𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀫𑀳𑀸𑀯𑀕𑁆𑀕𑀧𑀸𑀴𑀺

𑁧. 𑀫𑀳𑀸𑀔𑀦𑁆𑀥𑀓𑁄

𑁧. 𑀩𑁄𑀥𑀺𑀓𑀣𑀸

𑁧. [𑀉𑀤𑀸. 𑁧 𑀆𑀤𑀬𑁄] 𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄 𑀪𑀕𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻 [𑀯𑀺𑀫𑀼𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑀻 (𑀓.)]. 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀺 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺 𑁋 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. ‘‘𑀅𑀯𑀺𑀚𑁆𑀚𑀸𑀬𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺 𑁋 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸;

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸;

𑀬𑀢𑁄 𑀧𑀚𑀸𑀦𑀸𑀢𑀺 𑀲𑀳𑁂𑀢𑀼𑀥𑀫𑁆𑀫’’𑀦𑁆𑀢𑀺.

𑁨. [𑀉𑀤𑀸. 𑁨] 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀁 𑀬𑀸𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀺 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻…𑀧𑁂… 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸;

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀅𑀣𑀲𑁆𑀲 𑀓𑀗𑁆𑀔𑀸 𑀯𑀧𑀬𑀦𑁆𑀢𑀺 𑀲𑀩𑁆𑀩𑀸;

𑀬𑀢𑁄 𑀔𑀬𑀁 𑀧𑀘𑁆𑀘𑀬𑀸𑀦𑀁 𑀅𑀯𑁂𑀤𑀻’’𑀢𑀺.

𑁩. [𑀉𑀤𑀸. 𑁩] 𑀅𑀣 𑀔𑁄 𑀪𑀕𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀁 𑀬𑀸𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀫𑀦𑀲𑀸𑀓𑀸𑀲𑀺 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁…𑀧𑁂… 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺…𑀧𑁂… 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸;

𑀆𑀢𑀸𑀧𑀺𑀦𑁄 𑀛𑀸𑀬𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲;

𑀯𑀺𑀥𑀽𑀧𑀬𑀁 𑀢𑀺𑀝𑁆𑀞𑀢𑀺 𑀫𑀸𑀭𑀲𑁂𑀦𑀁;

𑀲𑀽𑀭𑀺𑀬𑁄𑀯 [𑀲𑀼𑀭𑀺𑀬𑁄𑀯 (𑀲𑀻. 𑀲𑁆𑀬𑀸. 𑀓𑀁.)] 𑀑𑀪𑀸𑀲𑀬𑀫𑀦𑁆𑀢𑀮𑀺𑀓𑁆𑀔’’𑀦𑁆𑀢𑀺.

𑀩𑁄𑀥𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀚𑀧𑀸𑀮𑀓𑀣𑀸

𑁪. [𑀉𑀤𑀸. 𑁪] 𑀅𑀣 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑀸 𑀬𑁂𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀳𑀼𑀁𑀳𑀼𑀗𑁆𑀓𑀚𑀸𑀢𑀺𑀓𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺, 𑀓𑀢𑀫𑁂 𑀘 𑀧𑀦 𑀩𑁆𑀭𑀸𑀳𑁆𑀫𑀡𑀓𑀭𑀡𑀸 [𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸 (𑀓.) 𑀩𑁆𑀭𑀸𑀳𑁆𑀫𑀡𑀓𑀭𑀸𑀡𑀸 (?)] 𑀥𑀫𑁆𑀫𑀸’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀦𑁂𑀢𑁆𑀢𑀺. 𑁧𑁦𑁩] 𑀬𑁄 𑀩𑁆𑀭𑀸𑀳𑁆𑀫𑀡𑁄 𑀩𑀸𑀳𑀺𑀢𑀧𑀸𑀧𑀥𑀫𑁆𑀫𑁄;

𑀦𑀺𑀳𑀼𑀁𑀳𑀼𑀗𑁆𑀓𑁄 𑀦𑀺𑀓𑁆𑀓𑀲𑀸𑀯𑁄 𑀬𑀢𑀢𑁆𑀢𑁄;

𑀯𑁂𑀤𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄;

𑀥𑀫𑁆𑀫𑁂𑀦 𑀲𑁄 𑀩𑁆𑀭𑀳𑁆𑀫𑀯𑀸𑀤𑀁 𑀯𑀤𑁂𑀬𑁆𑀬;

𑀬𑀲𑁆𑀲𑀼𑀲𑁆𑀲𑀤𑀸 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂’’𑀢𑀺.

𑀅𑀚𑀧𑀸𑀮𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀼𑀘𑀮𑀺𑀦𑁆𑀤𑀓𑀣𑀸

𑁫. [𑀉𑀤𑀸. 𑁧𑁧] 𑀅𑀣 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑀸 𑀬𑁂𑀦 𑀫𑀼𑀘𑀮𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀼𑀘𑀮𑀺𑀦𑁆𑀤𑀫𑀽𑀮𑁂 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀳𑀸 𑀅𑀓𑀸𑀮𑀫𑁂𑀖𑁄 𑀉𑀤𑀧𑀸𑀤𑀺, 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸 𑀲𑀻𑀢𑀯𑀸𑀢𑀤𑀼𑀤𑁆𑀤𑀺𑀦𑀻. 𑀅𑀣 𑀔𑁄 𑀫𑀼𑀘𑀮𑀺𑀦𑁆𑀤𑁄 𑀦𑀸𑀕𑀭𑀸𑀚𑀸 𑀲𑀓𑀪𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺𑀫𑀼𑀤𑁆𑀥𑀦𑀺 𑀫𑀳𑀦𑁆𑀢𑀁 𑀨𑀡𑀁 𑀓𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺 𑁋 ‘‘𑀫𑀸 𑀪𑀕𑀯𑀦𑁆𑀢𑀁 𑀲𑀻𑀢𑀁, 𑀫𑀸 𑀪𑀕𑀯𑀦𑁆𑀢𑀁 𑀉𑀡𑁆𑀳𑀁, 𑀫𑀸 𑀪𑀕𑀯𑀦𑁆𑀢𑀁 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁄’’𑀢𑀺 […𑀲𑀺𑀭𑀺𑀁 𑀲𑀧… (𑀲𑀻. 𑀲𑁆𑀬𑀸. 𑀓𑀁.)]. 𑀅𑀣 𑀔𑁄 𑀫𑀼𑀘𑀮𑀺𑀦𑁆𑀤𑁄 𑀦𑀸𑀕𑀭𑀸𑀚𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀯𑀺𑀤𑁆𑀥𑀁 𑀯𑀺𑀕𑀢𑀯𑀮𑀸𑀳𑀓𑀁 𑀤𑁂𑀯𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀬𑀸 𑀪𑁄𑀕𑁂 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀲𑀓𑀯𑀡𑁆𑀡𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺 𑀧𑀜𑁆𑀚𑀮𑀺𑀓𑁄 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

[𑀓𑀣𑀸. 𑁩𑁩𑁮 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺]‘‘𑀲𑀼𑀔𑁄 𑀯𑀺𑀯𑁂𑀓𑁄 𑀢𑀼𑀝𑁆𑀞𑀲𑁆𑀲, 𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄;

𑀅𑀩𑁆𑀬𑀸𑀧𑀚𑁆𑀚𑀁 𑀲𑀼𑀔𑀁 𑀮𑁄𑀓𑁂, 𑀧𑀸𑀡𑀪𑀽𑀢𑁂𑀲𑀼 𑀲𑀁𑀬𑀫𑁄.

