𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀧𑀸𑀭𑀸𑀚𑀺𑀓𑀧𑀸𑀴𑀺

𑀯𑁂𑀭𑀜𑁆𑀚𑀓𑀡𑁆𑀟𑀁

𑁧. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀲𑁆𑀲𑁄𑀲𑀺 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀺 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀫𑀽𑀮𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸 [𑀪𑀕𑀯𑀸𑀢𑀺 (𑀲𑁆𑀬𑀸.), 𑀤𑀻. 𑀦𑀺. 𑁧.𑁧𑁫𑁭, 𑀅𑀩𑁆𑀪𑀼𑀕𑁆𑀕𑀢𑀸𑀓𑀸𑀭𑁂𑀦 𑀧𑀦 𑀲𑀫𑁂𑀢𑀺]. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁; 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺; 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’’𑀢𑀺.

𑁨. [𑀇𑀢𑁄 𑀧𑀭𑀁 𑀬𑀸𑀯 𑀧𑀸𑀭𑀸. 𑁧𑁫-𑁧𑁬 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺 𑀧𑀸𑀞𑁄 𑀅. 𑀦𑀺. 𑁮.𑁧𑁧] 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫 𑁋 ‘𑀦 𑀲𑀫𑀡𑁄 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑁂 𑀚𑀺𑀡𑁆𑀡𑁂 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑁂 𑀅𑀤𑁆𑀥𑀕𑀢𑁂 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀻’𑀢𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀢𑀣𑁂𑀯? 𑀦 𑀳𑀺 𑀪𑀯𑀁 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑁂 𑀚𑀺𑀡𑁆𑀡𑁂 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑁂 𑀅𑀤𑁆𑀥𑀕𑀢𑁂 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁂 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀺? 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀦 𑀲𑀫𑁆𑀧𑀦𑁆𑀦𑀫𑁂𑀯𑀸’’𑀢𑀺.

‘‘𑀦𑀸𑀳𑀁 𑀢𑀁, 𑀩𑁆𑀭𑀸𑀳𑁆𑀫𑀡, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑀫𑀳𑀁 𑀅𑀪𑀺𑀯𑀸𑀤𑁂𑀬𑁆𑀬𑀁 𑀯𑀸 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀁 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬𑀁. 𑀬𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀅𑀪𑀺𑀯𑀸𑀤𑁂𑀬𑁆𑀬 𑀯𑀸 𑀧𑀘𑁆𑀘𑀼𑀝𑁆𑀞𑁂𑀬𑁆𑀬 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀬𑁆𑀬, 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’’𑀢𑀺.

𑁩. ‘‘𑀅𑀭𑀲𑀭𑀽𑀧𑁄 𑀪𑀯𑀁 𑀕𑁄𑀢𑀫𑁄’’𑀢𑀺? ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀭𑀲𑀭𑀽𑀧𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀬𑁂 𑀢𑁂, 𑀩𑁆𑀭𑀸𑀳𑁆𑀫𑀡, 𑀭𑀽𑀧𑀭𑀲𑀸 𑀲𑀤𑁆𑀤𑀭𑀲𑀸 𑀕𑀦𑁆𑀥𑀭𑀲𑀸 𑀭𑀲𑀭𑀲𑀸 𑀨𑁄𑀝𑁆𑀞𑀩𑁆𑀩𑀭𑀲𑀸 𑀢𑁂 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 [𑀅𑀦𑀪𑀸𑀯𑀓𑀢𑀸 (𑀲𑀻.) 𑀅𑀦𑀪𑀸𑀯𑀁𑀕𑀢𑀸 (𑀲𑁆𑀬𑀸.)] 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀭𑀲𑀭𑀽𑀧𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

𑁪. ‘‘𑀦𑀺𑀩𑁆𑀪𑁄𑀕𑁄 𑀪𑀯𑀁 𑀕𑁄𑀢𑀫𑁄’’𑀢𑀺? ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀦𑀺𑀩𑁆𑀪𑁄𑀕𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀬𑁂 𑀢𑁂, 𑀩𑁆𑀭𑀸𑀳𑁆𑀫𑀡, 𑀭𑀽𑀧𑀪𑁄𑀕𑀸 𑀲𑀤𑁆𑀤𑀪𑁄𑀕𑀸 𑀕𑀦𑁆𑀥𑀪𑁄𑀕𑀸 𑀭𑀲𑀪𑁄𑀕𑀸 𑀨𑁄𑀝𑁆𑀞𑀩𑁆𑀩𑀪𑁄𑀕𑀸 𑀢𑁂 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀦𑀺𑀩𑁆𑀪𑁄𑀕𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

𑁫. ‘‘𑀅𑀓𑀺𑀭𑀺𑀬𑀯𑀸𑀤𑁄 𑀪𑀯𑀁 𑀕𑁄𑀢𑀫𑁄’’𑀢𑀺? ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀅𑀓𑀺𑀭𑀺𑀬𑀁 𑀯𑀤𑀸𑀫𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑁆𑀲 𑀫𑀦𑁄𑀤𑀼𑀘𑁆𑀘𑀭𑀺𑀢𑀲𑁆𑀲. 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀓𑀺𑀭𑀺𑀬𑀁 𑀯𑀤𑀸𑀫𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀓𑀺𑀭𑀺𑀬𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

𑁬. ‘‘𑀉𑀘𑁆𑀙𑁂𑀤𑀯𑀸𑀤𑁄 𑀪𑀯𑀁 𑀕𑁄𑀢𑀫𑁄’’𑀢𑀺? ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀉𑀘𑁆𑀙𑁂𑀤𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀉𑀘𑁆𑀙𑁂𑀤𑀁 𑀯𑀤𑀸𑀫𑀺 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲. 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀘𑁆𑀙𑁂𑀤𑀁 𑀯𑀤𑀸𑀫𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀉𑀘𑁆𑀙𑁂𑀤𑀯𑀸𑀤𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

𑁭. ‘‘𑀚𑁂𑀕𑀼𑀘𑁆𑀙𑀻 𑀪𑀯𑀁 𑀕𑁄𑀢𑀫𑁄’’𑀢𑀺? ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀚𑁂𑀕𑀼𑀘𑁆𑀙𑀻 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀚𑀺𑀕𑀼𑀘𑁆𑀙𑀸𑀫𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦. 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑀚𑀺𑀕𑀼𑀘𑁆𑀙𑀸𑀫𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀚𑁂𑀕𑀼𑀘𑁆𑀙𑀻 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

𑁮. ‘‘𑀯𑁂𑀦𑀬𑀺𑀓𑁄 𑀪𑀯𑀁 𑀕𑁄𑀢𑀫𑁄’’𑀢𑀺? ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀭𑀸𑀕𑀲𑁆𑀲 𑀤𑁄𑀲𑀲𑁆𑀲 𑀫𑁄𑀳𑀲𑁆𑀲. 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀦𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

𑁯. ‘‘𑀢𑀧𑀲𑁆𑀲𑀻 𑀪𑀯𑀁 𑀕𑁄𑀢𑀫𑁄’’𑀢𑀺? ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀢𑀧𑀲𑁆𑀲𑀻 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀢𑀧𑀦𑀻𑀬𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀯𑀤𑀸𑀫𑀺, 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀬𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀧𑀦𑀻𑀬𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸 𑀢𑀫𑀳𑀁 𑀢𑀧𑀲𑁆𑀲𑀻𑀢𑀺 𑀯𑀤𑀸𑀫𑀺. 𑀢𑀣𑀸𑀕𑀢𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀧𑀦𑀻𑀬𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀢𑀧𑀲𑁆𑀲𑀻 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀻’’𑀢𑀺.

𑁧𑁦. ‘‘𑀅𑀧𑀕𑀩𑁆𑀪𑁄 𑀪𑀯𑀁 𑀕𑁄𑀢𑀫𑁄’’𑀢𑀺? ‘‘𑀅𑀢𑁆𑀣𑀺 𑀔𑁆𑀯𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀧𑀕𑀩𑁆𑀪𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺. 𑀬𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸 𑀢𑀫𑀳𑀁 𑀅𑀧𑀕𑀩𑁆𑀪𑁄𑀢𑀺 𑀯𑀤𑀸𑀫𑀺. 𑀢𑀣𑀸𑀕𑀢𑀲𑁆𑀲 𑀔𑁄, 𑀩𑁆𑀭𑀸𑀳𑁆𑀫𑀡, 𑀆𑀬𑀢𑀺𑀁 𑀕𑀩𑁆𑀪𑀲𑁂𑀬𑁆𑀬𑀸 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀳𑀻𑀦𑀸 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄 𑀬𑁂𑀦 𑀫𑀁 𑀧𑀭𑀺𑀬𑀸𑀬𑁂𑀦 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀧𑀕𑀩𑁆𑀪𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺, 𑀦𑁄 𑀘 𑀔𑁄 𑀬𑀁 𑀢𑁆𑀯𑀁 𑀲𑀦𑁆𑀥𑀸𑀬 𑀯𑀤𑁂𑀲𑀺’’.

𑁧𑁧. ‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸. 𑀢𑀸𑀦𑀲𑁆𑀲𑀼 𑀓𑀼𑀓𑁆𑀓𑀼𑀝𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀺 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀺. 𑀬𑁄 𑀦𑀼 𑀔𑁄 𑀢𑁂𑀲𑀁 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀸𑀦𑀁 𑀧𑀞𑀫𑀢𑀭𑀁 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑁂𑀬𑁆𑀬, 𑀓𑀺𑀦𑁆𑀢𑀺 𑀲𑁆𑀯𑀸𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀚𑁂𑀝𑁆𑀞𑁄 𑀯𑀸 𑀓𑀦𑀺𑀝𑁆𑀞𑁄 𑀯𑀸’’𑀢𑀺? ‘‘𑀚𑁂𑀝𑁆𑀞𑁄𑀢𑀺𑀲𑁆𑀲, 𑀪𑁄 𑀕𑁄𑀢𑀫, 𑀯𑀘𑀦𑀻𑀬𑁄. 𑀲𑁄 𑀳𑀺 𑀦𑁂𑀲𑀁 𑀚𑁂𑀝𑁆𑀞𑁄 𑀳𑁄𑀢𑀻’’𑀢𑀺. ‘‘𑀏𑀯𑀫𑁂𑀯 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀅𑀯𑀺𑀚𑁆𑀚𑀸𑀕𑀢𑀸𑀬 𑀧𑀚𑀸𑀬 𑀅𑀡𑁆𑀟𑀪𑀽𑀢𑀸𑀬 𑀧𑀭𑀺𑀬𑁄𑀦𑀤𑁆𑀥𑀸𑀬 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀏𑀓𑁄𑀯 𑀮𑁄𑀓𑁂 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀲𑁆𑀯𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄 𑀮𑁄𑀓𑀲𑁆𑀲’’.

‘‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂, 𑀩𑁆𑀭𑀸𑀳𑁆𑀫𑀡, 𑀯𑀻𑀭𑀺𑀬𑀁 [𑀯𑀺𑀭𑀺𑀬𑀁 (𑀲𑀻. 𑀲𑁆𑀬𑀸.)] 𑀅𑀳𑁄𑀲𑀺 𑀅𑀲𑀮𑁆𑀮𑀻𑀦𑀁, 𑀉𑀧𑀝𑁆𑀞𑀺𑀢𑀸 𑀲𑀢𑀺 𑀅𑀲𑀫𑁆𑀫𑀼𑀝𑁆𑀞𑀸 [𑀅𑀧𑁆𑀧𑀫𑀼𑀝𑁆𑀞𑀸 (𑀲𑀻. 𑀲𑁆𑀬𑀸.)], 𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄, 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁. 𑀲𑁄 𑀔𑁄 𑀅𑀳𑀁, 𑀩𑁆𑀭𑀸𑀳𑁆𑀫𑀡, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺𑀁 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺𑀁, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁.

𑁧𑁨. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺, 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺, 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄; 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄; 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀬𑀸 𑀧𑀞𑀫𑁂 𑀬𑀸𑀫𑁂 𑀧𑀞𑀫𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑁋 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀧𑀞𑀫𑀸𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸.

𑁧𑁩. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 [𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑁆𑀲𑀓𑁂𑀦 (𑀓.)] 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂. 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸; 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀸𑀫𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂. 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀺. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀤𑀼𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑁋 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀤𑀼𑀢𑀺𑀬𑀸𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀺 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸.

𑁧𑁪. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺𑀁. 𑀲𑁄 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁; ‘𑀇𑀫𑁂 𑀆𑀲𑀯𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀢𑀲𑁆𑀲 𑀫𑁂 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀅𑀳𑁄𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺𑀁. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀢𑀢𑀺𑀬𑀸 𑀯𑀺𑀚𑁆𑀚𑀸 𑀅𑀥𑀺𑀕𑀢𑀸, 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸, 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄 𑁋 𑀬𑀣𑀸 𑀢𑀁 𑀅𑀧𑁆𑀧𑀫𑀢𑁆𑀢𑀲𑁆𑀲 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀲𑁆𑀲 𑀯𑀺𑀳𑀭𑀢𑁄. 𑀅𑀬𑀁 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀢𑀢𑀺𑀬𑀸𑀪𑀺𑀦𑀺𑀩𑁆𑀪𑀺𑀤𑀸 𑀅𑀳𑁄𑀲𑀺 𑁋 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸’’𑀢𑀺.

𑁧𑁫. 𑀏𑀯𑀁 𑀯𑀼𑀢𑁆𑀢𑁂, 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀚𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄, 𑀲𑁂𑀝𑁆𑀞𑁄 𑀪𑀯𑀁 𑀕𑁄𑀢𑀫𑁄! 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫!! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻𑀢𑀺, 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁. 𑀅𑀥𑀺𑀯𑀸𑀲𑁂𑀢𑀼 𑀘 𑀫𑁂 𑀪𑀯𑀁 𑀕𑁄𑀢𑀫𑁄 𑀯𑁂𑀭𑀜𑁆𑀚𑀸𑀬𑀁 𑀯𑀲𑁆𑀲𑀸𑀯𑀸𑀲𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁧𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀢𑀺 𑀤𑁆𑀯𑀻𑀳𑀺𑀢𑀺𑀓𑀸 𑀲𑁂𑀢𑀝𑁆𑀞𑀺𑀓𑀸 𑀲𑀮𑀸𑀓𑀸𑀯𑀼𑀢𑁆𑀢𑀸 𑀦 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀢𑁆𑀢𑀭𑀸𑀧𑀣𑀓𑀸 [𑀉𑀢𑁆𑀢𑀭𑀸𑀳𑀓𑀸 (𑀲𑀻.)] 𑀅𑀲𑁆𑀲𑀯𑀸𑀡𑀺𑀚𑀸 [𑀅𑀲𑁆𑀲𑀯𑀡𑀺𑀚𑀸 (𑀓.)] 𑀧𑀜𑁆𑀘𑀫𑀢𑁆𑀢𑁂𑀳𑀺 𑀅𑀲𑁆𑀲𑀲𑀢𑁂𑀳𑀺 𑀯𑁂𑀭𑀜𑁆𑀚𑀁 𑀯𑀲𑁆𑀲𑀸𑀯𑀸𑀲𑀁 𑀉𑀧𑀕𑀢𑀸 𑀳𑁄𑀦𑁆𑀢𑀺. 𑀢𑁂𑀳𑀺 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀲𑀼 𑀪𑀺𑀓𑁆𑀔𑀽𑀦𑀁 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 [𑀧𑀢𑁆𑀣𑀧𑀢𑁆𑀣𑀫𑀽𑀮𑀓𑀁 (𑀓.)] 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀽 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀭𑀜𑁆𑀚𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀧𑀺𑀡𑁆𑀟𑀁 𑀅𑀮𑀪𑀫𑀸𑀦𑀸 𑀅𑀲𑁆𑀲𑀫𑀡𑁆𑀟𑀮𑀺𑀓𑀸𑀲𑀼 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀢𑁆𑀣𑀧𑀢𑁆𑀣𑀧𑀼𑀮𑀓𑀁 𑀆𑀭𑀸𑀫𑀁 𑀆𑀳𑀭𑀺𑀢𑁆𑀯𑀸 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀆𑀬𑀲𑁆𑀫𑀸 𑀧𑀦𑀸𑀦𑀦𑁆𑀤𑁄 𑀧𑀢𑁆𑀣𑀧𑀼𑀮𑀓𑀁 𑀲𑀺𑀮𑀸𑀬𑀁 𑀧𑀺𑀲𑀺𑀢𑁆𑀯𑀸 𑀪𑀕𑀯𑀢𑁄 𑀉𑀧𑀦𑀸𑀫𑁂𑀢𑀺. 𑀢𑀁 𑀪𑀕𑀯𑀸 𑀧𑀭𑀺𑀪𑀼𑀜𑁆𑀚𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀉𑀤𑀼𑀓𑁆𑀔𑀮𑀲𑀤𑁆𑀤𑀁. 𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸𑀧𑀺 𑀦 𑀧𑀼𑀘𑁆𑀙𑀦𑁆𑀢𑀺; 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀦 𑀧𑀼𑀘𑁆𑀙𑀦𑁆𑀢𑀺; 𑀅𑀢𑁆𑀣𑀲𑀁𑀳𑀺𑀢𑀁 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀁. 𑀅𑀦𑀢𑁆𑀣𑀲𑀁𑀳𑀺𑀢𑁂 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀸𑀦𑀁. 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀦𑁆𑀢𑀺 𑁋 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀸𑀫, 𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀸𑀢𑀺 [𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀸𑀢𑀺 (𑀲𑀻. 𑀲𑁆𑀬𑀸.)]. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀲𑁄, 𑀆𑀦𑀦𑁆𑀤, 𑀉𑀤𑀼𑀓𑁆𑀔𑀮𑀲𑀤𑁆𑀤𑁄’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀲𑀸𑀥𑀼 𑀲𑀸𑀥𑀼, 𑀆𑀦𑀦𑁆𑀤! 𑀢𑀼𑀫𑁆𑀳𑁂𑀳𑀺, 𑀆𑀦𑀦𑁆𑀤 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀺𑀚𑀺𑀢𑀁. 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀲𑀸𑀮𑀺𑀫𑀁𑀲𑁄𑀤𑀦𑀁 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀻’’𑀢𑀺.

𑁧𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 [𑀫𑀳𑀸𑀫𑁄𑀕𑁆𑀕𑀮𑀸𑀦𑁄 (𑀓.)] 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀭𑀳𑀺, 𑀪𑀦𑁆𑀢𑁂, 𑀯𑁂𑀭𑀜𑁆𑀚𑀸 𑀤𑀼𑀩𑁆𑀪𑀺𑀓𑁆𑀔𑀸 𑀤𑁆𑀯𑀻𑀳𑀺𑀢𑀺𑀓𑀸 𑀲𑁂𑀢𑀝𑁆𑀞𑀺𑀓𑀸 𑀲𑀮𑀸𑀓𑀸𑀯𑀼𑀢𑁆𑀢𑀸. 𑀦 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀇𑀫𑀺𑀲𑁆𑀲𑀸, 𑀪𑀦𑁆𑀢𑁂, 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑀁 𑀲𑀫𑁆𑀧𑀦𑁆𑀦𑀁 𑁋 𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑀻𑀮𑀓𑀁 𑀏𑀯𑀫𑀲𑁆𑀲𑀸𑀤𑀁. 𑀲𑀸𑀥𑀸𑀳𑀁, 𑀪𑀦𑁆𑀢𑁂, 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀬𑁆𑀬𑀁. 𑀪𑀺𑀓𑁆𑀔𑀽 𑀧𑀧𑁆𑀧𑀝𑀓𑁄𑀚𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺. ‘‘𑀬𑁂 𑀧𑀦 𑀢𑁂, 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀓𑀣𑀁 𑀓𑀭𑀺𑀲𑁆𑀲𑀲𑀻’’𑀢𑀺? ‘‘𑀏𑀓𑀸𑀳𑀁, 𑀪𑀦𑁆𑀢𑁂, 𑀧𑀸𑀡𑀺𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀲𑁆𑀲𑀸𑀫𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀧𑀣𑀯𑀻. 𑀬𑁂 𑀧𑀣𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀢𑁂 𑀢𑀢𑁆𑀣 𑀲𑀗𑁆𑀓𑀸𑀫𑁂𑀲𑁆𑀲𑀸𑀫𑀺. 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺. ‘‘𑀅𑀮𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀫𑀸 𑀢𑁂 𑀭𑀼𑀘𑁆𑀘𑀺 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑀼𑀁. 𑀯𑀺𑀧𑀮𑁆𑀮𑀸𑀲𑀫𑁆𑀧𑀺 𑀲𑀢𑁆𑀢𑀸 𑀧𑀝𑀺𑀮𑀪𑁂𑀬𑁆𑀬𑀼’’𑀦𑁆𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂, 𑀲𑀩𑁆𑀩𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀢𑁆𑀢𑀭𑀓𑀼𑀭𑀼𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑁂𑀬𑁆𑀬𑀸’’𑀢𑀺. ‘‘𑀅𑀮𑀁, 𑀫𑁄𑀕𑁆𑀕𑀮𑁆𑀮𑀸𑀦, 𑀫𑀸 𑀢𑁂 𑀭𑀼𑀘𑁆𑀘𑀺 𑀲𑀩𑁆𑀩𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀢𑁆𑀢𑀭𑀓𑀼𑀭𑀼𑀁 𑀧𑀺𑀡𑁆𑀟𑀸𑀬 𑀕𑀫𑀦’’𑀦𑁆𑀢𑀺.

𑁧𑁮. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀓𑀢𑀫𑁂𑀲𑀸𑀦𑀁 𑀔𑁄 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺; 𑀓𑀢𑀫𑁂𑀲𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀬𑀦𑁆𑀳𑀲𑀫𑀬𑀁 [𑀲𑀸𑀬𑀡𑁆𑀳𑀲𑀫𑀬𑀁 (𑀲𑀻.)] 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀓𑀢𑀫𑁂𑀲𑀸𑀦𑀁 𑀔𑁄 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺, 𑀓𑀢𑀫𑁂𑀲𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’𑀢𑀺. ‘𑀓𑀢𑀫𑁂𑀲𑀸𑀦𑀁 𑀦𑀼 𑀔𑁄, 𑀪𑀦𑁆𑀢𑁂, 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺, 𑀓𑀢𑀫𑁂𑀲𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’’𑀢𑀺?

‘‘𑀪𑀕𑀯𑀢𑁄 𑀘, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀘 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀘 𑀯𑁂𑀲𑁆𑀲𑀪𑀼𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀺. 𑀪𑀕𑀯𑀢𑁄 𑀘, 𑀲𑀸𑀭𑀺𑀧𑀼𑀢𑁆𑀢, 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀘 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀘 𑀓𑀲𑁆𑀲𑀧𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺.

𑁧𑁯. ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀪𑀕𑀯𑀢𑁄 𑀘 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀘 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀘 𑀯𑁂𑀲𑁆𑀲𑀪𑀼𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺? ‘‘𑀪𑀕𑀯𑀸 𑀘, 𑀲𑀸𑀭𑀺𑀧𑀼𑀢𑁆𑀢, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀘 𑀲𑀺𑀔𑀻 𑀪𑀕𑀯𑀸 𑀘 𑀯𑁂𑀲𑁆𑀲𑀪𑀽 𑀓𑀺𑀮𑀸𑀲𑀼𑀦𑁄 𑀅𑀳𑁂𑀲𑀼𑀁 𑀲𑀸𑀯𑀓𑀸𑀦𑀁 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀅𑀧𑁆𑀧𑀓𑀜𑁆𑀘 𑀦𑁂𑀲𑀁 𑀅𑀳𑁄𑀲𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁. 𑀅𑀧𑀜𑁆𑀜𑀢𑁆𑀢𑀁 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁. 𑀅𑀦𑀼𑀤𑁆𑀤𑀺𑀝𑁆𑀞𑀁 𑀧𑀸𑀢𑀺𑀫𑁄𑀓𑁆𑀔𑀁. 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀬𑁂 𑀢𑁂 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸 𑀦𑀸𑀦𑀸𑀦𑀸𑀫𑀸 𑀦𑀸𑀦𑀸𑀕𑁄𑀢𑁆𑀢𑀸 𑀦𑀸𑀦𑀸𑀚𑀘𑁆𑀘𑀸 𑀦𑀸𑀦𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀢𑁂 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀔𑀺𑀧𑁆𑀧𑀜𑁆𑀜𑁂𑀯 𑀅𑀦𑁆𑀢𑀭𑀥𑀸𑀧𑁂𑀲𑀼𑀁. 𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀨𑀮𑀓𑁂 𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀲𑀼𑀢𑁆𑀢𑁂𑀦 𑀅𑀲𑀗𑁆𑀕𑀳𑀺𑀢𑀸𑀦𑀺 𑀢𑀸𑀦𑀺 𑀯𑀸𑀢𑁄 𑀯𑀺𑀓𑀺𑀭𑀢𑀺 𑀯𑀺𑀥𑀫𑀢𑀺 𑀯𑀺𑀤𑁆𑀥𑀁𑀲𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀣𑀸 𑀢𑀁 𑀲𑀼𑀢𑁆𑀢𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸. 𑀏𑀯𑀫𑁂𑀯 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀬𑁂 𑀢𑁂 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸 𑀦𑀸𑀦𑀸𑀦𑀸𑀫𑀸 𑀦𑀸𑀦𑀸𑀕𑁄𑀢𑁆𑀢𑀸 𑀦𑀸𑀦𑀸𑀚𑀘𑁆𑀘𑀸 𑀦𑀸𑀦𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀢𑁂 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀔𑀺𑀧𑁆𑀧𑀜𑁆𑀜𑁂𑀯 𑀅𑀦𑁆𑀢𑀭𑀥𑀸𑀧𑁂𑀲𑀼𑀁.

‘‘𑀅𑀓𑀺𑀮𑀸𑀲𑀼𑀦𑁄 𑀘 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀲𑀸𑀯𑀓𑁂 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀑𑀯𑀤𑀺𑀢𑀼𑀁. 𑀪𑀽𑀢𑀧𑀼𑀩𑁆𑀩𑀁, 𑀲𑀸𑀭𑀺𑀧𑀼𑀢𑁆𑀢, 𑀯𑁂𑀲𑁆𑀲𑀪𑀽 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀪𑀺𑀁𑀲𑀦𑀓𑁂 [𑀪𑀻𑀲𑀦𑀓𑁂 (𑀓.)] 𑀯𑀦𑀲𑀡𑁆𑀟𑁂 𑀲𑀳𑀲𑁆𑀲𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀑𑀯𑀤𑀢𑀺 𑀅𑀦𑀼𑀲𑀸𑀲𑀢𑀺 𑁋 ‘𑀏𑀯𑀁 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣; 𑀏𑀯𑀁 𑀫𑀦𑀲𑀺𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀸𑀓𑀢𑁆𑀣 [𑀫𑀦𑀲𑀸𑀓𑀭𑀺𑀢𑁆𑀣 (𑀓.)]; 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’𑀢𑀺. 𑀅𑀣 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀢𑀲𑁆𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲 𑀯𑁂𑀲𑁆𑀲𑀪𑀼𑀦𑀸 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸𑀦𑀁 𑀏𑀯𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼. 𑀢𑀢𑁆𑀭 𑀲𑀼𑀤𑀁, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀁𑀲𑀦𑀓𑀲𑁆𑀲 𑀯𑀦𑀲𑀡𑁆𑀟𑀲𑁆𑀲 𑀪𑀺𑀁𑀲𑀦𑀓𑀢𑀲𑁆𑀫𑀺𑀁 𑀳𑁄𑀢𑀺 𑁋 𑀬𑁄 𑀓𑁄𑀘𑀺 𑀅𑀯𑀻𑀢𑀭𑀸𑀕𑁄 𑀢𑀁 𑀯𑀦𑀲𑀡𑁆𑀟𑀁 𑀧𑀯𑀺𑀲𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀮𑁄𑀫𑀸𑀦𑀺 𑀳𑀁𑀲𑀦𑁆𑀢𑀺. 𑀅𑀬𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀪𑀕𑀯𑀢𑁄 𑀘 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀘 𑀲𑀺𑀔𑀺𑀲𑁆𑀲 𑀪𑀕𑀯𑀢𑁄 𑀘 𑀯𑁂𑀲𑁆𑀲𑀪𑀼𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺.

𑁨𑁦. ‘‘𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀪𑀕𑀯𑀢𑁄 𑀘 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀘 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀘 𑀓𑀲𑁆𑀲𑀧𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺? ‘‘𑀪𑀕𑀯𑀸 𑀘, 𑀲𑀸𑀭𑀺𑀧𑀼𑀢𑁆𑀢, 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀘 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸 𑀘 𑀓𑀲𑁆𑀲𑀧𑁄 𑀅𑀓𑀺𑀮𑀸𑀲𑀼𑀦𑁄 𑀅𑀳𑁂𑀲𑀼𑀁 𑀲𑀸𑀯𑀓𑀸𑀦𑀁 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁. 𑀩𑀳𑀼𑀜𑁆𑀘 𑀦𑁂𑀲𑀁 𑀅𑀳𑁄𑀲𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮𑀁, 𑀧𑀜𑁆𑀜𑀢𑁆𑀢𑀁 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁, 𑀉𑀤𑁆𑀤𑀺𑀝𑁆𑀞𑀁 𑀧𑀸𑀢𑀺𑀫𑁄𑀓𑁆𑀔𑀁. 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀬𑁂 𑀢𑁂 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸 𑀦𑀸𑀦𑀸𑀦𑀸𑀫𑀸 𑀦𑀸𑀦𑀸𑀕𑁄𑀢𑁆𑀢𑀸 𑀦𑀸𑀦𑀸𑀚𑀘𑁆𑀘𑀸 𑀦𑀸𑀦𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀢𑁂 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀞𑀧𑁂𑀲𑀼𑀁. 𑀲𑁂𑀬𑁆𑀬𑀣𑀸𑀧𑀺, 𑀲𑀸𑀭𑀺𑀧𑀼𑀢𑁆𑀢, 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀨𑀮𑀓𑁂 𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀲𑀼𑀢𑁆𑀢𑁂𑀦 𑀲𑀼𑀲𑀗𑁆𑀕𑀳𑀺𑀢𑀸𑀦𑀺 𑀢𑀸𑀦𑀺 𑀯𑀸𑀢𑁄 𑀦 𑀯𑀺𑀓𑀺𑀭𑀢𑀺 𑀦 𑀯𑀺𑀥𑀫𑀢𑀺 𑀦 𑀯𑀺𑀤𑁆𑀥𑀁𑀲𑁂𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀣𑀸 𑀢𑀁 𑀲𑀼𑀢𑁆𑀢𑁂𑀦 𑀲𑀼𑀲𑀗𑁆𑀕𑀳𑀺𑀢𑀢𑁆𑀢𑀸. 𑀏𑀯𑀫𑁂𑀯 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀅𑀦𑁆𑀢𑀭𑀥𑀸𑀦𑁂𑀦 𑀬𑁂 𑀢𑁂 𑀧𑀘𑁆𑀙𑀺𑀫𑀸 𑀲𑀸𑀯𑀓𑀸 𑀦𑀸𑀦𑀸𑀦𑀸𑀫𑀸 𑀦𑀸𑀦𑀸𑀕𑁄𑀢𑁆𑀢𑀸 𑀦𑀸𑀦𑀸𑀚𑀘𑁆𑀘𑀸 𑀦𑀸𑀦𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀢𑁂 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀞𑀧𑁂𑀲𑀼𑀁. 𑀅𑀬𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀪𑀕𑀯𑀢𑁄 𑀘 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀘 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀘 𑀓𑀲𑁆𑀲𑀧𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺.

𑁨𑁧. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄! 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄! 𑀬𑀁 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬 [𑀧𑀜𑁆𑀜𑀸𑀧𑁂𑀬𑁆𑀬 (𑀲𑀻. 𑀲𑁆𑀬𑀸.)], 𑀉𑀤𑁆𑀤𑀺𑀲𑁂𑀬𑁆𑀬 𑀧𑀸𑀢𑀺𑀫𑁄𑀓𑁆𑀔𑀁, 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓’’𑀦𑁆𑀢𑀺. ‘‘𑀆𑀕𑀫𑁂𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢! 𑀆𑀕𑀫𑁂𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢! 𑀢𑀣𑀸𑀕𑀢𑁄𑀯 𑀢𑀢𑁆𑀣 𑀓𑀸𑀮𑀁 𑀚𑀸𑀦𑀺𑀲𑁆𑀲𑀢𑀺. 𑀦 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 𑀉𑀤𑁆𑀤𑀺𑀲𑀢𑀺 [𑀦 𑀉𑀤𑁆𑀤𑀺𑀲𑀢𑀺 (𑀲𑀻.)] 𑀧𑀸𑀢𑀺𑀫𑁄𑀓𑁆𑀔𑀁 𑀬𑀸𑀯 𑀦 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺. 𑀬𑀢𑁄 𑀘 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 𑀉𑀤𑁆𑀤𑀺𑀲𑁆𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀢𑁂𑀲𑀁𑀬𑁂𑀯 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀦 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺 𑀬𑀸𑀯 𑀦 𑀲𑀗𑁆𑀖𑁄 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀗𑁆𑀖𑁄 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺 𑀅𑀣 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀅𑀣, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 𑀉𑀤𑁆𑀤𑀺𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀢𑁂𑀲𑀁𑀬𑁂𑀯 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀦 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀬𑀸𑀯 𑀦 𑀲𑀗𑁆𑀖𑁄 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀗𑁆𑀖𑁄 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀅𑀣 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 𑀉𑀤𑁆𑀤𑀺𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀢𑁂𑀲𑀁𑀬𑁂𑀯 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀦 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀬𑀸𑀯 𑀦 𑀲𑀗𑁆𑀖𑁄 𑀮𑀸𑀪𑀕𑁆𑀕𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀗𑁆𑀖𑁄 𑀮𑀸𑀪𑀕𑁆𑀕𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀅𑀣 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 𑀉𑀤𑁆𑀤𑀺𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀢𑁂𑀲𑀁𑀬𑁂𑀯 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀦 𑀢𑀸𑀯, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀬𑀸𑀯 𑀦 𑀲𑀗𑁆𑀖𑁄 𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺. 𑀬𑀢𑁄 𑀘 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀗𑁆𑀖𑁄 𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀅𑀣 𑀇𑀥𑁂𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 𑀉𑀤𑁆𑀤𑀺𑀲𑀢𑀺 𑀧𑀸𑀢𑀺𑀫𑁄𑀓𑁆𑀔𑀁 𑀢𑁂𑀲𑀁𑀬𑁂𑀯 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀖𑀸𑀢𑀸𑀬. 𑀦𑀺𑀭𑀩𑁆𑀩𑀼𑀤𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀭𑀸𑀤𑀻𑀦𑀯𑁄 𑀅𑀧𑀕𑀢𑀓𑀸𑀴𑀓𑁄 𑀲𑀼𑀤𑁆𑀥𑁄 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑁄. 𑀇𑀫𑁂𑀲𑀜𑁆𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀬𑁄 𑀧𑀘𑁆𑀙𑀺𑀫𑀓𑁄 𑀪𑀺𑀓𑁆𑀔𑀼 𑀲𑁄 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺.

𑁨𑁨. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀸𑀦𑀁 𑀬𑁂𑀳𑀺 𑀦𑀺𑀫𑀦𑁆𑀢𑀺𑀢𑀸 𑀯𑀲𑁆𑀲𑀁 𑀯𑀲𑀦𑁆𑀢𑀺, 𑀦 𑀢𑁂 𑀅𑀦𑀧𑀮𑁄𑀓𑁂𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀺. 𑀆𑀬𑀸𑀫𑀸𑀦𑀦𑁆𑀤, 𑀯𑁂𑀭𑀜𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀅𑀧𑀮𑁄𑀓𑁂𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀬𑁂𑀦 𑀯𑁂𑀭𑀜𑁆𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀯𑁂𑀭𑀜𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀦𑀺𑀫𑀦𑁆𑀢𑀺𑀢𑀫𑁆𑀳 𑀢𑀬𑀸, 𑀩𑁆𑀭𑀸𑀳𑁆𑀫𑀡, 𑀯𑀲𑁆𑀲𑀁𑀯𑀼𑀝𑁆𑀞𑀸 [𑀯𑀲𑁆𑀲𑀁𑀯𑀼𑀢𑁆𑀣𑀸 (𑀲𑀻. 𑀲𑁆𑀬𑀸. 𑀓.)], 𑀅𑀧𑀮𑁄𑀓𑁂𑀫 𑀢𑀁, 𑀇𑀘𑁆𑀙𑀸𑀫 𑀫𑀬𑀁 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼’’𑀦𑁆𑀢𑀺. ‘‘𑀲𑀘𑁆𑀘𑀁, 𑀪𑁄 𑀕𑁄𑀢𑀫, 𑀦𑀺𑀫𑀦𑁆𑀢𑀺𑀢𑀢𑁆𑀣 𑀫𑀬𑀸 𑀯𑀲𑁆𑀲𑀁𑀯𑀼𑀝𑁆𑀞𑀸; 𑀅𑀧𑀺 𑀘, 𑀬𑁄 𑀤𑁂𑀬𑁆𑀬𑀥𑀫𑁆𑀫𑁄 𑀲𑁄 𑀦 𑀤𑀺𑀦𑁆𑀦𑁄. 𑀢𑀜𑁆𑀘 𑀔𑁄 𑀦𑁄 𑀅𑀲𑀦𑁆𑀢𑀁, 𑀦𑁄𑀧𑀺 𑀅𑀤𑀸𑀢𑀼𑀓𑀫𑁆𑀬𑀢𑀸, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸 𑀩𑀳𑀼𑀓𑀺𑀘𑁆𑀘𑀸 𑀖𑀭𑀸𑀯𑀸𑀲𑀸 𑀩𑀳𑀼𑀓𑀭𑀡𑀻𑀬𑀸. 𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑁨𑁩. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀯𑁂𑀭𑀜𑁆𑀚𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀣 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀲𑀫𑁆𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 [𑀑𑀡𑀻𑀢𑀧𑀢𑁆𑀢𑀧𑀸𑀡𑀺𑀁 (𑀓.)] 𑀢𑀺𑀘𑀻𑀯𑀭𑁂𑀦 𑀅𑀘𑁆𑀙𑀸𑀤𑁂𑀲𑀺, 𑀏𑀓𑀫𑁂𑀓𑀜𑁆𑀘 𑀪𑀺𑀓𑁆𑀔𑀼𑀁 𑀏𑀓𑀫𑁂𑀓𑁂𑀦 𑀤𑀼𑀲𑁆𑀲𑀬𑀼𑀕𑁂𑀦 𑀅𑀘𑁆𑀙𑀸𑀤𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀁 𑀩𑁆𑀭𑀸𑀳𑁆𑀫𑀡𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀅𑀦𑀼𑀧𑀕𑀫𑁆𑀫 𑀲𑁄𑀭𑁂𑀬𑁆𑀬𑀁 𑀲𑀗𑁆𑀓𑀲𑁆𑀲𑀁 𑀓𑀡𑁆𑀡𑀓𑀼𑀚𑁆𑀚𑀁 𑀬𑁂𑀦 𑀧𑀬𑀸𑀕𑀧𑀢𑀺𑀝𑁆𑀞𑀸𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀬𑀸𑀕𑀧𑀢𑀺𑀝𑁆𑀞𑀸𑀦𑁂 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑀤𑀯𑀲𑀭𑀺. 𑀅𑀣 𑀔𑁄 𑀪𑀕𑀯𑀸 𑀩𑀸𑀭𑀸𑀡𑀲𑀺𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺.

𑀯𑁂𑀭𑀜𑁆𑀚𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑀁

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀁

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑁄

𑁨𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀅𑀢𑁆𑀣𑀺 [𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀺 (𑀲𑀻.), 𑀓𑀮𑀦𑁆𑀤𑀕𑀸𑀫𑁄 𑀳𑁄𑀢𑀺 (𑀲𑁆𑀬𑀸.)]. 𑀢𑀢𑁆𑀣 𑀲𑀼𑀤𑀺𑀦𑁆𑀦𑁄 𑀦𑀸𑀫 𑀓𑀮𑀦𑁆𑀤𑀧𑀼𑀢𑁆𑀢𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀳𑁄𑀢𑀺. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀲𑀫𑁆𑀩𑀳𑀼𑀮𑁂𑀳𑀺 [𑀲𑀫𑁆𑀧𑀳𑀽𑀮𑁂𑀳𑀺 (𑀲𑀻.)] 𑀲𑀳𑀸𑀬𑀓𑁂𑀳𑀺 𑀲𑀤𑁆𑀥𑀺𑀁 𑀯𑁂𑀲𑀸𑀮𑀺𑀁 𑀅𑀕𑀫𑀸𑀲𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀫𑁆𑀧𑀺 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀬𑁂𑀦 𑀲𑀸 𑀧𑀭𑀺𑀲𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀣𑀸 𑀬𑀣𑀸 𑀔𑁄 𑀅𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁; 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑀸 𑀧𑀭𑀺𑀲𑀸 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁨𑁫. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀅𑀘𑀺𑀭𑀯𑀼𑀝𑁆𑀞𑀺𑀢𑀸𑀬 𑀧𑀭𑀺𑀲𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀬𑀣𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁; 𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀧𑀩𑁆𑀩𑀸𑀚𑁂𑀢𑀼 𑀫𑀁 𑀪𑀕𑀯𑀸’’𑀢𑀺. ‘‘𑀅𑀦𑀼𑀜𑁆𑀜𑀸𑀢𑁄𑀲𑀺 𑀧𑀦 𑀢𑁆𑀯𑀁, 𑀲𑀼𑀤𑁆𑀤𑀺𑀦𑁆𑀦, 𑀫𑀸𑀢𑀸𑀧𑀺𑀢𑀽𑀳𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺? ‘‘𑀦 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀦𑀼𑀜𑁆𑀜𑀸𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. ‘‘𑀦 𑀔𑁄, 𑀲𑀼𑀤𑀺𑀦𑁆𑀦, 𑀢𑀣𑀸𑀕𑀢𑀸 𑀅𑀦𑀦𑀼𑀜𑁆𑀜𑀸𑀢𑀁 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀢𑁆𑀢𑀁 𑀧𑀩𑁆𑀩𑀸𑀚𑁂𑀦𑁆𑀢𑀻’’𑀢𑀺. ‘‘𑀲𑁄𑀳𑀁, 𑀪𑀦𑁆𑀢𑁂, 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀫𑀁 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺.

𑁨𑁬. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀬𑁂𑀦 𑀓𑀮𑀦𑁆𑀤𑀕𑀸𑀫𑁄 𑀬𑁂𑀦 𑀫𑀸𑀢𑀸𑀧𑀺𑀢𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀏𑀢𑀤𑀯𑁄𑀘 𑁋 ‘‘𑀅𑀫𑁆𑀫𑀢𑀸𑀢𑀸, 𑀬𑀣𑀸 𑀬𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁; 𑀇𑀘𑁆𑀙𑀸𑀫𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀅𑀦𑀼𑀚𑀸𑀦𑀸𑀣 𑀫𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁆𑀯𑀁 𑀔𑁄𑀲𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄 𑀲𑀼𑀔𑁂𑀥𑀺𑀢𑁄 𑀲𑀼𑀔𑀧𑀭𑀺𑀳𑀢𑁄. 𑀦 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲 𑀚𑀸𑀦𑀸𑀲𑀺. 𑀫𑀭𑀡𑁂𑀦𑀧𑀺 𑀫𑀬𑀁 𑀢𑁂 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫, 𑀓𑀺𑀁 𑀧𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀫𑀸𑀢𑀸𑀧𑀺𑀢𑀭𑁄 𑀏𑀢𑀤𑀯𑁄𑀘 𑁋 ‘‘𑀅𑀫𑁆𑀫𑀢𑀸𑀢𑀸, 𑀬𑀣𑀸 𑀬𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁; 𑀇𑀘𑁆𑀙𑀸𑀫𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀅𑀦𑀼𑀚𑀸𑀦𑀸𑀣 𑀫𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁆𑀯𑀁 𑀔𑁄𑀲𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄 𑀲𑀼𑀔𑁂𑀥𑀺𑀢𑁄 𑀲𑀼𑀔𑀧𑀭𑀺𑀳𑀢𑁄. 𑀦 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲 𑀚𑀸𑀦𑀸𑀲𑀺. 𑀫𑀭𑀡𑁂𑀦𑀧𑀺 𑀫𑀬𑀁 𑀢𑁂 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫, 𑀓𑀺𑀁 𑀧𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺! 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀫𑀸𑀢𑀸𑀧𑀺𑀢𑀭𑁄 𑀏𑀢𑀤𑀯𑁄𑀘 𑁋 ‘‘𑀅𑀫𑁆𑀫𑀢𑀸𑀢𑀸, 𑀬𑀣𑀸 𑀬𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁; 𑀇𑀘𑁆𑀙𑀸𑀫𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀅𑀦𑀼𑀚𑀸𑀦𑀸𑀣 𑀫𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁆𑀯𑀁 𑀔𑁄𑀲𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄 𑀲𑀼𑀔𑁂𑀥𑀺𑀢𑁄 𑀲𑀼𑀔𑀧𑀭𑀺𑀳𑀢𑁄. 𑀦 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲 𑀚𑀸𑀦𑀸𑀲𑀺. 𑀫𑀭𑀡𑁂𑀦𑀧𑀺 𑀫𑀬𑀁 𑀢𑁂 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫, 𑀓𑀺𑀁 𑀧𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺!

𑁨𑁭. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑁋 ‘‘𑀦 𑀫𑀁 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀦𑁆𑀢𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺, 𑀢𑀢𑁆𑀣𑁂𑀯 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀦𑀺𑀧𑀚𑁆𑀚𑀺 𑁋 𑀇𑀥𑁂𑀯 𑀫𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺 𑀧𑀩𑁆𑀩𑀚𑁆𑀚𑀸 𑀯𑀸𑀢𑀺. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀏𑀓𑀫𑁆𑀧𑀺 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀺, 𑀤𑁆𑀯𑁂𑀧𑀺 𑀪𑀢𑁆𑀢𑀸𑀦𑀺 𑀦 𑀪𑀼𑀜𑁆𑀚𑀺, 𑀢𑀻𑀡𑀺𑀧𑀺 𑀪𑀢𑁆𑀢𑀸𑀦𑀺 𑀦 𑀪𑀼𑀜𑁆𑀚𑀺, 𑀘𑀢𑁆𑀢𑀸𑀭𑀺𑀧𑀺 𑀪𑀢𑁆𑀢𑀸𑀦𑀺 𑀦 𑀪𑀼𑀜𑁆𑀚𑀺, 𑀧𑀜𑁆𑀘𑀧𑀺 𑀪𑀢𑁆𑀢𑀸𑀦𑀺 𑀦 𑀪𑀼𑀜𑁆𑀚𑀺, 𑀙𑀧𑀺 𑀪𑀢𑁆𑀢𑀸𑀦𑀺 𑀦 𑀪𑀼𑀜𑁆𑀚𑀺, 𑀲𑀢𑁆𑀢𑀧𑀺 𑀪𑀢𑁆𑀢𑀸𑀦𑀺 𑀦 𑀪𑀼𑀜𑁆𑀚𑀺.

𑁨𑁮. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁆𑀯𑀁 𑀔𑁄𑀲𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄 𑀲𑀼𑀔𑁂𑀥𑀺𑀢𑁄 𑀲𑀼𑀔𑀧𑀭𑀺𑀳𑀢𑁄. 𑀦 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲 𑀚𑀸𑀦𑀸𑀲𑀺. 𑀫𑀭𑀡𑁂𑀦𑀧𑀺 𑀫𑀬𑀁 𑀢𑁂 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫, 𑀓𑀺𑀁 𑀧𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬? 𑀉𑀝𑁆𑀞𑁂𑀳𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀪𑀼𑀜𑁆𑀚 𑀘 𑀧𑀺𑀯 𑀘 𑀧𑀭𑀺𑀘𑀸𑀭𑁂𑀳𑀺 𑀘, 𑀪𑀼𑀜𑁆𑀚𑀦𑁆𑀢𑁄 𑀧𑀺𑀯𑀦𑁆𑀢𑁄 𑀧𑀭𑀺𑀘𑀸𑀭𑁂𑀦𑁆𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀅𑀪𑀺𑀭𑀫𑀲𑁆𑀲𑀼. 𑀦 𑀢𑀁 𑀫𑀬𑀁 𑀅𑀦𑀼𑀚𑀸𑀦𑀸𑀫 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁆𑀯𑀁 𑀔𑁄𑀲𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀅𑀫𑁆𑀳𑀸𑀓𑀁 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄 𑀲𑀼𑀔𑁂𑀥𑀺𑀢𑁄 𑀲𑀼𑀔𑀧𑀭𑀺𑀳𑀢𑁄. 𑀦 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲 𑀚𑀸𑀦𑀸𑀲𑀺. 𑀫𑀭𑀡𑁂𑀦𑀧𑀺 𑀫𑀬𑀁 𑀢𑁂 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫, 𑀓𑀺𑀁 𑀧𑀦 𑀫𑀬𑀁 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬! 𑀉𑀝𑁆𑀞𑁂𑀳𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀪𑀼𑀜𑁆𑀚 𑀘 𑀧𑀺𑀯 𑀘 𑀧𑀭𑀺𑀘𑀸𑀭𑁂𑀳𑀺 𑀘, 𑀪𑀼𑀜𑁆𑀚𑀦𑁆𑀢𑁄 𑀧𑀺𑀯𑀦𑁆𑀢𑁄 𑀧𑀭𑀺𑀘𑀸𑀭𑁂𑀦𑁆𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀅𑀪𑀺𑀭𑀫𑀲𑁆𑀲𑀼. 𑀦 𑀢𑀁 𑀫𑀬𑀁 𑀅𑀦𑀼𑀚𑀸𑀦𑀸𑀫 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀅𑀣 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀬𑁂𑀦 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁆𑀯𑀁 𑀔𑁄𑀲𑀺, 𑀲𑀫𑁆𑀫 𑀲𑀼𑀤𑀺𑀦𑁆𑀦, 𑀫𑀸𑀢𑀸𑀧𑀺𑀢𑀽𑀦𑀁 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄 𑀲𑀼𑀔𑁂𑀥𑀺𑀢𑁄 𑀲𑀼𑀔𑀧𑀭𑀺𑀳𑀢𑁄. 𑀦 𑀢𑁆𑀯𑀁, 𑀲𑀫𑁆𑀫 𑀲𑀼𑀤𑀺𑀦𑁆𑀦, 𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲 𑀚𑀸𑀦𑀸𑀲𑀺. 𑀫𑀭𑀡𑁂𑀦𑀧𑀺 𑀢𑁂 𑀫𑀸𑀢𑀸𑀧𑀺𑀢𑀭𑁄 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀓𑀺𑀁 𑀧𑀦 𑀢𑀁 𑀚𑀻𑀯𑀦𑁆𑀢𑀁 𑀅𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀸𑀬! 𑀉𑀝𑁆𑀞𑁂𑀳𑀺, 𑀲𑀫𑁆𑀫 𑀲𑀼𑀤𑀺𑀦𑁆𑀦, 𑀪𑀼𑀜𑁆𑀚 𑀘 𑀧𑀺𑀯 𑀘 𑀧𑀭𑀺𑀘𑀸𑀭𑁂𑀳𑀺 𑀘, 𑀪𑀼𑀜𑁆𑀚𑀦𑁆𑀢𑁄 𑀧𑀺𑀯𑀦𑁆𑀢𑁄 𑀧𑀭𑀺𑀘𑀸𑀭𑁂𑀦𑁆𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀅𑀪𑀺𑀭𑀫𑀲𑁆𑀲𑀼, 𑀦 𑀢𑀁 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁆𑀯𑀁 𑀔𑁄𑀲𑀺, 𑀲𑀫𑁆𑀫 𑀲𑀼𑀤𑀺𑀦𑁆𑀦…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑁨𑁯. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀬𑁂𑀦 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀫𑁆𑀫𑀢𑀸𑀢𑀸, 𑀏𑀲𑁄 𑀲𑀼𑀤𑀺𑀦𑁆𑀦𑁄 𑀅𑀦𑀦𑁆𑀢𑀭𑀳𑀺𑀢𑀸𑀬 𑀪𑀽𑀫𑀺𑀬𑀸 𑀦𑀺𑀧𑀦𑁆𑀦𑁄 𑁋 ‘𑀇𑀥𑁂𑀯 𑀫𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺 𑀧𑀩𑁆𑀩𑀚𑁆𑀚𑀸 𑀯𑀸’𑀢𑀺. 𑀲𑀘𑁂 𑀢𑀼𑀫𑁆𑀳𑁂 𑀲𑀼𑀤𑀺𑀦𑁆𑀦𑀁 𑀦𑀸𑀦𑀼𑀚𑀸𑀦𑀺𑀲𑁆𑀲𑀣 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬, 𑀢𑀢𑁆𑀣𑁂𑀯 𑀫𑀭𑀡𑀁 𑀆𑀕𑀫𑀺𑀲𑁆𑀲𑀢𑀺. 𑀲𑀘𑁂 𑀧𑀦 𑀢𑀼𑀫𑁆𑀳𑁂 𑀲𑀼𑀤𑀺𑀦𑁆𑀦𑀁 𑀅𑀦𑀼𑀚𑀸𑀦𑀺𑀲𑁆𑀲𑀣 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬, 𑀧𑀩𑁆𑀩𑀚𑀺𑀢𑀫𑁆𑀧𑀺 𑀦𑀁 𑀤𑀓𑁆𑀔𑀺𑀲𑁆𑀲𑀣. 𑀲𑀘𑁂 𑀲𑀼𑀤𑀺𑀦𑁆𑀦𑁄 𑀦𑀸𑀪𑀺𑀭𑀫𑀺𑀲𑁆𑀲𑀢𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬, 𑀓𑀸 𑀢𑀲𑁆𑀲 𑀅𑀜𑁆𑀜𑀸 𑀕𑀢𑀺 𑀪𑀯𑀺𑀲𑁆𑀲𑀢𑀺, 𑀇𑀥𑁂𑀯 𑀧𑀘𑁆𑀘𑀸𑀕𑀫𑀺𑀲𑁆𑀲𑀢𑀺. 𑀅𑀦𑀼𑀚𑀸𑀦𑀸𑀣 𑀲𑀼𑀤𑀺𑀦𑁆𑀦𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. ‘‘𑀅𑀦𑀼𑀚𑀸𑀦𑀸𑀫, 𑀢𑀸𑀢𑀸, 𑀲𑀼𑀤𑀺𑀦𑁆𑀦𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀮𑀦𑁆𑀤𑀧𑀼𑀢𑁆𑀢𑀲𑁆𑀲 𑀲𑀳𑀸𑀬𑀓𑀸 𑀬𑁂𑀦 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀉𑀝𑁆𑀞𑁂𑀳𑀺, 𑀲𑀫𑁆𑀫 𑀲𑀼𑀤𑀺𑀦𑁆𑀦, 𑀅𑀦𑀼𑀜𑁆𑀜𑀸𑀢𑁄𑀲𑀺 𑀫𑀸𑀢𑀸𑀧𑀺𑀢𑀽𑀳𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺.

𑁩𑁦. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑁋 ‘‘𑀅𑀦𑀼𑀜𑁆𑀜𑀸𑀢𑁄𑀫𑁆𑀳𑀺 𑀓𑀺𑀭 𑀫𑀸𑀢𑀸𑀧𑀺𑀢𑀽𑀳𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺, 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀧𑀸𑀡𑀺𑀦𑀸 𑀕𑀢𑁆𑀢𑀸𑀦𑀺 𑀧𑀭𑀺𑀧𑀼𑀜𑁆𑀙𑀦𑁆𑀢𑁄 𑀯𑀼𑀝𑁆𑀞𑀸𑀲𑀺. 𑀅𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀓𑀢𑀺𑀧𑀸𑀳𑀁 𑀩𑀮𑀁 𑀕𑀸𑀳𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀦𑁆𑀦𑁄 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀦𑀼𑀜𑁆𑀜𑀸𑀢𑁄 [𑀅𑀦𑀼𑀜𑁆𑀜𑀸𑀢𑁄𑀫𑁆𑀳𑀺 (𑀲𑀻. 𑀲𑁆𑀬𑀸.)] 𑀅𑀳𑀁, 𑀪𑀦𑁆𑀢𑁂, 𑀫𑀸𑀢𑀸𑀧𑀺𑀢𑀽𑀳𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬. 𑀧𑀩𑁆𑀩𑀸𑀚𑁂𑀢𑀼 𑀫𑀁 𑀪𑀕𑀯𑀸’’𑀢𑀺. 𑀅𑀮𑀢𑁆𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀘 𑀧𑀦𑀸𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀏𑀯𑀭𑀽𑀧𑁂 𑀥𑀼𑀢𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀆𑀭𑀜𑁆𑀜𑀺𑀓𑁄 𑀳𑁄𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁄 𑀧𑀁𑀲𑀼𑀓𑀽𑀮𑀺𑀓𑁄 𑀲𑀧𑀤𑀸𑀦𑀘𑀸𑀭𑀺𑀓𑁄, 𑀅𑀜𑁆𑀜𑀢𑀭𑀁 𑀯𑀚𑁆𑀚𑀺𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀚𑁆𑀚𑀻 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀢𑀺 𑀤𑁆𑀯𑀻𑀳𑀺𑀢𑀺𑀓𑀸 𑀲𑁂𑀢𑀝𑁆𑀞𑀺𑀓𑀸 𑀲𑀮𑀸𑀓𑀸𑀯𑀼𑀢𑁆𑀢𑀸, 𑀦 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀯𑀚𑁆𑀚𑀻 𑀤𑀼𑀩𑁆𑀪𑀺𑀓𑁆𑀔𑀸 𑀤𑁆𑀯𑀻𑀳𑀺𑀢𑀺𑀓𑀸 𑀲𑁂𑀢𑀝𑁆𑀞𑀺𑀓𑀸 𑀲𑀮𑀸𑀓𑀸𑀯𑀼𑀢𑁆𑀢𑀸, 𑀦 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀩𑀳𑀽 𑀔𑁄 𑀧𑀦 𑀫𑁂 𑀯𑁂𑀲𑀸𑀮𑀺𑀬𑀁 𑀜𑀸𑀢𑀻 𑀅𑀟𑁆𑀠𑀸 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸 𑀧𑀳𑀽𑀢𑀥𑀦𑀥𑀜𑁆𑀜𑀸. 𑀬𑀁𑀦𑀽𑀦𑀸𑀳𑀁 𑀜𑀸𑀢𑀻 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁! 𑀜𑀸𑀢𑀻 𑀫𑀁 [𑀜𑀸𑀢𑀓𑀸𑀧𑀺 𑀫𑀁 (𑀲𑁆𑀬𑀸.)] 𑀦𑀺𑀲𑁆𑀲𑀸𑀬 𑀤𑀸𑀦𑀸𑀦𑀺 𑀤𑀲𑁆𑀲𑀦𑁆𑀢𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀽 𑀘 𑀮𑀸𑀪𑀁 𑀮𑀘𑁆𑀙𑀦𑁆𑀢𑀺, 𑀅𑀳𑀜𑁆𑀘 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀅𑀲𑁆𑀲𑁄𑀲𑀼𑀁 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀜𑀸𑀢𑀓𑀸 𑁋 ‘‘𑀲𑀼𑀤𑀺𑀦𑁆𑀦𑁄 𑀓𑀺𑀭 𑀓𑀮𑀦𑁆𑀤𑀧𑀼𑀢𑁆𑀢𑁄 𑀯𑁂𑀲𑀸𑀮𑀺𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀢𑁂 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀲𑀝𑁆𑀞𑀺𑀫𑀢𑁆𑀢𑁂 𑀣𑀸𑀮𑀺𑀧𑀸𑀓𑁂 𑀪𑀢𑁆𑀢𑀸𑀪𑀺𑀳𑀸𑀭𑀁 𑀅𑀪𑀺𑀳𑀭𑀺𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀢𑁂 𑀲𑀝𑁆𑀞𑀺𑀫𑀢𑁆𑀢𑁂 𑀣𑀸𑀮𑀺𑀧𑀸𑀓𑁂 𑀪𑀺𑀓𑁆𑀔𑀽𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀓𑀮𑀦𑁆𑀤𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀓𑀮𑀦𑁆𑀤𑀕𑀸𑀫𑁂 𑀲𑀧𑀤𑀸𑀦𑀁 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀬𑁂𑀦 𑀲𑀓𑀧𑀺𑀢𑀼 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺.

𑁩𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀜𑀸𑀢𑀺𑀤𑀸𑀲𑀻 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀙𑀟𑁆𑀟𑁂𑀢𑀼𑀓𑀸𑀫𑀸 [𑀙𑀝𑁆𑀝𑁂𑀢𑀼𑀓𑀸𑀫𑀸 (𑀓.)] 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀢𑀁 𑀜𑀸𑀢𑀺𑀤𑀸𑀲𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀢𑀁, 𑀪𑀕𑀺𑀦𑀺, 𑀙𑀟𑁆𑀟𑀦𑀻𑀬𑀥𑀫𑁆𑀫𑀁, 𑀇𑀥 𑀫𑁂 𑀧𑀢𑁆𑀢𑁂 𑀆𑀓𑀺𑀭𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀜𑀸𑀢𑀺𑀤𑀸𑀲𑀻 𑀢𑀁 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀢𑁆𑀢𑁂 𑀆𑀓𑀺𑀭𑀦𑁆𑀢𑀻 𑀳𑀢𑁆𑀣𑀸𑀦𑀜𑁆𑀘 𑀧𑀸𑀤𑀸𑀦𑀜𑁆𑀘 𑀲𑀭𑀲𑁆𑀲 𑀘 𑀦𑀺𑀫𑀺𑀢𑁆𑀢𑀁 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀜𑀸𑀢𑀺𑀤𑀸𑀲𑀻 𑀬𑁂𑀦𑀸𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀬𑀕𑁆𑀖𑁂𑀬𑁆𑀬𑁂, 𑀚𑀸𑀦𑁂𑀬𑁆𑀬𑀸𑀲𑀺, 𑀅𑀬𑁆𑀬𑀧𑀼𑀢𑁆𑀢𑁄 𑀲𑀼𑀤𑀺𑀦𑁆𑀦𑁄 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. ‘‘𑀲𑀘𑁂, 𑀚𑁂, 𑀢𑁆𑀯𑀁 𑀲𑀘𑁆𑀘𑀁 𑀪𑀡𑀲𑀺, 𑀅𑀤𑀸𑀲𑀺𑀁 𑀢𑀁 𑀓𑀭𑁄𑀫𑀻’’𑀢𑀺.

𑁩𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀢𑀁 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀫𑀽𑀮𑀁 [𑀓𑀼𑀟𑁆𑀟𑀫𑀽𑀮𑀁 (𑀲𑀻. 𑀲𑁆𑀬𑀸.)] 𑀦𑀺𑀲𑁆𑀲𑀸𑀬 𑀧𑀭𑀺𑀪𑀼𑀜𑁆𑀚𑀢𑀺. 𑀧𑀺𑀢𑀸𑀧𑀺 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀓𑀫𑁆𑀫𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑁄 𑀅𑀤𑁆𑀤𑀲 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀢𑀁 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀅𑀜𑁆𑀜𑀢𑀭𑀁 𑀓𑀼𑀝𑁆𑀝𑀫𑀽𑀮𑀁 𑀦𑀺𑀲𑁆𑀲𑀸𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀬𑁂𑀦𑀸𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀦𑀸𑀫, 𑀢𑀸𑀢 𑀲𑀼𑀤𑀺𑀦𑁆𑀦, 𑀆𑀪𑀺𑀤𑁄𑀲𑀺𑀓𑀁 𑀓𑀼𑀫𑁆𑀫𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀲𑀺! 𑀦𑀦𑀼 𑀦𑀸𑀫, 𑀢𑀸𑀢 𑀲𑀼𑀤𑀺𑀦𑁆𑀦, 𑀲𑀓𑀁 𑀕𑁂𑀳𑀁 𑀕𑀦𑁆𑀢𑀩𑁆𑀩’’𑀦𑁆𑀢𑀺? ‘‘𑀅𑀕𑀫𑀺𑀫𑁆𑀳 [𑀅𑀕𑀫𑀫𑁆𑀳𑀸 (𑀓.)] 𑀔𑁄 𑀢𑁂 𑀕𑀳𑀧𑀢𑀺, 𑀕𑁂𑀳𑀁. 𑀢𑀢𑁄𑀬𑀁 𑀆𑀪𑀺𑀤𑁄𑀲𑀺𑀓𑁄 𑀓𑀼𑀫𑁆𑀫𑀸𑀲𑁄’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀺𑀢𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀏𑀳𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀖𑀭𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀬𑁂𑀦 𑀲𑀓𑀧𑀺𑀢𑀼 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀺𑀢𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀪𑀼𑀜𑁆𑀚, 𑀢𑀸𑀢 𑀲𑀼𑀤𑀺𑀦𑁆𑀦𑀸’’𑀢𑀺. ‘‘𑀅𑀮𑀁, 𑀕𑀳𑀧𑀢𑀺, 𑀓𑀢𑀁 𑀫𑁂 𑀅𑀚𑁆𑀚 𑀪𑀢𑁆𑀢𑀓𑀺𑀘𑁆𑀘’’𑀦𑁆𑀢𑀺. ‘‘𑀅𑀥𑀺𑀯𑀸𑀲𑁂𑀳𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀔𑁄 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁩𑁩. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀳𑀭𑀺𑀢𑁂𑀦 𑀕𑁄𑀫𑀬𑁂𑀦 𑀧𑀣𑀯𑀺𑀁 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸 [𑀑𑀧𑀼𑀘𑁆𑀙𑀸𑀧𑁂𑀢𑁆𑀯𑀸 (𑀲𑀻. 𑀲𑁆𑀬𑀸.)] 𑀤𑁆𑀯𑁂 𑀧𑀼𑀜𑁆𑀚𑁂 𑀓𑀸𑀭𑀸𑀧𑁂𑀲𑀺 𑁋 𑀏𑀓𑀁 𑀳𑀺𑀭𑀜𑁆𑀜𑀲𑁆𑀲, 𑀏𑀓𑀁 𑀲𑀼𑀯𑀡𑁆𑀡𑀲𑁆𑀲. 𑀢𑀸𑀯 𑀫𑀳𑀦𑁆𑀢𑀸 𑀧𑀼𑀜𑁆𑀚𑀸 𑀅𑀳𑁂𑀲𑀼𑀁, 𑀑𑀭𑀢𑁄 𑀞𑀺𑀢𑁄 𑀧𑀼𑀭𑀺𑀲𑁄 𑀧𑀸𑀭𑀢𑁄 𑀞𑀺𑀢𑀁 𑀧𑀼𑀭𑀺𑀲𑀁 𑀦 𑀧𑀲𑁆𑀲𑀢𑀺; 𑀧𑀸𑀭𑀢𑁄 𑀞𑀺𑀢𑁄 𑀧𑀼𑀭𑀺𑀲𑁄 𑀑𑀭𑀢𑁄 𑀞𑀺𑀢𑀁 𑀧𑀼𑀭𑀺𑀲𑀁 𑀦 𑀧𑀲𑁆𑀲𑀢𑀺. 𑀢𑁂 𑀧𑀼𑀜𑁆𑀚𑁂 𑀓𑀺𑀮𑀜𑁆𑀚𑁂𑀳𑀺 𑀧𑀝𑀺𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀫𑀚𑁆𑀛𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀺𑀭𑁄𑀓𑀭𑀡𑀻𑀬𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀯𑀥𑀼, 𑀬𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀢𑀸 𑀧𑀼𑀢𑁆𑀢𑀲𑁆𑀲 𑀫𑁂 𑀲𑀼𑀤𑀺𑀦𑁆𑀦𑀲𑁆𑀲 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸 𑀢𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀸’’𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺, 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀼𑀬𑀸 𑀧𑀘𑁆𑀘𑀲𑁆𑀲𑁄𑀲𑀺.

𑁩𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀲𑀓𑀧𑀺𑀢𑀼 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀺𑀢𑀸 𑀬𑁂𑀦𑀸𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀧𑀼𑀜𑁆𑀚𑁂 𑀯𑀺𑀯𑀭𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀢𑁂, 𑀢𑀸𑀢 𑀲𑀼𑀤𑀺𑀦𑁆𑀦, 𑀫𑀸𑀢𑀼 𑀫𑀢𑁆𑀢𑀺𑀓𑀁 𑀇𑀢𑁆𑀣𑀺𑀓𑀸𑀬 𑀇𑀢𑁆𑀣𑀺𑀥𑀦𑀁, 𑀅𑀜𑁆𑀜𑀁 𑀧𑁂𑀢𑁆𑀢𑀺𑀓𑀁 𑀅𑀜𑁆𑀜𑀁 𑀧𑀺𑀢𑀸𑀫𑀳𑀁. 𑀮𑀩𑁆𑀪𑀸, 𑀢𑀸𑀢 𑀲𑀼𑀤𑀺𑀦𑁆𑀦, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑀸 𑀘 𑀪𑀼𑀜𑁆𑀚𑀺𑀢𑀼𑀁 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀏𑀳𑀺 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀲𑁆𑀲𑀼 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀳𑀻’’𑀢𑀺. ‘‘𑀢𑀸𑀢, 𑀦 𑀉𑀲𑁆𑀲𑀳𑀸𑀫𑀺 𑀦 𑀯𑀺𑀲𑀳𑀸𑀫𑀺, 𑀅𑀪𑀺𑀭𑀢𑁄 𑀅𑀳𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀺𑀢𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁 𑀢𑁂, 𑀢𑀸𑀢 𑀲𑀼𑀤𑀺𑀦𑁆𑀦, 𑀫𑀸𑀢𑀼 𑀫𑀢𑁆𑀢𑀺𑀓𑀁, 𑀇𑀢𑁆𑀣𑀺𑀓𑀸𑀬 𑀇𑀢𑁆𑀣𑀺𑀥𑀦𑀁, 𑀅𑀜𑁆𑀜𑀁 𑀧𑁂𑀢𑁆𑀢𑀺𑀓𑀁, 𑀅𑀜𑁆𑀜𑀁 𑀧𑀺𑀢𑀸𑀫𑀳𑀁. 𑀮𑀩𑁆𑀪𑀸, 𑀢𑀸𑀢 𑀲𑀼𑀤𑀺𑀦𑁆𑀦, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑀸 𑀘 𑀪𑀼𑀜𑁆𑀚𑀺𑀢𑀼𑀁 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀏𑀳𑀺 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀲𑁆𑀲𑀼 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀳𑀻’’𑀢𑀺. ‘‘𑀯𑀤𑁂𑀬𑁆𑀬𑀸𑀫 𑀔𑁄 𑀢𑀁, 𑀕𑀳𑀧𑀢𑀺, 𑀲𑀘𑁂 𑀢𑁆𑀯𑀁 𑀦𑀸𑀢𑀺𑀓𑀟𑁆𑀠𑁂𑀬𑁆𑀬𑀸𑀲𑀻’’𑀢𑀺. ‘‘𑀯𑀤𑁂𑀳𑀺, 𑀢𑀸𑀢 𑀲𑀼𑀤𑀺𑀦𑁆𑀦𑀸’’𑀢𑀺. 𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀲𑀸𑀡𑀺𑀧𑀲𑀺𑀩𑁆𑀩𑀓𑁂 𑀓𑀸𑀭𑀸𑀧𑁂𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀲𑀓𑀝𑁂𑀳𑀺 𑀦𑀺𑀩𑁆𑀩𑀸𑀳𑀸𑀧𑁂𑀢𑁆𑀯𑀸 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀲𑁄𑀢𑁂 𑀑𑀧𑀸𑀢𑁂𑀳𑀺 [𑀑𑀲𑀸𑀤𑁂𑀳𑀺 (𑀲𑀻. 𑀲𑁆𑀬𑀸.)]. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀜𑁆𑀳𑀺 𑀢𑁂, 𑀕𑀳𑀧𑀢𑀺, 𑀪𑀯𑀺𑀲𑁆𑀲𑀢𑀺 𑀢𑀢𑁄𑀦𑀺𑀤𑀸𑀦𑀁 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸 𑀆𑀭𑀓𑁆𑀔𑁄 𑀯𑀸 𑀲𑁄 𑀢𑁂 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀺𑀢𑀸 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀧𑀼𑀢𑁆𑀢𑁄 𑀲𑀼𑀤𑀺𑀦𑁆𑀦𑁄 𑀏𑀯𑀁 𑀯𑀓𑁆𑀔𑀢𑀻’’𑀢𑀺!

𑁩𑁫. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀺𑀢𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀯𑀥𑀼, 𑀢𑁆𑀯𑀁 𑀧𑀺𑀬𑀸 𑀘 𑀫𑀦𑀸𑀧𑀸 𑀘 [𑀢𑁆𑀯𑀫𑁆𑀧𑀺 𑀬𑀸𑀘 (𑀲𑀻.)]. 𑀅𑀧𑁆𑀧𑁂𑀯 𑀦𑀸𑀫 𑀧𑀼𑀢𑁆𑀢𑁄 𑀲𑀼𑀤𑀺𑀦𑁆𑀦𑁄 𑀢𑀼𑀬𑁆𑀳𑀫𑁆𑀧𑀺 𑀯𑀘𑀦𑀁 𑀓𑀭𑁂𑀬𑁆𑀬𑀸’’𑀢𑀺! 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀓𑀻𑀤𑀺𑀲𑀸 𑀦𑀸𑀫 𑀢𑀸, 𑀅𑀬𑁆𑀬𑀧𑀼𑀢𑁆𑀢, 𑀅𑀘𑁆𑀙𑀭𑀸𑀬𑁄 𑀬𑀸𑀲𑀁 𑀢𑁆𑀯𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀻’’𑀢𑀺? ‘‘𑀦 𑀔𑁄 𑀅𑀳𑀁, 𑀪𑀕𑀺𑀦𑀺, 𑀅𑀘𑁆𑀙𑀭𑀸𑀦𑀁 𑀳𑁂𑀢𑀼 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑁋 ‘‘𑀅𑀚𑁆𑀚𑀢𑀕𑁆𑀕𑁂 𑀫𑀁 𑀅𑀬𑁆𑀬𑀧𑀼𑀢𑁆𑀢𑁄 𑀲𑀼𑀤𑀺𑀦𑁆𑀦𑁄 𑀪𑀕𑀺𑀦𑀺𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀢𑀻’’𑀢𑀺, 𑀢𑀢𑁆𑀣𑁂𑀯 𑀫𑀼𑀘𑁆𑀙𑀺𑀢𑀸 𑀧𑀧𑀢𑀸.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀧𑀺𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂, 𑀕𑀳𑀧𑀢𑀺, 𑀪𑁄𑀚𑀦𑀁 𑀤𑀸𑀢𑀩𑁆𑀩𑀁 𑀤𑁂𑀣, 𑀫𑀸 𑀦𑁄 𑀯𑀺𑀳𑁂𑀞𑀬𑀺𑀢𑁆𑀣𑀸’’𑀢𑀺. ‘‘𑀪𑀼𑀜𑁆𑀚, 𑀢𑀸𑀢 𑀲𑀼𑀤𑀺𑀦𑁆𑀦𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀸 𑀘 𑀧𑀺𑀢𑀸 𑀘 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀼𑀁 𑀲𑀫𑁆𑀧𑀯𑀸𑀭𑁂𑀲𑀼𑀁. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀼𑀮𑀁 𑀅𑀟𑁆𑀠𑀁 𑀫𑀳𑀤𑁆𑀥𑀦𑀁 𑀫𑀳𑀸𑀪𑁄𑀕𑀁 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀁 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀁 𑀧𑀳𑀽𑀢𑀥𑀦𑀥𑀜𑁆𑀜𑀁. 𑀮𑀩𑁆𑀪𑀸, 𑀢𑀸𑀢 𑀲𑀼𑀤𑀺𑀦𑁆𑀦, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑀸 𑀘 𑀪𑀼𑀜𑁆𑀚𑀺𑀢𑀼𑀁 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀏𑀳𑀺 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀲𑁆𑀲𑀼 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀳𑀻’’𑀢𑀺. ‘‘𑀅𑀫𑁆𑀫, 𑀦 𑀉𑀲𑁆𑀲𑀳𑀸𑀫𑀺 𑀦 𑀯𑀺𑀲𑀳𑀸𑀫𑀺, 𑀅𑀪𑀺𑀭𑀢𑁄 𑀅𑀳𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀼𑀮𑀁 𑀅𑀟𑁆𑀠𑀁 𑀫𑀳𑀤𑁆𑀥𑀦𑀁 𑀫𑀳𑀸𑀪𑁄𑀕𑀁 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀁 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀁 𑀧𑀳𑀽𑀢𑀥𑀦𑀥𑀜𑁆𑀜𑀁 [𑀧𑀳𑀽𑀢𑀥𑀦𑀥𑀜𑁆𑀜𑀁 (𑀧. 𑀘𑀭𑀸𑀫𑀻𑀢𑀺) 𑀇𑀢𑀺𑀧𑀸𑀞𑁄 𑀲𑀩𑁆𑀩𑀢𑁆𑀣 𑀦𑀢𑁆𑀣𑀺, 𑀊𑀦𑁄 𑀫𑀜𑁆𑀜𑁂]. 𑀢𑁂𑀦 𑀳𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀩𑀻𑀚𑀓𑀫𑁆𑀧𑀺 𑀤𑁂𑀳𑀺 𑁋 𑀫𑀸 𑀦𑁄 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀮𑀺𑀘𑁆𑀙𑀯𑀬𑁄 𑀅𑀢𑀺𑀳𑀭𑀸𑀧𑁂𑀲𑀼’’𑀦𑁆𑀢𑀺. ‘‘𑀏𑀢𑀁 𑀔𑁄 𑀫𑁂, 𑀅𑀫𑁆𑀫, 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺. ‘‘𑀓𑀳𑀁 𑀧𑀦, 𑀢𑀸𑀢 𑀲𑀼𑀤𑀺𑀦𑁆𑀦, 𑀏𑀢𑀭𑀳𑀺 𑀯𑀺𑀳𑀭𑀲𑀻’’𑀢𑀺? ‘‘𑀫𑀳𑀸𑀯𑀦𑁂, 𑀅𑀫𑁆𑀫𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁩𑁬. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀯𑀥𑀼, 𑀬𑀤𑀸 𑀉𑀢𑀼𑀦𑀻 𑀳𑁄𑀲𑀺, 𑀧𑀼𑀧𑁆𑀨𑀁 𑀢𑁂 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀅𑀣 𑀫𑁂 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺. ‘‘𑀏𑀯𑀁 𑀅𑀬𑁆𑀬𑁂’’𑀢𑀺 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀼𑀬𑀸 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀦𑀘𑀺𑀭𑀲𑁆𑀲𑁂𑀯 𑀉𑀢𑀼𑀦𑀻 𑀅𑀳𑁄𑀲𑀺, 𑀧𑀼𑀧𑁆𑀨𑀁𑀲𑀸 𑀉𑀧𑁆𑀧𑀚𑁆𑀚𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀉𑀢𑀼𑀦𑀻𑀫𑁆𑀳𑀺, 𑀅𑀬𑁆𑀬𑁂, 𑀧𑀼𑀧𑁆𑀨𑀁 𑀫𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀯𑀥𑀼, 𑀬𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀢𑀸 𑀧𑀼𑀢𑁆𑀢𑀲𑁆𑀲 𑀲𑀼𑀤𑀺𑀦𑁆𑀦𑀲𑁆𑀲 𑀧𑀺𑀬𑀸 𑀅𑀳𑁄𑀲𑀺 𑀫𑀦𑀸𑀧𑀸 𑀢𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀸’’𑀢𑀺. ‘‘𑀏𑀯𑀁 𑀅𑀬𑁆𑀬𑁂’’𑀢𑀺 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀼𑀬𑀸 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀸 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀁 𑀆𑀤𑀸𑀬 𑀬𑁂𑀦 𑀫𑀳𑀸𑀯𑀦𑀁 𑀬𑁂𑀦𑀸𑀬𑀲𑁆𑀫𑀸 𑀲𑀼𑀤𑀺𑀦𑁆𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀼𑀮𑀁 𑀅𑀟𑁆𑀠𑀁 𑀫𑀳𑀤𑁆𑀥𑀦𑀁 𑀫𑀳𑀸𑀪𑁄𑀕𑀁 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀁 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀁 𑀧𑀳𑀽𑀢𑀥𑀦𑀥𑀜𑁆𑀜𑀁. 𑀮𑀩𑁆𑀪𑀸, 𑀢𑀸𑀢 𑀲𑀼𑀤𑀺𑀦𑁆𑀦, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑀸 𑀘 𑀪𑀼𑀜𑁆𑀚𑀺𑀢𑀼𑀁 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁. 𑀏𑀳𑀺 𑀢𑁆𑀯𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀲𑁆𑀲𑀼 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀳𑀻’’𑀢𑀺. ‘‘𑀅𑀫𑁆𑀫, 𑀦 𑀉𑀲𑁆𑀲𑀳𑀸𑀫𑀺 𑀦 𑀯𑀺𑀲𑀳𑀸𑀫𑀺, 𑀅𑀪𑀺𑀭𑀢𑁄 𑀅𑀳𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀫𑀸𑀢𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀁, 𑀢𑀸𑀢 𑀲𑀼𑀤𑀺𑀦𑁆𑀦, 𑀓𑀼𑀮𑀁 𑀅𑀟𑁆𑀠𑀁 𑀫𑀳𑀤𑁆𑀥𑀦𑀁 𑀫𑀳𑀸𑀪𑁄𑀕𑀁 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀁 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀁 𑀧𑀳𑀽𑀢𑀥𑀦𑀥𑀜𑁆𑀜𑀁. 𑀢𑁂𑀦 𑀳𑀺, 𑀢𑀸𑀢 𑀲𑀼𑀤𑀺𑀦𑁆𑀦, 𑀩𑀻𑀚𑀓𑀫𑁆𑀧𑀺 𑀤𑁂𑀳𑀺 𑁋 𑀫𑀸 𑀦𑁄 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀮𑀺𑀘𑁆𑀙𑀯𑀬𑁄 𑀅𑀢𑀺𑀳𑀭𑀸𑀧𑁂𑀲𑀼’’𑀦𑁆𑀢𑀺. ‘‘𑀏𑀢𑀁 𑀔𑁄 𑀫𑁂, 𑀅𑀫𑁆𑀫, 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺, 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀅𑀦𑀸𑀤𑀻𑀦𑀯𑀤𑀲𑁆𑀲𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀢𑀺𑀓𑁆𑀔𑀢𑁆𑀢𑀼𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀺. 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀪𑀼𑀫𑁆𑀫𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘‘𑀦𑀺𑀭𑀩𑁆𑀩𑀼𑀤𑁄 𑀯𑀢, 𑀪𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀭𑀸𑀤𑀻𑀦𑀯𑁄; 𑀲𑀼𑀤𑀺𑀦𑁆𑀦𑁂𑀦 𑀓𑀮𑀦𑁆𑀤𑀧𑀼𑀢𑁆𑀢𑁂𑀦 𑀅𑀩𑁆𑀩𑀼𑀤𑀁 𑀉𑀧𑁆𑀧𑀸𑀤𑀺𑀢𑀁, 𑀆𑀤𑀻𑀦𑀯𑁄 𑀉𑀧𑁆𑀧𑀸𑀤𑀺𑀢𑁄’’𑀢𑀺. 𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 [𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑀸 (𑀲𑀻. 𑀲𑁆𑀬𑀸.)] 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁…𑀧𑁂… 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸… 𑀬𑀸𑀫𑀸 𑀤𑁂𑀯𑀸 … 𑀢𑀼𑀲𑀺𑀢𑀸 𑀤𑁂𑀯𑀸… 𑀦𑀺𑀫𑁆𑀫𑀸𑀦𑀭𑀢𑀻 𑀤𑁂𑀯𑀸… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑀸… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘‘𑀦𑀺𑀭𑀩𑁆𑀩𑀼𑀤𑁄 𑀯𑀢, 𑀪𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀦𑀺𑀭𑀸𑀤𑀻𑀦𑀯𑁄; 𑀲𑀼𑀤𑀺𑀦𑁆𑀦𑁂𑀦 𑀓𑀮𑀦𑁆𑀤𑀧𑀼𑀢𑁆𑀢𑁂𑀦 𑀅𑀩𑁆𑀩𑀼𑀤𑀁 𑀉𑀧𑁆𑀧𑀸𑀤𑀺𑀢𑀁, 𑀆𑀤𑀻𑀦𑀯𑁄 𑀉𑀧𑁆𑀧𑀸𑀤𑀺𑀢𑁄’’𑀢𑀺. 𑀇𑀢𑀺𑀳 𑀢𑁂𑀦 𑀔𑀡𑁂𑀦 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺.

𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀢𑀲𑁆𑀲 𑀕𑀩𑁆𑀪𑀲𑁆𑀲 𑀧𑀭𑀺𑀧𑀸𑀓𑀫𑀦𑁆𑀯𑀸𑀬 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀲𑀳𑀸𑀬𑀓𑀸 𑀢𑀲𑁆𑀲 𑀤𑀸𑀭𑀓𑀲𑁆𑀲 ‘𑀩𑀻𑀚𑀓𑁄’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀩𑀻𑀚𑀓𑀫𑀸𑀢𑀸𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀩𑀻𑀚𑀓𑀧𑀺𑀢𑀸𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑁂 𑀅𑀧𑀭𑁂𑀦 𑀲𑀫𑀬𑁂𑀦 𑀉𑀪𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀁𑀲𑀼.

𑁩𑁭. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘𑀁, 𑀅𑀳𑀼 𑀯𑀺𑀧𑁆𑀧𑀝𑀺𑀲𑀸𑀭𑁄 𑁋 ‘‘𑀅𑀮𑀸𑀪𑀸 𑀯𑀢 𑀫𑁂, 𑀦 𑀯𑀢 𑀫𑁂 𑀮𑀸𑀪𑀸! 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂, 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁! 𑀬𑁄𑀳𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀸𑀲𑀓𑁆𑀔𑀺𑀁 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼’’𑀦𑁆𑀢𑀺. 𑀲𑁄 𑀢𑁂𑀦𑁂𑀯 𑀓𑀼𑀓𑁆𑀓𑀼𑀘𑁆𑀘𑁂𑀦 𑀢𑁂𑀦 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀓𑀺𑀲𑁄 𑀅𑀳𑁄𑀲𑀺 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄 𑀅𑀦𑁆𑀢𑁄𑀫𑀦𑁄 𑀮𑀻𑀦𑀫𑀦𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀧𑀚𑁆𑀛𑀸𑀬𑀺.

𑁩𑁮. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀼𑀤𑀺𑀦𑁆𑀦𑀲𑁆𑀲 𑀲𑀳𑀸𑀬𑀓𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀼𑀩𑁆𑀩𑁂 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀲𑀼𑀤𑀺𑀦𑁆𑀦, 𑀯𑀡𑁆𑀡𑀯𑀸 𑀅𑀳𑁄𑀲𑀺 𑀧𑀻𑀡𑀺𑀦𑁆𑀤𑁆𑀭𑀺𑀬𑁄 𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀯𑀡𑁆𑀡𑁄; 𑀲𑁄 𑀤𑀸𑀦𑀺 𑀢𑁆𑀯𑀁 𑀏𑀢𑀭𑀳𑀺 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄 𑀅𑀦𑁆𑀢𑁄𑀫𑀦𑁄 𑀮𑀻𑀦𑀫𑀦𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑀻 𑀧𑀚𑁆𑀛𑀸𑀬𑀲𑀺. 𑀓𑀘𑁆𑀘𑀺 𑀦𑁄 𑀢𑁆𑀯𑀁, 𑀆𑀯𑀼𑀲𑁄 𑀲𑀼𑀤𑀺𑀦𑁆𑀦, 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀲𑀻’’𑀢𑀺? ‘‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀅𑀦𑀪𑀺𑀭𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀺. 𑀅𑀢𑁆𑀣𑀺 𑀫𑁂 𑀧𑀸𑀧𑀓𑀫𑁆𑀫𑀁 𑀓𑀢𑀁; 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀫𑁂𑀣𑀼𑀦𑁄 𑀥𑀫𑁆𑀫𑁄 𑀧𑀝𑀺𑀲𑁂𑀯𑀺𑀢𑁄; 𑀢𑀲𑁆𑀲 𑀫𑀬𑁆𑀳𑀁, 𑀆𑀯𑀼𑀲𑁄, 𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑀼 𑀯𑀺𑀧𑁆𑀧𑀝𑀺𑀲𑀸𑀭𑁄 𑁋 ‘𑀅𑀮𑀸𑀪𑀸 𑀯𑀢 𑀫𑁂, 𑀦 𑀯𑀢 𑀫𑁂 𑀮𑀸𑀪𑀸; 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂, 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁; 𑀬𑁄𑀳𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀸𑀲𑀓𑁆𑀔𑀺𑀁 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼’’𑀦𑁆𑀢𑀺. ‘‘𑀅𑀮𑀜𑁆𑀳𑀺 𑀢𑁂, 𑀆𑀯𑀼𑀲𑁄 𑀲𑀼𑀤𑀺𑀦𑁆𑀦, 𑀓𑀼𑀓𑁆𑀓𑀼𑀘𑁆𑀘𑀸𑀬 𑀅𑀮𑀁 𑀯𑀺𑀧𑁆𑀧𑀝𑀺𑀲𑀸𑀭𑀸𑀬 𑀬𑀁 𑀢𑁆𑀯𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀲𑀓𑁆𑀔𑀺𑀲𑁆𑀲𑀲𑀺 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀦𑀦𑀼, 𑀆𑀯𑀼𑀲𑁄, 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀭𑀸𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀭𑀸𑀕𑀸𑀬; 𑀯𑀺𑀲𑀁𑀬𑁄𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀁𑀬𑁄𑀕𑀸𑀬; 𑀅𑀦𑀼𑀧𑀸𑀤𑀸𑀦𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀉𑀧𑀸𑀤𑀸𑀦𑀸𑀬. 𑀢𑀢𑁆𑀣 𑀦𑀸𑀫 𑀢𑁆𑀯𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀯𑀺𑀭𑀸𑀕𑀸𑀬 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀲𑀭𑀸𑀕𑀸𑀬 𑀘𑁂𑀢𑁂𑀲𑁆𑀲𑀲𑀺, 𑀯𑀺𑀲𑀁𑀬𑁄𑀕𑀸𑀬 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀲𑀁𑀬𑁄𑀕𑀸𑀬 𑀘𑁂𑀢𑁂𑀲𑁆𑀲𑀲𑀺, 𑀅𑀦𑀼𑀧𑀸𑀤𑀸𑀦𑀸𑀬 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀲𑀉𑀧𑀸𑀤𑀸𑀦𑀸𑀬 𑀘𑁂𑀢𑁂𑀲𑁆𑀲𑀲𑀺! 𑀦𑀦𑀼, 𑀆𑀯𑀼𑀲𑁄, 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀭𑀸𑀕𑀯𑀺𑀭𑀸𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀫𑀤𑀦𑀺𑀫𑁆𑀫𑀤𑀦𑀸𑀬 𑀧𑀺𑀧𑀸𑀲𑀯𑀺𑀦𑀬𑀸𑀬 𑀆𑀮𑀬𑀲𑀫𑀼𑀕𑁆𑀖𑀸𑀢𑀸𑀬 𑀯𑀝𑁆𑀝𑀼𑀧𑀘𑁆𑀙𑁂𑀤𑀸𑀬 𑀢𑀡𑁆𑀳𑀸𑀓𑁆𑀔𑀬𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄! 𑀦𑀦𑀼, 𑀆𑀯𑀼𑀲𑁄, 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀓𑀸𑀫𑀸𑀦𑀁 𑀧𑀳𑀸𑀦𑀁 𑀅𑀓𑁆𑀔𑀸𑀢𑀁, 𑀓𑀸𑀫𑀲𑀜𑁆𑀜𑀸𑀦𑀁 𑀧𑀭𑀺𑀜𑁆𑀜𑀸 𑀅𑀓𑁆𑀔𑀸𑀢𑀸, 𑀓𑀸𑀫𑀧𑀺𑀧𑀸𑀲𑀸𑀦𑀁 𑀧𑀝𑀺𑀯𑀺𑀦𑀬𑁄 𑀅𑀓𑁆𑀔𑀸𑀢𑁄, 𑀓𑀸𑀫𑀯𑀺𑀢𑀓𑁆𑀓𑀸𑀦𑀁 𑀲𑀫𑀼𑀕𑁆𑀖𑀸𑀢𑁄 𑀅𑀓𑁆𑀔𑀸𑀢𑁄, 𑀓𑀸𑀫𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑁄 𑀅𑀓𑁆𑀔𑀸𑀢𑁄! 𑀦𑁂𑀢𑀁, 𑀆𑀯𑀼𑀲𑁄, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬. 𑀅𑀣 𑀔𑁆𑀯𑁂𑀢𑀁, 𑀆𑀯𑀼𑀲𑁄, 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘𑁂𑀯 𑀅𑀧𑁆𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀜𑁆𑀘 𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀸𑀬𑀸’’𑀢𑀺.

𑁩𑁯. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀲𑀼𑀤𑀺𑀦𑁆𑀦, 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁 [𑀅𑀦𑀦𑀼𑀘𑁆𑀙𑀯𑀺𑀬𑀁 (𑀲𑀻.)], 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀝𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀲𑀓𑁆𑀔𑀺𑀲𑁆𑀲𑀲𑀺 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁! 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀭𑀸𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀭𑀸𑀕𑀸𑀬; 𑀯𑀺𑀲𑀁𑀬𑁄𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀁𑀬𑁄𑀕𑀸𑀬; 𑀅𑀦𑀼𑀧𑀸𑀤𑀸𑀦𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀉𑀧𑀸𑀤𑀸𑀦𑀸𑀬! 𑀢𑀢𑁆𑀣 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀬𑀸 𑀯𑀺𑀭𑀸𑀕𑀸𑀬 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀲𑀭𑀸𑀕𑀸𑀬 𑀘𑁂𑀢𑁂𑀲𑁆𑀲𑀲𑀺, 𑀯𑀺𑀲𑀁𑀬𑁄𑀕𑀸𑀬 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀲𑀁𑀬𑁄𑀕𑀸𑀬 𑀘𑁂𑀢𑁂𑀲𑁆𑀲𑀲𑀺, 𑀅𑀦𑀼𑀧𑀸𑀤𑀸𑀦𑀸𑀬 𑀥𑀫𑁆𑀫𑁂 𑀤𑁂𑀲𑀺𑀢𑁂 𑀲𑀉𑀧𑀸𑀤𑀸𑀦𑀸𑀬 𑀘𑁂𑀢𑁂𑀲𑁆𑀲𑀲𑀺! 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀭𑀸𑀕𑀯𑀺𑀭𑀸𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄! 𑀫𑀤𑀦𑀺𑀫𑁆𑀫𑀤𑀦𑀸𑀬 𑀧𑀺𑀧𑀸𑀲𑀯𑀺𑀦𑀬𑀸𑀬 𑀆𑀮𑀬𑀲𑀫𑀼𑀕𑁆𑀖𑀸𑀢𑀸𑀬 𑀯𑀝𑁆𑀝𑀼𑀧𑀘𑁆𑀙𑁂𑀤𑀸𑀬 𑀢𑀡𑁆𑀳𑀸𑀓𑁆𑀔𑀬𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄! 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀓𑀸𑀫𑀸𑀦𑀁 𑀧𑀳𑀸𑀦𑀁 𑀅𑀓𑁆𑀔𑀸𑀢𑀁, 𑀓𑀸𑀫𑀲𑀜𑁆𑀜𑀸𑀦𑀁 𑀧𑀭𑀺𑀜𑁆𑀜𑀸 𑀅𑀓𑁆𑀔𑀸𑀢𑀸, 𑀓𑀸𑀫𑀧𑀺𑀧𑀸𑀲𑀸𑀦𑀁 𑀧𑀝𑀺𑀯𑀺𑀦𑀬𑁄 𑀅𑀓𑁆𑀔𑀸𑀢𑁄, 𑀓𑀸𑀫𑀯𑀺𑀢𑀓𑁆𑀓𑀸𑀦𑀁 𑀲𑀫𑀼𑀕𑁆𑀖𑀸𑀢𑁄 𑀅𑀓𑁆𑀔𑀸𑀢𑁄, 𑀓𑀸𑀫𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑁄 𑀅𑀓𑁆𑀔𑀸𑀢𑁄! 𑀯𑀭𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀆𑀲𑀺𑀯𑀺𑀲𑀲𑁆𑀲 [𑀆𑀲𑀻𑀯𑀺𑀲𑀲𑁆𑀲 (𑀲𑀻. 𑀲𑁆𑀬𑀸.)] 𑀖𑁄𑀭𑀯𑀺𑀲𑀲𑁆𑀲 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁, 𑀦 𑀢𑁆𑀯𑁂𑀯 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁. 𑀯𑀭𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀓𑀡𑁆𑀳𑀲𑀧𑁆𑀧𑀲𑁆𑀲 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁, 𑀦 𑀢𑁆𑀯𑁂𑀯 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁. 𑀯𑀭𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀅𑀗𑁆𑀕𑀸𑀭𑀓𑀸𑀲𑀼𑀬𑀸 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁, 𑀦 𑀢𑁆𑀯𑁂𑀯 𑀫𑀸𑀢𑀼𑀕𑀸𑀫𑀲𑁆𑀲 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄𑀦𑀺𑀤𑀸𑀦𑀜𑁆𑀳𑀺, 𑀫𑁄𑀖𑀧𑀼𑀭𑀺𑀲, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀇𑀢𑁄𑀦𑀺𑀤𑀸𑀦𑀜𑁆𑀘 𑀔𑁄, 𑀫𑁄𑀖𑀧𑀼𑀭𑀺𑀲, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀢𑁆𑀣 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀅𑀲𑀤𑁆𑀥𑀫𑁆𑀫𑀁 𑀕𑀸𑀫𑀥𑀫𑁆𑀫𑀁 𑀯𑀲𑀮𑀥𑀫𑁆𑀫𑀁 𑀤𑀼𑀝𑁆𑀞𑀼𑀮𑁆𑀮𑀁 𑀑𑀤𑀓𑀦𑁆𑀢𑀺𑀓𑀁 𑀭𑀳𑀲𑁆𑀲𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀲𑀺, 𑀩𑀳𑀽𑀦𑀁 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀤𑀺𑀓𑀢𑁆𑀢𑀸 𑀧𑀼𑀩𑁆𑀩𑀗𑁆𑀕𑀫𑁄. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬; 𑀅𑀣 𑀔𑁆𑀯𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘𑁂𑀯 𑀅𑀧𑁆𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀜𑁆𑀘 𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀸𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬 𑀤𑀼𑀧𑁆𑀧𑁄𑀲𑀢𑀸𑀬 𑀫𑀳𑀺𑀘𑁆𑀙𑀢𑀸𑀬 𑀅𑀲𑀦𑁆𑀢𑀼𑀝𑁆𑀞𑀺𑀢𑀸𑀬 [𑀅𑀲𑀦𑁆𑀢𑀼𑀝𑁆𑀞𑀢𑀸𑀬 (𑀲𑁆𑀬𑀸.)] 𑀲𑀗𑁆𑀕𑀡𑀺𑀓𑀸𑀬 𑀓𑁄𑀲𑀚𑁆𑀚𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀼𑀪𑀭𑀢𑀸𑀬 𑀲𑀼𑀧𑁄𑀲𑀢𑀸𑀬 𑀅𑀧𑁆𑀧𑀺𑀘𑁆𑀙𑀲𑁆𑀲 𑀲𑀦𑁆𑀢𑀼𑀝𑁆𑀞𑀲𑁆𑀲 𑀲𑀮𑁆𑀮𑁂𑀔𑀲𑁆𑀲 𑀥𑀼𑀢𑀲𑁆𑀲 𑀧𑀸𑀲𑀸𑀤𑀺𑀓𑀲𑁆𑀲 𑀅𑀧𑀘𑀬𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 [𑀯𑀻𑀭𑀺𑀬𑀸𑀭𑀩𑁆𑀪𑀲𑁆𑀲 (𑀓.)] 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼𑀮𑁄𑀫𑀺𑀓𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺 [𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀺 (𑀲𑀻. 𑀲𑁆𑀬𑀸.)] 𑀤𑀲 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑁋 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬, 𑀲𑀗𑁆𑀖𑀨𑀸𑀲𑀼𑀢𑀸𑀬, 𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬, 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀆𑀲𑀯𑀸𑀦𑀁 𑀲𑀁𑀯𑀭𑀸𑀬, 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬, 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀫𑀓𑁆𑀓𑀝𑀻𑀯𑀢𑁆𑀣𑀼

𑁪𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀯𑁂𑀲𑀸𑀮𑀺𑀬𑀁 𑀫𑀳𑀸𑀯𑀦𑁂 𑀫𑀓𑁆𑀓𑀝𑀺𑀁 𑀆𑀫𑀺𑀲𑁂𑀦 𑀉𑀧𑀮𑀸𑀧𑁂𑀢𑁆𑀯𑀸 𑀢𑀲𑁆𑀲𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀬𑁂𑀦 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀳𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀤𑁆𑀤𑀲 𑀔𑁄 𑀲𑀸 𑀫𑀓𑁆𑀓𑀝𑀻 𑀢𑁂 𑀪𑀺𑀓𑁆𑀔𑀽 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀓𑀝𑀺𑀫𑁆𑀧𑀺 𑀘𑀸𑀮𑁂𑀲𑀺 𑀙𑁂𑀧𑁆𑀧𑀫𑁆𑀧𑀺 𑀘𑀸𑀮𑁂𑀲𑀺, 𑀓𑀝𑀺𑀫𑁆𑀧𑀺 𑀑𑀟𑁆𑀟𑀺, 𑀦𑀺𑀫𑀺𑀢𑁆𑀢𑀫𑁆𑀧𑀺 𑀅𑀓𑀸𑀲𑀺. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀦𑀺𑀲𑁆𑀲𑀁𑀲𑀬𑀁 𑀔𑁄 𑀲𑁄 𑀪𑀺𑀓𑁆𑀔𑀼 𑀇𑀫𑀺𑀲𑁆𑀲𑀸 𑀫𑀓𑁆𑀓𑀝𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀻’’𑀢𑀺. 𑀏𑀓𑀫𑀦𑁆𑀢𑀁 𑀦𑀺𑀮𑀻𑀬𑀺𑀁𑀲𑀼. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀆𑀤𑀸𑀬 𑀧𑀝𑀺𑀓𑁆𑀓𑀫𑀺.

𑁪𑁧. 𑀅𑀣 𑀔𑁄 𑀲𑀸 𑀫𑀓𑁆𑀓𑀝𑀻 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀏𑀓𑀤𑁂𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀏𑀓𑀤𑁂𑀲𑀁 𑀢𑀲𑁆𑀲𑀸 𑀫𑀓𑁆𑀓𑀝𑀺𑀬𑀸 𑀅𑀤𑀸𑀲𑀺. 𑀅𑀣 𑀔𑁄 𑀲𑀸 𑀫𑀓𑁆𑀓𑀝𑀻 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀝𑀺𑀁 𑀑𑀟𑁆𑀟𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲𑀸 𑀫𑀓𑁆𑀓𑀝𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀦𑀦𑀼, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁; 𑀓𑀺𑀲𑁆𑀲 𑀢𑁆𑀯𑀁, 𑀆𑀯𑀼𑀲𑁄, 𑀫𑀓𑁆𑀓𑀝𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀲𑀻’’𑀢𑀺? ‘‘𑀲𑀘𑁆𑀘𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁; 𑀢𑀜𑁆𑀘 𑀔𑁄 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸, 𑀦𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀸’’𑀢𑀺. ‘‘𑀦𑀦𑀼, 𑀆𑀯𑀼𑀲𑁄, 𑀢𑀣𑁂𑀯 𑀢𑀁 𑀳𑁄𑀢𑀺. 𑀅𑀦𑀦𑀼𑀘𑁆𑀙𑀯𑀺𑀓𑀁, 𑀆𑀯𑀼𑀲𑁄, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀝𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀆𑀯𑀼𑀲𑁄, 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀲𑀓𑁆𑀔𑀺𑀲𑁆𑀲𑀲𑀺 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁! 𑀦𑀦𑀼, 𑀆𑀯𑀼𑀲𑁄, 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀭𑀸𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀭𑀸𑀕𑀸𑀬…𑀧𑁂… 𑀓𑀸𑀫𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑁄 𑀅𑀓𑁆𑀔𑀸𑀢𑁄! 𑀦𑁂𑀢𑀁, 𑀆𑀯𑀼𑀲𑁄, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬. 𑀅𑀣 𑀔𑁆𑀯𑁂𑀢𑀁, 𑀆𑀯𑀼𑀲𑁄, 𑀅𑀧𑁆𑀧𑀲𑀦𑁆𑀦𑀸𑀦𑀜𑁆𑀘𑁂𑀯 𑀅𑀧𑁆𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀜𑁆𑀘 𑀏𑀓𑀘𑁆𑀘𑀸𑀦𑀁 𑀅𑀜𑁆𑀜𑀣𑀢𑁆𑀢𑀸𑀬𑀸’’𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀁 𑀪𑀺𑀓𑁆𑀔𑀼𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀅𑀭𑁄𑀘𑁂𑀲𑀼𑀁.

𑁪𑁨. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀓𑁆𑀓𑀝𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦 𑀲𑀓𑁆𑀔𑀺𑀲𑁆𑀲𑀲𑀺 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁! 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀭𑀸𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀲𑀭𑀸𑀕𑀸𑀬 …𑀧𑁂… 𑀓𑀸𑀫𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑁄 𑀅𑀓𑁆𑀔𑀸𑀢𑁄! 𑀯𑀭𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀆𑀲𑀻𑀯𑀺𑀲𑀲𑁆𑀲 𑀖𑁄𑀭𑀯𑀺𑀲𑀲𑁆𑀲 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁, 𑀦 𑀢𑁆𑀯𑁂𑀯 𑀫𑀓𑁆𑀓𑀝𑀺𑀬𑀸 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁. 𑀯𑀭𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀓𑀡𑁆𑀳𑀲𑀧𑁆𑀧𑀲𑁆𑀲 𑀫𑀼𑀔𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁, 𑀦 𑀢𑁆𑀯𑁂𑀯 𑀫𑀓𑁆𑀓𑀝𑀺𑀬𑀸 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁. 𑀯𑀭𑀁 𑀢𑁂, 𑀫𑁄𑀖𑀧𑀼𑀭𑀺𑀲, 𑀅𑀗𑁆𑀕𑀸𑀭𑀓𑀸𑀲𑀼𑀬𑀸 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁, 𑀦 𑀢𑁆𑀯𑁂𑀯 𑀫𑀓𑁆𑀓𑀝𑀺𑀬𑀸 𑀅𑀗𑁆𑀕𑀚𑀸𑀢𑁂 𑀅𑀗𑁆𑀕𑀚𑀸𑀢𑀁 𑀧𑀓𑁆𑀔𑀺𑀢𑁆𑀢𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄𑀦𑀺𑀤𑀸𑀦𑀜𑁆𑀳𑀺, 𑀫𑁄𑀖𑀧𑀼𑀭𑀺𑀲, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁; 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀇𑀢𑁄𑀦𑀺𑀤𑀸𑀦𑀜𑁆𑀘 𑀔𑁄, 𑀫𑁄𑀖𑀧𑀼𑀭𑀺𑀲, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀢𑀢𑁆𑀣 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀅𑀲𑀤𑁆𑀥𑀫𑁆𑀫𑀁 𑀕𑀸𑀫𑀥𑀫𑁆𑀫𑀁 𑀯𑀲𑀮𑀥𑀫𑁆𑀫𑀁 𑀤𑀼𑀝𑁆𑀞𑀼𑀮𑁆𑀮𑀁 𑀑𑀤𑀓𑀦𑁆𑀢𑀺𑀓𑀁 𑀭𑀳𑀲𑁆𑀲𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀲𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑀫𑀓𑁆𑀓𑀝𑀻𑀯𑀢𑁆𑀣𑀼 𑀦𑀺𑀝𑁆𑀞𑀺𑀢𑀁.

𑀲𑀦𑁆𑀣𑀢𑀪𑀸𑀡𑀯𑀸𑀭𑁄

𑁪𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀁𑀲𑀼, 𑀬𑀸𑀯𑀤𑀢𑁆𑀣𑀁 𑀲𑀼𑀧𑀺𑀁𑀲𑀼, 𑀬𑀸𑀯𑀤𑀢𑁆𑀣𑀁 𑀦𑁆𑀳𑀸𑀬𑀺𑀁𑀲𑀼. 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀲𑀼𑀧𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀦𑁆𑀳𑀸𑀬𑀺𑀢𑁆𑀯𑀸 𑀅𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀁𑀲𑀼. 𑀢𑁂 𑀅𑀧𑀭𑁂𑀦 𑀲𑀫𑀬𑁂𑀦 𑀜𑀸𑀢𑀺𑀩𑁆𑀬𑀲𑀦𑁂𑀦𑀧𑀺 𑀨𑀼𑀝𑁆𑀞𑀸 𑀪𑁄𑀕𑀩𑁆𑀬𑀲𑀦𑁂𑀦𑀧𑀺 𑀨𑀼𑀝𑁆𑀞𑀸 𑀭𑁄𑀕𑀩𑁆𑀬𑀲𑀦𑁂𑀦𑀧𑀺 𑀨𑀼𑀝𑁆𑀞𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀦 𑀫𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀩𑀼𑀤𑁆𑀥𑀕𑀭𑀳𑀺𑀦𑁄 𑀦 𑀥𑀫𑁆𑀫𑀕𑀭𑀳𑀺𑀦𑁄 𑀦 𑀲𑀗𑁆𑀖𑀕𑀭𑀳𑀺𑀦𑁄; 𑀅𑀢𑁆𑀢𑀕𑀭𑀳𑀺𑀦𑁄 𑀫𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀅𑀦𑀜𑁆𑀜𑀕𑀭𑀳𑀺𑀦𑁄. 𑀫𑀬𑀫𑁂𑀯𑀫𑁆𑀳𑀸 𑀅𑀮𑀓𑁆𑀔𑀺𑀓𑀸 𑀫𑀬𑀁 𑀅𑀧𑁆𑀧𑀧𑀼𑀜𑁆𑀜𑀸, 𑀬𑁂 𑀫𑀬𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀸𑀲𑀓𑁆𑀔𑀺𑀫𑁆𑀳𑀸 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀇𑀤𑀸𑀦𑀺 𑀘𑁂𑀧𑀺 [𑀇𑀤𑀸𑀦𑀺𑀧𑀺 𑀘𑁂 (𑀲𑁆𑀬𑀸.)] 𑀫𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀮𑀪𑁂𑀬𑁆𑀬𑀸𑀫 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤𑀁, 𑀇𑀤𑀸𑀦𑀺𑀧𑀺 𑀫𑀬𑀁 𑀯𑀺𑀧𑀲𑁆𑀲𑀓𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑁂𑀬𑁆𑀬𑀸𑀫. 𑀲𑀸𑀥𑀼, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀳𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀯𑁂𑀲𑀸𑀮𑀺𑀓𑀸𑀦𑀁 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺.

‘‘𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄 𑀬𑀁 𑀢𑀣𑀸𑀕𑀢𑁄 𑀯𑀚𑁆𑀚𑀻𑀦𑀁 𑀯𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸𑀦𑀁 𑀯𑀸 𑀓𑀸𑀭𑀡𑀸 𑀲𑀸𑀯𑀓𑀸𑀦𑀁 𑀧𑀸𑀭𑀸𑀚𑀺𑀓𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑁄, 𑀪𑀺𑀓𑁆𑀔𑀯𑁂 [𑀬𑁄 𑀧𑀦 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 (𑀲𑀻.) 𑀬𑁄 𑀔𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 (𑀲𑁆𑀬𑀸.)], 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺 𑀲𑁄 𑀆𑀕𑀢𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄; 𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂 [𑀬𑁄 𑀘 𑀔𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 (𑀲𑀻. 𑀲𑁆𑀬𑀸.)], 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀆𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺 𑀲𑁄 𑀆𑀕𑀢𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁪𑁪. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺.

𑁪𑁫. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄 𑀬𑀣𑀸𑀬𑀼𑀢𑁆𑀢𑁄 𑀬𑀣𑀸𑀚𑀘𑁆𑀘𑁄 𑀬𑀣𑀸𑀦𑀸𑀫𑁄 𑀬𑀣𑀸𑀕𑁄𑀢𑁆𑀢𑁄 𑀬𑀣𑀸𑀲𑀻𑀮𑁄 𑀬𑀣𑀸𑀯𑀺𑀳𑀸𑀭𑀻 𑀬𑀣𑀸𑀕𑁄𑀘𑀭𑁄 𑀣𑁂𑀭𑁄 𑀯𑀸 𑀦𑀯𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸. 𑀏𑀲𑁄 𑀯𑀼𑀘𑁆𑀘𑀢𑀺 ‘𑀬𑁄 𑀧𑀦𑀸’𑀢𑀺.

[𑀯𑀺𑀪. 𑁫𑁧𑁦, 𑀛𑀸𑀦𑀯𑀺𑀪𑀗𑁆𑀕𑁂𑀧𑀺] 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀓𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼, 𑀲𑀫𑀜𑁆𑀜𑀸𑀬 𑀪𑀺𑀓𑁆𑀔𑀼, 𑀧𑀝𑀺𑀜𑁆𑀜𑀸𑀬 𑀪𑀺𑀓𑁆𑀔𑀼, 𑀏𑀳𑀺 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀼, 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀼, 𑀪𑀤𑁆𑀭𑁄 𑀪𑀺𑀓𑁆𑀔𑀼, 𑀲𑀸𑀭𑁄 𑀪𑀺𑀓𑁆𑀔𑀼, 𑀲𑁂𑀔𑁄 𑀪𑀺𑀓𑁆𑀔𑀼, 𑀅𑀲𑁂𑀔𑁄 𑀪𑀺𑀓𑁆𑀔𑀼, 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀼. 𑀢𑀢𑁆𑀭 𑀬𑁆𑀯𑀸𑀬𑀁 𑀪𑀺𑀓𑁆𑀔𑀼 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀲𑀫𑁆𑀧𑀦𑁆𑀦𑁄, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

[𑀤𑀻. 𑀦𑀺. 𑁩.𑁩𑁦𑁫] 𑀲𑀺𑀓𑁆𑀔𑀸𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑁋 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀢𑀢𑁆𑀭 𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸𑀢𑀺.

𑀲𑀸𑀚𑀻𑀯𑀁 𑀦𑀸𑀫 𑀬𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁, 𑀏𑀢𑀁 𑀲𑀸𑀚𑀻𑀯𑀁 𑀦𑀸𑀫. 𑀢𑀲𑁆𑀫𑀺𑀁 𑀲𑀺𑀓𑁆𑀔𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺.

𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸𑀢𑀺 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑀘𑁆𑀘𑀓𑁆𑀔𑀸𑀢𑀸; 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀧𑀘𑁆𑀘𑀓𑁆𑀔𑀸𑀢𑀸.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑀘𑁆𑀘𑀓𑁆𑀔𑀸𑀢𑀸. 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀉𑀧𑀸𑀲𑀓𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀆𑀭𑀸𑀫𑀺𑀓𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀲𑀸𑀫𑀡𑁂𑀭𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀢𑀺𑀢𑁆𑀣𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀢𑀺𑀢𑁆𑀣𑀺𑀬𑀲𑀸𑀯𑀓𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀅𑀲𑁆𑀲𑀫𑀡𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑁋 ‘𑀬𑀁𑀦𑀽𑀦𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑀘𑁆𑀘𑀓𑁆𑀔𑀸𑀢𑀸.

‘‘𑀅𑀣 𑀯𑀸 𑀧𑀦 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑁋 ‘𑀬𑀁𑀦𑀽𑀦𑀸𑀳𑀁 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… 𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀁… 𑀬𑀁𑀦𑀽𑀦𑀸𑀳𑀁 𑀲𑀺𑀓𑁆𑀔𑀁… 𑀬𑀁𑀦𑀽𑀦𑀸𑀳𑀁 𑀯𑀺𑀦𑀬𑀁… 𑀬𑀁𑀦𑀽𑀦𑀸𑀳𑀁 𑀧𑀸𑀢𑀺𑀫𑁄𑀓𑁆𑀔𑀁… 𑀬𑀁𑀦𑀽𑀦𑀸𑀳𑀁 𑀉𑀤𑁆𑀤𑁂𑀲𑀁… 𑀬𑀁𑀦𑀽𑀦𑀸𑀳𑀁 𑀉𑀧𑀚𑁆𑀛𑀸𑀬𑀁… 𑀬𑀁𑀦𑀽𑀦𑀸𑀳𑀁 𑀆𑀘𑀭𑀺𑀬𑀁… 𑀬𑀁𑀦𑀽𑀦𑀸𑀳𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁… 𑀬𑀁𑀦𑀽𑀦𑀸𑀳𑀁 𑀅𑀦𑁆𑀢𑁂𑀯𑀸𑀲𑀺𑀓𑀁… 𑀬𑀁𑀦𑀽𑀦𑀸𑀳𑀁 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀁… 𑀬𑀁𑀦𑀽𑀦𑀸𑀳𑀁 𑀲𑀫𑀸𑀦𑀸𑀘𑀭𑀺𑀬𑀓𑀁 𑀬𑀁𑀦𑀽𑀦𑀸𑀳𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. ‘𑀬𑀁𑀦𑀽𑀦𑀸𑀳𑀁 𑀕𑀺𑀳𑀻 𑀅𑀲𑁆𑀲’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. ‘𑀬𑀁𑀦𑀽𑀦𑀸𑀳𑀁 𑀉𑀧𑀸𑀲𑀓𑁄 𑀅𑀲𑁆𑀲’𑀦𑁆𑀢𑀺… ‘𑀬𑀁𑀦𑀽𑀦𑀸𑀳𑀁 𑀆𑀭𑀸𑀫𑀺𑀓𑁄 𑀅𑀲𑁆𑀲’𑀦𑁆𑀢𑀺… ‘𑀬𑀁𑀦𑀽𑀦𑀸𑀳𑀁 𑀲𑀸𑀫𑀡𑁂𑀭𑁄 𑀅𑀲𑁆𑀲’𑀦𑁆𑀢𑀺… ‘𑀬𑀁𑀦𑀽𑀦𑀸𑀳𑀁 𑀢𑀺𑀢𑁆𑀣𑀺𑀬𑁄 𑀅𑀲𑁆𑀲’𑀦𑁆𑀢𑀺… ‘𑀬𑀁𑀦𑀽𑀦𑀸𑀳𑀁 𑀢𑀺𑀢𑁆𑀣𑀺𑀬𑀲𑀸𑀯𑀓𑁄 𑀅𑀲𑁆𑀲’𑀦𑁆𑀢𑀺… ‘𑀬𑀁𑀦𑀽𑀦𑀸𑀳𑀁 𑀅𑀲𑁆𑀲𑀫𑀡𑁄 𑀅𑀲𑁆𑀲’𑀦𑁆𑀢𑀺… ‘𑀬𑀁𑀦𑀽𑀦𑀸𑀳𑀁 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀅𑀲𑁆𑀲’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑀘𑁆𑀘𑀓𑁆𑀔𑀸𑀢𑀸.

𑁪𑁬. ‘‘𑀅𑀣 𑀯𑀸 𑀧𑀦 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑁋 ‘𑀬𑀤𑀺 𑀧𑀦𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀬𑀤𑀺 𑀧𑀦𑀸𑀳𑀁 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀅𑀲𑁆𑀲’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀅𑀧𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀅𑀧𑀸𑀳𑀁 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀅𑀲𑁆𑀲’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀳𑀦𑁆𑀤𑀸𑀳𑀁 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀳𑀦𑁆𑀤𑀸𑀳𑀁 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀅𑀲𑁆𑀲’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀳𑁄𑀢𑀺 𑀫𑁂 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑁂𑀬𑁆𑀬’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀳𑁄𑀢𑀺 𑀫𑁂 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄 𑀅𑀲𑁆𑀲’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑀘𑁆𑀘𑀓𑁆𑀔𑀸𑀢𑀸.

𑁪𑁭. ‘‘𑀅𑀣 𑀯𑀸 𑀧𑀦 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 ‘𑀫𑀸𑀢𑀭𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀺𑀢𑀭𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀪𑀸𑀢𑀭𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀪𑀕𑀺𑀦𑀺𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀼𑀢𑁆𑀢𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀥𑀻𑀢𑀭𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀚𑀸𑀧𑀢𑀺𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀜𑀸𑀢𑀓𑁂 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀫𑀺𑀢𑁆𑀢𑁂 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀕𑀸𑀫𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀦𑀺𑀕𑀫𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀔𑁂𑀢𑁆𑀢𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀯𑀢𑁆𑀣𑀼𑀁 𑀲𑀭𑀸𑀫𑀺’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀳𑀺𑀭𑀜𑁆𑀜𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀼𑀯𑀡𑁆𑀡𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀺𑀧𑁆𑀧𑀁 𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀼𑀩𑁆𑀩𑁂 𑀳𑀲𑀺𑀢𑀁 𑀮𑀧𑀺𑀢𑀁 𑀓𑀻𑀴𑀺𑀢𑀁 𑀲𑀫𑀦𑀼𑀲𑁆𑀲𑀭𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑀘𑁆𑀘𑀓𑁆𑀔𑀸𑀢𑀸.

𑁪𑁮. ‘‘𑀅𑀣 𑀯𑀸 𑀧𑀦 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑁋 ‘𑀫𑀸𑀢𑀸 𑀫𑁂 𑀅𑀢𑁆𑀣𑀺, 𑀲𑀸 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀺𑀢𑀸 𑀫𑁂 𑀅𑀢𑁆𑀣𑀺, 𑀲𑁄 𑀫𑀬𑀸 𑀧𑁄𑀲𑁂𑀢𑀩𑁆𑀩𑁄’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀪𑀸𑀢𑀸 𑀫𑁂 𑀅𑀢𑁆𑀣𑀺, 𑀲𑁄 𑀫𑀬𑀸 𑀧𑁄𑀲𑁂𑀢𑀩𑁆𑀩𑁄’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀪𑀕𑀺𑀦𑀻 𑀫𑁂 𑀅𑀢𑁆𑀣𑀺, 𑀲𑀸 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀼𑀢𑁆𑀢𑁄 𑀫𑁂 𑀅𑀢𑁆𑀣𑀺, 𑀲𑁄 𑀫𑀬𑀸 𑀧𑁄𑀲𑁂𑀢𑀩𑁆𑀩𑁄’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀥𑀻𑀢𑀸 𑀫𑁂 𑀅𑀢𑁆𑀣𑀺, 𑀲𑀸 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀚𑀸𑀧𑀢𑀺 𑀫𑁂 𑀅𑀢𑁆𑀣𑀺, 𑀲𑀸 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺 … ‘𑀜𑀸𑀢𑀓𑀸 𑀫𑁂 𑀅𑀢𑁆𑀣𑀺, 𑀢𑁂 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀫𑀺𑀢𑁆𑀢𑀸 𑀫𑁂 𑀅𑀢𑁆𑀣𑀺, 𑀢𑁂 𑀫𑀬𑀸 𑀧𑁄𑀲𑁂𑀢𑀩𑁆𑀩𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑀘𑁆𑀘𑀓𑁆𑀔𑀸𑀢𑀸.

𑁪𑁯. ‘‘𑀅𑀣 𑀯𑀸 𑀧𑀦 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑁋 ‘𑀫𑀸𑀢𑀸 𑀫𑁂 𑀅𑀢𑁆𑀣𑀺, 𑀲𑀸 𑀫𑀁 𑀧𑁄𑀲𑁂𑀲𑁆𑀲𑀢𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀺𑀢𑀸 𑀫𑁂 𑀅𑀢𑁆𑀣𑀺, 𑀲𑁄 𑀫𑀁 𑀧𑁄𑀲𑁂𑀲𑁆𑀲𑀢𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀪𑀸𑀢𑀸 𑀫𑁂 𑀅𑀢𑁆𑀣𑀺, 𑀲𑁄 𑀫𑀁 𑀧𑁄𑀲𑁂𑀲𑁆𑀲𑀢𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀪𑀕𑀺𑀦𑀻 𑀫𑁂 𑀅𑀢𑁆𑀣𑀺, 𑀲𑀸 𑀫𑀁 𑀧𑁄𑀲𑁂𑀲𑁆𑀲𑀢𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀼𑀢𑁆𑀢𑁄 𑀫𑁂 𑀅𑀢𑁆𑀣𑀺, 𑀲𑁄 𑀫𑀁 𑀧𑁄𑀲𑁂𑀲𑁆𑀲𑀢𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀥𑀻𑀢𑀸 𑀫𑁂 𑀅𑀢𑁆𑀣𑀺, 𑀲𑀸 𑀫𑀁 𑀧𑁄𑀲𑁂𑀲𑁆𑀲𑀢𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀚𑀸𑀧𑀢𑀺 𑀫𑁂 𑀅𑀢𑁆𑀣𑀺, 𑀲𑀸 𑀫𑀁 𑀧𑁄𑀲𑁂𑀲𑁆𑀲𑀢𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀜𑀸𑀢𑀓𑀸 𑀫𑁂 𑀅𑀢𑁆𑀣𑀺, 𑀢𑁂 𑀫𑀁 𑀧𑁄𑀲𑁂𑀲𑁆𑀲𑀦𑁆𑀢𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀫𑀺𑀢𑁆𑀢𑀸 𑀫𑁂 𑀅𑀢𑁆𑀣𑀺, 𑀢𑁂 𑀫𑀁 𑀧𑁄𑀲𑁂𑀲𑁆𑀲𑀦𑁆𑀢𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀕𑀸𑀫𑁄 𑀫𑁂 𑀅𑀢𑁆𑀣𑀺, 𑀢𑁂𑀦𑀸𑀳𑀁 𑀚𑀻𑀯𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀦𑀺𑀕𑀫𑁄 𑀫𑁂 𑀅𑀢𑁆𑀣𑀺, 𑀢𑁂𑀦𑀸𑀳𑀁 𑀚𑀻𑀯𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀔𑁂𑀢𑁆𑀢𑀁 𑀫𑁂 𑀅𑀢𑁆𑀣𑀺, 𑀢𑁂𑀦𑀸𑀳𑀁 𑀚𑀻𑀯𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀯𑀢𑁆𑀣𑀼 𑀫𑁂 𑀅𑀢𑁆𑀣𑀺, 𑀢𑁂𑀦𑀸𑀳𑀁 𑀚𑀻𑀯𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀳𑀺𑀭𑀜𑁆𑀜𑀁 𑀫𑁂 𑀅𑀢𑁆𑀣𑀺, 𑀢𑁂𑀦𑀸𑀳𑀁 𑀚𑀻𑀯𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀼𑀯𑀡𑁆𑀡𑀁 𑀫𑁂 𑀅𑀢𑁆𑀣𑀺, 𑀢𑁂𑀦𑀸𑀳𑀁 𑀚𑀻𑀯𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀺𑀧𑁆𑀧𑀁 𑀫𑁂 𑀅𑀢𑁆𑀣𑀺, 𑀢𑁂𑀦𑀸𑀳𑀁 𑀚𑀻𑀯𑀺𑀲𑁆𑀲𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑀘𑁆𑀘𑀓𑁆𑀔𑀸𑀢𑀸.

𑁫𑁦. ‘‘𑀅𑀣 𑀯𑀸 𑀧𑀦 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 ‘𑀤𑀼𑀓𑁆𑀓𑀭’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀦 𑀲𑀼𑀓𑀭’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀤𑀼𑀘𑁆𑀘𑀭’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀦 𑀲𑀼𑀘𑀭’𑀦𑁆𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀦 𑀉𑀲𑁆𑀲𑀳𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀦 𑀯𑀺𑀲𑀳𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀦 𑀭𑀫𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀦𑀸𑀪𑀺𑀭𑀫𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀅𑀧𑀘𑁆𑀘𑀓𑁆𑀔𑀸𑀢𑀸.

𑁫𑁧. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀧𑀘𑁆𑀘𑀓𑁆𑀔𑀸𑀢𑀸? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑁋 ‘𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀧𑀘𑁆𑀘𑀓𑁆𑀔𑀸𑀢𑀸.

‘‘𑀅𑀣 𑀯𑀸 𑀧𑀦 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑁋 ‘𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀗𑁆𑀖𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀯𑀺𑀦𑀬𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀧𑀸𑀢𑀺𑀫𑁄𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀉𑀤𑁆𑀤𑁂𑀲𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀉𑀧𑀚𑁆𑀛𑀸𑀬𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀆𑀘𑀭𑀺𑀬𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀅𑀦𑁆𑀢𑁂𑀯𑀸𑀲𑀺𑀓𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀫𑀸𑀦𑀸𑀘𑀭𑀺𑀬𑀓𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀘𑁆𑀘𑀓𑁆𑀔𑀸𑀫𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀕𑀺𑀳𑀻𑀢𑀺 𑀫𑀁 𑀥𑀸𑀭𑁂𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀉𑀧𑀸𑀲𑀓𑁄𑀢𑀺 𑀫𑀁 𑀥𑀸𑀭𑁂𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀆𑀭𑀸𑀫𑀺𑀓𑁄𑀢𑀺 𑀫𑀁 𑀥𑀸𑀭𑁂𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀸𑀫𑀡𑁂𑀭𑁄𑀢𑀺 𑀫𑀁 𑀥𑀸𑀭𑁂𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀢𑀺𑀢𑁆𑀣𑀺𑀬𑁄𑀢𑀺 𑀫𑀁 𑀥𑀸𑀭𑁂𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀢𑀺𑀢𑁆𑀣𑀺𑀬𑀲𑀸𑀯𑀓𑁄𑀢𑀺 𑀫𑀁 𑀥𑀸𑀭𑁂𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀅𑀲𑁆𑀲𑀫𑀡𑁄𑀢𑀺 𑀫𑀁 𑀥𑀸𑀭𑁂𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀢𑀺 𑀫𑀁 𑀥𑀸𑀭𑁂𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀧𑀘𑁆𑀘𑀓𑁆𑀔𑀸𑀢𑀸.

𑁫𑁨. ‘‘𑀅𑀣 𑀯𑀸 𑀧𑀦 𑀉𑀓𑁆𑀓𑀡𑁆𑀞𑀺𑀢𑁄 𑀅𑀦𑀪𑀺𑀭𑀢𑁄 𑀲𑀸𑀫𑀜𑁆𑀜𑀸 𑀘𑀯𑀺𑀢𑀼𑀓𑀸𑀫𑁄 𑀪𑀺𑀓𑁆𑀔𑀼𑀪𑀸𑀯𑀁 𑀅𑀝𑁆𑀝𑀻𑀬𑀫𑀸𑀦𑁄 𑀳𑀭𑀸𑀬𑀫𑀸𑀦𑁄 𑀚𑀺𑀕𑀼𑀘𑁆𑀙𑀫𑀸𑀦𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄…𑀧𑁂… 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑁋 ‘𑀅𑀮𑀁 𑀫𑁂 𑀩𑀼𑀤𑁆𑀥𑁂𑀦𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀅𑀮𑀁 𑀫𑁂 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺…𑀧𑁂… 𑀅𑀣 𑀯𑀸 𑀧𑀦…𑀧𑁂… ‘𑀓𑀺𑀁 𑀦𑀼 𑀫𑁂 𑀩𑀼𑀤𑁆𑀥𑁂𑀦𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀓𑀺𑀁 𑀦𑀼 𑀫𑁂 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀦 𑀫𑀫𑀢𑁆𑀣𑁄 𑀩𑀼𑀤𑁆𑀥𑁂𑀦𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀦 𑀫𑀫𑀢𑁆𑀣𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺… ‘𑀲𑀼𑀫𑀼𑀢𑁆𑀢𑀸𑀳𑀁 𑀩𑀼𑀤𑁆𑀥𑁂𑀦𑀸’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺…𑀧𑁂… ‘𑀲𑀼𑀫𑀼𑀢𑁆𑀢𑀸𑀳𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀻’𑀢𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀧𑀘𑁆𑀘𑀓𑁆𑀔𑀸𑀢𑀸.

𑁫𑁩. ‘‘𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀩𑀼𑀤𑁆𑀥𑀯𑁂𑀯𑀘𑀦𑀸𑀦𑀺 𑀯𑀸 𑀥𑀫𑁆𑀫𑀯𑁂𑀯𑀘𑀦𑀸𑀦𑀺 𑀯𑀸 𑀲𑀗𑁆𑀖𑀯𑁂𑀯𑀘𑀦𑀸𑀦𑀺 𑀯𑀸 𑀲𑀺𑀓𑁆𑀔𑀸𑀯𑁂𑀯𑀘𑀦𑀸𑀦𑀺 𑀯𑀸 𑀯𑀺𑀦𑀬𑀯𑁂𑀯𑀘𑀦𑀸𑀦𑀺 𑀯𑀸 𑀧𑀸𑀢𑀺𑀫𑁄𑀓𑁆𑀔𑀯𑁂𑀯𑀘𑀦𑀸𑀦𑀺 𑀯𑀸 𑀉𑀤𑁆𑀤𑁂𑀲𑀯𑁂𑀯𑀘𑀦𑀸𑀦𑀺 𑀯𑀸 𑀉𑀧𑀚𑁆𑀛𑀸𑀬𑀯𑁂𑀯𑀘𑀦𑀸𑀦𑀺 𑀯𑀸 𑀆𑀘𑀭𑀺𑀬𑀯𑁂𑀯𑀘𑀦𑀸𑀦𑀺 𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀯𑁂𑀯𑀘𑀦𑀸𑀦𑀺 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀯𑁂𑀯𑀘𑀦𑀸𑀦𑀺 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀯𑁂𑀯𑀘𑀦𑀸𑀦𑀺 𑀯𑀸 𑀲𑀫𑀸𑀦𑀸𑀘𑀭𑀺𑀬𑀓𑀯𑁂𑀯𑀘𑀦𑀸𑀦𑀺 𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀺𑀯𑁂𑀯𑀘𑀦𑀸𑀦𑀺 𑀯𑀸 𑀕𑀺𑀳𑀺𑀯𑁂𑀯𑀘𑀦𑀸𑀦𑀺 𑀯𑀸 𑀉𑀧𑀸𑀲𑀓𑀯𑁂𑀯𑀘𑀦𑀸𑀦𑀺 𑀯𑀸 𑀆𑀭𑀸𑀫𑀺𑀓𑀯𑁂𑀯𑀘𑀦𑀸𑀦𑀺 𑀯𑀸 𑀲𑀸𑀫𑀡𑁂𑀭𑀯𑁂𑀯𑀘𑀦𑀸𑀦𑀺 𑀯𑀸 𑀢𑀺𑀢𑁆𑀣𑀺𑀬𑀯𑁂𑀯𑀘𑀦𑀸𑀦𑀺 𑀯𑀸 𑀢𑀺𑀢𑁆𑀣𑀺𑀬𑀲𑀸𑀯𑀓𑀯𑁂𑀯𑀘𑀦𑀸𑀦𑀺 𑀯𑀸 𑀅𑀲𑁆𑀲𑀫𑀡𑀯𑁂𑀯𑀘𑀦𑀸𑀦𑀺 𑀯𑀸 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀯𑁂𑀯𑀘𑀦𑀸𑀦𑀺 𑀯𑀸, 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀼𑀩𑁆𑀩𑀮𑁆𑀬𑀸𑀯𑀺𑀓𑀫𑁆𑀫𑀜𑁆𑀘𑁂𑀯 𑀳𑁄𑀢𑀺 𑀲𑀺𑀓𑁆𑀔𑀸 𑀘 𑀧𑀘𑁆𑀘𑀓𑁆𑀔𑀸𑀢𑀸.

𑁫𑁪. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸? 𑀇𑀥, 𑀪𑀺𑀓𑁆𑀔𑀯𑁂, 𑀬𑁂𑀳𑀺 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀲𑀺𑀓𑁆𑀔𑀸 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀉𑀫𑁆𑀫𑀢𑁆𑀢𑀓𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀉𑀫𑁆𑀫𑀢𑁆𑀢𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀔𑀺𑀢𑁆𑀢𑀘𑀺𑀢𑁆𑀢𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀯𑁂𑀤𑀦𑀸𑀝𑁆𑀝𑁄 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀯𑁂𑀤𑀦𑀸𑀝𑁆𑀝𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀤𑁂𑀯𑀢𑀸𑀬 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀭𑀺𑀬𑀓𑁂𑀦 𑀫𑀺𑀮𑀓𑁆𑀔𑀲𑁆𑀲 [𑀫𑀺𑀮𑀓𑁆𑀔𑀓𑀲𑁆𑀲 (𑀲𑀻. 𑀲𑁆𑀬𑀸.) 𑀫𑀺𑀮𑀓𑁆𑀔𑀼𑀲𑁆𑀲 (𑀓.)] 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀘 𑀦 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀫𑀺𑀮𑀓𑁆𑀔𑀓𑁂𑀦 𑀅𑀭𑀺𑀬𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀘 𑀦 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀭𑀺𑀬𑀓𑁂𑀦 𑀅𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀘 𑀦 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀫𑀺𑀮𑀓𑁆𑀔𑀓𑁂𑀦 𑀫𑀺𑀮𑀓𑁆𑀔𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀲𑁄 𑀘 𑀦 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀤𑀯𑀸𑀬 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀭𑀯𑀸𑀬 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀲𑀸𑀯𑁂𑀢𑀼𑀓𑀸𑀫𑁄 𑀲𑀸𑀯𑁂𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀲𑀸𑀯𑁂𑀢𑀼𑀓𑀸𑀫𑁄 𑀦 𑀲𑀸𑀯𑁂𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀅𑀯𑀺𑀜𑁆𑀜𑀼𑀲𑁆𑀲 𑀲𑀸𑀯𑁂𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀯𑀺𑀜𑁆𑀜𑀼𑀲𑁆𑀲 𑀦 𑀲𑀸𑀯𑁂𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀲𑀩𑁆𑀩𑀲𑁄 𑀯𑀸 𑀧𑀦 𑀦 𑀲𑀸𑀯𑁂𑀢𑀺, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀢𑀺 𑀲𑀺𑀓𑁆𑀔𑀸’’.

𑁫𑁫. [𑀫𑀳𑀸𑀦𑀺. 𑁪𑁯, 𑁫𑁦, 𑁫𑁧] 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫 𑀬𑁄 𑀲𑁄 𑀅𑀲𑀤𑁆𑀥𑀫𑁆𑀫𑁄 𑀕𑀸𑀫𑀥𑀫𑁆𑀫𑁄 𑀯𑀲𑀮𑀥𑀫𑁆𑀫𑁄 𑀤𑀼𑀝𑁆𑀞𑀼𑀮𑁆𑀮𑀁 𑀑𑀤𑀓𑀦𑁆𑀢𑀺𑀓𑀁 𑀭𑀳𑀲𑁆𑀲𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺, 𑀏𑀲𑁄 𑀫𑁂𑀣𑀼𑀦𑀥𑀫𑁆𑀫𑁄 𑀦𑀸𑀫.

𑀧𑀝𑀺𑀲𑁂𑀯𑀢𑀺 𑀦𑀸𑀫 𑀬𑁄 𑀦𑀺𑀫𑀺𑀢𑁆𑀢𑁂𑀦 𑀦𑀺𑀫𑀺𑀢𑁆𑀢𑀁 𑀅𑀗𑁆𑀕𑀚𑀸𑀢𑁂𑀦 𑀅𑀗𑁆𑀕𑀚𑀸𑀢𑀁 𑀅𑀦𑁆𑀢𑀫𑀲𑁄 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀧𑀯𑁂𑀲𑁂𑀢𑀺, 𑀏𑀲𑁄 𑀧𑀝𑀺𑀲𑁂𑀯𑀢𑀺 𑀦𑀸𑀫.

𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸𑀧𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄, 𑀧𑀕𑁂𑀯 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀸𑀬𑀧𑀻’𑀢𑀺.

𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀺𑀲𑁄 𑀲𑀻𑀲𑀘𑁆𑀙𑀺𑀦𑁆𑀦𑁄 𑀅𑀪𑀩𑁆𑀩𑁄 𑀢𑁂𑀦 𑀲𑀭𑀻𑀭𑀩𑀦𑁆𑀥𑀦𑁂𑀦 𑀚𑀻𑀯𑀺𑀢𑀼𑀁, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’𑀢𑀺.

𑀅𑀲𑀁𑀯𑀸𑀲𑁄𑀢𑀺 𑀲𑀁𑀯𑀸𑀲𑁄 𑀦𑀸𑀫 𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸 𑁋 𑀏𑀲𑁄 𑀲𑀁𑀯𑀸𑀲𑁄 𑀦𑀸𑀫. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀅𑀲𑀁𑀯𑀸𑀲𑁄’𑀢𑀺.

𑁫𑁬. 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄 𑁋 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀅𑀫𑀦𑀼𑀲𑁆𑀲𑀺𑀢𑁆𑀣𑀻, 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻. 𑀢𑀬𑁄 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑁋 𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑁄, 𑀅𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑁄, 𑀢𑀺𑀭𑀘𑁆𑀙𑀸𑀦𑀕𑀢𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑁄. 𑀢𑀬𑁄 𑀧𑀡𑁆𑀟𑀓𑀸 𑁋 𑀫𑀦𑀼𑀲𑁆𑀲𑀧𑀡𑁆𑀟𑀓𑁄, 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑁄, 𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑁄. 𑀢𑀬𑁄 𑀧𑀼𑀭𑀺𑀲𑀸 𑁋 𑀫𑀦𑀼𑀲𑁆𑀲𑀧𑀼𑀭𑀺𑀲𑁄, 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑁄, 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑁄.

𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀯𑀘𑁆𑀘𑀫𑀕𑁆𑀕𑁂, 𑀧𑀲𑁆𑀲𑀸𑀯𑀫𑀕𑁆𑀕𑁂, 𑀫𑀼𑀔𑁂. 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸…𑀧𑁂… 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀯𑀘𑁆𑀘𑀫𑀕𑁆𑀕𑁂, 𑀧𑀲𑁆𑀲𑀸𑀯𑀫𑀕𑁆𑀕𑁂, 𑀫𑀼𑀔𑁂. 𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀅𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀢𑀬𑁄 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀯𑀘𑁆𑀘𑀫𑀕𑁆𑀕𑁂, 𑀧𑀲𑁆𑀲𑀸𑀯𑀫𑀕𑁆𑀕𑁂, 𑀫𑀼𑀔𑁂. 𑀫𑀦𑀼𑀲𑁆𑀲𑀧𑀡𑁆𑀟𑀓𑀲𑁆𑀲 𑀤𑁆𑀯𑁂 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀯𑀘𑁆𑀘𑀫𑀕𑁆𑀕𑁂, 𑀫𑀼𑀔𑁂. 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑀲𑁆𑀲… 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲… 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀯𑀘𑁆𑀘𑀫𑀕𑁆𑀕𑁂, 𑀫𑀼𑀔𑁂.

𑁫𑁭. 𑀪𑀺𑀓𑁆𑀔𑀼𑀲𑁆𑀲 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀪𑀺𑀓𑁆𑀔𑀼𑀲𑁆𑀲 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀧𑀲𑁆𑀲𑀸𑀯𑀫𑀕𑁆𑀕𑀁… 𑀫𑀼𑀔𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀪𑀺𑀓𑁆𑀔𑀼𑀲𑁆𑀲 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸… 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸… 𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀅𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀫𑀼𑀔𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀪𑀺𑀓𑁆𑀔𑀼𑀲𑁆𑀲 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂 𑀫𑀦𑀼𑀲𑁆𑀲𑀧𑀡𑁆𑀟𑀓𑀲𑁆𑀲 𑀯𑀘𑁆𑀘𑀫𑀕𑁆𑀕𑀁 𑀫𑀼𑀔𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀪𑀺𑀓𑁆𑀔𑀼𑀲𑁆𑀲 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀺𑀢𑁂 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑀲𑁆𑀲… 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲… 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀲𑁆𑀲 𑀯𑀘𑁆𑀘𑀫𑀕𑁆𑀕𑀁 𑀫𑀼𑀔𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑁫𑁮. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺 [𑀧𑀯𑀺𑀲𑀦𑀁 𑀲𑀸𑀤𑀬𑀢𑀺 (𑀓.)], 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀦 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀦 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀦 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀦 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀦 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀦 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀦 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀦 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀦 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀧𑀲𑁆𑀲𑀸𑀯𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑁫𑁯. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀚𑀸𑀕𑀭𑀦𑁆𑀢𑀺𑀁… 𑀲𑀼𑀢𑁆𑀢𑀁… 𑀫𑀢𑁆𑀢𑀁… 𑀉𑀫𑁆𑀫𑀢𑁆𑀢𑀁… 𑀧𑀫𑀢𑁆𑀢𑀁… 𑀫𑀢𑀁 𑀅𑀓𑁆𑀔𑀸𑀬𑀺𑀢𑀁… 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀁…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀧𑀲𑁆𑀲𑀸𑀯𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀁… 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀁… 𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀁… 𑀅𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀁… 𑀢𑀺𑀭𑀘𑁆𑀙𑀸𑀦𑀕𑀢𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀧𑀲𑁆𑀲𑀸𑀯𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀢𑀺𑀭𑀘𑁆𑀙𑀸𑀦𑀕𑀢𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀁 𑀚𑀸𑀕𑀭𑀦𑁆𑀢𑀁… 𑀲𑀼𑀢𑁆𑀢𑀁… 𑀫𑀢𑁆𑀢𑀁… 𑀉𑀫𑁆𑀫𑀢𑁆𑀢𑀁… 𑀧𑀫𑀢𑁆𑀢𑀁… 𑀫𑀢𑀁 𑀅𑀓𑁆𑀔𑀸𑀬𑀺𑀢𑀁… 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀁…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀧𑀲𑁆𑀲𑀸𑀯𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀧𑀡𑁆𑀟𑀓𑀁… 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑀁… 𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑀁 𑀚𑀸𑀕𑀭𑀦𑁆𑀢𑀁… 𑀲𑀼𑀢𑁆𑀢𑀁… 𑀫𑀢𑁆𑀢𑀁… 𑀉𑀫𑁆𑀫𑀢𑁆𑀢𑀁… 𑀧𑀫𑀢𑁆𑀢𑀁… 𑀫𑀢𑀁 𑀅𑀓𑁆𑀔𑀸𑀬𑀺𑀢𑀁 … 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀁…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑁬𑁦. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀧𑀼𑀭𑀺𑀲𑀁… 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀁… 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀁 𑀚𑀸𑀕𑀭𑀦𑁆𑀢𑀁… 𑀲𑀼𑀢𑁆𑀢𑀁… 𑀫𑀢𑁆𑀢𑀁… 𑀉𑀫𑁆𑀫𑀢𑁆𑀢𑀁… 𑀧𑀫𑀢𑁆𑀢𑀁… 𑀫𑀢𑀁 𑀅𑀓𑁆𑀔𑀸𑀬𑀺𑀢𑀁… 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀁…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑁬𑁧. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀧𑀲𑁆𑀲𑀸𑀯𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀸𑀬 𑀅𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀸𑀬 𑀲𑀦𑁆𑀣𑀢𑀲𑁆𑀲, 𑀲𑀦𑁆𑀣𑀢𑀸𑀬 𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀸𑀬 𑀅𑀲𑀦𑁆𑀣𑀢𑀲𑁆𑀲. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀺𑀢𑁆𑀣𑀺𑀁 𑀚𑀸𑀕𑀭𑀦𑁆𑀢𑀺𑀁… 𑀲𑀼𑀢𑁆𑀢𑀁… 𑀫𑀢𑁆𑀢𑀁… 𑀉𑀫𑁆𑀫𑀢𑁆𑀢𑀁… 𑀧𑀫𑀢𑁆𑀢𑀁… 𑀫𑀢𑀁 𑀅𑀓𑁆𑀔𑀸𑀬𑀺𑀢𑀁… 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀁…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀧𑀲𑁆𑀲𑀸𑀯𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺, 𑀲𑀦𑁆𑀣𑀢𑀸𑀬 𑀅𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀸𑀬 𑀲𑀦𑁆𑀣𑀢𑀲𑁆𑀲, 𑀲𑀦𑁆𑀣𑀢𑀸𑀬 𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀸𑀬 𑀅𑀲𑀦𑁆𑀣𑀢𑀲𑁆𑀲. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀁… 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀁… 𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀁… 𑀅𑀫𑀦𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀁 … 𑀢𑀺𑀭𑀘𑁆𑀙𑀸𑀦𑀕𑀢𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀧𑀲𑁆𑀲𑀸𑀯𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀢𑀺𑀭𑀘𑁆𑀙𑀸𑀦𑀕𑀢𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀁 𑀚𑀸𑀕𑀭𑀦𑁆𑀢𑀁… 𑀲𑀼𑀢𑁆𑀢𑀁… 𑀫𑀢𑁆𑀢𑀁… 𑀉𑀫𑁆𑀫𑀢𑁆𑀢𑀁… 𑀧𑀫𑀢𑁆𑀢𑀁… 𑀫𑀢𑀁 𑀅𑀓𑁆𑀔𑀸𑀬𑀺𑀢𑀁… 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀁…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀧𑀲𑁆𑀲𑀸𑀯𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺, 𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑁬𑁨. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀫𑀦𑀼𑀲𑁆𑀲𑀧𑀡𑁆𑀟𑀓𑀁… 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑀁… 𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑀁… 𑀫𑀦𑀼𑀲𑁆𑀲𑀧𑀼𑀭𑀺𑀲𑀁… 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀁… 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀁 𑀚𑀸𑀕𑀭𑀦𑁆𑀢𑀁… 𑀲𑀼𑀢𑁆𑀢𑀁… 𑀫𑀢𑁆𑀢𑀁… 𑀉𑀫𑁆𑀫𑀢𑁆𑀢𑀁… 𑀧𑀫𑀢𑁆𑀢𑀁… 𑀫𑀢𑀁 𑀅𑀓𑁆𑀔𑀸𑀬𑀺𑀢𑀁… 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀁…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀁 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀯𑀘𑁆𑀘𑀫𑀕𑁆𑀕𑁂𑀦… 𑀫𑀼𑀔𑁂𑀦 𑀅𑀗𑁆𑀕𑀚𑀸𑀢𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺, 𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲. 𑀲𑁄 𑀘 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑁬𑁩. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀅𑀗𑁆𑀕𑀚𑀸𑀢𑁂𑀦 𑀯𑀘𑁆𑀘𑀫𑀕𑁆𑀕𑀁… 𑀧𑀲𑁆𑀲𑀸𑀯𑀫𑀕𑁆𑀕𑀁… 𑀫𑀼𑀔𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀚𑀸𑀕𑀭𑀦𑁆𑀢𑀺𑀬𑀸… 𑀲𑀼𑀢𑁆𑀢𑀸𑀬… 𑀫𑀢𑁆𑀢𑀸𑀬… 𑀉𑀫𑁆𑀫𑀢𑁆𑀢𑀸𑀬… 𑀧𑀫𑀢𑁆𑀢𑀸𑀬 … 𑀫𑀢𑀸𑀬 𑀅𑀓𑁆𑀔𑀸𑀬𑀺𑀢𑀸𑀬… 𑀫𑀢𑀸𑀬 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀸𑀬…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀸𑀬 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀸𑀬 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀅𑀗𑁆𑀕𑀚𑀸𑀢𑁂𑀦 𑀯𑀘𑁆𑀘𑀫𑀕𑁆𑀕𑀁… 𑀧𑀲𑁆𑀲𑀸𑀯𑀫𑀕𑁆𑀕𑀁… 𑀫𑀼𑀔𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀁 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸… 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸… 𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀅𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀫𑀦𑀼𑀲𑁆𑀲𑀧𑀡𑁆𑀟𑀓𑀲𑁆𑀲… 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑀲𑁆𑀲… 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲… 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀅𑀗𑁆𑀕𑀚𑀸𑀢𑁂𑀦 𑀯𑀘𑁆𑀘𑀫𑀕𑁆𑀕𑀁… 𑀫𑀼𑀔𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀁 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀲𑁆𑀲 𑀚𑀸𑀕𑀭𑀦𑁆𑀢𑀲𑁆𑀲… 𑀲𑀼𑀢𑁆𑀢𑀲𑁆𑀲… 𑀫𑀢𑁆𑀢𑀲𑁆𑀲… 𑀉𑀫𑁆𑀫𑀢𑁆𑀢𑀲𑁆𑀲… 𑀧𑀫𑀢𑁆𑀢𑀲𑁆𑀲… 𑀫𑀢𑀲𑁆𑀲 𑀅𑀓𑁆𑀔𑀸𑀬𑀺𑀢𑀲𑁆𑀲… 𑀫𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀲𑁆𑀲…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀅𑀗𑁆𑀕𑀚𑀸𑀢𑁂𑀦 𑀯𑀘𑁆𑀘𑀫𑀕𑁆𑀕𑀁… 𑀫𑀼𑀔𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑁬𑁪. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀅𑀗𑁆𑀕𑀚𑀸𑀢𑁂𑀦 𑀯𑀘𑁆𑀘𑀫𑀕𑁆𑀕𑀁… 𑀧𑀲𑁆𑀲𑀸𑀯𑀫𑀕𑁆𑀕𑀁… 𑀫𑀼𑀔𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀸𑀬, 𑀅𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀸𑀬, 𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀸𑀬, 𑀅𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀸𑀬. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀚𑀸𑀕𑀭𑀦𑁆𑀢𑀺𑀬𑀸… 𑀲𑀼𑀢𑁆𑀢𑀸𑀬… 𑀫𑀢𑁆𑀢𑀸𑀬… 𑀉𑀫𑁆𑀫𑀢𑁆𑀢𑀸𑀬… 𑀧𑀫𑀢𑁆𑀢𑀸𑀬… 𑀫𑀢𑀸𑀬 𑀅𑀓𑁆𑀔𑀸𑀬𑀺𑀢𑀸𑀬… 𑀫𑀢𑀸𑀬 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀸𑀬…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀸𑀬 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀸𑀬 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀅𑀗𑁆𑀕𑀚𑀸𑀢𑁂𑀦 𑀯𑀘𑁆𑀘𑀫𑀕𑁆𑀕𑀁… 𑀧𑀲𑁆𑀲𑀸𑀯𑀫𑀕𑁆𑀕𑀁… 𑀫𑀼𑀔𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀸𑀬, 𑀅𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀸𑀬, 𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀸𑀬, 𑀅𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀸𑀬. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀁 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸… 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸… 𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀅𑀫𑀦𑀼𑀲𑁆𑀲𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀼𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲… 𑀫𑀦𑀼𑀲𑁆𑀲𑀧𑀡𑁆𑀟𑀓𑀲𑁆𑀲… 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑀲𑁆𑀲… 𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲… 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀲𑁆𑀲… 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀅𑀗𑁆𑀕𑀚𑀸𑀢𑁂𑀦 𑀯𑀘𑁆𑀘𑀫𑀕𑁆𑀕𑀁… 𑀫𑀼𑀔𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑁬𑁫. 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀪𑀺𑀓𑁆𑀔𑀼𑀁 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀲𑁆𑀲 𑀚𑀸𑀕𑀭𑀦𑁆𑀢𑀲𑁆𑀲… 𑀲𑀼𑀢𑁆𑀢𑀲𑁆𑀲… 𑀫𑀢𑁆𑀢𑀲𑁆𑀲… 𑀉𑀫𑁆𑀫𑀢𑁆𑀢𑀲𑁆𑀲… 𑀧𑀫𑀢𑁆𑀢𑀲𑁆𑀲… 𑀫𑀢𑀲𑁆𑀲 𑀅𑀓𑁆𑀔𑀸𑀬𑀺𑀢𑀲𑁆𑀲… 𑀫𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀅𑀓𑁆𑀔𑀸𑀬𑀺𑀢𑀲𑁆𑀲…𑀧𑁂… 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀦𑁂𑀢𑁆𑀯𑀸 𑀅𑀗𑁆𑀕𑀚𑀸𑀢𑁂𑀦 𑀯𑀘𑁆𑀘𑀫𑀕𑁆𑀕𑀁… 𑀫𑀼𑀔𑀁 𑀅𑀪𑀺𑀦𑀺𑀲𑀻𑀤𑁂𑀦𑁆𑀢𑀺 𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀲𑀦𑁆𑀣𑀢𑀲𑁆𑀲 𑀲𑀦𑁆𑀣𑀢𑀲𑁆𑀲, 𑀅𑀲𑀦𑁆𑀣𑀢𑀲𑁆𑀲 𑀅𑀲𑀦𑁆𑀣𑀢𑀲𑁆𑀲. 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂… 𑀦 𑀲𑀸𑀤𑀺𑀬𑀢𑀺, 𑀅𑀦𑀸𑀧𑀢𑁆𑀢𑀺.

𑀬𑀣𑀸 𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸 𑀯𑀺𑀢𑁆𑀣𑀸𑀭𑀺𑀢𑀸, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑀭𑀸𑀚𑀧𑀘𑁆𑀘𑀢𑁆𑀣𑀺𑀓𑀸… 𑀘𑁄𑀭𑀧𑀘𑁆𑀘𑀢𑁆𑀣𑀺𑀓𑀸… 𑀥𑀼𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸… 𑀉𑀧𑁆𑀧𑀴𑀕𑀦𑁆𑀥𑀧𑀘𑁆𑀘𑀢𑁆𑀣𑀺𑀓𑀸. 𑀲𑀁𑀔𑀺𑀢𑁆𑀢𑀁.

𑁬𑁬. 𑀫𑀕𑁆𑀕𑁂𑀦 𑀫𑀕𑁆𑀕𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀕𑁆𑀕𑁂𑀦 𑀅𑀫𑀕𑁆𑀕𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀅𑀫𑀕𑁆𑀕𑁂𑀦 𑀫𑀕𑁆𑀕𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀅𑀫𑀕𑁆𑀕𑁂𑀦 𑀅𑀫𑀕𑁆𑀕𑀁 𑀧𑀯𑁂𑀲𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀪𑀺𑀓𑁆𑀔𑀼 𑀲𑀼𑀢𑁆𑀢𑀪𑀺𑀓𑁆𑀔𑀼𑀫𑁆𑀳𑀺 𑀯𑀺𑀧𑁆𑀧𑀝𑀺𑀧𑀚𑁆𑀚𑀢𑀺; 𑀧𑀝𑀺𑀩𑀼𑀤𑁆𑀥𑁄 𑀲𑀸𑀤𑀺𑀬𑀢𑀺, 𑀉𑀪𑁄 𑀦𑀸𑀲𑁂𑀢𑀩𑁆𑀩𑀸. 𑀧𑀝𑀺𑀩𑀼𑀤𑁆𑀥𑁄 𑀦 𑀲𑀸𑀤𑀺𑀬𑀢𑀺, 𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄. 𑀪𑀺𑀓𑁆𑀔𑀼 𑀲𑀼𑀢𑁆𑀢𑀲𑀸𑀫𑀡𑁂𑀭𑀫𑁆𑀳𑀺 𑀯𑀺𑀧𑁆𑀧𑀝𑀺𑀧𑀚𑁆𑀚𑀢𑀺; 𑀧𑀝𑀺𑀩𑀼𑀤𑁆𑀥𑁄 𑀲𑀸𑀤𑀺𑀬𑀢𑀺, 𑀉𑀪𑁄 𑀦𑀸𑀲𑁂𑀢𑀩𑁆𑀩𑀸. 𑀧𑀝𑀺𑀩𑀼𑀤𑁆𑀥𑁄 𑀦 𑀲𑀸𑀤𑀺𑀬𑀢𑀺, 𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄. 𑀲𑀸𑀫𑀡𑁂𑀭𑁄 𑀲𑀼𑀢𑁆𑀢𑀪𑀺𑀓𑁆𑀔𑀼𑀫𑁆𑀳𑀺 𑀯𑀺𑀧𑁆𑀧𑀝𑀺𑀧𑀚𑁆𑀚𑀢𑀺; 𑀧𑀝𑀺𑀩𑀼𑀤𑁆𑀥𑁄 𑀲𑀸𑀤𑀺𑀬𑀢𑀺, 𑀉𑀪𑁄 𑀦𑀸𑀲𑁂𑀢𑀩𑁆𑀩𑀸. 𑀧𑀝𑀺𑀩𑀼𑀤𑁆𑀥𑁄 𑀦 𑀲𑀸𑀤𑀺𑀬𑀢𑀺, 𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄. 𑀲𑀸𑀫𑀡𑁂𑀭𑁄 𑀲𑀼𑀢𑁆𑀢𑀲𑀸𑀫𑀡𑁂𑀭𑀫𑁆𑀳𑀺 𑀯𑀺𑀧𑁆𑀧𑀝𑀺𑀧𑀚𑁆𑀚𑀢𑀺; 𑀧𑀝𑀺𑀩𑀼𑀤𑁆𑀥𑁄 𑀲𑀸𑀤𑀺𑀬𑀢𑀺, 𑀉𑀪𑁄 𑀦𑀸𑀲𑁂𑀢𑀩𑁆𑀩𑀸. 𑀧𑀝𑀺𑀩𑀼𑀤𑁆𑀥𑁄 𑀦 𑀲𑀸𑀤𑀺𑀬𑀢𑀺, 𑀤𑀽𑀲𑀓𑁄 𑀦𑀸𑀲𑁂𑀢𑀩𑁆𑀩𑁄.

𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲, 𑀅𑀲𑀸𑀤𑀺𑀬𑀦𑁆𑀢𑀲𑁆𑀲, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲, 𑀯𑁂𑀤𑀦𑀸𑀝𑁆𑀝𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀲𑀦𑁆𑀣𑀢𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀯𑀺𑀦𑀻𑀢𑀯𑀢𑁆𑀣𑀼𑀉𑀤𑁆𑀤𑀸𑀦𑀕𑀸𑀣𑀸

𑀫𑀓𑁆𑀓𑀝𑀻 𑀯𑀚𑁆𑀚𑀺𑀧𑀼𑀢𑁆𑀢𑀸 𑀘, 𑀕𑀺𑀳𑀻 𑀦𑀕𑁆𑀕𑁄 𑀘 𑀢𑀺𑀢𑁆𑀣𑀺𑀬𑀸;

𑀤𑀸𑀭𑀺𑀓𑀼𑀧𑁆𑀧𑀮𑀯𑀡𑁆𑀡𑀸 𑀘, 𑀩𑁆𑀬𑀜𑁆𑀚𑀦𑁂𑀳𑀺𑀧𑀭𑁂 𑀤𑀼𑀯𑁂.

𑀫𑀸𑀢𑀸 𑀥𑀻𑀢𑀸 𑀪𑀕𑀺𑀦𑀻 𑀘, 𑀚𑀸𑀬𑀸 𑀘 𑀫𑀼𑀤𑀼 𑀮𑀫𑁆𑀩𑀺𑀦𑀸;

𑀤𑁆𑀯𑁂 𑀯𑀡𑀸 𑀮𑁂𑀧𑀘𑀺𑀢𑁆𑀢𑀜𑁆𑀘, 𑀤𑀸𑀭𑀼𑀥𑀻𑀢𑀮𑀺𑀓𑀸𑀬 𑀘.

𑀲𑀼𑀦𑁆𑀤𑀭𑁂𑀦 𑀲𑀳 𑀧𑀜𑁆𑀘, 𑀧𑀜𑁆𑀘 𑀲𑀺𑀯𑀣𑀺𑀓𑀝𑁆𑀞𑀺𑀓𑀸;

𑀦𑀸𑀕𑀻 𑀬𑀓𑁆𑀔𑀻 𑀘 𑀧𑁂𑀢𑀻 𑀘, 𑀧𑀡𑁆𑀟𑀓𑁄𑀧𑀳𑀢𑁄 𑀙𑀼𑀧𑁂.

𑀪𑀤𑁆𑀤𑀺𑀬𑁂 𑀅𑀭𑀳𑀁 𑀲𑀼𑀢𑁆𑀢𑁄, 𑀲𑀸𑀯𑀢𑁆𑀣𑀺𑀬𑀸 𑀘𑀢𑀼𑀭𑁄 𑀧𑀭𑁂;

𑀯𑁂𑀲𑀸𑀮𑀺𑀬𑀸 𑀢𑀬𑁄 𑀫𑀸𑀮𑀸, 𑀲𑀼𑀧𑀺𑀦𑁂 𑀪𑀸𑀭𑀼𑀓𑀘𑁆𑀙𑀓𑁄.

𑀲𑀼𑀧𑀩𑁆𑀩𑀸 𑀲𑀤𑁆𑀥𑀸 𑀪𑀺𑀓𑁆𑀔𑀼𑀦𑀻, 𑀲𑀺𑀓𑁆𑀔𑀫𑀸𑀦𑀸 𑀲𑀸𑀫𑀡𑁂𑀭𑀻 𑀘;

𑀯𑁂𑀲𑀺𑀬𑀸 𑀧𑀡𑁆𑀟𑀓𑁄 𑀕𑀺𑀳𑀻, 𑀅𑀜𑁆𑀜𑀫𑀜𑁆𑀜𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀫𑀺𑀕𑁄𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼

𑁬𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀓𑁆𑀓𑀝𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀓𑀘𑁆𑀘𑀺 𑀦𑀼 𑀔𑁄 𑀅𑀳𑀁 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀪𑀺𑀓𑁆𑀔𑀽 𑀲𑀺𑀓𑁆𑀔𑀁 𑀅𑀧𑀘𑁆𑀘𑀓𑁆𑀔𑀸𑀬 𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀁𑀲𑀼. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀓𑀘𑁆𑀘𑀺 𑀦𑀼 𑀔𑁄 𑀫𑀬𑀁 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀆𑀧𑀢𑁆𑀢𑀺𑀁 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀧𑀦𑁆𑀦𑀸 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑁋 ‘𑀏𑀯𑀁 𑀫𑁂 𑀅𑀦𑀸𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’𑀢𑀺, 𑀕𑀺𑀳𑀺𑀮𑀺𑀗𑁆𑀕𑁂𑀦 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀓𑀘𑁆𑀘𑀺 𑀦𑀼 𑀔𑁄 𑀅𑀳𑀁 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑁋 ‘𑀏𑀯𑀁 𑀫𑁂 𑀅𑀦𑀸𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’𑀢𑀺, 𑀦𑀕𑁆𑀕𑁄 𑀳𑀼𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑁋 ‘𑀏𑀯𑀁 𑀫𑁂 𑀅𑀦𑀸𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’𑀢𑀺, 𑀓𑀼𑀲𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸… 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸… 𑀨𑀮𑀓𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸… 𑀓𑁂𑀲𑀓𑀫𑁆𑀩𑀮𑀁 𑀦𑀺𑀯𑀸𑀲𑁂𑀢𑁆𑀯𑀸… 𑀯𑀸𑀮𑀓𑀫𑁆𑀩𑀮𑀁 𑀦𑀺𑀯𑀸𑀲𑁂𑀢𑁆𑀯𑀸… 𑀉𑀮𑀽𑀓𑀧𑀓𑁆𑀔𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸… 𑀅𑀚𑀺𑀦𑀓𑁆𑀔𑀺𑀧𑀁 𑀦𑀺𑀯𑀸𑀲𑁂𑀢𑁆𑀯𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀺𑀡𑁆𑀟𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀧𑀻𑀞𑀓𑁂 𑀦𑀺𑀧𑀦𑁆𑀦𑀁 𑀤𑀸𑀭𑀺𑀓𑀁 𑀧𑀲𑁆𑀲𑀺𑀢𑁆𑀯𑀸 𑀲𑀸𑀭𑀢𑁆𑀢𑁄 𑀅𑀗𑁆𑀕𑀼𑀝𑁆𑀞𑀁 𑀅𑀗𑁆𑀕𑀚𑀸𑀢𑀁 𑀧𑀯𑁂𑀲𑁂𑀲𑀺. 𑀲𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲. 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺.

𑁬𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀫𑀸𑀡𑀯𑀓𑁄 𑀉𑀧𑁆𑀧𑀮𑀯𑀡𑁆𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀳𑁄𑀢𑀺. 𑀅𑀣 𑀔𑁄 𑀲𑁄 𑀫𑀸𑀡𑀯𑀓𑁄 𑀉𑀧𑁆𑀧𑀮𑀯𑀡𑁆𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀬 𑀓𑀼𑀝𑀺𑀓𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀮𑀻𑀦𑁄 𑀅𑀘𑁆𑀙𑀺. 𑀉𑀧𑁆𑀧𑀮𑀯𑀡𑁆𑀡𑀸 𑀪𑀺𑀓𑁆𑀔𑀼𑀦𑀻 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀓𑀼𑀝𑀺𑀓𑀁 𑀧𑀯𑀺𑀲𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑁄 𑀫𑀸𑀡𑀯𑀓𑁄 𑀉𑀧𑁆𑀧𑀮𑀯𑀡𑁆𑀡𑀁 𑀪𑀺𑀓𑁆𑀔𑀼𑀦𑀺𑀁 𑀉𑀕𑁆𑀕𑀳𑁂𑀢𑁆𑀯𑀸 𑀤𑀽𑀲𑁂𑀲𑀺. 𑀉𑀧𑁆𑀧𑀮𑀯𑀡𑁆𑀡𑀸 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀻𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀪𑀺𑀓𑁆𑀔𑀼𑀦𑀺𑀬𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀸𑀤𑀺𑀬𑀦𑁆𑀢𑀺𑀬𑀸’’𑀢𑀺.

𑁬𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀁𑀬𑁂𑀯 𑀉𑀧𑀚𑁆𑀛𑀁 𑀢𑀫𑁂𑀯 𑀉𑀧𑀲𑀫𑁆𑀧𑀤𑀁 𑀢𑀸𑀦𑀺𑀬𑁂𑀯 [𑀢𑀸𑀦𑀺 (𑀲𑀻. 𑀲𑁆𑀬𑀸.)] 𑀯𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀗𑁆𑀕𑀫𑀺𑀢𑀼𑀁 [𑀲𑀗𑁆𑀓𑀫𑀺𑀢𑀼𑀁 (𑀲𑀻. 𑀲𑁆𑀬𑀸.)]. 𑀬𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀲𑀸𑀥𑀸𑀭𑀡𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀼𑀦𑀻𑀦𑀁 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀼𑀁. 𑀬𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀳𑀺 𑀅𑀲𑀸𑀥𑀸𑀭𑀡𑀸 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀻’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀸𑀢𑀼𑀪𑀽𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀁𑀬𑁂𑀯 𑀉𑀧𑀚𑁆𑀛𑀁 𑀢𑀫𑁂𑀯 𑀉𑀧𑀲𑀫𑁆𑀧𑀤𑀁 𑀢𑀸𑀦𑀺𑀬𑁂𑀯 [𑀢𑀸𑀦𑀺 (𑀲𑀻. 𑀲𑁆𑀬𑀸.)] 𑀯𑀲𑁆𑀲𑀸𑀦𑀺 𑀪𑀺𑀓𑁆𑀔𑀽𑀳𑀺 𑀲𑀗𑁆𑀕𑀫𑀺𑀢𑀼𑀁 [𑀲𑀗𑁆𑀓𑀫𑀺𑀢𑀼𑀁 (𑀲𑀻. 𑀲𑁆𑀬𑀸.)]. 𑀬𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀲𑀸𑀥𑀸𑀭𑀡𑀸 𑀢𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀼𑀁. 𑀬𑀸 𑀆𑀧𑀢𑁆𑀢𑀺𑀬𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀳𑀺 𑀅𑀲𑀸𑀥𑀸𑀭𑀡𑀸 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀦𑀸𑀧𑀢𑁆𑀢𑀻’’𑀢𑀺.

𑁭𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑁋 ‘𑀏𑀯𑀁 𑀫𑁂 𑀅𑀦𑀸𑀧𑀢𑁆𑀢𑀺 𑀪𑀯𑀺𑀲𑁆𑀲𑀢𑀻’𑀢𑀺, 𑀫𑀸𑀢𑀼𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺… 𑀥𑀻𑀢𑀼𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺… 𑀪𑀕𑀺𑀦𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺… 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑁭𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀼𑀤𑀼𑀧𑀺𑀝𑁆𑀞𑀺𑀓𑁄 𑀳𑁄𑀢𑀺. 𑀲𑁄 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀅𑀢𑁆𑀢𑀦𑁄 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀅𑀕𑁆𑀕𑀳𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀭𑀸𑀚𑀺𑀓’’𑀦𑁆𑀢𑀺.