𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀁

𑁧𑁬𑁨. [𑀇𑀤𑀁 𑀯𑀢𑁆𑀣𑀼 𑀲𑀁. 𑀦𑀺. 𑁫.𑁯𑁮𑁫] 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺, 𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀲𑀼𑀪𑀪𑀸𑀯𑀦𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁. 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺, 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀦𑀸𑀲𑁆𑀲𑀼𑀥 𑀓𑁄𑀘𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀢𑀺, 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦. 𑀪𑀺𑀓𑁆𑀔𑀽 𑁋 ‘‘𑀪𑀕𑀯𑀸 𑀔𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺, 𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀲𑀼𑀪𑀪𑀸𑀯𑀦𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 (𑀢𑁂) [( ) (?) 𑀏𑀯𑀫𑀼𑀧𑀭𑀺𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼] 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀦𑁆𑀢𑀺 𑀳𑀭𑀸𑀬𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀲𑀻𑀲𑀁𑀦𑁆𑀳𑀸𑀢𑁄 𑀅𑀳𑀺𑀓𑀼𑀡𑀧𑁂𑀦 𑀯𑀸 𑀓𑀼𑀓𑁆𑀓𑀼𑀭𑀓𑀼𑀡𑀧𑁂𑀦 𑀯𑀸 𑀫𑀦𑀼𑀲𑁆𑀲𑀓𑀼𑀡𑀧𑁂𑀦 𑀯𑀸 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦 𑀅𑀝𑁆𑀝𑀻𑀬𑁂𑀬𑁆𑀬 𑀳𑀭𑀸𑀬𑁂𑀬𑁆𑀬 𑀚𑀺𑀕𑀼𑀘𑁆𑀙𑁂𑀬𑁆𑀬, 𑀏𑀯𑀫𑁂𑀯 𑀢𑁂 𑀪𑀺𑀓𑁆𑀔𑀽 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀦𑁆𑀢𑀸 𑀳𑀭𑀸𑀬𑀦𑁆𑀢𑀸 𑀚𑀺𑀕𑀼𑀘𑁆𑀙𑀦𑁆𑀢𑀸 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀫𑀺𑀕𑀮𑀡𑁆𑀟𑀺𑀓𑀫𑁆𑀧𑀺 𑀲𑀫𑀡𑀓𑀼𑀢𑁆𑀢𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀲𑀸𑀥𑀼 𑀦𑁄, 𑀆𑀯𑀼𑀲𑁄, 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀺. 𑀇𑀤𑀁 𑀢𑁂 𑀧𑀢𑁆𑀢𑀘𑀻𑀯𑀭𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀫𑀺𑀕𑀮𑀡𑁆𑀟𑀺𑀓𑁄 𑀲𑀫𑀡𑀓𑀼𑀢𑁆𑀢𑀓𑁄 𑀧𑀢𑁆𑀢𑀘𑀻𑀯𑀭𑁂𑀳𑀺 𑀪𑀝𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀮𑁄𑀳𑀺𑀢𑀓𑀁 [𑀮𑁄𑀳𑀺𑀢𑀕𑀢𑀁 (𑀓.)] 𑀅𑀲𑀺𑀁 𑀆𑀤𑀸𑀬 𑀬𑁂𑀦 𑀯𑀕𑁆𑀕𑀫𑀼𑀤𑀸 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺.

𑁧𑁬𑁩. 𑀅𑀣 𑀔𑁄 𑀫𑀺𑀕𑀮𑀡𑁆𑀟𑀺𑀓𑀲𑁆𑀲 𑀲𑀫𑀡𑀓𑀼𑀢𑁆𑀢𑀓𑀲𑁆𑀲 𑀮𑁄𑀳𑀺𑀢𑀓𑀁 𑀢𑀁 𑀅𑀲𑀺𑀁 𑀥𑁄𑀯𑀦𑁆𑀢𑀲𑁆𑀲 𑀅𑀳𑀼𑀤𑁂𑀯 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑀼 𑀯𑀺𑀧𑁆𑀧𑀝𑀺𑀲𑀸𑀭𑁄 𑁋 ‘‘𑀅𑀮𑀸𑀪𑀸 𑀯𑀢 𑀫𑁂, 𑀦 𑀯𑀢 𑀫𑁂 𑀮𑀸𑀪𑀸; 𑀤𑀼𑀮𑁆𑀮𑀤𑁆𑀥𑀁 𑀯𑀢 𑀫𑁂, 𑀦 𑀯𑀢 𑀫𑁂 𑀲𑀼𑀮𑀤𑁆𑀥𑀁. 𑀩𑀳𑀼𑀁 𑀯𑀢 𑀫𑀬𑀸 𑀅𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀬𑁄𑀳𑀁 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺’’𑀦𑁆𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀫𑀸𑀭𑀓𑀸𑀬𑀺𑀓𑀸 𑀤𑁂𑀯𑀢𑀸 𑀅𑀪𑀺𑀚𑁆𑀚𑀫𑀸𑀦𑁂 𑀉𑀤𑀓𑁂 𑀆𑀕𑀦𑁆𑀢𑁆𑀯𑀸 𑀫𑀺𑀕𑀮𑀡𑁆𑀟𑀺𑀓𑀁 𑀲𑀫𑀡𑀓𑀼𑀢𑁆𑀢𑀓𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼 𑀲𑀸𑀥𑀼 𑀲𑀧𑁆𑀧𑀼𑀭𑀺𑀲, 𑀮𑀸𑀪𑀸 𑀢𑁂 𑀲𑀧𑁆𑀧𑀼𑀭𑀺𑀲, 𑀲𑀼𑀮𑀤𑁆𑀥𑀁 𑀢𑁂 𑀲𑀧𑁆𑀧𑀼𑀭𑀺𑀲. 𑀩𑀳𑀼𑀁 𑀢𑀬𑀸 𑀲𑀧𑁆𑀧𑀼𑀭𑀺𑀲 𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀬𑀁 𑀢𑁆𑀯𑀁 𑀅𑀢𑀺𑀡𑁆𑀡𑁂 𑀢𑀸𑀭𑁂𑀲𑀻’’𑀢𑀺. 𑀅𑀣 𑀔𑁄 𑀫𑀺𑀕𑀮𑀡𑁆𑀟𑀺𑀓𑁄 𑀲𑀫𑀡𑀓𑀼𑀢𑁆𑀢𑀓𑁄 𑁋 ‘‘𑀮𑀸𑀪𑀸 𑀓𑀺𑀭 𑀫𑁂, 𑀲𑀼𑀮𑀤𑁆𑀥𑀁 𑀓𑀺𑀭 𑀫𑁂, 𑀩𑀳𑀼𑀁 𑀓𑀺𑀭 𑀫𑀬𑀸 𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀅𑀢𑀺𑀡𑁆𑀡𑁄 𑀓𑀺𑀭𑀸𑀳𑀁 𑀢𑀸𑀭𑁂𑀫𑀻’’𑀢𑀺 𑀢𑀺𑀡𑁆𑀳𑀁 𑀅𑀲𑀺𑀁 𑀆𑀤𑀸𑀬 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀧𑀭𑀺𑀯𑁂𑀡𑁂𑀦 𑀧𑀭𑀺𑀯𑁂𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑁂𑀢𑀺 𑁋 ‘‘𑀓𑁄 𑀅𑀢𑀺𑀡𑁆𑀡𑁄, 𑀓𑀁 𑀢𑀸𑀭𑁂𑀫𑀻’’𑀢𑀺? 𑀢𑀢𑁆𑀣 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀯𑀻𑀢𑀭𑀸𑀕𑀸 𑀢𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺𑀬𑁂𑀯 𑀪𑀬𑀁 𑀳𑁄𑀢𑀺 𑀙𑀫𑁆𑀪𑀺𑀢𑀢𑁆𑀢𑀁 𑀳𑁄𑀢𑀺 𑀮𑁄𑀫𑀳𑀁𑀲𑁄. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀯𑀻𑀢𑀭𑀸𑀕𑀸 𑀢𑁂𑀲𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀢𑀺 𑀪𑀬𑀁 𑀦 𑀳𑁄𑀢𑀺 𑀙𑀫𑁆𑀪𑀺𑀢𑀢𑁆𑀢𑀁 𑀦 𑀳𑁄𑀢𑀺 𑀮𑁄𑀫𑀳𑀁𑀲𑁄. 𑀅𑀣 𑀔𑁄 𑀫𑀺𑀕𑀮𑀡𑁆𑀟𑀺𑀓𑁄 𑀲𑀫𑀡𑀓𑀼𑀢𑁆𑀢𑀓𑁄 𑀏𑀓𑀫𑁆𑀧𑀺 𑀪𑀺𑀓𑁆𑀔𑀼𑀁 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀤𑁆𑀯𑁂𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀢𑀬𑁄𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀘𑀢𑁆𑀢𑀸𑀭𑁄𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀧𑀜𑁆𑀘𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀤𑀲𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀯𑀻𑀲𑀫𑁆𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀢𑀺𑀁𑀲𑀫𑁆𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀧𑀜𑁆𑀜𑀸𑀲𑀫𑁆𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀲𑀝𑁆𑀞𑀺𑀫𑁆𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺.

𑁧𑁬𑁪. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀅𑀤𑁆𑀥𑀫𑀸𑀲𑀲𑁆𑀲 𑀅𑀘𑁆𑀘𑀬𑁂𑀦 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀦𑀦𑁆𑀤, 𑀢𑀦𑀼𑀪𑀽𑀢𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺? ‘‘𑀢𑀣𑀸 𑀳𑀺 𑀧𑀦, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺, 𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀲𑀼𑀪𑀪𑀸𑀯𑀦𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀺. 𑀢𑁂 𑀘, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑁋 ‘𑀪𑀕𑀯𑀸 𑀔𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺, 𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀅𑀲𑀼𑀪𑀪𑀸𑀯𑀦𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺, 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀅𑀲𑀼𑀪𑀲𑀫𑀸𑀧𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀢𑀻’𑀢𑀺, 𑀢𑁂 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀢𑁂 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀦𑁆𑀢𑀺 𑀳𑀭𑀸𑀬𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀲𑀻𑀲𑀁𑀦𑁆𑀳𑀸𑀢𑁄 𑀅𑀳𑀺𑀓𑀼𑀡𑀧𑁂𑀦 𑀯𑀸 𑀓𑀼𑀓𑁆𑀓𑀼𑀭𑀓𑀼𑀡𑀧𑁂𑀦 𑀯𑀸 𑀫𑀦𑀼𑀲𑁆𑀲𑀓𑀼𑀡𑀧𑁂𑀦 𑀯𑀸 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦 𑀅𑀝𑁆𑀝𑀻𑀬𑁂𑀬𑁆𑀬 𑀳𑀭𑀸𑀬𑁂𑀬𑁆𑀬 𑀚𑀺𑀕𑀼𑀘𑁆𑀙𑁂𑀬𑁆𑀬, 𑀏𑀯𑀫𑁂𑀯 𑀢𑁂 𑀪𑀺𑀓𑁆𑀔𑀽 𑀲𑀓𑁂𑀦 𑀓𑀸𑀬𑁂𑀦 𑀅𑀝𑁆𑀝𑀻𑀬𑀦𑁆𑀢𑀸 𑀳𑀭𑀸𑀬𑀦𑁆𑀢𑀸 𑀚𑀺𑀕𑀼𑀘𑁆𑀙𑀦𑁆𑀢𑀸 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀫𑀺𑀕𑀮𑀡𑁆𑀟𑀺𑀓𑀫𑁆𑀧𑀺 𑀲𑀫𑀡𑀓𑀼𑀢𑁆𑀢𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀲𑀸𑀥𑀼 𑀦𑁄, 𑀆𑀯𑀼𑀲𑁄, 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀺. 𑀇𑀤𑀁 𑀢𑁂 𑀧𑀢𑁆𑀢𑀘𑀻𑀯𑀭𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀫𑀺𑀕𑀮𑀡𑁆𑀟𑀺𑀓𑁄 𑀲𑀫𑀡𑀓𑀼𑀢𑁆𑀢𑀓𑁄 𑀧𑀢𑁆𑀢𑀘𑀻𑀯𑀭𑁂𑀳𑀺 𑀪𑀝𑁄 𑀏𑀓𑀫𑁆𑀧𑀺 𑀪𑀺𑀓𑁆𑀔𑀼𑀁 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺…𑀧𑁂… 𑀲𑀝𑁆𑀞𑀺𑀫𑁆𑀧𑀺 𑀪𑀺𑀓𑁆𑀔𑀽 𑀏𑀓𑀸𑀳𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀅𑀜𑁆𑀜𑀁 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑀢𑀼 𑀬𑀣𑀸𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀜𑁆𑀜𑀸𑀬 𑀲𑀡𑁆𑀞𑀳𑁂𑀬𑁆𑀬𑀸’’𑀢𑀺. ‘‘𑀢𑁂𑀦𑀳𑀸𑀦𑀦𑁆𑀤, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺, 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀦𑀺𑀧𑀢𑀺𑀢𑁄, 𑀪𑀦𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄; 𑀬𑀲𑁆𑀲 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑁧𑁬𑁫. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀉𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘 𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀘 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀉𑀳𑀢𑀁 [𑀊𑀳𑀢𑀁 (𑀓.)] 𑀭𑀚𑁄𑀚𑀮𑁆𑀮𑀁 𑀢𑀫𑁂𑀦𑀁 𑀫𑀳𑀸 𑀅𑀓𑀸𑀮𑀫𑁂𑀖𑁄 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘 𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀘 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀺. 𑀓𑀣𑀁 𑀪𑀸𑀯𑀺𑀢𑁄 𑀘, 𑀪𑀺𑀓𑁆𑀔𑀯𑁂, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺 𑀓𑀣𑀁 𑀩𑀳𑀼𑀮𑀻𑀓𑀢𑁄 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘 𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀘 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀺 𑀲𑀢𑁄 𑀧𑀲𑁆𑀲𑀲𑀢𑀺. 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 𑀤𑀻𑀖𑀁 𑀅𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺, 𑀤𑀻𑀖𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 𑀤𑀻𑀖𑀁 𑀧𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺. 𑀭𑀲𑁆𑀲𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 𑀭𑀲𑁆𑀲𑀁 𑀅𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺, 𑀭𑀲𑁆𑀲𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 𑀭𑀲𑁆𑀲𑀁 𑀧𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺. 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀲𑀩𑁆𑀩𑀓𑀸𑀬𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀲𑀼𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀧𑀲𑁆𑀲𑀫𑁆𑀪𑀬𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀘𑀺𑀢𑁆𑀢𑀧𑁆𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀘𑀺𑀢𑁆𑀢𑀧𑁆𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀅𑀪𑀺𑀧𑁆𑀧𑀫𑁄𑀤𑀬𑀁 𑀘𑀺𑀢𑁆𑀢𑀁…𑀧𑁂… 𑀲𑀫𑀸𑀤𑀳𑀁 𑀘𑀺𑀢𑁆𑀢𑀁…𑀧𑁂… 𑀯𑀺𑀫𑁄𑀘𑀬𑀁 𑀘𑀺𑀢𑁆𑀢𑀁…𑀧𑁂… 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻…𑀧𑁂… 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻…𑀧𑁂… 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀺. 𑀏𑀯𑀁 𑀪𑀸𑀯𑀺𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺 𑀏𑀯𑀁 𑀩𑀳𑀼𑀮𑀻𑀓𑀢𑁄 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘 𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀘 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀻’’𑀢𑀺.