[𑀓𑀣𑀸. 𑁩𑁩𑁮 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺]‘‘𑀲𑀼𑀔𑀸 𑀯𑀺𑀭𑀸𑀕𑀢𑀸 𑀮𑁄𑀓𑁂, 𑀓𑀸𑀫𑀸𑀦𑀁 𑀲𑀫𑀢𑀺𑀓𑁆𑀓𑀫𑁄;

𑀅𑀲𑁆𑀫𑀺𑀫𑀸𑀦𑀲𑁆𑀲 𑀬𑁄 𑀯𑀺𑀦𑀬𑁄, 𑀏𑀢𑀁 𑀯𑁂 𑀧𑀭𑀫𑀁 𑀲𑀼𑀔’’𑀦𑁆𑀢𑀺.

𑀫𑀼𑀘𑀮𑀺𑀦𑁆𑀤𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁪. 𑀭𑀸𑀚𑀸𑀬𑀢𑀦𑀓𑀣𑀸

𑁬. 𑀅𑀣 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀼𑀘𑀮𑀺𑀦𑁆𑀤𑀫𑀽𑀮𑀸 𑀬𑁂𑀦 𑀭𑀸𑀚𑀸𑀬𑀢𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑁂 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀻. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑀧𑀼𑀲𑁆𑀲 [𑀢𑀧𑀲𑁆𑀲𑀼 (𑀲𑀻.)] 𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸 𑀉𑀓𑁆𑀓𑀮𑀸 𑀢𑀁 𑀤𑁂𑀲𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀣 𑀔𑁄 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀦𑀁 𑀯𑀸𑀡𑀺𑀚𑀸𑀦𑀁 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀤𑁂𑀯𑀢𑀸 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑁂 𑀯𑀸𑀡𑀺𑀚𑁂 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀫𑀸𑀭𑀺𑀲𑀸, 𑀪𑀕𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑁂 𑀯𑀺𑀳𑀭𑀢𑀺 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄; 𑀕𑀘𑁆𑀙𑀣 𑀢𑀁 𑀪𑀕𑀯𑀦𑁆𑀢𑀁 𑀫𑀦𑁆𑀣𑁂𑀦 𑀘 𑀫𑀥𑀼𑀧𑀺𑀡𑁆𑀟𑀺𑀓𑀸𑀬 𑀘 𑀧𑀢𑀺𑀫𑀸𑀦𑁂𑀣; 𑀢𑀁 𑀯𑁄 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀅𑀣 𑀔𑁄 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘, 𑀬𑀁 𑀅𑀫𑁆𑀳𑀸𑀓𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀢𑀣𑀸𑀕𑀢𑀸 𑀳𑀢𑁆𑀣𑁂𑀲𑀼 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀳𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀁 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘𑀸’’𑀢𑀺? 𑀅𑀣 𑀔𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀘𑀢𑀼𑀤𑁆𑀤𑀺𑀲𑀸 𑀘𑀢𑁆𑀢𑀸𑀭𑁄 𑀲𑁂𑀮𑀫𑀬𑁂 𑀧𑀢𑁆𑀢𑁂 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘𑀸’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀧𑀘𑁆𑀘𑀕𑁆𑀖𑁂 𑀲𑁂𑀮𑀫𑀬𑁂 𑀧𑀢𑁆𑀢𑁂 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘, 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺. 𑀅𑀣 𑀔𑁄 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀯𑀸𑀡𑀺𑀚𑀸 𑀪𑀕𑀯𑀦𑁆𑀢𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 (𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁) [( ) 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀏𑀢𑀤𑀯𑁄𑀘𑀼𑀁 𑁋 ‘‘𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘, 𑀉𑀧𑀸𑀲𑀓𑁂 𑀦𑁄 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺. 𑀢𑁂 𑀘 𑀮𑁄𑀓𑁂 𑀧𑀞𑀫𑀁 𑀉𑀧𑀸𑀲𑀓𑀸 𑀅𑀳𑁂𑀲𑀼𑀁 𑀤𑁆𑀯𑁂𑀯𑀸𑀘𑀺𑀓𑀸.

𑀭𑀸𑀚𑀸𑀬𑀢𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁫. 𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸

𑁭. [𑀅𑀬𑀁 𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸 𑀤𑀻. 𑀦𑀺. 𑁨.𑁬𑁪 𑀆𑀤𑀬𑁄; 𑀫. 𑀦𑀺. 𑁧.𑁨𑁮𑁧 𑀆𑀤𑀬𑁄; 𑀫. 𑀦𑀺. 𑁨.𑁩𑁩𑁬 𑀆𑀤𑀬𑁄; 𑀲𑀁. 𑀦𑀺. 𑁧.𑁧𑁭𑁨 𑀆𑀤𑀬𑁄] 𑀅𑀣 𑀔𑁄 𑀪𑀕𑀯𑀸 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀭𑀸𑀚𑀸𑀬𑀢𑀦𑀫𑀽𑀮𑀸 𑀬𑁂𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀯𑀺𑀳𑀭𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀬𑀭𑀸𑀫𑀸 𑀔𑁄 𑀧𑀦𑀸𑀬𑀁 𑀧𑀚𑀸 𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀆𑀮𑀬𑀭𑀸𑀫𑀸𑀬 𑀔𑁄 𑀧𑀦 𑀧𑀚𑀸𑀬 𑀆𑀮𑀬𑀭𑀢𑀸𑀬 𑀆𑀮𑀬𑀲𑀫𑁆𑀫𑀼𑀤𑀺𑀢𑀸𑀬 𑀤𑀼𑀤𑁆𑀤𑀲𑀁 𑀇𑀤𑀁 𑀞𑀸𑀦𑀁 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀅𑀘𑁆𑀘𑀲𑀫𑀼𑀧𑁆𑀧𑀸𑀤𑁄; 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀲𑀼𑀤𑀼𑀤𑁆𑀤𑀲𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼𑀁, 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’’𑀢𑀺. 𑀅𑀧𑀺𑀲𑁆𑀲𑀼 𑀪𑀕𑀯𑀦𑁆𑀢𑀁 𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀼 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑁋

‘‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼𑀁;

𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘‘𑀧𑀝𑀺𑀲𑁄𑀢𑀕𑀸𑀫𑀺𑀁 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸 [𑀆𑀯𑀝𑀸 (𑀲𑀻.)]’’𑀢𑀺.

𑀇𑀢𑀺𑀳 𑀪𑀕𑀯𑀢𑁄 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬.

