𑁩. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀁

𑁨𑁮𑁩. 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀢𑀲𑁆𑀲𑀸𑀬𑀲𑁆𑀫𑀢𑁄 𑀯𑀺𑀳𑀸𑀭𑁄 𑀅𑀪𑀺𑀭𑀽𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀆𑀭𑀸𑀫𑀁 𑀆𑀕𑀫𑀁𑀲𑀼 𑀯𑀺𑀳𑀸𑀭𑀧𑁂𑀓𑁆𑀔𑀺𑀓𑀸𑀬𑁄. 𑀅𑀣 𑀔𑁄 𑀢𑀸 𑀇𑀢𑁆𑀣𑀺𑀬𑁄 𑀬𑁂𑀦𑀸𑀬𑀲𑁆𑀫𑀸 𑀉𑀤𑀸𑀬𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀘𑁆𑀙𑀸𑀫 𑀫𑀬𑀁, 𑀪𑀦𑁆𑀢𑁂, 𑀅𑀬𑁆𑀬𑀲𑁆𑀲 𑀯𑀺𑀳𑀸𑀭𑀁 𑀧𑁂𑀓𑁆𑀔𑀺𑀢𑀼’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀢𑀸 𑀇𑀢𑁆𑀣𑀺𑀬𑁄 𑀯𑀺𑀳𑀸𑀭𑀁 𑀧𑁂𑀓𑁆𑀔𑀸𑀧𑁂𑀢𑁆𑀯𑀸 𑀢𑀸𑀲𑀁 𑀇𑀢𑁆𑀣𑀻𑀦𑀁 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀬𑀸𑀘𑀢𑀺𑀧𑀺 𑀆𑀬𑀸𑀘𑀢𑀺𑀧𑀺 𑀧𑀼𑀘𑁆𑀙𑀢𑀺𑀧𑀺 𑀧𑀝𑀺𑀧𑀼𑀘𑁆𑀙𑀢𑀺𑀧𑀺 𑀆𑀘𑀺𑀓𑁆𑀔𑀢𑀺𑀧𑀺 𑀅𑀦𑀼𑀲𑀸𑀲𑀢𑀺𑀧𑀺 𑀅𑀓𑁆𑀓𑁄𑀲𑀢𑀺𑀧𑀺. 𑀬𑀸 𑀢𑀸 𑀇𑀢𑁆𑀣𑀺𑀬𑁄 𑀙𑀺𑀦𑁆𑀦𑀺𑀓𑀸 𑀥𑀼𑀢𑁆𑀢𑀺𑀓𑀸 𑀅𑀳𑀺𑀭𑀺𑀓𑀸𑀬𑁄 𑀢𑀸 𑀆𑀬𑀲𑁆𑀫𑀢𑀸 𑀉𑀤𑀸𑀬𑀺𑀦𑀸 𑀲𑀤𑁆𑀥𑀺𑀁 𑀉𑀳𑀲𑀦𑁆𑀢𑀺𑀧𑀺 𑀉𑀮𑁆𑀮𑀧𑀦𑁆𑀢𑀺𑀧𑀺 𑀉𑀚𑁆𑀚𑀕𑁆𑀖𑀦𑁆𑀢𑀺𑀧𑀺 𑀉𑀧𑁆𑀧𑀡𑁆𑀟𑁂𑀦𑁆𑀢𑀺𑀧𑀺. 𑀬𑀸 𑀧𑀦 𑀢𑀸 𑀇𑀢𑁆𑀣𑀺𑀬𑁄 𑀳𑀺𑀭𑀺𑀫𑀦𑀸 𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀦𑁆𑀢𑀺 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀦𑀘𑁆𑀙𑀦𑁆𑀦𑀁 𑀦𑀧𑁆𑀧𑀢𑀺𑀭𑀽𑀧𑀁. 𑀲𑀸𑀫𑀺𑀓𑁂𑀦𑀧𑀺 𑀫𑀬𑀁 𑀏𑀯𑀁 𑀯𑀼𑀢𑁆𑀢𑀸 𑀦 𑀇𑀘𑁆𑀙𑁂𑀬𑁆𑀬𑀸𑀫, 𑀓𑀺𑀁 𑀧𑀦𑀸𑀬𑁆𑀬𑁂𑀦 𑀉𑀤𑀸𑀬𑀺𑀦𑀸’’𑀢𑀺. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀆𑀬𑀲𑁆𑀫𑀸 𑀉𑀤𑀸𑀬𑀻 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀺𑀲𑁆𑀲𑀢𑀻’’𑀢𑀺! 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀁 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀉𑀤𑀸𑀬𑀺, 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀲𑀻’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑀺𑀲𑁆𑀲𑀲𑀺! 𑀦𑀦𑀼 𑀫𑀬𑀸, 𑀫𑁄𑀖𑀧𑀼𑀭𑀺𑀲, 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀭𑀸𑀕𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀦𑁄 𑀲𑀭𑀸𑀕𑀸𑀬…𑀧𑁂… 𑀓𑀸𑀫𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀫𑁄 𑀅𑀓𑁆𑀔𑀸𑀢𑁄. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁨𑁮𑁪. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀑𑀢𑀺𑀡𑁆𑀡𑁄 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑁂𑀬𑁆𑀬 𑀬𑀣𑀸 𑀢𑀁 𑀬𑀼𑀯𑀸 𑀬𑀼𑀯𑀢𑀺𑀁 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀳𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺.

