𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁

𑁧𑁯𑁩. [𑀇𑀤𑀁 𑀯𑀢𑁆𑀣𑀼 𑀧𑀸𑀘𑀺. 𑁬𑁭] 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸 𑀪𑀺𑀓𑁆𑀔𑀽 𑀯𑀕𑁆𑀕𑀼𑀫𑀼𑀤𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀚𑁆𑀚𑀻 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀢𑀺 𑀤𑁆𑀯𑀻𑀳𑀺𑀢𑀺𑀓𑀸 𑀲𑁂𑀢𑀝𑁆𑀞𑀺𑀓𑀸 𑀲𑀮𑀸𑀓𑀸𑀯𑀼𑀢𑁆𑀢𑀸, 𑀦 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀏𑀢𑀭𑀳𑀺 𑀔𑁄 𑀯𑀚𑁆𑀚𑀻 𑀤𑀼𑀩𑁆𑀪𑀺𑀓𑁆𑀔𑀸 𑀤𑁆𑀯𑀻𑀳𑀺𑀢𑀺𑀓𑀸 𑀲𑁂𑀢𑀝𑁆𑀞𑀺𑀓𑀸 𑀲𑀮𑀸𑀓𑀸𑀯𑀼𑀢𑁆𑀢𑀸, 𑀦 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼𑀁. 𑀓𑁂𑀦 𑀦𑀼 𑀔𑁄 𑀫𑀬𑀁 𑀉𑀧𑀸𑀬𑁂𑀦 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑁂𑀬𑁆𑀬𑀸𑀫, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑁂𑀬𑁆𑀬𑀸𑀫𑀸’’𑀢𑀺? 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀕𑀺𑀳𑀻𑀦𑀁 𑀓𑀫𑁆𑀫𑀦𑁆𑀢𑀁 𑀅𑀥𑀺𑀝𑁆𑀞𑁂𑀫, 𑀏𑀯𑀁 𑀢𑁂 𑀅𑀫𑁆𑀳𑀸𑀓𑀁 𑀤𑀸𑀢𑀼𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀫𑀬𑀁 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀲𑁆𑀲𑀸𑀫𑀸’’𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀮𑀁, 𑀆𑀯𑀼𑀲𑁄, 𑀓𑀺𑀁 𑀕𑀺𑀳𑀻𑀦𑀁 𑀓𑀫𑁆𑀫𑀦𑁆𑀢𑀁 𑀅𑀥𑀺𑀝𑁆𑀞𑀺𑀢𑁂𑀦! 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀕𑀺𑀳𑀻𑀦𑀁 𑀤𑀽𑀢𑁂𑀬𑁆𑀬𑀁 𑀳𑀭𑀸𑀫, 𑀏𑀯𑀁 𑀢𑁂 𑀅𑀫𑁆𑀳𑀸𑀓𑀁 𑀤𑀸𑀢𑀼𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀫𑀬𑀁 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀲𑁆𑀲𑀸𑀫𑀸’’𑀢𑀺. 𑀏𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀮𑀁, 𑀆𑀯𑀼𑀲𑁄, 𑀓𑀺𑀁 𑀕𑀺𑀳𑀻𑀦𑀁 𑀓𑀫𑁆𑀫𑀦𑁆𑀢𑀁 𑀅𑀥𑀺𑀝𑁆𑀞𑀺𑀢𑁂𑀦! 𑀓𑀺𑀁 𑀕𑀺𑀳𑀻𑀦𑀁 𑀤𑀽𑀢𑁂𑀬𑁆𑀬𑀁 𑀳𑀝𑁂𑀦! 𑀳𑀦𑁆𑀤 𑀫𑀬𑀁, 𑀆𑀯𑀼𑀲𑁄, 𑀕𑀺𑀳𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀸𑀫 𑁋 ‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀤𑀼𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀢𑀢𑀺𑀬𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀦𑁆𑀦𑁄, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀲𑀓𑀤𑀸𑀕𑀸𑀫𑀻, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀅𑀦𑀸𑀕𑀸𑀫𑀻, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀅𑀭𑀳𑀸, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀢𑁂𑀯𑀺𑀚𑁆𑀚𑁄, 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀙𑀴𑀪𑀺𑀜𑁆𑀜𑁄’𑀢𑀺. 𑀏𑀯𑀁 𑀢𑁂 𑀅𑀫𑁆𑀳𑀸𑀓𑀁 𑀤𑀸𑀢𑀼𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀫𑀬𑀁 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀲𑁆𑀲𑀸𑀫, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀲𑁄𑀬𑁂𑀯 𑀔𑁄, 𑀆𑀯𑀼𑀲𑁄, 𑀲𑁂𑀬𑁆𑀬𑁄 𑀬𑁄 𑀅𑀫𑁆𑀳𑀸𑀓𑀁 𑀕𑀺𑀳𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄’’𑀢𑀺.

𑁧𑁯𑁪. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀕𑀺𑀳𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀁𑀲𑀼 𑁋 ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻…𑀧𑁂… 𑀅𑀲𑀼𑀓𑁄 𑀪𑀺𑀓𑁆𑀔𑀼 𑀙𑀴𑀪𑀺𑀜𑁆𑀜𑁄’’𑀢𑀺. 𑀅𑀣 𑀔𑁄 𑀢𑁂 𑀫𑀦𑀼𑀲𑁆𑀲𑀸 𑁋 ‘‘𑀮𑀸𑀪𑀸 𑀯𑀢 𑀦𑁄, 𑀲𑀼𑀮𑀤𑁆𑀥𑀁 𑀯𑀢 𑀦𑁄, 𑀬𑁂𑀲𑀁 𑀯𑀢 𑀦𑁄 𑀏𑀯𑀭𑀽𑀧𑀸 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀉𑀧𑀕𑀢𑀸; 𑀦 𑀯𑀢 𑀦𑁄 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀸 𑀪𑀺𑀓𑁆𑀔𑀽 𑀯𑀲𑁆𑀲𑀁 𑀉𑀧𑀕𑀢𑀸 𑀬𑀣𑀬𑀺𑀫𑁂 𑀪𑀺𑀓𑁆𑀔𑀽 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸’’𑀢𑀺, 𑀢𑁂 𑀦 𑀢𑀸𑀤𑀺𑀲𑀸𑀦𑀺 𑀪𑁄𑀚𑀦𑀸𑀦𑀺 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀤𑁂𑀦𑁆𑀢𑀺 𑀧𑀼𑀢𑁆𑀢𑀤𑀸𑀭𑀲𑁆𑀲 𑀤𑁂𑀦𑁆𑀢𑀺 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀤𑁂𑀦𑁆𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑀸𑀦𑀁 𑀤𑁂𑀦𑁆𑀢𑀺 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀦𑀁 𑀤𑁂𑀦𑁆𑀢𑀺, 𑀬𑀸𑀤𑀺𑀲𑀸𑀦𑀺 𑀪𑀺𑀓𑁆𑀔𑀽𑀦𑀁 𑀤𑁂𑀦𑁆𑀢𑀺. 𑀢𑁂 𑀦 𑀢𑀸𑀤𑀺𑀲𑀸𑀦𑀺 𑀔𑀸𑀤𑀦𑀻𑀬𑀸𑀦𑀺 𑀲𑀸𑀬𑀦𑀻𑀬𑀸𑀦𑀺 𑀧𑀸𑀦𑀸𑀦𑀺 𑀅𑀢𑁆𑀢𑀦𑀸 𑀔𑀸𑀤𑀦𑁆𑀢𑀺 𑀲𑀸𑀬𑀦𑁆𑀢𑀺 𑀧𑀺𑀯𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀤𑁂𑀦𑁆𑀢𑀺 𑀧𑀼𑀢𑁆𑀢𑀤𑀸𑀭𑀲𑁆𑀲 𑀤𑁂𑀦𑁆𑀢𑀺 𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑀲𑁆𑀲 𑀤𑁂𑀦𑁆𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑀸𑀦𑀁 𑀤𑁂𑀦𑁆𑀢𑀺 𑀜𑀸𑀢𑀺𑀲𑀸𑀮𑁄𑀳𑀺𑀢𑀸𑀦𑀁 𑀤𑁂𑀦𑁆𑀢𑀺, 𑀬𑀸𑀤𑀺𑀲𑀸𑀦𑀺 𑀪𑀺𑀓𑁆𑀔𑀽𑀦𑀁 𑀤𑁂𑀦𑁆𑀢𑀺. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀯𑀡𑁆𑀡𑀯𑀸 𑀅𑀳𑁂𑀲𑀼𑀁 𑀧𑀻𑀡𑀺𑀦𑁆𑀤𑁆𑀭𑀺𑀬𑀸 𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑀸 𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀯𑀡𑁆𑀡𑀸.

𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀯𑀲𑁆𑀲𑀁𑀯𑀼𑀝𑁆𑀞𑀸 𑀢𑁂𑀫𑀸𑀲𑀘𑁆𑀘𑀬𑁂𑀦 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦 𑀧𑀓𑁆𑀓𑀫𑀺𑀁𑀲𑀼. 𑀅𑀦𑀼𑀧𑀼𑀩𑁆𑀩𑁂𑀦 𑀬𑁂𑀦 𑀯𑁂𑀲𑀸𑀮𑀻 𑀫𑀳𑀸𑀯𑀦𑀁 𑀓𑀽𑀝𑀸𑀕𑀸𑀭𑀲𑀸𑀮𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑀺𑀲𑀸𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑀸 𑀪𑀺𑀓𑁆𑀔𑀽 𑀓𑀺𑀲𑀸 𑀳𑁄𑀦𑁆𑀢𑀺 𑀮𑀽𑀔𑀸 𑀤𑀼𑀩𑁆𑀩𑀡𑁆𑀡𑀸 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀸 𑀥𑀫𑀦𑀺𑀲𑀦𑁆𑀣𑀢𑀕𑀢𑁆𑀢𑀸; 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸 𑀧𑀦 𑀪𑀺𑀓𑁆𑀔𑀽 𑀯𑀡𑁆𑀡𑀯𑀸 𑀳𑁄𑀦𑁆𑀢𑀺 𑀧𑀻𑀡𑀺𑀦𑁆𑀤𑁆𑀭𑀺𑀬𑀸 𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑀸 𑀯𑀺𑀧𑁆𑀧𑀲𑀦𑁆𑀦𑀙𑀯𑀺𑀯𑀡𑁆𑀡𑀸. 𑀆𑀘𑀺𑀡𑁆𑀡𑀁 𑀔𑁄 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑀼𑀁. 𑀅𑀣 𑀔𑁄 𑀪𑀕𑀯𑀸 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁 𑀓𑀘𑁆𑀘𑀺 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀢𑁆𑀣 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀢𑁆𑀣𑀸’’𑀢𑀺? ‘‘𑀔𑀫𑀦𑀻𑀬𑀁, 𑀪𑀕𑀯𑀸, 𑀬𑀸𑀧𑀦𑀻𑀬𑀁, 𑀪𑀕𑀯𑀸. 𑀲𑀫𑀕𑁆𑀕𑀸 𑀘 𑀫𑀬𑀁, 𑀪𑀦𑁆𑀢𑁂, 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀫𑁆𑀳𑀸, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀫𑁆𑀳𑀸’’𑀢𑀺. 𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸𑀧𑀺 𑀦 𑀧𑀼𑀘𑁆𑀙𑀦𑁆𑀢𑀺…𑀧𑁂… 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀦𑁆𑀢𑀺 𑁋 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀲𑁆𑀲𑀸𑀫, 𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀸𑀢𑀺. 𑀅𑀣 𑀔𑁄 𑀪𑀕𑀯𑀸 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀬𑀣𑀸 𑀓𑀣𑀁 𑀧𑀦 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀅𑀯𑀺𑀯𑀤𑀫𑀸𑀦𑀸 𑀨𑀸𑀲𑀼𑀓𑀁 𑀯𑀲𑁆𑀲𑀁 𑀯𑀲𑀺𑀢𑁆𑀣 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀢𑁆𑀣𑀸’’𑀢𑀺? 𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁 𑁋 ‘‘𑀓𑀘𑁆𑀘𑀺 𑀧𑀦 𑀯𑁄, 𑀪𑀺𑀓𑁆𑀔𑀯𑁂, 𑀪𑀽𑀢’’𑀦𑁆𑀢𑀺? ‘‘𑀅𑀪𑀽𑀢𑀁, 𑀪𑀕𑀯𑀸’’𑀢𑀺. 𑀯𑀺𑀕𑀭𑀳𑀺 𑀩𑀼𑀤𑁆𑀥𑁄 𑀪𑀕𑀯𑀸 𑁋 ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀦𑀦𑀼𑀮𑁄𑀫𑀺𑀓𑀁 𑀅𑀧𑁆𑀧𑀢𑀺𑀭𑀽𑀧𑀁 𑀅𑀲𑁆𑀲𑀸𑀫𑀡𑀓𑀁 𑀅𑀓𑀧𑁆𑀧𑀺𑀬𑀁 𑀅𑀓𑀭𑀡𑀻𑀬𑀁. 𑀓𑀣𑀜𑁆𑀳𑀺 𑀦𑀸𑀫 𑀢𑀼𑀫𑁆𑀳𑁂, 𑀫𑁄𑀖𑀧𑀼𑀭𑀺𑀲𑀸, 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀕𑀺𑀳𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀣! 𑀯𑀭𑀁 𑀢𑀼𑀫𑁆𑀳𑁂𑀳𑀺, 𑀫𑁄𑀖𑀧𑀼𑀭𑀺𑀲𑀸, 𑀢𑀺𑀡𑁆𑀳𑁂𑀦 𑀕𑁄𑀯𑀺𑀓𑀦𑁆𑀢𑀦𑁂𑀦 [𑀕𑁄𑀯𑀺𑀓𑀢𑁆𑀢𑀦𑁂𑀦 (𑀲𑀻. 𑀓.)] 𑀓𑀼𑀘𑁆𑀙𑀺𑀁 𑀧𑀭𑀺𑀓𑀦𑁆𑀢𑁄, 𑀦 𑀢𑁆𑀯𑁂𑀯 𑀉𑀤𑀭𑀲𑁆𑀲 𑀓𑀸𑀭𑀡𑀸 𑀕𑀺𑀳𑀻𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄! 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀢𑁄 𑀦𑀺𑀤𑀸𑀦𑀜𑁆𑀳𑀺, 𑀫𑁄𑀖𑀧𑀼𑀭𑀺𑀲𑀸, 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁, 𑀦 𑀢𑁆𑀯𑁂𑀯 𑀢𑀧𑁆𑀧𑀘𑁆𑀘𑀬𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬. 𑀇𑀢𑁄 𑀦𑀺𑀤𑀸𑀦𑀜𑁆𑀘 𑀔𑁄, 𑀫𑁄𑀖𑀧𑀼𑀭𑀺𑀲𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀦𑁂𑀢𑀁, 𑀫𑁄𑀖𑀧𑀼𑀭𑀺𑀲𑀸, 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬’’…𑀧𑁂… 𑀯𑀺𑀕𑀭𑀳𑀺𑀢𑁆𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

𑁧𑁯𑁫. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑀲𑁆𑀲 𑀫𑀳𑀸𑀘𑁄𑀭𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀆𑀳𑀺𑀡𑁆𑀟𑀺𑀲𑁆𑀲𑀸𑀫𑀺 𑀳𑀦𑀦𑁆𑀢𑁄 𑀖𑀸𑀢𑁂𑀦𑁆𑀢𑁄 𑀙𑀺𑀦𑁆𑀤𑀦𑁆𑀢𑁄 𑀙𑁂𑀤𑀸𑀧𑁂𑀦𑁆𑀢𑁄 𑀧𑀘𑀦𑁆𑀢𑁄 𑀧𑀸𑀘𑁂𑀦𑁆𑀢𑁄’𑀢𑀺! 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀆𑀳𑀺𑀡𑁆𑀟𑀢𑀺 𑀳𑀦𑀦𑁆𑀢𑁄 𑀖𑀸𑀢𑁂𑀦𑁆𑀢𑁄 𑀙𑀺𑀦𑁆𑀤𑀦𑁆𑀢𑁄 𑀙𑁂𑀤𑀸𑀧𑁂𑀦𑁆𑀢𑁄 𑀧𑀘𑀦𑁆𑀢𑁄 𑀧𑀸𑀘𑁂𑀦𑁆𑀢𑁄. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀏𑀯𑀁 𑀳𑁄𑀢𑀺 𑁋 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀺𑀲𑁆𑀲𑀸𑀫𑀺 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀕𑀳𑀝𑁆𑀞𑀸𑀦𑀜𑁆𑀘𑁂𑀯 𑀧𑀩𑁆𑀩𑀚𑀺𑀢𑀸𑀦𑀜𑁆𑀘, 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’𑀦𑁆𑀢𑀺! 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀢𑁂𑀦 𑀯𑀸 𑀲𑀳𑀲𑁆𑀲𑁂𑀦 𑀯𑀸 𑀧𑀭𑀺𑀯𑀼𑀢𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀕𑀳𑀝𑁆𑀞𑀸𑀦𑀜𑁆𑀘𑁂𑀯 𑀧𑀩𑁆𑀩𑀚𑀺𑀢𑀸𑀦𑀜𑁆𑀘, 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀫𑀳𑀸𑀘𑁄𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀫𑀳𑀸𑀘𑁄𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀸𑀭𑀺𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀁 𑀅𑀫𑀽𑀮𑀓𑁂𑀦 𑀅𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀅𑀦𑀼𑀤𑁆𑀥𑀁𑀲𑁂𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑁄 𑀫𑀳𑀸𑀘𑁄𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀬𑀸𑀦𑀺 𑀢𑀸𑀦𑀺 𑀲𑀗𑁆𑀖𑀲𑁆𑀲 𑀕𑀭𑀼𑀪𑀡𑁆𑀟𑀸𑀦𑀺 𑀕𑀭𑀼𑀧𑀭𑀺𑀓𑁆𑀔𑀸𑀭𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀭𑀸𑀫𑁄 𑀆𑀭𑀸𑀫𑀯𑀢𑁆𑀣𑀼 𑀯𑀺𑀳𑀸𑀭𑁄 𑀯𑀺𑀳𑀸𑀭𑀯𑀢𑁆𑀣𑀼 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺 𑀩𑀺𑀫𑁆𑀩𑁄𑀳𑀦𑀁 [𑀩𑀺𑀫𑁆𑀩𑁄𑀳𑀦𑀁 (𑀲𑀻. 𑀲𑁆𑀬𑀸.)] 𑀮𑁄𑀳𑀓𑀼𑀫𑁆𑀪𑀻 𑀮𑁄𑀳𑀪𑀸𑀡𑀓𑀁 𑀮𑁄𑀳𑀯𑀸𑀭𑀓𑁄 𑀮𑁄𑀳𑀓𑀝𑀸𑀳𑀁 𑀯𑀸𑀲𑀻 𑀧𑀭𑀲𑀼 [𑀨𑀭𑀲𑀼 (𑀲𑀻. 𑀲𑁆𑀬𑀸.)] 𑀓𑀼𑀞𑀸𑀭𑀻 𑀓𑀼𑀤𑀸𑀮𑁄 𑀦𑀺𑀔𑀸𑀤𑀦𑀁 𑀯𑀮𑁆𑀮𑀺 𑀯𑁂𑀴𑀼 𑀫𑀼𑀜𑁆𑀚𑀁 𑀧𑀩𑁆𑀩𑀚𑀁 𑀢𑀺𑀡𑀁 𑀫𑀢𑁆𑀢𑀺𑀓𑀸 𑀤𑀸𑀭𑀼𑀪𑀡𑁆𑀟𑀁 𑀫𑀢𑁆𑀢𑀺𑀓𑀸𑀪𑀡𑁆𑀟𑀁, 𑀢𑁂𑀳𑀺 𑀕𑀺𑀳𑀻𑀁 𑀲𑀗𑁆𑀕𑀡𑁆𑀳𑀸𑀢𑀺 𑀉𑀧𑀮𑀸𑀧𑁂𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑁄 𑀫𑀳𑀸𑀘𑁄𑀭𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀮𑁄𑀓𑀲𑁆𑀫𑀺𑀁.

‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀬𑀁 𑀅𑀕𑁆𑀕𑁄 𑀫𑀳𑀸𑀘𑁄𑀭𑁄 𑀬𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀣𑁂𑀬𑁆𑀬𑀸𑀬 𑀯𑁄, 𑀪𑀺𑀓𑁆𑀔𑀯𑁂, 𑀭𑀝𑁆𑀞𑀧𑀺𑀡𑁆𑀟𑁄 𑀪𑀼𑀢𑁆𑀢𑁄’’𑀢𑀺.

[𑀲𑀁. 𑀦𑀺. 𑁧.𑁩𑁫] 𑀅𑀜𑁆𑀜𑀣𑀸 𑀲𑀦𑁆𑀢𑀫𑀢𑁆𑀢𑀸𑀦𑀁, 𑀅𑀜𑁆𑀜𑀣𑀸 𑀬𑁄 𑀧𑀯𑁂𑀤𑀬𑁂;

𑀦𑀺𑀓𑀘𑁆𑀘 𑀓𑀺𑀢𑀯𑀲𑁆𑀲𑁂𑀯, 𑀪𑀼𑀢𑁆𑀢𑀁 𑀣𑁂𑀬𑁆𑀬𑁂𑀦 𑀢𑀲𑁆𑀲 𑀢𑀁.

[𑀥. 𑀧. 𑁩𑁦𑁭 𑀥𑀫𑁆𑀫𑀧𑀤𑁂𑀧𑀺] 𑀓𑀸𑀲𑀸𑀯𑀓𑀡𑁆𑀞𑀸 𑀩𑀳𑀯𑁄, 𑀧𑀸𑀧𑀥𑀫𑁆𑀫𑀸 𑀅𑀲𑀜𑁆𑀜𑀢𑀸;

𑀧𑀸𑀧𑀸 𑀧𑀸𑀧𑁂𑀳𑀺 𑀓𑀫𑁆𑀫𑁂𑀳𑀺, 𑀦𑀺𑀭𑀬𑀁 𑀢𑁂 𑀉𑀧𑀧𑀚𑁆𑀚𑀭𑁂.

[𑀥. 𑀧. 𑁩𑁦𑁭 𑀥𑀫𑁆𑀫𑀧𑀤𑁂𑀧𑀺] 𑀲𑁂𑀬𑁆𑀬𑁄 𑀅𑀬𑁄𑀕𑀼𑀴𑁄 𑀪𑀼𑀢𑁆𑀢𑁄, 𑀢𑀢𑁆𑀢𑁄 𑀅𑀕𑁆𑀕𑀺𑀲𑀺𑀔𑀽𑀧𑀫𑁄;

𑀬𑀜𑁆𑀘𑁂 𑀪𑀼𑀜𑁆𑀚𑁂𑀬𑁆𑀬 𑀤𑀼𑀲𑁆𑀲𑀻𑀮𑁄, 𑀭𑀝𑁆𑀞𑀧𑀺𑀡𑁆𑀟𑀁 𑀅𑀲𑀜𑁆𑀜𑀢𑁄𑀢𑀺.

𑀅𑀣 𑀔𑁄 𑀪𑀕𑀯𑀸 𑀢𑁂 𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑁂 𑀪𑀺𑀓𑁆𑀔𑀽 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀕𑀭𑀳𑀺𑀢𑁆𑀯𑀸 𑀤𑀼𑀩𑁆𑀪𑀭𑀢𑀸𑀬 𑀤𑀼𑀧𑁆𑀧𑁄𑀲𑀢𑀸𑀬…𑀧𑁂… 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀪𑀺𑀚𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁 𑀲𑀫𑀼𑀤𑀸𑀘𑀭𑁂𑀬𑁆𑀬 𑁋 ‘𑀇𑀢𑀺 𑀚𑀸𑀦𑀸𑀫𑀺 𑀇𑀢𑀺 𑀧𑀲𑁆𑀲𑀸𑀫𑀻’𑀢𑀺, 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸 𑀆𑀧𑀦𑁆𑀦𑁄 𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀚𑀸𑀦𑀫𑁂𑀯𑀁, 𑀆𑀯𑀼𑀲𑁄, 𑀅𑀯𑀘𑀁 𑀚𑀸𑀦𑀸𑀫𑀺, 𑀅𑀧𑀲𑁆𑀲𑀁 𑀧𑀲𑁆𑀲𑀸𑀫𑀺. 𑀢𑀼𑀘𑁆𑀙𑀁 𑀫𑀼𑀲𑀸 𑀯𑀺𑀮𑀧𑀺’𑀦𑁆𑀢𑀺, 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺.

𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀺.

𑁧𑁯𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀲𑀜𑁆𑀜𑀺𑀦𑁄 𑀅𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀦𑁄 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀺𑀦𑁄 𑀅𑀲𑀘𑁆𑀙𑀺𑀓𑀢𑁂 𑀲𑀘𑁆𑀙𑀺𑀓𑀢𑀲𑀜𑁆𑀜𑀺𑀦𑁄 𑀅𑀥𑀺𑀫𑀸𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀁𑀲𑀼. 𑀢𑁂𑀲𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀭𑀸𑀕𑀸𑀬𑀧𑀺 𑀘𑀺𑀢𑁆𑀢𑀁 𑀦𑀫𑀢𑀺 𑀤𑁄𑀲𑀸𑀬𑀧𑀺 𑀘𑀺𑀢𑁆𑀢𑀁 𑀦𑀫𑀢𑀺 𑀫𑁄𑀳𑀸𑀬𑀧𑀺 𑀘𑀺𑀢𑁆𑀢𑀁 𑀦𑀫𑀢𑀺. 𑀢𑁂𑀲𑀁 𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺 𑁋 ‘‘𑀪𑀕𑀯𑀢𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁. 𑀫𑀬𑀜𑁆𑀘𑀫𑁆𑀳 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀲𑀜𑁆𑀜𑀺𑀦𑁄 𑀅𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀦𑁄 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀺𑀦𑁄 𑀅𑀲𑀘𑁆𑀙𑀺𑀓𑀢𑁂 𑀲𑀘𑁆𑀙𑀺𑀓𑀢𑀲𑀜𑁆𑀜𑀺𑀦𑁄, 𑀅𑀥𑀺𑀫𑀸𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀫𑁆𑀳𑀸. 𑀓𑀘𑁆𑀘𑀺 𑀦𑀼 𑀔𑁄 𑀫𑀬𑀁 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸’’𑀢𑀺? 𑀢𑁂 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. ‘‘𑀳𑁄𑀦𑁆𑀢𑀺 𑀬𑁂 𑀢𑁂, 𑀆𑀦𑀦𑁆𑀤 [𑀳𑁄𑀦𑁆𑀢𑀺 𑀬𑁂𑀯𑀸𑀦𑀦𑁆𑀤 (𑀲𑁆𑀬𑀸.), 𑀳𑁄𑀦𑁆𑀢𑀺 𑀢𑁂 𑀆𑀦𑀦𑁆𑀤 (𑀲𑀻.)], 𑀪𑀺𑀓𑁆𑀔𑀽 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀲𑀜𑁆𑀜𑀺𑀦𑁄 𑀅𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀦𑁄 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀺𑀦𑁄 𑀅𑀲𑀘𑁆𑀙𑀺𑀓𑀢𑁂 𑀲𑀘𑁆𑀙𑀺𑀓𑀢𑀲𑀜𑁆𑀜𑀺𑀦𑁄 𑀅𑀥𑀺𑀫𑀸𑀦𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑀺. 𑀢𑀜𑁆𑀘 𑀔𑁄 𑀏𑀢𑀁 𑀅𑀩𑁆𑀩𑁄𑀳𑀸𑀭𑀺𑀓’’𑀦𑁆𑀢𑀺.

‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 𑁋

𑁧𑁯𑁭. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀪𑀺𑀚𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁 𑀲𑀫𑀼𑀤𑀸𑀘𑀭𑁂𑀬𑁆𑀬 𑁋 ‘𑀇𑀢𑀺 𑀚𑀸𑀦𑀸𑀫𑀺 𑀇𑀢𑀺 𑀧𑀲𑁆𑀲𑀸𑀫𑀻’𑀢𑀺, 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸 𑀅𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑀯𑀸 𑀆𑀧𑀦𑁆𑀦𑁄 𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀚𑀸𑀦𑀫𑁂𑀯𑀁, 𑀆𑀯𑀼𑀲𑁄, 𑀅𑀯𑀘𑀁 𑀚𑀸𑀦𑀸𑀫𑀺, 𑀅𑀧𑀲𑁆𑀲𑀁 𑀧𑀲𑁆𑀲𑀸𑀫𑀺. 𑀢𑀼𑀘𑁆𑀙𑀁 𑀫𑀼𑀲𑀸 𑀯𑀺𑀮𑀧𑀺’𑀦𑁆𑀢𑀺, 𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸, 𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺.

𑁧𑁯𑁮. 𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄…𑀧𑁂… 𑀪𑀺𑀓𑁆𑀔𑀽𑀢𑀺…𑀧𑁂… 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄 𑀪𑀺𑀓𑁆𑀔𑀽𑀢𑀺.

𑀅𑀦𑀪𑀺𑀚𑀸𑀦𑀦𑁆𑀢𑀺 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀅𑀲𑀁𑀯𑀺𑀚𑁆𑀚𑀫𑀸𑀦𑀁 𑀅𑀚𑀸𑀦𑀦𑁆𑀢𑁄 𑀅𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀦𑀺 𑀓𑀼𑀲𑀮𑀁 𑀥𑀫𑁆𑀫𑀁 𑁋 𑀅𑀢𑁆𑀣𑀺 𑀫𑁂 𑀓𑀼𑀲𑀮𑁄 𑀥𑀫𑁆𑀫𑁄𑀢𑀺.

[𑀧𑀸𑀘𑀺. 𑁭𑁦] 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫 𑀛𑀸𑀦𑀁 𑀯𑀺𑀫𑁄𑀓𑁆𑀔𑁄 [𑀯𑀺𑀫𑁄𑀓𑁆𑀔𑀁 (𑀲𑀻. 𑀲𑁆𑀬𑀸.)] 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦𑀁 𑀫𑀕𑁆𑀕𑀪𑀸𑀯𑀦𑀸 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀦𑀻𑀯𑀭𑀡𑀢𑀸 𑀘𑀺𑀢𑁆𑀢𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀺.

𑀅𑀢𑁆𑀢𑀼𑀧𑀦𑀸𑀬𑀺𑀓𑀦𑁆𑀢𑀺 𑀢𑁂 𑀯𑀸 𑀓𑀼𑀲𑀮𑁂 𑀥𑀫𑁆𑀫𑁂 𑀅𑀢𑁆𑀢𑀦𑀺 𑀉𑀧𑀦𑁂𑀢𑀺 𑀅𑀢𑁆𑀢𑀸𑀦𑀁 𑀯𑀸 𑀢𑁂𑀲𑀼 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀉𑀧𑀦𑁂𑀢𑀺.

𑀜𑀸𑀡𑀦𑁆𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀤𑀲𑁆𑀲𑀦𑀦𑁆𑀢𑀺 𑀬𑀁 𑀜𑀸𑀡𑀁 𑀢𑀁 𑀤𑀲𑁆𑀲𑀦𑀁. 𑀬𑀁 𑀤𑀲𑁆𑀲𑀦𑀁 𑀢𑀁 𑀜𑀸𑀡𑀁.

𑀲𑀫𑀼𑀤𑀸𑀘𑀭𑁂𑀬𑁆𑀬𑀸𑀢𑀺 𑀆𑀭𑁄𑀘𑁂𑀬𑁆𑀬 𑀇𑀢𑁆𑀣𑀺𑀬𑀸 𑀯𑀸 𑀧𑀼𑀭𑀺𑀲𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸.

𑀇𑀢𑀺 𑀚𑀸𑀦𑀸𑀫𑀺 𑀇𑀢𑀺 𑀧𑀲𑁆𑀲𑀸𑀫𑀻𑀢𑀺 𑀚𑀸𑀦𑀸𑀫𑀳𑀁 𑀏𑀢𑁂 𑀥𑀫𑁆𑀫𑁂, 𑀧𑀲𑁆𑀲𑀸𑀫𑀳𑀁 𑀏𑀢𑁂 𑀥𑀫𑁆𑀫𑁂 𑀅𑀢𑁆𑀣𑀺 𑀘 𑀏𑀢𑁂 𑀥𑀫𑁆𑀫𑀸 𑀫𑀬𑀺, 𑀅𑀳𑀜𑁆𑀘 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀦𑁆𑀤𑀺𑀲𑁆𑀲𑀸𑀫𑀻𑀢𑀺.

𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀬𑀲𑁆𑀫𑀺𑀁 𑀔𑀡𑁂 𑀲𑀫𑀼𑀤𑀸𑀘𑀺𑀡𑁆𑀡𑀁 𑀳𑁄𑀢𑀺 𑀢𑀁 𑀔𑀡𑀁 𑀢𑀁 𑀮𑀬𑀁 𑀢𑀁 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀯𑀢𑁆𑀢𑁂.

𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄𑀢𑀺 𑀬𑀁 𑀯𑀢𑁆𑀣𑀼 𑀧𑀝𑀺𑀜𑁆𑀜𑀸𑀢𑀁 𑀳𑁄𑀢𑀺 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄 𑁋 ‘‘𑀓𑀺𑀦𑁆𑀢𑁂 𑀅𑀥𑀺𑀕𑀢𑀁, 𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢𑀁, 𑀓𑀤𑀸 𑀢𑁂 𑀅𑀥𑀺𑀕𑀢𑀁, 𑀓𑀢𑁆𑀣 𑀢𑁂 𑀅𑀥𑀺𑀕𑀢𑀁, 𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺.

𑀅𑀲𑀫𑀦𑀼𑀕𑁆𑀕𑀸𑀳𑀻𑀬𑀫𑀸𑀦𑁄𑀢𑀺 𑀦 𑀓𑁂𑀦𑀘𑀺 𑀯𑀼𑀘𑁆𑀘𑀫𑀸𑀦𑁄.

𑀆𑀧𑀦𑁆𑀦𑁄𑀢𑀺 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀺𑀢𑁆𑀯𑀸 𑀧𑀸𑀭𑀸𑀚𑀺𑀓𑀁 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄 𑀳𑁄𑀢𑀺.

𑀯𑀺𑀲𑀼𑀤𑁆𑀥𑀸𑀧𑁂𑀓𑁆𑀔𑁄𑀢𑀺 𑀕𑀺𑀳𑀻 𑀯𑀸 𑀳𑁄𑀢𑀼𑀓𑀸𑀫𑁄 𑀉𑀧𑀸𑀲𑀓𑁄 𑀯𑀸 𑀳𑁄𑀢𑀼𑀓𑀸𑀫𑁄 𑀆𑀭𑀸𑀫𑀺𑀓𑁄 𑀯𑀸 𑀳𑁄𑀢𑀼𑀓𑀸𑀫𑁄 𑀲𑀸𑀫𑀡𑁂𑀭𑁄 𑀯𑀸 𑀳𑁄𑀢𑀼𑀓𑀸𑀫𑁄.

𑀅𑀚𑀸𑀦𑀫𑁂𑀯𑀁, 𑀆𑀯𑀼𑀲𑁄, 𑀅𑀯𑀘𑀁 𑁋 𑀚𑀸𑀦𑀸𑀫𑀺, 𑀅𑀧𑀲𑁆𑀲𑀁 𑀧𑀲𑁆𑀲𑀸𑀫𑀻𑀢𑀺 𑀦𑀸𑀳𑀁 𑀏𑀢𑁂 𑀥𑀫𑁆𑀫𑁂 𑀚𑀸𑀦𑀸𑀫𑀺, 𑀦𑀸𑀳𑀁 𑀏𑀢𑁂 𑀥𑀫𑁆𑀫𑁂 𑀧𑀲𑁆𑀲𑀸𑀫𑀺, 𑀦𑀢𑁆𑀣𑀺 𑀘 𑀏𑀢𑁂 𑀥𑀫𑁆𑀫𑀸 𑀫𑀬𑀺, 𑀦 𑀘𑀸𑀳𑀁 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀦𑁆𑀤𑀺𑀲𑁆𑀲𑀸𑀫𑀻𑀢𑀺.

𑀢𑀼𑀘𑁆𑀙𑀁 𑀫𑀼𑀲𑀸 𑀯𑀺𑀮𑀧𑀺𑀦𑁆𑀢𑀺 𑀢𑀼𑀘𑁆𑀙𑀓𑀁 𑀫𑀬𑀸 𑀪𑀡𑀺𑀢𑀁, 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀁, 𑀅𑀪𑀽𑀢𑀁 𑀫𑀬𑀸 𑀪𑀡𑀺𑀢𑀁, 𑀅𑀚𑀸𑀦𑀦𑁆𑀢𑁂𑀦 𑀫𑀬𑀸 𑀪𑀡𑀺𑀢𑀁.

𑀅𑀜𑁆𑀜𑀢𑁆𑀭 𑀅𑀥𑀺𑀫𑀸𑀦𑀸𑀢𑀺 𑀞𑀧𑁂𑀢𑁆𑀯𑀸 𑀅𑀥𑀺𑀫𑀸𑀦𑀁.

𑀅𑀬𑀫𑁆𑀧𑀻𑀢𑀺 𑀧𑀼𑀭𑀺𑀫𑁂 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺.