𑁮. 𑀅𑀣 𑀔𑁄 𑀩𑁆𑀭𑀳𑁆𑀫𑀼𑀦𑁄 𑀲𑀳𑀫𑁆𑀧𑀢𑀺𑀲𑁆𑀲 𑀪𑀕𑀯𑀢𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀯𑀺𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑀲𑁆𑀲 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺 [𑀦𑀫𑀺𑀲𑁆𑀲𑀢𑀺 (?)], 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 𑀦𑀺𑀳𑀦𑁆𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀇𑀤𑀁 𑀯𑀢𑁆𑀯𑀸𑀦 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀧𑀸𑀢𑀼𑀭𑀳𑁄𑀲𑀺 𑀫𑀕𑀥𑁂𑀲𑀼 𑀧𑀼𑀩𑁆𑀩𑁂;

𑀥𑀫𑁆𑀫𑁄 𑀅𑀲𑀼𑀤𑁆𑀥𑁄 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄;

𑀅𑀧𑀸𑀧𑀼𑀭𑁂𑀢𑀁 [𑀅𑀯𑀸𑀧𑀼𑀭𑁂𑀢𑀁 (𑀲𑀻.)] 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁;

𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄;

𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥;

𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀦𑀢𑀫𑀧𑁂𑀢𑀲𑁄𑀓𑁄;

𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁.

‘‘𑀉𑀝𑁆𑀞𑁂𑀳𑀺 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫;

𑀲𑀢𑁆𑀣𑀯𑀸𑀳 𑀅𑀡𑀡 [𑀅𑀦𑀡 (𑀓.)] 𑀯𑀺𑀘𑀭 𑀮𑁄𑀓𑁂;

𑀤𑁂𑀲𑀲𑁆𑀲𑀼 [𑀤𑁂𑀲𑁂𑀢𑀼 (𑀓.)] 𑀪𑀕𑀯𑀸 𑀥𑀫𑁆𑀫𑀁;

𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.

[[ ] 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺, 𑀫𑀽𑀮𑀧𑀡𑁆𑀡𑀸𑀲𑀓𑁂𑀲𑀼 𑀧𑀸𑀲𑀭𑀸𑀲𑀺𑀲𑀼𑀢𑁆𑀣𑁂 𑀩𑁆𑀭𑀳𑁆𑀫𑀬𑀸𑀘𑀦𑀸 𑀲𑀓𑀺𑀁 𑀬𑁂𑀯 𑀆𑀕𑀢𑀸] [ 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀩𑁆𑀭𑀳𑁆𑀫𑀸𑀦𑀁 𑀲𑀳𑀫𑁆𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀩𑁆𑀭𑀳𑁆𑀫𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀬𑀭𑀸𑀫𑀸 𑀔𑁄 𑀧𑀦𑀸𑀬𑀁 𑀧𑀚𑀸 𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀆𑀮𑀬𑀭𑀸𑀫𑀸𑀬 𑀔𑁄 𑀧𑀦 𑀧𑀚𑀸𑀬 𑀆𑀮𑀬𑀭𑀢𑀸𑀬 𑀆𑀮𑀬𑀲𑀫𑁆𑀫𑀼𑀤𑀺𑀢𑀸𑀬 𑀤𑀼𑀤𑁆𑀤𑀲𑀁 𑀇𑀤𑀁 𑀞𑀸𑀦𑀁 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄; 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀲𑀼𑀤𑀼𑀤𑁆𑀤𑀲𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼𑀁, 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’𑀢𑀺. 𑀅𑀧𑀺𑀲𑁆𑀲𑀼 𑀫𑀁, 𑀩𑁆𑀭𑀳𑁆𑀫𑁂, 𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀼 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑁋

‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼𑀁;

𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘𑀧𑀝𑀺𑀲𑁄𑀢𑀕𑀸𑀫𑀺𑀁 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸’𑀢𑀺.

𑀇𑀢𑀺𑀳 𑀫𑁂, 𑀩𑁆𑀭𑀳𑁆𑀫𑁂, 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁; 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀇𑀤𑀁 𑀯𑀢𑁆𑀯𑀸𑀦 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀧𑀸𑀢𑀼𑀭𑀳𑁄𑀲𑀺 𑀫𑀕𑀥𑁂𑀲𑀼 𑀧𑀼𑀩𑁆𑀩𑁂;

𑀥𑀫𑁆𑀫𑁄 𑀅𑀲𑀼𑀤𑁆𑀥𑁄 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄;

𑀅𑀧𑀸𑀧𑀼𑀭𑁂𑀢𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁;

𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄;

𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥;

𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀦𑀢𑀫𑀧𑁂𑀢𑀲𑁄𑀓𑁄;

𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁.

‘‘𑀉𑀝𑁆𑀞𑁂𑀳𑀺 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫;

𑀲𑀢𑁆𑀣𑀯𑀸𑀳 𑀅𑀡𑀡 𑀯𑀺𑀘𑀭 𑀮𑁄𑀓𑁂;

𑀤𑁂𑀲𑀲𑁆𑀲𑀼 𑀪𑀕𑀯𑀸 𑀥𑀫𑁆𑀫𑀁;

𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀩𑁆𑀭𑀳𑁆𑀫𑀸𑀦𑀁 𑀲𑀳𑀫𑁆𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀫𑁆𑀧𑀺 𑀔𑁄, 𑀩𑁆𑀭𑀳𑁆𑀫𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀬𑀭𑀸𑀫𑀸 𑀔𑁄 𑀧𑀦𑀸𑀬𑀁 𑀧𑀚𑀸 𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀆𑀮𑀬𑀭𑀸𑀫𑀸𑀬 𑀔𑁄 𑀧𑀦 𑀧𑀚𑀸𑀬 𑀆𑀮𑀬𑀭𑀢𑀸𑀬 𑀆𑀮𑀬𑀲𑀫𑁆𑀫𑀼𑀤𑀺𑀢𑀸𑀬 𑀤𑀼𑀤𑁆𑀤𑀲𑀁 𑀇𑀤𑀁 𑀞𑀸𑀦𑀁 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄; 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀲𑀼𑀤𑀼𑀤𑁆𑀤𑀲𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼𑀁, 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’𑀢𑀺. 𑀅𑀧𑀺𑀲𑁆𑀲𑀼 𑀫𑀁, 𑀩𑁆𑀭𑀳𑁆𑀫𑁂, 𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀼 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑁋

‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼𑀁;

𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘𑀧𑀝𑀺𑀲𑁄𑀢𑀕𑀸𑀫𑀺𑀁 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸’𑀢𑀺.

𑀇𑀢𑀺𑀳 𑀫𑁂, 𑀩𑁆𑀭𑀳𑁆𑀫𑁂, 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺. 𑀇𑀤𑀫𑀯𑁄𑀘 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺, 𑀇𑀤𑀁 𑀯𑀢𑁆𑀯𑀸𑀦 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑁋

‘‘𑀧𑀸𑀢𑀼𑀭𑀳𑁄𑀲𑀺 𑀫𑀕𑀥𑁂𑀲𑀼 𑀧𑀼𑀩𑁆𑀩𑁂;

𑀥𑀫𑁆𑀫𑁄 𑀅𑀲𑀼𑀤𑁆𑀥𑁄 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄;

𑀅𑀧𑀸𑀧𑀼𑀭𑁂𑀢𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁;

𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀁.

‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄;

𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥;

𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼;

𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀦𑀢𑀫𑀧𑁂𑀢𑀲𑁄𑀓𑁄;

𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁.

‘‘𑀉𑀝𑁆𑀞𑁂𑀳𑀺 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫;

𑀲𑀢𑁆𑀣𑀯𑀸𑀳 𑀅𑀡𑀡 𑀯𑀺𑀘𑀭 𑀮𑁄𑀓𑁂;

𑀤𑁂𑀲𑀲𑁆𑀲𑀼 𑀪𑀕𑀯𑀸 𑀥𑀫𑁆𑀫𑀁;

𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺.

𑁯. 𑀅𑀣 𑀔𑁄 𑀪𑀕𑀯𑀸 𑀩𑁆𑀭𑀳𑁆𑀫𑀼𑀦𑁄 𑀘 𑀅𑀚𑁆𑀛𑁂𑀲𑀦𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀢𑁂𑀲𑀼 𑀘 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀲𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 [𑀤𑀲𑁆𑀲𑀸𑀯𑀺𑀦𑁄 (𑀲𑀻. 𑀲𑁆𑀬𑀸. 𑀓𑀁.)] 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀺 [𑀢𑀺𑀝𑁆𑀞𑀦𑁆𑀢𑀺 (𑀲𑀻. 𑀲𑁆𑀬𑀸.)] 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀉𑀤𑀓𑁂𑀦, 𑀏𑀯𑀫𑁂𑀯𑀁 𑀪𑀕𑀯𑀸 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂; 𑀤𑀺𑀲𑁆𑀯𑀸𑀦 𑀩𑁆𑀭𑀳𑁆𑀫𑀸𑀦𑀁 𑀲𑀳𑀫𑁆𑀧𑀢𑀺𑀁 𑀕𑀸𑀣𑀸𑀬 𑀧𑀘𑁆𑀘𑀪𑀸𑀲𑀺 𑁋

‘‘𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸;

𑀬𑁂 𑀲𑁄𑀢𑀯𑀦𑁆𑀢𑁄 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀁;

𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁;

𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’𑀢𑀺.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 ‘‘𑀓𑀢𑀸𑀯𑀓𑀸𑀲𑁄 𑀔𑁄𑀫𑁆𑀳𑀺 𑀪𑀕𑀯𑀢𑀸 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺.

𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀜𑁆𑀘𑀯𑀕𑁆𑀕𑀺𑀬𑀓𑀣𑀸

𑁧𑁦. [𑀫. 𑀦𑀺. 𑁧.𑁨𑁮𑁪 𑀆𑀤𑀬𑁄; 𑀫. 𑀦𑀺. 𑁨.𑁩𑁩𑁯 𑀆𑀤𑀬𑁄] 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁? 𑀓𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑁄; 𑀬𑀁𑀦𑀽𑀦𑀸𑀳𑀁 𑀆𑀴𑀸𑀭𑀲𑁆𑀲 𑀓𑀸𑀮𑀸𑀫𑀲𑁆𑀲 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀲𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀅𑀦𑁆𑀢𑀭𑀳𑀺𑀢𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 𑁋 ‘‘𑀲𑀢𑁆𑀢𑀸𑀳𑀓𑀸𑀮𑀗𑁆𑀓𑀢𑁄, 𑀪𑀦𑁆𑀢𑁂, 𑀆𑀴𑀸𑀭𑁄 𑀓𑀸𑀮𑀸𑀫𑁄’’𑀢𑀺. 𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀺 𑁋 ‘‘𑀲𑀢𑁆𑀢𑀸𑀳𑀓𑀸𑀮𑀗𑁆𑀓𑀢𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀸𑀚𑀸𑀦𑀺𑀬𑁄 𑀔𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄; 𑀲𑀘𑁂 𑀳𑀺 𑀲𑁄 𑀇𑀫𑀁 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑁂𑀬𑁆𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁? 𑀓𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀉𑀤𑀓𑁄 [𑀉𑀤𑁆𑀤𑀓𑁄 (𑀲𑀻. 𑀲𑁆𑀬𑀸.)] 𑀭𑀸𑀫𑀧𑀼𑀢𑁆𑀢𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑁄; 𑀬𑀁𑀦𑀽𑀦𑀸𑀳𑀁 𑀉𑀤𑀓𑀲𑁆𑀲 𑀭𑀸𑀫𑀧𑀼𑀢𑁆𑀢𑀲𑁆𑀲 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀲𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀅𑀦𑁆𑀢𑀭𑀳𑀺𑀢𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 𑁋 ‘‘𑀅𑀪𑀺𑀤𑁄𑀲𑀓𑀸𑀮𑀗𑁆𑀓𑀢𑁄, 𑀪𑀦𑁆𑀢𑁂, 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄’’𑀢𑀺. 𑀪𑀕𑀯𑀢𑁄𑀧𑀺 𑀔𑁄 𑀜𑀸𑀡𑀁 𑀉𑀤𑀧𑀸𑀤𑀺 𑁋 ‘‘𑀅𑀪𑀺𑀤𑁄𑀲𑀓𑀸𑀮𑀗𑁆𑀓𑀢𑁄 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄’’𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀫𑀳𑀸𑀚𑀸𑀦𑀺𑀬𑁄 𑀔𑁄 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄; 𑀲𑀘𑁂 𑀳𑀺 𑀲𑁄 𑀇𑀫𑀁 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑁂𑀬𑁆𑀬𑀸’’𑀢𑀺

𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁? 𑀓𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺? 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀩𑀳𑀼𑀓𑀸𑀭𑀸 𑀔𑁄 𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽, 𑀬𑁂 𑀫𑀁 𑀧𑀥𑀸𑀦𑀧𑀳𑀺𑀢𑀢𑁆𑀢𑀁 𑀉𑀧𑀝𑁆𑀞𑀳𑀺𑀁𑀲𑀼; 𑀬𑀁𑀦𑀽𑀦𑀸𑀳𑀁 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀓𑀳𑀁 𑀦𑀼 𑀔𑁄 𑀏𑀢𑀭𑀳𑀺 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀻’’𑀢𑀺? 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀩𑀸𑀭𑀸𑀡𑀲𑀺𑀬𑀁 𑀯𑀺𑀳𑀭𑀦𑁆𑀢𑁂 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀬𑁂𑀦 𑀩𑀸𑀭𑀸𑀡𑀲𑀻 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺.

