑀅𑀳𑀁 𑀔𑁆𑀯𑀬𑁆𑀬𑁄 𑀢𑀼𑀫𑁆𑀳𑁂 𑀦 𑀚𑀸𑀦𑀸𑀫𑀺 𑁋 𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸𑀢𑀺, 𑀅𑀳𑀜𑁆𑀘𑀫𑁆𑀳𑀺 𑀩𑀳𑀼𑀪𑀡𑁆𑀟𑀸 𑀩𑀳𑀼𑀧𑀭𑀺𑀓𑁆𑀔𑀸𑀭𑀸, 𑀩𑀳𑀺𑀦𑀕𑀭𑀜𑁆𑀘 𑀕𑀦𑁆𑀢𑀩𑁆𑀩𑀁. 𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀢𑀁 𑀯𑀲𑀺𑀁 𑀉𑀬𑁆𑀬𑁄𑀚𑁂𑀢𑀽’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀬𑁂𑀦 𑀲𑀸 𑀯𑁂𑀲𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀯𑁂𑀲𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲𑀺𑀫𑁂𑀲𑀁 𑀦 𑀕𑀘𑁆𑀙𑀲𑀻’’𑀢𑀺? ‘‘𑀅𑀳𑀁 𑀔𑁆𑀯𑀬𑁆𑀬 𑀇𑀫𑁂 𑀦 𑀚𑀸𑀦𑀸𑀫𑀺 𑁋 ‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’𑀢𑀺. 𑀅𑀳𑀜𑁆𑀘𑀫𑁆𑀳𑀺 𑀩𑀳𑀼𑀪𑀡𑁆𑀟𑀸 𑀩𑀳𑀼𑀧𑀭𑀺𑀓𑁆𑀔𑀸𑀭𑀸, 𑀩𑀳𑀺𑀦𑀕𑀭𑀜𑁆𑀘 𑀕𑀦𑁆𑀢𑀩𑁆𑀩𑀁. 𑀦𑀸𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. ‘‘𑀕𑀘𑁆𑀙𑀺𑀫𑁂𑀲𑀁. 𑀅𑀳𑀁 𑀇𑀫𑁂 𑀚𑀸𑀦𑀸𑀫𑀻’’𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀚𑀸𑀦𑀸𑀢𑀺 𑀅𑀳𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀢𑁂 𑀥𑀼𑀢𑁆𑀢𑀸 𑀢𑀁 𑀯𑁂𑀲𑀺𑀁 𑀆𑀤𑀸𑀬 𑀉𑀬𑁆𑀬𑀸𑀦𑀁 𑀅𑀕𑀫𑀁𑀲𑀼. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀅𑀬𑁆𑀬𑁄 𑀉𑀤𑀸𑀬𑀻 𑀢𑀗𑁆𑀔𑀡𑀺𑀓𑀁 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀉𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀺𑀬𑁆𑀬𑀦𑁆𑀢𑀲𑁆𑀲 𑀯𑀺𑀧𑀸𑀘𑁂𑀦𑁆𑀢𑀲𑁆𑀲. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀢𑀗𑁆𑀔𑀡𑀺𑀓𑀁 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀤𑀸𑀬𑀺, 𑀢𑀗𑁆𑀔𑀡𑀺𑀓𑀁 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀢𑀗𑁆𑀔𑀡𑀺𑀓𑀁 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀲𑀺? 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁩𑁦𑁧. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑁂𑀬𑁆𑀬, 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀫𑀢𑀺𑀁, 𑀚𑀸𑀬𑀢𑁆𑀢𑀦𑁂 𑀯𑀸 𑀚𑀸𑀭𑀢𑁆𑀢𑀦𑁂 𑀯𑀸, 𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺.

𑁩𑁦𑁨. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀲𑀜𑁆𑀘𑀭𑀺𑀢𑁆𑀢𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀇𑀢𑁆𑀣𑀺𑀬𑀸 𑀯𑀸 𑀧𑀳𑀺𑀢𑁄 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀕𑀘𑁆𑀙𑀢𑀺, 𑀧𑀼𑀭𑀺𑀲𑁂𑀦 𑀯𑀸 𑀧𑀳𑀺𑀢𑁄 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑁂 𑀕𑀘𑁆𑀙𑀢𑀺.

𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀫𑀢𑀺𑀦𑁆𑀢𑀺 𑀧𑀼𑀭𑀺𑀲𑀲𑁆𑀲 𑀫𑀢𑀺𑀁 𑀇𑀢𑁆𑀣𑀺𑀬𑀸 𑀆𑀭𑁄𑀘𑁂𑀢𑀺.

𑀧𑀼𑀭𑀺𑀲𑀲𑁆𑀲 𑀯𑀸 𑀇𑀢𑁆𑀣𑀺𑀫𑀢𑀺𑀦𑁆𑀢𑀺 𑀇𑀢𑁆𑀣𑀺𑀬𑀸 𑀫𑀢𑀺𑀁 𑀧𑀼𑀭𑀺𑀲𑀲𑁆𑀲 𑀆𑀭𑁄𑀘𑁂𑀢𑀺.

𑀚𑀸𑀬𑀢𑁆𑀢𑀦𑁂 𑀯𑀸𑀢𑀺 𑀚𑀸𑀬𑀸 𑀪𑀯𑀺𑀲𑁆𑀲𑀲𑀺.

𑀚𑀸𑀭𑀢𑁆𑀢𑀦𑁂 𑀯𑀸𑀢𑀺 𑀚𑀸𑀭𑀻 𑀪𑀯𑀺𑀲𑁆𑀲𑀲𑀺.