𑀧𑀸𑀭𑀸𑀚𑀺𑀓𑁄 𑀳𑁄𑀢𑀻𑀢𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀢𑀸𑀮𑁄 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑁄 𑀅𑀪𑀩𑁆𑀩𑁄 𑀧𑀼𑀦 𑀯𑀺𑀭𑀽𑀴𑁆𑀳𑀺𑀬𑀸, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀺𑀢𑁆𑀯𑀸 𑀅𑀲𑁆𑀲𑀫𑀡𑁄 𑀳𑁄𑀢𑀺 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀻’’𑀢𑀺.

𑀅𑀲𑀁𑀯𑀸𑀲𑁄𑀢𑀺 𑀲𑀁𑀯𑀸𑀲𑁄 𑀦𑀸𑀫 𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸 𑁋 𑀏𑀲𑁄 𑀲𑀁𑀯𑀸𑀲𑁄 𑀦𑀸𑀫. 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀺. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀅𑀲𑀁𑀯𑀸𑀲𑁄’’𑀢𑀺.

𑁧𑁯𑁯. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫 𑀛𑀸𑀦𑀁 𑀯𑀺𑀫𑁄𑀓𑁆𑀔𑁄 𑀲𑀫𑀸𑀥𑀺 𑀲𑀫𑀸𑀧𑀢𑁆𑀢𑀺 𑀜𑀸𑀡𑀤𑀲𑁆𑀲𑀦𑀁 𑀫𑀕𑁆𑀕𑀪𑀸𑀯𑀦𑀸 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀦𑀻𑀯𑀭𑀡𑀢𑀸 𑀘𑀺𑀢𑁆𑀢𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀺.

[𑀧𑀸𑀘𑀺. 𑁭𑁦] 𑀛𑀸𑀦𑀦𑁆𑀢𑀺 𑀧𑀞𑀫𑀁 𑀛𑀸𑀦𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀢𑀢𑀺𑀬𑀁 𑀛𑀸𑀦𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁.

[𑀧𑀸𑀘𑀺. 𑁭𑁦] 𑀯𑀺𑀫𑁄𑀓𑁆𑀔𑁄𑀢𑀺 𑀲𑀼𑀜𑁆𑀜𑀢𑁄 𑀯𑀺𑀫𑁄𑀓𑁆𑀔𑁄 𑀅𑀦𑀺𑀫𑀺𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄.

[𑀧𑀸𑀘𑀺. 𑁭𑁦] 𑀲𑀫𑀸𑀥𑀻𑀢𑀺 𑀲𑀼𑀜𑁆𑀜𑀢𑁄 𑀲𑀫𑀸𑀥𑀺 𑀅𑀦𑀺𑀫𑀺𑀢𑁆𑀢𑁄 𑀲𑀫𑀸𑀥𑀺 𑀅𑀧𑁆𑀧𑀡𑀺𑀳𑀺𑀢𑁄 𑀲𑀫𑀸𑀥𑀺.

[𑀧𑀸𑀘𑀺. 𑁭𑁦] 𑀲𑀫𑀸𑀧𑀢𑁆𑀢𑀻𑀢𑀺 𑀲𑀼𑀜𑁆𑀜𑀢𑀸 𑀲𑀫𑀸𑀧𑀢𑁆𑀢𑀺 𑀅𑀦𑀺𑀫𑀺𑀢𑁆𑀢𑀸 𑀲𑀫𑀸𑀧𑀢𑁆𑀢𑀺 𑀅𑀧𑁆𑀧𑀡𑀺𑀳𑀺𑀢𑀸 𑀲𑀫𑀸𑀧𑀢𑁆𑀢𑀺.

[𑀧𑀸𑀘𑀺. 𑁭𑁦] 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸.

[𑀧𑀸𑀘𑀺. 𑁭𑁦] 𑀫𑀕𑁆𑀕𑀪𑀸𑀯𑀦𑀸𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄.

[𑀧𑀸𑀘𑀺. 𑁭𑁦] 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸, 𑀲𑀓𑀤𑀸𑀕𑀸𑀫𑀺𑀨𑀮𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸, 𑀅𑀦𑀸𑀕𑀸𑀫𑀺𑀨𑀮𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸, 𑀅𑀭𑀳𑀢𑁆𑀢𑀲𑁆𑀲 [𑀅𑀭𑀳𑀢𑁆𑀢𑀨𑀮𑀲𑁆𑀲 (𑀲𑁆𑀬𑀸.)] 𑀲𑀘𑁆𑀙𑀺𑀓𑀺𑀭𑀺𑀬𑀸.

[𑀧𑀸𑀘𑀺. 𑁭𑁦] 𑀓𑀺𑀮𑁂𑀲𑀧𑁆𑀧𑀳𑀸𑀦𑀦𑁆𑀢𑀺 𑀭𑀸𑀕𑀲𑁆𑀲 𑀧𑀳𑀸𑀦𑀁 𑀤𑁄𑀲𑀲𑁆𑀲 𑀧𑀳𑀸𑀦𑀁 𑀫𑁄𑀳𑀲𑁆𑀲 𑀧𑀳𑀸𑀦𑀁.

[𑀧𑀸𑀘𑀺. 𑁭𑁦] 𑀯𑀺𑀦𑀻𑀯𑀭𑀡𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑀭𑀸𑀕𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀢𑀸, 𑀤𑁄𑀲𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀢𑀸, 𑀫𑁄𑀳𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀢𑀸.

[𑀧𑀸𑀘𑀺. 𑁭𑁦] 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀻𑀢𑀺 𑀧𑀞𑀫𑁂𑀦 𑀛𑀸𑀦𑁂𑀦 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀺, 𑀤𑀼𑀢𑀺𑀬𑁂𑀦 𑀛𑀸𑀦𑁂𑀦 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀺, 𑀢𑀢𑀺𑀬𑁂𑀦 𑀛𑀸𑀦𑁂𑀦 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀺, 𑀘𑀢𑀼𑀢𑁆𑀣𑁂𑀦 𑀛𑀸𑀦𑁂𑀦 𑀲𑀼𑀜𑁆𑀜𑀸𑀕𑀸𑀭𑁂 𑀅𑀪𑀺𑀭𑀢𑀺.

𑁨𑁦𑁦. 𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲, 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺.

𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁.

𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁.

𑀙𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁.

𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑁨𑁦𑁧. 𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺.

𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁.

𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁.

𑀙𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁.

𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀸𑀫𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑁨𑁦𑁨. 𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺.

𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁.

𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁.

𑀙𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁.

𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑁨𑁦𑁩. 𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺.

𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁.

𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁.

𑀙𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁.

𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑁨𑁦𑁪. 𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀯𑀲𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺.

𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀯𑀲𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁.

𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀯𑀲𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁.

𑀙𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀯𑀲𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁.

𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀯𑀲𑀻𑀫𑁆𑀳𑀻𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑁨𑁦𑁫. 𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺.

𑀘𑀢𑀽𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁.

𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁.

𑀙𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁.

𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑀬𑀣𑀸 𑀇𑀤𑀁 𑀧𑀞𑀫𑀁 𑀛𑀸𑀦𑀁 𑀯𑀺𑀢𑁆𑀣𑀸𑀭𑀺𑀢𑀁 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁨𑁦𑁬. 𑀢𑀻𑀳𑀸𑀓𑀸𑀭𑁂𑀳𑀺…𑀧𑁂… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑁨𑁦𑁭. 𑀢𑀻𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀁… 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀁… 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀁… 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀅𑀧𑁆𑀧𑀡𑀺𑀳𑀺𑀢𑀲𑁆𑀲 𑀯𑀺𑀫𑁄𑀓𑁆𑀔𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀅𑀧𑁆𑀧𑀡𑀺𑀳𑀺𑀢𑁄 𑀯𑀺𑀫𑁄𑀓𑁆𑀔𑁄 𑀲𑀘𑁆𑀙𑀺𑀓𑀢𑁄 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂….