𑁧𑁬𑁬. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺 𑁋 ‘‘𑀲𑀘𑁆𑀘𑀁 𑀓𑀺𑀭, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺 𑀫𑀺𑀕𑀮𑀡𑁆𑀟𑀺𑀓𑀫𑁆𑀧𑀺 𑀲𑀫𑀡𑀓𑀼𑀢𑁆𑀢𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀲𑀸𑀥𑀼 𑀦𑁄, 𑀆𑀯𑀼𑀲𑁄, 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀺, 𑀇𑀤𑀁 𑀢𑁂 𑀧𑀢𑁆𑀢𑀘𑀻𑀯𑀭𑀁 𑀪𑀯𑀺𑀲𑁆𑀲𑀢𑀻’’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀝𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀫𑁆𑀧𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀦𑁆𑀢𑀺, 𑀫𑀺𑀕𑀮𑀡𑁆𑀟𑀺𑀓𑀫𑁆𑀧𑀺 𑀲𑀫𑀡𑀓𑀼𑀢𑁆𑀢𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀓𑁆𑀔𑀦𑁆𑀢𑀺 𑁋 ‘𑀲𑀸𑀥𑀼 𑀦𑁄, 𑀆𑀯𑀼𑀲𑁄, 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀺, 𑀇𑀤𑀁 𑀢𑁂 𑀧𑀢𑁆𑀢𑀘𑀻𑀯𑀭𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁧𑁬𑁭. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬 𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬, 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁧𑁬𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀉𑀧𑀸𑀲𑀓𑁄 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀧𑀚𑀸𑀧𑀢𑀺 𑀅𑀪𑀺𑀭𑀽𑀧𑀸 𑀳𑁄𑀢𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀲𑁄, 𑀆𑀯𑀼𑀲𑁄, 𑀉𑀧𑀸𑀲𑀓𑁄 𑀚𑀻𑀯𑀺𑀲𑁆𑀲𑀢𑀺 𑀦 𑀫𑀬𑀁 𑀢𑀁 𑀇𑀢𑁆𑀣𑀺𑀁 𑀮𑀪𑀺𑀲𑁆𑀲𑀸𑀫. 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀫𑀸’’𑀢𑀺. 𑀅𑀣 𑀔𑁄 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀬𑁂𑀦 𑀲𑁄 𑀉𑀧𑀸𑀲𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀉𑀧𑀸𑀲𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑁆𑀯𑀁 𑀔𑁄𑀲𑀺, 𑀉𑀧𑀸𑀲𑀓, 𑀓𑀢𑀓𑀮𑁆𑀬𑀸𑀡𑁄 𑀓𑀢𑀓𑀼𑀲𑀮𑁄 𑀓𑀢𑀪𑀻𑀭𑀼𑀢𑁆𑀢𑀸𑀡𑁄 𑀅𑀓𑀢𑀧𑀸𑀧𑁄 𑀅𑀓𑀢𑀮𑀼𑀤𑁆𑀤𑁄 𑀅𑀓𑀢𑀓𑀺𑀩𑁆𑀩𑀺𑀲𑁄. 𑀓𑀢𑀁 𑀢𑀬𑀸 𑀓𑀮𑁆𑀬𑀸𑀡𑀁, 𑀅𑀓𑀢𑀁 𑀢𑀬𑀸 𑀧𑀸𑀧𑀁. 𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 𑀧𑀸𑀧𑀓𑁂𑀦 𑀤𑀼𑀚𑁆𑀚𑀻𑀯𑀺𑀢𑁂𑀦! 𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄. 𑀇𑀢𑁄 𑀢𑁆𑀯𑀁 𑀓𑀸𑀮𑀗𑁆𑀓𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀲𑀺. 𑀢𑀢𑁆𑀣 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀲𑁆𑀲𑀲𑀻’’𑀢𑀺.

𑁧𑁬𑁯. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑁋 ‘‘𑀲𑀘𑁆𑀘𑀁 𑀔𑁄 𑀅𑀬𑁆𑀬𑀸 𑀆𑀳𑀁𑀲𑀼. 𑀅𑀳𑀜𑁆𑀳𑀺 𑀓𑀢𑀓𑀮𑁆𑀬𑀸𑀡𑁄 𑀓𑀢𑀓𑀼𑀲𑀮𑁄 𑀓𑀢𑀪𑀻𑀭𑀼𑀢𑁆𑀢𑀸𑀡𑁄 𑀅𑀓𑀢𑀧𑀸𑀧𑁄 𑀅𑀓𑀢𑀮𑀼𑀤𑁆𑀤𑁄 𑀅𑀓𑀢𑀓𑀺𑀩𑁆𑀩𑀺𑀲𑁄. 𑀓𑀢𑀁 𑀫𑀬𑀸 𑀓𑀮𑁆𑀬𑀸𑀡𑀁, 𑀅𑀓𑀢𑀁 𑀫𑀬𑀸 𑀧𑀸𑀧𑀁. 𑀓𑀺𑀁 𑀫𑀬𑁆𑀳𑀺𑀫𑀺𑀦𑀸 𑀧𑀸𑀧𑀓𑁂𑀦 𑀤𑀼𑀚𑁆𑀚𑀻𑀯𑀺𑀢𑁂𑀦! 𑀫𑀢𑀁 𑀫𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄. 𑀇𑀢𑁄 𑀅𑀳𑀁 𑀓𑀸𑀮𑀗𑁆𑀓𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀸𑀫𑀺. 𑀢𑀢𑁆𑀣 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀲𑁆𑀲𑀸𑀫𑀻’’𑀢𑀺, 𑀲𑁄 𑀅𑀲𑀧𑁆𑀧𑀸𑀬𑀸𑀦𑀺 𑀘𑁂𑀯 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺 𑀅𑀲𑀧𑁆𑀧𑀸𑀬𑀸𑀦𑀺 𑀘 𑀔𑀸𑀤𑀦𑀻𑀬𑀸𑀦𑀺 𑀔𑀸𑀤𑀺 𑀅𑀲𑀧𑁆𑀧𑀸𑀬𑀸𑀦𑀺 𑀘 𑀲𑀸𑀬𑀦𑀻𑀬𑀸𑀦𑀺 𑀲𑀸𑀬𑀺 𑀅𑀲𑀧𑁆𑀧𑀸𑀬𑀸𑀦𑀺 𑀘 𑀧𑀸𑀦𑀸𑀦𑀺 𑀧𑀺𑀯𑀺. 𑀢𑀲𑁆𑀲 𑀅𑀲𑀧𑁆𑀧𑀸𑀬𑀸𑀦𑀺 𑀘𑁂𑀯 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀢𑁄 𑀅𑀲𑀧𑁆𑀧𑀸𑀬𑀸𑀦𑀺 𑀘 𑀔𑀸𑀤𑀦𑀻𑀬𑀸𑀦𑀺 𑀔𑀸𑀤𑀢𑁄 𑀅𑀲𑀧𑁆𑀧𑀸𑀬𑀸𑀦𑀺 𑀘 𑀲𑀸𑀬𑀦𑀻𑀬𑀸𑀦𑀺 𑀲𑀸𑀬𑀢𑁄 𑀅𑀲𑀧𑁆𑀧𑀸𑀬𑀸𑀦𑀺 𑀘 𑀧𑀸𑀦𑀸𑀦𑀺 𑀧𑀺𑀯𑀢𑁄 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑁂𑀦𑁂𑀯 𑀆𑀩𑀸𑀥𑁂𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀧𑀚𑀸𑀧𑀢𑀺 𑀉𑀚𑁆𑀛𑀸𑀬𑀢𑀺 𑀔𑀺𑀬𑁆𑀬𑀢𑀺 𑀯𑀺𑀧𑀸𑀘𑁂𑀢𑀺 𑁋 ‘‘𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀲𑁆𑀲𑀻𑀮𑀸 𑀫𑀼𑀲𑀸𑀯𑀸𑀤𑀺𑀦𑁄. 𑀇𑀫𑁂 𑀳𑀺 𑀦𑀸𑀫 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀺! 𑀦𑀢𑁆𑀣𑀺 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁 𑀦𑀢𑁆𑀣𑀺 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀦𑀝𑁆𑀞𑀁 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁 𑀦𑀝𑁆𑀞𑀁 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀓𑀼𑀢𑁄 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁 𑀓𑀼𑀢𑁄 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀅𑀧𑀕𑀢𑀸 𑀇𑀫𑁂 𑀲𑀸𑀫𑀜𑁆𑀜𑀸 𑀅𑀧𑀕𑀢𑀸 𑀇𑀫𑁂 𑀩𑁆𑀭𑀳𑁆𑀫𑀜𑁆𑀜𑀸. 𑀇𑀫𑁂 𑀫𑁂 𑀲𑀸𑀫𑀺𑀓𑀲𑁆𑀲 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀲𑀼𑀁. 𑀇𑀫𑁂𑀳𑀺 𑀫𑁂 𑀲𑀸𑀫𑀺𑀓𑁄 𑀫𑀸𑀭𑀺𑀢𑁄’’𑀢𑀺. 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀅𑀮𑀚𑁆𑀚𑀺𑀦𑁄 𑀇𑀫𑁂 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀤𑀼𑀲𑁆𑀲𑀻𑀮𑀸 𑀫𑀼𑀲𑀸𑀯𑀸𑀤𑀺𑀦𑁄. 𑀇𑀫𑁂 𑀳𑀺 𑀦𑀸𑀫 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀺! 𑀦𑀢𑁆𑀣𑀺 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁 𑀦𑀢𑁆𑀣𑀺 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀦𑀝𑁆𑀞𑀁 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁 𑀦𑀝𑁆𑀞𑀁 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀓𑀼𑀢𑁄 𑀇𑀫𑁂𑀲𑀁 𑀲𑀸𑀫𑀜𑁆𑀜𑀁 𑀓𑀼𑀢𑁄 𑀇𑀫𑁂𑀲𑀁 𑀩𑁆𑀭𑀳𑁆𑀫𑀜𑁆𑀜𑀁, 𑀅𑀧𑀕𑀢𑀸 𑀇𑀫𑁂 𑀲𑀸𑀫𑀜𑁆𑀜𑀸 𑀅𑀧𑀕𑀢𑀸 𑀇𑀫𑁂 𑀩𑁆𑀭𑀳𑁆𑀫𑀜𑁆𑀜𑀸. 𑀇𑀫𑁂 𑀉𑀧𑀸𑀲𑀓𑀲𑁆𑀲 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀲𑀼𑀁. 𑀇𑀫𑁂𑀳𑀺 𑀉𑀧𑀸𑀲𑀓𑁄 𑀫𑀸𑀭𑀺𑀢𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀪𑀺𑀓𑁆𑀔𑀽 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀉𑀚𑁆𑀛𑀸𑀬𑀦𑁆𑀢𑀸𑀦𑀁 𑀔𑀺𑀬𑁆𑀬𑀦𑁆𑀢𑀸𑀦𑀁 𑀯𑀺𑀧𑀸𑀘𑁂𑀦𑁆𑀢𑀸𑀦𑀁. 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸…𑀧𑁂… 𑀢𑁂 𑀉𑀚𑁆𑀛𑀸𑀬𑀦𑁆𑀢𑀺 𑀔𑀺𑀬𑁆𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀉𑀧𑀸𑀲𑀓𑀲𑁆𑀲 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑀺𑀲𑁆𑀲𑀦𑁆𑀢𑀻’’𑀢𑀺!