𑀅𑀦𑁆𑀢𑀫𑀲𑁄 𑀢𑀗𑁆𑀔𑀡𑀺𑀓𑀸𑀬𑀧𑀻𑀢𑀺 𑀫𑀼𑀳𑀼𑀢𑁆𑀢𑀺𑀓𑀸 𑀪𑀯𑀺𑀲𑁆𑀲𑀲𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺…𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑁩𑁦𑁩. 𑀤𑀲 𑀇𑀢𑁆𑀣𑀺𑀬𑁄 𑁋 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀸𑀭𑀓𑁆𑀔𑀸 𑀲𑀧𑀭𑀺𑀤𑀡𑁆𑀟𑀸.

𑀤𑀲 𑀪𑀭𑀺𑀬𑀸𑀬𑁄 𑁋 𑀥𑀦𑀓𑁆𑀓𑀻𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀪𑁄𑀕𑀯𑀸𑀲𑀺𑀦𑀻 𑀧𑀝𑀯𑀸𑀲𑀺𑀦𑀻 𑀑𑀤𑀧𑀢𑁆𑀢𑀓𑀺𑀦𑀻 𑀑𑀪𑀝𑀘𑀼𑀫𑁆𑀩𑀝𑀸 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀫𑀼𑀳𑀼𑀢𑁆𑀢𑀺𑀓𑀸.

𑁩𑁦𑁪. 𑀫𑀸𑀢𑀼𑀭𑀓𑁆𑀔𑀺𑀢𑀸 𑀦𑀸𑀫 𑀫𑀸𑀢𑀸 𑀭𑀓𑁆𑀔𑀢𑀺 𑀕𑁄𑀧𑁂𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀺 𑀯𑀲𑀁 𑀯𑀢𑁆𑀢𑁂𑀢𑀺.

𑀧𑀺𑀢𑀼𑀭𑀓𑁆𑀔𑀺𑀢𑀸 𑀦𑀸𑀫 𑀧𑀺𑀢𑀸 𑀭𑀓𑁆𑀔𑀢𑀺 𑀕𑁄𑀧𑁂𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀺 𑀯𑀲𑀁 𑀯𑀢𑁆𑀢𑁂𑀢𑀺.

𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀦𑀸𑀫 𑀫𑀸𑀢𑀸𑀧𑀺𑀢𑀭𑁄 𑀭𑀓𑁆𑀔𑀦𑁆𑀢𑀺 𑀕𑁄𑀧𑁂𑀦𑁆𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀦𑁆𑀢𑀺 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺.

𑀪𑀸𑀢𑀼𑀭𑀓𑁆𑀔𑀺𑀢𑀸 𑀦𑀸𑀫 𑀪𑀸𑀢𑀸 𑀭𑀓𑁆𑀔𑀢𑀺 𑀕𑁄𑀧𑁂𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀺 𑀯𑀲𑀁 𑀯𑀢𑁆𑀢𑁂𑀢𑀺.

𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀦𑀸𑀫 𑀪𑀕𑀺𑀦𑀻 𑀭𑀓𑁆𑀔𑀢𑀺 𑀕𑁄𑀧𑁂𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀢𑀺 𑀯𑀲𑀁 𑀯𑀢𑁆𑀢𑁂𑀢𑀺.

𑀜𑀸𑀢𑀺𑀭𑀓𑁆𑀔𑀺𑀢𑀸 𑀦𑀸𑀫 𑀜𑀸𑀢𑀓𑀸 𑀭𑀓𑁆𑀔𑀦𑁆𑀢𑀺 𑀕𑁄𑀧𑁂𑀦𑁆𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀦𑁆𑀢𑀺 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺.

𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀦𑀸𑀫 𑀲𑀕𑁄𑀢𑁆𑀢𑀸 𑀭𑀓𑁆𑀔𑀦𑁆𑀢𑀺 𑀕𑁄𑀧𑁂𑀦𑁆𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀦𑁆𑀢𑀺 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺.

𑀥𑀫𑁆𑀫𑀭𑀓𑁆𑀔𑀺𑀢𑀸 𑀦𑀸𑀫 𑀲𑀳𑀥𑀫𑁆𑀫𑀺𑀓𑀸 𑀭𑀓𑁆𑀔𑀦𑁆𑀢𑀺 𑀕𑁄𑀧𑁂𑀦𑁆𑀢𑀺 𑀇𑀲𑁆𑀲𑀭𑀺𑀬𑀁 𑀓𑀸𑀭𑁂𑀦𑁆𑀢𑀺 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺.

𑀲𑀸𑀭𑀓𑁆𑀔𑀸 𑀦𑀸𑀫 𑀕𑀩𑁆𑀪𑁂𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀢𑀺 𑁋 𑀫𑀬𑁆𑀳𑀁 𑀏𑀲𑀸𑀢𑀺. 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀺.

𑀲𑀧𑀭𑀺𑀤𑀡𑁆𑀟𑀸 𑀦𑀸𑀫 𑀓𑁂𑀳𑀺𑀘𑀺 𑀤𑀡𑁆𑀟𑁄 𑀞𑀧𑀺𑀢𑁄 𑀳𑁄𑀢𑀺 𑁋 𑀬𑁄 𑀇𑀢𑁆𑀣𑀦𑁆𑀦𑀸𑀫𑀁 𑀇𑀢𑁆𑀣𑀺𑀁 𑀕𑀘𑁆𑀙𑀢𑀺 𑀏𑀢𑁆𑀢𑀓𑁄 𑀤𑀡𑁆𑀟𑁄𑀢𑀺.

𑀥𑀦𑀓𑁆𑀓𑀻𑀢𑀸 𑀦𑀸𑀫 𑀥𑀦𑁂𑀦 𑀓𑀺𑀡𑀺𑀢𑁆𑀯𑀸 𑀯𑀸𑀲𑁂𑀢𑀺.