𑀢𑀻𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀲𑀫𑀸𑀥𑀺𑀁… 𑀅𑀦𑀺𑀫𑀺𑀢𑁆𑀢𑀁 𑀲𑀫𑀸𑀥𑀺𑀁… 𑀅𑀧𑁆𑀧𑀡𑀺𑀳𑀺𑀢𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀅𑀧𑁆𑀧𑀡𑀺𑀳𑀺𑀢𑀲𑁆𑀲 𑀲𑀫𑀸𑀥𑀺𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀅𑀧𑁆𑀧𑀡𑀺𑀳𑀺𑀢𑁄 𑀲𑀫𑀸𑀥𑀺 𑀲𑀘𑁆𑀙𑀺𑀓𑀢𑁄 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀲𑀼𑀜𑁆𑀜𑀢𑀁 𑀲𑀫𑀸𑀧𑀢𑁆𑀢𑀺𑀁… 𑀅𑀦𑀺𑀫𑀺𑀢𑁆𑀢𑀁 𑀲𑀫𑀸𑀧𑀢𑁆𑀢𑀺𑀁… 𑀅𑀧𑁆𑀧𑀡𑀺𑀳𑀺𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀅𑀧𑁆𑀧𑀡𑀺𑀳𑀺𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀅𑀧𑁆𑀧𑀡𑀺𑀳𑀺𑀢𑀸 𑀲𑀫𑀸𑀧𑀢𑁆𑀢𑀺 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺 𑀲𑀫𑀸𑀧𑀦𑁆𑀦𑁄… 𑀢𑀺𑀲𑁆𑀲𑀦𑁆𑀦𑀁 𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂… 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺… 𑀧𑀜𑁆𑀘 𑀩𑀮𑀸𑀦𑀺 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄 … 𑀧𑀜𑁆𑀘𑀦𑁆𑀦𑀁 𑀩𑀮𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀜𑁆𑀘𑀩𑀮𑀸𑀦𑀺 𑀲𑀘𑁆𑀙𑀺𑀓𑀢𑀸𑀦𑀺 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀘𑁆𑀙𑀺𑀓𑀢𑁄 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁… 𑀲𑀓𑀤𑀸𑀕𑀸𑀫𑀺𑀨𑀮𑀁… 𑀅𑀦𑀸𑀕𑀸𑀫𑀺𑀨𑀮𑀁… 𑀅𑀭𑀳𑀢𑁆𑀢𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀅𑀭𑀳𑀢𑁆𑀢𑀲𑁆𑀲 𑀮𑀸𑀪𑀻𑀫𑁆𑀳𑀺 𑀯𑀲𑀻𑀫𑁆𑀳𑀺 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀭𑀸𑀕𑁄 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄 𑀉𑀓𑁆𑀔𑁂𑀝𑀺𑀢𑁄 𑀲𑀫𑀼𑀓𑁆𑀔𑁂𑀝𑀺𑀢𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀤𑁄𑀲𑁄 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄 𑀉𑀓𑁆𑀔𑁂𑀝𑀺𑀢𑁄 𑀲𑀫𑀼𑀓𑁆𑀔𑁂𑀝𑀺𑀢𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑁄 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄 𑀉𑀓𑁆𑀔𑁂𑀝𑀺𑀢𑁄 𑀲𑀫𑀼𑀓𑁆𑀔𑁂𑀝𑀺𑀢𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀭𑀸𑀕𑀸 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀤𑁄𑀲𑀸 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 …𑀧𑁂… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑁋 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑀲𑀼𑀤𑁆𑀥𑀺𑀓𑀁 𑀦𑀺𑀝𑁆𑀞𑀺𑀢𑀁.

𑁨𑁦𑁮. 𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂….

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀘𑀢𑀼𑀢𑁆𑀣𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀘𑀢𑀼𑀢𑁆𑀣𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀼𑀜𑁆𑀜𑀢𑀜𑁆𑀘 𑀯𑀺𑀫𑁄𑀓𑁆𑀔𑀁… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀦𑀺𑀫𑀺𑀢𑁆𑀢𑀜𑁆𑀘 𑀯𑀺𑀫𑁄𑀓𑁆𑀔𑀁… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀯𑀺𑀫𑁄𑀓𑁆𑀔𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑀲𑁆𑀲 𑀘 𑀯𑀺𑀫𑁄𑀓𑁆𑀔𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀧𑁆𑀧𑀡𑀺𑀳𑀺𑀢𑁄 𑀘 𑀯𑀺𑀫𑁄𑀓𑁆𑀔𑁄 𑀲𑀘𑁆𑀙𑀺𑀓𑀢𑁄 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀼𑀜𑁆𑀜𑀢𑀜𑁆𑀘 𑀲𑀫𑀸𑀥𑀺𑀁… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀦𑀺𑀫𑀺𑀢𑁆𑀢𑀜𑁆𑀘 𑀲𑀫𑀸𑀥𑀺𑀁… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑀲𑁆𑀲 𑀘 𑀲𑀫𑀸𑀥𑀺𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀧𑁆𑀧𑀡𑀺𑀳𑀺𑀢𑁄 𑀘 𑀲𑀫𑀸𑀥𑀺 𑀲𑀘𑁆𑀙𑀺𑀓𑀢𑁄 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀼𑀜𑁆𑀜𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀦𑀺𑀫𑀺𑀢𑁆𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑀸𑀬 𑀘 𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀧𑁆𑀧𑀡𑀺𑀳𑀺𑀢𑀸 𑀘 𑀲𑀫𑀸𑀧𑀢𑁆𑀢𑀺 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀢𑀺𑀲𑁆𑀲𑁄 𑀘 𑀯𑀺𑀚𑁆𑀚𑀸 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀢𑀺𑀲𑁆𑀲𑀦𑁆𑀦𑀜𑁆𑀘 𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀢𑀺𑀲𑁆𑀲𑁄 𑀘 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀘𑀢𑁆𑀢𑀸𑀭𑁄 𑀘 𑀲𑀢𑀺𑀧𑀝𑁆𑀞𑀸𑀦𑁂… 𑀧𑀞𑀫𑀜𑁆𑀘 𑀛𑀸𑀦𑀁 𑀘𑀢𑁆𑀢𑀸𑀭𑁄 𑀘 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀧𑀞𑀫𑀜𑁆𑀘 𑀛𑀸𑀦𑀁 𑀘𑀢𑁆𑀢𑀸𑀭𑁄 𑀘 𑀇𑀤𑁆𑀥𑀺𑀧𑀸𑀤𑁂 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀘𑀢𑀼𑀦𑁆𑀦𑀜𑁆𑀘 𑀇𑀤𑁆𑀥𑀺𑀧𑀸𑀤𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀘𑀢𑁆𑀢𑀸𑀭𑁄 𑀘 𑀇𑀤𑁆𑀥𑀺𑀧𑀸𑀤𑀸 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀧𑀜𑁆𑀘 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀧𑀜𑁆𑀘 𑀘 𑀩𑀮𑀸𑀦𑀺 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀧𑀜𑁆𑀘𑀦𑁆𑀦𑀜𑁆𑀘 𑀩𑀮𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀧𑀜𑁆𑀘 𑀘 𑀩𑀮𑀸𑀦𑀺 𑀲𑀘𑁆𑀙𑀺𑀓𑀢𑀸𑀦𑀺 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑁨𑁦𑁯. 𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀢𑁆𑀢 𑀘 𑀩𑁄𑀚𑁆𑀛𑀗𑁆𑀕𑁂 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀲𑀢𑁆𑀢𑀦𑁆𑀦𑀜𑁆𑀘 𑀩𑁄𑀚𑁆𑀛𑀗𑁆𑀕𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀢𑁆𑀢 𑀘 𑀩𑁄𑀚𑁆𑀛𑀗𑁆𑀕𑀸 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀭𑀺𑀬𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀭𑀺𑀬𑀲𑁆𑀲 𑀘 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀮𑀸𑀪𑀻𑀫𑁆𑀳𑀺 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀭𑀺𑀬𑁄 𑀘 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀘𑁆𑀙𑀺𑀓𑀢𑁄 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘… 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀦𑀸𑀕𑀸𑀫𑀺𑀨𑀮𑀜𑁆𑀘… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀭𑀳𑀢𑁆𑀢𑀜𑁆𑀘 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀘 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀅𑀭𑀳𑀢𑁆𑀢𑀜𑁆𑀘 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸, 𑀭𑀸𑀕𑁄 𑀘 𑀫𑁂 𑀘𑀢𑁆𑀢𑁄… 𑀤𑁄𑀲𑁄 𑀘 𑀫𑁂 𑀘𑀢𑁆𑀢𑁄… 𑀫𑁄𑀳𑁄 𑀘 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄 𑀉𑀓𑁆𑀔𑁂𑀝𑀺𑀢𑁄 𑀲𑀫𑀼𑀓𑁆𑀔𑁂𑀝𑀺𑀢𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺…𑀧𑁂… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸, 𑀭𑀸𑀕𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁… 𑀤𑁄𑀲𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑀔𑀡𑁆𑀟𑀘𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁨𑁧𑁦. 𑀢𑀻𑀳𑀸𑀓𑀸𑀭𑁂𑀳𑀺 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀘𑀢𑀼𑀢𑁆𑀣𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀘𑀢𑀼𑀢𑁆𑀣𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀲𑀼𑀜𑁆𑀜𑀢𑀜𑁆𑀘 𑀯𑀺𑀫𑁄𑀓𑁆𑀔𑀁… 𑀅𑀦𑀺𑀫𑀺𑀢𑁆𑀢𑀜𑁆𑀘 𑀯𑀺𑀫𑁄𑀓𑁆𑀔𑀁… 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀯𑀺𑀫𑁄𑀓𑁆𑀔𑀁… 𑀲𑀼𑀜𑁆𑀜𑀢𑀜𑁆𑀘 𑀲𑀫𑀸𑀥𑀺𑀁… 𑀅𑀦𑀺𑀫𑀺𑀢𑁆𑀢𑀜𑁆𑀘 𑀲𑀫𑀸𑀥𑀺𑀁… 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀲𑀫𑀸𑀥𑀺𑀁… 𑀲𑀼𑀜𑁆𑀜𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁… 𑀅𑀦𑀺𑀫𑀺𑀢𑁆𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁… 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁… 𑀢𑀺𑀲𑁆𑀲𑁄 𑀘 𑀯𑀺𑀚𑁆𑀚𑀸… 𑀘𑀢𑁆𑀢𑀸𑀭𑁄 𑀘 𑀲𑀢𑀺𑀧𑀝𑁆𑀞𑀸𑀦𑁂… 𑀘𑀢𑁆𑀢𑀸𑀭𑁄 𑀘 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀘𑀢𑁆𑀢𑀸𑀭𑁄 𑀘 𑀇𑀤𑁆𑀥𑀺𑀧𑀸𑀤𑁂… 𑀧𑀜𑁆𑀘 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺… 𑀧𑀜𑁆𑀘 𑀘 𑀩𑀮𑀸𑀦𑀺… 𑀲𑀢𑁆𑀢 𑀘 𑀩𑁄𑀚𑁆𑀛𑀗𑁆𑀕𑁂… 𑀅𑀭𑀺𑀬𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁… 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘… 𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘… 𑀅𑀦𑀸𑀕𑀸𑀫𑀺𑀨𑀮𑀜𑁆𑀘… 𑀅𑀭𑀳𑀢𑁆𑀢𑀜𑁆𑀘 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀘 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀅𑀭𑀳𑀢𑁆𑀢𑀜𑁆𑀘 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸, 𑀭𑀸𑀕𑁄 𑀘 𑀫𑁂 𑀘𑀢𑁆𑀢𑁄… 𑀤𑁄𑀲𑁄 𑀘 𑀫𑁂 𑀘𑀢𑁆𑀢𑁄… 𑀫𑁄𑀳𑁄 𑀘 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄 𑀉𑀓𑁆𑀔𑁂𑀝𑀺𑀢𑁄 𑀲𑀫𑀼𑀓𑁆𑀔𑁂𑀝𑀺𑀢𑁄. 𑀭𑀸𑀕𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁… 𑀤𑁄𑀲𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 …𑀧𑁂… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀧𑀞𑀫𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀧𑀞𑀫𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲…𑀧𑁂… 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑀩𑀤𑁆𑀥𑀘𑀓𑁆𑀓𑀁.