𑁧𑁭𑁦. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁…𑀧𑁂… ‘‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑀲𑁆𑀲 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀣𑀸’’𑀢𑀺? ‘‘𑀲𑀘𑁆𑀘𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀝𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀉𑀧𑀸𑀲𑀓𑀲𑁆𑀲 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑀺𑀲𑁆𑀲𑀣! 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁧𑁭𑁧. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬 𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬 𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬 𑀫𑀭𑀡𑀸𑀬 𑀯𑀸 𑀲𑀫𑀸𑀤𑀧𑁂𑀬𑁆𑀬 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 𑀧𑀸𑀧𑀓𑁂𑀦 𑀤𑀼𑀚𑁆𑀚𑀻𑀯𑀺𑀢𑁂𑀦, 𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄’𑀢𑀺, 𑀇𑀢𑀺 𑀘𑀺𑀢𑁆𑀢𑀫𑀦𑁄 𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬, 𑀫𑀭𑀡𑀸𑀬 𑀯𑀸 𑀲𑀫𑀸𑀤𑀧𑁂𑀬𑁆𑀬, 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺.

𑁧𑁭𑁨. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀲𑀜𑁆𑀘𑀺𑀘𑁆𑀘𑀸𑀢𑀺 𑀚𑀸𑀦𑀦𑁆𑀢𑁄 𑀲𑀜𑁆𑀚𑀸𑀦𑀦𑁆𑀢𑁄 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁄.

𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀦𑀸𑀫 𑀬𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀞𑀫𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀧𑀞𑀫𑀁 𑀯𑀺𑀜𑁆𑀜𑀸𑀡𑀁 𑀧𑀸𑀢𑀼𑀪𑀽𑀢𑀁, 𑀬𑀸𑀯 𑀫𑀭𑀡𑀓𑀸𑀮𑀸 𑀏𑀢𑁆𑀣𑀦𑁆𑀢𑀭𑁂 𑀏𑀲𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀦𑀸𑀫.

𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀘𑁆𑀙𑀺𑀦𑁆𑀤𑀢𑀺 𑀉𑀧𑀭𑁄𑀥𑁂𑀢𑀺 𑀲𑀦𑁆𑀢𑀢𑀺𑀁 𑀯𑀺𑀓𑁄𑀧𑁂𑀢𑀺.

𑀲𑀢𑁆𑀣𑀳𑀸𑀭𑀓𑀁 𑀯𑀸𑀲𑁆𑀲 𑀧𑀭𑀺𑀬𑁂𑀲𑁂𑀬𑁆𑀬𑀸𑀢𑀺 𑀅𑀲𑀺𑀁 𑀯𑀸 𑀲𑀢𑁆𑀢𑀺𑀁 𑀯𑀸 𑀪𑁂𑀡𑁆𑀟𑀺𑀁 𑀯𑀸 [𑀪𑁂𑀦𑁆𑀤𑀺𑀁 𑀯𑀸 (𑀓.)] 𑀮𑀕𑀼𑀴𑀁 𑀯𑀸 [𑀲𑀽𑀮𑀁𑀯𑀸 𑀮𑀕𑀼𑀴𑀁𑀯𑀸 (𑀲𑁆𑀬𑀸.)] 𑀧𑀸𑀲𑀸𑀡𑀁 𑀯𑀸 𑀲𑀢𑁆𑀣𑀁 𑀯𑀸 𑀯𑀺𑀲𑀁 𑀯𑀸 𑀭𑀚𑁆𑀚𑀼𑀁 𑀯𑀸.

𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸𑀢𑀺 𑀚𑀻𑀯𑀺𑀢𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺, 𑀫𑀭𑀡𑁂 𑀯𑀡𑁆𑀡𑀁 𑀪𑀡𑀢𑀺.

𑀫𑀭𑀡𑀸𑀬 𑀯𑀸 𑀲𑀫𑀸𑀤𑀧𑁂𑀬𑁆𑀬𑀸𑀢𑀺 𑀲𑀢𑁆𑀣𑀁 𑀯𑀸 𑀆𑀳𑀭, 𑀯𑀺𑀲𑀁 𑀯𑀸 𑀔𑀸𑀤, 𑀭𑀚𑁆𑀚𑀼𑀬𑀸 𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀓𑀸𑀮𑀗𑁆𑀓𑀭𑁄𑀳𑀻𑀢𑀺.

𑀅𑀫𑁆𑀪𑁄 𑀧𑀼𑀭𑀺𑀲𑀸𑀢𑀺 𑀆𑀮𑀧𑀦𑀸𑀥𑀺𑀯𑀘𑀦𑀫𑁂𑀢𑀁.

𑀓𑀺𑀁 𑀢𑀼𑀬𑁆𑀳𑀺𑀫𑀺𑀦𑀸 𑀧𑀸𑀧𑀓𑁂𑀦 𑀤𑀼𑀚𑁆𑀚𑀻𑀯𑀺𑀢𑁂𑀦𑀸𑀢𑀺 𑀧𑀸𑀧𑀓𑀁 𑀦𑀸𑀫 𑀚𑀻𑀯𑀺𑀢𑀁 𑀅𑀟𑁆𑀠𑀸𑀦𑀁 𑀚𑀻𑀯𑀺𑀢𑀁 𑀉𑀧𑀸𑀤𑀸𑀬 𑀤𑀮𑀺𑀤𑁆𑀤𑀸𑀦𑀁 𑀚𑀻𑀯𑀺𑀢𑀁 𑀧𑀸𑀧𑀓𑀁 𑀮𑀸𑀫𑀓𑀁, 𑀲𑀥𑀦𑀸𑀦𑀁 𑀚𑀻𑀯𑀺𑀢𑀁 𑀉𑀧𑀸𑀤𑀸𑀬 𑀅𑀥𑀦𑀸𑀦𑀁 𑀚𑀻𑀯𑀺𑀢𑀁 𑀧𑀸𑀧𑀓𑀁, 𑀤𑁂𑀯𑀸𑀦𑀁 𑀚𑀻𑀯𑀺𑀢𑀁 𑀉𑀧𑀸𑀤𑀸𑀬 𑀫𑀦𑀼𑀲𑁆𑀲𑀸𑀦𑀁 𑀚𑀻𑀯𑀺𑀢𑀁 𑀧𑀸𑀧𑀓𑀁.

𑀤𑀼𑀚𑁆𑀚𑀻𑀯𑀺𑀢𑀁 𑀦𑀸𑀫 𑀳𑀢𑁆𑀣𑀘𑁆𑀙𑀺𑀦𑁆𑀦𑀲𑁆𑀲 𑀧𑀸𑀤𑀘𑁆𑀙𑀺𑀦𑁆𑀦𑀲𑁆𑀲 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀦𑀲𑁆𑀲 𑀓𑀡𑁆𑀡𑀘𑁆𑀙𑀺𑀦𑁆𑀦𑀲𑁆𑀲 𑀦𑀸𑀲𑀘𑁆𑀙𑀺𑀦𑁆𑀦𑀲𑁆𑀲 𑀓𑀡𑁆𑀡𑀦𑀸𑀲𑀘𑁆𑀙𑀺𑀦𑁆𑀦𑀲𑁆𑀲, 𑀇𑀫𑀺𑀦𑀸 𑀘 𑀧𑀸𑀧𑀓𑁂𑀦 𑀇𑀫𑀺𑀦𑀸 𑀘 𑀤𑀼𑀚𑁆𑀚𑀻𑀯𑀺𑀢𑁂𑀦 𑀫𑀢𑀁 𑀢𑁂 𑀚𑀻𑀯𑀺𑀢𑀸 𑀲𑁂𑀬𑁆𑀬𑁄𑀢𑀺.

𑀇𑀢𑀺 𑀘𑀺𑀢𑁆𑀢𑀫𑀦𑁄𑀢𑀺 𑀬𑀁 𑀘𑀺𑀢𑁆𑀢𑀁 𑀢𑀁 𑀫𑀦𑁄, 𑀬𑀁 𑀫𑀦𑁄 𑀢𑀁 𑀘𑀺𑀢𑁆𑀢𑀁.

𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄𑀢𑀺 𑀫𑀭𑀡𑀲𑀜𑁆𑀜𑀻 𑀫𑀭𑀡𑀘𑁂𑀢𑀦𑁄 𑀫𑀭𑀡𑀸𑀥𑀺𑀧𑁆𑀧𑀸𑀬𑁄.

𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀉𑀘𑁆𑀘𑀸𑀯𑀘𑁂𑀳𑀺 𑀆𑀓𑀸𑀭𑁂𑀳𑀺.

𑀫𑀭𑀡𑀯𑀡𑁆𑀡𑀁 𑀯𑀸 𑀲𑀁𑀯𑀡𑁆𑀡𑁂𑀬𑁆𑀬𑀸𑀢𑀺 𑀚𑀻𑀯𑀺𑀢𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺, 𑀫𑀭𑀡𑁂 𑀯𑀡𑁆𑀡𑀁 𑀪𑀡𑀢𑀺 𑁋 ‘‘𑀇𑀢𑁄 𑀢𑁆𑀯𑀁 𑀓𑀸𑀮𑀗𑁆𑀓𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀲𑀺, 𑀢𑀢𑁆𑀣 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀲𑁆𑀲𑀲𑀻’’𑀢𑀺.

𑀫𑀭𑀡𑀸𑀬 𑀯𑀸 𑀲𑀫𑀸𑀤𑀧𑁂𑀬𑁆𑀬𑀸𑀢𑀺 𑀲𑀢𑁆𑀣𑀁 𑀯𑀸 𑀆𑀳𑀭, 𑀯𑀺𑀲𑀁 𑀯𑀸 𑀔𑀸𑀤, 𑀭𑀚𑁆𑀚𑀼𑀬𑀸 𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀓𑀸𑀮𑀗𑁆𑀓𑀭𑁄𑀳𑀺, 𑀲𑁄𑀩𑁆𑀪𑁂 𑀯𑀸 𑀦𑀭𑀓𑁂 𑀯𑀸 𑀧𑀧𑀸𑀢𑁂 𑀯𑀸 𑀧𑀧𑀢𑀸𑀢𑀺.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑁂 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀣𑀼𑀲𑀺𑀮𑀸 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸 [𑀤𑁆𑀯𑁂𑀥𑀸 𑀪𑀺𑀦𑁆𑀦𑀸 (𑀲𑁆𑀬𑀸.)] 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀳𑁄𑀢𑀺, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’𑀢𑀺.

𑀅𑀲𑀁𑀯𑀸𑀲𑁄𑀢𑀺 𑀲𑀁𑀯𑀸𑀲𑁄 𑀦𑀸𑀫 𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸 𑁋 𑀏𑀲𑁄 𑀲𑀁𑀯𑀸𑀲𑁄 𑀦𑀸𑀫. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀲𑀁𑀯𑀸𑀲𑁄𑀢𑀺.

𑁧𑁭𑁩. 𑀲𑀸𑀫𑀁, 𑀅𑀥𑀺𑀝𑁆𑀞𑀸𑀬, 𑀤𑀽𑀢𑁂𑀦, 𑀤𑀽𑀢𑀧𑀭𑀁𑀧𑀭𑀸𑀬, 𑀯𑀺𑀲𑀓𑁆𑀓𑀺𑀬𑁂𑀦 𑀤𑀽𑀢𑁂𑀦, 𑀕𑀢𑀧𑀘𑁆𑀘𑀸𑀕𑀢𑁂𑀦 𑀤𑀽𑀢𑁂𑀦, 𑀅𑀭𑀳𑁄 𑀭𑀳𑁄𑀲𑀜𑁆𑀜𑀻, 𑀭𑀳𑁄 𑀅𑀭𑀳𑁄𑀲𑀜𑁆𑀜𑀻, 𑀅𑀭𑀳𑁄 𑀅𑀭𑀳𑁄𑀲𑀜𑁆𑀜𑀻, 𑀭𑀳𑁄 𑀭𑀳𑁄𑀲𑀜𑁆𑀜𑀻 𑀓𑀸𑀬𑁂𑀦 𑀲𑀁𑀯𑀡𑁆𑀡𑁂𑀢𑀺, 𑀯𑀸𑀘𑀸𑀬 𑀲𑀁𑀯𑀡𑁆𑀡𑁂𑀢𑀺, 𑀓𑀸𑀬𑁂𑀦 𑀯𑀸𑀘𑀸𑀬 𑀲𑀁𑀯𑀡𑁆𑀡𑁂𑀢𑀺, 𑀤𑀽𑀢𑁂𑀦 𑀲𑀁𑀯𑀡𑁆𑀡𑁂𑀢𑀺, 𑀮𑁂𑀔𑀸𑀬 𑀲𑀁𑀯𑀡𑁆𑀡𑁂𑀢𑀺, 𑀑𑀧𑀸𑀢𑀁 𑀅𑀧𑀲𑁆𑀲𑁂𑀦𑀁, 𑀉𑀧𑀦𑀺𑀓𑁆𑀔𑀺𑀧𑀦𑀁, 𑀪𑁂𑀲𑀚𑁆𑀚𑀁, 𑀭𑀽𑀧𑀽𑀧𑀳𑀸𑀭𑁄, 𑀲𑀤𑁆𑀤𑀽𑀧𑀳𑀸𑀭𑁄, 𑀕𑀦𑁆𑀥𑀽𑀧𑀳𑀸𑀭𑁄, 𑀭𑀲𑀽𑀧𑀳𑀸𑀭𑁄, 𑀨𑁄𑀝𑁆𑀞𑀩𑁆𑀩𑀽𑀧𑀳𑀸𑀭𑁄, 𑀥𑀫𑁆𑀫𑀽𑀧𑀳𑀸𑀭𑁄, 𑀆𑀘𑀺𑀓𑁆𑀔𑀦𑀸, 𑀅𑀦𑀼𑀲𑀸𑀲𑀦𑀻, 𑀲𑀗𑁆𑀓𑁂𑀢𑀓𑀫𑁆𑀫𑀁, 𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺.

𑁧𑁭𑁪. 𑀲𑀸𑀫𑀦𑁆𑀢𑀺 𑀲𑀬𑀁 𑀳𑀦𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸.

𑀅𑀥𑀺𑀝𑁆𑀞𑀸𑀬𑀸𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀡𑀸𑀧𑁂𑀢𑀺 𑁋 ‘‘𑀏𑀯𑀁 𑀯𑀺𑀚𑁆𑀛, 𑀏𑀯𑀁 𑀧𑀳𑀭, 𑀏𑀯𑀁 𑀖𑀸𑀢𑁂𑀳𑀻’’𑀢𑀺.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀢𑀁 𑀫𑀜𑁆𑀜𑀫𑀸𑀦𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀲𑁆𑀲.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀢𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀯𑀥𑀓𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀅𑀜𑁆𑀜𑀁 𑀫𑀜𑁆𑀜𑀫𑀸𑀦𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀲𑁆𑀲.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀅𑀜𑁆𑀜𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺; 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀯𑀥𑀓𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤 𑁋 ‘𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤𑀢𑀼 𑁋 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀽’’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀇𑀢𑀭𑀲𑁆𑀲 𑀆𑀭𑁄𑀘𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀲𑀩𑁆𑀩𑁂𑀲𑀁 𑀧𑀸𑀭𑀸𑀚𑀺𑀓𑀲𑁆𑀲.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤 𑁋 ‘𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀧𑀸𑀯𑀤𑀢𑀼 𑁋 𑀇𑀢𑁆𑀣𑀦𑁆𑀦𑀸𑀫𑁄 𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀽’’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀅𑀜𑁆𑀜𑀁 𑀆𑀡𑀸𑀧𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀯𑀥𑀓𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺; 𑀆𑀡𑀸𑀧𑀓𑀲𑁆𑀲 𑀘 𑀯𑀥𑀓𑀲𑁆𑀲 𑀘 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀕𑀦𑁆𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀘𑁆𑀙𑀢𑀺 𑁋 ‘‘𑀦𑀸𑀳𑀁 𑀲𑀓𑁆𑀓𑁄𑀫𑀺 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼’’𑀦𑁆𑀢𑀺. 𑀲𑁄 𑀧𑀼𑀦 𑀆𑀡𑀸𑀧𑁂𑀢𑀺 𑁋 ‘‘𑀬𑀤𑀸 𑀲𑀓𑁆𑀓𑁄𑀲𑀺 𑀢𑀤𑀸 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀲𑁆𑀲.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀆𑀡𑀸𑀧𑁂𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀦 𑀲𑀸𑀯𑁂𑀢𑀺 𑁋 ‘‘𑀫𑀸 𑀖𑀸𑀢𑁂𑀳𑀻’’𑀢𑀺. 𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀲𑁆𑀲.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀆𑀡𑀸𑀧𑁂𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀲𑀸𑀯𑁂𑀢𑀺 𑁋 ‘‘𑀫𑀸 𑀖𑀸𑀢𑁂𑀳𑀻’’𑀢𑀺. 𑀲𑁄 𑁋 ‘‘𑀆𑀡𑀢𑁆𑀢𑁄 𑀅𑀳𑀁 𑀢𑀬𑀸’’𑀢𑀺 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀯𑀥𑀓𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀢𑀺 𑁋 ‘‘𑀇𑀢𑁆𑀣𑀦𑁆𑀦𑀸𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁄 𑀆𑀡𑀸𑀧𑁂𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀲𑀸𑀯𑁂𑀢𑀺 𑁋 ‘‘𑀫𑀸 𑀖𑀸𑀢𑁂𑀳𑀻’’𑀢𑀺. 𑀲𑁄 𑀲𑀸𑀥𑀽𑀢𑀺 𑀑𑀭𑀫𑀢𑀺, 𑀉𑀪𑀺𑀦𑁆𑀦𑀁 𑀅𑀦𑀸𑀧𑀢𑁆𑀢𑀺.

𑁧𑁭𑁫. 𑀅𑀭𑀳𑁄 𑀭𑀳𑁄𑀲𑀜𑁆𑀜𑀻 𑀉𑀮𑁆𑀮𑀧𑀢𑀺 𑁋 ‘‘𑀅𑀳𑁄 𑀇𑀢𑁆𑀣𑀦𑁆𑀦𑀸𑀫𑁄 𑀳𑀢𑁄 𑀅𑀲𑁆𑀲𑀸’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀭𑀳𑁄 𑀅𑀭𑀳𑁄𑀲𑀜𑁆𑀜𑀻 𑀉𑀮𑁆𑀮𑀧𑀢𑀺 𑁋 ‘‘𑀅𑀳𑁄 𑀇𑀢𑁆𑀣𑀦𑁆𑀦𑀸𑀫𑁄 𑀳𑀢𑁄 𑀅𑀲𑁆𑀲𑀸’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀭𑀳𑁄 𑀅𑀭𑀳𑁄𑀲𑀜𑁆𑀜𑀻 𑀉𑀮𑁆𑀮𑀧𑀢𑀺 𑁋 ‘‘𑀅𑀳𑁄 𑀇𑀢𑁆𑀣𑀦𑁆𑀦𑀸𑀫𑁄 𑀳𑀢𑁄 𑀅𑀲𑁆𑀲𑀸’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀭𑀳𑁄 𑀭𑀳𑁄𑀲𑀜𑁆𑀜𑀻 𑀉𑀮𑁆𑀮𑀧𑀢𑀺 𑁋 ‘‘𑀅𑀳𑁄 𑀇𑀢𑁆𑀣𑀦𑁆𑀦𑀸𑀫𑁄 𑀳𑀢𑁄 𑀅𑀲𑁆𑀲𑀸’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲.

𑀓𑀸𑀬𑁂𑀦 𑀲𑀁𑀯𑀡𑁆𑀡𑁂𑀢𑀺 𑀦𑀸𑀫 𑀓𑀸𑀬𑁂𑀦 𑀯𑀺𑀓𑀸𑀭𑀁 𑀓𑀭𑁄𑀢𑀺 𑁋 ‘‘𑀬𑁄 𑀏𑀯𑀁 𑀫𑀭𑀢𑀺 𑀲𑁄 𑀥𑀦𑀁 𑀯𑀸 𑀮𑀪𑀢𑀺 𑀬𑀲𑀁 𑀯𑀸 𑀮𑀪𑀢𑀺 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀸𑀬 𑀲𑀁𑀯𑀡𑁆𑀡𑀦𑀸𑀬 𑀫𑀭𑀺𑀲𑁆𑀲𑀸𑀫𑀻𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀯𑀸𑀘𑀸𑀬 𑀲𑀁𑀯𑀡𑁆𑀡𑁂𑀢𑀺 𑀦𑀸𑀫 𑀯𑀸𑀘𑀸𑀬 𑀪𑀡𑀢𑀺 𑁋 ‘‘𑀬𑁄 𑀏𑀯𑀁 𑀫𑀭𑀢𑀺 𑀲𑁄 𑀥𑀦𑀁 𑀯𑀸 𑀮𑀪𑀢𑀺 𑀬𑀲𑀁 𑀯𑀸 𑀮𑀪𑀢𑀺 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀸𑀬 𑀲𑀁𑀯𑀡𑁆𑀡𑀦𑀸𑀬 𑀫𑀭𑀺𑀲𑁆𑀲𑀸𑀫𑀻𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀓𑀸𑀬𑁂𑀦 𑀯𑀸𑀘𑀸𑀬 𑀲𑀁𑀯𑀡𑁆𑀡𑁂𑀢𑀺 𑀦𑀸𑀫 𑀓𑀸𑀬𑁂𑀦 𑀘 𑀯𑀺𑀓𑀸𑀭𑀁 𑀓𑀭𑁄𑀢𑀺, 𑀯𑀸𑀘𑀸𑀬 𑀘 𑀪𑀡𑀢𑀺 𑁋 ‘‘𑀬𑁄 𑀏𑀯𑀁 𑀫𑀭𑀢𑀺 𑀲𑁄 𑀥𑀦𑀁 𑀯𑀸 𑀮𑀪𑀢𑀺 𑀬𑀲𑀁 𑀯𑀸 𑀮𑀪𑀢𑀺 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀸𑀬 𑀲𑀁𑀯𑀡𑁆𑀡𑀦𑀸𑀬 𑀫𑀭𑀺𑀲𑁆𑀲𑀸𑀫𑀻𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀤𑀽𑀢𑁂𑀦 𑀲𑀁𑀯𑀡𑁆𑀡𑁂𑀢𑀺 𑀦𑀸𑀫 𑀤𑀽𑀢𑀲𑁆𑀲 𑀲𑀸𑀲𑀦𑀁 𑀆𑀭𑁄𑀘𑁂𑀢𑀺 𑁋 ‘‘𑀬𑁄 𑀏𑀯𑀁 𑀫𑀭𑀢𑀺 𑀲𑁄 𑀥𑀦𑀁 𑀯𑀸 𑀮𑀪𑀢𑀺 𑀬𑀲𑀁 𑀯𑀸 𑀮𑀪𑀢𑀺 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀤𑀽𑀢𑀲𑁆𑀲 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑁧𑁭𑁬. 𑀮𑁂𑀔𑀸𑀬 𑀲𑀁𑀯𑀡𑁆𑀡𑁂𑀢𑀺 𑀦𑀸𑀫 𑀮𑁂𑀔𑀁 𑀙𑀺𑀦𑁆𑀤𑀢𑀺 𑁋 ‘‘𑀬𑁄 𑀏𑀯𑀁 𑀫𑀭𑀢𑀺 𑀲𑁄 𑀥𑀦𑀁 𑀯𑀸 𑀮𑀪𑀢𑀺 𑀬𑀲𑀁 𑀯𑀸 𑀮𑀪𑀢𑀺 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻’’𑀢𑀺, 𑀅𑀓𑁆𑀔𑀭𑀓𑁆𑀔𑀭𑀸𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀮𑁂𑀔𑀁 𑀧𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀑𑀧𑀸𑀢𑀁 𑀦𑀸𑀫 𑀫𑀦𑀼𑀲𑁆𑀲𑀁 𑀉𑀤𑁆𑀤𑀺𑀲𑁆𑀲 𑀑𑀧𑀸𑀢𑀁 𑀔𑀦𑀢𑀺 𑁋 ‘‘𑀧𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀧𑀢𑀺𑀢𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀅𑀦𑁄𑀤𑀺𑀲𑁆𑀲 𑀑𑀧𑀸𑀢𑀁 𑀔𑀦𑀢𑀺 𑁋 ‘‘𑀬𑁄 𑀓𑁄𑀘𑀺 𑀧𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀫𑀦𑀼𑀲𑁆𑀲𑁄 𑀢𑀲𑁆𑀫𑀺𑀁 𑀧𑀧𑀢𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀧𑀢𑀺𑀢𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀯𑀸 𑀢𑀲𑁆𑀫𑀺𑀁 𑀧𑀧𑀢𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀧𑀢𑀺𑀢𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀢𑀺𑀭𑀘𑁆𑀙𑀸𑀦𑀕𑀢𑁄 𑀢𑀲𑁆𑀫𑀺𑀁 𑀧𑀧𑀢𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀧𑀧𑀢𑀺𑀢𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲.