𑀙𑀦𑁆𑀤𑀯𑀸𑀲𑀺𑀦𑀻 𑀦𑀸𑀫 𑀧𑀺𑀬𑁄 𑀧𑀺𑀬𑀁 𑀯𑀸𑀲𑁂𑀢𑀺.

𑀪𑁄𑀕𑀯𑀸𑀲𑀺𑀦𑀻 𑀦𑀸𑀫 𑀪𑁄𑀕𑀁 𑀤𑀢𑁆𑀯𑀸 𑀯𑀸𑀲𑁂𑀢𑀺.

𑀧𑀝𑀯𑀸𑀲𑀺𑀦𑀻 𑀦𑀸𑀫 𑀧𑀝𑀁 𑀤𑀢𑁆𑀯𑀸 𑀯𑀸𑀲𑁂𑀢𑀺.

𑀑𑀤𑀧𑀢𑁆𑀢𑀓𑀺𑀦𑀻 𑀦𑀸𑀫 𑀉𑀤𑀓𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀯𑀸𑀲𑁂𑀢𑀺.

𑀑𑀪𑀝𑀘𑀼𑀫𑁆𑀩𑀝𑀸 𑀦𑀸𑀫 𑀘𑀼𑀫𑁆𑀩𑀝𑀁 𑀑𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀢𑀺.

𑀤𑀸𑀲𑀻 𑀦𑀸𑀫 𑀤𑀸𑀲𑀻 𑀘𑁂𑀯 𑀳𑁄𑀢𑀺 𑀪𑀭𑀺𑀬𑀸 𑀘.

𑀓𑀫𑁆𑀫𑀓𑀸𑀭𑀻 𑀦𑀸𑀫 𑀓𑀫𑁆𑀫𑀓𑀸𑀭𑀻 𑀘𑁂𑀯 𑀳𑁄𑀢𑀺 𑀪𑀭𑀺𑀬𑀸 𑀘.

𑀥𑀚𑀸𑀳𑀝𑀸 𑀦𑀸𑀫 𑀓𑀭𑀫𑀭𑀸𑀦𑀻𑀢𑀸 𑀯𑀼𑀘𑁆𑀘𑀢𑀺.

𑀫𑀼𑀳𑀼𑀢𑁆𑀢𑀺𑀓𑀸 𑀦𑀸𑀫 𑀢𑀗𑁆𑀔𑀡𑀺𑀓𑀸 𑀯𑀼𑀘𑁆𑀘𑀢𑀺.

𑁩𑁦𑁫. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀺𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺…𑀧𑁂… 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀪𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀪𑀕𑀺𑀦𑀺𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀜𑀸𑀢𑀺𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀕𑁄𑀢𑁆𑀢𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀥𑀫𑁆𑀫𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀲𑀸𑀭𑀓𑁆𑀔𑀁 𑀩𑁆𑀭𑀽𑀳𑀺… 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀦𑀺𑀓𑁆𑀔𑁂𑀧𑀧𑀤𑀸𑀦𑀺.

𑁩𑁦𑁬. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀸𑀧𑀺𑀢𑀼𑀭𑀅𑀔𑀢𑀜𑁆𑀘…𑀧𑁂…

𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀸𑀢𑀼𑀭𑀓𑁆𑀔𑀺𑀢𑀜𑁆𑀘… 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀕𑀺𑀦𑀺𑀭𑀓𑁆𑀔𑀺𑀢𑀜𑁆𑀘… 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀜𑀸𑀢𑀺𑀭𑀓𑁆𑀔𑀺𑀢𑀜𑁆𑀘… 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀕𑁄𑀢𑁆𑀢𑀭𑀓𑁆𑀔𑀺𑀢𑀜𑁆𑀘… 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀥𑀫𑁆𑀫𑀭𑀓𑁆𑀔𑀺𑀢𑀜𑁆𑀘… 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀲𑀸𑀭𑀓𑁆𑀔𑀜𑁆𑀘… 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀲𑀧𑀭𑀺𑀤𑀡𑁆𑀟𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀔𑀡𑁆𑀟𑀘𑀓𑁆𑀓𑀁.

𑁩𑁦𑁭. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀸𑀢𑀼𑀭𑀓𑁆𑀔𑀺𑀢𑀜𑁆𑀘…𑀧𑁂… 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀕𑀺𑀦𑀺𑀭𑀓𑁆𑀔𑀺𑀢𑀜𑁆𑀘… 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀜𑀸𑀢𑀺𑀭𑀓𑁆𑀔𑀺𑀢𑀜𑁆𑀘… 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀕𑁄𑀢𑁆𑀢𑀭𑀓𑁆𑀔𑀺𑀢𑀜𑁆𑀘… 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀥𑀫𑁆𑀫𑀭𑀓𑁆𑀔𑀺𑀢𑀜𑁆𑀘… 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀲𑀸𑀭𑀓𑁆𑀔𑀜𑁆𑀘… 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀲𑀧𑀭𑀺𑀤𑀡𑁆𑀟𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀩𑀤𑁆𑀥𑀘𑀓𑁆𑀓𑀁 𑀫𑀽𑀮𑀁 𑀲𑀁𑀔𑀺𑀢𑁆𑀢𑀁.