𑁧𑁧. 𑀅𑀤𑁆𑀤𑀲𑀸 𑀔𑁄 𑀉𑀧𑀓𑁄 𑀆𑀚𑀻𑀯𑀓𑁄 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀁, 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀢𑁂, 𑀆𑀯𑀼𑀲𑁄, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀓𑀁𑀲𑀺 𑀢𑁆𑀯𑀁, 𑀆𑀯𑀼𑀲𑁄, 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄? 𑀓𑁄 𑀯𑀸 𑀢𑁂 𑀲𑀢𑁆𑀣𑀸? 𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀉𑀧𑀓𑀁 𑀆𑀚𑀻𑀯𑀓𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

[𑀥. 𑀧. 𑁩𑁫𑁩; 𑀓𑀣𑀸. 𑁪𑁦𑁫] ‘‘𑀲𑀩𑁆𑀩𑀸𑀪𑀺𑀪𑀽 𑀲𑀩𑁆𑀩𑀯𑀺𑀤𑀽𑀳𑀫𑀲𑁆𑀫𑀺,

𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀽𑀧𑀮𑀺𑀢𑁆𑀢𑁄;

𑀲𑀩𑁆𑀩𑀜𑁆𑀚𑀳𑁄 𑀢𑀡𑁆𑀳𑀸𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑁄,

𑀲𑀬𑀁 𑀅𑀪𑀺𑀜𑁆𑀜𑀸𑀬 𑀓𑀫𑀼𑀤𑁆𑀤𑀺𑀲𑁂𑀬𑁆𑀬𑀁.

[𑀫𑀺. 𑀧. 𑁪.𑁫.𑁧𑁧 𑀫𑀺𑀮𑀺𑀦𑁆𑀤𑀧𑀜𑁆𑀳𑁂𑀧𑀺; 𑀓𑀣𑀸. 𑁪𑁦𑁫] ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄.

[𑀓𑀣𑀸. 𑁪𑁦𑁫 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺] ‘‘𑀅𑀳𑀜𑁆𑀳𑀺 𑀅𑀭𑀳𑀸 𑀮𑁄𑀓𑁂, 𑀅𑀳𑀁 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄.

[𑀓𑀣𑀸. 𑁪𑁦𑁫 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺]‘‘𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀼𑀁, 𑀕𑀘𑁆𑀙𑀸𑀫𑀺 𑀓𑀸𑀲𑀺𑀦𑀁 𑀧𑀼𑀭𑀁;

𑀅𑀦𑁆𑀥𑀻𑀪𑀽𑀢𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀆𑀳𑀜𑁆𑀙𑀁 [𑀆𑀳𑀜𑁆𑀜𑀺𑀁 (𑀓.)] 𑀅𑀫𑀢𑀤𑀼𑀦𑁆𑀤𑀼𑀪𑀺’’𑀦𑁆𑀢𑀺.

𑀬𑀣𑀸 𑀔𑁄 𑀢𑁆𑀯𑀁, 𑀆𑀯𑀼𑀲𑁄, 𑀧𑀝𑀺𑀚𑀸𑀦𑀸𑀲𑀺, 𑀅𑀭𑀳𑀲𑀺 𑀅𑀦𑀦𑁆𑀢𑀚𑀺𑀦𑁄𑀢𑀺.

[𑀓𑀣𑀸. 𑁪𑁦𑁫 𑀓𑀣𑀸𑀯𑀢𑁆𑀣𑀼𑀧𑀸𑀴𑀺𑀬𑀫𑁆𑀧𑀺] ‘‘𑀫𑀸𑀤𑀺𑀲𑀸 𑀯𑁂 𑀚𑀺𑀦𑀸 𑀳𑁄𑀦𑁆𑀢𑀺, 𑀬𑁂 𑀧𑀢𑁆𑀢𑀸 𑀆𑀲𑀯𑀓𑁆𑀔𑀬𑀁;