𑁨𑁮𑁫. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀑𑀢𑀺𑀡𑁆𑀡𑁄 𑀦𑀸𑀫 𑀲𑀸𑀭𑀢𑁆𑀢𑁄 𑀅𑀧𑁂𑀓𑁆𑀔𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄.

𑀯𑀺𑀧𑀭𑀺𑀡𑀢𑀦𑁆𑀢𑀺 𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁, 𑀤𑀼𑀝𑁆𑀞𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 𑀫𑀽𑀴𑁆𑀳𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁. 𑀅𑀧𑀺𑀘, 𑀭𑀢𑁆𑀢𑀁 𑀘𑀺𑀢𑁆𑀢𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀁 𑀯𑀺𑀧𑀭𑀺𑀡𑀢𑀦𑁆𑀢𑀺.

𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻, 𑀦 𑀬𑀓𑁆𑀔𑀻, 𑀦 𑀧𑁂𑀢𑀻, 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸. 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀤𑀼𑀝𑁆𑀞𑀼𑀮𑁆𑀮𑀸𑀤𑀼𑀝𑁆𑀞𑀼𑀮𑁆𑀮𑀁 𑀆𑀚𑀸𑀦𑀺𑀢𑀼𑀁.

𑀤𑀼𑀝𑁆𑀞𑀼𑀮𑁆𑀮𑀸 𑀦𑀸𑀫 𑀯𑀸𑀘𑀸 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀣𑀼𑀦𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀸𑀘𑀸.

𑀑𑀪𑀸𑀲𑁂𑀬𑁆𑀬𑀸𑀢𑀺 𑀅𑀚𑁆𑀛𑀸𑀘𑀸𑀭𑁄 𑀯𑀼𑀘𑁆𑀘𑀢𑀺.

𑀬𑀣𑀸 𑀢𑀁 𑀬𑀼𑀯𑀸 𑀬𑀼𑀯𑀢𑀺𑀦𑁆𑀢𑀺 𑀤𑀳𑀭𑁄 𑀤𑀳𑀭𑀺𑀁, 𑀢𑀭𑀼𑀡𑁄 𑀢𑀭𑀼𑀡𑀺𑀁, 𑀓𑀸𑀫𑀪𑁄𑀕𑀻 𑀓𑀸𑀫𑀪𑁄𑀕𑀺𑀦𑀺𑀁.

𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀳𑀻𑀢𑀺 𑀫𑁂𑀣𑀼𑀦𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀳𑀺.

𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 …𑀧𑁂… 𑀢𑁂𑀦𑀧𑀺 𑀯𑀼𑀘𑁆𑀘𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺.

𑀤𑁆𑀯𑁂 𑀫𑀕𑁆𑀕𑁂 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺, 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺, 𑀬𑀸𑀘𑀢𑀺𑀧𑀺, 𑀆𑀬𑀸𑀘𑀢𑀺𑀧𑀺, 𑀧𑀼𑀘𑁆𑀙𑀢𑀺𑀧𑀺, 𑀧𑀝𑀺𑀧𑀼𑀘𑁆𑀙𑀢𑀺𑀧𑀺, 𑀆𑀘𑀺𑀓𑁆𑀔𑀢𑀺𑀧𑀺, 𑀅𑀦𑀼𑀲𑀸𑀲𑀢𑀺𑀧𑀺, 𑀅𑀓𑁆𑀓𑁄𑀲𑀢𑀺𑀧𑀺.

𑀯𑀡𑁆𑀡𑀁 𑀪𑀡𑀢𑀺 𑀦𑀸𑀫 𑀤𑁆𑀯𑁂 𑀫𑀕𑁆𑀕𑁂 𑀣𑁄𑀫𑁂𑀢𑀺 𑀯𑀡𑁆𑀡𑁂𑀢𑀺 𑀧𑀲𑀁𑀲𑀢𑀺.

𑀅𑀯𑀡𑁆𑀡𑀁 𑀪𑀡𑀢𑀺 𑀦𑀸𑀫 𑀤𑁆𑀯𑁂 𑀫𑀕𑁆𑀕𑁂 𑀔𑀼𑀁𑀲𑁂𑀢𑀺 𑀯𑀫𑁆𑀪𑁂𑀢𑀺 𑀕𑀭𑀳𑀢𑀺.

𑀬𑀸𑀘𑀢𑀺 𑀦𑀸𑀫 𑀤𑁂𑀳𑀺 𑀫𑁂, 𑀅𑀭𑀳𑀲𑀺 𑀫𑁂 𑀤𑀸𑀢𑀼𑀦𑁆𑀢𑀺.

𑀆𑀬𑀸𑀘𑀢𑀺 𑀦𑀸𑀫 𑀓𑀤𑀸 𑀢𑁂 𑀫𑀸𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀧𑀺𑀢𑀸 𑀧𑀲𑀻𑀤𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀤𑁂𑀯𑀢𑀸𑀬𑁄 𑀧𑀲𑀻𑀤𑀺𑀲𑁆𑀲𑀦𑁆𑀢𑀺, 𑀓𑀤𑀸 [𑀓𑀤𑀸 𑀢𑁂 (𑀲𑁆𑀬𑀸.)] 𑀲𑀼𑀔𑀡𑁄 𑀲𑀼𑀮𑀬𑁄 𑀲𑀼𑀫𑀼𑀳𑀼𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀓𑀤𑀸 𑀢𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀮𑀪𑀺𑀲𑁆𑀲𑀸𑀫𑀻𑀢𑀺.

𑀧𑀼𑀘𑁆𑀙𑀢𑀺 𑀦𑀸𑀫 𑀓𑀣𑀁 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀺, 𑀓𑀣𑀁 𑀚𑀸𑀭𑀲𑁆𑀲 𑀤𑁂𑀲𑀻𑀢𑀺?

𑀧𑀝𑀺𑀧𑀼𑀘𑁆𑀙𑀢𑀺 𑀦𑀸𑀫 𑀏𑀯𑀁 𑀓𑀺𑀭 𑀢𑁆𑀯𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀺, 𑀏𑀯𑀁 𑀚𑀸𑀭𑀲𑁆𑀲 𑀤𑁂𑀲𑀻𑀢𑀺.

𑀆𑀘𑀺𑀓𑁆𑀔𑀢𑀺 𑀦𑀸𑀫 𑀧𑀼𑀝𑁆𑀞𑁄 𑀪𑀡𑀢𑀺 𑁋 ‘‘𑀏𑀯𑀁 𑀤𑁂𑀳𑀺. 𑀏𑀯𑀁 𑀤𑁂𑀦𑁆𑀢𑀸 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀪𑀯𑀺𑀲𑁆𑀲𑀲𑀺 𑀫𑀦𑀸𑀧𑀸 𑀘𑀸’’𑀢𑀺.

𑀅𑀦𑀼𑀲𑀸𑀲𑀢𑀺 𑀦𑀸𑀫 𑀅𑀧𑀼𑀝𑁆𑀞𑁄 𑀪𑀡𑀢𑀺 𑁋 ‘‘𑀏𑀯𑀁 𑀤𑁂𑀳𑀺. 𑀏𑀯𑀁 𑀤𑁂𑀦𑁆𑀢𑀸 𑀲𑀸𑀫𑀺𑀓𑀲𑁆𑀲 𑀧𑀺𑀬𑀸 𑀪𑀯𑀺𑀲𑁆𑀲𑀢𑀺 𑀫𑀦𑀸𑀧𑀸 𑀘𑀸’’𑀢𑀺.

𑀅𑀓𑁆𑀓𑁄𑀲𑀢𑀺 𑀦𑀸𑀫 𑀅𑀦𑀺𑀫𑀺𑀢𑁆𑀢𑀸𑀲𑀺, 𑀦𑀺𑀫𑀺𑀢𑁆𑀢𑀫𑀢𑁆𑀢𑀸𑀲𑀺, 𑀅𑀮𑁄𑀳𑀺𑀢𑀸𑀲𑀺, 𑀥𑀼𑀯𑀮𑁄𑀳𑀺𑀢𑀸𑀲𑀺, 𑀥𑀼𑀯𑀘𑁄𑀴𑀸𑀲𑀺, 𑀧𑀕𑁆𑀖𑀭𑀦𑁆𑀢𑀻𑀲𑀺, 𑀲𑀺𑀔𑀭𑀡𑀻𑀲𑀺, 𑀇𑀢𑁆𑀣𑀺𑀧𑀡𑁆𑀟𑀓𑀸𑀲𑀺, 𑀯𑁂𑀧𑀼𑀭𑀺𑀲𑀺𑀓𑀸𑀲𑀺, 𑀲𑀫𑁆𑀪𑀺𑀦𑁆𑀦𑀸𑀲𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻𑀢𑀺.

𑁨𑁮𑁬. 𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀬𑀸𑀘𑀢𑀺𑀧𑀺 𑀆𑀬𑀸𑀘𑀢𑀺𑀧𑀺 𑀧𑀼𑀘𑁆𑀙𑀢𑀺𑀧𑀺 𑀧𑀝𑀺𑀧𑀼𑀘𑁆𑀙𑀢𑀺𑀧𑀺 𑀆𑀘𑀺𑀓𑁆𑀔𑀢𑀺𑀧𑀺 𑀅𑀦𑀼𑀲𑀸𑀲𑀢𑀺𑀧𑀺 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲…𑀧𑁂….

𑀤𑁆𑀯𑁂 𑀇𑀢𑁆𑀣𑀺𑀬𑁄 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀁𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁…𑀧𑁂….

𑀇𑀢𑁆𑀣𑀻 𑀘 𑀧𑀡𑁆𑀟𑀓𑁄 𑀘 𑀉𑀪𑀺𑀦𑁆𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀉𑀪𑀺𑀦𑁆𑀦𑀁 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂….

𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲…𑀧𑁂….

𑀤𑁆𑀯𑁂 𑀇𑀢𑁆𑀣𑀺𑀬𑁄 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀣𑀼𑀮𑁆𑀮𑀘𑁆𑀘𑀬𑀸𑀦𑀁…𑀧𑁂….

𑀇𑀢𑁆𑀣𑀻 𑀘 𑀧𑀡𑁆𑀟𑀓𑁄 𑀘 𑀉𑀪𑀺𑀦𑁆𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀉𑀪𑀺𑀦𑁆𑀦𑀁 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑁂𑀦 𑀤𑀼𑀓𑁆𑀓𑀝𑀲𑁆𑀲…𑀧𑁂….

𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀉𑀩𑁆𑀪𑀓𑁆𑀔𑀓𑀁 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂….

𑀤𑁆𑀯𑁂 𑀇𑀢𑁆𑀣𑀺𑀬𑁄 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀉𑀩𑁆𑀪𑀓𑁆𑀔𑀓𑀁 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂….

𑀇𑀢𑁆𑀣𑀻 𑀘 𑀧𑀡𑁆𑀟𑀓𑁄 𑀘 𑀉𑀪𑀺𑀦𑁆𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀉𑀪𑀺𑀦𑁆𑀦𑀁 𑀉𑀩𑁆𑀪𑀓𑁆𑀔𑀓𑀁 𑀅𑀥𑁄𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂….

𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀓𑀸𑀬𑀧𑀝𑀺𑀩𑀤𑁆𑀥𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲…𑀧𑁂….

𑀤𑁆𑀯𑁂 𑀇𑀢𑁆𑀣𑀺𑀬𑁄 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁 𑀓𑀸𑀬𑀧𑀝𑀺𑀩𑀤𑁆𑀥𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂….

𑀇𑀢𑁆𑀣𑀻 𑀘 𑀧𑀡𑁆𑀟𑀓𑁄 𑀘 𑀉𑀪𑀺𑀦𑁆𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘. 𑀪𑀺𑀓𑁆𑀔𑀼 𑀘 𑀦𑀁 𑀉𑀪𑀺𑀦𑁆𑀦𑀁 𑀓𑀸𑀬𑀧𑀝𑀺𑀩𑀤𑁆𑀥𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀓𑀝𑀸𑀦𑀁…𑀧𑁂….

𑁨𑁮𑁭. 𑀅𑀦𑀸𑀧𑀢𑁆𑀢𑀺 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀲𑁆𑀲, 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑀲𑁆𑀲, 𑀅𑀦𑀼𑀲𑀸𑀲𑀦𑀺𑀧𑀼𑀭𑁂𑀓𑁆𑀔𑀸𑀭𑀲𑁆𑀲, 𑀉𑀫𑁆𑀫𑀢𑁆𑀢𑀓𑀲𑁆𑀲, 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼𑀉𑀤𑁆𑀤𑀸𑀦𑀕𑀸𑀣𑀸

𑀮𑁄𑀳𑀺𑀢𑀁 𑀓𑀓𑁆𑀓𑀲𑀸𑀓𑀺𑀡𑁆𑀡𑀁, 𑀔𑀭𑀁 𑀤𑀻𑀖𑀜𑁆𑀘 𑀯𑀸𑀧𑀺𑀢𑀁;

𑀓𑀘𑁆𑀘𑀺 𑀲𑀁𑀲𑀻𑀤𑀢𑀺 𑀫𑀕𑁆𑀕𑁄, 𑀲𑀤𑁆𑀥𑀸 𑀤𑀸𑀦𑁂𑀦 𑀓𑀫𑁆𑀫𑀼𑀦𑀸𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼

𑁨𑁮𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀦𑀯𑀭𑀢𑁆𑀢𑀁 𑀓𑀫𑁆𑀩𑀮𑀁 𑀧𑀸𑀭𑀼𑀢𑀸 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀸𑀭𑀢𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀮𑁄𑀳𑀺𑀢𑀁 𑀔𑁄 𑀢𑁂, 𑀪𑀕𑀺𑀦𑀻’’𑀢𑀺. 𑀲𑀸 𑀦 𑀧𑀝𑀺𑀯𑀺𑀚𑀸𑀦𑀺. ‘‘𑀆𑀫𑀸𑀬𑁆𑀬, 𑀦𑀯𑀭𑀢𑁆𑀢𑁄 𑀓𑀫𑁆𑀩𑀮𑁄’’𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀓𑀘𑁆𑀘𑀺 𑀦𑀼 𑀔𑁄 𑀅𑀳𑀁 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀔𑀭𑀓𑀫𑁆𑀩𑀮𑀁 𑀧𑀸𑀭𑀼𑀢𑀸 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀸𑀭𑀢𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀓𑀓𑁆𑀓𑀲𑀮𑁄𑀫𑀁 𑀔𑁄 𑀢𑁂, 𑀪𑀕𑀺𑀦𑀻’’𑀢𑀺. 𑀲𑀸 𑀦 𑀧𑀝𑀺𑀯𑀺𑀚𑀸𑀦𑀺. ‘‘𑀆𑀫𑀸𑀬𑁆𑀬, 𑀔𑀭𑀓𑀫𑁆𑀩𑀮𑀓𑁄’’𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀦𑀯𑀸𑀯𑀼𑀢𑀁 𑀓𑀫𑁆𑀩𑀮𑀁 𑀧𑀸𑀭𑀼𑀢𑀸 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀸𑀭𑀢𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀆𑀓𑀺𑀡𑁆𑀡𑀮𑁄𑀫𑀁 𑀔𑁄 𑀢𑁂, 𑀪𑀕𑀺𑀦𑀻’’𑀢𑀺. 𑀲𑀸 𑀦 𑀧𑀝𑀺𑀯𑀺𑀚𑀸𑀦𑀺. ‘‘𑀆𑀫𑀸𑀬𑁆𑀬, 𑀦𑀯𑀸𑀯𑀼𑀢𑁄 𑀓𑀫𑁆𑀩𑀮𑁄’’𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀔𑀭𑀓𑀫𑁆𑀩𑀮𑀁 𑀧𑀸𑀭𑀼𑀢𑀸 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀸𑀭𑀢𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀔𑀭𑀮𑁄𑀫𑀁 𑀔𑁄 𑀢𑁂, 𑀪𑀕𑀺𑀦𑀻’’𑀢𑀺. 𑀲𑀸 𑀦 𑀧𑀝𑀺𑀯𑀺𑀚𑀸𑀦𑀺. ‘‘𑀆𑀫𑀸𑀬𑁆𑀬, 𑀔𑀭𑀓𑀫𑁆𑀩𑀮𑀓𑁄’’𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀧𑀸𑀯𑀸𑀭𑀁 [𑀤𑀻𑀖𑀧𑀸𑀯𑀸𑀭𑀁 (𑀲𑁆𑀬𑀸.)] 𑀧𑀸𑀭𑀼𑀢𑀸 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀸𑀭𑀢𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀤𑀻𑀖𑀮𑁄𑀫𑀁 𑀔𑁄 𑀢𑁂, 𑀪𑀕𑀺𑀦𑀻’’𑀢𑀺. 𑀲𑀸 𑀦 𑀧𑀝𑀺𑀯𑀺𑀚𑀸𑀦𑀺. ‘‘𑀆𑀫𑀸𑀬𑁆𑀬, 𑀧𑀸𑀯𑀸𑀭𑁄’’ [𑀤𑀻𑀖𑀧𑀸𑀯𑀸𑀭𑁄 (𑀲𑁆𑀬𑀸.)] 𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑁨𑁮𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀔𑁂𑀢𑁆𑀢𑀁 𑀯𑀧𑀸𑀧𑁂𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀸𑀭𑀢𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀯𑀸𑀧𑀺𑀢𑀁 𑀔𑁄 𑀢𑁂, 𑀪𑀕𑀺𑀦𑀻’’𑀢𑀺? 𑀲𑀸 𑀦 𑀧𑀝𑀺𑀯𑀺𑀚𑀸𑀦𑀺. ‘‘𑀆𑀫𑀸𑀬𑁆𑀬, 𑀦𑁄 𑀘 𑀔𑁄 𑀧𑀝𑀺𑀯𑀼𑀢𑁆𑀢’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀸𑀚𑀺𑀓𑀁 𑀧𑀝𑀺𑀧𑀣𑁂 𑀧𑀲𑁆𑀲𑀺𑀢𑁆𑀯𑀸 𑀲𑀸𑀭𑀢𑁆𑀢𑁄 𑀢𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀕𑀺𑀦𑀺, 𑀫𑀕𑁆𑀕𑁄 𑀲𑀁𑀲𑀻𑀤𑀢𑀻’’𑀢𑀺? 𑀲𑀸 𑀦 𑀧𑀝𑀺𑀯𑀺𑀚𑀸𑀦𑀺. ‘‘𑀆𑀫 𑀪𑀺𑀓𑁆𑀔𑀼, 𑀧𑀝𑀺𑀧𑀚𑁆𑀚𑀺𑀲𑁆𑀲𑀲𑀻’’𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀸𑀭𑀢𑁆𑀢𑁄 𑀅𑀜𑁆𑀜𑀢𑀭𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀤𑁆𑀥𑀸𑀲𑀺 𑀢𑁆𑀯𑀁, 𑀪𑀕𑀺𑀦𑀺. 𑀅𑀧𑀺𑀘, 𑀬𑀁 𑀲𑀸𑀫𑀺𑀓𑀲𑁆𑀲 𑀤𑁂𑀲𑀺 𑀢𑀁 𑀦𑀸𑀫𑁆𑀳𑀸𑀓𑀁 𑀤𑁂𑀲𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂’’𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀸𑀭𑀢𑁆𑀢𑁄 𑀅𑀜𑁆𑀜𑀢𑀭𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀲𑀤𑁆𑀥𑀸𑀲𑀺 𑀢𑁆𑀯𑀁, 𑀪𑀕𑀺𑀦𑀺. 𑀅𑀧𑀺𑀘, 𑀬𑀁 𑀅𑀕𑁆𑀕𑀤𑀸𑀦𑀁 𑀢𑀁 𑀦𑀸𑀫𑁆𑀳𑀸𑀓𑀁 𑀤𑁂𑀲𑀻’’𑀢𑀺. ‘‘𑀓𑀺𑀁, 𑀪𑀦𑁆𑀢𑁂, 𑀅𑀕𑁆𑀕𑀤𑀸𑀦’’𑀦𑁆𑀢𑀺? ‘‘𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀲𑀸𑀭𑀢𑁆𑀢𑁄 𑀢𑀁 𑀇𑀢𑁆𑀣𑀺𑀁 𑀏𑀢𑀤𑀯𑁄𑀘 𑁋 ‘‘𑀢𑀺𑀝𑁆𑀞, 𑀪𑀕𑀺𑀦𑀺, 𑀅𑀳𑀁 𑀓𑀭𑀺𑀲𑁆𑀲𑀸𑀫𑀻𑀢𑀺…𑀧𑁂… 𑀦𑀺𑀲𑀻𑀤, 𑀪𑀕𑀺𑀦𑀺, 𑀅𑀳𑀁 𑀓𑀭𑀺𑀲𑁆𑀲𑀸𑀫𑀻𑀢𑀺…𑀧𑁂… 𑀦𑀺𑀧𑀚𑁆𑀚, 𑀪𑀕𑀺𑀦𑀺, 𑀅𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑀸 𑀦 𑀧𑀝𑀺𑀯𑀺𑀚𑀸𑀦𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲; 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.