𑁩𑁦𑁮. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀜𑁆𑀘 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀜𑁆𑀘 𑀧𑀺𑀢𑀼𑀭𑀅𑀔𑀢𑀜𑁆𑀘…𑀧𑁂…

𑀲𑀧𑀭𑀺𑀤𑀡𑁆𑀟𑀜𑁆𑀘 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘… 𑀲𑀧𑀭𑀺𑀤𑀡𑁆𑀟𑀜𑁆𑀘 𑀪𑀸𑀢𑀼𑀭𑀓𑁆𑀔𑀺𑀢𑀜𑁆𑀘… 𑀲𑀧𑀭𑀺𑀤𑀡𑁆𑀟𑀜𑁆𑀘 𑀪𑀕𑀺𑀦𑀺𑀭𑀓𑁆𑀔𑀺𑀢𑀜𑁆𑀘… 𑀲𑀧𑀭𑀺𑀤𑀡𑁆𑀟𑀜𑁆𑀘 𑀜𑀸𑀢𑀺𑀭𑀓𑁆𑀔𑀺𑀢𑀜𑁆𑀘… 𑀲𑀧𑀭𑀺𑀤𑀡𑁆𑀟𑀜𑁆𑀘 𑀕𑁄𑀢𑁆𑀢𑀭𑀓𑁆𑀔𑀺𑀢𑀜𑁆𑀘… 𑀲𑀧𑀭𑀺𑀤𑀡𑁆𑀟𑀜𑁆𑀘 𑀥𑀫𑁆𑀫𑀭𑀓𑁆𑀔𑀺𑀢𑀜𑁆𑀘… 𑀲𑀧𑀭𑀺𑀤𑀡𑁆𑀟𑀜𑁆𑀘 𑀲𑀸𑀭𑀓𑁆𑀔𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑀏𑀯𑀁 𑀤𑀼𑀫𑀽𑀮𑀓𑀫𑁆𑀧𑀺 𑀢𑀺𑀫𑀽𑀮𑀓𑀫𑁆𑀧𑀺 𑀬𑀸𑀯 𑀦𑀯𑀫𑀽𑀮𑀓𑀁 𑀓𑀸𑀢𑀩𑁆𑀩𑀁.

𑀇𑀤𑀁 𑀤𑀲𑀫𑀽𑀮𑀓𑀁

𑁩𑁦𑁯. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀕𑀺𑀦𑀺𑀭𑀓𑁆𑀔𑀺𑀢𑀜𑁆𑀘 𑀜𑀸𑀢𑀺𑀭𑀓𑁆𑀔𑀺𑀢𑀜𑁆𑀘 𑀕𑁄𑀢𑁆𑀢𑀭𑀓𑁆𑀔𑀺𑀢𑀜𑁆𑀘 𑀥𑀫𑁆𑀫𑀭𑀓𑁆𑀔𑀺𑀢𑀜𑁆𑀘 𑀲𑀸𑀭𑀓𑁆𑀔𑀜𑁆𑀘 𑀲𑀧𑀭𑀺𑀤𑀡𑁆𑀟𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀥𑀦𑀓𑁆𑀓𑀻𑀢𑀸𑀘𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁩𑁧𑁦. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻…𑀧𑁂… 𑀪𑁄𑀕𑀯𑀸𑀲𑀺𑀦𑀻… 𑀧𑀝𑀯𑀸𑀲𑀺𑀦𑀻… 𑀑𑀤𑀧𑀢𑁆𑀢𑀓𑀺𑀦𑀻… 𑀑𑀪𑀝𑀘𑀼𑀫𑁆𑀩𑀝𑀸… 𑀤𑀸𑀲𑀻 𑀘 𑀪𑀭𑀺𑀬𑀸 𑀘… 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘… 𑀥𑀚𑀸𑀳𑀝𑀸… 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀺𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺…𑀧𑁂… 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀪𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀪𑀕𑀺𑀦𑀺𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀜𑀸𑀢𑀺𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀕𑁄𑀢𑁆𑀢𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀥𑀫𑁆𑀫𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺… 𑀲𑀸𑀭𑀓𑁆𑀔𑀁 𑀩𑁆𑀭𑀽𑀳𑀺… 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀦𑀺𑀓𑁆𑀔𑁂𑀧𑀧𑀤𑀸𑀦𑀺.

𑁩𑁧𑁧. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘…𑀧𑁂… 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀲𑀧𑀭𑀺𑀤𑀡𑁆𑀟𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀔𑀡𑁆𑀟𑀘𑀓𑁆𑀓𑀁.

𑁩𑁧𑁨. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀸𑀢𑀼𑀭𑀓𑁆𑀔𑀺𑀢𑀜𑁆𑀘…𑀧𑁂… 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀲𑀧𑀭𑀺𑀤𑀡𑁆𑀟𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀩𑀤𑁆𑀥𑀘𑀓𑁆𑀓𑀁 𑀫𑀽𑀮𑀁 𑀲𑀁𑀔𑀺𑀢𑁆𑀢𑀁.

𑁩𑁧𑁩. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀜𑁆𑀘 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀜𑁆𑀘 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘…𑀧𑁂… 𑀲𑀧𑀭𑀺𑀤𑀡𑁆𑀟𑀜𑁆𑀘 𑀲𑀸𑀭𑀓𑁆𑀔𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑀤𑀼𑀫𑀽𑀮𑀓𑀸𑀤𑀻𑀦𑀺𑀧𑀺 𑀏𑀯𑀫𑁂𑀯 𑀓𑀸𑀢𑀩𑁆𑀩𑀸𑀦𑀺.