𑀏𑀯𑀁 𑀏𑀓𑁂𑀓𑀁 𑀫𑀽𑀮𑀁 𑀓𑀸𑀢𑀼𑀦 𑀩𑀤𑁆𑀥𑀘𑀓𑁆𑀓𑀁 𑀧𑀭𑀺𑀯𑀢𑁆𑀢𑀓𑀁 𑀓𑀢𑁆𑀢𑀩𑁆𑀩𑀁.

𑀇𑀤𑀁 𑀲𑀁𑀔𑀺𑀢𑁆𑀢𑀁.

𑁨𑁧𑁧. 𑀢𑀻𑀳𑀸𑀓𑀸𑀭𑁂𑀳𑀺 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀘𑀢𑀼𑀢𑁆𑀣𑀜𑁆𑀘 𑀛𑀸𑀦𑀁…𑀧𑁂… 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀅𑀭𑀳𑀢𑁆𑀢𑀜𑁆𑀘 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀘 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀅𑀭𑀳𑀢𑁆𑀢𑀜𑁆𑀘 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸, 𑀭𑀸𑀕𑁄 𑀘 𑀫𑁂 𑀘𑀢𑁆𑀢𑁄… 𑀤𑁄𑀲𑁄 𑀘 𑀫𑁂 𑀘𑀢𑁆𑀢𑁄… 𑀫𑁄𑀳𑁄 𑀘 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄 𑀉𑀓𑁆𑀔𑁂𑀝𑀺𑀢𑁄 𑀲𑀫𑀼𑀓𑁆𑀔𑁂𑀝𑀺𑀢𑁄. 𑀭𑀸𑀕𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁… 𑀤𑁄𑀲𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀧𑀞𑀫𑀜𑁆𑀘 𑀛𑀸𑀦𑀁… 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀢𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀤𑀼𑀢𑀺𑀬𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀧𑀞𑀫𑀜𑁆𑀘 𑀛𑀸𑀦𑀁…𑀧𑁂… 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁… 𑀢𑀢𑀺𑀬𑀜𑁆𑀘 𑀛𑀸𑀦𑀁… 𑀘𑀢𑀼𑀢𑁆𑀣𑀜𑁆𑀘 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀁 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀘𑀢𑀼𑀢𑁆𑀣𑀲𑁆𑀲 𑀘 𑀛𑀸𑀦𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀘𑀢𑀼𑀢𑁆𑀣𑀜𑁆𑀘 𑀛𑀸𑀦𑀁 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑁨𑁧𑁨. 𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀲𑀼𑀜𑁆𑀜𑀢𑀜𑁆𑀘 𑀯𑀺𑀫𑁄𑀓𑁆𑀔𑀁… 𑀅𑀦𑀺𑀫𑀺𑀢𑁆𑀢𑀜𑁆𑀘 𑀯𑀺𑀫𑁄𑀓𑁆𑀔𑀁… 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀯𑀺𑀫𑁄𑀓𑁆𑀔𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀧𑁆𑀧𑀡𑀺𑀳𑀺𑀢𑀲𑁆𑀲 𑀘 𑀯𑀺𑀫𑁄𑀓𑁆𑀔𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀧𑁆𑀧𑀡𑀺𑀳𑀺𑀢𑁄 𑀘 𑀯𑀺𑀫𑁄𑀓𑁆𑀔𑁄 𑀲𑀘𑁆𑀙𑀺𑀓𑀢𑁄 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀲𑀼𑀜𑁆𑀜𑀢𑀜𑁆𑀘 𑀲𑀫𑀸𑀥𑀺𑀁… 𑀅𑀦𑀺𑀫𑀺𑀢𑁆𑀢𑀜𑁆𑀘 𑀲𑀫𑀸𑀥𑀺𑀁… 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀧𑁆𑀧𑀡𑀺𑀳𑀺𑀢𑀲𑁆𑀲 𑀘 𑀲𑀫𑀸𑀥𑀺𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀧𑁆𑀧𑀡𑀺𑀳𑀺𑀢𑁄 𑀘 𑀲𑀫𑀸𑀥𑀺 𑀲𑀘𑁆𑀙𑀺𑀓𑀢𑁄 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀲𑀼𑀜𑁆𑀜𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁… 𑀅𑀦𑀺𑀫𑀺𑀢𑁆𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁… 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀁 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀧𑁆𑀧𑀡𑀺𑀳𑀺𑀢𑀸𑀬 𑀘 𑀲𑀫𑀸𑀧𑀢𑁆𑀢𑀺𑀬𑀸 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀧𑁆𑀧𑀡𑀺𑀳𑀺𑀢𑀸 𑀘 𑀲𑀫𑀸𑀧𑀢𑁆𑀢𑀺 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀢𑀺𑀲𑁆𑀲𑁄 𑀘 𑀯𑀺𑀚𑁆𑀚𑀸 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… ‘𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀢𑀺𑀲𑁆𑀲𑀦𑁆𑀦𑀜𑁆𑀘 𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀢𑀺𑀲𑁆𑀲𑁄 𑀘 𑀯𑀺𑀚𑁆𑀚𑀸 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀘𑀢𑁆𑀢𑀸𑀭𑁄 𑀘 𑀲𑀢𑀺𑀧𑀝𑁆𑀞𑀸𑀦𑁂… 𑀘𑀢𑁆𑀢𑀸𑀭𑁄 𑀘 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀘𑀢𑁆𑀢𑀸𑀭𑁄 𑀘 𑀇𑀤𑁆𑀥𑀺𑀧𑀸𑀤𑁂 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀘𑀢𑀼𑀦𑁆𑀦𑀜𑁆𑀘 𑀇𑀤𑁆𑀥𑀺𑀧𑀸𑀤𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀘𑀢𑁆𑀢𑀸𑀭𑁄 𑀘 𑀇𑀤𑁆𑀥𑀺𑀧𑀸𑀤𑀸 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑁨𑁧𑁩. 𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀧𑀜𑁆𑀘 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺… 𑀧𑀜𑁆𑀘 𑀘 𑀩𑀮𑀸𑀦𑀺 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀧𑀜𑁆𑀘𑀦𑁆𑀦𑀜𑁆𑀘 𑀩𑀮𑀸𑀦𑀁 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀧𑀜𑁆𑀘 𑀘 𑀩𑀮𑀸𑀦𑀺 𑀲𑀘𑁆𑀙𑀺𑀓𑀢𑀸𑀦𑀺 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀲𑀢𑁆𑀢 𑀘 𑀩𑁄𑀚𑁆𑀛𑀗𑁆𑀕𑁂 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀲𑀢𑁆𑀢𑀦𑁆𑀦𑀜𑁆𑀘 𑀩𑁄𑀚𑁆𑀛𑀗𑁆𑀕𑀸𑀦𑀁 𑀮𑀸𑀪𑀻𑀫𑁆𑀳𑀺 … 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀲𑀢𑁆𑀢 𑀘 𑀩𑁄𑀚𑁆𑀛𑀗𑁆𑀕𑀸 𑀲𑀘𑁆𑀙𑀺𑀓𑀢𑀸 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀭𑀺𑀬𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀭𑀺𑀬𑀲𑁆𑀲 𑀘 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀭𑀺𑀬𑁄 𑀘 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀘𑁆𑀙𑀺𑀓𑀢𑁄 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘… 𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘… 𑀅𑀦𑀸𑀕𑀸𑀫𑀺𑀨𑀮𑀜𑁆𑀘… 𑀅𑀭𑀳𑀢𑁆𑀢𑀜𑁆𑀘 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀭𑀳𑀢𑁆𑀢𑀲𑁆𑀲 𑀘 𑀮𑀸𑀪𑀻𑀫𑁆𑀳𑀺… 𑀯𑀲𑀻𑀫𑁆𑀳𑀺… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀅𑀭𑀳𑀢𑁆𑀢𑀜𑁆𑀘 𑀲𑀘𑁆𑀙𑀺𑀓𑀢𑀁 𑀫𑀬𑀸𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁, 𑀭𑀸𑀕𑁄 𑀘 𑀫𑁂 𑀘𑀢𑁆𑀢𑁄… 𑀤𑁄𑀲𑁄 𑀘 𑀫𑁂 𑀘𑀢𑁆𑀢𑁄… 𑀫𑁄𑀳𑁄 𑀘 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄 𑀉𑀓𑁆𑀔𑁂𑀝𑀺𑀢𑁄 𑀲𑀫𑀼𑀓𑁆𑀔𑁂𑀝𑀺𑀢𑁄𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺…𑀧𑁂… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀭𑀸𑀕𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁… 𑀤𑁄𑀲𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑀏𑀓𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁. [𑀏𑀓𑀫𑀽𑀮𑀓𑀁 𑀲𑀗𑁆𑀔𑀺𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 (𑀲𑁆𑀬𑀸.)]

𑀬𑀣𑀸 𑀏𑀓𑀫𑀽𑀮𑀓𑀁 𑀯𑀺𑀢𑁆𑀣𑀸𑀭𑀺𑀢𑀁 𑀏𑀯𑀫𑁂𑀯 𑀤𑀼𑀫𑀽𑀮𑀓𑀸𑀤𑀺𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀇𑀤𑀁 𑀲𑀩𑁆𑀩𑀫𑀽𑀮𑀓𑀁

𑁨𑁧𑁪. 𑀢𑀻𑀳𑀸𑀓𑀸𑀭𑁂𑀳𑀺 …𑀧𑁂… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀞𑀫𑀜𑁆𑀘 𑀛𑀸𑀦𑀁 𑀤𑀼𑀢𑀺𑀬𑀜𑁆𑀘 𑀛𑀸𑀦𑀁 𑀢𑀢𑀺𑀬𑀜𑁆𑀘 𑀛𑀸𑀦𑀁 𑀘𑀢𑀼𑀢𑁆𑀣𑀜𑁆𑀘 𑀛𑀸𑀦𑀁 𑀲𑀼𑀜𑁆𑀜𑀢𑀜𑁆𑀘 𑀯𑀺𑀫𑁄𑀓𑁆𑀔𑀁 𑀅𑀦𑀺𑀫𑀺𑀢𑁆𑀢𑀜𑁆𑀘 𑀯𑀺𑀫𑁄𑀓𑁆𑀔𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀯𑀺𑀫𑁄𑀓𑁆𑀔𑀁 𑀲𑀼𑀜𑁆𑀜𑀢𑀜𑁆𑀘 𑀲𑀫𑀸𑀥𑀺𑀁 𑀅𑀦𑀺𑀫𑀺𑀢𑁆𑀢𑀜𑁆𑀘 𑀲𑀫𑀸𑀥𑀺𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀲𑀫𑀸𑀥𑀺𑀁 𑀲𑀼𑀜𑁆𑀜𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁 𑀅𑀦𑀺𑀫𑀺𑀢𑁆𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑀡𑀺𑀳𑀺𑀢𑀜𑁆𑀘 𑀲𑀫𑀸𑀧𑀢𑁆𑀢𑀺𑀁 𑀢𑀺𑀲𑁆𑀲𑁄 𑀘 𑀯𑀺𑀚𑁆𑀚𑀸 𑀘𑀢𑁆𑀢𑀸𑀭𑁄 𑀘 𑀲𑀢𑀺𑀧𑀝𑁆𑀞𑀸𑀦𑁂 𑀘𑀢𑁆𑀢𑀸𑀭𑁄 𑀘 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀘 𑀇𑀤𑁆𑀥𑀺𑀧𑀸𑀤𑁂 𑀧𑀜𑁆𑀘 𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀘 𑀩𑀮𑀸𑀦𑀺 𑀲𑀢𑁆𑀢 𑀘 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀜𑁆𑀘 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀜𑁆𑀘 𑀲𑀓𑀤𑀸𑀕𑀸𑀫𑀺𑀨𑀮𑀜𑁆𑀘 𑀅𑀦𑀸𑀕𑀸𑀫𑀺𑀨𑀮𑀜𑁆𑀘 𑀅𑀭𑀳𑀢𑁆𑀢𑀜𑁆𑀘 𑀲𑀫𑀸𑀧𑀚𑁆𑀚𑀺𑀁… 𑀲𑀫𑀸𑀧𑀚𑁆𑀚𑀸𑀫𑀺… 𑀲𑀫𑀸𑀧𑀦𑁆𑀦𑁄…𑀧𑁂… 𑀭𑀸𑀕𑁄 𑀘 𑀫𑁂 𑀘𑀢𑁆𑀢𑁄, 𑀤𑁄𑀲𑁄 𑀘 𑀫𑁂 𑀘𑀢𑁆𑀢𑁄, 𑀫𑁄𑀳𑁄 𑀘 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄 𑀉𑀓𑁆𑀔𑁂𑀝𑀺𑀢𑁄 𑀲𑀫𑀼𑀓𑁆𑀔𑁂𑀝𑀺𑀢𑁄. 𑀭𑀸𑀕𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁, 𑀤𑁄𑀲𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁, 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑀲𑀩𑁆𑀩𑀫𑀽𑀮𑀓𑀁 𑀦𑀺𑀝𑁆𑀞𑀺𑀢𑀁.

𑀲𑀼𑀤𑁆𑀥𑀺𑀓𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨𑁧𑁫. 𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑁄 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑁄 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 …𑀧𑁂… 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑁄 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀁… 𑀅𑀦𑀺𑀫𑀺𑀢𑁆𑀢𑀁 𑀯𑀺𑀫𑁄𑀓𑁆𑀔𑀁… 𑀅𑀧𑁆𑀧𑀡𑀺𑀳𑀺𑀢𑀁 𑀯𑀺𑀫𑁄𑀓𑁆𑀔𑀁… 𑀲𑀼𑀜𑁆𑀜𑀢𑀁 𑀲𑀫𑀸𑀥𑀺𑀁… 𑀅𑀦𑀺𑀫𑀺𑀢𑁆𑀢𑀁 𑀲𑀫𑀸𑀥𑀺𑀁… 𑀅𑀧𑁆𑀧𑀡𑀺𑀳𑀺𑀢𑀁 𑀲𑀫𑀸𑀥𑀺𑀁… 𑀲𑀼𑀜𑁆𑀜𑀢𑀁 𑀲𑀫𑀸𑀧𑀢𑁆𑀢𑀺𑀁… 𑀅𑀦𑀺𑀫𑀺𑀢𑁆𑀢𑀁 𑀲𑀫𑀸𑀧𑀢𑁆𑀢𑀺𑀁… 𑀅𑀧𑁆𑀧𑀡𑀺𑀳𑀺𑀢𑀁 𑀲𑀫𑀸𑀧𑀢𑁆𑀢𑀺𑀁… 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸… 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂… 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂… 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂… 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺… 𑀧𑀜𑁆𑀘 𑀩𑀮𑀸𑀦𑀺… 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂… 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁… 𑀲𑁄𑀢𑀸𑀧𑀢𑁆𑀢𑀺𑀨𑀮𑀁… 𑀲𑀓𑀤𑀸𑀕𑀸𑀫𑀺𑀨𑀮𑀁… 𑀅𑀦𑀸𑀕𑀸𑀫𑀺𑀨𑀮𑀁… 𑀅𑀭𑀳𑀢𑁆𑀢𑀁 𑀲𑀫𑀸𑀧𑀚𑁆𑀚𑀺𑀁…𑀧𑁂… 𑀭𑀸𑀕𑁄 𑀫𑁂 𑀘𑀢𑁆𑀢𑁄… 𑀤𑁄𑀲𑁄 𑀫𑁂 𑀘𑀢𑁆𑀢𑁄… 𑀫𑁄𑀳𑁄 𑀫𑁂 𑀘𑀢𑁆𑀢𑁄 𑀯𑀦𑁆𑀢𑁄 𑀫𑀼𑀢𑁆𑀢𑁄 𑀧𑀳𑀻𑀦𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑁄 𑀉𑀓𑁆𑀔𑁂𑀝𑀺𑀢𑁄 𑀲𑀫𑀼𑀓𑁆𑀔𑁂𑀝𑀺𑀢𑁄. 𑀭𑀸𑀕𑀸 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁… 𑀤𑁄𑀲𑀸 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁… 𑀫𑁄𑀳𑀸 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀺𑀲𑁆𑀲𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀪𑀡𑀸𑀫𑀻𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 𑀫𑀼𑀲𑀸 𑀫𑀬𑀸 𑀪𑀡𑀺𑀢𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁, 𑀯𑀺𑀦𑀺𑀥𑀸𑀬 𑀔𑀦𑁆𑀢𑀺𑀁, 𑀯𑀺𑀦𑀺𑀥𑀸𑀬 𑀭𑀼𑀘𑀺𑀁, 𑀯𑀺𑀦𑀺𑀥𑀸𑀬 𑀪𑀸𑀯𑀁.

𑀯𑀢𑁆𑀣𑀼𑀯𑀺𑀲𑀸𑀭𑀓𑀲𑁆𑀲 𑀏𑀓𑀫𑀽𑀮𑀓𑀲𑁆𑀲 𑀔𑀡𑁆𑀟𑀘𑀓𑁆𑀓𑀁 𑀦𑀺𑀝𑁆𑀞𑀺𑀢𑀁.

𑁨𑁧𑁬. 𑀢𑀻𑀳𑀸𑀓𑀸𑀭𑁂𑀳𑀺 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑁄 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.

𑀢𑀻𑀳𑀸𑀓𑀸𑀭𑁂𑀳𑀺 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀦𑁆𑀢𑀺…𑀧𑁂… 𑀫𑁄𑀳𑀸 𑀘 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀦𑁆𑀢𑀺 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀡𑀦𑁆𑀢𑀲𑁆𑀲 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲; 𑀦 𑀧𑀝𑀺𑀯𑀺𑀚𑀸𑀦𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲.