𑁪. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀁

𑁨𑁯𑁦. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀽𑀧𑀓𑁄 𑀳𑁄𑀢𑀺, 𑀩𑀳𑀼𑀓𑀸𑀦𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀫𑀢𑀧𑀢𑀺𑀓𑀸 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀬𑁂𑀦𑀸𑀬𑀲𑁆𑀫𑀸 𑀉𑀤𑀸𑀬𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀢𑀁 𑀇𑀢𑁆𑀣𑀺𑀁 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀆𑀬𑀲𑁆𑀫𑀢𑀸 𑀉𑀤𑀸𑀬𑀺𑀦𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘 𑁋 ‘‘𑀯𑀤𑁂𑀬𑁆𑀬𑀸𑀣, 𑀪𑀦𑁆𑀢𑁂, 𑀬𑁂𑀦 𑀅𑀢𑁆𑀣𑁄. 𑀧𑀝𑀺𑀩𑀮𑀸 𑀫𑀬𑀁 𑀅𑀬𑁆𑀬𑀲𑁆𑀲 𑀤𑀸𑀢𑀼𑀁 𑀬𑀤𑀺𑀤𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺.

‘‘𑀦 𑀔𑁄 𑀢𑁂, 𑀪𑀕𑀺𑀦𑀺, 𑀅𑀫𑁆𑀳𑀸𑀓𑀁 𑀤𑀼𑀮𑁆𑀮𑀪𑀸 𑀬𑀤𑀺𑀤𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸. 𑀅𑀧𑀺𑀘, 𑀬𑁄 𑀅𑀫𑁆𑀳𑀸𑀓𑀁 𑀤𑀼𑀮𑁆𑀮𑀪𑁄 𑀢𑀁 𑀤𑁂𑀳𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂’’𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. ‘‘𑀅𑀢𑁆𑀣𑁄, 𑀪𑀦𑁆𑀢𑁂’’𑀢𑀺? ‘‘𑀅𑀢𑁆𑀣𑁄, 𑀪𑀕𑀺𑀦𑀻’’𑀢𑀺. ‘‘𑀏𑀳𑀺, 𑀪𑀦𑁆𑀢𑁂’’𑀢𑀺, 𑀑𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀲𑀸𑀝𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀜𑁆𑀘𑀓𑁂 𑀉𑀢𑁆𑀢𑀸𑀦𑀸 𑀦𑀺𑀧𑀚𑁆𑀚𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀬𑁂𑀦 𑀲𑀸 𑀇𑀢𑁆𑀣𑀻 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀓𑁄 𑀇𑀫𑀁 𑀯𑀲𑀮𑀁 𑀤𑀼𑀕𑁆𑀕𑀦𑁆𑀥𑀁 𑀆𑀫𑀲𑀺𑀲𑁆𑀲𑀢𑀻’’𑀢𑀺, 𑀦𑀺𑀝𑁆𑀞𑀼𑀳𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑀸 𑀇𑀢𑁆𑀣𑀻 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀲𑁆𑀲𑀻𑀮𑀸 𑀫𑀼𑀲𑀸𑀯𑀸𑀤𑀺𑀦𑁄. 𑀇𑀫𑁂 𑀳𑀺 𑀦𑀸𑀫 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀺! 𑀦𑀢𑁆𑀣𑀺 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁 𑀦𑀢𑁆𑀣𑀺 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀦𑀝𑁆𑀞𑀁 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁 𑀦𑀝𑁆𑀞𑀁 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀓𑀼𑀢𑁄 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁 𑀓𑀼𑀢𑁄 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀅𑀧𑀕𑀢𑀸 𑀇𑀫𑁂 𑀲𑀸𑀫𑀜𑁆𑀜𑀸 𑀅𑀧𑀕𑀢𑀸 𑀇𑀫𑁂 𑀩𑁆𑀭𑀳𑁆𑀫𑀜𑁆𑀜𑀸. 𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑁄 𑀉𑀤𑀸𑀬𑀻 𑀫𑀁 𑀲𑀸𑀫𑀁 𑀫𑁂𑀣𑀼𑀦𑀥𑀫𑁆𑀫𑀁 𑀬𑀸𑀘𑀺𑀢𑁆𑀯𑀸, ‘𑀓𑁄 𑀇𑀫𑀁 𑀯𑀲𑀮𑀁 𑀤𑀼𑀕𑁆𑀕𑀦𑁆𑀥𑀁 𑀆𑀫𑀲𑀺𑀲𑁆𑀲𑀢𑀻’’𑀢𑀺 𑀦𑀺𑀝𑁆𑀞𑀼𑀳𑀺𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀢𑀺! 𑀓𑀺𑀁 𑀫𑁂 𑀧𑀸𑀧𑀓𑀁 𑀓𑀺𑀁 𑀫𑁂 𑀤𑀼𑀕𑁆𑀕𑀦𑁆𑀥𑀁, 𑀓𑀲𑁆𑀲𑀸𑀳𑀁 𑀓𑁂𑀦 𑀳𑀸𑀬𑀸𑀫𑀻’’𑀢𑀺? 𑀅𑀜𑁆𑀜𑀸𑀧𑀺 𑀇𑀢𑁆𑀣𑀺𑀬𑁄 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀲𑁆𑀲𑀻𑀮𑀸 𑀫𑀼𑀲𑀸𑀯𑀸𑀤𑀺𑀦𑁄…𑀧𑁂… 𑀓𑀣𑀜𑁆𑀳𑀺 𑀦𑀸𑀫 𑀲𑀫𑀡𑁄 𑀉𑀤𑀸𑀬𑀻 𑀇𑀫𑀺𑀲𑁆𑀲𑀸 𑀲𑀸𑀫𑀁 𑀫𑁂𑀣𑀼𑀦𑀥𑀫𑁆𑀫𑀁 𑀬𑀸𑀘𑀺𑀢𑁆𑀯𑀸, ‘𑀓𑁄 𑀇𑀫𑀁 𑀯𑀲𑀮𑀁 𑀤𑀼𑀕𑁆𑀕𑀦𑁆𑀥𑀁 𑀆𑀫𑀲𑀺𑀲𑁆𑀲𑀢𑀻’𑀢𑀺 𑀦𑀺𑀝𑁆𑀞𑀼𑀳𑀺𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀢𑀺! 𑀓𑀺𑀁 𑀇𑀫𑀺𑀲𑁆𑀲𑀸 𑀧𑀸𑀧𑀓𑀁 𑀓𑀺𑀁 𑀇𑀫𑀺𑀲𑁆𑀲𑀸 𑀤𑀼𑀕𑁆𑀕𑀦𑁆𑀥𑀁, 𑀓𑀲𑁆𑀲𑀸𑀬𑀁 𑀓𑁂𑀦 𑀳𑀸𑀬𑀢𑀻’’𑀢𑀺? 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑀸𑀲𑀁 𑀇𑀢𑁆𑀣𑀻𑀦𑀁 𑀉𑀚𑁆𑀛𑀸𑀬𑀦𑁆𑀢𑀻𑀦𑀁 𑀔𑀺𑀬𑁆𑀬𑀦𑁆𑀢𑀻𑀦𑀁 𑀯𑀺𑀧𑀸𑀘𑁂𑀦𑁆𑀢𑀻𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀢𑀻’’𑀢𑀺!

𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀤𑀸𑀬𑀺, 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀲𑀺! 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀭𑀸𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀦𑁄 𑀲𑀭𑀸𑀕𑀸𑀬…𑀧𑁂… 𑀓𑀸𑀫𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑁄 𑀅𑀓𑁆𑀔𑀸𑀢𑁄? 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁯𑁧. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀑𑀢𑀺𑀡𑁆𑀡𑁄 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬 𑁋 ‘𑀏𑀢𑀤𑀕𑁆𑀕𑀁, 𑀪𑀕𑀺𑀦𑀺, 𑀧𑀸𑀭𑀺𑀘𑀭𑀺𑀬𑀸𑀦𑀁 𑀬𑀸 𑀫𑀸𑀤𑀺𑀲𑀁 𑀲𑀻𑀮𑀯𑀦𑁆𑀢𑀁 𑀓𑀮𑁆𑀬𑀸𑀡𑀥𑀫𑁆𑀫𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀏𑀢𑁂𑀦 𑀥𑀫𑁆𑀫𑁂𑀦 𑀧𑀭𑀺𑀘𑀭𑁂𑀬𑁆𑀬𑀸𑀢𑀺 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦’, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺.

𑁨𑁯𑁨. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀑𑀢𑀺𑀡𑁆𑀡𑁄 𑀦𑀸𑀫 𑀲𑀸𑀭𑀢𑁆𑀢𑁄 𑀅𑀧𑁂𑀓𑁆𑀔𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄.

𑀯𑀺𑀧𑀭𑀺𑀡𑀢𑀦𑁆𑀢𑀺 𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑁆𑀢𑀁, 𑀤𑀼𑀝𑁆𑀞𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁, 𑀫𑀽𑀴𑁆𑀳𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁. 𑀅𑀧𑀺𑀘, 𑀭𑀢𑁆𑀢𑀁 𑀘𑀺𑀢𑁆𑀢𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀁 𑀯𑀺𑀧𑀭𑀺𑀡𑀢𑀦𑁆𑀢𑀺.

𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸. 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼𑀁.

𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑁂𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀲𑀸𑀫𑀦𑁆𑀢𑀸, 𑀫𑀸𑀢𑀼𑀕𑀸𑀫𑀲𑁆𑀲 𑀅𑀯𑀺𑀤𑀽𑀭𑁂.

𑀅𑀢𑁆𑀢𑀓𑀸𑀫𑀦𑁆𑀢𑀺 𑀅𑀢𑁆𑀢𑀦𑁄 𑀓𑀸𑀫𑀁 𑀅𑀢𑁆𑀢𑀦𑁄 𑀳𑁂𑀢𑀼𑀁 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀅𑀢𑁆𑀢𑀦𑁄 𑀧𑀸𑀭𑀺𑀘𑀭𑀺𑀬𑀁.

𑀏𑀢𑀤𑀕𑁆𑀕𑀦𑁆𑀢𑀺 𑀏𑀢𑀁 𑀅𑀕𑁆𑀕𑀁 𑀏𑀢𑀁 𑀲𑁂𑀝𑁆𑀞𑀁 𑀏𑀢𑀁 𑀫𑁄𑀓𑁆𑀔𑀁 𑀏𑀢𑀁 𑀉𑀢𑁆𑀢𑀫𑀁 𑀏𑀢𑀁 𑀧𑀯𑀭𑀁.

𑀬𑀸𑀢𑀺 𑀔𑀢𑁆𑀢𑀺𑀬𑀻 [𑀔𑀢𑁆𑀢𑀺𑀬𑀸 (𑀲𑁆𑀬𑀸.)] 𑀯𑀸 𑀩𑁆𑀭𑀸𑀳𑁆𑀫𑀡𑀻 𑀯𑀸 𑀯𑁂𑀲𑁆𑀲𑀻 𑀯𑀸 𑀲𑀼𑀤𑁆𑀤𑀻 𑀯𑀸.

𑀫𑀸𑀤𑀺𑀲𑀦𑁆𑀢𑀺 𑀔𑀢𑁆𑀢𑀺𑀬𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑁂𑀲𑁆𑀲𑀁 𑀯𑀸 𑀲𑀼𑀤𑁆𑀤𑀁 𑀯𑀸.

𑀲𑀻𑀮𑀯𑀦𑁆𑀢𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀁, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀁, 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀁.

𑀩𑁆𑀭𑀳𑁆𑀫𑀘𑀸𑀭𑀺𑀦𑁆𑀢𑀺 𑀫𑁂𑀣𑀼𑀦𑀥𑀫𑁆𑀫𑀸 𑀧𑀝𑀺𑀯𑀺𑀭𑀢𑀁.

𑀓𑀮𑁆𑀬𑀸𑀡𑀥𑀫𑁆𑀫𑁄 𑀦𑀸𑀫 𑀢𑁂𑀦 𑀘 𑀲𑀻𑀮𑁂𑀦 𑀢𑁂𑀦 𑀘 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑁄 𑀳𑁄𑀢𑀺.

𑀏𑀢𑁂𑀦 𑀥𑀫𑁆𑀫𑁂𑀦𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑁂𑀦.

𑀧𑀭𑀺𑀘𑀭𑁂𑀬𑁆𑀬𑀸𑀢𑀺 𑀅𑀪𑀺𑀭𑀫𑁂𑀬𑁆𑀬.

𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑁂𑀦𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂𑀦.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺…𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑁨𑁯𑁩. 𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲.

𑀇𑀢𑁆𑀣𑀻 𑀘 𑀳𑁄𑀢𑀺 𑀯𑁂𑀫𑀢𑀺𑀓𑁄…𑀧𑁂… 𑀧𑀡𑁆𑀟𑀓𑀲𑀜𑁆𑀜𑀻… 𑀧𑀼𑀭𑀺𑀲𑀲𑀜𑁆𑀜𑀻… 𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀧𑀡𑁆𑀟𑀓𑁄 𑀘 𑀳𑁄𑀢𑀺 𑀧𑀡𑁆𑀟𑀓𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀧𑀡𑁆𑀟𑀓𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀧𑀡𑁆𑀟𑀓𑁄 𑀘 𑀳𑁄𑀢𑀺 𑀯𑁂𑀫𑀢𑀺𑀓𑁄…𑀧𑁂… 𑀧𑀼𑀭𑀺𑀲𑀲𑀜𑁆𑀜𑀻… 𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀻… 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀧𑀡𑁆𑀟𑀓𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀧𑀼𑀭𑀺𑀲𑁄 𑀘 𑀳𑁄𑀢𑀺…𑀧𑁂… 𑀢𑀺𑀭𑀘𑁆𑀙𑀸𑀦𑀕𑀢𑁄 𑀘 𑀳𑁄𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀻…𑀧𑁂… 𑀯𑁂𑀫𑀢𑀺𑀓𑁄 𑀇𑀢𑁆𑀣𑀺𑀲𑀜𑁆𑀜𑀻… 𑀧𑀡𑁆𑀟𑀓𑀲𑀜𑁆𑀜𑀻… 𑀧𑀼𑀭𑀺𑀲𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀤𑁆𑀯𑁂 𑀇𑀢𑁆𑀣𑀺𑀬𑁄 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁…𑀧𑁂….