𑀚𑀺𑀢𑀸 𑀫𑁂 𑀧𑀸𑀧𑀓𑀸 𑀥𑀫𑁆𑀫𑀸, 𑀢𑀲𑁆𑀫𑀸𑀳𑀫𑀼𑀧𑀓 [𑀢𑀲𑁆𑀫𑀸𑀳𑀫𑀼𑀧𑀓𑀸 (𑀲𑀻.)] 𑀚𑀺𑀦𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀉𑀧𑀓𑁄 𑀆𑀚𑀻𑀯𑀓𑁄 𑀳𑀼𑀧𑁂𑀬𑁆𑀬𑀧𑀸𑀯𑀼𑀲𑁄𑀢𑀺 [𑀳𑀼𑀯𑁂𑀬𑁆𑀬𑀧𑀸𑀯𑀼𑀲𑁄 (𑀲𑀻.) 𑀳𑀼𑀯𑁂𑀬𑁆𑀬𑀸𑀯𑀼𑀲𑁄 (𑀲𑁆𑀬𑀸.)] 𑀯𑀢𑁆𑀯𑀸 𑀲𑀻𑀲𑀁 𑀑𑀓𑀫𑁆𑀧𑁂𑀢𑁆𑀯𑀸 𑀉𑀫𑁆𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁧𑁨. 𑀅𑀣 𑀔𑁄 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀩𑀸𑀭𑀸𑀡𑀲𑀻 𑀇𑀲𑀺𑀧𑀢𑀦𑀁 𑀫𑀺𑀕𑀤𑀸𑀬𑁄, 𑀬𑁂𑀦 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀁𑀲𑀼 𑀔𑁄 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀅𑀜𑁆𑀜𑀫𑀜𑁆𑀜𑀁 𑀓𑀢𑀺𑀓𑀁 [𑀇𑀤𑀁 𑀧𑀤𑀁 𑀓𑁂𑀲𑀼𑀘𑀺 𑀦𑀢𑁆𑀣𑀺] 𑀲𑀡𑁆𑀞𑀧𑁂𑀲𑀼𑀁 𑁋 ‘‘𑀅𑀬𑀁, 𑀆𑀯𑀼𑀲𑁄, 𑀲𑀫𑀡𑁄 𑀕𑁄𑀢𑀫𑁄 𑀆𑀕𑀘𑁆𑀙𑀢𑀺, 𑀩𑀸𑀳𑀼𑀮𑁆𑀮𑀺𑀓𑁄 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬. 𑀲𑁄 𑀦𑁂𑀯 𑀅𑀪𑀺𑀯𑀸𑀤𑁂𑀢𑀩𑁆𑀩𑁄, 𑀦 𑀧𑀘𑁆𑀘𑀼𑀝𑁆𑀞𑀸𑀢𑀩𑁆𑀩𑁄, 𑀦𑀸𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁; 𑀅𑀧𑀺 𑀘 𑀔𑁄 𑀆𑀲𑀦𑀁 𑀞𑀧𑁂𑀢𑀩𑁆𑀩𑀁, 𑀲𑀘𑁂 𑀲𑁄 𑀆𑀓𑀗𑁆𑀔𑀺𑀲𑁆𑀲𑀢𑀺 𑀦𑀺𑀲𑀻𑀤𑀺𑀲𑁆𑀲𑀢𑀻’’𑀢𑀺. 𑀬𑀣𑀸 𑀬𑀣𑀸 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀢𑀺, 𑀢𑀣𑀸 𑀢𑀣𑀸 [𑀢𑀣𑀸 𑀢𑀣𑀸 𑀢𑁂 (𑀲𑀻. 𑀲𑁆𑀬𑀸.)] 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀦𑀸𑀲𑀓𑁆𑀔𑀺𑀁𑀲𑀼 𑀲𑀓𑀸𑀬 𑀓𑀢𑀺𑀓𑀸𑀬 𑀲𑀡𑁆𑀞𑀸𑀢𑀼𑀁. 𑀅𑀲𑀡𑁆𑀞𑀳𑀦𑁆𑀢𑀸 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀏𑀓𑁄 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀲𑀺, 𑀏𑀓𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺, 𑀏𑀓𑁄 𑀧𑀸𑀤𑁄𑀤𑀓𑀁, 𑀏𑀓𑁄 𑀧𑀸𑀤𑀧𑀻𑀞𑀁, 𑀏𑀓𑁄 𑀧𑀸𑀤𑀓𑀞𑀮𑀺𑀓𑀁 𑀉𑀧𑀦𑀺𑀓𑁆𑀔𑀺𑀧𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂; 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺. 𑀅𑀧𑀺𑀲𑁆𑀲𑀼 [𑀅𑀧𑀺 𑀘 𑀔𑁄 (𑀧𑀸𑀲𑀭𑀸𑀲𑀺𑀲𑀼𑀢𑁆𑀣)] 𑀪𑀕𑀯𑀦𑁆𑀢𑀁 𑀦𑀸𑀫𑁂𑀦 𑀘 𑀆𑀯𑀼𑀲𑁄𑀯𑀸𑀤𑁂𑀦 𑀘 𑀲𑀫𑀼𑀤𑀸𑀘𑀭𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀫𑀸, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀁 𑀦𑀸𑀫𑁂𑀦 𑀘 𑀆𑀯𑀼𑀲𑁄𑀯𑀸𑀤𑁂𑀦 𑀘 𑀲𑀫𑀼𑀤𑀸𑀘𑀭𑀣 [𑀲𑀫𑀼𑀤𑀸𑀘𑀭𑀺𑀢𑁆𑀣 (𑀲𑀻. 𑀲𑁆𑀬𑀸.)]. 𑀅𑀭𑀳𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀑𑀤𑀳𑀣, 𑀪𑀺𑀓𑁆𑀔𑀯𑁂, 𑀲𑁄𑀢𑀁, 𑀅𑀫𑀢𑀫𑀥𑀺𑀕𑀢𑀁, 𑀅𑀳𑀫𑀦𑀼𑀲𑀸𑀲𑀸𑀫𑀺, 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 [𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 (𑀲𑁆𑀬𑀸.)] 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑀸𑀬𑀧𑀺 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀕𑁄𑀢𑀫, 𑀇𑀭𑀺𑀬𑀸𑀬 [𑀘𑀭𑀺𑀬𑀸𑀬 (𑀲𑁆𑀬𑀸.)], 𑀢𑀸𑀬 𑀧𑀝𑀺𑀧𑀤𑀸𑀬, 𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀦𑁂𑀯𑀚𑁆𑀛𑀕𑀸 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 [𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 (𑀲𑁆𑀬𑀸. 𑀓.)] 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁, 𑀓𑀺𑀁 𑀧𑀦 𑀢𑁆𑀯𑀁 𑀏𑀢𑀭𑀳𑀺, 𑀩𑀸𑀳𑀼𑀮𑁆𑀮𑀺𑀓𑁄 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬, 𑀅𑀥𑀺𑀕𑀫𑀺𑀲𑁆𑀲𑀲𑀺 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲’’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀩𑀸𑀳𑀼𑀮𑁆𑀮𑀺𑀓𑁄, 𑀦 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄, 𑀦 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬; 𑀅𑀭𑀳𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀑𑀤𑀳𑀣, 𑀪𑀺𑀓𑁆𑀔𑀯𑁂, 𑀲𑁄𑀢𑀁, 𑀅𑀫𑀢𑀫𑀥𑀺𑀕𑀢𑀁, 𑀅𑀳𑀫𑀦𑀼𑀲𑀸𑀲𑀸𑀫𑀺, 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁…𑀧𑁂…. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘…𑀧𑁂…. 𑀢𑀢𑀺𑀬𑀫𑁆𑀧𑀺 𑀔𑁄 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀢𑀸𑀬𑀧𑀺 𑀔𑁄 𑀢𑁆𑀯𑀁, 𑀆𑀯𑀼𑀲𑁄 𑀕𑁄𑀢𑀫, 𑀇𑀭𑀺𑀬𑀸𑀬, 𑀢𑀸𑀬 𑀧𑀝𑀺𑀧𑀤𑀸𑀬, 𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀦𑁂𑀯𑀚𑁆𑀛𑀕𑀸 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁, 𑀓𑀺𑀁 𑀧𑀦 𑀢𑁆𑀯𑀁 𑀏𑀢𑀭𑀳𑀺, 𑀩𑀸𑀳𑀼𑀮𑁆𑀮𑀺𑀓𑁄 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬, 𑀅𑀥𑀺𑀕𑀫𑀺𑀲𑁆𑀲𑀲𑀺 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲’’𑀦𑁆𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀚𑀸𑀦𑀸𑀣 𑀫𑁂 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀧𑀪𑀸𑀯𑀺𑀢𑀫𑁂𑀢’’𑀦𑁆𑀢𑀺 [𑀪𑀸𑀲𑀺𑀢𑀫𑁂𑀢𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓.) 𑀝𑀻𑀓𑀸𑀬𑁄 𑀑𑀮𑁄𑀓𑁂𑀢𑀩𑁆𑀩𑀸]? ‘‘𑀦𑁄𑀳𑁂𑀢𑀁, 𑀪𑀦𑁆𑀢𑁂’’. 𑀅𑀭𑀳𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀑𑀤𑀳𑀣, 𑀪𑀺𑀓𑁆𑀔𑀯𑁂, 𑀲𑁄𑀢𑀁, 𑀅𑀫𑀢𑀫𑀥𑀺𑀕𑀢𑀁, 𑀅𑀳𑀫𑀦𑀼𑀲𑀸𑀲𑀸𑀫𑀺, 𑀅𑀳𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑀸 𑀦𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺 𑀢𑀤𑀦𑀼𑀢𑁆𑀢𑀭𑀁𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸𑀢𑀺. 𑀅𑀲𑀓𑁆𑀔𑀺 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑀼𑀁. 𑀅𑀣 𑀔𑁄 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀲𑀼𑀲𑁆𑀲𑀽𑀲𑀺𑀁𑀲𑀼, 𑀲𑁄𑀢𑀁 𑀑𑀤𑀳𑀺𑀁𑀲𑀼, 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀲𑀼𑀁.

