𑁨𑁩𑁦. 𑀲𑀗𑁆𑀖𑁂 𑀪𑀺𑀦𑁆𑀦𑁂 𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸

𑁩𑁭𑁬. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀉𑀤𑀓𑀁 𑀤𑁂𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺. 𑀲𑀗𑁆𑀖𑀲𑁆𑀲𑁂𑀯𑁂𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀉𑀤𑀓𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀧𑀓𑁆𑀔𑁂 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺. 𑀲𑀗𑁆𑀖𑀲𑁆𑀲𑁂𑀯𑁂𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀉𑀤𑀓𑀁 𑀤𑁂𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 𑀧𑀓𑁆𑀔𑀲𑁆𑀲 𑀤𑁂𑀫𑀸𑀢𑀺. 𑀧𑀓𑁆𑀔𑀲𑁆𑀲𑁂𑀯𑁂𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀉𑀤𑀓𑀁 𑀤𑁂𑀦𑁆𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀧𑀓𑁆𑀔𑁂 𑀘𑀻𑀯𑀭𑀁 𑀤𑁂𑀦𑁆𑀢𑀺 𑁋 𑀧𑀓𑁆𑀔𑀲𑁆𑀲 𑀤𑁂𑀫𑀸𑀢𑀺. 𑀧𑀓𑁆𑀔𑀲𑁆𑀲𑁂𑀯𑁂𑀢𑀁.

𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀯𑀲𑁆𑀲𑀁𑀯𑀼𑀝𑁆𑀞𑀸𑀦𑀁 𑀪𑀺𑀓𑁆𑀔𑀽𑀦𑀁 𑀉𑀧𑁆𑀧𑀦𑁆𑀦𑁂 𑀘𑀻𑀯𑀭𑁂 𑀅𑀪𑀸𑀚𑀺𑀢𑁂 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀲𑀩𑁆𑀩𑁂𑀲𑀁 𑀲𑀫𑀓𑀁 𑀪𑀸𑀚𑁂𑀢𑀩𑁆𑀩𑀦𑁆𑀢𑀺.

𑀲𑀗𑁆𑀖𑁂 𑀪𑀺𑀦𑁆𑀦𑁂 𑀘𑀻𑀯𑀭𑀼𑀧𑁆𑀧𑀸𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.