𑀇𑀢𑁆𑀣𑀻 𑀘 𑀧𑀡𑁆𑀟𑀓𑁄 𑀘 𑀉𑀪𑀺𑀦𑁆𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀉𑀪𑀺𑀦𑁆𑀦𑀁 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂….

𑁨𑁯𑁪. 𑀅𑀦𑀸𑀧𑀢𑁆𑀢𑀺 ‘‘𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦 𑀉𑀧𑀝𑁆𑀞𑀳𑀸’’𑀢𑀺 𑀪𑀡𑀢𑀺, 𑀉𑀫𑁆𑀫𑀢𑁆𑀢𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼𑀉𑀤𑁆𑀤𑀸𑀦𑀕𑀸𑀣𑀸

𑀓𑀣𑀁 𑀯𑀜𑁆𑀛𑀸 𑀮𑀪𑁂 𑀧𑀼𑀢𑁆𑀢𑀁, 𑀧𑀺𑀬𑀸 𑀘 𑀲𑀼𑀪𑀕𑀸 𑀲𑀺𑀬𑀁;

𑀓𑀺𑀁 𑀤𑀚𑁆𑀚𑀁 𑀓𑁂𑀦𑀼𑀧𑀝𑁆𑀞𑁂𑀬𑁆𑀬𑀁, 𑀓𑀣𑀁 𑀕𑀘𑁆𑀙𑁂𑀬𑁆𑀬𑀁 𑀲𑀼𑀕𑁆𑀕𑀢𑀺𑀦𑁆𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼

𑁨𑁯𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀯𑀜𑁆𑀛𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀯𑀺𑀚𑀸𑀬𑁂𑀬𑁆𑀬’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀪𑀕𑀺𑀦𑀺, 𑀅𑀕𑁆𑀕𑀤𑀸𑀦𑀁 𑀤𑁂𑀳𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀅𑀕𑁆𑀕𑀤𑀸𑀦’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀯𑀺𑀚𑀸𑀬𑀺𑀦𑀻 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀪𑀕𑀺𑀦𑀺, 𑀅𑀕𑁆𑀕𑀤𑀸𑀦𑀁 𑀤𑁂𑀳𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀅𑀕𑁆𑀕𑀤𑀸𑀦’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀅𑀲𑁆𑀲’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀪𑀕𑀺𑀦𑀺, 𑀅𑀕𑁆𑀕𑀤𑀸𑀦𑀁 𑀤𑁂𑀳𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀅𑀕𑁆𑀕𑀤𑀸𑀦’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀸𑀳𑀁, 𑀪𑀦𑁆𑀢𑁂, 𑀲𑀼𑀪𑀕𑀸 𑀅𑀲𑁆𑀲’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀪𑀕𑀺𑀦𑀺, 𑀅𑀕𑁆𑀕𑀤𑀸𑀦𑀁 𑀤𑁂𑀳𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀅𑀕𑁆𑀕𑀤𑀸𑀦’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑁆𑀬𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀤𑀚𑁆𑀚𑀸𑀫𑀻’’𑀢𑀺? ‘‘𑀅𑀕𑁆𑀕𑀤𑀸𑀦𑀁, 𑀪𑀕𑀺𑀦𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀅𑀕𑁆𑀕𑀤𑀸𑀦’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑁂𑀦𑀸𑀳𑀁, 𑀪𑀦𑁆𑀢𑁂, 𑀅𑀬𑁆𑀬𑀁 𑀉𑀧𑀝𑁆𑀞𑁂𑀫𑀻’’𑀢𑀺? ‘‘𑀅𑀕𑁆𑀕𑀤𑀸𑀦𑁂𑀦, 𑀪𑀕𑀺𑀦𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀅𑀕𑁆𑀕𑀤𑀸𑀦’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀸𑀳𑀁,

𑀪𑀦𑁆𑀢𑁂, 𑀲𑀼𑀕𑀢𑀺𑀁 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺? ‘‘𑀢𑁂𑀦 𑀳𑀺, 𑀪𑀕𑀺𑀦𑀺, 𑀅𑀕𑁆𑀕𑀤𑀸𑀦𑀁 𑀤𑁂𑀳𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀅𑀕𑁆𑀕𑀤𑀸𑀦’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.