𑁧𑁩. 𑀅𑀣 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘[𑀲𑀁. 𑀦𑀺. 𑁫.𑁧𑁦𑁮𑁧 𑀆𑀤𑀬𑁄] 𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸. 𑀓𑀢𑀫𑁂 𑀤𑁆𑀯𑁂 [𑀇𑀤𑀁 𑀧𑀤𑀤𑁆𑀯𑀬𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺]? 𑀬𑁄 𑀘𑀸𑀬𑀁 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀳𑀻𑀦𑁄 𑀕𑀫𑁆𑀫𑁄 𑀧𑁄𑀣𑀼𑀚𑁆𑀚𑀦𑀺𑀓𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀬𑁄 𑀘𑀸𑀬𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀤𑀼𑀓𑁆𑀔𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄. 𑀏𑀢𑁂 𑀔𑁄, 𑀪𑀺𑀓𑁆𑀔𑀯𑁂, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑀸 𑀘 𑀲𑀸, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄 𑀲𑀸, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸, 𑀘𑀓𑁆𑀔𑀼𑀓𑀭𑀡𑀻 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

𑁧𑁪. ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁. 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀩𑁆𑀬𑀸𑀥𑀺𑀧𑀺 𑀤𑀼𑀓𑁆𑀔𑁄, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀲𑀁𑀔𑀺𑀢𑁆𑀢𑁂𑀦, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 [𑀧𑀜𑁆𑀘𑀼𑀧𑀸𑀤𑀸𑀦𑀔𑀦𑁆𑀥𑀸𑀧𑀺 (𑀓)] 𑀤𑀼𑀓𑁆𑀔𑀸. ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀏𑀢𑁆𑀣 ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀆𑀤𑀻𑀲𑀼 𑀤𑀼𑀓𑁆𑀔𑀲𑀫𑀼𑀤𑀬𑁄 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀯𑀢𑁆𑀢𑀩𑁆𑀩𑁂 𑀤𑀼𑀓𑁆𑀔𑀲𑀫𑀼𑀤𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀢𑀢𑁄’’𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 𑀧𑀦 𑀉𑀧𑁆𑀧𑀸𑀤𑁄 𑀪𑀬𑀦𑁆𑀢𑀺𑀧𑀸𑀞𑀯𑀡𑁆𑀡𑀦𑀸𑀬𑀁 ‘‘𑀲𑀢𑀺𑀧𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂 𑀮𑀺𑀗𑁆𑀕𑀪𑁂𑀤𑁄 𑀕𑀳𑀺𑀢𑁄, 𑀬𑀣𑀸 𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀼 𑀤𑀼𑀓𑁆𑀔𑀲𑀫𑀼𑀤𑀬𑁄 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀲𑀓𑀮𑀺𑀗𑁆𑀕𑀺𑀓𑀧𑀸𑀞𑁄 ‘‘𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺 𑀧𑀸𑀴𑀺𑀬𑀸 𑀲𑀫𑁂𑀢𑀺.] 𑀅𑀭𑀺𑀬𑀲𑀘𑁆𑀘𑀁 𑁋 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 [𑀧𑁄𑀦𑁄𑀪𑀯𑀺𑀓𑀸 (𑀓.)] 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸 [𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸 (𑀲𑀻. 𑀲𑁆𑀬𑀸.)] 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸, 𑀪𑀯𑀢𑀡𑁆𑀳𑀸, 𑀯𑀺𑀪𑀯𑀢𑀡𑁆𑀳𑀸.

‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 𑁋 𑀬𑁄 𑀢𑀲𑁆𑀲𑀸 𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄, 𑀘𑀸𑀕𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑁄, 𑀫𑀼𑀢𑁆𑀢𑀺, 𑀅𑀦𑀸𑀮𑀬𑁄. ‘‘𑀇𑀤𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑁋 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺.

𑁧𑁫. ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀇𑀤𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁 𑀧𑀳𑀸𑀢𑀩𑁆𑀩𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁 𑀧𑀳𑀻𑀦𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀇𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 𑀲𑀘𑁆𑀙𑀺𑀓𑀸𑀢𑀩𑁆𑀩𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁 𑀲𑀘𑁆𑀙𑀺𑀓𑀢𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

‘‘𑀇𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀪𑀸𑀯𑁂𑀢𑀩𑁆𑀩𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀪𑀸𑀯𑀺𑀢𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑁧𑁬. ‘‘𑀬𑀸𑀯𑀓𑀻𑀯𑀜𑁆𑀘 𑀫𑁂, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀼 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀏𑀯𑀁 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀬𑀣𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀁 𑀦 𑀲𑀼𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺, 𑀦𑁂𑀯 𑀢𑀸𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀬𑀢𑁄 𑀘 𑀔𑁄 𑀫𑁂, 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀼 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀏𑀯𑀁 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀬𑀣𑀸𑀪𑀽𑀢𑀁 𑀜𑀸𑀡𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺, 𑀅𑀣𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 [𑀅𑀪𑀺𑀲𑀫𑁆𑀩𑀼𑀤𑁆𑀥𑁄 (𑀲𑀻. 𑀲𑁆𑀬𑀸.)] 𑀧𑀘𑁆𑀘𑀜𑁆𑀜𑀸𑀲𑀺𑀁. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 𑁋 𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸 𑀅𑀢𑁆𑀢𑀫𑀦𑀸 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺 [𑀇𑀤𑀫𑀯𑁄𑀘…𑀧𑁂… 𑀅𑀪𑀺𑀦𑀦𑁆𑀤𑀼𑀦𑁆𑀢𑀺𑀯𑀸𑀓𑁆𑀬𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺].

𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀆𑀬𑀲𑁆𑀫𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑁧𑁭. 𑀧𑀯𑀢𑁆𑀢𑀺𑀢𑁂 𑀘 𑀧𑀦 𑀪𑀕𑀯𑀢𑀸 𑀥𑀫𑁆𑀫𑀘𑀓𑁆𑀓𑁂, 𑀪𑀼𑀫𑁆𑀫𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘‘𑀏𑀢𑀁 𑀪𑀕𑀯𑀢𑀸 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁, 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁…𑀧𑁂… 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸…𑀧𑁂… 𑀬𑀸𑀫𑀸 𑀤𑁂𑀯𑀸…𑀧𑁂… 𑀢𑀼𑀲𑀺𑀢𑀸 𑀤𑁂𑀯𑀸…𑀧𑁂… 𑀦𑀺𑀫𑁆𑀫𑀸𑀦𑀭𑀢𑀻 𑀤𑁂𑀯𑀸…𑀧𑁂… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑀸…𑀧𑁂… 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘‘𑀏𑀢𑀁 𑀪𑀕𑀯𑀢𑀸 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀇𑀢𑀺𑀳, 𑀢𑁂𑀦 𑀔𑀡𑁂𑀦, 𑀢𑁂𑀦 𑀮𑀬𑁂𑀦 [𑀢𑁂𑀦 𑀮𑀬𑁂𑀦𑀸𑀢𑀺 𑀧𑀤𑀤𑁆𑀯𑀬𑀁 𑀲𑀻. 𑀲𑁆𑀬𑀸. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀢𑁂𑀦 𑀫𑀼𑀳𑀼𑀢𑁆𑀢𑁂𑀦 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺. 𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀁𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺; 𑀅𑀧𑁆𑀧𑀫𑀸𑀡𑁄 𑀘 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀭𑀳𑁄𑀲𑀺, 𑀅𑀢𑀺𑀓𑁆𑀓𑀫𑁆𑀫 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀣 𑀔𑁄 𑀪𑀕𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀅𑀜𑁆𑀜𑀸𑀲𑀺 𑀯𑀢, 𑀪𑁄 𑀓𑁄𑀡𑁆𑀟𑀜𑁆𑀜𑁄, 𑀅𑀜𑁆𑀜𑀸𑀲𑀺 𑀯𑀢 𑀪𑁄 𑀓𑁄𑀡𑁆𑀟𑀜𑁆𑀜𑁄’’𑀢𑀺. 𑀇𑀢𑀺 𑀳𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀡𑁆𑀟𑀜𑁆𑀜𑀲𑁆𑀲 ‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’ 𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺.

𑁧𑁮. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀳𑀺 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑁧𑁯. 𑀅𑀣 𑀔𑁄 𑀪𑀕𑀯𑀸 𑀢𑀤𑀯𑀲𑁂𑀲𑁂 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀘 𑀯𑀧𑁆𑀧𑀲𑁆𑀲 𑀆𑀬𑀲𑁆𑀫𑀢𑁄 𑀘 𑀪𑀤𑁆𑀤𑀺𑀬𑀲𑁆𑀲 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺𑀬𑀫𑀸𑀦𑀸𑀦𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺.

𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑀅𑀣 𑀔𑁄 𑀪𑀕𑀯𑀸 𑀢𑀤𑀯𑀲𑁂𑀲𑁂 𑀪𑀺𑀓𑁆𑀔𑀽 𑀦𑀻𑀳𑀸𑀭𑀪𑀢𑁆𑀢𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺 𑀅𑀦𑀼𑀲𑀸𑀲𑀺. 𑀬𑀁 𑀢𑀬𑁄 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀆𑀳𑀭𑀦𑁆𑀢𑀺, 𑀢𑁂𑀦 𑀙𑀩𑁆𑀩𑀕𑁆𑀕𑁄 𑀬𑀸𑀧𑁂𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀘 𑀫𑀳𑀸𑀦𑀸𑀫𑀲𑁆𑀲 𑀆𑀬𑀲𑁆𑀫𑀢𑁄 𑀘 𑀅𑀲𑁆𑀲𑀚𑀺𑀲𑁆𑀲 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀑𑀯𑀤𑀺𑀬𑀫𑀸𑀦𑀸𑀦𑀁 𑀅𑀦𑀼𑀲𑀸𑀲𑀺𑀬𑀫𑀸𑀦𑀸𑀦𑀁 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺. 𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀏𑀣 𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀅𑀯𑁄𑀘 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀘𑀭𑀣 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀸𑀯 𑀢𑁂𑀲𑀁 𑀆𑀬𑀲𑁆𑀫𑀦𑁆𑀢𑀸𑀦𑀁 𑀉𑀧𑀲𑀫𑁆𑀧𑀤𑀸 𑀅𑀳𑁄𑀲𑀺.

𑁨𑁦. 𑀅𑀣 𑀔𑁄 𑀪𑀕𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

[𑀲𑀁. 𑀦𑀺. 𑁩.𑁫𑁯 𑀆𑀤𑀬𑁄] ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸. 𑀭𑀽𑀧𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀭𑀽𑀧𑁂 𑁋 ‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀭𑀽𑀧𑁂 𑁋 ‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’𑀢𑀺. 𑀯𑁂𑀤𑀦𑀸, 𑀅𑀦𑀢𑁆𑀢𑀸. 𑀯𑁂𑀤𑀦𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀯𑁂𑀤𑀦𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀯𑁂𑀤𑀦𑀸𑀬 𑁋 ‘𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀼, 𑀏𑀯𑀁 𑀫𑁂 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀯𑁂𑀤𑀦𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀯𑁂𑀤𑀦𑀸𑀬 𑁋 ‘𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀼, 𑀏𑀯𑀁 𑀫𑁂 𑀯𑁂𑀤𑀦𑀸 𑀫𑀸 𑀅𑀳𑁄𑀲𑀻’𑀢𑀺. 𑀲𑀜𑁆𑀜𑀸, 𑀅𑀦𑀢𑁆𑀢𑀸. 𑀲𑀜𑁆𑀜𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀲𑀜𑁆𑀜𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀲𑀜𑁆𑀜𑀸𑀬 𑁋 ‘𑀏𑀯𑀁 𑀫𑁂 𑀲𑀜𑁆𑀜𑀸 𑀳𑁄𑀢𑀼, 𑀏𑀯𑀁 𑀫𑁂 𑀲𑀜𑁆𑀜𑀸 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀜𑁆𑀜𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀲𑀜𑁆𑀜𑀸𑀬 𑁋 ‘𑀏𑀯𑀁 𑀫𑁂 𑀲𑀜𑁆𑀜𑀸 𑀳𑁄𑀢𑀼, 𑀏𑀯𑀁 𑀫𑁂 𑀲𑀜𑁆𑀜𑀸 𑀫𑀸 𑀅𑀳𑁄𑀲𑀻’𑀢𑀺. 𑀲𑀗𑁆𑀔𑀸𑀭𑀸, 𑀅𑀦𑀢𑁆𑀢𑀸. 𑀲𑀗𑁆𑀔𑀸𑀭𑀸 𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲𑀁𑀲𑀼, 𑀦𑀬𑀺𑀤𑀁 [𑀦𑀬𑀺𑀫𑁂 (𑀓.)] 𑀲𑀗𑁆𑀔𑀸𑀭𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀁, 𑀮𑀩𑁆𑀪𑁂𑀣 𑀘 𑀲𑀗𑁆𑀔𑀸𑀭𑁂𑀲𑀼 𑁋 ‘𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼, 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀫𑀸 𑀅𑀳𑁂𑀲𑀼’𑀦𑁆𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀲𑀗𑁆𑀔𑀸𑀭𑀸 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀦 𑀘 𑀮𑀩𑁆𑀪𑀢𑀺 𑀲𑀗𑁆𑀔𑀸𑀭𑁂𑀲𑀼 𑁋 ‘𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼, 𑀏𑀯𑀁 𑀫𑁂 𑀲𑀗𑁆𑀔𑀸𑀭𑀸 𑀫𑀸 𑀅𑀳𑁂𑀲𑀼’𑀦𑁆𑀢𑀺. 𑀯𑀺𑀜𑁆𑀜𑀸𑀡𑀁, 𑀅𑀦𑀢𑁆𑀢𑀸. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀯𑀺𑀜𑁆𑀜𑀸𑀡𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀯𑀺𑀜𑁆𑀜𑀸𑀡𑁂 𑁋 ‘𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀳𑁄𑀢𑀼, 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀯𑀺𑀜𑁆𑀜𑀸𑀡𑁂 𑁋 ‘𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀳𑁄𑀢𑀼, 𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’𑀢𑀺.

𑁨𑁧. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺? 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀯𑁂𑀤𑀦𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸𑀢𑀺? 𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀲𑀜𑁆𑀜𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸𑀢𑀺? 𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸 𑀯𑀸 𑀅𑀦𑀺𑀘𑁆𑀘𑀸 𑀯𑀸𑀢𑀺? 𑀅𑀦𑀺𑀘𑁆𑀘𑀸, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺? 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂.