𑁬. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁

𑁩𑁪𑁨. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀲𑀜𑁆𑀜𑀸𑀘𑀺𑀓𑀸𑀬𑁄 𑀓𑀼𑀝𑀺𑀬𑁄 𑀓𑀸𑀭𑀸𑀧𑁂𑀦𑁆𑀢𑀺 𑀅𑀲𑁆𑀲𑀸𑀫𑀺𑀓𑀸𑀬𑁄 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀸𑀬𑁄 𑀅𑀧𑁆𑀧𑀫𑀸𑀡𑀺𑀓𑀸𑀬𑁄. 𑀢𑀸𑀬𑁄 𑀦 𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑁂 𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀦𑁆𑀢𑀺 𑁋 ‘‘𑀧𑀼𑀭𑀺𑀲𑀁 𑀤𑁂𑀣, 𑀧𑀼𑀭𑀺𑀲𑀢𑁆𑀣𑀓𑀭𑀁 𑀤𑁂𑀣, 𑀕𑁄𑀡𑀁 𑀤𑁂𑀣, 𑀲𑀓𑀝𑀁 𑀤𑁂𑀣, 𑀯𑀸𑀲𑀺𑀁 𑀤𑁂𑀣, 𑀧𑀭𑀲𑀼𑀁 𑀤𑁂𑀣, 𑀓𑀼𑀞𑀸𑀭𑀺𑀁 𑀤𑁂𑀣, 𑀓𑀼𑀤𑀸𑀮𑀁 𑀤𑁂𑀣, 𑀦𑀺𑀔𑀸𑀤𑀦𑀁 𑀤𑁂𑀣, 𑀯𑀮𑁆𑀮𑀺𑀁 𑀤𑁂𑀣, 𑀯𑁂𑀴𑀼𑀁 𑀤𑁂𑀣, 𑀫𑀼𑀜𑁆𑀚𑀁 𑀤𑁂𑀣, 𑀧𑀩𑁆𑀩𑀚𑀁 𑀤𑁂𑀣, 𑀢𑀺𑀡𑀁 𑀤𑁂𑀣, 𑀫𑀢𑁆𑀢𑀺𑀓𑀁 𑀤𑁂𑀣𑀸’’𑀢𑀺. 𑀫𑀦𑀼𑀲𑁆𑀲𑀸 𑀉𑀧𑀤𑁆𑀤𑀼𑀢𑀸 𑀬𑀸𑀘𑀦𑀸𑀬 𑀉𑀧𑀤𑁆𑀤𑀼𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀉𑀩𑁆𑀩𑀺𑀚𑁆𑀚𑀦𑁆𑀢𑀺𑀧𑀺 𑀉𑀢𑁆𑀢𑀲𑀦𑁆𑀢𑀺𑀧𑀺 𑀧𑀮𑀸𑀬𑀦𑁆𑀢𑀺𑀧𑀺 𑀅𑀜𑁆𑀜𑁂𑀦𑀧𑀺 𑀕𑀘𑁆𑀙𑀦𑁆𑀢𑀺 𑀅𑀜𑁆𑀜𑁂𑀦𑀧𑀺 𑀫𑀼𑀔𑀁 𑀓𑀭𑁄𑀦𑁆𑀢𑀺 𑀤𑁆𑀯𑀸𑀭𑀫𑁆𑀧𑀺 𑀣𑀓𑁂𑀦𑁆𑀢𑀺, 𑀕𑀸𑀯𑀺𑀫𑁆𑀧𑀺 𑀤𑀺𑀲𑁆𑀯𑀸 𑀧𑀮𑀸𑀬𑀦𑁆𑀢𑀺 𑀪𑀺𑀓𑁆𑀔𑀽𑀢𑀺 𑀫𑀜𑁆𑀜𑀫𑀸𑀦𑀸.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀭𑀸𑀚𑀕𑀳𑁂 𑀯𑀲𑁆𑀲𑀁𑀯𑀼𑀝𑁆𑀞𑁄 𑀬𑁂𑀦 𑀆𑀴𑀯𑀻 𑀢𑁂𑀦 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀆𑀴𑀯𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀴𑀯𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 𑀧𑀲𑁆𑀲𑀺𑀢𑁆𑀯𑀸 𑀉𑀩𑁆𑀩𑀺𑀚𑁆𑀚𑀦𑁆𑀢𑀺𑀧𑀺 𑀉𑀢𑁆𑀢𑀲𑀦𑁆𑀢𑀺𑀧𑀺 𑀧𑀮𑀸𑀬𑀦𑁆𑀢𑀺𑀧𑀺 𑀅𑀜𑁆𑀜𑁂𑀦𑀧𑀺 𑀕𑀘𑁆𑀙𑀦𑁆𑀢𑀺 𑀅𑀜𑁆𑀜𑁂𑀦𑀧𑀺 𑀫𑀼𑀔𑀁 𑀓𑀭𑁄𑀦𑁆𑀢𑀺 𑀤𑁆𑀯𑀸𑀭𑀫𑁆𑀧𑀺 𑀣𑀓𑁂𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀴𑀯𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀼𑀩𑁆𑀩𑀸𑀬𑀁, 𑀆𑀯𑀼𑀲𑁄, 𑀆𑀴𑀯𑀻 𑀲𑀼𑀪𑀺𑀓𑁆𑀔𑀸 𑀅𑀳𑁄𑀲𑀺 𑀲𑀼𑀮𑀪𑀧𑀺𑀡𑁆𑀟𑀸 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁; 𑀏𑀢𑀭𑀳𑀺 𑀧𑀦𑀸𑀬𑀁 𑀆𑀴𑀯𑀻 𑀤𑀼𑀩𑁆𑀪𑀺𑀓𑁆𑀔𑀸 𑀤𑀼𑀮𑁆𑀮𑀪𑀧𑀺𑀡𑁆𑀟𑀸, 𑀦 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀓𑁄 𑀦𑀼 𑀔𑁄, 𑀆𑀯𑀼𑀲𑁄, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑀸𑀬𑀁 𑀆𑀴𑀯𑀻 𑀤𑀼𑀩𑁆𑀪𑀺𑀓𑁆𑀔𑀸 𑀤𑀼𑀮𑁆𑀮𑀪𑀧𑀺𑀡𑁆𑀟𑀸, 𑀦 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼’’𑀦𑁆𑀢𑀺? 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁.

𑁩𑁪𑁩. 𑀅𑀣 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀆𑀴𑀯𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀆𑀴𑀯𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀆𑀴𑀯𑀺𑀬𑀁 𑀯𑀺𑀳𑀭𑀢𑀺 𑀅𑀕𑁆𑀕𑀸𑀴𑀯𑁂 𑀘𑁂𑀢𑀺𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀴𑀯𑀓𑁂 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸𑀘𑀺𑀓𑀸𑀬𑁄 𑀓𑀼𑀝𑀺𑀬𑁄 𑀓𑀸𑀭𑀸𑀧𑁂𑀣 𑀅𑀲𑁆𑀲𑀸𑀫𑀺𑀓𑀸𑀬𑁄 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀸𑀬𑁄 𑀅𑀧𑁆𑀧𑀫𑀸𑀡𑀺𑀓𑀸𑀬𑁄. 𑀢𑀸𑀬𑁄 𑀦 𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑁂 𑀢𑀼𑀫𑁆𑀳𑁂 𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀣 𑁋 ‘𑀧𑀼𑀭𑀺𑀲𑀁 𑀤𑁂𑀣 𑀧𑀼𑀭𑀺𑀲𑀢𑁆𑀣𑀓𑀭𑀁 𑀤𑁂𑀣…𑀧𑁂… 𑀢𑀺𑀡𑀁 𑀤𑁂𑀣 𑀫𑀢𑁆𑀢𑀺𑀓𑀁 𑀤𑁂𑀣𑀸’𑀢𑀺. 𑀫𑀦𑀼𑀲𑁆𑀲𑀸 𑀉𑀧𑀤𑁆𑀤𑀼𑀢𑀸 𑀬𑀸𑀘𑀦𑀸𑀬 𑀉𑀧𑀤𑁆𑀤𑀼𑀢𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀉𑀩𑁆𑀩𑀺𑀚𑁆𑀚𑀦𑁆𑀢𑀺𑀧𑀺 𑀉𑀢𑁆𑀢𑀲𑀦𑁆𑀢𑀺𑀧𑀺 𑀧𑀮𑀸𑀬𑀦𑁆𑀢𑀺𑀧𑀺 𑀅𑀜𑁆𑀜𑁂𑀦𑀧𑀺 𑀕𑀘𑁆𑀙𑀦𑁆𑀢𑀺 𑀅𑀜𑁆𑀜𑁂𑀦𑀧𑀺 𑀫𑀼𑀔𑀁 𑀓𑀭𑁄𑀦𑁆𑀢𑀺 𑀤𑁆𑀯𑀸𑀭𑀫𑁆𑀧𑀺 𑀣𑀓𑁂𑀦𑁆𑀢𑀺, 𑀕𑀸𑀯𑀺𑀫𑁆𑀧𑀺 𑀤𑀺𑀲𑁆𑀯𑀸 𑀧𑀮𑀸𑀬𑀦𑁆𑀢𑀺 𑀪𑀺𑀓𑁆𑀔𑀽𑀢𑀺 𑀫𑀜𑁆𑀜𑀫𑀸𑀦𑀸’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸…𑀧𑁂… ‘‘𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀲𑀁𑀬𑀸𑀘𑀺𑀓𑀸𑀬𑁄 𑀓𑀼𑀝𑀺𑀬𑁄 𑀓𑀸𑀭𑀸𑀧𑁂𑀲𑁆𑀲𑀣 𑀅𑀲𑁆𑀲𑀸𑀫𑀺𑀓𑀸𑀬𑁄 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀸𑀬𑁄 𑀅𑀧𑁆𑀧𑀫𑀸𑀡𑀺𑀓𑀸𑀬𑁄! 𑀢𑀸𑀬𑁄 𑀦 𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑁂 𑀢𑀼𑀫𑁆𑀳𑁂 𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀺𑀲𑁆𑀲𑀣 𑁋 ‘𑀧𑀼𑀭𑀺𑀲𑀁 𑀤𑁂𑀣 𑀧𑀼𑀭𑀺𑀲𑀢𑁆𑀣𑀓𑀭𑀁 𑀤𑁂𑀣…𑀧𑁂… 𑀢𑀺𑀡𑀁 𑀤𑁂𑀣 𑀫𑀢𑁆𑀢𑀺𑀓𑀁 𑀤𑁂𑀣𑀸’𑀢𑀺! 𑀦𑁂𑀢𑀁 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂…’’ 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁩𑁪𑁪. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀪𑀸𑀢𑀭𑁄 𑀇𑀲𑀬𑁄 𑀕𑀗𑁆𑀕𑀁 𑀦𑀤𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀺𑀁𑀲𑀼. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀡𑀺𑀓𑀡𑁆𑀞𑁄 𑀦𑀸𑀕𑀭𑀸𑀚𑀸 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀬𑁂𑀦 𑀓𑀦𑀺𑀝𑁆𑀞𑁄 𑀇𑀲𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀦𑀺𑀝𑁆𑀞𑀁 𑀇𑀲𑀺𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀓𑀦𑀺𑀝𑁆𑀞𑁄 𑀇𑀲𑀺 𑀢𑀲𑁆𑀲 𑀦𑀸𑀕𑀲𑁆𑀲 𑀪𑀬𑀸 𑀓𑀺𑀲𑁄 𑀅𑀳𑁄𑀲𑀺 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀅𑀤𑁆𑀤𑀲 𑀔𑁄, 𑀪𑀺𑀓𑁆𑀔𑀯𑁂, 𑀚𑁂𑀝𑁆𑀞𑁄 𑀇𑀲𑀺 𑀓𑀦𑀺𑀝𑁆𑀞𑀁 𑀇𑀲𑀺𑀁 𑀓𑀺𑀲𑀁 𑀮𑀽𑀔𑀁 𑀤𑀼𑀩𑁆𑀩𑀡𑁆𑀡𑀁 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀁 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀁. 𑀤𑀺𑀲𑁆𑀯𑀸𑀦 𑀓𑀦𑀺𑀝𑁆𑀞𑀁 𑀇𑀲𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀪𑁄, 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄’’𑀢𑀺? ‘‘𑀇𑀥, 𑀪𑁄, 𑀫𑀡𑀺𑀓𑀡𑁆𑀞𑁄 𑀦𑀸𑀕𑀭𑀸𑀚𑀸 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀲𑀸𑀳𑀁, 𑀪𑁄, 𑀦𑀸𑀕𑀲𑁆𑀲 𑀪𑀬𑀸 [𑀪𑀬𑀸𑀫𑁆𑀳𑀺 (𑀲𑀻.)] 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄’’𑀢𑀺. ‘‘𑀇𑀘𑁆𑀙𑀲𑀺 𑀧𑀦 𑀢𑁆𑀯𑀁, 𑀪𑁄, 𑀢𑀲𑁆𑀲 𑀦𑀸𑀕𑀲𑁆𑀲 𑀅𑀦𑀸𑀕𑀫𑀦’’𑀦𑁆𑀢𑀺? ‘‘𑀇𑀘𑁆𑀙𑀸𑀫𑀳𑀁, 𑀪𑁄, 𑀢𑀲𑁆𑀲 𑀦𑀸𑀕𑀲𑁆𑀲 𑀅𑀦𑀸𑀕𑀫𑀦’’𑀦𑁆𑀢𑀺. ‘‘𑀅𑀧𑀺 𑀧𑀦 𑀢𑁆𑀯𑀁, 𑀪𑁄, 𑀢𑀲𑁆𑀲 𑀦𑀸𑀕𑀲𑁆𑀲 𑀓𑀺𑀜𑁆𑀘𑀺 𑀧𑀲𑁆𑀲𑀲𑀻’’𑀢𑀺? ‘‘𑀧𑀲𑁆𑀲𑀸𑀫𑀳𑀁, 𑀪𑁄, 𑀫𑀡𑀺𑀫𑀲𑁆𑀲 [𑀫𑀡𑀺𑀲𑁆𑀲 (𑀲𑀻. 𑀓.)] 𑀓𑀡𑁆𑀞𑁂 𑀧𑀺𑀮𑀦𑁆𑀥𑀦’’𑀦𑁆𑀢𑀺. ‘‘𑀢𑁂𑀦 𑀳𑀺 𑀢𑁆𑀯𑀁, 𑀪𑁄, 𑀢𑀁 𑀦𑀸𑀕𑀁 𑀫𑀡𑀺𑀁 𑀬𑀸𑀘 𑁋 ‘𑀫𑀡𑀺𑀁 𑀫𑁂, 𑀪𑁄, 𑀤𑁂𑀳𑀺; 𑀫𑀡𑀺𑀦𑀸 𑀫𑁂 𑀅𑀢𑁆𑀣𑁄’’’𑀢𑀺.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀡𑀺𑀓𑀡𑁆𑀞𑁄 𑀦𑀸𑀕𑀭𑀸𑀚𑀸 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀬𑁂𑀦 𑀓𑀦𑀺𑀝𑁆𑀞𑁄 𑀇𑀲𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀡𑀺𑀓𑀡𑁆𑀞𑀁 𑀦𑀸𑀕𑀭𑀸𑀚𑀸𑀦𑀁 𑀓𑀦𑀺𑀝𑁆𑀞𑁄 𑀇𑀲𑀺 𑀏𑀢𑀤𑀯𑁄𑀘 𑁋 ‘‘𑀫𑀡𑀺𑀁 𑀫𑁂, 𑀪𑁄, 𑀤𑁂𑀳𑀺; 𑀫𑀡𑀺𑀦𑀸 𑀫𑁂 𑀅𑀢𑁆𑀣𑁄’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀡𑀺𑀓𑀡𑁆𑀞𑁄 𑀦𑀸𑀕𑀭𑀸𑀚𑀸 𑁋 ‘𑀪𑀺𑀓𑁆𑀔𑀼 𑀫𑀡𑀺𑀁 𑀬𑀸𑀘𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀫𑀡𑀺𑀦𑀸 𑀅𑀢𑁆𑀣𑁄’𑀢𑀺 𑀔𑀺𑀧𑁆𑀧𑀜𑁆𑀜𑁂𑀯 𑀅𑀕𑀫𑀸𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀡𑀺𑀓𑀡𑁆𑀞𑁄 𑀦𑀸𑀕𑀭𑀸𑀚𑀸 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀺𑀢𑁆𑀯𑀸 𑀬𑁂𑀦 𑀓𑀦𑀺𑀝𑁆𑀞𑁄 𑀇𑀲𑀺 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲 𑀔𑁄, 𑀪𑀺𑀓𑁆𑀔𑀯𑁂, 𑀓𑀦𑀺𑀝𑁆𑀞𑁄 𑀇𑀲𑀺 𑀫𑀡𑀺𑀓𑀡𑁆𑀞𑀁 𑀦𑀸𑀕𑀭𑀸𑀚𑀸𑀦𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀫𑀡𑀺𑀓𑀡𑁆𑀞𑀁 𑀦𑀸𑀕𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀡𑀺𑀁 𑀫𑁂, 𑀪𑁄, 𑀤𑁂𑀳𑀺; 𑀫𑀡𑀺𑀦𑀸 𑀫𑁂 𑀅𑀢𑁆𑀣𑁄’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀡𑀺𑀓𑀡𑁆𑀞𑁄 𑀦𑀸𑀕𑀭𑀸𑀚𑀸 𑁋 ‘‘𑀪𑀺𑀓𑁆𑀔𑀼 𑀫𑀡𑀺𑀁 𑀬𑀸𑀘𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀫𑀡𑀺𑀦𑀸 𑀅𑀢𑁆𑀣𑁄’’𑀢𑀺 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀡𑀺𑀓𑀡𑁆𑀞𑁄 𑀦𑀸𑀕𑀭𑀸𑀚𑀸 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀢𑀺. 𑀅𑀤𑁆𑀤𑀲 𑀔𑁄, 𑀪𑀺𑀓𑁆𑀔𑀯𑁂, 𑀓𑀦𑀺𑀝𑁆𑀞𑁄 𑀇𑀲𑀺 𑀫𑀡𑀺𑀓𑀡𑁆𑀞𑀁 𑀦𑀸𑀕𑀭𑀸𑀚𑀸𑀦𑀁 𑀕𑀗𑁆𑀕𑀁 𑀦𑀤𑀺𑀁 𑀉𑀢𑁆𑀢𑀭𑀦𑁆𑀢𑀁. 𑀤𑀺𑀲𑁆𑀯𑀸𑀦 𑀫𑀡𑀺𑀓𑀡𑁆𑀞𑀁 𑀦𑀸𑀕𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀡𑀺𑀁 𑀫𑁂, 𑀪𑁄, 𑀤𑁂𑀳𑀺; 𑀫𑀡𑀺𑀦𑀸 𑀫𑁂 𑀅𑀢𑁆𑀣𑁄’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀡𑀺𑀓𑀡𑁆𑀞𑁄 𑀦𑀸𑀕𑀭𑀸𑀚𑀸 𑀓𑀦𑀺𑀝𑁆𑀞𑀁 𑀇𑀲𑀺𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

[𑀚𑀸. 𑁧.𑁩.𑁭 𑀫𑀡𑀺𑀓𑀡𑁆𑀞𑀚𑀸𑀢𑀓𑁂𑀧𑀺] ‘‘𑀫𑀫𑀦𑁆𑀦𑀧𑀸𑀦𑀁 𑀯𑀺𑀧𑀼𑀮𑀁 𑀉𑀴𑀸𑀭𑀁,

𑀉𑀧𑁆𑀧𑀚𑁆𑀚𑀢𑀻𑀫𑀲𑁆𑀲 𑀫𑀡𑀺𑀲𑁆𑀲 𑀳𑁂𑀢𑀼;

𑀢𑀁 𑀢𑁂 𑀦 𑀤𑀲𑁆𑀲𑀁 𑀅𑀢𑀺𑀬𑀸𑀘𑀓𑁄𑀲𑀺;

𑀦 𑀘𑀸𑀧𑀺 𑀢𑁂 𑀅𑀲𑁆𑀲𑀫𑀫𑀸𑀕𑀫𑀺𑀲𑁆𑀲𑀁.

[𑀚𑀸. 𑁧.𑁩.𑁮 𑀫𑀡𑀺𑀓𑀡𑁆𑀞𑀚𑀸𑀢𑀓𑁂𑀧𑀺] ‘‘𑀲𑀼𑀲𑀽 𑀬𑀣𑀸 𑀲𑀓𑁆𑀔𑀭𑀥𑁄𑀢𑀧𑀸𑀡𑀻;

𑀢𑀸𑀲𑁂𑀲𑀺 𑀫𑀁 𑀲𑁂𑀮𑀫𑀸𑀬𑀸𑀘𑀫𑀸𑀦𑁄;

𑀢𑀁 𑀢𑁂 𑀦 𑀤𑀲𑁆𑀲𑀁 𑀅𑀢𑀺𑀬𑀸𑀘𑀓𑁄𑀲𑀺;

𑀦 𑀘𑀸𑀧𑀺 𑀢𑁂 𑀅𑀲𑁆𑀲𑀫𑀫𑀸𑀕𑀫𑀺𑀲𑁆𑀲’’𑀦𑁆𑀢𑀺.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀡𑀺𑀓𑀡𑁆𑀞𑁄 𑀦𑀸𑀕𑀭𑀸𑀚𑀸 𑁋 ‘‘𑀪𑀺𑀓𑁆𑀔𑀼 𑀫𑀡𑀺𑀁 𑀬𑀸𑀘𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀫𑀡𑀺𑀦𑀸 𑀅𑀢𑁆𑀣𑁄’’𑀢𑀺 𑀧𑀓𑁆𑀓𑀸𑀫𑀺. 𑀢𑀣𑀸 𑀧𑀓𑁆𑀓𑀦𑁆𑀢𑁄𑀯 [𑀢𑀤𑀸𑀧𑀓𑁆𑀓𑀦𑁆𑀢𑁄𑀯 (𑀓.)] 𑀅𑀳𑁄𑀲𑀺, 𑀦 𑀧𑀼𑀦 𑀧𑀘𑁆𑀘𑀸𑀕𑀜𑁆𑀙𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀓𑀦𑀺𑀝𑁆𑀞𑁄 𑀇𑀲𑀺 𑀢𑀲𑁆𑀲 𑀦𑀸𑀕𑀲𑁆𑀲 𑀤𑀲𑁆𑀲𑀦𑀻𑀬𑀲𑁆𑀲 𑀅𑀤𑀲𑁆𑀲𑀦𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀺𑀲𑁄 𑀅𑀳𑁄𑀲𑀺 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄, 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄. 𑀅𑀤𑁆𑀤𑀲 𑀔𑁄, 𑀪𑀺𑀓𑁆𑀔𑀯𑁂, 𑀚𑁂𑀝𑁆𑀞𑁄 𑀇𑀲𑀺 𑀓𑀦𑀺𑀝𑁆𑀞𑀁 𑀇𑀲𑀺𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀺𑀲𑀁 𑀮𑀽𑀔𑀁 𑀤𑀼𑀩𑁆𑀩𑀡𑁆𑀡𑀁 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀁 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀁. 𑀤𑀺𑀲𑁆𑀯𑀸𑀦 𑀓𑀦𑀺𑀝𑁆𑀞𑀁 𑀇𑀲𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀲𑁆𑀲 𑀢𑁆𑀯𑀁, 𑀪𑁄, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄’’𑀢𑀺? ‘‘𑀢𑀲𑁆𑀲𑀸𑀳𑀁, 𑀪𑁄, 𑀦𑀸𑀕𑀲𑁆𑀲 𑀤𑀲𑁆𑀲𑀦𑀻𑀬𑀲𑁆𑀲 𑀅𑀤𑀲𑁆𑀲𑀦𑁂𑀦 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀓𑀺𑀲𑁄 𑀮𑀽𑀔𑁄 𑀤𑀼𑀩𑁆𑀩𑀡𑁆𑀡𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑁄’’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀚𑁂𑀝𑁆𑀞𑁄 𑀇𑀲𑀺 𑀓𑀦𑀺𑀝𑁆𑀞𑀁 𑀇𑀲𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

[𑀚𑀸. 𑁧.𑁩.𑁯 𑀫𑀡𑀺𑀓𑀡𑁆𑀞𑀚𑀸𑀢𑀓𑁂𑀧𑀺] ‘‘𑀦 𑀢𑀁 𑀬𑀸𑀘𑁂 𑀬𑀲𑁆𑀲 𑀧𑀺𑀬𑀁 𑀚𑀺𑀕𑀻𑀲𑁂,

𑀯𑀺𑀤𑁂𑀲𑁆𑀲𑁄 [𑀤𑁂𑀲𑁆𑀲𑁄 (𑀲𑀻.), 𑀤𑁂𑀲𑁆𑀲𑁄 𑀘 (𑀲𑁆𑀬𑀸.)] 𑀳𑁄𑀢𑀺 𑀅𑀢𑀺𑀬𑀸𑀘𑀦𑀸𑀬;

𑀦𑀸𑀕𑁄 𑀫𑀡𑀺𑀁 𑀬𑀸𑀘𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦;

𑀅𑀤𑀲𑁆𑀲𑀦𑀜𑁆𑀜𑁂𑀯 𑀢𑀤𑀚𑁆𑀛𑀕𑀫𑀸’’𑀢𑀺.

𑀢𑁂𑀲𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀸𑀡𑀸𑀦𑀁 𑀅𑀫𑀦𑀸𑀧𑀸 𑀪𑀯𑀺𑀲𑁆𑀲𑀢𑀺 𑀬𑀸𑀘𑀦𑀸 𑀅𑀫𑀦𑀸𑀧𑀸 𑀯𑀺𑀜𑁆𑀜𑀢𑁆𑀢𑀺. 𑀓𑀺𑀫𑀗𑁆𑀕𑀁 [𑀓𑀺𑀫𑀗𑁆𑀕 (𑀲𑀻.)] 𑀧𑀦 𑀫𑀦𑀼𑀲𑁆𑀲𑀪𑀽𑀢𑀸𑀦𑀁!

𑁩𑁪𑁫. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀯𑀺𑀳𑀭𑀢𑀺 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀢𑀲𑁆𑀲 𑀔𑁄, 𑀪𑀺𑀓𑁆𑀔𑀯𑁂, 𑀯𑀦𑀲𑀡𑁆𑀟𑀲𑁆𑀲 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀦𑀺𑀦𑁆𑀦𑀁 𑀧𑀮𑁆𑀮𑀮𑀁. 𑀅𑀣 𑀔𑁄,

𑀯𑀸𑀲𑀸𑀬 𑀉𑀧𑀕𑀘𑁆𑀙𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀲𑀓𑀼𑀡𑀲𑀗𑁆𑀖𑀲𑁆𑀲 𑀲𑀤𑁆𑀤𑁂𑀦 𑀉𑀩𑁆𑀩𑀸𑀴𑁆𑀳𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺, 𑀪𑀺𑀓𑁆𑀔𑀼, 𑀔𑀫𑀦𑀻𑀬𑀁 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁 𑀓𑀘𑁆𑀘𑀺𑀲𑀺 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑁄? 𑀓𑀼𑀢𑁄 𑀘 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀕𑀘𑁆𑀙𑀲𑀻’𑀢𑀺? ‘𑀔𑀫𑀦𑀻𑀬𑀁, 𑀪𑀕𑀯𑀸, 𑀬𑀸𑀧𑀦𑀻𑀬𑀁, 𑀪𑀕𑀯𑀸. 𑀅𑀧𑁆𑀧𑀓𑀺𑀮𑀫𑀣𑁂𑀦 𑀘𑀸𑀳𑀁, 𑀪𑀦𑁆𑀢𑁂, 𑀅𑀤𑁆𑀥𑀸𑀦𑀁 𑀆𑀕𑀢𑁄. 𑀅𑀢𑁆𑀣𑀺, 𑀪𑀦𑁆𑀢𑁂, 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀫𑀳𑀸𑀯𑀦𑀲𑀡𑁆𑀟𑁄. 𑀢𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀯𑀦𑀲𑀡𑁆𑀟𑀲𑁆𑀲 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀦𑀺𑀦𑁆𑀦𑀁 𑀧𑀮𑁆𑀮𑀮𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀫𑀳𑀸𑀲𑀓𑀼𑀡𑀲𑀗𑁆𑀖𑁄 𑀢𑀲𑁆𑀫𑀺𑀁 𑀧𑀮𑁆𑀮𑀮𑁂 𑀤𑀺𑀯𑀲𑀁 𑀕𑁄𑀘𑀭𑀁 𑀘𑀭𑀺𑀢𑁆𑀯𑀸 𑀲𑀸𑀬𑀁 𑀢𑀁 𑀯𑀦𑀲𑀡𑁆𑀟𑀁 𑀯𑀸𑀲𑀸𑀬 𑀉𑀧𑀕𑀘𑁆𑀙𑀢𑀺. 𑀢𑀢𑁄 𑀅𑀳𑀁, 𑀪𑀕𑀯𑀸, 𑀆𑀕𑀘𑁆𑀙𑀸𑀫𑀺 𑁋 𑀢𑀲𑁆𑀲 𑀲𑀓𑀼𑀡𑀲𑀗𑁆𑀖𑀲𑁆𑀲 𑀲𑀤𑁆𑀤𑁂𑀦 𑀉𑀩𑁆𑀩𑀸𑀴𑁆𑀳𑁄’𑀢𑀺. ‘𑀇𑀘𑁆𑀙𑀲𑀺 𑀧𑀦 𑀢𑁆𑀯𑀁, 𑀪𑀺𑀓𑁆𑀔𑀼, 𑀢𑀲𑁆𑀲 𑀲𑀓𑀼𑀡𑀲𑀗𑁆𑀖𑀲𑁆𑀲 𑀅𑀦𑀸𑀕𑀫𑀦’𑀦𑁆𑀢𑀺? ‘𑀇𑀘𑁆𑀙𑀸𑀫𑀳𑀁, 𑀪𑀕𑀯𑀸, 𑀢𑀲𑁆𑀲 𑀲𑀓𑀼𑀡𑀲𑀗𑁆𑀖𑀲𑁆𑀲 𑀅𑀦𑀸𑀕𑀫𑀦’𑀦𑁆𑀢𑀺. ‘𑀢𑁂𑀦 𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀯𑀦𑀲𑀡𑁆𑀟𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀳𑀺 𑁋 𑀲𑀼𑀡𑀦𑁆𑀢𑀼 𑀫𑁂, 𑀪𑁄𑀦𑁆𑀢𑁄 𑀲𑀓𑀼𑀡𑀸, 𑀬𑀸𑀯𑀢𑀺𑀓𑀸 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀸𑀲𑀁 𑀉𑀧𑀕𑀢𑀸, 𑀧𑀢𑁆𑀢𑁂𑀦 𑀫𑁂 𑀅𑀢𑁆𑀣𑁄. 𑀏𑀓𑁂𑀓𑀁 𑀫𑁂, 𑀪𑁄𑀦𑁆𑀢𑁄, 𑀧𑀢𑁆𑀢𑀁 𑀤𑀤𑀦𑁆𑀢𑀽’𑀢𑀺. 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 𑀬𑀸𑀫𑀁… 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀁 𑀬𑀸𑀫𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀳𑀺 𑁋 ‘𑀲𑀼𑀡𑀦𑁆𑀢𑀼 𑀫𑁂, 𑀪𑁄𑀦𑁆𑀢𑁄 𑀲𑀓𑀼𑀡𑀸, 𑀬𑀸𑀯𑀢𑀺𑀓𑀸 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀸𑀲𑀁 𑀉𑀧𑀕𑀢𑀸, 𑀧𑀢𑁆𑀢𑁂𑀦 𑀫𑁂 𑀅𑀢𑁆𑀣𑁄. 𑀏𑀓𑁂𑀓𑀁 𑀫𑁂, 𑀪𑁄𑀦𑁆𑀢𑁄, 𑀧𑀢𑁆𑀢𑀁 𑀤𑀤𑀦𑁆𑀢𑀽’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀪𑀺𑀓𑁆𑀔𑀼 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀁 𑀯𑀦𑀲𑀡𑁆𑀟𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋 ‘𑀲𑀼𑀡𑀦𑁆𑀢𑀼 𑀫𑁂, 𑀪𑁄𑀦𑁆𑀢𑁄 𑀲𑀓𑀼𑀡𑀸, 𑀬𑀸𑀯𑀢𑀺𑀓𑀸 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀸𑀲𑀁 𑀉𑀧𑀕𑀢𑀸, 𑀧𑀢𑁆𑀢𑁂𑀦 𑀫𑁂 𑀅𑀢𑁆𑀣𑁄. 𑀏𑀓𑁂𑀓𑀁 𑀫𑁂, 𑀪𑁄𑀦𑁆𑀢𑁄, 𑀧𑀢𑁆𑀢𑀁 𑀤𑀤𑀦𑁆𑀢𑀽’𑀢𑀺. 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫 𑀬𑀸𑀫𑀁… 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀁 𑀬𑀸𑀫𑀁 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋 ‘𑀲𑀼𑀡𑀦𑁆𑀢𑀼 𑀫𑁂, 𑀪𑁄𑀦𑁆𑀢𑁄 𑀲𑀓𑀼𑀡𑀸, 𑀬𑀸𑀯𑀢𑀺𑀓𑀸 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀸𑀲𑀁 𑀉𑀧𑀕𑀢𑀸, 𑀧𑀢𑁆𑀢𑁂𑀦 𑀫𑁂 𑀅𑀢𑁆𑀣𑁄. 𑀏𑀓𑁂𑀓𑀁 𑀫𑁂, 𑀪𑁄𑀦𑁆𑀢𑁄, 𑀧𑀢𑁆𑀢𑀁 𑀤𑀤𑀦𑁆𑀢𑀽’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀲𑀓𑀼𑀡𑀲𑀗𑁆𑀖𑁄 𑁋 ‘𑀪𑀺𑀓𑁆𑀔𑀼 𑀧𑀢𑁆𑀢𑀁 𑀬𑀸𑀘𑀢𑀺 𑀪𑀺𑀓𑁆𑀔𑀼𑀲𑁆𑀲 𑀧𑀢𑁆𑀢𑁂𑀦 𑀅𑀢𑁆𑀣𑁄’𑀢𑀺 𑀢𑀫𑁆𑀳𑀸 𑀯𑀦𑀲𑀡𑁆𑀟𑀸 𑀧𑀓𑁆𑀓𑀸𑀫𑀺. 𑀢𑀣𑀸 𑀧𑀓𑁆𑀓𑀦𑁆𑀢𑁄𑀯 𑀅𑀳𑁄𑀲𑀺 𑀦 𑀧𑀼𑀦 𑀧𑀘𑁆𑀘𑀸𑀕𑀜𑁆𑀙𑀺. 𑀢𑁂𑀲𑀜𑁆𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀸𑀡𑀸𑀦𑀁 𑀅𑀫𑀦𑀸𑀧𑀸 𑀪𑀯𑀺𑀲𑁆𑀲𑀢𑀺 𑀬𑀸𑀘𑀦𑀸 𑀅𑀫𑀦𑀸𑀧𑀸 𑀯𑀺𑀜𑁆𑀜𑀢𑁆𑀢𑀺. 𑀓𑀺𑀫𑀗𑁆𑀕𑀁 𑀧𑀦 𑀫𑀦𑀼𑀲𑁆𑀲𑀪𑀽𑀢𑀸𑀦𑀁’’!

𑁩𑁪𑁬. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀭𑀝𑁆𑀞𑀧𑀸𑀮𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀺𑀢𑀸 𑀭𑀝𑁆𑀞𑀧𑀸𑀮𑀁 𑀓𑀼𑀮𑀧𑀼𑀢𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘𑀅𑀧𑀸𑀳𑀁 𑀢𑁂 𑀦 𑀚𑀸𑀦𑀸𑀫𑀺, 𑀭𑀝𑁆𑀞𑀧𑀸𑀮 𑀩𑀳𑀽 𑀚𑀦𑀸;

[𑀚𑀸. 𑁧.𑁭.𑁫𑁪] 𑀢𑁂 𑀫𑀁 𑀲𑀗𑁆𑀕𑀫𑁆𑀫 𑀬𑀸𑀘𑀦𑁆𑀢𑀺, 𑀓𑀲𑁆𑀫𑀸 𑀫𑀁 𑀢𑁆𑀯𑀁 𑀦 𑀬𑀸𑀘𑀲𑀻’𑀢𑀺.

[𑀚𑀸. 𑁧.𑁭.𑁫𑁫] ‘𑀬𑀸𑀘𑀓𑁄 𑀅𑀧𑁆𑀧𑀺𑀬𑁄 𑀳𑁄𑀢𑀺, 𑀬𑀸𑀘𑀁 𑀅𑀤𑀤𑀫𑀧𑁆𑀧𑀺𑀬𑁄;

𑀢𑀲𑁆𑀫𑀸𑀳𑀁 𑀢𑀁 𑀦 𑀬𑀸𑀘𑀸𑀫𑀺, 𑀫𑀸 𑀫𑁂 𑀯𑀺𑀤𑁂𑀲𑁆𑀲𑀦𑀸 𑀅𑀳𑀽’𑀢𑀺.

‘‘𑀲𑁄 𑀳𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀭𑀝𑁆𑀞𑀧𑀸𑀮𑁄 𑀓𑀼𑀮𑀧𑀼𑀢𑁆𑀢𑁄 𑀲𑀓𑀁 𑀧𑀺𑀢𑀭𑀁 𑀏𑀯𑀁 𑀯𑀓𑁆𑀔𑀢𑀺. 𑀓𑀺𑀫𑀗𑁆𑀕𑀁 𑀧𑀦 𑀚𑀦𑁄 𑀚𑀦𑀁!

𑁩𑁪𑁭. ‘‘𑀕𑀺𑀳𑀻𑀦𑀁, 𑀪𑀺𑀓𑁆𑀔𑀯𑁂, 𑀤𑀼𑀲𑁆𑀲𑀁𑀳𑀭𑀸𑀦𑀺 𑀪𑁄𑀕𑀸𑀦𑀺 𑀲𑀫𑁆𑀪𑀢𑀸𑀦𑀺𑀧𑀺 𑀤𑀼𑀭𑀓𑁆𑀔𑀺𑀬𑀸𑀦𑀺. 𑀢𑀢𑁆𑀣 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀏𑀯𑀁 𑀤𑀼𑀲𑁆𑀲𑀁𑀳𑀭𑁂𑀲𑀼 𑀪𑁄𑀕𑁂𑀲𑀼 𑀲𑀫𑁆𑀪𑀢𑁂𑀲𑀼𑀧𑀺 𑀤𑀼𑀭𑀓𑁆𑀔𑀺𑀬𑁂𑀲𑀼 𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀺𑀲𑁆𑀲𑀣 𑁋 ‘𑀧𑀼𑀭𑀺𑀲𑀁 𑀤𑁂𑀣, 𑀧𑀼𑀭𑀺𑀲𑀢𑁆𑀣𑀓𑀭𑀁 𑀤𑁂𑀣, 𑀕𑁄𑀡𑀁 𑀤𑁂𑀣, 𑀲𑀓𑀝𑀁 𑀤𑁂𑀣, 𑀯𑀸𑀲𑀺𑀁 𑀤𑁂𑀣, 𑀧𑀭𑀲𑀼𑀁 𑀤𑁂𑀣, 𑀓𑀼𑀞𑀸𑀭𑀺𑀁 𑀤𑁂𑀣, 𑀓𑀼𑀤𑀸𑀮𑀁 𑀤𑁂𑀣, 𑀦𑀺𑀔𑀸𑀤𑀦𑀁 𑀤𑁂𑀣, 𑀯𑀮𑁆𑀮𑀺𑀁 𑀤𑁂𑀣, 𑀯𑁂𑀴𑀼𑀁 𑀤𑁂𑀣, 𑀫𑀼𑀜𑁆𑀚𑀁 𑀤𑁂𑀣, 𑀧𑀩𑁆𑀩𑀚𑀁 𑀤𑁂𑀣, 𑀢𑀺𑀡𑀁 𑀤𑁂𑀣, 𑀫𑀢𑁆𑀢𑀺𑀓𑀁 𑀤𑁂𑀣𑀸’’𑀢𑀺! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁩𑁪𑁮. ‘‘𑀲𑀜𑁆𑀜𑀸𑀘𑀺𑀓𑀸𑀬 𑀧𑀦 𑀪𑀺𑀓𑁆𑀔𑀼𑀦𑀸 𑀓𑀼𑀝𑀺𑀁 𑀓𑀸𑀭𑀬𑀫𑀸𑀦𑁂𑀦 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁 𑀧𑀫𑀸𑀡𑀺𑀓𑀸 𑀓𑀸𑀭𑁂𑀢𑀩𑁆𑀩𑀸. 𑀢𑀢𑁆𑀭𑀺𑀤𑀁 𑀧𑀫𑀸𑀡𑀁 𑁋 𑀤𑀻𑀖𑀲𑁄 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄, 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸; 𑀢𑀺𑀭𑀺𑀬𑀁 𑀲𑀢𑁆𑀢𑀦𑁆𑀢𑀭𑀸. 𑀪𑀺𑀓𑁆𑀔𑀽 𑀅𑀪𑀺𑀦𑁂𑀢𑀩𑁆𑀩𑀸 𑀯𑀢𑁆𑀣𑀼𑀤𑁂𑀲𑀦𑀸𑀬. 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀁 𑁋 𑀅𑀦𑀸𑀭𑀫𑁆𑀪𑀁 [𑀅𑀦𑀸𑀭𑀩𑁆𑀪𑀁 (𑀓.)] 𑀲𑀧𑀭𑀺𑀓𑁆𑀓𑀫𑀦𑀁. 𑀲𑀸𑀭𑀫𑁆𑀪𑁂 [𑀲𑀸𑀭𑀩𑁆𑀪𑁂 (𑀓.)] 𑀘𑁂 𑀪𑀺𑀓𑁆𑀔𑀼 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑀭𑀺𑀓𑁆𑀓𑀫𑀦𑁂 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀸𑀭𑁂𑀬𑁆𑀬, 𑀪𑀺𑀓𑁆𑀔𑀽 𑀯𑀸 𑀅𑀦𑀪𑀺𑀦𑁂𑀬𑁆𑀬 𑀯𑀢𑁆𑀣𑀼𑀤𑁂𑀲𑀦𑀸𑀬, 𑀧𑀫𑀸𑀡𑀁 𑀯𑀸 𑀅𑀢𑀺𑀓𑁆𑀓𑀸𑀫𑁂𑀬𑁆𑀬, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺.

𑁩𑁪𑁯. 𑀲𑀜𑁆𑀜𑀸𑀘𑀺𑀓𑀸 𑀦𑀸𑀫 𑀲𑀬𑀁 𑀬𑀸𑀘𑀺𑀢𑁆𑀯𑀸 𑀧𑀼𑀭𑀺𑀲𑀫𑁆𑀧𑀺 𑀧𑀼𑀭𑀺𑀲𑀢𑁆𑀣𑀓𑀭𑀫𑁆𑀧𑀺 𑀕𑁄𑀡𑀫𑁆𑀧𑀺 𑀲𑀓𑀝𑀫𑁆𑀧𑀺 𑀯𑀸𑀲𑀺𑀫𑁆𑀧𑀺 𑀧𑀭𑀲𑀼𑀫𑁆𑀧𑀺 𑀓𑀼𑀞𑀸𑀭𑀺𑀫𑁆𑀧𑀺 𑀓𑀼𑀤𑀸𑀮𑀫𑁆𑀧𑀺 𑀦𑀺𑀔𑀸𑀤𑀦𑀫𑁆𑀧𑀺 𑀯𑀮𑁆𑀮𑀺𑀫𑁆𑀧𑀺 𑀯𑁂𑀴𑀼𑀫𑁆𑀧𑀺 𑀫𑀼𑀜𑁆𑀚𑀫𑁆𑀧𑀺 𑀧𑀩𑁆𑀩𑀚𑀫𑁆𑀧𑀺 𑀢𑀺𑀡𑀫𑁆𑀧𑀺 𑀫𑀢𑁆𑀢𑀺𑀓𑀫𑁆𑀧𑀺.

𑀓𑀼𑀝𑀺 𑀦𑀸𑀫 𑀉𑀮𑁆𑀮𑀺𑀢𑁆𑀢𑀸 𑀯𑀸 𑀳𑁄𑀢𑀺 𑀅𑀯𑀮𑀺𑀢𑁆𑀢𑀸 𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸 𑀯𑀸.

𑀓𑀸𑀭𑀬𑀫𑀸𑀦𑁂𑀦𑀸𑀢𑀺 𑀓𑀭𑁄𑀦𑁆𑀢𑁄 𑀯𑀸 𑀓𑀸𑀭𑀸𑀧𑁂𑀦𑁆𑀢𑁄 𑀯𑀸.

𑀅𑀲𑁆𑀲𑀸𑀫𑀺𑀓𑀦𑁆𑀢𑀺 𑀦 𑀅𑀜𑁆𑀜𑁄 𑀓𑁄𑀘𑀺 𑀲𑀸𑀫𑀺𑀓𑁄 𑀳𑁄𑀢𑀺, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸.

𑀅𑀢𑁆𑀢𑀼𑀤𑁆𑀤𑁂𑀲𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬.

𑀧𑀫𑀸𑀡𑀺𑀓𑀸 𑀓𑀸𑀭𑁂𑀢𑀩𑁆𑀩𑀸. 𑀢𑀢𑁆𑀭𑀺𑀤𑀁 𑀧𑀫𑀸𑀡𑀁 𑁋 𑀤𑀻𑀖𑀲𑁄 𑀤𑁆𑀯𑀸𑀤𑀲 𑀯𑀺𑀤𑀢𑁆𑀣𑀺𑀬𑁄, 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸𑀢𑀺 𑀩𑀸𑀳𑀺𑀭𑀺𑀫𑁂𑀦 𑀫𑀸𑀦𑁂𑀦.

𑀢𑀺𑀭𑀺𑀬𑀁 𑀲𑀢𑁆𑀢𑀦𑁆𑀢𑀭𑀸𑀢𑀺 𑀅𑀩𑁆𑀪𑀦𑁆𑀢𑀭𑀺𑀫𑁂𑀦 𑀫𑀸𑀦𑁂𑀦.

𑀪𑀺𑀓𑁆𑀔𑀽 𑀅𑀪𑀺𑀦𑁂𑀢𑀩𑁆𑀩𑀸 𑀯𑀢𑁆𑀣𑀼𑀤𑁂𑀲𑀦𑀸𑀬𑀸𑀢𑀺 𑀢𑁂𑀦 𑀓𑀼𑀝𑀺𑀓𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀓𑀼𑀝𑀺𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀑𑀮𑁄𑀓𑀦𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀲𑀘𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀉𑀲𑁆𑀲𑀳𑀢𑀺 𑀓𑀼𑀝𑀺𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑀼𑀁, 𑀲𑀩𑁆𑀩𑁂𑀦 𑀲𑀗𑁆𑀖𑁂𑀦 𑀑𑀮𑁄𑀓𑁂𑀢𑀩𑁆𑀩𑀁. 𑀦𑁄 𑀘𑁂 𑀲𑀩𑁆𑀩𑁄 𑀲𑀗𑁆𑀖𑁄 𑀉𑀲𑁆𑀲𑀳𑀢𑀺 𑀓𑀼𑀝𑀺𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑀼𑀁, 𑀬𑁂 𑀢𑀢𑁆𑀣 𑀳𑁄𑀦𑁆𑀢𑀺 𑀪𑀺𑀓𑁆𑀔𑀽 𑀩𑁆𑀬𑀢𑁆𑀢𑀸 𑀧𑀝𑀺𑀩𑀮𑀸 𑀲𑀸𑀭𑀫𑁆𑀪𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁 𑀅𑀧𑀭𑀺𑀓𑁆𑀓𑀫𑀦𑀁 𑀚𑀸𑀦𑀺𑀢𑀼𑀁 𑀢𑁂 𑀬𑀸𑀘𑀺𑀢𑁆𑀯𑀸 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁩𑁫𑁦. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. 𑀲𑁄 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀑𑀮𑁄𑀓𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀜𑁆𑀘 𑀇𑀢𑁆𑀣𑀦𑁆𑀦𑀸𑀫𑀜𑁆𑀘 𑀪𑀺𑀓𑁆𑀔𑀽 𑀲𑀫𑁆𑀫𑀦𑁆𑀦𑁂𑀬𑁆𑀬 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑀼𑀁. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. 𑀲𑁄 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀑𑀮𑁄𑀓𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀜𑁆𑀘 𑀇𑀢𑁆𑀣𑀦𑁆𑀦𑀸𑀫𑀜𑁆𑀘 𑀪𑀺𑀓𑁆𑀔𑀽 𑀲𑀫𑁆𑀫𑀦𑁆𑀦𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑀼𑀁. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀘 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀘 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀢𑀺 [𑀲𑀫𑁆𑀫𑀢𑀺 (𑀲𑁆𑀬𑀸.)] 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑀼𑀁, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀲𑀫𑁆𑀫𑀢𑀸 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑁄 𑀘 𑀇𑀢𑁆𑀣𑀦𑁆𑀦𑀸𑀫𑁄 𑀘 𑀪𑀺𑀓𑁆𑀔𑀽 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑀼𑀁. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁩𑁫𑁧. 𑀢𑁂𑀳𑀺 𑀲𑀫𑁆𑀫𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀼𑀝𑀺𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩𑀁, 𑀲𑀸𑀭𑀫𑁆𑀪𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁 𑀅𑀧𑀭𑀺𑀓𑁆𑀓𑀫𑀦𑀁 𑀚𑀸𑀦𑀺𑀢𑀩𑁆𑀩𑀁. 𑀲𑀘𑁂 𑀲𑀸𑀭𑀫𑁆𑀪𑀁 𑀳𑁄𑀢𑀺 𑀅𑀧𑀭𑀺𑀓𑁆𑀓𑀫𑀦𑀁, ‘𑀫𑀸 𑀇𑀥 𑀓𑀭𑀻’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀘𑁂 𑀅𑀦𑀸𑀭𑀫𑁆𑀪𑀁 𑀳𑁄𑀢𑀺 𑀲𑀧𑀭𑀺𑀓𑁆𑀓𑀫𑀦𑀁, 𑀲𑀗𑁆𑀖𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁 𑁋 ‘𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦’𑀦𑁆𑀢𑀺. 𑀢𑁂𑀦 𑀓𑀼𑀝𑀺𑀓𑀸𑀭𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀼𑀟𑁆𑀠𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. 𑀲𑁄𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀢𑀢𑀺𑀬𑀫𑁆𑀧𑀺 𑀬𑀸𑀘𑀺𑀢𑀩𑁆𑀩𑀸. 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀲𑀗𑁆𑀖𑁄 𑀜𑀸𑀧𑁂𑀢𑀩𑁆𑀩𑁄 𑁋

𑁩𑁫𑁨. ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. 𑀲𑁄 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀁 𑀤𑁂𑀲𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀺.

‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄. 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀪𑀺𑀓𑁆𑀔𑀼 𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀢𑁆𑀢𑀼𑀓𑀸𑀫𑁄 𑀅𑀲𑁆𑀲𑀸𑀫𑀺𑀓𑀁 𑀅𑀢𑁆𑀢𑀼𑀤𑁆𑀤𑁂𑀲𑀁. 𑀲𑁄 𑀲𑀗𑁆𑀖𑀁 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀁 𑀬𑀸𑀘𑀢𑀺. 𑀲𑀗𑁆𑀖𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀁 𑀤𑁂𑀲𑁂𑀢𑀺. 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼𑀲𑁆𑀲 𑀤𑁂𑀲𑀦𑀸, 𑀲𑁄 𑀢𑀼𑀡𑁆𑀳𑀲𑁆𑀲; 𑀬𑀲𑁆𑀲 𑀦𑀓𑁆𑀔𑀫𑀢𑀺, 𑀲𑁄 𑀪𑀸𑀲𑁂𑀬𑁆𑀬.

‘‘𑀤𑁂𑀲𑀺𑀢𑀁 𑀲𑀗𑁆𑀖𑁂𑀦 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀼𑀝𑀺𑀯𑀢𑁆𑀣𑀼. 𑀔𑀫𑀢𑀺 𑀲𑀗𑁆𑀖𑀲𑁆𑀲, 𑀢𑀲𑁆𑀫𑀸 𑀢𑀼𑀡𑁆𑀳𑀻, 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺.

𑁩𑁫𑁩. 𑀲𑀸𑀭𑀫𑁆𑀪𑀁 𑀦𑀸𑀫 𑀓𑀺𑀧𑀺𑀮𑁆𑀮𑀺𑀓𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀉𑀧𑀘𑀺𑀓𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀉𑀦𑁆𑀤𑀼𑀭𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀅𑀳𑀻𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀯𑀺𑀘𑁆𑀙𑀺𑀓𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀲𑀢𑀧𑀤𑀻𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀳𑀢𑁆𑀣𑀻𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀅𑀲𑁆𑀲𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀲𑀻𑀳𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀩𑁆𑀬𑀕𑁆𑀖𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀤𑀻𑀧𑀻𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀅𑀘𑁆𑀙𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀢𑀭𑀘𑁆𑀙𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀸𑀡𑀸𑀦𑀁 𑀆𑀲𑀬𑁄 𑀳𑁄𑀢𑀺, 𑀧𑀼𑀩𑁆𑀩𑀡𑁆𑀡𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀅𑀧𑀭𑀡𑁆𑀡𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀅𑀩𑁆𑀪𑀸𑀖𑀸𑀢𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀆𑀖𑀸𑀢𑀦𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀲𑀼𑀲𑀸𑀦𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀉𑀬𑁆𑀬𑀸𑀦𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀭𑀸𑀚𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀳𑀢𑁆𑀣𑀺𑀲𑀸𑀮𑀸𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀅𑀲𑁆𑀲𑀲𑀸𑀮𑀸𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀩𑀦𑁆𑀥𑀦𑀸𑀕𑀸𑀭𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀧𑀸𑀦𑀸𑀕𑀸𑀭𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀲𑀽𑀦𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀭𑀘𑁆𑀙𑀸𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀘𑀘𑁆𑀘𑀭𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀲𑀪𑀸𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺, 𑀲𑀁𑀲𑀭𑀡𑀦𑀺𑀲𑁆𑀲𑀺𑀢𑀁 𑀯𑀸 [𑀲𑀜𑁆𑀘𑀭𑀡𑀦𑀺𑀲𑁆𑀲𑀺𑀢𑀁 𑀯𑀸 (𑀓.)] 𑀳𑁄𑀢𑀺. 𑀏𑀢𑀁 𑀲𑀸𑀭𑀫𑁆𑀪𑀁 𑀦𑀸𑀫.

𑀅𑀧𑀭𑀺𑀓𑁆𑀓𑀫𑀦𑀁 𑀦𑀸𑀫 𑀦 𑀲𑀓𑁆𑀓𑀸 𑀳𑁄𑀢𑀺 𑀬𑀣𑀸𑀬𑀼𑀢𑁆𑀢𑁂𑀦 𑀲𑀓𑀝𑁂𑀦 𑀅𑀦𑀼𑀧𑀭𑀺𑀕𑀦𑁆𑀢𑀼𑀁 𑀲𑀫𑀦𑁆𑀢𑀸 𑀦𑀺𑀲𑁆𑀲𑁂𑀡𑀺𑀬𑀸 𑀅𑀦𑀼𑀧𑀭𑀺𑀕𑀦𑁆𑀢𑀼𑀁. 𑀏𑀢𑀁 𑀅𑀧𑀭𑀺𑀓𑁆𑀓𑀫𑀦𑀁 𑀦𑀸𑀫.

𑀅𑀦𑀸𑀭𑀫𑁆𑀪𑀁 𑀦𑀸𑀫 𑀦 𑀓𑀺𑀧𑀺𑀮𑁆𑀮𑀺𑀓𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀦 𑀉𑀧𑀘𑀺𑀓𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀦 𑀉𑀦𑁆𑀤𑀼𑀭𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀦 𑀅𑀳𑀻𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀦 𑀯𑀺𑀘𑁆𑀙𑀺𑀓𑀸𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺, 𑀦 𑀲𑀢𑀧𑀤𑀻𑀦𑀁 𑀯𑀸 𑀆𑀲𑀬𑁄 𑀳𑁄𑀢𑀺…𑀧𑁂… 𑀦 𑀲𑀁𑀲𑀭𑀡𑀦𑀺𑀲𑁆𑀲𑀺𑀢𑀁 𑀯𑀸 𑀳𑁄𑀢𑀺. 𑀏𑀢𑀁 𑀅𑀦𑀸𑀭𑀫𑁆𑀪𑀁 𑀦𑀸𑀫.

𑀲𑀧𑀭𑀺𑀓𑁆𑀓𑀫𑀦𑀁 𑀦𑀸𑀫 𑀲𑀓𑁆𑀓𑀸 𑀳𑁄𑀢𑀺 𑀬𑀣𑀸𑀬𑀼𑀢𑁆𑀢𑁂𑀦 𑀲𑀓𑀝𑁂𑀦 𑀅𑀦𑀼𑀧𑀭𑀺𑀕𑀦𑁆𑀢𑀼𑀁, 𑀲𑀫𑀦𑁆𑀢𑀸 𑀦𑀺𑀲𑁆𑀲𑁂𑀡𑀺𑀬𑀸 𑀅𑀦𑀼𑀧𑀭𑀺𑀕𑀦𑁆𑀢𑀼𑀁. 𑀏𑀢𑀁 𑀲𑀧𑀭𑀺𑀓𑁆𑀓𑀫𑀦𑀁 𑀦𑀸𑀫.

𑀲𑀜𑁆𑀜𑀸𑀘𑀺𑀓𑀸 𑀦𑀸𑀫 𑀲𑀬𑀁 𑀬𑀸𑀘𑀺𑀢𑁆𑀯𑀸 𑀧𑀼𑀭𑀺𑀲𑀫𑁆𑀧𑀺 𑀧𑀼𑀭𑀺𑀲𑀢𑁆𑀣𑀓𑀭𑀫𑁆𑀧𑀺…𑀧𑁂… 𑀫𑀢𑁆𑀢𑀺𑀓𑀫𑁆𑀧𑀺.

𑀓𑀼𑀝𑀺 𑀦𑀸𑀫 𑀉𑀮𑁆𑀮𑀺𑀢𑁆𑀢𑀸 𑀯𑀸 𑀳𑁄𑀢𑀺 𑀯𑀸 𑀅𑀯𑀮𑀺𑀢𑁆𑀢𑀸 𑀯𑀸 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸 𑀯𑀸.

𑀓𑀸𑀭𑁂𑀬𑁆𑀬𑀸𑀢𑀺 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸.

𑀪𑀺𑀓𑁆𑀔𑀽 𑀯𑀸 𑀅𑀦𑀪𑀺𑀦𑁂𑀬𑁆𑀬, 𑀯𑀢𑁆𑀣𑀼𑀤𑁂𑀲𑀦𑀸𑀬 𑀧𑀫𑀸𑀡𑀁 𑀯𑀸 𑀅𑀢𑀺𑀓𑁆𑀓𑀸𑀫𑁂𑀬𑁆𑀬𑀸𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀓𑀼𑀝𑀺𑀯𑀢𑁆𑀣𑀼𑀁 𑀦 𑀤𑁂𑀲𑀸𑀧𑁂𑀢𑁆𑀯𑀸, 𑀆𑀬𑀸𑀫𑀢𑁄 𑀯𑀸 𑀯𑀺𑀢𑁆𑀣𑀸𑀭𑀢𑁄 𑀯𑀸 𑀅𑀦𑁆𑀢𑀫𑀲𑁄 𑀓𑁂𑀲𑀕𑁆𑀕𑀫𑀢𑁆𑀢𑀫𑁆𑀧𑀺 𑀅𑀢𑀺𑀓𑁆𑀓𑀸𑀫𑁂𑀢𑁆𑀯𑀸 𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸, 𑀧𑀬𑁄𑀕𑁂 𑀧𑀬𑁄𑀕𑁂 𑀤𑀼𑀓𑁆𑀓𑀝𑀁. 𑀏𑀓𑀁 𑀧𑀺𑀡𑁆𑀟𑀁 𑀅𑀦𑀸𑀕𑀢𑁂 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀢𑀲𑁆𑀫𑀺𑀁 𑀧𑀺𑀡𑁆𑀟𑁂 𑀆𑀕𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺…𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑁩𑁫𑁪. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁩𑁫𑁫. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀺𑀓𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀧𑀫𑀸𑀡𑀺𑀓𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁.

𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀪𑀺𑀓𑁆𑀔𑀼 𑀓𑀼𑀝𑀺𑀁 𑀓𑀭𑁄𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑁩𑁫𑁬. 𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑁩𑁫𑁭. 𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀦 𑀘 𑀲𑀫𑀸𑀤𑀺𑀲𑀢𑀺 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀦 𑀘 𑀲𑀫𑀸𑀤𑀺𑀲𑀢𑀺 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀦 𑀘 𑀲𑀫𑀸𑀤𑀺𑀲𑀢𑀺 𑁋 ‘‘𑀧𑀫𑀸𑀡𑀺𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀦 𑀘 𑀲𑀫𑀸𑀤𑀺𑀲𑀢𑀺 𑁋 ‘‘𑀧𑀫𑀸𑀡𑀺𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀦 𑀘 𑀲𑀫𑀸𑀤𑀺𑀲𑀢𑀺 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲 …𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀦 𑀘 𑀲𑀫𑀸𑀤𑀺𑀲𑀢𑀺 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑁩𑁫𑁮. 𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀲𑀸𑀭𑀫𑁆𑀪𑀸 𑀅𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀦𑁄 𑀘𑁂 𑀲𑀸𑀫𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀤𑀽𑀢𑀁 𑀯𑀸 𑀧𑀳𑀺𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀲𑀸𑀭𑀫𑁆𑀪𑀸 𑀲𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘𑀸’’𑀢𑀺. 𑀦𑁄 𑀘𑁂 𑀲𑀸𑀫𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀤𑀽𑀢𑀁 𑀯𑀸 𑀧𑀳𑀺𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀅𑀦𑀸𑀭𑀫𑁆𑀪𑀸 𑀅𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀦𑁄 𑀘𑁂 𑀲𑀸𑀫𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀤𑀽𑀢𑀁 𑀯𑀸 𑀧𑀳𑀺𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀅𑀦𑀸𑀭𑀫𑁆𑀪𑀸 𑀲𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀳𑁄𑀢𑀽’’𑀢𑀺. 𑀦𑁄 𑀘𑁂 𑀲𑀸𑀫𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀤𑀽𑀢𑀁 𑀯𑀸 𑀧𑀳𑀺𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀲𑀸𑀭𑀫𑁆𑀪𑀸 𑀅𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀅𑀦𑀸𑀭𑀫𑁆𑀪𑀸 𑀘 𑀳𑁄𑀢𑀼 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀦𑁄 𑀘𑁂 𑀲𑀸𑀫𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀤𑀽𑀢𑀁 𑀯𑀸 𑀧𑀳𑀺𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀲𑀸𑀭𑀫𑁆𑀪𑀸 𑀲𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀅𑀦𑀸𑀭𑀫𑁆𑀪𑀸 𑀳𑁄𑀢𑀽’’𑀢𑀺. 𑀦𑁄 𑀘𑁂 𑀲𑀸𑀫𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀤𑀽𑀢𑀁 𑀯𑀸 𑀧𑀳𑀺𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀅𑀦𑀸𑀭𑀫𑁆𑀪𑀸 𑀅𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀲𑀧𑀭𑀺𑀓𑁆𑀓𑀫𑀦𑀸 𑀳𑁄𑀢𑀽’’𑀢𑀺. 𑀦𑁄 𑀘𑁂 𑀲𑀸𑀫𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀤𑀽𑀢𑀁 𑀯𑀸 𑀧𑀳𑀺𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑁩𑁫𑁯. 𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀧𑀫𑀸𑀡𑀺𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸 𑀲𑀸𑀭𑀫𑁆𑀪𑀸 𑀅𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀧𑀫𑀸𑀡𑀺𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺…𑀧𑁂… ‘‘𑀧𑀫𑀸𑀡𑀺𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘𑀸’’𑀢𑀺…𑀧𑁂… ‘‘𑀧𑀫𑀸𑀡𑀺𑀓𑀸 𑀘 𑀳𑁄𑀢𑀼 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺…𑀧𑁂… ‘‘𑀧𑀫𑀸𑀡𑀺𑀓𑀸 𑀳𑁄𑀢𑀽’’𑀢𑀺. 𑀦𑁄 𑀘𑁂 𑀲𑀸𑀫𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀤𑀽𑀢𑀁 𑀯𑀸 𑀧𑀳𑀺𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀧𑀫𑀸𑀡𑀺𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀧𑀫𑀸𑀡𑀺𑀓𑀸 𑀲𑀸𑀭𑀫𑁆𑀪𑀸 𑀅𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀅𑀦𑀸𑀭𑀫𑁆𑀪𑀸 𑀘 𑀳𑁄𑀢𑀼 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺…𑀧𑁂… ‘‘𑀅𑀦𑀸𑀭𑀫𑁆𑀪𑀸 𑀳𑁄𑀢𑀽’’𑀢𑀺…𑀧𑁂… ‘‘𑀲𑀧𑀭𑀺𑀓𑁆𑀓𑀫𑀦𑀸 𑀳𑁄𑀢𑀽’’𑀢𑀺…𑀧𑁂… 𑀅𑀦𑀸𑀧𑀢𑁆𑀢𑀺.

𑁩𑁬𑁦. 𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸 𑀲𑀸𑀭𑀫𑁆𑀪𑀸 𑀅𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺…𑀧𑁂… ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘 𑀅𑀦𑀸𑀭𑀫𑁆𑀪𑀸 𑀘𑀸’’𑀢𑀺…𑀧𑁂… ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺…𑀧𑁂… ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘𑀸’’𑀢𑀺. 𑀦𑁄 𑀘𑁂 𑀲𑀸𑀫𑀁 𑀯𑀸 𑀕𑀘𑁆𑀙𑁂𑀬𑁆𑀬 𑀤𑀽𑀢𑀁 𑀯𑀸 𑀧𑀳𑀺𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀲𑀼𑀡𑀸𑀢𑀺 𑁋 ‘‘𑀓𑀼𑀝𑀺 𑀓𑀺𑀭 𑀫𑁂 𑀓𑀬𑀺𑀭𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀧𑀫𑀸𑀡𑀺𑀓𑀸 𑀲𑀸𑀭𑀫𑁆𑀪𑀸 𑀅𑀧𑀭𑀺𑀓𑁆𑀓𑀫𑀦𑀸’’𑀢𑀺. 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀁 𑀯𑀸 𑀕𑀦𑁆𑀢𑀩𑁆𑀩𑀁 𑀤𑀽𑀢𑁄 𑀯𑀸 𑀧𑀸𑀳𑁂𑀢𑀩𑁆𑀩𑁄 𑁋 ‘‘𑀅𑀦𑀸𑀭𑀫𑁆𑀪𑀸 𑀘 𑀳𑁄𑀢𑀼 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺…𑀧𑁂… ‘‘𑀅𑀦𑀸𑀭𑀫𑁆𑀪𑀸 𑀳𑁄𑀢𑀽’’𑀢𑀺…𑀧𑁂… ‘‘𑀲𑀧𑀭𑀺𑀓𑁆𑀓𑀫𑀦𑀸 𑀳𑁄𑀢𑀽’’𑀢𑀺…𑀧𑁂… 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀸𑀝𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀧𑀫𑀸𑀡𑀺𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀧𑀫𑀸𑀡𑀺𑀓𑀸 𑀘 𑀳𑁄𑀢𑀼 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀘𑀢𑀼𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀲𑀫𑀸𑀤𑀺𑀲𑀢𑀺 𑀘 𑁋 ‘‘𑀤𑁂𑀲𑀺𑀢𑀯𑀢𑁆𑀣𑀼𑀓𑀸 𑀘 𑀳𑁄𑀢𑀼 𑀧𑀫𑀸𑀡𑀺𑀓𑀸 𑀘 𑀅𑀦𑀸𑀭𑀫𑁆𑀪𑀸 𑀘 𑀲𑀧𑀭𑀺𑀓𑁆𑀓𑀫𑀦𑀸 𑀘𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑁩𑁬𑁧. 𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀘𑁂 𑀯𑀺𑀧𑁆𑀧𑀓𑀢𑁂 𑀆𑀕𑀘𑁆𑀙𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸 𑀓𑀼𑀝𑀺 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸. 𑀦𑁄 𑀘𑁂 𑀅𑀜𑁆𑀜𑀲𑁆𑀲 𑀯𑀸 𑀤𑀤𑁂𑀬𑁆𑀬 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀘𑁂 𑀯𑀺𑀧𑁆𑀧𑀓𑀢𑁂 𑀆𑀕𑀘𑁆𑀙𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸 𑀓𑀼𑀝𑀺 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸. 𑀦𑁄 𑀘𑁂 𑀅𑀜𑁆𑀜𑀲𑁆𑀲 𑀯𑀸 𑀤𑀤𑁂𑀬𑁆𑀬 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁…𑀧𑁂… 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁…𑀧𑁂… 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀘𑁂 𑀯𑀺𑀧𑁆𑀧𑀓𑀢𑁂 𑀆𑀕𑀘𑁆𑀙𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸 𑀓𑀼𑀝𑀺 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸. 𑀦𑁄 𑀘𑁂 𑀅𑀜𑁆𑀜𑀲𑁆𑀲 𑀯𑀸 𑀤𑀤𑁂𑀬𑁆𑀬 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑁩𑁬𑁨. 𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀘𑁂 𑀯𑀺𑀧𑁆𑀧𑀓𑀢𑁂 𑀆𑀕𑀘𑁆𑀙𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸 𑀓𑀼𑀝𑀺 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸. 𑀦𑁄 𑀘𑁂 𑀅𑀜𑁆𑀜𑀲𑁆𑀲 𑀯𑀸 𑀤𑀤𑁂𑀬𑁆𑀬 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀘𑁂 𑀯𑀺𑀧𑁆𑀧𑀓𑀢𑁂 𑀆𑀕𑀘𑁆𑀙𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸 𑀓𑀼𑀝𑀺 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸. 𑀦𑁄 𑀘𑁂 𑀅𑀜𑁆𑀜𑀲𑁆𑀲 𑀯𑀸 𑀤𑀤𑁂𑀬𑁆𑀬 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀘𑁂 𑀯𑀺𑀧𑁆𑀧𑀓𑀢𑁂 𑀆𑀕𑀘𑁆𑀙𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸 𑀓𑀼𑀝𑀺 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸. 𑀦𑁄 𑀘𑁂 𑀅𑀜𑁆𑀜𑀲𑁆𑀲 𑀯𑀸 𑀤𑀤𑁂𑀬𑁆𑀬 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁. 𑀲𑁄 𑀘𑁂 𑀯𑀺𑀧𑁆𑀧𑀓𑀢𑁂 𑀆𑀕𑀘𑁆𑀙𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸 𑀓𑀼𑀝𑀺 𑀅𑀜𑁆𑀜𑀲𑁆𑀲 𑀯𑀸 𑀤𑀸𑀢𑀩𑁆𑀩𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀢𑀩𑁆𑀩𑀸. 𑀦𑁄 𑀘𑁂 𑀅𑀜𑁆𑀜𑀲𑁆𑀲 𑀯𑀸 𑀤𑀤𑁂𑀬𑁆𑀬 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸 𑀧𑀼𑀦 𑀓𑀸𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀸𑀝𑀸𑀦𑀁…𑀧𑁂… 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂… 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀪𑀺𑀓𑁆𑀔𑀼 𑀲𑀫𑀸𑀤𑀺𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀺 𑁋 ‘‘𑀓𑀼𑀝𑀺𑀁 𑀫𑁂 𑀓𑀭𑁄𑀣𑀸’’𑀢𑀺. 𑀢𑀲𑁆𑀲 𑀓𑀼𑀝𑀺𑀁 𑀓𑀭𑁄𑀦𑁆𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀁 𑀧𑀫𑀸𑀡𑀺𑀓𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀦𑀸𑀧𑀢𑁆𑀢𑀺.

𑁩𑁬𑁩. 𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀁 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀺 [𑀧𑀭𑀺𑀬𑁄𑀲𑀸𑀯𑀸𑀧𑁂𑀢𑀺 (𑀓.)], 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀭𑁂𑀳𑀺 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀧𑀭𑁂𑀳𑀺 𑀯𑀺𑀧𑁆𑀧𑀓𑀢𑀁 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀺 [𑀧𑀭𑀺𑀬𑁄𑀲𑀸𑀯𑀸𑀧𑁂𑀢𑀺 (𑀓.)], 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑁩𑁬𑁪. 𑀅𑀦𑀸𑀧𑀢𑁆𑀢𑀺 𑀮𑁂𑀡𑁂 𑀕𑀼𑀳𑀸𑀬 𑀢𑀺𑀡𑀓𑀼𑀝𑀺𑀓𑀸𑀬 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣, 𑀅𑀦𑀸𑀧𑀢𑁆𑀢𑀺 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.