𑀇𑀤𑀁 𑀤𑀲𑀫𑀽𑀮𑀓𑀁

𑁩𑁧𑁪. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀕𑀺𑀦𑀺𑀭𑀓𑁆𑀔𑀺𑀢𑀜𑁆𑀘 𑀜𑀸𑀢𑀺𑀭𑀓𑁆𑀔𑀺𑀢𑀜𑁆𑀘 𑀕𑁄𑀢𑁆𑀢𑀭𑀓𑁆𑀔𑀺𑀢𑀜𑁆𑀘 𑀥𑀫𑁆𑀫𑀭𑀓𑁆𑀔𑀺𑀢𑀜𑁆𑀘 𑀲𑀸𑀭𑀓𑁆𑀔𑀜𑁆𑀘 𑀲𑀧𑀭𑀺𑀤𑀡𑁆𑀟𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀫𑀼𑀳𑀼𑀢𑁆𑀢𑀺𑀓𑀸𑀘𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁩𑁧𑁫. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻…𑀧𑁂… 𑀪𑁄𑀕𑀯𑀸𑀲𑀺𑀦𑀻… 𑀧𑀝𑀯𑀸𑀲𑀺𑀦𑀻… 𑀑𑀤𑀧𑀢𑁆𑀢𑀓𑀺𑀦𑀻… 𑀑𑀪𑀝𑀘𑀼𑀫𑁆𑀩𑀝𑀸… 𑀤𑀸𑀲𑀻 𑀘 𑀪𑀭𑀺𑀬𑀸 𑀘… 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘… 𑀥𑀚𑀸𑀳𑀝𑀸… 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀦𑀺𑀓𑁆𑀔𑁂𑀧𑀧𑀤𑀸𑀦𑀺.

𑁩𑁧𑁬. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀪𑁄𑀕𑀯𑀸𑀲𑀺𑀦𑀻 𑀘…𑀧𑁂… 𑀥𑀦𑀓𑁆𑀓𑀻𑀢𑀸 𑀘 𑀧𑀝𑀯𑀸𑀲𑀺𑀦𑀻 𑀘… 𑀥𑀦𑀓𑁆𑀓𑀻𑀢𑀸 𑀘 𑀑𑀤𑀧𑀢𑁆𑀢𑀓𑀺𑀦𑀻 𑀘… 𑀥𑀦𑀓𑁆𑀓𑀻𑀢𑀸 𑀘 𑀑𑀪𑀝𑀘𑀼𑀫𑁆𑀩𑀝𑀸 𑀘… 𑀥𑀦𑀓𑁆𑀓𑀻𑀢𑀸 𑀘 𑀤𑀸𑀲𑀻 𑀘 𑀪𑀭𑀺𑀬𑀸 𑀘… 𑀥𑀦𑀓𑁆𑀓𑀻𑀢𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘… 𑀥𑀦𑀓𑁆𑀓𑀻𑀢𑀸 𑀘 𑀥𑀚𑀸𑀳𑀝𑀸 𑀘… 𑀥𑀦𑀓𑁆𑀓𑀻𑀢𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀔𑀡𑁆𑀟𑀘𑀓𑁆𑀓𑀁.

𑁩𑁧𑁭. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘…𑀧𑁂… 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘… 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀥𑀦𑀓𑁆𑀓𑀻𑀢𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀩𑀤𑁆𑀥𑀘𑀓𑁆𑀓𑀁 𑀫𑀽𑀮𑀁 𑀲𑀁𑀔𑀺𑀢𑁆𑀢𑀁.

𑁩𑁧𑁮. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀥𑀦𑀓𑁆𑀓𑀻𑀢𑀸 𑀘…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀥𑀚𑀸𑀳𑀝𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑀤𑀼𑀫𑀽𑀮𑀓𑀸𑀤𑀻𑀦𑀺𑀧𑀺 𑀏𑀯𑀫𑁂𑀯 𑀓𑀸𑀢𑀩𑁆𑀩𑀸𑀦𑀺.

𑀇𑀤𑀁 𑀤𑀲𑀫𑀽𑀮𑀓𑀁

𑁩𑁧𑁯. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘 𑀧𑀝𑀯𑀸𑀲𑀺𑀦𑀻 𑀘 𑀑𑀤𑀧𑀢𑁆𑀢𑀓𑀺𑀦𑀻 𑀘 𑀑𑀪𑀝𑀘𑀼𑀫𑁆𑀩𑀝𑀸 𑀘 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀫𑀸𑀢𑀼𑀭𑀓𑁆𑀔𑀺𑀢𑀸𑀘𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀧𑀺𑀢𑀼𑀭𑀓𑁆𑀔𑀺𑀢𑀁…𑀧𑁂… 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀁… 𑀪𑀸𑀢𑀼𑀭𑀓𑁆𑀔𑀺𑀢𑀁… 𑀪𑀕𑀺𑀦𑀺𑀭𑀓𑁆𑀔𑀺𑀢𑀁 … 𑀜𑀸𑀢𑀺𑀭𑀓𑁆𑀔𑀺𑀢𑀁… 𑀕𑁄𑀢𑁆𑀢𑀭𑀓𑁆𑀔𑀺𑀢𑀁… 𑀥𑀫𑁆𑀫𑀭𑀓𑁆𑀔𑀺𑀢𑀁 … 𑀲𑀸𑀭𑀓𑁆𑀔𑀁… 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻…𑀧𑁂… 𑀪𑁄𑀕𑀯𑀸𑀲𑀺𑀦𑀻, 𑀧𑀝𑀯𑀸𑀲𑀺𑀦𑀻, 𑀑𑀤𑀧𑀢𑁆𑀢𑀓𑀺𑀦𑀻, 𑀑𑀪𑀝𑀘𑀼𑀫𑁆𑀩𑀝𑀸, 𑀤𑀸𑀲𑀻 𑀘 𑀪𑀭𑀺𑀬𑀸 𑀘, 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘, 𑀥𑀚𑀸𑀳𑀝𑀸, 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀦𑀺𑀓𑁆𑀔𑁂𑀧𑀧𑀤𑀸𑀦𑀺.

𑁩𑁨𑁦. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀪𑁄𑀕𑀯𑀸𑀲𑀺𑀦𑀻 𑀘…𑀧𑁂… 𑀥𑀦𑀓𑁆𑀓𑀻𑀢𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀔𑀡𑁆𑀟𑀘𑀓𑁆𑀓𑀁.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘…𑀧𑁂… 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘, 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀥𑀦𑀓𑁆𑀓𑀻𑀢𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀩𑀤𑁆𑀥𑀘𑀓𑁆𑀓𑀁 𑀫𑀽𑀮𑀁 𑀲𑀁𑀔𑀺𑀢𑁆𑀢𑀁.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀥𑀦𑀓𑁆𑀓𑀻𑀢𑀸 𑀘…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘, 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀥𑀚𑀸𑀳𑀝𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑀤𑀼𑀫𑀽𑀮𑀓𑀫𑁆𑀧𑀺 𑀢𑀺𑀫𑀽𑀮𑀓𑀫𑁆𑀧𑀺 𑀬𑀸𑀯 𑀦𑀯𑀫𑀽𑀮𑀓𑀁 𑀏𑀯𑀫𑁂𑀯 𑀓𑀸𑀢𑀩𑁆𑀩𑀁.

𑀇𑀤𑀁 𑀤𑀲𑀫𑀽𑀮𑀓𑀁.

𑁩𑁨𑁧. 𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀲𑀧𑀭𑀺𑀤𑀡𑁆𑀟𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘 𑀧𑀝𑀯𑀸𑀲𑀺𑀦𑀻 𑀘 𑀑𑀤𑀧𑀢𑁆𑀢𑀓𑀺𑀦𑀻 𑀘 𑀑𑀪𑀝𑀘𑀼𑀫𑁆𑀩𑀝𑀸 𑀘 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀲𑀧𑀭𑀺𑀤𑀡𑁆𑀟𑀸𑀘𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀺 𑁋 ‘𑀳𑁄𑀳𑀺 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀯𑀁 𑀉𑀪𑀢𑁄𑀯𑀟𑁆𑀠𑀓𑀁 𑀓𑀸𑀢𑀩𑁆𑀩𑀁.

𑀧𑀼𑀭𑀺𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀫𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀸𑀢𑀼𑀭𑀓𑁆𑀔𑀺𑀢𑀜𑁆𑀘 𑀪𑀕𑀺𑀦𑀺𑀭𑀓𑁆𑀔𑀺𑀢𑀜𑁆𑀘 𑀜𑀸𑀢𑀺𑀭𑀓𑁆𑀔𑀺𑀢𑀜𑁆𑀘 𑀕𑁄𑀢𑁆𑀢𑀭𑀓𑁆𑀔𑀺𑀢𑀜𑁆𑀘 𑀥𑀫𑁆𑀫𑀭𑀓𑁆𑀔𑀺𑀢𑀜𑁆𑀘 𑀲𑀸𑀭𑀓𑁆𑀔𑀜𑁆𑀘 𑀲𑀧𑀭𑀺𑀤𑀡𑁆𑀟𑀜𑁆𑀘 𑀩𑁆𑀭𑀽𑀳𑀺 𑁋 ‘𑀳𑁄𑀣 𑀓𑀺𑀭 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸𑀬𑁄 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘 𑀧𑀝𑀯𑀸𑀲𑀺𑀦𑀻 𑀘 𑀑𑀤𑀧𑀢𑁆𑀢𑀓𑀺𑀦𑀻 𑀘 𑀑𑀪𑀝𑀘𑀼𑀫𑁆𑀩𑀝𑀸 𑀘 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀉𑀪𑀢𑁄𑀯𑀟𑁆𑀠𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀼𑀭𑀺𑀲𑀲𑁆𑀲 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺…𑀧𑁂… 𑀧𑀼𑀭𑀺𑀲𑀲𑁆𑀲 𑀧𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺…𑀧𑁂… 𑀧𑀼𑀭𑀺𑀲𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺…𑀧𑁂… 𑀧𑀼𑀭𑀺𑀲𑀲𑁆𑀲 𑀪𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺…𑀧𑁂… 𑀧𑀼𑀭𑀺𑀲𑀲𑁆𑀲 𑀪𑀕𑀺𑀦𑀻 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺…𑀧𑁂… 𑀧𑀼𑀭𑀺𑀲𑀲𑁆𑀲 𑀜𑀸𑀢𑀓𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺…𑀧𑁂… 𑀧𑀼𑀭𑀺𑀲𑀲𑁆𑀲 𑀕𑁄𑀢𑁆𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺…𑀧𑁂… 𑀧𑀼𑀭𑀺𑀲𑀲𑁆𑀲 𑀲𑀳𑀥𑀫𑁆𑀫𑀺𑀓𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺…𑀧𑁂….

𑀧𑀼𑀭𑀺𑀲𑀲𑁆𑀲 𑀧𑁂𑀬𑁆𑀬𑀸𑀮𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄.

𑀉𑀪𑀢𑁄𑀯𑀟𑁆𑀠𑀓𑀁 𑀬𑀣𑀸 𑀧𑀼𑀭𑀺𑀫𑀦𑀬𑁄 𑀢𑀣𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁩𑁨𑁨. 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻…𑀧𑁂… 𑀪𑁄𑀕𑀯𑀸𑀲𑀺𑀦𑀻, 𑀧𑀝𑀯𑀸𑀲𑀺𑀦𑀻, 𑀑𑀤𑀧𑀢𑁆𑀢𑀓𑀺𑀦𑀻, 𑀑𑀪𑀝𑀘𑀼𑀫𑁆𑀩𑀝𑀸, 𑀤𑀸𑀲𑀻 𑀘 𑀪𑀭𑀺𑀬𑀸 𑀘, 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘, 𑀥𑀚𑀸𑀳𑀝𑀸, 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀦𑀺𑀓𑁆𑀔𑁂𑀧𑀧𑀤𑀸𑀦𑀺.

𑁩𑁨𑁩. 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘…𑀧𑁂… 𑀥𑀦𑀓𑁆𑀓𑀻𑀢𑀸 𑀘 𑀪𑁄𑀕𑀯𑀸𑀲𑀺𑀦𑀻 𑀘, 𑀥𑀦𑀓𑁆𑀓𑀻𑀢𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀔𑀡𑁆𑀟𑀘𑀓𑁆𑀓𑀁.

𑁩𑁨𑁪. 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘…𑀧𑁂… 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘, 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀥𑀦𑀓𑁆𑀓𑀻𑀢𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀩𑀤𑁆𑀥𑀘𑀓𑁆𑀓𑀁 𑀫𑀽𑀮𑀁 𑀲𑀁𑀔𑀺𑀢𑁆𑀢𑀁.

𑁩𑁨𑁫. 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀥𑀦𑀓𑁆𑀓𑀻𑀢𑀸 𑀘…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀥𑀚𑀸𑀳𑀝𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑀤𑀼𑀫𑀽𑀮𑀓𑀫𑁆𑀧𑀺 𑀢𑀺𑀫𑀽𑀮𑀓𑀫𑁆𑀧𑀺 𑀬𑀸𑀯 𑀦𑀯𑀫𑀽𑀮𑀓𑀁 𑀏𑀯𑀫𑁂𑀯 𑀓𑀸𑀢𑀩𑁆𑀩𑀁.

𑀇𑀤𑀁 𑀤𑀲𑀫𑀽𑀮𑀓𑀁

𑁩𑁨𑁬. 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘 𑀧𑀝𑀯𑀸𑀲𑀺𑀦𑀻 𑀘 𑀑𑀤𑀧𑀢𑁆𑀢𑀓𑀺𑀦𑀻 𑀘 𑀑𑀪𑀝𑀘𑀼𑀫𑁆𑀩𑀝𑀸 𑀘 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀫𑀸𑀢𑀼𑀘𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀧𑀺𑀢𑀼𑀭𑀓𑁆𑀔𑀺𑀢𑀸𑀬 𑀧𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺…𑀧𑁂… 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸𑀧𑀺𑀢𑀭𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺… 𑀪𑀸𑀢𑀼𑀭𑀓𑁆𑀔𑀺𑀢𑀸𑀬 𑀪𑀸𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺… 𑀪𑀕𑀺𑀦𑀺𑀭𑀓𑁆𑀔𑀺𑀢𑀸𑀬 𑀪𑀕𑀺𑀦𑀻 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺… 𑀜𑀸𑀢𑀺𑀭𑀓𑁆𑀔𑀺𑀢𑀸𑀬 𑀜𑀸𑀢𑀓𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺… 𑀕𑁄𑀢𑁆𑀢𑀭𑀓𑁆𑀔𑀺𑀢𑀸𑀬 𑀕𑁄𑀢𑁆𑀢𑀸 [𑀲𑀕𑁄𑀢𑁆𑀢𑀸 (?)] 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺… 𑀥𑀫𑁆𑀫𑀭𑀓𑁆𑀔𑀺𑀢𑀸𑀬 𑀲𑀳𑀥𑀫𑁆𑀫𑀺𑀓𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀦𑁆𑀢𑀺… 𑀲𑀸𑀭𑀓𑁆𑀔𑀸𑀬 𑀬𑁂𑀦 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀢𑀺 𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺… 𑀲𑀧𑀭𑀺𑀤𑀡𑁆𑀟𑀸𑀬 𑀬𑁂𑀦 𑀤𑀡𑁆𑀟𑁄 𑀞𑀧𑀺𑀢𑁄 𑀳𑁄𑀢𑀺 𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀲𑀧𑀭𑀺𑀤𑀡𑁆𑀟𑀸𑀬 𑀬𑁂𑀦 𑀤𑀡𑁆𑀟𑁄 𑀞𑀧𑀺𑀢𑁄 𑀳𑁄𑀢𑀺 𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻…𑀧𑁂… 𑀪𑁄𑀕𑀯𑀸𑀲𑀺𑀦𑀻… 𑀧𑀝𑀯𑀸𑀲𑀺𑀦𑀻… 𑀑𑀤𑀧𑀢𑁆𑀢𑀓𑀺𑀦𑀻… 𑀑𑀪𑀝𑀘𑀼𑀫𑁆𑀩𑀝𑀸… 𑀤𑀸𑀲𑀻 𑀘 𑀪𑀭𑀺𑀬𑀸 𑀘… 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘… 𑀥𑀚𑀸𑀳𑀝𑀸… 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀦𑀺𑀓𑁆𑀔𑁂𑀧𑀧𑀤𑀸𑀦𑀺.

𑁩𑁨𑁭. 𑀲𑀧𑀭𑀺𑀤𑀡𑁆𑀟𑀸𑀬 𑀬𑁂𑀦 𑀤𑀡𑁆𑀟𑁄 𑀞𑀧𑀺𑀢𑁄 𑀳𑁄𑀢𑀺 𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘…𑀧𑁂… 𑀥𑀦𑀓𑁆𑀓𑀻𑀢𑀸 𑀘 𑀪𑁄𑀕𑀯𑀸𑀲𑀺𑀦𑀻 𑀘… 𑀥𑀦𑀓𑁆𑀓𑀻𑀢𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀔𑀡𑁆𑀟𑀘𑀓𑁆𑀓𑀁.

𑁩𑁨𑁮. 𑀲𑀧𑀭𑀺𑀤𑀡𑁆𑀟𑀸𑀬 𑀬𑁂𑀦 𑀤𑀡𑁆𑀟𑁄 𑀞𑀧𑀺𑀢𑁄 𑀳𑁄𑀢𑀺 𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘…𑀧𑁂… 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘… 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀥𑀦𑀓𑁆𑀓𑀻𑀢𑀸 𑀘𑀸’’’ 𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀩𑀤𑁆𑀥𑀘𑀓𑁆𑀓𑀁 𑀫𑀽𑀮𑀁 𑀲𑀁𑀔𑀺𑀢𑁆𑀢𑀁.

𑁩𑁨𑁯. 𑀲𑀧𑀭𑀺𑀤𑀡𑁆𑀟𑀸𑀬 𑀬𑁂𑀦 𑀤𑀡𑁆𑀟𑁄, 𑀞𑀧𑀺𑀢𑁄 𑀳𑁄𑀢𑀺 𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀥𑀦𑀓𑁆𑀓𑀻𑀢𑀸 𑀘…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘…𑀧𑁂… 𑀫𑀼𑀳𑀼𑀢𑁆𑀢𑀺𑀓𑀸 𑀘 𑀥𑀚𑀸𑀳𑀝𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀏𑀓𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑀤𑀼𑀫𑀽𑀮𑀓𑀫𑁆𑀧𑀺 𑀢𑀺𑀫𑀽𑀮𑀓𑀫𑁆𑀧𑀺 𑀬𑀸𑀯 𑀦𑀯𑀫𑀽𑀮𑀓𑀁 𑀏𑀯𑀫𑁂𑀯 𑀓𑀸𑀢𑀩𑁆𑀩𑀁.

𑀇𑀤𑀁 𑀤𑀲𑀫𑀽𑀮𑀓𑀁

𑁩𑁩𑁦. 𑀲𑀧𑀭𑀺𑀤𑀡𑁆𑀟𑀸𑀬 𑀬𑁂𑀦 𑀤𑀡𑁆𑀟𑁄 𑀞𑀧𑀺𑀢𑁄 𑀳𑁄𑀢𑀺 𑀲𑁄 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀢𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘 𑀧𑀝𑀯𑀸𑀲𑀺𑀦𑀻 𑀘 𑀑𑀤𑀧𑀢𑁆𑀢𑀓𑀺𑀦𑀻 𑀘 𑀑𑀪𑀝𑀘𑀼𑀫𑁆𑀩𑀝𑀸 𑀘 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀤𑀡𑁆𑀟𑀞𑀧𑀺𑀢𑀘𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑀫𑀸𑀢𑀼𑀭𑀓𑁆𑀔𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀫𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀫𑀸𑀢𑀼𑀭𑀓𑁆𑀔𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀫𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻…𑀧𑁂… 𑀪𑁄𑀕𑀯𑀸𑀲𑀺𑀦𑀻… 𑀧𑀝𑀯𑀸𑀲𑀺𑀦𑀻… 𑀑𑀤𑀧𑀢𑁆𑀢𑀓𑀺𑀦𑀻… 𑀑𑀪𑀝𑀘𑀼𑀫𑁆𑀩𑀝𑀸… 𑀤𑀸𑀲𑀻 𑀘 𑀪𑀭𑀺𑀬𑀸 𑀘… 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘… 𑀥𑀚𑀸𑀳𑀝𑀸… 𑀫𑀼𑀳𑀼𑀢𑁆𑀢𑀺𑀓𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀦𑀺𑀓𑁆𑀔𑁂𑀧𑀧𑀤𑀸𑀦𑀺.

𑁩𑁩𑁧. 𑀫𑀸𑀢𑀼𑀭𑀓𑁆𑀔𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀫𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀙𑀦𑁆𑀤𑀯𑀸𑀲𑀺𑀦𑀻 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀫𑀸𑀢𑀼𑀭𑀓𑁆𑀔𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀫𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀥𑀦𑀓𑁆𑀓𑀻𑀢𑀸 𑀘 𑀪𑁄𑀕𑀯𑀸𑀲𑀺𑀦𑀻 𑀘…𑀧𑁂… 𑀥𑀦𑀓𑁆𑀓𑀻𑀢𑀸 𑀘 𑀧𑀝𑀯𑀸𑀲𑀺𑀦𑀻 𑀘…𑀧𑁂… 𑀥𑀦𑀓𑁆𑀓𑀻𑀢𑀸 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀔𑀡𑁆𑀟𑀘𑀓𑁆𑀓𑀁.

𑁩𑁩𑁨. 𑀫𑀸𑀢𑀼𑀭𑀓𑁆𑀔𑀺𑀢𑀸 𑀪𑀺𑀓𑁆𑀔𑀼𑀁 𑀧𑀳𑀺𑀡𑀢𑀺 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀩𑁆𑀭𑀽𑀳𑀺 𑁋 ‘𑀳𑁄𑀫𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀭𑀺𑀬𑀸 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀪𑁄𑀕𑀯𑀸𑀲𑀺𑀦𑀻 𑀘…𑀧𑁂… 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀫𑀼𑀳𑀼𑀢𑁆𑀢𑀺𑀓𑀸 𑀘… 𑀙𑀦𑁆𑀤𑀯𑀸𑀲𑀺𑀦𑀻 𑀘 𑀥𑀦𑀓𑁆𑀓𑀻𑀢𑀸 𑀘𑀸’’’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀯𑀻𑀫𑀁𑀲𑀢𑀺 𑀧𑀘𑁆𑀘𑀸𑀳𑀭𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀩𑀤𑁆𑀥𑀘𑀓𑁆𑀓𑀁 𑀫𑀽𑀮𑀁 𑀲𑀁𑀔𑀺𑀢𑁆𑀢𑀁.