𑁧𑁭𑁭. 𑀅𑀧𑀲𑁆𑀲𑁂𑀦𑀁 𑀦𑀸𑀫 𑀅𑀧𑀲𑁆𑀲𑁂𑀦𑁂 𑀲𑀢𑁆𑀣𑀁 𑀯𑀸 𑀞𑀧𑁂𑀢𑀺 𑀯𑀺𑀲𑁂𑀦 𑀯𑀸 𑀫𑀓𑁆𑀔𑁂𑀢𑀺 𑀤𑀼𑀩𑁆𑀩𑀮𑀁 𑀯𑀸 𑀓𑀭𑁄𑀢𑀺 𑀲𑁄𑀩𑁆𑀪𑁂 𑀯𑀸 𑀦𑀭𑀓𑁂 𑀯𑀸 𑀧𑀧𑀸𑀢𑁂 𑀯𑀸 𑀞𑀧𑁂𑀢𑀺 𑁋 ‘‘𑀧𑀧𑀢𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑀢𑁆𑀣𑁂𑀦 𑀯𑀸 𑀯𑀺𑀲𑁂𑀦 𑀯𑀸 𑀧𑀧𑀢𑀺𑀢𑁂𑀦 𑀯𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀉𑀧𑀦𑀺𑀓𑁆𑀔𑀺𑀧𑀦𑀁 𑀦𑀸𑀫 𑀅𑀲𑀺𑀁 𑀯𑀸 𑀲𑀢𑁆𑀢𑀺𑀁 𑀯𑀸 𑀪𑁂𑀡𑁆𑀟𑀺𑀁 𑀯𑀸 𑀮𑀕𑀼𑀴𑀁 𑀯𑀸 𑀧𑀸𑀲𑀸𑀡𑀁 𑀯𑀸 𑀲𑀢𑁆𑀣𑀁 𑀯𑀸 𑀯𑀺𑀲𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀉𑀧𑀦𑀺𑀓𑁆𑀔𑀺𑀧𑀢𑀺 𑁋 ‘‘𑀇𑀫𑀺𑀦𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. ‘‘𑀢𑁂𑀦 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀪𑁂𑀲𑀚𑁆𑀚𑀁 𑀦𑀸𑀫 𑀲𑀧𑁆𑀧𑀺𑀁 𑀯𑀸 𑀦𑀯𑀦𑀻𑀢𑀁 𑀯𑀸 𑀢𑁂𑀮𑀁 𑀯𑀸 𑀫𑀥𑀼𑀁 𑀯𑀸 𑀨𑀸𑀡𑀺𑀢𑀁 𑀯𑀸 𑀤𑁂𑀢𑀺 𑁋 ‘‘𑀇𑀫𑀁 𑀲𑀸𑀬𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀲𑀸𑀬𑀺𑀢𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑁧𑁭𑁮. 𑀭𑀽𑀧𑀽𑀧𑀳𑀸𑀭𑁄 𑀦𑀸𑀫 𑀅𑀫𑀦𑀸𑀧𑀺𑀓𑀁 𑀭𑀽𑀧𑀁 𑀉𑀧𑀲𑀁𑀳𑀭𑀢𑀺 𑀪𑀬𑀸𑀦𑀓𑀁 𑀪𑁂𑀭𑀯𑀁 𑁋 ‘‘𑀇𑀫𑀁 𑀧𑀲𑁆𑀲𑀺𑀢𑁆𑀯𑀸 𑀉𑀢𑁆𑀢𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀧𑀲𑁆𑀲𑀺𑀢𑁆𑀯𑀸 𑀉𑀢𑁆𑀢𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀦𑀸𑀧𑀺𑀓𑀁 𑀭𑀽𑀧𑀁 𑀉𑀧𑀲𑀁𑀳𑀭𑀢𑀺 [𑀉𑀧𑀲𑀁𑀳𑀭𑀢𑀺 𑀧𑁂𑀫𑀦𑀻𑀬𑀁 𑀳𑀤𑀬𑀗𑁆𑀕𑀫𑀁 (𑀲𑁆𑀬𑀸.)] 𑁋 ‘‘𑀇𑀫𑀁 𑀧𑀲𑁆𑀲𑀺𑀢𑁆𑀯𑀸 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀧𑀲𑁆𑀲𑀺𑀢𑁆𑀯𑀸 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀲𑀤𑁆𑀤𑀽𑀧𑀳𑀸𑀭𑁄 𑀦𑀸𑀫 𑀅𑀫𑀦𑀸𑀧𑀺𑀓𑀁 𑀲𑀤𑁆𑀤𑀁 𑀉𑀧𑀲𑀁𑀳𑀭𑀢𑀺 𑀪𑀬𑀸𑀦𑀓𑀁 𑀪𑁂𑀭𑀯𑀁 𑁋 ‘‘𑀇𑀫𑀁 𑀲𑀼𑀢𑁆𑀯𑀸 𑀉𑀢𑁆𑀢𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀲𑀼𑀢𑁆𑀯𑀸 𑀉𑀢𑁆𑀢𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀦𑀸𑀧𑀺𑀓𑀁 𑀲𑀤𑁆𑀤𑀁 𑀉𑀧𑀲𑀁𑀳𑀭𑀢𑀺 𑀧𑁂𑀫𑀦𑀻𑀬𑀁 𑀳𑀤𑀬𑀗𑁆𑀕𑀫𑀁 𑁋 ‘‘𑀇𑀫𑀁 𑀲𑀼𑀢𑁆𑀯𑀸 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀲𑀼𑀢𑁆𑀯𑀸 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀕𑀦𑁆𑀥𑀽𑀧𑀳𑀸𑀭𑁄 𑀦𑀸𑀫 𑀅𑀫𑀦𑀸𑀧𑀺𑀓𑀁 𑀕𑀦𑁆𑀥𑀁 𑀉𑀧𑀲𑀁𑀳𑀭𑀢𑀺 𑀚𑁂𑀕𑀼𑀘𑁆𑀙𑀁 𑀧𑀸𑀝𑀺𑀓𑀼𑀮𑁆𑀬𑀁 [𑀧𑀝𑀺𑀓𑀽𑀮𑀁 (?)] 𑁋 ‘‘𑀇𑀫𑀁 𑀖𑀸𑀬𑀺𑀢𑁆𑀯𑀸 𑀚𑁂𑀕𑀼𑀘𑁆𑀙𑀢𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀖𑀸𑀬𑀺𑀢𑁂 𑀚𑁂𑀕𑀼𑀘𑁆𑀙𑀢𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀦𑀸𑀧𑀺𑀓𑀁 𑀕𑀦𑁆𑀥𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀫𑀁 𑀖𑀸𑀬𑀺𑀢𑁆𑀯𑀸 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀖𑀸𑀬𑀺𑀢𑁆𑀯𑀸 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀭𑀲𑀽𑀧𑀳𑀸𑀭𑁄 𑀦𑀸𑀫 𑀅𑀫𑀦𑀸𑀧𑀺𑀓𑀁 𑀭𑀲𑀁 𑀉𑀧𑀲𑀁𑀳𑀭𑀢𑀺 𑀚𑁂𑀕𑀼𑀘𑁆𑀙𑀁 𑀧𑀸𑀝𑀺𑀓𑀼𑀮𑁆𑀬𑀁 [𑀧𑀝𑀺𑀓𑀽𑀮𑀁 (?)] 𑁋 ‘‘𑀇𑀫𑀁 𑀲𑀸𑀬𑀺𑀢𑁆𑀯𑀸 𑀚𑁂𑀕𑀼𑀘𑁆𑀙𑀢𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀲𑀸𑀬𑀺𑀢𑁂 𑀚𑁂𑀕𑀼𑀘𑁆𑀙𑀢𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀦𑀸𑀧𑀺𑀓𑀁 𑀭𑀲𑀁 𑀉𑀧𑀲𑀁𑀳𑀭𑀢𑀺 𑁋 ‘‘𑀇𑀫𑀁 𑀲𑀸𑀬𑀺𑀢𑁆𑀯𑀸 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀲𑀸𑀬𑀺𑀢𑁆𑀯𑀸 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀨𑁄𑀝𑁆𑀞𑀩𑁆𑀩𑀽𑀧𑀳𑀸𑀭𑁄 𑀦𑀸𑀫 𑀅𑀫𑀦𑀸𑀧𑀺𑀓𑀁 𑀨𑁄𑀝𑁆𑀞𑀩𑁆𑀩𑀁 𑀉𑀧𑀲𑀁𑀳𑀭𑀢𑀺 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀁 𑀔𑀭𑀲𑀫𑁆𑀨𑀲𑁆𑀲𑀁 𑁋 ‘‘𑀇𑀫𑀺𑀦𑀸 𑀨𑀼𑀝𑁆𑀞𑁄 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂𑀦 𑀨𑀼𑀝𑁆𑀞𑀲𑁆𑀲 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀫𑀦𑀸𑀧𑀺𑀓𑀁 𑀨𑁄𑀝𑁆𑀞𑀩𑁆𑀩𑀁 𑀉𑀧𑀲𑀁𑀳𑀭𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑀁 𑀫𑀼𑀤𑀼𑀲𑀫𑁆𑀨𑀲𑁆𑀲𑀁 𑁋 ‘‘𑀇𑀫𑀺𑀦𑀸 𑀨𑀼𑀝𑁆𑀞𑁄 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂𑀦 𑀨𑀼𑀝𑁆𑀞𑁄 𑀅𑀮𑀸𑀪𑀓𑁂𑀦 𑀲𑀼𑀲𑁆𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀥𑀫𑁆𑀫𑀽𑀧𑀳𑀸𑀭𑁄 𑀦𑀸𑀫 𑀦𑁂𑀭𑀬𑀺𑀓𑀲𑁆𑀲 𑀦𑀺𑀭𑀬𑀓𑀣𑀁 𑀓𑀣𑁂𑀢𑀺 𑁋 ‘‘𑀇𑀫𑀁 𑀲𑀼𑀢𑁆𑀯𑀸 𑀉𑀢𑁆𑀢𑀲𑀺𑀢𑁆𑀯𑀸 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀲𑀼𑀢𑁆𑀯𑀸 𑀉𑀢𑁆𑀢𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲 𑀲𑀕𑁆𑀕𑀓𑀣𑀁 𑀓𑀣𑁂𑀢𑀺 𑁋 ‘‘𑀇𑀫𑀁 𑀲𑀼𑀢𑁆𑀯𑀸 𑀅𑀥𑀺𑀫𑀼𑀢𑁆𑀢𑁄 𑀫𑀭𑀺𑀲𑁆𑀲𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀁 𑀲𑀼𑀢𑁆𑀯𑀸 𑀅𑀥𑀺𑀫𑀼𑀢𑁆𑀢𑁄 𑀫𑀭𑀺𑀲𑁆𑀲𑀸𑀫𑀻𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑁧𑁭𑁯. 𑀆𑀘𑀺𑀓𑁆𑀔𑀦𑀸 𑀦𑀸𑀫 𑀧𑀼𑀝𑁆𑀞𑁄 𑀪𑀡𑀢𑀺 𑁋 ‘‘𑀏𑀯𑀁 𑀫𑀭𑀲𑁆𑀲𑀼. 𑀬𑁄 𑀏𑀯𑀁 𑀫𑀭𑀢𑀺 𑀲𑁄 𑀥𑀦𑀁 𑀯𑀸 𑀮𑀪𑀢𑀺 𑀬𑀲𑀁 𑀯𑀸 𑀮𑀪𑀢𑀺 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀸𑀬 𑀆𑀘𑀺𑀓𑁆𑀔𑀦𑀸𑀬 𑀫𑀭𑀺𑀲𑁆𑀲𑀸𑀫𑀻𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀅𑀦𑀼𑀲𑀸𑀲𑀦𑀻 𑀦𑀸𑀫 𑀅𑀧𑀼𑀝𑁆𑀞𑁄 𑀪𑀡𑀢𑀺 𑁋 ‘‘𑀏𑀯𑀁 𑀫𑀭𑀲𑁆𑀲𑀼. 𑀬𑁄 𑀏𑀯𑀁 𑀫𑀭𑀢𑀺 𑀲𑁄 𑀥𑀦𑀁 𑀯𑀸 𑀮𑀪𑀢𑀺 𑀬𑀲𑀁 𑀯𑀸 𑀮𑀪𑀢𑀺 𑀲𑀕𑁆𑀕𑀁 𑀯𑀸 𑀕𑀘𑁆𑀙𑀢𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀫𑀭𑀺𑀲𑁆𑀲𑀸𑀫𑀻𑀢𑀺 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀫𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀲𑀗𑁆𑀓𑁂𑀢𑀓𑀫𑁆𑀫𑀁 𑀦𑀸𑀫 𑀲𑀗𑁆𑀓𑁂𑀢𑀁 𑀓𑀭𑁄𑀢𑀺 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀸 𑀯𑀸 𑁋 ‘‘𑀢𑁂𑀦 𑀲𑀗𑁆𑀓𑁂𑀢𑁂𑀦 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂𑀦 𑀲𑀗𑁆𑀓𑁂𑀢𑁂𑀦 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀲𑁆𑀲. 𑀢𑀁 𑀲𑀗𑁆𑀓𑁂𑀢𑀁 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀯𑀥𑀓𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀦𑀸𑀫 𑀦𑀺𑀫𑀺𑀢𑁆𑀢𑀁 𑀓𑀭𑁄𑀢𑀺 𑁋 ‘‘𑀅𑀓𑁆𑀔𑀺𑀁 𑀯𑀸 𑀦𑀺𑀔𑀡𑀺𑀲𑁆𑀲𑀸𑀫𑀺 𑀪𑀫𑀼𑀓𑀁 𑀯𑀸 𑀉𑀓𑁆𑀔𑀺𑀧𑀺𑀲𑁆𑀲𑀸𑀫𑀺 𑀲𑀻𑀲𑀁 𑀯𑀸 𑀉𑀓𑁆𑀔𑀺𑀧𑀺𑀲𑁆𑀲𑀸𑀫𑀺, 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀧𑀸𑀭𑀸𑀚𑀺𑀓𑀲𑁆𑀲. 𑀢𑀁 𑀦𑀺𑀫𑀺𑀢𑁆𑀢𑀁 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀫𑀽𑀮𑀝𑁆𑀞𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀯𑀥𑀓𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀅𑀦𑀸𑀧𑀢𑁆𑀢𑀺 𑀅𑀲𑀜𑁆𑀘𑀺𑀘𑁆𑀘 𑀅𑀚𑀸𑀦𑀦𑁆𑀢𑀲𑁆𑀲 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 [𑀉𑀫𑁆𑀫𑀢𑁆𑀢𑀓𑀲𑁆𑀲 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀯𑁂𑀤𑀦𑀸𑀝𑁆𑀝𑀲𑁆𑀲 (𑀲𑁆𑀬𑀸.)] 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺.

𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀧𑀸𑀭𑀸𑀚𑀺𑀓𑀫𑁆𑀳𑀺 𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀯𑀺𑀦𑀻𑀢𑀯𑀢𑁆𑀣𑀼𑀉𑀤𑁆𑀤𑀸𑀦𑀕𑀸𑀣𑀸

𑀲𑀁𑀯𑀡𑁆𑀡𑀦𑀸 𑀦𑀺𑀲𑀻𑀤𑀦𑁆𑀢𑁄, 𑀫𑀼𑀲𑀮𑁄𑀤𑀼𑀓𑁆𑀔𑀮𑁂𑀦 𑀘;

𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀸𑀪𑀺𑀲𑀦𑁆𑀦𑁄, 𑀅𑀕𑁆𑀕𑀯𑀻𑀫𑀁𑀲𑀦𑀸𑀯𑀺𑀲𑀁.

𑀢𑀬𑁄 𑀘 𑀯𑀢𑁆𑀣𑀼𑀓𑀫𑁆𑀫𑁂𑀳𑀺, 𑀇𑀝𑁆𑀞𑀓𑀸𑀳𑀺𑀧𑀭𑁂 𑀢𑀬𑁄;

𑀯𑀸𑀲𑀻 𑀕𑁄𑀧𑀸𑀦𑀲𑀻 𑀘𑁂𑀯, 𑀅𑀝𑁆𑀝𑀓𑁄𑀢𑀭𑀡𑀁 𑀧𑀢𑀺.

𑀲𑁂𑀤𑀁 𑀦𑀢𑁆𑀣𑀼𑀜𑁆𑀘 𑀲𑀫𑁆𑀩𑀸𑀳𑁄, 𑀦𑁆𑀳𑀸𑀧𑀦𑀩𑁆𑀪𑀜𑁆𑀚𑀦𑁂𑀦 𑀘;

𑀉𑀝𑁆𑀞𑀸𑀧𑁂𑀦𑁆𑀢𑁄 𑀦𑀺𑀧𑀸𑀢𑁂𑀦𑁆𑀢𑁄, 𑀅𑀦𑁆𑀦𑀧𑀸𑀦𑁂𑀦 𑀫𑀸𑀭𑀡𑀁.

𑀚𑀸𑀭𑀕𑀩𑁆𑀪𑁄 𑀲𑀧𑀢𑁆𑀢𑀻 𑀘, 𑀫𑀸𑀢𑀸 𑀧𑀼𑀢𑁆𑀢𑀁 𑀉𑀪𑁄 𑀯𑀥𑀺;

𑀉𑀪𑁄 𑀦 𑀫𑀺𑀬𑁆𑀬𑀭𑁂 𑀫𑀤𑁆𑀤𑀸, 𑀢𑀸𑀧𑀁 𑀯𑀜𑁆𑀛𑀸 𑀯𑀺𑀚𑀸𑀬𑀺𑀦𑀻.

𑀧𑀢𑁄𑀤𑀁 𑀦𑀺𑀕𑁆𑀕𑀳𑁂 𑀬𑀓𑁆𑀔𑁄, 𑀯𑀸𑀴𑀬𑀓𑁆𑀔𑀜𑁆𑀘 𑀧𑀸𑀳𑀺𑀡𑀺;

𑀢𑀁 𑀫𑀜𑁆𑀜𑀫𑀸𑀦𑁄 𑀧𑀳𑀭𑀺, 𑀲𑀕𑁆𑀕𑀜𑁆𑀘 𑀦𑀺𑀭𑀬𑀁 𑀪𑀡𑁂.

𑀆𑀴𑀯𑀺𑀬𑀸 𑀢𑀬𑁄 𑀭𑀼𑀓𑁆𑀔𑀸, 𑀤𑀸𑀬𑁂𑀳𑀺 𑀅𑀧𑀭𑁂 𑀢𑀬𑁄;

𑀫𑀸 𑀓𑀺𑀮𑀫𑁂𑀲𑀺 𑀦 𑀢𑀼𑀬𑁆𑀳𑀁, 𑀢𑀓𑁆𑀓𑀁 𑀲𑁄𑀯𑀻𑀭𑀓𑁂𑀦 𑀘𑀸𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼

𑁧𑁮𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀽 𑀓𑀸𑀭𑀼𑀜𑁆𑀜𑁂𑀦 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀓𑀘𑁆𑀘𑀺 𑀦𑀼 𑀔𑁄 𑀫𑀬𑀁 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. ‘‘𑀆𑀧𑀢𑁆𑀢𑀺𑀁 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀧𑀦𑁆𑀦𑀸 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀺𑀡𑁆𑀟𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀧𑀻𑀞𑀓𑁂 𑀧𑀺𑀮𑁄𑀢𑀺𑀓𑀸𑀬 𑀧𑀝𑀺𑀘𑁆𑀙𑀦𑁆𑀦𑀁 𑀤𑀸𑀭𑀓𑀁 𑀦𑀺𑀲𑀻𑀤𑀦𑁆𑀢𑁄 𑀑𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀓𑀘𑁆𑀘𑀺 𑀦𑀼 𑀔𑁄 𑀅𑀳𑀁 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄’’𑀢𑀺? 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀝𑀺𑀯𑁂𑀓𑁆𑀔𑀺𑀢𑁆𑀯𑀸 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁; 𑀬𑁄 𑀦𑀺𑀲𑀻𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀆𑀲𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀫𑀼𑀲𑀮𑁂 𑀉𑀲𑁆𑀲𑀺𑀢𑁂 𑀏𑀓𑀁 𑀫𑀼𑀲𑀮𑀁 𑀅𑀕𑁆𑀕𑀳𑁂𑀲𑀺. 𑀤𑀼𑀢𑀺𑀬𑁄 𑀫𑀼𑀲𑀮𑁄 𑀧𑀭𑀺𑀧𑀢𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀤𑀸𑀭𑀓𑀲𑁆𑀲 𑀫𑀢𑁆𑀣𑀓𑁂 𑀅𑀯𑀢𑁆𑀣𑀸𑀲𑀺. 𑀲𑁄 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀅𑀲𑀜𑁆𑀘𑀺𑀘𑁆𑀘 𑀅𑀳𑀁, 𑀪𑀕𑀯𑀸’’𑀢𑀺. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀢𑁆𑀢𑀕𑁆𑀕𑁂 𑀅𑀦𑁆𑀢𑀭𑀖𑀭𑁂 𑀆𑀲𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀉𑀤𑀼𑀓𑁆𑀔𑀮𑀪𑀡𑁆𑀟𑀺𑀓𑀁 𑀅𑀓𑁆𑀓𑀫𑀺𑀢𑁆𑀯𑀸 𑀧𑀯𑀝𑁆𑀝𑁂𑀲𑀺. 𑀅𑀜𑁆𑀜𑀢𑀭𑀁 𑀤𑀸𑀭𑀓𑀁 𑀑𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀺𑀢𑀸𑀧𑀼𑀢𑁆𑀢𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑀸 𑀳𑁄𑀦𑁆𑀢𑀺. 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀧𑀼𑀢𑁆𑀢𑁄 𑀧𑀺𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀲𑀗𑁆𑀖𑁄 𑀢𑀁 𑀧𑀢𑀺𑀫𑀸𑀦𑁂𑀢𑀻’’𑀢𑀺 𑀧𑀺𑀝𑁆𑀞𑀺𑀬𑀁 𑀕𑀳𑁂𑀢𑁆𑀯𑀸 𑀧𑀡𑀸𑀫𑁂𑀲𑀺. 𑀲𑁄 𑀧𑀧𑀢𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀦𑀸𑀳𑀁, 𑀪𑀕𑀯𑀸, 𑀫𑀭𑀡𑀸𑀥𑀺𑀧𑁆𑀧𑀸𑀬𑁄’’𑀢𑀺. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀺𑀢𑀸𑀧𑀼𑀢𑁆𑀢𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑀸 𑀳𑁄𑀦𑁆𑀢𑀺. 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀧𑀼𑀢𑁆𑀢𑁄 𑀧𑀺𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀲𑀗𑁆𑀖𑁄 𑀢𑀁 𑀧𑀢𑀺𑀫𑀸𑀦𑁂𑀢𑀻’’𑀢𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀧𑀺𑀝𑁆𑀞𑀺𑀬𑀁 𑀕𑀳𑁂𑀢𑁆𑀯𑀸 𑀧𑀡𑀸𑀫𑁂𑀲𑀺. 𑀲𑁄 𑀧𑀧𑀢𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀺𑀢𑀸𑀧𑀼𑀢𑁆𑀢𑀸 𑀪𑀺𑀓𑁆𑀔𑀽𑀲𑀼 𑀧𑀩𑁆𑀩𑀚𑀺𑀢𑀸 𑀳𑁄𑀦𑁆𑀢𑀺. 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀧𑀼𑀢𑁆𑀢𑁄 𑀧𑀺𑀢𑀭𑀁 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙, 𑀪𑀦𑁆𑀢𑁂, 𑀲𑀗𑁆𑀖𑁄 𑀢𑀁 𑀧𑀢𑀺𑀫𑀸𑀦𑁂𑀢𑀻’’𑀢𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀧𑀺𑀝𑁆𑀞𑀺𑀬𑀁 𑀕𑀳𑁂𑀢𑁆𑀯𑀸 𑀧𑀡𑀸𑀫𑁂𑀲𑀺. 𑀲𑁄 𑀧𑀧𑀢𑀺𑀢𑁆𑀯𑀸 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑁧𑁮𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀫𑀁𑀲𑀁 𑀓𑀡𑁆𑀞𑁂 𑀯𑀺𑀮𑀕𑁆𑀕𑀁 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀻𑀯𑀸𑀬𑀁 𑀧𑀳𑀸𑀭𑀁 𑀅𑀤𑀸𑀲𑀺. 𑀲𑀮𑁄𑀳𑀺𑀢𑀁 𑀫𑀁𑀲𑀁 𑀧𑀢𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀫𑀁𑀲𑀁 𑀓𑀡𑁆𑀞𑁂 𑀯𑀺𑀮𑀕𑁆𑀕𑀁 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀻𑀯𑀸𑀬𑀁 𑀧𑀳𑀸𑀭𑀁 𑀅𑀤𑀸𑀲𑀺. 𑀲𑀮𑁄𑀳𑀺𑀢𑀁 𑀫𑀁𑀲𑀁 𑀧𑀢𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀼𑀜𑁆𑀚𑀦𑁆𑀢𑀲𑁆𑀲 𑀫𑀁𑀲𑀁 𑀓𑀡𑁆𑀞𑁂 𑀯𑀺𑀮𑀕𑁆𑀕𑀁 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀻𑀯𑀸𑀬𑀁 𑀧𑀳𑀸𑀭𑀁 𑀅𑀤𑀸𑀲𑀺. 𑀲𑀮𑁄𑀳𑀺𑀢𑀁 𑀫𑀁𑀲𑀁 𑀧𑀢𑀺. 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀧𑀺𑀡𑁆𑀟𑀘𑀸𑀭𑀺𑀓𑁄 𑀪𑀺𑀓𑁆𑀔𑀼 𑀯𑀺𑀲𑀕𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀢𑁆𑀯𑀸 𑀧𑀝𑀺𑀓𑁆𑀓𑀫𑀦𑀁 𑀳𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀓𑀸𑀭𑀺𑀓𑀁 𑀅𑀤𑀸𑀲𑀺. 𑀢𑁂 𑀪𑀺𑀓𑁆𑀔𑀽 𑀓𑀸𑀮𑀫𑀓𑀁𑀲𑀼. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀦𑀸𑀳𑀁, 𑀪𑀕𑀯𑀸, 𑀚𑀸𑀦𑀸𑀫𑀻’’𑀢𑀺. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀯𑀻𑀫𑀁𑀲𑀸𑀥𑀺𑀧𑁆𑀧𑀸𑀬𑁄 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀲𑀁 𑀅𑀤𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀯𑀻𑀫𑀁𑀲𑀸𑀥𑀺𑀧𑁆𑀧𑀸𑀬𑁄 𑀅𑀳𑀁, 𑀪𑀕𑀯𑀸’’𑀢𑀺. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑁧𑁮𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 [𑀆𑀴𑀯𑀺𑀓𑀸 (𑀲𑁆𑀬𑀸.)] 𑀪𑀺𑀓𑁆𑀔𑀽 𑀯𑀺𑀳𑀸𑀭𑀯𑀢𑁆𑀣𑀼𑀁 𑀓𑀭𑁄𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀳𑀼𑀢𑁆𑀯𑀸 𑀲𑀺𑀮𑀁 𑀉𑀘𑁆𑀘𑀸𑀭𑁂𑀲𑀺. 𑀉𑀧𑀭𑀺𑀫𑁂𑀦 𑀪𑀺𑀓𑁆𑀔𑀼𑀦𑀸 𑀤𑀼𑀕𑁆𑀕𑀳𑀺𑀢𑀸 𑀲𑀺𑀮𑀸 𑀳𑁂𑀝𑁆𑀞𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀢𑁆𑀣𑀓𑁂 𑀅𑀯𑀢𑁆𑀣𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀯𑀺𑀳𑀸𑀭𑀯𑀢𑁆𑀣𑀼𑀁 𑀓𑀭𑁄𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀳𑀼𑀢𑁆𑀯𑀸 𑀲𑀺𑀮𑀁 𑀉𑀘𑁆𑀘𑀸𑀭𑁂𑀲𑀺. 𑀉𑀧𑀭𑀺𑀫𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀳𑁂𑀝𑁆𑀞𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀢𑁆𑀣𑀓𑁂 𑀲𑀺𑀮𑀁 𑀫𑀼𑀜𑁆𑀘𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀯𑀺𑀳𑀸𑀭𑀲𑁆𑀲 𑀓𑀼𑀝𑁆𑀝𑀁 𑀉𑀝𑁆𑀞𑀸𑀧𑁂𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀳𑀼𑀢𑁆𑀯𑀸 𑀇𑀝𑁆𑀞𑀓𑀁 𑀉𑀘𑁆𑀘𑀸𑀭𑁂𑀲𑀺. 𑀉𑀧𑀭𑀺𑀫𑁂𑀦 𑀪𑀺𑀓𑁆𑀔𑀼𑀦𑀸 𑀤𑀼𑀕𑁆𑀕𑀳𑀺𑀢𑀸 𑀇𑀝𑁆𑀞𑀓𑀸 𑀳𑁂𑀝𑁆𑀞𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀢𑁆𑀣𑀓𑁂 𑀅𑀯𑀢𑁆𑀣𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑀺, 𑀪𑀺𑀓𑁆𑀔𑀼, 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀯𑀺𑀳𑀸𑀭𑀲𑁆𑀲 𑀓𑀼𑀝𑁆𑀝𑀁 𑀉𑀝𑁆𑀞𑀸𑀧𑁂𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀳𑀼𑀢𑁆𑀯𑀸 𑀇𑀝𑁆𑀞𑀓𑀁 𑀉𑀘𑁆𑀘𑀸𑀭𑁂𑀲𑀺. 𑀉𑀧𑀭𑀺𑀫𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀳𑁂𑀝𑁆𑀞𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀢𑁆𑀣𑀓𑁂 𑀇𑀝𑁆𑀞𑀓𑀁 𑀫𑀼𑀜𑁆𑀘𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑁧𑁮𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀳𑀼𑀢𑁆𑀯𑀸 𑀯𑀸𑀲𑀺𑀁 𑀉𑀘𑁆𑀘𑀸𑀭𑁂𑀲𑀺. 𑀉𑀧𑀭𑀺𑀫𑁂𑀦 𑀪𑀺𑀓𑁆𑀔𑀼𑀦𑀸 𑀤𑀼𑀕𑁆𑀕𑀳𑀺𑀢𑀸 𑀯𑀸𑀲𑀻 𑀳𑁂𑀝𑁆𑀞𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀢𑁆𑀣𑀓𑁂 𑀅𑀯𑀢𑁆𑀣𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀳𑀼𑀢𑁆𑀯𑀸 𑀯𑀸𑀲𑀺𑀁 𑀉𑀘𑁆𑀘𑀸𑀭𑁂𑀲𑀺. 𑀉𑀧𑀭𑀺𑀫𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀳𑁂𑀝𑁆𑀞𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀢𑁆𑀣𑀓𑁂 𑀯𑀸𑀲𑀺𑀁 𑀫𑀼𑀜𑁆𑀘𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀳𑀼𑀢𑁆𑀯𑀸 𑀕𑁄𑀧𑀸𑀦𑀲𑀺𑀁 𑀉𑀘𑁆𑀘𑀸𑀭𑁂𑀲𑀺. 𑀉𑀧𑀭𑀺𑀫𑁂𑀦 𑀪𑀺𑀓𑁆𑀔𑀼𑀦𑀸 𑀤𑀼𑀕𑁆𑀕𑀳𑀺𑀢𑀸 𑀕𑁄𑀧𑀸𑀦𑀲𑀻 𑀳𑁂𑀝𑁆𑀞𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀢𑁆𑀣𑀓𑁂 𑀅𑀯𑀢𑁆𑀣𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀳𑀼𑀢𑁆𑀯𑀸 𑀕𑁄𑀧𑀸𑀦𑀲𑀺𑀁 𑀉𑀘𑁆𑀘𑀸𑀭𑁂𑀲𑀺. 𑀉𑀧𑀭𑀺𑀫𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀳𑁂𑀝𑁆𑀞𑀺𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀢𑁆𑀣𑀓𑁂 𑀕𑁄𑀧𑀸𑀦𑀲𑀺𑀁 𑀫𑀼𑀜𑁆𑀘𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀅𑀝𑁆𑀝𑀓𑀁 𑀩𑀦𑁆𑀥𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀆𑀯𑀼𑀲𑁄, 𑀅𑀢𑁆𑀭𑀝𑁆𑀞𑀺𑀢𑁄 𑀩𑀦𑁆𑀥𑀸𑀳𑀻’’𑀢𑀺. 𑀲𑁄 𑀢𑀢𑁆𑀭𑀝𑁆𑀞𑀺𑀢𑁄 𑀩𑀦𑁆𑀥𑀦𑁆𑀢𑁄 𑀧𑀭𑀺𑀧𑀢𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺? ‘‘𑀦𑀸𑀳𑀁, 𑀪𑀕𑀯𑀸, 𑀫𑀭𑀡𑀸𑀥𑀺𑀧𑁆𑀧𑀸𑀬𑁄’’𑀢𑀺. ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀅𑀝𑁆𑀝𑀓𑀁 𑀩𑀦𑁆𑀥𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀆𑀯𑀼𑀲𑁄, 𑀅𑀢𑁆𑀭𑀝𑁆𑀞𑀺𑀢𑁄 𑀩𑀦𑁆𑀥𑀸𑀳𑀻’’𑀢𑀺. 𑀲𑁄 𑀢𑀢𑁆𑀭𑀝𑁆𑀞𑀺𑀢𑁄 𑀩𑀦𑁆𑀥𑀦𑁆𑀢𑁄 𑀧𑀭𑀺𑀧𑀢𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺…𑀧𑁂… 𑀧𑀭𑀺𑀧𑀢𑀺𑀢𑁆𑀯𑀸 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀯𑀺𑀳𑀸𑀭𑀁 𑀙𑀸𑀤𑁂𑀢𑁆𑀯𑀸 𑀑𑀢𑀭𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀆𑀯𑀼𑀲𑁄, 𑀇𑀢𑁄 𑀑𑀢𑀭𑀸𑀳𑀻’’𑀢𑀺. 𑀲𑁄 𑀢𑁂𑀦 𑀑𑀢𑀭𑀦𑁆𑀢𑁄 𑀧𑀭𑀺𑀧𑀢𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀯𑀺𑀳𑀸𑀭𑀁 𑀙𑀸𑀤𑁂𑀢𑁆𑀯𑀸 𑀑𑀢𑀭𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀆𑀯𑀼𑀲𑁄, 𑀇𑀢𑁄 𑀑𑀢𑀭𑀸𑀳𑀻’’𑀢𑀺. 𑀲𑁄 𑀢𑁂𑀦 𑀑𑀢𑀭𑀦𑁆𑀢𑁄 𑀧𑀭𑀺𑀧𑀢𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺…𑀧𑁂… 𑀧𑀭𑀺𑀧𑀢𑀺𑀢𑁆𑀯𑀸 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀧𑀸𑀢𑁂 𑀧𑀧𑀢𑀦𑁆𑀢𑁄 𑀅𑀜𑁆𑀜𑀢𑀭𑀁 𑀯𑀺𑀮𑀻𑀯𑀓𑀸𑀭𑀁 𑀑𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀦𑀁 𑀧𑀸𑀢𑁂𑀢𑀩𑁆𑀩𑀁. 𑀬𑁄 𑀧𑀸𑀢𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀯𑀸𑀬 𑀲𑀺𑀮𑀁 𑀧𑀯𑀺𑀚𑁆𑀛𑀺𑀁𑀲𑀼. 𑀲𑀸 𑀅𑀜𑁆𑀜𑀢𑀭𑀁 𑀕𑁄𑀧𑀸𑀮𑀓𑀁 𑀑𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺 …𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲. 𑀦 𑀘, 𑀪𑀺𑀓𑁆𑀔𑀯𑁂, 𑀤𑀯𑀸𑀬 𑀲𑀺𑀮𑀸 𑀧𑀯𑀺𑀚𑁆𑀛𑀺𑀢𑀩𑁆𑀩𑀸. 𑀬𑁄 𑀧𑀯𑀺𑀚𑁆𑀛𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑁧𑁮𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀲𑁂𑀤𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀲𑁂𑀤𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺.…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀲𑀸𑀪𑀺𑀢𑀸𑀧𑁄 𑀳𑁄𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀽 𑀦𑀢𑁆𑀣𑀼𑀁 𑀅𑀤𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀲𑀸𑀪𑀺𑀢𑀸𑀧𑁄 𑀳𑁄𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀽 𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀦𑀢𑁆𑀣𑀼𑀁 𑀅𑀤𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀲𑀫𑁆𑀩𑀸𑀳𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀲𑀫𑁆𑀩𑀸𑀳𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀼 𑀦𑁆𑀳𑀸𑀧𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀦𑁆𑀳𑀸𑀧𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑁧𑁮𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀉𑀝𑁆𑀞𑀸𑀧𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀉𑀝𑁆𑀞𑀸𑀧𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀦𑀺𑀧𑀸𑀢𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀁 𑀪𑀺𑀓𑁆𑀔𑀽 𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀦𑀺𑀧𑀸𑀢𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀽 𑀅𑀦𑁆𑀦𑀁 𑀅𑀤𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀽 𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀅𑀦𑁆𑀦𑀁 𑀅𑀤𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼 𑀧𑀸𑀦𑀁 𑀅𑀤𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀳𑁄𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀽 𑀫𑀭𑀡𑀸𑀥𑀺𑀧𑁆𑀧𑀸𑀬𑀸 𑀧𑀸𑀦𑀁 𑀅𑀤𑀁𑀲𑀼. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑁧𑁮𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀇𑀢𑁆𑀣𑀻 𑀧𑀯𑀼𑀢𑁆𑀣𑀧𑀢𑀺𑀓𑀸 𑀚𑀸𑀭𑁂𑀦 𑀕𑀩𑁆𑀪𑀺𑀦𑀻 𑀳𑁄𑀢𑀺. 𑀲𑀸 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀇𑀗𑁆𑀖𑀸𑀬𑁆𑀬 𑀕𑀩𑁆𑀪𑀧𑀸𑀢𑀦𑀁 𑀚𑀸𑀦𑀸𑀳𑀻’’𑀢𑀺. ‘‘𑀲𑀼𑀝𑁆𑀞𑀼, 𑀪𑀕𑀺𑀦𑀻’’𑀢𑀺 𑀢𑀲𑁆𑀲𑀸 𑀕𑀩𑁆𑀪𑀧𑀸𑀢𑀦𑀁 𑀅𑀤𑀸𑀲𑀺. 𑀤𑀸𑀭𑀓𑁄 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀧𑀚𑀸𑀧𑀢𑀺𑀬𑁄 𑀳𑁄𑀦𑁆𑀢𑀺 𑁋 𑀏𑀓𑀸 𑀯𑀜𑁆𑀛𑀸, 𑀏𑀓𑀸 𑀯𑀺𑀚𑀸𑀬𑀺𑀦𑀻. 𑀯𑀜𑁆𑀛𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀲𑀸, 𑀪𑀦𑁆𑀢𑁂, 𑀯𑀺𑀚𑀸𑀬𑀺𑀲𑁆𑀲𑀢𑀺 𑀲𑀩𑁆𑀩𑀲𑁆𑀲 𑀓𑀼𑀝𑀼𑀫𑁆𑀩𑀲𑁆𑀲 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀢𑀺. 𑀇𑀗𑁆𑀖𑀸𑀬𑁆𑀬, 𑀢𑀲𑁆𑀲𑀸 𑀕𑀩𑁆𑀪𑀧𑀸𑀢𑀦𑀁 𑀚𑀸𑀦𑀸𑀳𑀻’’𑀢𑀺.‘‘𑀲𑀼𑀝𑁆𑀞𑀼, 𑀪𑀕𑀺𑀦𑀻’’𑀢𑀺 𑀢𑀲𑁆𑀲𑀸 𑀕𑀩𑁆𑀪𑀧𑀸𑀢𑀦𑀁 𑀅𑀤𑀸𑀲𑀺. 𑀤𑀸𑀭𑀓𑁄 𑀓𑀸𑀮𑀫𑀓𑀸𑀲𑀺, 𑀫𑀸𑀢𑀸 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀧𑀚𑀸𑀧𑀢𑀺𑀬𑁄 𑀳𑁄𑀦𑁆𑀢𑀺 𑁋 𑀏𑀓𑀸 𑀯𑀜𑁆𑀛𑀸, 𑀏𑀓𑀸 𑀯𑀺𑀚𑀸𑀬𑀺𑀦𑀻. 𑀯𑀜𑁆𑀛𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀲𑀸, 𑀪𑀦𑁆𑀢𑁂, 𑀯𑀺𑀚𑀸𑀬𑀺𑀲𑁆𑀲𑀢𑀺 𑀲𑀩𑁆𑀩𑀲𑁆𑀲 𑀓𑀼𑀝𑀼𑀫𑁆𑀩𑀲𑁆𑀲 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀢𑀺. 𑀇𑀗𑁆𑀖𑀸𑀬𑁆𑀬, 𑀢𑀲𑁆𑀲𑀸 𑀕𑀩𑁆𑀪𑀧𑀸𑀢𑀦𑀁 𑀚𑀸𑀦𑀸𑀳𑀻’’𑀢𑀺. ‘‘𑀲𑀼𑀝𑁆𑀞𑀼, 𑀪𑀕𑀺𑀦𑀻’’𑀢𑀺 𑀢𑀲𑁆𑀲𑀸 𑀕𑀩𑁆𑀪𑀧𑀸𑀢𑀦𑀁 𑀅𑀤𑀸𑀲𑀺. 𑀫𑀸𑀢𑀸 𑀓𑀸𑀮𑀫𑀓𑀸𑀲𑀺, 𑀤𑀸𑀭𑀓𑁄 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀧𑀚𑀸𑀧𑀢𑀺𑀬𑁄 𑀳𑁄𑀦𑁆𑀢𑀺 𑁋 𑀏𑀓𑀸 𑀯𑀜𑁆𑀛𑀸, 𑀏𑀓𑀸 𑀯𑀺𑀚𑀸𑀬𑀺𑀦𑀻. 𑀯𑀜𑁆𑀛𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀲𑀸, 𑀪𑀦𑁆𑀢𑁂, 𑀯𑀺𑀚𑀸𑀬𑀺𑀲𑁆𑀲𑀢𑀺 𑀲𑀩𑁆𑀩𑀲𑁆𑀲 𑀓𑀼𑀝𑀼𑀫𑁆𑀩𑀲𑁆𑀲 𑀇𑀲𑁆𑀲𑀭𑀸 𑀪𑀯𑀺𑀲𑁆𑀲𑀢𑀺. 𑀇𑀗𑁆𑀖𑀸𑀬𑁆𑀬, 𑀢𑀲𑁆𑀲𑀸 𑀕𑀩𑁆𑀪𑀧𑀸𑀢𑀦𑀁 𑀚𑀸𑀦𑀸𑀳𑀻’’𑀢𑀺. ‘‘𑀲𑀼𑀝𑁆𑀞𑀼, 𑀪𑀕𑀺𑀦𑀻’’𑀢𑀺 𑀢𑀲𑁆𑀲𑀸 𑀕𑀩𑁆𑀪𑀧𑀸𑀢𑀦𑀁 𑀅𑀤𑀸𑀲𑀺. 𑀉𑀪𑁄 𑀓𑀸𑀮𑀫𑀓𑀁𑀲𑀼…𑀧𑁂… 𑀉𑀪𑁄 𑀦 𑀓𑀸𑀮𑀫𑀓𑀁𑀲𑀼. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑁧𑁮𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀕𑀩𑁆𑀪𑀺𑀦𑀻 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀇𑀗𑁆𑀖𑀸𑀬𑁆𑀬, 𑀕𑀩𑁆𑀪𑀧𑀸𑀢𑀦𑀁 𑀚𑀸𑀦𑀸𑀳𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀕𑀺𑀦𑀺, 𑀫𑀤𑁆𑀤𑀲𑁆𑀲𑀽’’𑀢𑀺. 𑀲𑀸 𑀫𑀤𑁆𑀤𑀸𑀧𑁂𑀢𑁆𑀯𑀸 𑀕𑀩𑁆𑀪𑀁 𑀧𑀸𑀢𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀕𑀩𑁆𑀪𑀺𑀦𑀻 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀇𑀗𑁆𑀖𑀸𑀬𑁆𑀬, 𑀕𑀩𑁆𑀪𑀧𑀸𑀢𑀦𑀁 𑀚𑀸𑀦𑀸𑀳𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀕𑀺𑀦𑀺, 𑀢𑀸𑀧𑁂𑀳𑀻’’𑀢𑀺. 𑀲𑀸 𑀢𑀸𑀧𑁂𑀢𑁆𑀯𑀸 𑀕𑀩𑁆𑀪𑀁 𑀧𑀸𑀢𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀯𑀜𑁆𑀛𑀸 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀇𑀗𑁆𑀖𑀸𑀬𑁆𑀬, 𑀪𑁂𑀲𑀚𑁆𑀚𑀁 𑀚𑀸𑀦𑀸𑀳𑀺 𑀬𑁂𑀦𑀸𑀳𑀁 𑀯𑀺𑀚𑀸𑀬𑁂𑀬𑁆𑀬’’𑀦𑁆𑀢𑀺. ‘‘𑀲𑀼𑀝𑁆𑀞𑀼, 𑀪𑀕𑀺𑀦𑀻’’𑀢𑀺 𑀢𑀲𑁆𑀲𑀸 𑀪𑁂𑀲𑀚𑁆𑀚𑀁 𑀅𑀤𑀸𑀲𑀺. 𑀲𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀸 𑀯𑀺𑀚𑀸𑀬𑀺𑀦𑀻 𑀇𑀢𑁆𑀣𑀻 𑀓𑀼𑀮𑀽𑀧𑀓𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀇𑀗𑁆𑀖𑀸𑀬𑁆𑀬, 𑀪𑁂𑀲𑀚𑁆𑀚𑀁 𑀚𑀸𑀦𑀸𑀳𑀺 𑀬𑁂𑀦𑀸𑀳𑀁 𑀦 𑀯𑀺𑀚𑀸𑀬𑁂𑀬𑁆𑀬’’𑀦𑁆𑀢𑀺. ‘‘𑀲𑀼𑀝𑁆𑀞𑀼, 𑀪𑀕𑀺𑀦𑀻’’𑀢𑀺 𑀢𑀲𑁆𑀲𑀸 𑀪𑁂𑀲𑀚𑁆𑀚𑀁 𑀅𑀤𑀸𑀲𑀺. 𑀲𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀁 𑀪𑀺𑀓𑁆𑀔𑀼𑀁 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀦 𑀳𑀸𑀲𑁂𑀲𑀼𑀁. 𑀲𑁄 𑀪𑀺𑀓𑁆𑀔𑀼 𑀉𑀢𑁆𑀢𑀦𑁆𑀢𑁄 𑀅𑀦𑀲𑁆𑀲𑀸𑀲𑀓𑁄 𑀓𑀸𑀮𑀫𑀓𑀸𑀲𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 [𑀧𑀸𑀭𑀸𑀚𑀺𑀓𑀲𑁆𑀲, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 (𑀲𑁆𑀬𑀸.)].

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀢𑁆𑀢𑀭𑀲𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀙𑀩𑁆𑀩𑀕𑁆𑀕𑀺𑀬𑀁 𑀪𑀺𑀓𑁆𑀔𑀼𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀑𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑀼𑀁. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀽𑀢𑀯𑁂𑀚𑁆𑀚𑀓𑁄 𑀪𑀺𑀓𑁆𑀔𑀼 𑀬𑀓𑁆𑀔𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀯𑀸𑀴𑀬𑀓𑁆𑀔𑀯𑀺𑀳𑀸𑀭𑀁 𑀧𑀸𑀳𑁂𑀲𑀺. 𑀢𑀁 𑀬𑀓𑁆𑀔𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀯𑀸𑀴𑀬𑀓𑁆𑀔𑀯𑀺𑀳𑀸𑀭𑀁 𑀧𑀸𑀳𑁂𑀲𑀺. 𑀢𑀁 𑀬𑀓𑁆𑀔𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁…𑀧𑁂… 𑀢𑀁 𑀬𑀓𑁆𑀔𑀸 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀲𑀼𑀁. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀯𑀸𑀴𑀓𑀦𑁆𑀢𑀸𑀭𑀁 𑀧𑀸𑀳𑁂𑀲𑀺. 𑀢𑀁 𑀯𑀸𑀴𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀯𑀸𑀴𑀓𑀦𑁆𑀢𑀸𑀭𑀁 𑀧𑀸𑀳𑁂𑀲𑀺. 𑀢𑀁 𑀯𑀸𑀴𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁…𑀧𑁂… 𑀢𑀁 𑀯𑀸𑀴𑀸 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀲𑀼𑀁. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀘𑁄𑀭𑀓𑀦𑁆𑀢𑀸𑀭𑀁 𑀧𑀸𑀳𑁂𑀲𑀺. 𑀢𑀁 𑀘𑁄𑀭𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀘𑁄𑀭𑀓𑀦𑁆𑀢𑀸𑀭𑀁 𑀧𑀸𑀳𑁂𑀲𑀺. 𑀢𑀁 𑀘𑁄𑀭𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁…𑀧𑁂… 𑀢𑀁 𑀘𑁄𑀭𑀸 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀲𑀼𑀁. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑁧𑁮𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀁 𑀫𑀜𑁆𑀜𑀫𑀸𑀦𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺…𑀧𑁂… 𑀢𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺…𑀧𑁂… 𑀅𑀜𑁆𑀜𑀁 𑀫𑀜𑁆𑀜𑀫𑀸𑀦𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺…𑀧𑁂… 𑀅𑀜𑁆𑀜𑀁 𑀫𑀜𑁆𑀜𑀫𑀸𑀦𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀆𑀧𑀢𑁆𑀢𑀺𑀁 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀧𑀦𑁆𑀦𑁄 𑀧𑀸𑀭𑀸𑀚𑀺𑀓’’𑀦𑁆𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀫𑀦𑀼𑀲𑁆𑀲𑁂𑀦 𑀕𑀳𑀺𑀢𑁄 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀸𑀭𑀁 𑀅𑀤𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀫𑀦𑀼𑀲𑁆𑀲𑁂𑀦 𑀕𑀳𑀺𑀢𑁄 𑀳𑁄𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀳𑀸𑀭𑀁 𑀅𑀤𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀪𑀺𑀓𑁆𑀔𑀼 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲 𑀲𑀕𑁆𑀕𑀓𑀣𑀁 𑀓𑀣𑁂𑀲𑀺. 𑀲𑁄 𑀅𑀥𑀺𑀫𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲 𑀲𑀕𑁆𑀕𑀓𑀣𑀁 𑀓𑀣𑁂𑀲𑀺. 𑀲𑁄 𑀅𑀥𑀺𑀫𑀼𑀢𑁆𑀢𑁄 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀅𑀥𑀺𑀫𑀼𑀢𑁆𑀢𑁄 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀦𑁂𑀭𑀬𑀺𑀓𑀲𑁆𑀲 𑀦𑀺𑀭𑀬𑀓𑀣𑀁 𑀓𑀣𑁂𑀲𑀺. 𑀲𑁄 𑀉𑀢𑁆𑀢𑀲𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀦𑁂𑀭𑀬𑀺𑀓𑀲𑁆𑀲 𑀦𑀺𑀭𑀬𑀓𑀣𑀁 𑀓𑀣𑁂𑀲𑀺. 𑀲𑁄 𑀉𑀢𑁆𑀢𑀲𑀺𑀢𑁆𑀯𑀸 𑀓𑀸𑀮𑀫𑀓𑀸𑀲𑀺…𑀧𑁂… 𑀲𑁄 𑀉𑀢𑁆𑀢𑀲𑀺𑀢𑁆𑀯𑀸 𑀦 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑁧𑁮𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀆𑀯𑀼𑀲𑁄, 𑀅𑀢𑁆𑀭𑀝𑁆𑀞𑀺𑀢𑁄 𑀙𑀺𑀦𑁆𑀤𑀸𑀳𑀻’’𑀢𑀺. 𑀢𑀁 𑀢𑀢𑁆𑀭𑀝𑁆𑀞𑀺𑀢𑀁 𑀙𑀺𑀦𑁆𑀤𑀦𑁆𑀢𑀁 𑀭𑀼𑀓𑁆𑀔𑁄 𑀑𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀴𑀯𑀓𑀸 𑀪𑀺𑀓𑁆𑀔𑀽 𑀦𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑁄 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘‘𑀆𑀯𑀼𑀲𑁄, 𑀅𑀢𑁆𑀭𑀝𑁆𑀞𑀺𑀢𑁄 𑀙𑀺𑀦𑁆𑀤𑀸𑀳𑀻’’𑀢𑀺. 𑀢𑀁 𑀢𑀢𑁆𑀭𑀝𑁆𑀞𑀺𑀢𑀁 𑀙𑀺𑀦𑁆𑀤𑀦𑁆𑀢𑀁 𑀭𑀼𑀓𑁆𑀔𑁄 𑀑𑀢𑁆𑀣𑀭𑀺𑀢𑁆𑀯𑀸 𑀫𑀸𑀭𑁂𑀲𑀺…𑀧𑁂… 𑀭𑀼𑀓𑁆𑀔𑁄 𑀑𑀢𑁆𑀣𑀭𑀺𑀢𑁆𑀯𑀸 𑀦 𑀫𑀸𑀭𑁂𑀲𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀼, 𑀧𑀸𑀭𑀸𑀚𑀺𑀓𑀲𑁆𑀲; 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺.

𑁧𑁯𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀤𑀸𑀬𑀁 𑀆𑀮𑀺𑀫𑁆𑀧𑁂𑀲𑀼𑀁 [𑀆𑀴𑀺𑀫𑁆𑀧𑁂𑀲𑀼𑀁 (𑀲𑁆𑀬𑀸. 𑀓.)]; 𑀫𑀦𑀼𑀲𑁆𑀲𑀸 𑀤𑀟𑁆𑀠𑀸 𑀓𑀸𑀮𑀫𑀓𑀁𑀲𑀼. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺…𑀧𑁂… ‘‘𑀅𑀦𑀸𑀧𑀢𑁆𑀢𑀺, 𑀪𑀺𑀓𑁆𑀔𑀯𑁂, 𑀦𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺.